Segunda Categoria: is de sa Gioventù de Sarrocu sighint a cumandai in sa Lista A; in sa Lista B sighit sa batalla tra Deximu e Cabuderra

E duncas, a cantu parit, seus arrannèscius a nc'arribbai puru a s'ùrtima cida de su segundu mesi de s'annu, est a nai, de su mesi de Friàrgiu, chi, cumenti eis a sciri beni, est su prus crutzu de totus, fadendi su contu chi tenit feti bintotu diis, e no sciu chi siat po custu motivu puru, ma su tempus mi parit chi si ndi siat bobau. 

E mi fait prexei meda, chi pròpriu si depu narai sa beridadi, ca su mesi de Friàrgiu no m'apat portau nè dannus e nè arroris, ma antzis, nc'est passau deretu, chentza nemmancu si fai intendi, giai giai, cumenti si iat a podi narai (chi mi cumprendeis). 
E mi intendu basau de sa bona sorti, mi acudu a si ddu narai, fadendi su contu ca me in custas ùrtimas cidas apu intèndiu is storias de meda personas, tra cussas chi seu costumau a atobiai, chi ant tentu dannus e strobbus po su chi pertocat sa saludi: nc'est chini dda at acabbada cun unu bratzu arrogau, chi s'est pigau su puntori (e in s'ierru funt cosas chi podint sucedi, e si cumprendit beni) e chini dda at acabbada a s'uspidali puru, ca is arroris in custu mundu no ammancant de seguru, e dònnia dì (sighendi sa letzioni chi s'ant donau is antigus aregus) ndi iant a podi arribbai cosa bonas, ma puru, est craru, cosas mabas medas de scroxai, cumenti m'est bèniu de narai, gioghendi a fai unu pagheddeddu su poeta. 
Ca custa vida, a bortas (e giogu a si intregai custa metafora puru) est giai giai aguali a una partida de bòcia o, po ddu narai mellus puru, abarrat giai giai aguali a su chi podit sucedi in una partida de bòcia: est a nai ca unu giogadori iat a podi giogai una partida toga meda, mancai pesendindi, a solu, duus o tres gol (cumenti est sucèdiu custu fini de cida passau a calincunu piciocu); ma is cosas ti iant a podi andai mabi, o peus de su chi bisàst, e intzandus, ddu scieis cumenti andant is cosas, iast a podi sbàlliai unu tiru de is undixi metrus, o unu gol giai fatu; e nci funt, mancai, portieris chi faint calincunu sbàlliu mannu, de cussus chi ti costant sa partida, ca ddu scieis, e mancai mellus de mei puru (e chi no ddu scieis, chi no seis acapiaus a istrintu cun is chistionis chi pertocant su giogu de sa bòcia, intzandus si dongiu una manu de agiudu deu a si fai a cumprendi cumenti andant is cosas), ca candu unu portieri fait unu sbàlliu, intzandus est facili (benit a essi facili meda, chi si sonat mellus cumenti sonat) ca sa scuadra cosa sua ndi buschit, ndi ingollat unu gol. 

E duncas, unu giogadori depit sèmpiri fai su contu ca me is noranta minudus (prus is minudus chi tzerriaus de su recuperu) de sa partida iat a podi sucedi diaderus de totu: podis essi su giogadori prus forti in campu, ma ti iast a podi strupiai puru, e abarrai aforas de su campu (e duncas de is giogus) po cidas e cidas, chi no po mesis e mesis. E su pròpriu iat a podi capitai in sa vida cosa nosta, cussa chi seus costumaus a bivi dònnia dì: oi ti ndi pesas totu allirgu, ma mancai s'arrogat calincuna cosa (sa machina? Su telefuneddu?) chi ti fait perdi sa passièntzia, o, ballit aguali, cabai a terra s'umori. 
Ca no parit berus, e si ddu nau diaici, nd'aprofitu, de cantu febi a bortas si pigaus, in custa vida, po cosas de pagu contu, ca mancai costant una surra, una biga de dinai, ma che peròu no ballint giai nudda, mescamente chi pentzaus a cali funt is cosas de importu prus mannu in sa vida cosa nosta, partendi de sa saludi. 
Ma candu stadeus beni, chentza de daboris, intzandus abarraus a totu dì pighendusì febi po cussas chi mi benit de tzerriai tontesas: si pigaus febi chi sa machina no partit, chi si nd'arruit de is manus su tialu de telefuneddu; si pigaus febi chi ndi ingolleus una multa (o una contravintzioni, chi teneis prus agradessu custu fueddu) o chi arribbaus a certai cun calincunu, ma si nd'acataus de cantu custas funt cosas de nudda, de pagu contu, candu mancai arribbant is dannus a sa saludi. 
Intzandus, eia, est cumenti a si ndi scidai de unu bisu, incumentzaus a cumprendi, mancai totu paris, mancai de una dì a s'atra, cali funt is cosas de importu prus mannu in custa vida. 
Su de abarrai cun su coru assèbiau, mancai, chentza pentzamentus lègius, po incumentzai, est una de is cosas de importu prus mannu, a su mancu a parri miu, ca no nc'est tanti de dinai diaici mannu chi ddu potzat balli, cumenti si narat. 
E candu si nd'arribbant is pentzamentus lègius, mancai po una persona chi stimmaus e chi no stait beni po su chi pertocat sa saludi, intzandus si nd'acataus, e acoitu puru, ca is cosas chi si donant fastidiu, mancai, a partiri de is resultaus lègius de sa scuadra de bòcia chi sigheus, funt tontesas. 
Poita, cumenti narant is bècius etotu (ca calincuna cosa, mancai, de custa vida dda ant cumprendia), candu mancat sa saludi, intzandus mancat totu. 

E torrendi a nosu, duncas, gràtzias a Deus, gràtzias a su Cielu, chi si praxit de prus cumenti sonat, no tèngiu nudda de murrungiai nemmancu po custa cida, a su mancu po su chi mi pertocat. 
E antzis, su chi potzu fai, e cun custu dda serru puru (e fiat ora, s'at a megai, mancai, calincunu de bosatrus), est su de domandai, su de pediri a su Cielu, e a Deus, duncas (po chini nci creit, est craru) ca potzat donai una manu de agiudu (immoi etotu, mancai!) a totus is personas chi in dì de oi funt serradas me is aposentus de is uspidalis, e mancai, crocadas in su letu, chentza de tenni sa possibbilidadi de si ndi strantaxai, nemmancu po fai duus passus. 
Ca po su chi mi pertocat, no tèngiu daboris, seu de apetitu bonu e nci potzu bessiri de domu candu mi parit e praxit. E tzerriu totu custu "bona sorti", est craru, e no nc'est dì chi mi bivu chentza de torrai gràtzias a su Cielu po totu custu oru. 
E unu fueddu bonu, una precadoria nc'at a essi sèmpiri, de parti mia, po totus cussas personas ca in dì de oi no funt annadendi in acua bonas, isperendi ca potzant torrai allestru, e chitzi meda, a biri sa luxi, cumenti si narat, a ndi sanai de su mabi chi mancai tenint. 
E si scriu totus custus fueddus candu mancant feti seti diis, prus o mancu, a s'incumintzu de sa caresima, chi po mei est unu de is perìodus de s'annu chi abarrant prus fadiosus, ma est, megu a narai diaderus, unu de is perìodus de importu prus mannu po sa vida cosa mia, fadendi su contu (eia, mi praxit a narai diaici) ca in custas coranta diis mi ndi cumbinu, diaderus, de dònnia cabori, tra dietas e atrus gioghiteddus chi seu costumau a fai apitzus de mei etotu, chi arrannèsceis a sighiri su chi si bollu narai. 
Ma fadendi su contu, cumenti s'apu narau immubagora, de su restu, ca sa caresima at a durai, est craru, po coranta diis (chi no mancai calincuna cosa de prus, fadendi su contu ca nci depeus aciungi puru is seti diis de sa cida santa), e duncas custu bollit narai ca, eia, apa a tenni atras ocasionis (chi su Cielu at a bolli custu beni po mei) po si chistionai torra de totus is chistionis chi ddoi funt acapiadas a su mesi e mesu chi nd'arribbat ainnantis de sa Pasca Manna. 
E cumenti seu costumau a fai dònnia dònnia annu (incumentzu a si ddu arremonai, immoi chi nci seu), unu de is giogus prus togus chi apa a circai de ndi pesai est cussu de cumprendi chi, tra totus is cosas chi mi torrant a contai is allenadoris chi intendu, apustis de is partidas, po ndi pesai is ciaciarradas (is intervistas, po ddu narai a trassa de s'italianu etotu) nci podint essi letzionis, ddas tzerriu diaici, de importu, chi si potzant serbiri, puru, po si bivi sa vida cosa nosta de dònnia dì, e duncas, chi nci possant essi cosas de importu po si ndi scabulli de totus cussus dannus, puru, chi si ndi proint apitzus in s'interis chi si biveus custa vida totu machillota e ghetada a pari (e chistionu de sa vida cosa mia, est craru, ca sa vida de bosatrus, chi est cussu chi s'auguru, de su restu, est toga meda e andat ainnantis chentza nesciunu dannu). 
E una de is cosas de importu prus mannu po su giogu de sa bòcia e, duncas, po binci is partidas (custu mi parit de podi narai, apustis de giai cuindixi annus chi seu fadendi custu trabballu, est a nai su trabballu de su giornalista sportivu, cumenti si iat a podi narai, a trassa de cumenti si narat in italianu etotu), est su de trabballai apitzus de tui etotu, cumenti is allenadoris faint cus is piciocus chi sighint, cun is piciocus chi faint parti de sa rosa de sa scuadra cosa insoru, po circai de mellorai, est craru. 
Ma de totu custu (de is chistionis chi apa a acapiai a sa Caresima), megu a si ddu narai giai de oi, eus a tenni su modu de ndi chistionai, torra, puru me is cidas chi ant a benni. 
A ddu castiai de innoi (apu atacau a scriri custu artìculu su martis, ca in su calendàriu benit a essi su binticincu, mancai s'artìculu nd'at a bessiri aforas feti su bintiseti), si naru sa beridadi, su mesi de martzu mi fait a timi meda, de cantu iat a podi essi fadiosu, ma invècias de abarrai innoi a pentzai a su chi at a essi, a su chi nd'at a arribbai me is trintunu diis chi faint parti de su de tres mesis de s'annu, mi ia a depi gosai is ùrtimus diis de su mesi de Friàrgiu. 

E fortzis fortzis, chi pròpriu si ddu depu narai (e m'eis a iscusai chi mi seu strollichendi prus de su tanti, ma de su restu, chi eis lìgiu a su mancu unu de is artìculus chi ndi pesu in sardu e chi ndi bogu aforas de giòbia, scieis giai ca mi praxit unu pagheddu a mi strollicai cun bosatrus ainnantis de andai a castiai, impari, cali funt is novas de importu prus mannu chi nd'arribbant de is campionaus chi sigheus cun su giàssu de su Diàriu Sportivu), sa chistioni prus manna po su chi mi pertocat, a su mancu, est pròpriu cussa chi no arrannèsciu a mi bivi su presenti, a mi bivi custu momentu, poita abarru totu pentzendi (e no creu de essi s'ùnicu chi nc'arruit in custu stampu, in custa forada) a su passau, o a su benidori. 
E invècias (po torrai a sa chistioni de is consillus chi nd'arribbant gràtzias a totu su chi mi contant is allenadoris chi intendu dònnia cida po ndi pesai is ciaciarradas (e is intervistas, duncas), ia a depi pentzai a una partida a sa borta, e duncas, ia a depi pentzai a una dì po borta; mi ia a depi cuncentrai apitzus de su chi seu fadendi e apitzus de su chi seu bivendi, e po oi, duncas, po custa cida, seus ancora in su mesi de Friàrgiu, e duncas, nc'est su tanti po sighiri a fai unu pagheddu de festa, mancai no sia costumau a mi bistiri a maschera, e mancai no mi speddiat (no mi speddiat prus de su tanti) su de andai in giru po is sfiladas de maschereddas, e mancai fintzas a oi apa papau feti unu parafritu (fiat sa noti de Sant'Antoni...), e duncas, po segai a crutzu sa cosa, mancai po mei sa festa bengiat a essi pagu meda. 

Ma apu imparau, in custa vida, ca sa festa benit a essi dònnia dì innoi no tenis daboris (po s'apicai a su chi si fia narendi ainnantis, in custu artìculu etotu), e sa festa benit a essi candu ti podis papai su chi ti andat e ti spreviat de prus, e duncas, intzandus, eus a biri totu su druci chi apa a agatai in custas seti diis chi m'abarrant de mi scroxai, de mi bivi, ainnantis chi nd'arribbit sa Caresima. 
Ca sa chistioni ballit aguali, siat po is daboris (chi ti ndi podint proi apitzus candu no ti ddu abertas) ma siat puru, mancai, po is cosas drucis, e megu a chistionai, mancai, de is novas bonas, chi ti ndi podint arribbai a is origas candu invècias pentzas ca no nci siat prus nudda de fai. 

E duncas, ainnantis de mi fuiai a fundu 'e suus, cumenti si narat in bidda mia a su mancu, me is chistionis chi pertocant su mundu de sa bòcia de is diletantis sardus, deu creu ca siat una cosa toga su de andai a castiai, in su tialu de calendàriu (e m'eis a iscusai po su giogu de fueddus, po sa rima, po dda tzerriai cun su nomini cosa sua etotu, chi mi nd'est bessida aforas giai giai chentza de mi nd'acatai; ca sa lingua sarda, cumenti eis a podi cumprendi a solus, abarrat poètica meda, chi cumprendeis su chi si bollu narai, a su mancu) cumenti funt cuncodradas is cosas po su mesi de Martzu. 
E sa primu cosa chi mi benit in conca de si narai est ca, eia, is diis me in su calendàriu funt cuncodradas aguali aguali a su mesi de Friàrgiu, e ndi seu seguru, est una cosa chi est sucèdia s'annu passau puru. Est a nai ca sa primu dì de su mesi de Martzu at a essi de sabudu, cumenti est stètia in su mesi de Friàrgiu, e duncas, in su mesi de Martzu nc'ant a essi cuatru giòbias (e custu bollit narai, est craru, ca po su chi pertocat is artìculus in sardu, nd'apa a depi pesai cuatru etotu), e seu chistionendi de su ses, de su trexi, de su binti e de su bintiseti. At a essi unu mesi prenu fintzas a cucuru de partidas, e si potzu giai scoviai ca is scuadras de sa Promotzioni ant a giogai su sabudu de su noi e su sabudu apustis puru, chi at a essi su sexi. 
E su mesi de Martzu, si cumprendit, ddu cumprendeis a solus puru, at a essi de importu mannu meda po ndi cassai sa bìncida de su campionau, o po ndi cassai sa sarvesa, ballit aguali deu creu, poita apustis, cumenti nd'at a brintai su mesi de Abrili, nc'ant a essi feti tres o cuatru partidas ainnantis de acabbai cun sa stagioni. 

Ma dda acabbu (e fiat ora puru, s'at a megai calincunu de bosatrus) de abarrai innoi a si chistionai de su tempus chi at a arribbai, e invècias deu creu ca sa cosa mellus chi potzu fai est cussa de andai a castiai, impari a bosatrus, chi seis de acòrdiu, est craru, cumenti funt cuncodradas is cosas me is otu listas chi pertocant su campionau de sa Segunda Categoria, chi, de su restu, est una cosa chi si seu promitendi de una bella pariga de cidas, a nai sa beridadi, e sa cosa prus toga, o mellus, una de is cosas prus togas chi nci funt in custa vida, est pròpriu su de mantenni is promissas. 

E duncas, sèmpiri chi seis de acòrdiu (ddu megu a narai po brullai unu pagheddeddu, ma isperu chi siat diaici), podeus incumentzai a castiai, impari, si cumprendit, cumenti funt cuncodradas is cosas po su chi pertocat sa Lista A. 
A su primu postu, duncas, agataus is de sa Gioventù Sarrocu, chi ndi funt pesendi, cumenti si iat a podi narai (e cumenti seu narendu, de su restu) una stagioni toga meda, est a narai, una stagioni de oru, fadendi su contu ca fintzas a oi (e funt passadas giai dexennoi giorronadas) no ant ancora pèrdiu nemmancu una borta; antzis, a narai sa beridadi, a narai is cosas cumenti funt, ant bintu, s'una avatu de s'atra, calincuna cosa cumenti a sexi partidas de sighiu, e sa cosa at fatu ispantus mannus, no feti innoi in Sardìnnia, fadendi su contu ca no nci funt medas atras scuadras ca, po su chi pertocat is campionaus chi si giogant me is atras regionis de s'Italia, (e chistionaus, est craru, de is campionaus pesaus de is de sa Federatzioni Italiana de su Giogu de su Càlciu) potzant narai sa pròpriu cosa. 

E duncas, custu bollit narai ca is de sa Gioventù de Sarrocu funt una de is scuadras chi, tra cussas chi s'agatant in totu Italia, funt currendi a forti meda. 
Is grogus-brau, tra is atras cosas, depint ancora giogai sa partida in domu cosa insoru, contras a is de s'Accademia Sulcitana, chi si depiàt giogai su duus de su mesi de Friàrgiu e chi s'est giogada invècias, pròpriu ariseu a su merì (e chi s'est serrada cun su resultau de unu a zeru po is meris de domu de su Sarrocu). 

E pròpriu in sa cida apustis, seus chistionendi de sa partida chi s'est giogada su noi, sèmpiri de su mesi de Friàrgiu, est craru, is de sa Gioventù de Sarrocu, chi funt sighius de un allenadori bravu, e cun esperièntzia manna a is pabas, cumenti est Nunzio Falco, ant serrau sa partida in domu de is de sa La Salle cun su resultau siddau in paridadi, e custa est stètia sa primu borta ca is de su Sarrocu no funt stètius bonus a ndi pesai nemmancu unu gol (e sa partida, duncas, ddu cumprendeis a solus, nci arribbais mancai a solus, s'est serrada cun su resultau de zeru a zeru). 
Ma giai in sa partida chi ant giogau apustis, e megu a chistionai de sa isfida in domu cosa insoru, contras a is fradibis de su Pula (ddi naraus diaici poita Sarrocu e Pula funt duas biddas chi abarrant giai giai a su costau, mi parit craru), funt stètius bonus a ndi pesai calincuna cosa cumenti a noi gol, chi no funt pagus de seguru. 
E me in s'ùrtima bessida, est a nai cussa de custu domìnigu passau, is de sa Gioventù de Sarrocu ant cassau sa de dexasseti bìncidas de su campionau, gràtzias a su tres a duus chi ant scutu in faci a is de sa Jupiter, cun is meris de domu (eia, is de su Sarrocu ant giogau in domu allena, si cumprendit, berus est?) chi si funt fatus balli e si funt arrèndius, ddi naru diaici, feti me is minudus de su tempu de recuperu (cumenti seus costumaus a ddus tzerriai, a trassa de s'italianu etotu). 

E duncas, in dì de oi is de su Sarrocu tenint in buciaca calincuna cosa cumenti a cincuantacincu puntus, contras a is corantacincu chi tenint is segundus de sa lista, e seus chistionendi de is de su La Salle de Pauli, chi ant bintu, fintzas a oi, catodixi partidas in totu e nd'ant pèrdiu duas, cun tres partidas chi ant serrau cun su resultau siddau in paridadi. 
Po serrai su campionau, duncas, chi at a acabbai, cumenti cussu de sa Primu Categoria etotu, de su restu, su cuatru de su mesi de Maju, ammancant duncas feti dexi partideddas, e si potzu narai puru ca, eia, cumenti a is scuadras chi currint in su campionau de sa Promotzioni, is scuadras de sa Segunda Categoria nd'ant a cabai in campu po su sabudu de sa cida de Pasca.

E po cumenti funt postas immoi is cosas, si iat a podi narai puru, chentza timi de si sbàlliai, ca is de sa Gioventù de Sarrocu funt giai giai segurus de binci su campionau, e duncas, de ndi cassai su primu postu de sa lista e de nci artziai, mi parit craru, in su campionau de sa Primu Categoria.
 Po su chi eus narau in sa primu parti de custu artìculu etotu, peròu, su giogu de sa bòcia est togu (e benit sighiu diaici meda de sa genti) puru e pruschetotu poita no podis mai sciri cumenti ant a andai is cosas, cumenti ant a acabbai is giogus; ca podit sèmpiri sucedi de totu (e sa cosa ballit, est craru, siat po is scuadras de is diletantis, chi funt cussas chi sigheus cun su Diàriu Sportivu, ma a sa fini sa pròpriu cosa si podit narai, puru, po totus cussas scuadras chi currint me is grandus campionaus de is professioneris, cumenti iat a podi essi sa Sèrie A. Ca no iat a essi sa primu borta chi sucedit ca sa scuadra chi s'agatat a su primu postu de sa lista, e mancai cun una biga manna de puntus allogaus in buciaca, e cun unu tanti mannu meda de puntus in prus de is chi tenint is aversàrius, nci fuliit sa bìncida a s'abiga, pròpriu candu pariàt ca su prus de su trabballu fessit fatu. 

Ma, a si narai sa beridadi, a su mancu po su chi ndi podeus cumprendi in dì de oi, no parit ca nci siat su tanti po crei, o puru, feti, po pentzai, ca is de su Sarrocu nci potzant fuliai a s'abiga (cumenti si narat) sa bìncida de su campionau, chi andaus, mescamente, a castiai is numerus chi nd'ant pesau fintzas a oi: sessantaseti gol pesaus in totu e feti dexi cussus ingotus, est a nai, mellus, bodditus. 

E sigheus a andai ainnantis, duncas, e castiaus, chentza de perdi tropu tempus, est craru, cumenti funt postas, cumenti funt cuncodradas is cosas po su chi pertocat sa Lista B, e chistionaus, est craru, sèmpiri de su campionau de sa Segunda Categoria (si cumprendit, berus est?). 

Duncas, chi in sa Lista A si iat a podi narai ca su spàssiu prus mannu si ddu funt pighendi is de sa Gioventù de Sarrocu, impari a is tifosus cosa insoru (e a is atras scuadras, e duncas a is tifosus de is atras scuadras, funt abarrendi, giai giai, cumenti si narat, feti is pimpirillas), po su chi pertocat sa Lista B nc'est de sighiri sa isfida tra is de sa Decimo 07 (sa scuadra chi nd'ant pesau in Deximumannu, gei si cumprendit beni, deu creu) e is de su Cabuderra (Capoterra, cumenti ddu scieus in italianu e cumenti ddu agatais scritu, de su restu, me in su giàssu cosa nosta), chi si funt gioghendi sa bìncida de su campionau e, si cumprendit, s'artziada in su campionau de sa Primu Categoria. 

E duncas, andaus a castiai unu pagheddeddu cumenti funt postas e cuncodradas is cosas: a su primu postu de sa lista, in dì de oi, ddoi funt is piciocus sighius de Daniele Cadelano, cun su presidenti de s'assotziu chi est Andrea Vergari (chi in totus custus annus at trabballu, beni meda, tocat e fait a ddu narai, po sa scuadra cosa sua, fadendi su contu ca una dexina de annus fait fiat s'allenadori e, duncas, s'est sèmpiri donau de fai, chi est cussu chi si bollu fai a cumprendi), chi tenint allogaus in buciaca calincuna cosa cumenti a corantotu puntus, chi ndi funt arribbaus gràtzias a cuindixi partidas bintas e tres partidas chi si funt serradas cun su resultau siddau in paridadi. 

E duncas, acudu a si narai custu puru: is de su Cabuderra ant pèrdiu feti una partida, a su mancu fintzas a oi, e duncas, feti una partida pèrdia apitzus de dexennoi bessidas, chi est stètia, nemmancu a ddu fai aposta, cussa chi ant giogau in domu de is deximesus etotu, e chi ant pèrdiu cun su resultau de duus a unu. 
Si potzu contai puru, immoi chi nci seu, po si fai a cumprendi totu sa fortza de sa scuadra bianca-arrùbia-brau, ca is de su Cabuderra funt stètius bonus a ndi pesai calincuna cosa cumenti a sessantacincu gol, e no nc'est stètia nesciuna scuadra, a su mancu po su chi pertocat sa Lista B de su campionau de sa Segunda Categoria, chi apat fatu diaici beni; e po su chi pertocat sa difesa puru, e duncas, po su chi pertocat is gol chi nd'ant ingotu, chi nd'ant bodditu, in dì de oi (chistionu po cumenti funt cuncodradas is cosas apustis de sa de ses giorronadas de sa lista de partidas de sa torrada), is de su Cabuderra ant dèpiu incasciai, ddi naru diaici, calincuna cosa cumenti a bintunu gol. E immoi, a fai is contus nci poneus pagu meda (a acabbai de fai is contus, si iat a podi narai, puru), is de su Cabuderra tenint duus puntus in prus de is chi tenint is de su Deximu (Decimo 07 Atletico iat a essi su nomini de sa scuadra scritu totu interu, po essi prus pretzisus puru, cumenti unu giornalista bravu iat a depi fai, sèmpiri chi bolit fai beni su trabballu cosa sua), ma tocat a s'acudi a narai, puru, ca is de su Deximu custu fini de cida passau no ndi funt cabaus in campu, est a nai chi si funt dèpius pigai unu domìnigu de pàsiu, fadendi su contu ca is listas de sa Segunda Categoria cust'annu funt stètias pesadas (gràtzias a su trabballu chi ant fatu is dotoris chi sighint is giogus e chi faint parti de su Cumitau Regionali Sardu de sa Lega Natzionali de is Diletantis) cun cuindixi scuadras in totu, e custu bollit narai, duncas, ca dònnia cida, in dònnia giorronada, nci funt seti partidas, po catodixi scuadras, e duncas, una scuadra abarrat, a turnu, a castiai is atras. 

E duncas, custu domìnigu passau est tocau pròpriu a sa scuadra de is campidanesus, sighida de un allenadori giòvuneddu, ma bravu meda, cumenti est Albertinu Melis, chi nd'est arribbau feti in sa segunda parti de sa stagioni e at pigau su postu chi fiat de Damiano Bartoli, unu piciocu chi me in custus dexi-cuindixi annus at sèmpiri donau una manu a is decimesus, ma chi cust'annu s'est dèpiu ponni de una parti (cumenti si iat a podi narai) poita is cosas no ddi fiant andendi beni cumenti, invècias, isperant is dirigentis de s'assòtziu. 

E de candu est arribbau Albertino Melis, is decimesus ant incumentzau a curri, e a forti puru. 
Bastat a narai, po si fai a cumprendi sa stagioni de oru chi ndi funt pesendi, ca is deximesus no ant pèrdiu nemmancu una partida, a su mancu fintzas a oi (pròpriu cumenti funt fadendi is de sa Gioventù de Sarrocu in sa Lista A, chi s'apu giai arremonau, tra is atras cosas), e antzis, funt arrannèscius a binci dexi partidas totu de sighiu, est a nai, duncas, una avatu de s'atra. 

E duncas, in dì de oi is Deximesus s'agatant a su segundu postu de sa lista, ma cun una partida in mancu de cussas chi tenint giogadas is de su Cabuderra, chi s'ant a pigai su turnu de pàsiu (ddu tzerriu diaici, isperendi chi si cumprendat su chi si bollu narai) pròpriu me in sa giorronada chi nd'at a arrui su sabudu de sa Pasca Manna, e chi at a essi sa de trexi giorronadas, po essi prus pretzisus. 

E duncas, su chi ant a depi circai de fai is deximesus, mi parit craru, est cussu de circai de abarrai apicigaus a is carronis de is cabuderresus (cumenti si narat, furendindi sa trassa de s'italianu etotu) po un antru mesi e mesu. Po su chi pertocat sa Deximu 07, si potzu contai, puru, ca po immoi (e duncas, fintzas a oi) ant incasciau, nd'ant bodditu feti doxi gol in dexiotu bessidas (e no nc'est nesciuna scuadra, a su mancu po su chi pertocat sa Lista B, chi apat pigau unu tanti diaici piticheddeddu de gol, chi cumprendeis su chi si bollu narai); e nc'est chi narat, puru, tra is allenadoris etotu, ca sa scuadra chi a sa fini bincit su campionau, tra una cosa e s'atra, est sèmpiri cussa chi incasciat prus pagu gol de totus is atras. 
E duncas, si iat a podi narai ca, eia, is de sa Deximu 07 funt currendi in s'arrastu bonu po ndi cassai s'artziada in su campionau de sa Primu Categoria. 

Immoi chi nci seus, si potzu narai ca puru is de s'Ussana funt currendi po circai de ndi cassai sa bìncida de su campionau, ma in di de oi is grogus-arrùbius s'agatant a su de tres postus in sa lista, cun coranta puntus in totu, chi funt, duncas, ses in mancu de is chi tenint is deximesus. 

Torrendi a is contus chi pertocant sa scuadra sighida de Albertinu Melis, si potzu narai, puru, ca funt andendi beni, e currendi a forti, no feti po su chi pertocat sa difesa, ma puru po su chi pertocat s'atacu, fadendi su contu chi nd'ant pesau cincuantunu gol in totu, e no funt pagus. 
E immoi chi nci seu, immoi chi mi seu ingiogatzendi a castiai cumenti est andendi sa isfida tra is de su Cabuderra e is de sa Deximu 07, si potzu narai, puru, ca s'atacu de is deximesus est forti meda, fadendi su contu chi podint contai apitzus de giogadoris de importu mannu meda cumenti Umbertu Festa (chi in dì de oi est unu de is atacantis cun s'esperièntzia prus manna chi s'agatat in su mundu de is diletantis sardus), e chi at acutu a fai calincuna cosa cumenti a undixi gol, e chi no funt pagus, si cumprendi, mescamente chi pentzaus chi Umberto Festa est arribbau a giogai cun s'assòtziu campidanesu feti a sa de cuatru giorronadas, in sa partida contras a is de Su Planu, po essi prus pretzisus puru. Tra is giogadoris de su Deximu 07 chi funt fadendi is ispantus prus mannus agataus, puru, Nicola Ledda, cun ses gol pesaus fintzas a oi, e Edoardu Matta, chi nd'at pesau dexi gol in totu; totus e duus funt nàscius in su duamilla e unu, est a nai ca in dì de oi no tenint fatus nemmancu binticincu annus, e nc'est su tanti po crei ca, chi ant a sighiri a curri in cust'arrastu, ndi iant a podi arribbai a giogai (chi est cussu chi ddis auguru, de su restu, e mi parit craru puru) me is campionaus de sa Promotzioni, de s'Ecellenza e fintzas in su campionau de sa Sèrie D ca, de su restu, est su bisu de totus is piciocus chi giogant a bòcia, est a nai, su de fai carrièra in su mundu de su càlciu, po dda acabbai, mancai, a curri impari (o contras, ballit aguali) a is grandus campionis de sa Sèrie A. 

E torrendi a is chistionis chi pertocant is atacantis de sa Deximu 07, in sa scuadra est arribbau puru un antru atacanti forti meda, e seus chistionendi de Danieli Zucca, chi at fatu sa primu parti de sa stagioni in domu (ddi naru diaici isperendi chi si cumprendat) de is de su Pula, ma apustis at agatau s'acòrdiu cun s'assotziu de su presidenti Corradu Pireddu; e duncas, Zucca fintzas a immoi nd'at pesau cuatru goiteddus, ma fadendi su contu ca a sa fini de sa stagioni de su duamilla e binticuatru – duamilla e binticincu ammancant ancora dexi partidas, su numeru, su tanti del gol iat a podi benni a essi prus matucheddu puru. 
E duncas, chi mi ddu permiteis, deu ia a podi fai su pròpriu giogu chi apu fatu immubagora po is deximesus, andendi a castiai calli funt is giogadoris chi funt fadendi a biri is cosas prus toga in domu de is de su Cabuderra, ddi naru diaici isperendi chi si cumprendat. 

Duncas, cun seti gol fatus agataus a Guglielmo Falciani, chi mancai siat unu difensori (e no un atacanti) est arrannèsciu a ndi pesai calincuna cosa cumenti a seti gol, a su mancu fintzas a oi; e nareus puru ca Falciani, chi est nàsciu in su milli e noicentus otantacuatru, e duncas in dì de oi tenit fatus calincuna cosa cumenti a corant'annus (chi no calincuna cosa de prus puru, e megu a brullai, gei si cumprendit, berus est?), est unu de is giogadoris cun s'esperièntzia prus manna no feti po su chi pertocat s'assòtziu cosa sua (de su Cabuderra, est craru, berus?) ma est unu de is prus matucheddus in totu su mundu de is diletantis sardus; ma si cumprendit beni cumenti andant is cosas: candu tenis sa passioni, sa passioni po unu giogu, po su giogu de sa bòcia, est mau meda a si dda scroxai de pitzus (chi mi permiteis de giogai unu pagheddeddu a fai su poeta), e duncas, chi fessit po is giogadoris, iant a abarrai in campu a curri avatu a sa bòcia (e a is aversàrius) po calincuna cosa cumenti a setanta o otant'annus, ma a sa fini asuta de custu cielu (cumenti narànt is prus sàbius tra is antigus cinesus) totus is cosas depint acabbai; e tra is atras cosas, puru sa carrièra de unu giogadori; ma a sa fini, e in su mundu de su càlciu sucedit fatu fatu meda (e si nd'apu chistionau, de custa cosa, un'antra bella pariga de bortas, chi no mi sbàlliu, e no mi megu a sbàlliai...), is giogadoris chi serrant cun sa carrièra cosa insoru in campu, apustis si nci ghetant, si nci fuiant a fundu 'e susu in sa carrièra de allenadoris, chi no cun is scuadras de is giogadoris mannus (cussas chi tzerriaus, chi seus costumaus a tzerriai Primu Scuadras), cun is scuadras de piciocheddus piticus, e fintzas a arribbai a is scolas de càlciu po is pipius. 

E duncas, est su chi si bollu narai, sa passioni po custu giogu no si studat mai, no acabbat mai. 
E chi est cussu, de su restu, chi auguraus puru a Guglielmu Falciani. 

Torrendi a is contus apitzus de is de su Cabuderra, cun dexi gol fatus agataus a Federicu Pinna, unu piciocheddu giòvuneddu meda, fadendi su contu chi est nàsciu in su duamilla e tres. 
Ma is ispantus prus mannus ddus est fadendi Andrea Pisanu, chi a solu est arrannèsciu a ndi pesai calincuna cosa cumenti a binticuatru gol. Po su chi pertocat is giogadoris chi giogant in atacu, is de su Cabuderra depint torrai gràtzias puru a Davide Secci, nàsciu in su milli e noicentusnorantaseti, chi nd'at pesau seti gol, e a Christian Viani puru, unu giogadori nàsciu in su milli e noicentusotanta, chi est unu de cussus cun s'esperièntzia prus manna tra totus cussus chi ddoi funt in su mundu de is diletantis sardus, fadendi su contu chi at tentu sa possibbilidadi de giogai cun una biga manna de scuadras innoi in s'isula, e candu fiat prus giòvuneddu, at giogau puru in su campionau de sa Sèrie D, e duncas, si cumprendit, cantu potzat donai una bella manu de agiudu a is cumpàngius cosa sua. 

E cun custu deu creu de podi serrai s'artìculu po custa cida puru, e si incumentzu a narai, immoi chi nci seu, ca sa cida chi at a benni apa a sighiri a castiai cumenti funt postas is cosas me is atras ses listas chi pertocant su mundu de sa Segunda Categoria, e custu sèmpiri chi su Cielu at a bolli custu beni po mei, chi custus artìculus ddus scriu e ddus pesu, e po bosatrus puru, ca custus artìculus ddus ligeis, e si torru gràtzias po sa passièntzia chi eis tentu po custa borta puru. 

E duncas, no potzu fai atru ca si imprassai a forti meda e, po su chi mi pertocat, si torraus a intendi (mellus: a ligi), sèmpiri innoi me is paginas de su Diàriu Sportivu, po su primu giòbia de su mesi de martzu.


Attività realizzata col contributo della Regione Sardegna. IMPRENTAS 2024-2025. LR 22/2018 art. 22