Su Ploaghe currit conca a sa Primu Categoria cun bomber Antonio Borrotzu

Gràtzias a is cincu bussinadas scutas a faci, pròpriu domìnigu passau, a cussus de su Duospedes, in s'ùrtima bessida, su Ploaghe arribat a corantacuatru gol in totu, cun is biancu-braus chi funt sa scuadra, in su girone cosa insoru, chi nd at fatu de prus: s'Audax Algherese, difatis, ndi tenit duus in mancu; su Sennori, su de duus in sa lista, tres in mancu. Is piciocus de mister Tore Porqueddu funt currendi sempri prus a forti: trintanoi puntus ballint po su primu postu, cun su Sennori chi perou abarrat apicigau a is pabas, cun feti unu puntu de mancu, e non tenit sa bidea de s'arrendi, a su mancu po imui, chistioi chi ballit puru po su Ittiri Sprint, artziau a trintases puntus a pustis de sa bìncida contras a sa San Paolo Apostolo de Tàttari.

A nai sa beridadi, Su Ploaghe est currendi diaici a forti gràtzias puru a Antonio Borrotzu, giai dexiotu gol fintzas a imui, unu chi su mundu de sa bòcia, in Sardìnnia, ddu connoscit cumenti is buciacas suas.
Nasciu, e cresciu, in Orane su dexi de su mesi de ladàmini de su milli e noicentus e setantotu, giogat de candu est unu pipiu. Cumenti a totus is piocheddus de s'edadi sua, at incumentzau a curri a vatu de sa bòcia in sa ruga, ma a pustis est arribau in sa scuadra de sa bidda cosa sua, sighiu de allenadoris bravus. Me is primus tempus giogat in difesa, poita fiat meda prus mannu de is attrus e arrannesciat a firmai a totus, ma issu bolliat giogai po fai gol. E difatis, candu ddu ant acuntentau, in sa scuadra de is Allievi, nd at fatu giai sessantacuatru. A pustis at giogau in su Tèmpiu, fintzas a sa Serie C. At giogau puru cun Messina, Castrovillari, Igea Virtus; in Serie D, sempri a foras de Sardìnnia, impari a Rutigliano, Calcio Flaminia e Terracina. In su duamilla e duus ndi torrat in domu, in Sardìnnia, cun Ilvamaddalena, La Palma de s'Alighera, torra cun cussu de su Tèmpiu, cuatru annus in su Tavolara, Seddori, Portu Turre, Budune, fintzas a is urtimas stòrias cun Atletico de Uri, Castiadas, Itiri Cannedu, Ossese, Istintinu, Codronzanu. In totus custus annus at fatu calincuna cosa cumenti 350 gol in totu e imoi est agiudendi su Ploaghe a ndi torrai a artziai in Primu Categoria.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020