E is scuadras de sa de Tres Categorias? Andaus a castiai cumenti funt postas is cosas me in su campionau prus pitichinninniu de totus

E duncas, seu atachendi a scriri is rigas chi ant a balli po s'artìculu chi nd'at a bessiri su bintunu de su mesi de Donniasantu candu seu arribbau a su catodixi; est a nai, duncas, ca seu atachendi a scriri po s'artìculu nou una cida ainnantis de candu nd'at a bessiri a pillu, e custu, po primu cosa, est poita mi intendu beni, est a nai ca no seu fadiau motu, cumenti apu sèmpiri intèndiu narai in Bidd'e Sorris, chi est sa bidda innoi seu nàsciu e pàsciu, cumenti si narat. 

E duncas, mi seu megau a solu a solu, immoi chi nci seu, immoi chi seu aranti de su tialu de computer, nd'aprofitu po mi ndi bogai de sa conca una pariga de chistionis (una pariga feti, a sa sarda ma peròu, e gei si cumprendit, ca candu nosu sardus naraus una pariga, no intendeus su numeru duus, cumenti benit a essi in italianu, ma iant a podi essi, duncas, mancai tres, o cuatru, o cincu puru, a segunda de cumenti si pigat, e megu a brullai, gei si cumprendit, berus est?) chi tèngiu giai badda badda in conca; e ddu sciu ca, a sa fini, no mi ia a depi permiti de mi strollicai (no mi ia a depi permiti de mi strollicai prus de su tanti, po ddu narai mellus puru) e no mi ia a depi permiti de arriscai de si ndi furai su tempus chi mancai nemmancu teneis, ca a s'acabbada de is giogus (m'est beniu de ddu narai diaici) mi ndi ia a depi arregodai, prus, mancai, de cussu chi fatzu giai, ca is artìculus chi ndi pesu, chi scriu in lingua sarda po immoi (e bai a circa cumenti ant a andai is cosas in su benidori, ca feti Deus e su Cielu sciint ita totu nd'at a essi de sa pobera vida mia, e deu creu ca sa chistioni ballat unu pagheddu po totus, e ballit puru, duncas, po bosatrus chi seis ligendi custu artìculu) ndi bessint aforas in unu giàssu (e ddu scieis beni) chi sighit is fainas de is scuadras sardas de bòcia de is diletantis; ma a sa fini, e si ddu apu arremonau giai una bella biga de bortas (e ddu fatzu po custa cida puru, ca no si sciit mai!), mi praxit custa cosa de nci stichiri in mesu (in mesu a is chistionis chi pertocant is partidas de càlciu) atras legas puru; e fatzu custu gioghiteddu (diaici mi benit de ddu tzerriai, a sa fini) siat po manigiai unu scantu de fueddus in prus de su chi ia a fai chi depessi abarrai innoi a chistionai feti de gol e de resultaus (e gei si cumprendit, est a nai, ca gei ddu cumprendeis a solus, ca chi depessi chistionai feti de partidas ia a manigiai feti, e sèmpiri, is proprius coranta-cincuanta fueddus); e duncas, mi praxit custa cosa de nci stichiri, po su chi fait, chentza de esagerai, duncas, calincunu de is strollichiminis, de is contus e de is contixeddus, chi mi benint in conca, dònnia cida. 

E duncas, atacu narendusì ca seu bèniu a sciri, pròpriu ariseu, ca unu piciocu giòvunu, prus giòvunu de mei de tres annus, chi biviàt innoi in Bidd'e Sorris etotu, est motu poita at tentu unu dannu a su coru; e duncas, eia, si iat a podi narai ca at tentu un infartu, cumenti si iat a podi narai a trassa de s'italianu etotu. 
E ddu sciu deu puru (ddu apu cumprendiu beni, e giai de meda puru, fadendi su contu ca m'agatu in custa terra, in custu mundu, de calincuna cosa cumenti a corantatres annus, antzis, a bolli essi prus pretzisus puru, tra una pariga de cidas ant a benni a essi corantacuatru) ca in dònnia segundu, e in dònnia parti de su mundu (est a nai, duncas, no feti innoi in bidda cosa mia, est craru) sa genti morit, e ballit po is prus matucus de edadi, ma ballit puru po is prus giòvuneddus; ca cumenti mi praxit a arrapiti (mi ddu arrapitu deu po primu, po incumentzai), furendindi is fueddus de cussu grandu filosofu tedescu chi si tzerriàt Martin Heidegger, unu pipiu chi est nasciu de pagu segundus, est bastanti bèciu po si morri. 

E duncas, megamu a si narai, ariseu a su merì apu scobertu ca custu piciocu, chi bidemmu sèmpiri in giru apitzus de sa machina cosa sua, in s'interis chi andàt me is campus a fai su trabballu cosa sua, chi fiat cussu de su massaju (cumenti capitat a medas personas chi bivint in bidda, fadendi su contu ca su trabballu me is campus, cun canciofas e trigus, est una de is fainas de importu prus manna tra totus cussas chi nci funt de sighiri, a su mancu innoi in su Campidanu de mesu), si nd'est bobau in su Cielu, cumenti si iat a podi narai (o, po ddu narai mellus, si iat a podi narai, sèmpiri po chini nci creit, est craru, ca s'anima cosa sua si nd'est bobada concas a su Cielu) poita su coru cosa sua at acabbau de tocheddai, cumenti si iat a podi narai (e cumenti m'at consillau su fueddariu). 

E duncas, sa primu cosa chi m'est benida in conca (e si dda intregu, isperendi ca su de ddu scriri, mancai innoi in custu artìculu, mi potzat agiudai a ndi bogai aforas totus is pentzamentus lègius chi mi intendu aintru de su coru e de sa conca puru) est ca su coru est una de is partis de su cropus cosa nosta (e chistionaus mescamente de is maschiteddus, poita, de su chi seu beniu a sciri ligendi unu pagheddeddu de informatzionis apitzus de sa chistioni, is femineddas, a su mancu ainnantis chi nd'arribbit sa menopausa, po una chistioni acapiada a is ormonis, arriscant meda, ma meda prus pagu, de su chi sucedit a is ominis, est craru, de si morri, de si cherpai po crupa de su coru chi si frimat, e duncas, po crupa de cussus chi tzerriaus infartus) chi sunfrit de prus; e po ddu cumprendi bastat a fai su contu de cantus ominis nci funt, in dì de oi puru (antzis, si iat a podi narai: mescamente in dì de oi), chi si morrint po mobadias, po dannus e po arroris acapiaus a su coru. 

E fortzis fortzis, m'est acucau in conca pròpriu ariseu a merì, candu fia chistionendu de custa cosa cun un amigu miu stiau meda (est issu, a narai sa beridadi, chi m'at intregau sa nova, poita deu, a su mancu, no ia cumprèndiu chini fessit su mortu) su coru si frimat, puru, poita seus arribbaus a unu puntu innoi no scieus prus bogai aforas is sentidus chi teneus, pròpriu, in su coru, prus ca in sa conca. E poberus nosus, mi benit de ddu narai diaici (a sa moda de is antigus) ca biveus in custu mundu macu meda, innoi su prexu nd'arribbat, mancai, a stiddius, cumenti si narat; unu stiddiu feti, unu stiddiu de amori dònnia tanti, e ita pentzais chi potzat bastai po sighiri a bivi custa vida chi, a bortas, est prena de trumentus (cumenti est prena de trumentus, de su restu, sa vida chi fatu fatu si tocat a si bivi, po murigai sa cosa a trassa de poeta); ca s'amori, si cumprendit, est a trassa de sa cosa de papai po su stogumu cosa nosta, e duncas, s'amori est su pani de s'anima, e de su coru, duncas, chi est unu de is partis de su cropu chi est acapiau de prus, de su chi narant, a su mancu, cun s'anima cosa nosta e cun is sentidus chi intendeus. 
E duncas, chentza de amori, deu creu chi siat tostada meda, ma meda (cumenti si narat in bidda) su de sighiri a andai ainnantis. 

E duncas, ddu scieis cumenti andant is cosas (e deu creu chi ddu scieis cantu se no de prus de mei puru): oi ses totu allirgu, o totu indaboriu po crupa de su trabballu, e mancai perdis su tempus avatu de centumilla tontesas, cumenti si capitat fatu fatu, e sa dì apustis ses bellu ca scarèsciu. E sa cosa prus bona, fortzis, de candu si frimmat su coru, est a nai de una dì a s'atra, est craru, est cussa ca no nci funt daboris fortis; est una morti chi ti mussiat drabessi (po giogai a fai unu pagheddeddu su poeta torra, isperendi chi si cumprendat su chi seu circhendi de si narai), eia, a s'imbressi, mancai, de su chi sucedit cun cussa chi is bècius (a su mancu in bidda mia) tzerriant "cudda mobadia", po no dda nomenai nemmancu, de cantu est lègia, maba e trumentosa, e de cantu dda timint no da tzerriant nemmancu cun su nomini cosa sua, cun su nomini chi tenit in italianu, e chi est "cancro". 

E duncas, potzu feti isperai chi s'anima de cussu poberu piciocu siat in Cielu e apat agatau sa paxi cosa sua, sa paxi chi, mancai, no est arrannèscia a agatai in custu mundu. E mi megu a solu a solu ca deu puru, cumenti a cussu poberu piciocheddu, bivu a solu, est a nai chentza de cumpangias, e de cumpangius, chentza de sposas o pobiddas, e po immoi andat beni diaici, fadendi su contu ca seu fadendi sa vida de bagadiu, cumenti si narat in Bidd'e Sorris, de calincuna cosa cumenti a otu annus, e seu cumprendendi chi siat unu pagheddeddu tostadatza, custa cosa de abarrai a solus po annus e annus, ma peròu si potzu narai ca sa mexina de s'anima mia mi nd'arribbat, mancai, de is animabis chi atobiu in sa bia, o chi benint a m'agatai innoi in domu: e ballit po is canis, po is pisitus, po is crucueus. E in prus, dòngiu a papai a su coru e a s'anima mia (diaici m'est bèniu de ddu narai) gràtzias a is paginas de is lìbbrus chi liggu, giai dònnia dònnia noti, ainnantis de mi dromiri (e in su fini de cida, candu tèngiu sa possibbilidadi de mi pasiai unu pagheddeddu de prus de su chi sucedit aintru de sa cida, is paginas chi arrannèsciu a ligi funt de prus puru), ca is libbrus (e is libbrus de sa filosofia, nc'aciungu deu, po su chi mi pertocat) funt una de is mexinas prus fortis, e prus bonas chi ddoi funt po s'anima cosa nosta. 

E candu, mancai, mi intendu unu pagheddeddu tristu (podit sucedi a totus, gei si cumprendit, e a mei capitat, mancai, mescamente, candu su tempus si fai malu, est malu), mi pòngiu me is manus de Deus, e domandu sa passièntzia po aguantai, po andai ainnantis in custa cosa maca meda chi mi parit (a bortas, a bortas feti, no sèmpiri, e megu a brullai) siat sa vida de s'omini in custu mundu totu ghetau a pari. E no m'apa a arrosci mai de ddu arripiti: ca oi nci seus, ma giai de cras, e no parit berus, e fortzis fait dannu a su coru feti a nci pentzai, estus a podi essi bellus ca scarèscius, cumenti si narat. E pròpriu po custu, sigu a mi megai a solu a solu, ca estus depi circai de bivi sa vida cosa nosta in sa manera mellus chi podeus, chentza de perdi tempus avatu de tontesas; e mi parit mi parit, invècias, ca sa moda (sa moda chi seus sighendi, e ballit pruschetotu po is personas prus arricas chi s'agatant in custu mundu, a partiri, duncas de totus is personas, is cristianus, si iat a podi narai diaici puru, a sa sorresa, chi bivint, chi s'agatant a bivi in sa parti prus arrica de s'Europa, o de s'America de su nord) est pròpriu cussa de preni is diis cosa nosta, de ddas preni fintzas a cucuru, de tontesas, fintzas a candu, duncas, no si scopiat su coru, cumenti si iat a podi narai. 

E duncas (e po oi dda serru diaici, chi mi parit diaderus bastanti), estus a depi circai de scanceriai su coru cosa nosta, s'anima nosta e duncas, sa fida etotu; estus a depi circai de si scanceriai unu pagheddeddu dònnia, dònnia dì, chentza de ndi sartai nemmancu una; e feti nosu podeus sciri cali funt is cosas chi si faint stai beni, de cussas chi si faint stai mali. Ca su giogu est pròpriu totu innoi (e a fueddus sa cosa parit facili meda, ma scieus ca no est diaici): cumprendi cali funt is cosas chi si faint beni, po diaderus, poita abortas perdeus is diis, su tempus (chi mancai nemmancu teneus) avatu de cosas chi si parit si fatzant beni, e invècias funt pròpriu cussas is cosas chi, mancai, si strupiant, e si bocint. Cumenti iat a podi essi, po nd'arremonai feti una, su de si preni sa brenti de cosa de papai fintzas a dda fai scopiai; e mancai si iat a podi parri una cosa toga meda, custu de podi papai fintzas a candu no ti scopias, fintzas a candu nci dda fais (e de su restu: "all you can eat", in ingresu, bollit narai, pròpriu, ca podis papai totu su chi bolis fintzas a candu sa cosa de papai ti capit in brenti; e bella giogada, mi parit, ma dda acabbu innoi), ma poi tocat a biri (iat a tocai a intendi, chi si praxit de prus cumenti sonat) ita ndi pentzat su restu de su corpus cosa nosta. Ca po unu golosu, sa cosa prus bona est su de donai prexus a sa lingua; e po donai prexus a sa lingua, gei si cumprendit, bastat pagu: est a nai ca bastat a si cravai in buca una surra de cosa de papai chi siat saborida meda, e su de benni a sciri chi una cosa est stètia coxinada in gràtzia de Deus, cumenti si iat a podi narai, est una cosa chi no importat giai giai a nemus; sa cosa de importu prus manna, duncas, est cussa de fai cuntenta sa lingua. Ma poi, apustis ca ti nci ghetas in su cropus, e duncas in brenti, giai giai s'impossibbili, cumenti si iat a podi narai, intzandus, apustis, si cumprendit, totu cussa cosa dda depis cabai, cumenti si narat, est a nai, inguti, e mescamente, pruschetotu, dda depis dizeriri, cumenti si narat; e est pròpriu ingunis ca ndi iant a podi arribbai is daboris (is daboris po sa brenti, po incumentzai); e est pròpriu candu nd'arribbant is daboris (e is daboris atumbant is mannus e is piticus, is giòvunus e is antzianus, is maschiteddus ma is femineddas puru, is poburus e is arricus), ca cumprendis (e fortzis cumprendeus is cosas candu est giai tropu tradu puru) ca sa vida no est feti unu giogu (mancai, calincuna borta, si fetzat prexei a pentzai ca sa fida no est atru ca unu giogu), ma puru, una chistioni de responsabbilidadi. 
E ballit, duncas, po su chi fadeus (su chi sceraus de fai ballit cantu su chi no sceraus de fai, mi parit bastanti craru), po is cosas chi sigheus, po is cosas chi ndi pesaus o ndi sciusciaus, po totu su chi si nci ghetaus in sa brenti (torra, ca custu esèmpiu mi depit essi praxu meda), po totus is fueddus, puru, chi si nci bessint de sa buca: seus nosu chi decideus cumenti cuncodrai sa vida cosa nosta, e cun custu, no mi parit nemmancu berus, torru a m'acapiai a s'esistenzialismu (si nd'apu arremonau de custa cosa sa cida passada puru, chi si ddu arregodais; e desinò, chi no si ddu arregodais, deu seu innoi pròpriu po custu puru), chi est cussu movimentu filosoficu (diaici m'est bèniu de ddu tzerriai), cussu ramu de sa filosofia (chi si praxit de prus cumenti sonat) chi est partiu cun Severino Kierkegaard (s'apu furriau su nomini cosa sua, chi in danesu sonat a trassa de "Soren", cun "Severino", chi est in italianu, e gei si cumprendit, berus est?) e est arribbau fintzas a Nicola Abbagnano, innoi in Italia etotu, passendi de Heidegger (seu chistionendi de su filosofu tedescu) e de Jasper (feti po arremonai is prus famosus): e duncas, est pròpriu sa possibbilidadi chi teneus de fai (o de no fai, ballit aguali) una cosa, su chi si fait essi, in totu e po totu, ominis. Ca s'omini est libberu poita tenit sa possibbilidadi de fai is isceras cosa sua; e custa cosa de is isceras ballit (iat a depi balli, chi si praxit de prus diaici) po dònnia, dònnia dì chi s'agataus de bivi. E duncas, su giogu (eia, seu torrendi a manigiai custu fueddu) iat a depi essi su de giogai in sa manera mellus chi podeus, chentza de perdi su tempus chi mancai no teneus avatu de is milli tontesas chi custu mundu ndi bogat aforas in dònnia segundu. E cun custu mi frimu puru, ca deu creu ca mi seu strollicau fintzas tropu po oi. 

E duncas, fadendi su contu ca seu scriendi po unu giàssu chi pertocat is campionaus de bòcia de is diletantis (e no seu scriendi apitzus de unu giàssu chi sighit is chistionis acapiadas a sa filosofia, mancai custa cosa no mi iat a dispraxi, e ddu nau a su Cielu, prus ca a bosatrus), deu creu chi siat arribbada s'ora, puru, de chistionai unu pagheddeddu de bòcias, de partidas, de gol e de resultaus. 

E duncas, cumenti s'apu giai ispiegau po unu bellu tanti de bortas (chi forzis sa metadi de is bortas fiat potzia essi bastanti, e megu a brullai, gei si cumprendit, berus est?), cun su Diàriu Sportivu, e seu chistionendi mescamente de is artìculus chi ndi bessint aforas scritus in italianu, acudeus a sighiri feti (feti po modu de narai, est craru, ca su trabballu chi fadeus no est pagu, ma custa est una cosa chi no iat a spetai a nosu a narai, no iat a tocai a nosu, intzandus) is scuadras chi currint me is campionaus de sa Sèrie C, de sa Sèrie D, de s'Ecellenza, de sa Promotzioni, de sa Primu e de sa Segunda Categoria; e duncas no arrannèsceus a sighiri is scuadras chi currint in su campionau de sa de Tres Categorias, e custu unu pagheddeddu mi dispraxit (unu pagheddeddu meda, cumenti si iat a podi narai, cun una botada), e duncas, po custa cida apu decìdiu chi apa andai a castiai, impari a bosatrus, e a chistionai unu pagheddeddu de cumenti funt andendi is cosas me in su campionau prus piticheddu tra totus cussus chi ndi pesant is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis. E duncas, no potzu scriri apitzus de sa chistioni in italianu (poita su tempus no mi iat a bastai mai, e sa cosa ballit, puru, po is collegas cosa mia), ma deu creu chi si ndi potzat chistionai, a su mancu custu, me in s'artìculu chi ndi bessit in sardu: e fatzu totu custu, pruschetotu, po circai de donai sa dignidadi, su rispetu chi si minescint is giogadoris, is allenadoris, e is tifosus de totus is scuadras chi currint in su campionau prus piticheddu chi teneus in s'isula (e seu chistionendi, est craru, de is scuadras de is giogadoris matucus, seu chistionendi, duncas, de cussas chi si tzerriant Primu Scuadras, po no si cunfundi, duncas, cun is scuadras de is piciocheddus piticus, chi funt un'antra pariga de maigas, cumenti si iat a podi narai, e cumenti apu sèmpiri intèndiu narai de babbu miu, a su mancu). 

E duncas, podeus partiri, chi seis de acòrdiu, andendi a castiai cumenti ant cuncodrau is listas is de sa Federatzioni de su Giogu de su Càlciu e is de sa Lega Natzionali de is Diletantis: is scuadras chi currint in su campionau de sa de Tres Categorias funt stètias pretzidas, est craru, a segunda de sa zona innoi s'agatant; e duncas, is scuadras chi faint parti de sa zona de Casteddu currint in sa lista B, is scuadras chi s'agatant in sa zona de Crabonia e de Bidd'e Cresia currint in sa lista A; is scuadras chi s'agatant in sa zona de Aristanis currint in sa lista C; is scuadras chi s'agatant in sa zona de Olbia e de Tèmpiu currint in sa Lista G; e is scuadras chi s'agatant in sa zona de Tattari funt aderetura stètias pretzidas in duas listas, sa lista E e sa Lista F. Duncas, is sorresus de su Santu Brai (diaici si tzerriat sa scuadra chi nd'ant pesau in Bidd'e Sorris, fadendi su contu, tra is atras cosas, ca Santu Brai est su santu patronu, pròpriu, de sa bidda cosa mia, de sa bidda innoi seu stètiu pàsciu, a su mancu, de candu fia unu pipiu) funt stètius stichius, ddi nau diaici, in sa lista A, impari a is de su Barbusi, chi tra is atras cosas, a fai is contus nci poneus pagu meda, s'agatant a su primu postu de sa lista, cun doxi puntus in totu, chi ndi funt arribbaus gràtzias a cuatru partidas bintas, s'una de sighiu a s'atra, apustis de cuatru giorronadas. A su segundu postu de sa lista, intzandus, agataus is de su Alteticu de Uda (chi est sa segunda scuadra chi ddoi est in sa bidda, fadendi su contu ca is de s'Uda currint me in su campionau de sa Promotzioni); sigheus cun is de su Teulada, chi s'agatant a su segundu postu in sa lista, cun dexi puntus issus puru, impari a is de s'Atletico de Uda, duncas, chi eus arremonau pròpriu immubagora. A su de tres postus agataus is de su Villaperuccio, e sigheus cun is de su Carluforti (in sa citadi, peròu, ddoi est puru un'antra scuadra, e seus chistionendi de is de sa Verde Isola, chi peròu currint, cumenti scieis beni, e chi no ddu scieis deu seu innoi pròpriu po si ddu arregodai torra, in su campionau de sa Primu Categoria e, duncas, in sa Lista B, apustis de nd'essi cabaus de su campionau de sa Promotzioni, innoi fiant arribbaus feti una pariga de annus fait); cun ses puntus in buciaca agataus, puru, is de su Biddacidru Soccer 2024, e in BiddaCidru puru su giogu de sa bòcia est sighiu meda, fadendi su contu ca in su campionau de sa Promotzioni, e po essi prus pretzisus, in sa Lista A, ddoi currint is de sa Villacidrese, sa scuadra pesada de su presidenti Marrocu, ca fintzas a s'annu passau s'agatànt in su campionau de s'Ecellenza, ma po crupa de sa maba sorti ndi funt cabaus torra de categoria e immoi ant a fai de totu po torrai in su campionau prus mannu chi teneus in s'isula, e seus chistionendi, est craru, de su campionau de s'Ecellenza. E su de benni a sciri ca in dònnia bidda nci funt, mancai, duas o fintzas tres scuadras de bòcia, si fait a cumprendi cantu su sport, e duncas su giogu de su càlciu, benit a essi una cosa de importu mannu meda, pruschetotu po is piciocheddus prus giòvuneddus ca, ddu torraus a arrapiti (e ddu torru a arrapiti mescamente poita seu cunvintu meda de sa beridadi de sa cosa chi megu a si contai), chentza de su giogu de sa bòcia, chentza de su sport, duncas, e chentza de sa scuadra cosa insoru, iant a podi abarrai chentza de fai nudda de su mengianu a su noti, e mancai, fuiaus in su bar (cumenti si megant innoi in Bidd'e Sorris, cumenti apu sèmpiri intèndiu narai, a su mancu) o in pratza de cresia, a imbutillai su sobi, cumenti si iat a podi narai, o peus, puru, a si imbriagai, a totu is oras de sa dì (e de su noti) a corpus de butillias de birra e a cropus de tassas (e tassas) de biu. 

Ma torraus a nosu, e duncas sigheus a castiai cumenti funt cuncodradas is cosas in sa Lista A: cun cincu puntus in buciaca agataus is de s'Antas Calcio, e a sighiri, cun unu puntu in mancu, is de su Calcio Silicua; in sa lista agataus puru una scuadra de Pramentellu (sa Polisportiva), is de su Fluminese, is de s'Arresina, is de su Parco Cross de sa citadi de Serrenti, is de sa Nora de Nuraminis, is de su Santu Brai de Bidd'e Sorris (chi apu arremonau ainnantis) e chi tenint feti unu puntixeddu in buciaca, apustis de cuatru partidas giogadas, e a s'ùrtimu postu, cun nemmancu unu puntixeddu allogau, is de Is Urigus. 

E duncas, is scuadras de sa de Tres Categorias funt stètius is ùrtimus a essi torraus in campu apustis de s'istadi, fadendi su contu ca su campionau cosa insoru est incumentzau feti su bintises de su mesi de Ladàmini, est a nai unu mesu apustis de sa Primu Categoria, e tres cidas, prus o mancu, apustis de is de sa Segunda Categoria. E chi si depu narai sa beridadi, nc'est stètiu unu momentu innoi apu pentzau ca, mancai, po cust'annu, is giogus po is scuadras de sa de Tres Categorias no iant a essi incumentzaus mai, ma comentecasiat apu sèmpiri biu is piciocus de su Santu Brai de Bidd'e Sorris chi sighiant a curri, in truma manna, po is allenamentus (e pruschetotu po su chi tzerriaus "preparatzioni" po su campionau, ca funt is allenamentus chi fais ainnantis de incumentzai is giogus de sa stagioni noba), e duncas, apu cumprèndiu ca po cust'annu is scuadras de sa de Tres Categorias ant dèpiu tenni unu stiddiu de passièntzia in prus, po abertai de ndi torrai a cabai in campu. E is giogus, duncas, (e seu chistionendi mescamente de sa Lista A, gei si cumprendit, berus est?) ant a sighiri fintzas a su trintunu de su mesi de maju, e duncas si iat a podi narai, puru (ca a fai is contus nci poneus pagu meda), ca is de sa de Tres Categorias, cumenti est berus, funt stètius is ùrtimus a torrai a partiri cun is giogus, ma ant a essi is ùrtimus a ddus acabbai; e custu bollit narai, duncas, chi eus a tenni s'ocasioni, torra (o, a su mancu, est cussu chi mi auguru, chi mi potzu augurai in dì de oi), de ndi chistionai, mancai in unu de is giòbias chi ant a benni. E serru sa chistioni, chistionendi un antru pagheddu de is de su Santu Brai, chi funt sa scuadra de sa bidda cosa mia: e duncas, me in sa primu bessida, sa scuadra sighida, po cust'annu puru, de s'allenadori chi at trabballau cun sa rosa puru me in totus custus annus passaus, e chi arrespundit a su nomini de Filipu Marcis nd'at cassau unu puntixeddu, in sa partida chi ant giogau in domu cosa insoru etotu, contras a is de su Silicua, cun su resultau de unu a unu. In sa bessida apustis, cussa chi ballit po sa segunda giorronada, est craru, e chi s'est giogada in su primu fini de cida de su mesi de Donniassantu, is de su Santu Brai nd'ant buscau, cumenti si iat a podi narai, una bella surra in domu de is de su Carloforti, chi funt stètius bonus a ndi cassai is tres puntus prenus gràtzias a su resultau finali de ses a zeru (ca prus de una partida de bòcia, de càlciu, cumenti si narat, parit su resultau de una partida de tennis); is sorresus funt arrutus puru in sa partida de su dexi de su mesi de Donniasantu, aranti de is tifosus cosa insoru, cun is de s'Uda chi funt arrannèscius a binci sa partida cun su resultau de tres a unu. Custu sabudu passau, invècias, is de su Santu Brai de Bidd'e Sorris funt abarraus a castiai is atrus, est a nai ca ant dèpiu fai una dì de pàsiu, fadendi su contu (e a fai is contus nci poneus pagu meda, cumenti mi praxit, fintzas a m'amachiai, a narai) ca in sa Lista A ddoi funt cuindixi scuadras, e duncas bessint seti partidas a sa cida, cun una scuadra chi depit abarrai a castiai is atras. In sa Lista B, invècias, chi est cussa chi pertocat totus is scuadras chi s'agatant in sa zona de Casteddu, su campionau est stètiu pesau cun trexi scuadras, ma a narai sa beridadi is scuadras depiànt essi catodixi, ma est sucèdiu ca is de sa Fulgor de Senorbì ndi funt bèssius de is giogus ainnantis de s'ora; e tocat a narai, puru, ca is de s'Academia de Dolianova no currint po sa lista. E duncas, a su primu postu (e megu a sighiri a chistionai de sa Lista B, mi parit bastanti craru) agataus is casteddaius de su Mulinu Bèciu, sighius de is de su Soleminis, chi tenint tres puntus in mancu (seti contras a dexi) de is chi tenint is primus de sa classi; a is pabas de is de su Soleminis agataus is de su Biddesatu (chi benit a essi Villasalto, furriau in italianu); cun ses puntus in buciaca, e chi ballint po su de tres postus in sa lista, agataus puru is de su Càlciu de Kalagonis, is de sa Burcerese (una de is duas scuadras chi ddoi funt in dì de oi in Brucei) e is de sa Polisportiva de Santa Luxia; cun cincu puntus agataus is de su Maracalagonis; cun cuatru puntus is de su Guasila (e in Guasila puru ddoi funt duas scuadras, fadendi su contu ca s'atra giogat sèmpiri in sa Lista B, ma s'agatat, in dì de oi, a s'ùrtimu postu, cun nemmancu unu mesu puntixeddu allogau in buciaca). E immoi chi nci seus (immoi chi mi seu ingiogatzendi, cumenti si iat a podi narai e cumenti apu sèmpiri intèndiu narai de babbu miu e de sa bon'anima de mamma mia), podeus andai a castiai puru, e impari, si cumprendit, cumenti funt cuncodradas is cosas in sa Lista G, chi est stètia pesada cun catodixi scuadras in totu, e duncas, si iat a podi narai ca nci funt seti partidas dònnia dònnia cida (chentza de ndi sartai nemmancu una), e totus is scuadras giogant totus is partidas, chentza de ndi perdi nemmancu una. E duncas, chi castiaus sa lista, si nd'acataus, e allestru puru, ca is prus fortis de totu, a su mancu fintzas a oi, a su mancu apustis de is primus cincu partidas, funt is de su Loiri – Portu Santu Paulu, cun cuindixi puntus in totu (e custu bollit narai, est craru, ca is de su Portu Santu Paulu ant bintu totus is partidas chi ant giogau fintzas a oi, e bai e circa cumenti ant a sighiri is cosas); is de s'Atleticu Tomi de Oschiri, invècias, tenint duus puntus in mancu, est a nai trexi contras a cuindixi. A su de tres postus in sa lista agataus is de s'Audax de su Padru; sigheus duncas cun is de su Azos (chi in italianu benit a essi Aggius, e chi est una biddixedda chi fait calincuna cosa cumenti a milli e cuatrucentus animas) e is de su Rudalza, ca ndi funt cabaus torra in su campionau de sa de Tres Categorias apustis de essi giogau in su campionau de sa Segunda in custus ùrtimus annus. 
Po su chi pertocat sa Lista C, invècias, chi est cussa innoi currint is scuadras de sa zona de Aristanis, ddoi funt otu partidas a sa cida, est a nai, duncas, ca ddoi funt sexi scuadras in totu. A su primu postu de sa lista, cun doxi puntus apustis de cuatru giorronadas giogadas, ddoi funt is de su Mogoredda (chi in italianu benit a essi, furriau, Mogorella, est craru), impari a is de sa Barbagia Sport, una bella scuadrixedda chi nd'ant pesau in sa bidda de Aritzo. A su de tres postus in sa lista agataus una scuadra de Terraba (is de s'Oratorio de Terraba, po essi prus pretzisus puru, e a mei praxit custa cosa de fai beni, est a nai in gràtzia de Deus, su trabballu cosa mia), e s'arragodu, puru, immoi chi nci seu, ca in sa bidda de Terraba ddoi est puru un'antra scuadra, e seus chistionendi, est craru, de is de sa Frantziscu Bellu, chi currint (e funt fadendi ispantus togus, ddi naru diaici) in sa lista A de su campionau de sa Promotzioni. 

E serraus custa chistioni acapiada a su mundu de sa de Tres Categorias, andendi a castiai cumenti funt cuncodradas is cosas me is campionaus chi pertocant is scuadras chi s'agatant in sa zona de Tattari; e duncas, is de sa Lega Natzionali de is Diletantis ant prètzius is scuadras de su tattaresu in duas listas; in sa primu, sa prus manna, ddoi funt calincuna cosa cumenti a cuindixi scuadras, cun seti partidas in dònnia giorronada e una scuadra chi, peròu, e si cumprendit beni, depit abarrai a castiai is atras, est a nai, ca dònnia, dònnia cida nc'est una scuadra chi si depit pigai unu turnu de pàsiu, cumenti m'est bèniu de ddu tzerriai. E duncas, no podeus fai atru, immoi chi nci seus, chi andai a castiai cumenti funt cuncodradas is cosas po su chi pertocat sa lista; e duncas, a su primu postu agataus is de su Monte Muros, cun cuindixi puntus in totu, chi ndi funt arribbaus, est craru, gràtzias a is primus cincu partidas bintas. A su primu postu de sa lista, peròu, agataus puru is de su Ebadottu Carlu Fresu, una scuadrixedda toga meda chi nd'ant pesau in Ossi (e si ndi arregodais, berus est, ca in Ossi tenint puru una scuadra chi currint, 'tendei 'tendei', in su campionau de s'Ecellenza, e custu giai de una bella pariga de annus, po ddu narai a sa sarda, e si iat a podi narai, puru, ca is de s'Ossese funt una de is scuadras prus fortis, e prus togas, chi ddoi funt in su campionau prus mannu chi si giogat innoi in s'isula, fadendi su contu ca me is ùrtimus annus funt arribbaus sèmpiri a unu passu de ndi cassai s'artziada in su campionau de sa Sèrie D, e seus chistionendi, est craru, de una bidda chi fait cincu mila cristianus, e no funt pagus). 
A su de tres postus in sa lista, intzandus, agataus is de su Nugheddu e is de su Turalva (chi furriau in italianu benit a essi Torralba). In sa lista B po su chi pertocat sa zona de su tattaresu, agataus atras catodixi scuadras e, duncas, in dònnia giorronada si giogant seti partidas, e custu bollit narai, puru, ca non nci funt scuadras chi abarrant chentza spàssiu, nemmancu po una dì, fadendi su contu ca ndi cabant totus in campu, dònnia giorronada. A su primu postu de sa lista, intzandus, agataus is de su Viddalba (su nomini de sa scuadra, a essi prus pretzisus ancora, est Viddalbese); impari a is de Viddalba, e sèmpiri cun cuindixi puntus allogaus in buciaca, chi ballint, est craru, po su primu postu de sa lista, agataus is de sa Turritana, una de is scuadras chi nd'ant pesau in Portu Torres. Cun doxi puntus, chi ballint po su de tres postus in sa lista, agataus is de Cus Sassari (sa scuadra pesada de is de s'universidadi, po si cumprendi, ca fintzas a una pariga de annus fait curriant in su campionau de sa Primu Categoria) e is de Sa Nurrese 2023. 




Attività realizzata col contributo della Regione Sardegna - IMPRENTAS 2023-2024. LR 22/2018, art. 22