In su giogu de su càlciu bincit sa scuadra chi fait unu gol in prus de cussa de is aversàrius: andaus a castiai cali funt is giogadoris chi funt fadendi is ispantus prus mannus in atacu

E duncas, eia, nci dda eus giai giai fata, ma no podeus narai de nci dda essi fata po diaderus (a su mancu chi castiaus su tialu de calendàriu), e seu chistionendi, est craru (bieus chi calincunu intzertat a solu, chentza de s'agiudu cosa mia) de su mesi de Gennàrgiu, ca seus arribbaus a si scroxai po prus de sa metadi de su chi ddoi fiat de fai, fadendi su contu (e a fai is contus, cumenti s'arrapitu fatu fatu meda, nci poneus pagu, berus est?) ca si seus lassaus a is pabas prus de sa metadi de su mesi, ca, segumenti nd'arribbat apustis de totu cussu muntoni de festas chi ddoi funt de sighiri in su mesi de Idas, est unu de is prus fadiosus (a su mancu po mei), ca no est facili, de seguru, torrai a partiri, mescamente e pruschetotu cun is trabballus e cun totus is fainas chi si pertocant, poita bastat pagu, apustis chi ti satzas a tipu prochiteddu (po ddu narai diaici, chi mi ddu permiteis, est craru), e apustis chi, mancai, ti pigas calincuna diis de pàsiu e de vacantzas (e bastant, feti, cussus tres diis de pàsiu chi ti podis pigai po Nadali, o po sa primu dì de s'annu nou, o po sa festa de sa Befana, cumenti est sucèdiu, de su restu) po perdi cussu chi si iat a podi tzerriai rìtimu (furendindi su fueddu, e sa trassa, de cumenti si narat in italianu etotu), est a nai, duncas, po perdi cussu stìddiu de gana bella ca serbit po torrai a incumentzai cun is fainas, cun is trabballus e cun totu su restu de is cosas chi depeus sighiri in custa vida. 

E su pròpriu sucedit (iat a podi sucediri, po ddu narai mellus) po is scuadras de bòcia puru, ca peròu, pròpriu po no tenni de custus arroris, e de custus dannus, sighint a s'atobiai po is allenamentus puru candu is campionaus funt frimus po is festas. 
Ma su de torrai in campu, apustis de is festas, benit a essi, sèmpiri, unu "puntu de domanda", cumenti si iat a podi narai furendindi sa cosa de s'italianu etotu: eia, si cumprendit beni, deu creu, ca apustis chi abarras frimu po una pariga de cidas, intzandus is cambas cosa tua (chi funt su strumentu chi is giogadoris de bòcia manigiant po ndi cabai in campu, po curri avatu de sa bòcia e po circai de nci dda spundi a is pabas de su portieri aversàriu) si iant a podi incidrinai, e iast a podi perdi sa forma fisica, cumenti si iat a podi narai. 
Chi est pròpriu cussu chi sucedit a nosu (a mei de seguru!) candu, mancai, abarraus atesu de su trabballu cosa nosta po una parighedda de diis (mancai feti pop cussas duas cidixeddas de vacantzas ca teneus in s'istadi), e intzandus, a torrai a atacai benit a essi una cosa tostada, lègia, marigosa e fadiosa meda. E custu ddu seu narendi po circai de si cumprendi beni. 

E duncas, su mesi de Gennàrgiu, a su mancu po mei (de bosatrus no ddu sciu, ma mancai mi iat a praxi, diaderus, meda ma meda, su de sciri cumenti si pigant is cosas, cumenti si pigat sa vida) est unu de is prus fadiosus, ma gràtzias a Deus (a su Cielu, a su chi boleis bosatrus) cussu de su duamilla e binticincu, chi fatzu beni is contus (e a su mancu po immoi, isperendi ca is cosas potzant sighiri a andai ainnantis diaici), est benendu a essi unu mesi bellu e druci. 

Me is annus passaus, mi potzu arregodai feti custu, totu su druci de sa vida mi nd'arribbàt apitzus (ddiu naru diaici) feti a partiri de su mesi de Friàrgiu; est a nai, duncas, ca me in totus is annus passaus in su mesi de Gennàrgiu tenìa diaderus pagu, ma pagu meda, de arriri e de brullai: antzis, mi pariat (e seu chistionendi sèmpiri de is annus passaus, gei si cumprendit beni, deu creu) ca dònnia dì chi passàt fiat giai giai aguali a una bussinada, cumenti chi calincunu ti fessit stichendi unu corteddu in su costau. 
Diaici mi intèndia, e custu capitàt fatu fatu, chi pròpriu si depu narai sa beridadi. 

E invècias, po su chi pertocat cust'annu, is cosas funt andendi beni, est a nai, chentza dannus, ne strobbus, ne arroris, e de custu ndi torru gràtzias a su Cielu, ca apu imparau, in custa vida, ca is dannus ti ndi podint proi in pitzus, in conca, candu no ti ddu abertas nemmancu. E duncas, deu no si seu narendi chi ballat sa pena a bivi custa vida (bella e maca) cun sa timoria (totu timi timi, cumenti si megàt sa bon'anima de mamma mia) ca ti ndi potzat arrui un arrogu de cielu in conca (ddu naru gioghendi unu pagheddeddu a fai su poeta, prus ca su giornalista); ma fortzis, custa cosa de cumprendi ca oi nci seus e cras bai e circa cumenti ant a essi cuncodradas is cosas, si iat a podi agiudai a torrai gràtzias a su Cielu po totus is diis chi nci passant chentza nemmancu unu dabori, cumenti mi benit de ddu narai. 

E duncas, eia, no mi parit nemmancu berus, po torrai a nosu e a sa chistioni chi pigu sèmpiri a s'incumintzu de is artìculus chi scriu, e chi ndi pesu in sardu (e chi ndi bessint aforas dònnia, dònnia, dònnia giòbia de s'annu, puru candu su giòbia est dì de festa), ca in dì de oi (sa dì, a su mancu, innoi est bessendindi a pillu) ammancant feti noi diis po acabbai de si scroxai su primu mesi de s'annu; e duncas, chi fatzu su contu de su trabballu chi apu giai fatu po custu mesi de Gennàrgiu, e chi fatzu su contu, mescamente, de su chi m'abarrat de fai, si iat a podi narai ca, eia, is cosas funt andendumì beni, su tempus est sighendi a curri (po mei puru!) allestru cumenti chi fessit unu leporeddu chi currit in su sartu e, immoi, tèngiu feti un antru giòbia aranti (chi nd'at arrui su trinta de custu mesi etotu, candu, eia, at a mancai feti una diis, feti binticuatru oras, po nci ghetai a is pabas su primu mesi de s'annu, de custu duamilla e binticincu). 

E duncas, no potzu ca essi prexau, cumenti si narat, fadendi su contu, mescamente, ca de sa cida passada est incumentzau, a su mancu innoi in s'isula, su Carrasciali, chi est una de is festas prus togas (mescamente po is piciocheddus prus giòvunus, ma no feti!) chi teneus: a si narai sa beridadi (chi mi permiteis de mi strollicai unu pagheddeddu cun bosatrus, cumenti mi capitat de fai fatu fatu, e mescamente, po no narai feti, me is artìculus chi ndi pesu in sardu), a mei no praxit diaici meda a mi cuncodrai a maschera, cumenti m'est bèniu de si ddu narai, peròu mi andat meda meda su segundu mesi de s'annu mancai feti po su fatu chi potzu sighiri a papai su chi bollu, su chi dìsigiu, su chi mi praxit de prus, e chi est una cosa chi, cumenti incumentzat sa caresima, no mi potzu prus permiti (no mi potzu prus permiti, po una iscera chi apu fatu, est craru, e no de seguru poita mi ddu ordinat su dotori, cumenti apu sèmpiri intèndiu narai, tra is atras cosas). 

Ma de innoi a s'incumentzu de sa caresima ammancat prus de unu mesi, est a nai, prus de coranta diis, giai giai. E duncas, est una tontesa custu de pentzai a su chi at a sucedi tra prus de unu mesi e mesu. E duncas, eia, mi praxit meda, custa cosa chi mi potzu gosai sa vida (e totu su bonu chi sa vida mia mi arregalat!), e duncas, mi praxit custa cosa de su Carrasciali, su de biri is piciocheddus (e is piciocheddas) totu prexaus, in giru me is bias de sa bidda cosa mia (ma deu creu ca unu pagheddeddu, custa cosa sucedat, ancora, e mancu mali, mi megu a solu, in totus is biddas, fintzas in cussas prus pitichinninnias, chi teneus spratas in totu s'isula stimmada cosa nosta). 

E duncas, po torrai a nosu, si potzu narai puru, immoi chi nci seu, ca seu scriendi beni meda: e deu creu ca po fai beni su trabballu cosa tua, serbit a tenni sa conca sana de totus is pentzamentus chi no serbint, e custa cosa (a su mancu, de su chi contant is allenadoris de is scuadras de càlciu etotu, ca deu a bòcia, de su restu, no apu mai giogau, a su mancu, no in una scuadra, ma feti in sa bia impari a is amigus cosa mia) ballit puru po su giogu de sa bòcia: candu giogas iast a depi abarrai cuncentrau, e meda puru, feti in su chi est sucedendi in campu, poita chi ti fais pigai de is distratzionis, cumenti ddas podeus tzerriai, a sa moda de s'italianu etotu, intzandus nci ponis pagu meda a fai su dannu. 
E in su giogu de su càlciu (e custu ballit po sa vida de dònnia dì cosa nosta etotu, est craru), bincit chini sbàlliat prus pagu. 

Ma torraus a nosu: est de una bella pariga de cidas chi arrannèsciu a sbuidai (a sbuidai bastanti beni, nci ia podi aciungi custa cosa) sa conca de totus is cosas chi no mi serbint, e duncas, candu mi setzu aranti a su tialu de su computer chi manigiu po trabballai (e duncas po scriri is artìculus chi ndi bogu aforas, giai dònnia dì, po su giàssu de is amigus de su Diàriu Sportivu), mi nd'acatu ca arrannèsciu a trabballai chentza fai, giai giai, nesciunu isfortzu, e custa cosa benit a essi una beneditzioni po mei, po sa conca mia, e po su trabballu cosa mia, duncas. 
Ca chi aciutu a fai su chi depu fai po trabballu, intzandus, chi arrannèsciu a no m'arresci avatu de is centumilas tontesas ca custu mundu ndi bogat aforas, intzandus m'abarrat su tempus (m'abarrat prus tempus, si iat a podi narai diaici puru) po sighiri is atras cosas chi mi paxit a fai in custa vida, partendi, duncas, de su studiu de sa Filosofia. 

E duncas, eia, si iat a podi narai ca custu mesi de Gennàrgiu est stètiu giai giai de oru, poita seu scriendi beni po su trabballu cosa mia (e mai ammanchit su trabballu!) e apustis seu studiendi beni meda, e duncas mi intendu beni, e dònnia dì arribbu a su noti (m'eis a iscusai po su giogu de fueddus chi mi nd'est bèssiu aforas) ca mi intendu satzau de prexus (po ddu narai, torra, a trassa de poeta etotu, prus ca a trassa de giornalista); e cuntentu cumenti, fortzis, no m'est sucèdiu mai in custa vida (a su mancu, po su chi pertocat is primus corantacuatru annus de custa vida machillota chi m'est tocau de mi bivi). 

E duncas, ainnantis de atacai (e fiat ora puru, s'at a megai calincunu de bosatrus) cun is chistionis acapiadas a su giogu de sa bòcia, a su mundu de is giogadoris diletantis chi giogant me is scuadras chi ddoi funt innoi in Sardìnnia, si naru feti custu (e si promitu, giai de immoi, chi at a essi s'ùrtimu strollichimini chi nci sticu in cust'artìculu!): seu scriendi diaici beni ca tèngiu giai unu pagheddeddu de rigas pesadas (est a nai: scritas) po is artìculus in sardu chi ant a bessiri in su benidori (una cosa chi, siat craru, mi potzu permìtiri feti, e si naru feti, po is artìculus in sardu, e no de seguru po is chi ndi pesu in italianu, e custu sucedit poita me is artìculus in sardu tèngiu sa possibbilidadi de mi strollicai unu pagheddeddu de prus de su chi fatzu me is artìculus in italianu, e mescamente, mi potzu strollicai in sa primu parti de s'artìculu, fadendi su contu ca, cumenti as ai cumprèndiu a solus, me in sa primu parti de s'artìculu mi benit, e mi praxit, a chistionai, a su mancu po unu pagheddeddu, de totu su chi tèngiu badda badda in conca, e dònnia dì, gràtzias a su Cielu, tèngiu calincuna cosa nova chi mi baddat in conca, e custu at a essi, mancai, poita lìgiu calincuna cosa de nou, est a nai, ca lìgiu unu libbru giai dònnia dònnia dònnia dì, e mescamente a su noti, ainnantis de mi ndi andai a dromiri. E duncas, fia narendusì ca seu scriendi diaici beni, diaici allestru, ca tèngiu sa possibbilidadi (e gràtzias a Deus, m'acudu a narai, puru) de scriri unu pagheddeddu po s'artìculu chi nd'at a bessiri a pillu feti sa cida apustis, e duncas, eia, si iat a podi narai ca seu in vantàgiu, cumenti si iat a podi narai po una partida de càlciu. 

Ma po su chi mi pertocat, no seu gioghendi contras a una scuadra de aversàrius, ma feti contras a su tempus (chi passat, chi sighit a passai e chi, a bortas, mescamente candu seu apicau a calincuna de cussas tontesas chi s'apu arremonau ainnantis, parit totu chi si ndi potzat bobai de unu segundu a s'atru) e, mescamente, po si narai sa beridadi, unu scritori giogat sa partida cosa sua contras a sa gana bella chi tenit, o chi no tenit. 

Eia, ddu eis a podi cumprendi mancai a solus puru: unu scritori (ma sa pròpriu cosa ballit po unu chi depit studiai, e duncas, ballit po unu chi depit abarrai a totu dì sètziu in sa cadira, aranti de unu libbru, po oras e oras e oras de sighiu) no tenit atra possibbilidadi de fai su trabballu cosa sua su chi no ponendi su cuiteddu in sa cadira; e si cumprendit (est una cosa chi naràt puru Michel Foucault, ca po mei est stètiu unu de is filosofus prus mannus chi eus tentu, a su mancu innoi in Europa, e a su mancu in custus ùrtimus centus annus, diaici apu arremonau sa filosofia puru in s'artìculu de oi e potzu sighiri cun su coru selenu) ca su de scrii (o de studiai), mancai po medas siat una cosa stramba meda feti a dda pentzai, benit a essi una cosa fadiosa meda. 

No si naru ca su de scriri e studiai siat fadiosu, mancai, cumenti su trabballu de is minadoris, o cumenti su trabballu chi faint is massajus (deu arremonu totus is massajus chi ddoi funt, ancora in dì de oi, in Bidd'e Sorris), ca si ndi depint abarrai a reu, in peis, est a nai, strantaxius, a totu dì, asuta de sa basca (in s'istadi), e a su frius, in s'ierru, po stegai is canciofas (o is tamatas), o po prantai (o po ndi boddiri de terra) is ochiellus; e duncas, eia, po su chi pertocat su corpus, no potzu narai, custu est pagu ma seguru, ca su trabballu cosa mia (po ddu narais mellus puru, su trabballu ca m'est tocau de sighiri in custa vida, gràtzias a su Cielu e a cussa chi Gianbattista Vico tzerriàt sa divina providentzia), siat su prus fadiosu de su mundu, e sa pròpriu cosa si iat a podi narai po su chi pertocat is daboris, ma peròu su de scriri, cumenti su de abarrai a studiai apitzus de is lìbbrus po oras e oras e oras, benit a essi fadiosu, custu est pagu ma seguru, po sa conchitedda, ca apustis de una bella pariga de oras, est cumenti chi incumentzit a ndi bogai fumu de is origas, cumenti si iat a podi narai, po brullai unu pagheddeddu. 

E duncas, serru diaderus cun custu stròllichimini, chi at a essi s'ùrtimu: unu scritori depit agatai sa gana de si ponni a fai su chi depit dònnia dì, e su de scriri (si megàt Michel Foucault) po torrai a nosu, no praxit a nemus. Ma chi ses unu scritori, duncas, s'at a parri una tontesa, cussu depis fai. 
E depis circai de agatai sa gana po ddu fai feti fadendi su contu apitzus de tui etotu: no nc'est de seguru un allenadori, cumenti mancai sucedit in su mundu de sa bòcia, chi t'agiudat a andai ainnantis in sa faina cosa tua; no tenis cumpàngius chi t'agiudant a pretziri is fainas e is trumentus (unu scritori trabballat a solu, gei si cumprendit) e no tenis nemmancu is tifosus totu a giru a giru (cumenti invècias sucedit, mancai, me is partidas de bòcia, e fintzas me is partidas de is categorias prus prus pitichinninnias, cumenti iant a podi essi is partidas chi si giogant me is campionaus de sa Segunda e de sa de Tres Catregorias, cumenti seus costumaus a dda tzerriai) chi ti donanrt sa fortza, mancai, po scriri prus allestru (cumenti, mancai, is tifosus donant sa fortza a is giogadoris in campu, po curri, mancai, prus a forti de su chi funt fadendi o prus a forti de su chi iant a fai chi s'agatessint a solus); e duncas, si iat a podi narai (po segai a crutzu sa chistioni) ca unu scritori si depit arrangiai a solu. 

E immoi andu a si contai su chi apu lìgiu me is diarus de Jack Kerouac, chi est stètiu unu de is scritoris de importu prus mannu po su chi pertocat sa literadura americana, e mescamente unu de is scritoris de importu prus mannu in cussa chi estus a podi tzerriai sa Beat Generation (po ddu narai a s'americana, e chi, chi provaus a furriai sa cosa in sardu, iat a benni calincuna cosa cumenti: sa generatzioni de is personas chi ant pèrdiu, e chi funt stètias bintas de sa vida etotu, e custu sucediat, a su mancu in America, me is annus sessanta e setanta). 

E duncas, apu agatau custu: po arrannèsci a scriri unu bellu tanti de paginas, e de rigas, dònnia dì, Kerouac pigàt a esèmpiu su campionau de baseball chi sighiàt issu, in America. E duncas, in su baseball, cumenti in su mundu e in su giogu de su càlciu etotu, ddoi funt cussus giogadoris chi faint, chi ndi pesant, in unu annu, una surra manna de puntus (o de gol, chi chistionaus de su giogu de sa bòcia). E duncas, Kerouac fadiat finta ca unu puntu de unu giogadori de baseball (ma deu, est craru, ia a podi fai su pròpriu cun is giogadoris diletantis chi currint me is campionaus pesaus de is de sa Federatzioni Italiana de su Giogu de su Càlciu, e de is de sa Lega Natzionali de is Diletantis) ballessit, po si fai un esèmpiu, dexi paginas de is chi depiàt scriri issu. E duncas, a corpus de paginas, circat de mantenniu su rìtimu (eia, torra cun custu fueddu, ca po custa cida est brintendumì beni in conca) de su giogadori prus forti chi ddoi fiat, in cussa cida, in cussu mesi. Est a nai ca, chi su tali fadiat calincuna cosa cumenti a dexi puntus in una partida, issu, po ddu sighiri, si poniat in conca de depi scriri centu paginas in una cida. Po si fai feti un esèmpiu, est craru, berus? 

E immoi, chi seis de acòrdiu, si furriu sa cosa andendi a castiai sa classifica de is giogadoris chi funt fadendi, chi ndi funt pesendi su tanti de gol prus mannu, me is campionaus de s'Ecellenza e de sa Promotzioni, chi funt is duus campionaus prus matucus, prus mannus, e prus de importu, tra totus cussus chi sigheus cun su Diàriu Sportivu, e chi est una cosa ca no apu ancora fatu po su chi pertocat is artìculus in sardu. 

E duncas, po su chi pertocat su campionau de s'Ecellenza, a su primu postu de sa lista de is giogadoris chi funt fadendi su tanti prus mannu de gol, agataus Ezequiel Franchi, chi giogat impari a is de s'Ossese, chi tenit fatus, in dì de oi (e seu castiendi is numerus candu su tialu de calendàriu narat ca seu lòmpiu a su cuindixi de su mesi de Gennàrgiu, po essi prus crarus e prus pretzisus puru), calincuna cosa cumenti  a dexi gol. E duncas, a bollu fai su giogu chi fadiàt Kerouac, deu ia a podi fai finta ca dònnia gol de Franchi (dònnia gol chi Franchi ndi pesat, po ddu narai mellus puru) iat a podi balli, ddi naraus diaici, calincuna cosa cumenti a tres paginas chi scriu po is artìculus in sardu. E duncas, chi Franchi ndi depessit pesai duus gol in sa partida chi at a giogai in custu fini de cida chi est arribbendindi, deu, po abarrai a su passu su (po su chi pertocat su trabballu cosa mia, est craru, berus est?) ndi ia a depi pesai calincuna cosa cumenti a ses paginas in una cida (o in una pariga de diis, a segunda de su tempus chi tèngiu, e de su tempus chi m'abarrat). 

E immoi chi nci seus, andaus a castiai cumenti funt postas is cosas: a su segundu postu de sa lista de is giogadoris chi nd'ant pesau su numeru prus mannu de gol, agataus, a Sergiu Nurchi, chi giogat impari a is de su Muristeni, cun noi gol fatus. A su de tres postus agataus Kaio Cesar Florencio Piassi, chi gigoat impari a is de su Budune, cun seti gol. E seti gol funt puru cussus chi at pesau Luca Scognamiglio, chi giogat impari a is de s'Alghero Calcio, chi est una de is scuadras (fortzis cussa de importu prus mannu, a narai sa beridadi) tra totus cussas chi nd'ant pesau in s'Alighera (e gei si cumprendit beni, deu creu). A su de cincu postus in sa lista (sigheus mancai diaici, ca cumenti si naru dònnia, dònnia borta, no sciu mai cali arrastu ant a pigai is artìculus chi ndi pesu in sardu, ainnantis de mi ponni a ddu fai, a ddu scriri) agataus un antru giogadori de su Budune, e seus chistionendi de Diego Barboza, chi at acutu a ndi pesai, in custa primu parti de sa stagioni, calincuna cosa cumenti ses gol, chentza nemmancu unu gol fatu cun unu tiru de is undixi metrus. A su de ses postus in sa lista, agataus un antru giogadori de is de s'Ossese (sa scuadra de Osssi, si cumprendit berus?), e seus chistionendi de Filipu Mascia. Cun cincu gol fatus, a su de seti postus in sa lista, agataus Mateu Argiolas, chi giogat in sa scuadra de su Crabonaxa; cun cincu gol agataus puru Heber Chiappino, de su Ilartzi, impari a Melessi, unu giogadori de is de su Tèmpiu, e impari a Andrea Porcheddu, un antru giogadori de is de s'Ossese; e si cumprendit, pròpriu de custas cosas, cali siant is scuadras chi funt currendi prus a forti in su campionau de s'Ecellenza. 

E immoi chi seu arribbau a custu puntu de is chistionis, a custu puntu de s'artìculu (cumenti si iat a podi narai, puru), andaus a castiai cumenti funt postas e cuncodradas is cosas po su chi pertocat su campionau de sa Promotzioni, partendi, duncas, de sa lista innoi agataus totus is giogadoris chi funt arrannèscendi a ndi pesai su tanti prus mannu de gol. E fiat ora puru, mi megu a solu a solu, fadendi su contu ca seu de una pariga de cidas ca circu de chistionai de su mundu de sa Promotzioni, ma a sa fini mi fatzu sèmpiri pigai de is strollichiminis (gei ddu scieis cumenti seu fatu e cumenti andant is cosas, cumenti funtzionant is cosas aintru de sa conca cosa mia, po si ddu narai, mancai, mellus puru) e dda acabbu a sighiri atras legas, ca cumenti si naru e si arrapitu fatu fatu, no sciu mai cali legas apa a scerai de nci stichiri aintru de s'artìculu de su giòbia, ainnantis de mi ponni a ddu fai; e chi pròpriu si depu narai sa beridadi, mi capitat, mancai, de abarrai a totu cida a pentzai a is legas chi ia a podi pigai, chi ia a podi sighiri me in s'artìculu de sa cida apustis, ma candu m'agatu aranti de sa tialu de pagina bianca (cumenti si iat a podi narai, mancai deu scria a su computer, e duncas no nci funt paginas de paperi de preni, ma feti paginas in su tialu de schermu, de su cuadru, e ddu tzerriu diaicicumenti apu agatau scritu immoi immoi in su fueddariu pesau de Rubattu, chi est cussu chi manigiu po circai is fueddus chi mancai no mi benint in conca, o is fueddus chi pertocant fueddus modernus, ddi naraus diaici, isperendi ca si cumprendat su chi si bollu e seu circhendi de si narai), no potzu mai sciri innoi mi portat sa conchitedda cosa mia, totu maca e ghetada a pari cumenti est. 

Ma, e fiat ora puru, a cantu puru nci dda eus fata. 
E duncas, no m'abarrat atru de fai ca sighiri in cust'arrastu, cumenti apu fatu, de su restu, po su chi pertocat su campionau de s'Ecellenza, chi s'apu arremonau immubagora (chi est unu fueddu chi apu sèmpiri intèndiu narai innoi in bidda, de sa bon'anima de mamma mia e de una tzia chi teniàt, mancai, peròu, no arrannèsciu a agatai su fueddu in su fueddàriu, ma deu sigu a ddu manigiai a su pròpriu, poita, tra is atras cosas, mi praxit meda, ma meda, cumenti sonat) de su restu. 

E duncas, a su primu postu de sa lista, Alfredo Francisco Martins, unu giogadori chi at fatu calincuna cosa cumenti a doxi gol cun sa camisedda in pitzus de is de su Lanusè, ca tra is atras cosas s'agatant a su primu postu de sa lista. A su segundu postu de sa lista de is giogadoris chi funt pesendindi su numeru prus mannu de gol, agataus Buba Darboe, ca cust'annu est gioghendi e est donendu una bella manu de agiudu a is de s'Arborea: e duncas Buba fintzas a oi nd'at pesau calincuna cosa cumenti a undixi gol, cun unu gol chi nd'est arribbau gràtzias a unu tiru de is undixi metrus (eia, cussu ca in italianu tzerriaus "calcio di rigore", e si ddu naru po si cumprendi mellus a pari). A su de tres postus de sa lista, agataus a Alessiu D'Agostino, ca cust'annu (e seus chistionendi, est craru, po su chi pertocat sa stagioni sportiva de su duamilla e binticuatru – duamilla e binticincu) est gioghendi e donendu una manu de agiudu manna meda a is de su Sant'Aleni, chi funt sighius de un allenadori bravu e cun una esperièntzia manna a is pabas cumenti est Maurizio Rinino. 
E duncas, D'Agostino (ca in sa carrièra cosa tua at acutu a giogai, at tentu sa possibbilidadi de giogai, ca sonat mellus puru, impari a is de sa Ferrini de Casteddu, po una bella pariga de annus, in su campionau de s'Ecellenza e fintzas in Sèrie D cun sa camisedda de is de su Castiadas) tenit fatus calincuna cosa cumenti a noi gol, chentza nemmancu unu gol fatu cun is tirus de is undixi metrus. Cun noi gol etotu, agataus Mauru Ragatzu, unu de is atacantis prus fortis, e cun s'esperièntzia prus manna a is pabas tra totus cussus chi ddoi funt in dì de oi in su mundu de sa Promozioni, e chi cust'annu est gioghendi impari a is de sa Villacidrese (sa scuadra, toga meda, ca su presidenti Marrocu nd'at pesau in Biddacidru), apustis de essi bintu su campionau, e sa Copa Italia puru, a narai sa beridadi, cun sa camisedda de is de su Muristeni (ma totu custu est sucèdiu, est craru, in su campionau de s'annu passau, si cumprendit, berus?). 
Sèmpiri cun noi gol in buciaca (est a nai, cun noi gol giai fatus) agataus Robertu Serra, chi cust'annu est gioghendi impari a is de su Cus de Casteddu (ca, si ddu torru a arragodai torra, est sa scuadrixedda chi nd'ant pesau, e chi ndi pesant dònnia dònnia annu, is de s'Universidadi de Casteddu), e chi est fadendi ispantus mannus, fadendi su contu, in prus, ca fintzas a s'annu passau, e po cuatrus annus de sighiu, giogàt impari a is de su Cannonau de Jerzu, ma fadiat parti, mescamente, de sa scuadra de giòvunus (cussa chi podeus tzerriai sa Juniores, a trassa de cumenti faint is ingresus, ma is italianus puru funt costumaus a tzerriai diaici sa scuadra chi pertocat totus cussus giogadoris chi tenint prus pagu de dexannoi annus, e si cumprendit beni, berus est?). 
A narai sa beridadi, peròu, Roberto Serra, mancai siat giòvuneddu meda, fadendi su contu ca est nàsciu in su duamilla e cuatru, e tenit giai giai bintun'annus fatus, at acutu, at tentu sa possibbilidadi de giogai unu bellu tanti de partidas impari a sa primu scuadra (sa scuadra de is mannus, si iat a podi narai diaici puru) de is de su Cannonau de Jerzu. E si iat a podi narai, immoi chi nci seus (e de su restu, seu de una pariga de cidas ca bisammu de arribbai pròpriu a si chistionai de cumenti funt andendi is cosas me in su campionau de sa Promotzioni e, mescamente, in sa Lista A), ca is de su Sant'Aleni funt fadendi una stagioni toga meda, e funt fadendi ispantus mannus, fadendi su contu (e a fai su contu nci poneus pagu meda, chi pròpriu si ddu depu narai) ca funt arrannèscius a binci calincuna cosa cumenti a seti partidas de sighiu, po bintunu puntus in totu, partendi de cussa chi iant bintu, in domu cosa insoru, contras a is de s'Arborea (chi s'apu arremonau ainnantis puru), cun su resultau de duus a unu, candu fiat su binticuatru de su mesi de Donniassantu; e apustis nd'est arribbada sa bìncida, bella e tunda tunda, cumenti si iat a podi narai, cun su resultau de tres a zeru, in domu de is de su Cus de Casteddu (chi s'appu arremonau immubagora, de su restu, candu fia contendusì de sa stagioni de Roberto Serra), in s'ùrtima bessida de su mesi de Idas, chi s'est gigoada su trinta, chi fiat, tra is atras cosas, s'ùrtima dì de su mesi. E in sa isfida chi nd'est arribbada apustis, seus chistionendi de sa partida chi s'est giogada s'otu de su mesi de Idas, contras a is allenus de su Bidda Matzraxia, is de su Sant'Aleni funt arrannèscius a binci, torra, cun su resultau de tres a zeru. E cun su resultau de tres a zeru ant bintu puru in sa partida chi s'est giogada sa cida apustis, est a nai su cuindixi de su mesi de Idas, in domu de is de Calciu de Pirri, po su chi in ingresu si iat a podi tzerriai derby (chi est su modu chi teneus po tzerriai is partidas tra duas scuadras chi nd'arribbant de sa pròpriu citadi, o de sa pròpria bidda, o ballit aguali, de duas biddas chi s'agatant s'una a su costau de s'atru, cumenti iant a podi essi, de su restu, Pirri cun Casteddu). 
In s'ùrtima bessida de su duamilla e binticuatru, cun is partidas chi si funt giogadas su domìnigu ainnantis de Nadali, est a nai su bintiduus, is de su Sant'Aleni funt arrannèscius a bati, a binci contras is de s'Atleticu de Casteddu (un antru derby, duncas...), ma custa borta cun su resultau de duus a zeru. E in sa primu bessida de s'annu nou ca s'est giogada su cincu de su mesi de Gennàrgiu (eia, sa dì ainanntis de sa festa de sa Befana e de is tres reis, chi si praxit de prus cumenti sonat) is de su Sant'Aleni nd'ant cassau is tres puntus prenus in sa isfida chi ant giogau in domu de is de s'Orrolose, sa scuadra de Arroli (si cumprendit beni, berus est, chentza de s'agiudu cosa mia...). Ma deu creu de podi narai, chentza timi de mi sballiai, ca is de su Sant'Aleni apant bintu sa partida de importu prus mannu (prus mannu, a su mancu, tra custas seti partidas chi s'apu arremonau) in sa isfida de s'undixi de su mesi de Gennàrgiu, candu is biancu-birdis funt andaus a fai visita, cumenti si narat, a is de su Lanusè, ca de unu bellu arrogu de tempus, de unu bellu iscantu de giorronadas, s'agatant a su primu postu de sa lista. E is meris de sa lista, is primus de sa classi (cumenti si iant a podi tzerriai is de su Lanusè) nd'ant ingotu una bella surra, chi fadeus su contu ca sa partida s'est serrada cun su resultau de tres a unu po is allenus. E fait a narai, puru, ca is de su Sant'Elena funt, a su mancu in dì de oi (ca in su giogu de sa bòcia, diaici cumenti in sa vida, podit sucediri de totu, in dònnia segundu, e ballit, est craru, siat po su beni ca po su mabi), funt una de is scuadras ca funt currendi prus a forti.

E immoi chi nci seus, fadendi su contu ca mi seu spassiendi meda, sigheus a castiai cumenti funt cuncodradas is cosas me in sa lista de is giogadoris chi funt pesendindi su tanti prus mannu de gol, tra totus cussus chi currint in sa Lista A de su campionau de sa Promotzioni. Cun otu gol fatus (si iat a podi narai: cun otu gol in buciaca) agataus Nicolò Agostinelli de is de su Guspini, ca cust'annu funt sighius de un allenadori bravu, mancai siat ancora giòvuneddu meda, cumenti a Cristian Dessì. Cun otu gol ddoi est puru Nicola Vacca, chi cust'annu est gioghendi impari a is de su Castiadas. Cun seti gol agataus unu giogadori de su Terraba Frantziscu Bellu, e seus chistionendi, mescamente, de Rodrigo Ezechiel Ramos. 

A su de noi postus in custa lista, agataus un antru giogadori chi nd'arribbat de foras. E po mei (si ddu naru craru e tundu, immoi chi nci seu) no nc'est nudda de mabi chi unu giogadori nd'arribbat de un'antra parti de su mundu po giogai a bòcia me is campionaus chi ndi pesant in s'isula bella e stimmada cosa nosta; ma de seguru, eia, fait unu pagheddeddu de ispantu su pentzai ca, est craru, is giogadoris chi nd'arribbant de foras, de atrus logus, chi mancai s'agatant atesu meda de sa Sardìnnia, po giogai, po ndi cabai in campu, bollint unu tantixeddu de dinai, desinò no giogant de seguru; eia, a cantu parit si cumportant a trassa de cussus giogadoris professioneris chi, mancai, agataus me is campionaus de importu prus mannu, cumenti mancai iat a podi essi su campionau de sa Sèrie A, innoi is giogadoris, is grandus campionus, ndi ingollint una surra manna de dinai (una barca de dinai, si iat a podi narai, mellus puru). E invècias is diletantis, (chi pigaus po bonu su nomini e is sentidus chi tenit acapiaus) iant a depi cabai in campiu feti po si spreviai, po su spàssiu chi nd'agatant, e invècias, ita sucedit? Ca a binci praxit unu pagheddeddu a totus (e no feti a is grandus scuadras de sa Sèrie A, e no feti, po si cumprendi, a is grandus scuadras chi currint, mancai, po ndi gassai sa Cupa de is Campionis, cumenti dda tzerriastus fintzas a una pariga de annus fait, e chi, mancai, podeus castiai feti a sa tialu de sa televisioni), e duncas, si cumprendit, in su mundu de is diletantis puru, ddoi funt presidentis chi faint una biga de sacrifìcius, cumenti si iat a podi narai, partendi de is assotzius chi faint parti de sa lista de scuadras chi currint in su campionau de s'Ecellenza, e chi bisant, duncas, de nd'artziai in su campionau de sa Sèrie D, chi est sa porta, ddi naraus diaici, chi candu s'oberrit ti permitit de brintai in su mundu de is professioneris, ma sa pròpriu cosa si iat a podi narai de is assòtzius prus mannus chi agataus me is duas listas de sa Promotzioni; ma sa pròpriu cosa sucedit, mancai prus in piticu, me is campionaus de sa Primu Categoria e de sa Segunda Categoria, a segunda de is obbietivus chi tenint. 

E duncas, eia, seu narendusì totu custu po si fai a cumprendi ca in su mundu de is diletantis, a su mancu in dì de oi, ca me is tempus passaus fortzis, e naru fortzis, is cosas no fiant cuncodradas diaici, a cantu parit, de su chi ndi potzu cumprendi, giràt unu bellu tanti de dinai. 
Ma torraus a nosu.
Cun ses gol agataus un antru giogadori forti meda, mancai siat ancora giòvuneddu, e seus chistionendi de Andrea Iesu, ca in dì de oi est gioghendi impari a is de su Sant'Aleni de Cuartu. 
E cun custu serru cun is chistionis acapiadas a sa Lista A de su campionau de sa Promotzioni (chi fia arremonendusì de una biga de cidas, e immoi potzu narai, eia, ca nci dda apu fata!), ma nc'est de narai, puru, ca ia a podi andai ainnantis (cumenti tèngiu sa bidea de fai, tra is atras cosas) fadendi sa pròpriu cosa po su chi pertocat sa Lista B, sèmpiri de su campionau de sa Promotzioni, mi parit bastanti craru. 
E duncas, tocaus a biri! (cumenti si megàt sèmpiri sa bon'anima de nonna mia). 

A su primu postu de sa lista agataus Lorenco Zela, unu giogadori chi est fadendi a biri a totus cantu est forti giai de una parigas de stagionis, a nai sa beridadi, e chi est gioghendi, de duus annus, cun sa camisedda de is de s'Altzaghena. Duncas, Zela po immoi tenit fatus calincuna cosa cumenti a catodixi gol e mi benit de pentzai ca su primu artìculu chi apu scritu po is novas de su Diàriu Sportivu fiat, pròpriu, apitzus de sa carriera cosa sua, e seu chistionendi de un artìculu chi ndi fiat bessiu aforas me is ùrtimus mesis de su duamilla e dexannoi, chi no mi megu a sballiai (e mi parit pròpriu ca no mi megu a sballiai, e si ddu naru po arriri, e si cumprendit, ca dònnia tanti fait beni, diaici narant is dotoris, a su mancu). 
A su segundu postu de sa lista chi pertocat is giogadoris chi ndi funt pesendi su tanti de gol prus mannu de totus, agataus Santiago Mateucci, chi giogat impari a is de su Coghinas, sa scuadra sighida de Paolu Congiu, e chi s'agatat, in dì de oi, a su segundu postu de sa lista, a is pabas de is de su Uddusò, ca funt cussus chi funt currendi prus a forti, e immoi eus a biri ita totu nd'at a bessiri aforas in sa segunda parti de sa stagioni (cussa chi podeus tzerriai, e difati tzerriaus diaici, sa lista de partidas chi ballint po sa torrada). 
Cun undixi gol fatus, agataus Enzo Fink Hassan Fiori, chi giogat impari a is de su Logusantu e, impari a issu, sèmpiri cun undixi gol, agataus puru Giuseppe Meloni, ca megat a giogai cun sa camisedda bianca e arrùbia apitzus de is de su Bonorva. A su de cincu postus in custa lista, agataus a Domenico Saba, unu de is atacantis prus fortis, e prus matucheddus e, duncas, cun s'esperièntzia prus manna, chi s'agatant in dì de oi in totu su mundu de sa Promotzioni (custu est pagu ma seguru), ma sa chistioni iat a podi balli, deu creu, puru po totu su mundu de su càlciu sardu, chi pròpriu depeus narai is cosas cumenti funt. A su de ses postus, a is pabas de Domenico Saba, agataus un antru giogadori sardu (e si ddu naru po essi crarus: no tèngiu nudda, ma pròpriu nudda de narai, nudda contras a cussus giogadoris chi nd'arribbant de atras partis de su mundu, mancai de s'Africa puru, po giogai a bòcia cun is scuadras chi s'agatant spratas in totus is citadis e mescamente in giai totus is biddas chi ddoi funt in Sardìnia), e seus chistionendi de Gavino Molzzu, ca cust'annu est circhendi de donai una bella manu de agiudu a is de s'Atleticu de Bono, chi s'apu arremonau pròpriu sa cida passada (e chistionu mescamente, est craru, de is artìculus chi ndi pesu in sardu, chi calincunu bollit andai a cumprendi mellus de ita seus chistionendi), candu s'apu torrau a contai totu su chi mi iat scoviau Celestino Ciarolu, chi est, cumenti si eis arregodai beni a solus (e desinò deu seu innoi, setziu po oi puru a fai su trabballu cosa mia, po custu motivu puru: po si nd'arregodai is cosas chi si funt bessidas a foras de conca, ca si sciit beni cumenti andant custas cosas...), s'allenadori chi est sighendi sa scuadra de s'Atleticu de Bono de una pariga feti de cidas, apustis chi Massimo Altarozzi at decìdiu de pinnigai is bagaglius, mundai su logu e saludai a totus (cumenti si iat a podi naraia e cumenti mi praxit a narai, de su restu). A su de seti postus in sa lista, cun seti gol, agataus un antru atacanti, forti meda, chi giogat in s'Usinese, e seus chistionendi de Michele Chelo (chi apu tentu su prexei, tra is atras cosas, de intendi a su telefunu pròpriu me is cidas passadas, e isperu de ddi ai portau bona sorti!). 
E si iat a podi narai, duncas, ca s'Usinese tenit sa copia de atacantis prus forti de su campionau de sa Promotzioni (chentza nudda de ndi bogai a sa fortza de totus is atras scuadras! Siat craru), ma a bortas, su de tenni duus giogadoris diaici fortis in atacu no bastat (no est bastanti, si iat a podi narai, ca sonat mellus puru) po binci su campionau, fadendi su contu ca is de s'Usinese, a su mancu in dì de oi, s'agatant a su de tres postus in sa lista; e invècias is de su Uddusò, ca funt primus cun una bella pariga (pariga a sa sarda, si cumprendit e nci iat a mancai atru puru) de puntus in prus de is scuadras chi tenint a is pabas, no tenint nesciunu de is giogadoris de sa rosa cosa insoru me is primus postus de sa lista chi pertocat is giogadoris chi funt pesendindi su tanti del gol prus mannu (e chi, in italianu, estus a podi tzerriai, cumenti fadeus, de su restu, "classifica dei capocannonieri"), fadendi su contu ca Ousmane Balde (ca est s'atacanti prus forti ca tenint in sa rosa cosa insoru is de su Uddusò) est stètiu bonu a ndi cassai, fintzas a oi, si cumprendit, calincuna cosa cumenti a seti gol, e tenit aranti (aranti in sa lista, si cumprendit berus?) Roberto Seu, unu giogadori de su Coghinas, e fintzas a Gino Noli, unu piciocu chi est donendu una bella manu de agiudu a is de su Tonara, cun is arrùbius-nieddus chi funt circhendi de ndi cassai sa sarvesa, sèmpiri po su chi pertocat su campionau de sa Promotzioni. 

E cun custu, deu creu de essi acabbau, po oi puru e duncas po custa cida, su logu e su tempus po si scriri in sardu. E chi totu andat beni, chi totu andat cumenti depit, si potzu giai narai ca, chi Deus at a bolli custu beni po mei puru, s'eus a ligi torra, sèmpiri cun s'artìculu scritu e pesau in lingua sarda, tra seti diis, est a nai, duncas, giòbia chi at a benni. 
E in s'interis, si imprassu a forti!




Attività realizzata col contributo della Regione Sardegna. IMPRENTAS 2024-2025. LR 22/2018 art. 22