Gabriele Falchi fait spantus cun su Portu Turre: su portieri de su duamilla cassat tres tirus de is undixi metrus a Michele Pulina

In s'ùrtimu bìncida de su Portu Turre, sa de ses, arribada pròpriu domìnigu passau, in domu de cussus de s'Istintinu, nc'est sa manu, e bella grai puru, a nai sa beridadi, de Gabriele Falchi: su piciocheddu, chi su trinta de marzu chi benit at a fai bint'annus tundus tundus, at giogau una partida foras de conca, e imoi totus funt chistionendi beni meda de issu. Po cumprendi poita, abastat pagu: seus a su de trinta minudu, in su primu tempus, cun is duas scuadras acapiadas a su zeru a zeru, candu s'arbitru detzidit, a pustis de unu fallu, de donai unu tiru de is undixi metrus a su Istintinu.
Su giogadori chi Falchi s'agatat aranti no est pròpriu s'urtimu arribau: seus chistionendi, difatis, de Michele Pulina, nasciu su sexi de su mesi de ladàmini de su milli e noicentu otanta, una fida in su mundu de sa bòcia, cun Torres e Lanusè in Serie D, po nd'arremonai duas, e in Eccellenza cun Piaghe, Tergu, Calanzanos e Sorso, fintzas a nd'arribai in s'Istintinu, innui at giai fatu calincuna cosa cumenti a sexi gol in bintiduas bessidas. Su calciu est unu giogu strambu meda, ddu scieus, ma fortzis una cosa diaici non s'est mai bida. Michele Pulina, difatis, at depiu arrepiti su rigori po tres bortas, poitta is giogadoris de su Portu Turre brintànt in area a innantis de su tiru, una cosa chi, po is arregulas, non si potit fai. Dònnia borta, peròu, est pròpriu custu su spantu prus mannu, Gabriele Falchi est arrannesciu a cassai sa bòcia, fadendi a biri a totus cantu est forti, mancai s'iat unu giòvuneddu.

«Giogu de catodixi annus, de candu ndi tengiu ses, ma non mi fiat mai sutzedia una cosa diaici e pentzu chi siat pròpriu po custu chi sa genti est chistionendindi meda — contat Gabriele Falchi —. A pustis de sa partida nd'apu arrexonau cun is cumpàgius mius e totus femus de sa pròpria bidea: Pulina potiàt tirai po atras dexi bortas, ma sa dii non nci fiat nudda de fai; fortzis po issu fiat unu domìnigu trotu».
Falchi acciungit. «Non ti sciu nai beni ita fia pentzendi in cussus secundus, ma unu pagheddu non nci credia mancu deu: giai cassai unu tiru de is undixi metrus est traballosu, figuradì ita bollidi nai ndi cassai tres, unu avatu de s'atru».
S'urtimu est stetiu cussu de importu prus mannu. «S'at fatu a cumprendi, a mei e a is atrus cumpàngius mius, chi si podestus giogai sa partida. Apu fintzas pentzau de abarrai frimu, poita timia chi Pulina tiressit deretu, ma calincuna cosa aintru de mei mi nc at fatu fuiai a dereta».
Falchi tenit is bideas craras. «Po imui pentzu feti a agiudai su Portu Turre a ndi arregolli is puntus chi serbint po abarrai in Promozione, po su benidori eus a biri ita at a sutzedi».



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020