Is de su Bonnanaro funt fadendi ispantus mannus in sa Lista G de su campionau de sa Segunda Categoria

E duncas, cumenti mi praxit a s'arrapiti fatu fatu, mancu mali chi su tempus est sighendi a andai ainnantis, mi megu a solu a solu e, duncas, a fai is contus nci poneus pagu meda, seus arribbaus a su primu giòbia po su chi pertocat su mesi de Donniàsantu puru ca, a su mancu po mei, a su mancu po su chi ferrit is cosas mia (ddi nau diaici, isperendi ca no si sonit tropu mabi sa frasia po cumenti dda apu cuncodrada, fadendi su contu, mescamente, ca a bortas mi praxit, puru, a giogai a fai unu pagheddeddu su poeta, chi pròpriu si ddu depu narai) est unu de is prus fadiosus, de is prus tostadatzus (po ddu narai a sa sorresa, est a nai, po fueddai cumenti si fueddat innoi in Bidd'e Sorris, chi est sa bidda innoi seu stètiu pasciu, fintzas de candu fia unu notzenteddu, e innoi ancora m'agatu, apustis de corantatres annus de vida, ma tra pagu ant a essi corantacuatru, sèmpiri po mi torrai a apicai a sa chistioni de su tempus chi passat o, mellus, de su tempus chi si ndi bobat), aguali a su mesi de martzu. 
Eia, si iat a podi narai, duncas, ca tra totus is doxis mesis chi nci brintant in unu annu (seu sighendi a giogai a fai su poeta e, duncas, seu circhendi de manigiai is fueddus cun unu pagheddeddu de fantasia, chi cumprendeis su chi si bollu narai, e isperu, diaderus, chi si cumprendat!), su mesi de Donniasantu (e cussu de Martzu, o po essi prus pretzisus puru, is coranta diis chi ddoi funt ainnantis de sa Pasca Manna, cussus chi tzerriaus, a trassa de s'italianu etotu, carèsima) est cussu chi depu manigiai cun s'atentzioni prus manna: est a nai, duncas, po si fai cumprendi mellus de ita totu seu chistionendi, ca me is ùrtimus annus, chi calincuna cosa si podit arrogai, chi calincuna cosa podit andai trota (est a nai, duncas, no beni, no dereta cumenti iat a podi fai), podeis abarrai segurus de su fatu ca at a andai trota, at andai mabi, s'at a arrogai (mancai, puru, in milli arrogus) in su mesi de Dònniasantu. E duncas? 
E duncas custu bollit narai ca no mi potzu fai pigai de su disisperu candu mi proint in conca is arroris (custu a su mancu est cussu ca m'arrapitu, fatu fatu), ma s'unica cosa chi si podit fai est cussa de si arremangai is manigas (cumenti si narat, cumenti apu sèmpiri intèndiu narai innoi in Bidd'e Sorris, a su mancu, e chi est unu fueddu chi m'est sèmpiri praxu meda, ma meda, po cumenti sonat, est craru puru) e circai de si ndi strantaxai acoitu; su de circai de reparai is cosas (candu s'arrogant) est sa cosa chi serbit de prus de totus is atras (eis mai intèndiu ca sa vida podit essi sa scola prus bona chi podeus agatai?) impari, no nc'eis a crei mai (e seu brullendi, gei si cumprendit), a cussa chi tzerriaus passièntzia. A su mancu po su chi mi pertocat. 


E de su restu ddu scideus beni, ca seus fatus de petza moddi, e is ossus cosa nosta, mancai si parint tostaus, si iant a podi segai in centumilla arrogheddus, ca bastat a ddus atumbai pagu pagu e faint a tipu biscotus (e megu a brullai, gei si cumprendit deu creu, ma nemmancu diaici meda). 
Po no si contai de cantu podit essi tonta sa vida: ca oi ses bellu allirgu, ca tenis sa gana e sa possibbilidadi de sighiri totus is cosas chi ti pertocant (e ballit po is cosas serias, de importu, ma ballit puru po cussa surra manna, manna cumenti su mari, de tontesas chi ddoi funt in custu mundu e chi serbint, feti, a si fai perdi su tempus chi nemmancu teneus) e cras mancai ti ndi scidas in s'aposentu de unu uspidali. Sa vida est maca, maca meda, e nosu, in prus, no seus innoi po ponni arrexinis, est a nai ca no s'estus a si depi scaresci mai ca su tempus cosa nosta at a spaciai; e duncas, si naru totu custu no po si fai carrigai de su disisperu, mi parit craru puru, ma antzis, po si narai ca a mei mi benit totu de torrai gràtzias a su Cielu po dònnia dì chi mi bivu in saludi, chentza tropu daboris de mi scroxai (si ddu nai diaici, a trassa de poeta etotu, ancora!), e no potzu fai atru, in prus, ca torrai gràtzias a su Cielu poita, (e mancu mali!) tèngiu unu trabballeddu chi no est tropu fadiosu (mi praxit a ddu narai diaici, duncas, ca gràtzias a Deus depu abarrai innoi a totu dì a cracai is butoneddus de sa tialu de sa tastiera). E custu de torrai gràtzias a su Cielu po sa saludi e su trabballu, no nc'eis a crei mai (o fortzis eia, mescamente chi seis costumaus a ligi is artìculus chi ndi pesu in sardu e ndi bessint aforas in su giàssu de is amigus de su Diàriu Sportivu, dònnia dònnia giòbia de s'annu, chentza de ndi perdi nemmancu unu!), est una cosa chi fatzu, a su mancu po una borta (ma benint a essi fintzas tres o cuatru, dònnia, dònnia, dònnia dì chi Deus m'arregalat). 

E duncas, m'eis a iscusai chi apu incumentzau s'artìculu de custa cida diaici, ponendinci in mesu cosas pagu allirgas cumenti iant a podi essi is dannus chi si ndi podint arrui apitzus, is arroris, is mobadias e fintzas sa morti; ma a mei (a su mancu cun mei is cosas funtzionant diaici) a chistionai de custas cosas mi serbit, pruschetotu, a cumprendi cantu seu fortunau, a su mancu, cantu seu fortunau in dì de oi, ca no tèngiu (giai) nudda de murrungiai. Ca a bortas mi capitat (e mi capitat fatu fatu meda, gei ddu eis a cumprendi a solus) de m'atobiai cun personas ca faint totu su tempus totu murrungia murrungia: murrungiant po su tempus, po su chi papant (o no papant); murrungiant candu nc'est frius, ma funt is primus ca murrungiant, puru, candu nd'arribbat sa basca; murrungiant poita is atrus no faint beni is cosas (beni cumenti ddas iant a podi fai issus, o issas, ca sa cosa ballit puru po is femineddas, e no feti po is maschiteddus, mi parit craru); e candu ddus intendu, no potzu fai atru ca ddus lassai a buddiri in mesu a is murrungius cosa insoru etotu (chi mi permiteis de manigiai custus fueddus, a trassa de cumenti iat a podi farai unu poeta, prus de unu giornalista, e si cumprendit). 

E invècias a mei mi benit totu de torrai gratzias a su Cielu, po dònnia cosa bella chi mi nd'arribbat (po dònnia arregalu, mancai, puru, po is prus piticheddus chi su Cielu mi fait), e po mi intendi su coru prenu a cucuru de prexu, mi bastat pagu: mi bastat ca calincunu mi craculit cun rispetu, mi bastat unu fueddu bonu, unu fueddu beni nau e mancai druci; mi bastat a arrannesci a mi cumportai beni, a essi bonu cun is atrus; mi bastat su scancèriu chi mi ndi podit arribbai fintzas de unu pisiteddu, de unu callelleddu (o callellu, cumenti si megàt sa bon'anima de unu tziu de mamma mia) , po mi intendi cun su coru prenu de afròddiu e de gana bella de bivi, e mi intendu fortunau meda. E duncas, in s'interis chi is atrus murrungiant, deu torru gràtzias a su Cielu e a Deus, po totu su de bonu chi tèngiu me is manus. E chini murrungiat, chini est costumau a murrungiai po dònnia cositedda, mancai po is cositeddas prus tontas, a bortas, nemmancu si nd'acatat, s'arriscu est pròpriu custu, de totu su bonu chi at arriciu. Ca sa chistioni, a bortas, est chi nemmancu s'acuntentaus, est a nai, duncas, ca no si scieus prus acuntentai; e s'arti, una de is artis prus mannas (manigiu pròpriu custu fueddu, diaici m'est bèssiu, a su mancu) in sa vida est pròpriu su de si gosai is cosas chi si nd'arribbant, chentza de abarrai a ndi domandai atras, chentza de abarrai a circai sèmpiri su chi no teneus. 

Po oi, intzandus, seu cuntentu (cuntentu cumenti una Pasca, si iat a podi narai, po manigiai una frasia, unu dìciu chi m'est sèmpiri praxu) de no tenni daboris, de no essi serrau in s'aposentu de unu uspidali, de essi in peis (antzis, a nai sa beridadi immoi seu sètziu aranti de su tialu de su computer) e duncas de no essi crocau in su letu, mancai prenu de daboris; seu cuntentu po s'afròddiu e po sa gana bona chi mi intendu aintru de su coru; seu cuntentu, e meda puru, po totus is personas (personas de oru, si iant a podi tzerriai diaici, o a su mancu, po mei ballint cumenti chi siant fatas de oru, o mellus puru, sa bonesa chi tenint, e chi mi arregalant, ballit cantu, chi no prus, de s'oru. Ca su dìciu ddu eis a connosci bosatrus puru: chini agatat un amigu, un amigu santzeru, intzandus agatat unu tesoru. 

E duncas, si domandu iscusa, po primu cosa, chi si ndi seu furendi totu su tempus chi, mancai, nemmancu teneis, ma chi seis costumaus a ligi is artìculus chi ndi pesu in sardu (o chi ndi eis lìgiu a su mancu unu tra totus cussus chi nd'apu pesau e chi nd'apu bogau aforas in custus undixi mesis de su duamilla e binticuatru) scieis beni, puru, ca mi praxit a mi strollicai unu pagheddeddu, ainnantis de incumentzai a atacai, a chistionai de totus is novas chi nd'arribbant de is campus de càlciu innoi giogant is scuadras sardas de is diletantis. E fatzu custu giogu (su de mi strollicai, su de chistionai de atras legas puru, e no feti de resultaus e de gol, cumenti de su restu ia a podi fai, e cumenti, de su restu, fatzu po is artìculus chi scriu in italianu) isperendi (cun sa ispera in su coru, chi si praxit de prus diaici cumenti sonat) de ndi cassai s'atentzioni de cussas personas puru chi, mancai, no funt acapiadas a strintu cun is fainas de is assòtzius sardus de bòcia. 
Ca a bortas mi capitat de chistionai de su trabballu cosa mia cun is personas chi, mancai, atobiu in giru; e candu benint a sciri ca trabballu cumenti a giornalista, intzandus bolint sciri, puru, mi parit bastanti craru, de ita scriu, de ita arraxonu; e candu ddis nau (mi capitat mescamente cun is femineddas, est craru, si ddu torru a arrapiti) chi sigu is campionaus de bòcia, de càlciu de is diletantis, intzandus faint una faci strana, una faci lègia, cumenti chi essint intèndiu unu fragu mau meda. E intzandus, m'acudu a ddis narai ca, peròu, scriu in sardu puru, e no feti in italianu, e mi acudu a ddis narai, puru, ca me is artìculus chi ndi pesu in sardu circu de chistionai, puru, de atras legas, de atras chistionis, mancai deu no potza sciri, ainnantis de mi ponni a ddu fai, cali ant a essi is legas chi ant a brintai me in s'artìculu, tra totus is cosas chi tèngiu badda badda in conca, a totu dì. 
E duncas, po si fai un esèmpiu, po sighiri cun sa cosa chi nd'apu bogau aforas ainnantis, e megu a chistionai, duncas, de su fatu chi sa genti no fait atru ca abarrai totu murrungia murrungia, m'est benida in conca pròpriu in custas ùrtimas oras, apustis de essi chistionau cun una persona, un'amiga cosa mia chi stimu meda, tra is atras cosas (ma chi peròu perdit sa passièntzia drabessi meda, e bidi sèmpiri su chi bandat mabi, prus de su chi bandat beni). 
E no bollu narai (e cun custu dda serru puru, sèmpiri chi nc'arrannesciu) ca in custu mundu est andendi totu beni, e no bollu narai, est craru, ca no nci siant cosas ca iant a podi andai mellus (fait a pentzai a is gherras chi ancora ddoi funt in custu mundu, a totus is poberus ominis e a totus is poberas femineddas chi mancai no tenint nudda de papai, po nd'arremonai un antru dannu mannu), antzis, a bortas mi benit totu de pentzai ca seus sballiendi totu (po su chipertocat su incuinamentu de s'aria, de s'acua e de sa terra, po fai un esèmpiu), ca seus currendi concas a is dannus mannus, ma est cumenti chi nemmancu si nd'acataus. Seus currendi concas a su disastru, a su dannu prus mannu de totus is tempus, ma in s'interis sigheus a tenni sa conca prena de tontesas, de fesserias (cumenti ddas tzerriadas sa bon'anima de nonnu miu, su babbu de babbu miu). 

E is grandus dotoris chi sighint is fainas acapiadas a sa saludi de sa terra cosa nosta (e chi sighint is dannus de s'incuinamentu, po nd'arremonai unu, e chi sighint su clima, ca est mudendi meda, e mabi, in custus ùrtimus annus) no acabbant mai de si narai, de s'arrapiti ca is cosas ant a andai (custa est sa timoria, a su mancu), iant a podi andai, sèmpiri peus. 
E duncas, in s'artìculu chi nd'apu bogau aforas pròpriu sa cida passada eus tentu su modu de chistionai de su tempus mau chi at fatu in s'isula, e benimindi de prantus (cumenti si iat a podi narai, cumenti apu sèmpiri intèndiu narai in bidda mia, a su mancu), e benimindi de arroris, e de dannus. 
E no sciu chi eis biu su chi at fatu su tempus mau in Spagna, e in Valencia mescamente, innoi ddoi funt stètius calincuna cosa cumenti a duscentus mortus (po crupa de totu s'acua chi at fatu, est craru). E un'amiga mia, chi bivit in Spagna de unu bellu tanti de annus, m'at fatu a biri una parighedda de fotografias de is dannus chi at fatu su tempus mau in sa citadi de Valencia, e ita depestis biri (e deu creu chi ddas eis bidas bosatrus puru), is machinas de sa genti totus ghetadas a pari, ammuntonadas, is unas apitzus de is atras, in mesu a sa bia, cumenti chi fessint giucatulleddus, de cussus chi arregallas a is pipius po Natali. Ca no parit berus, de cumenti podit essi mau su tempus candu si nci ponit. E candu sucedint custas cosas, intzandus ti intendis dèbbili, s'animabi prus debbili chi Deus nc'at postu in sa faci de sa terra. E de su restu, chi si nd'arregodais beni, apu serrau, apu acabbau s'artìculu de sa cida passada cun una frasia bona po Davide Manca, po s'anima de Davide Manca, chi si praxit de prus cumenti sonat, fadendi su contu ca no arrannesciànt a ddu agatai, e fadendi su contu ca su mesi de Donniasantu s'est obertu, est craru, cun sa festa po is santus e po is mortus puru.
 E duncas, apustis de nd'essi bogau aforas s'artìculu, seu bènniu a sciri chi ant agatau su corpus de Davide Manca, apustis de una bella pariga de diis chi ddu fiant circhendi. E deu no potzu fai atru, immoi, chi pregai po s'anima cosa sua (po su chi podit serbiri, est craru, e po su chi ndi cumprendu, serbit meda). 
E in prus, custa est sa nova prus callenti, e cussa chi si donat su dabori prus mannu, pròpriu sa cida passada, in sa bidda de Fonne, ant tentu unu dannu mannu meda, fadendi su contu ca cuatru piciocheddus giòvuneddus meda ant tentu unu incidenti, cumenti si iat a podi narai a trassa de s'italianu etotu, est a nai unu sciacu mannu cun sa machina, ca si sciit, ca bastat pagu meda, bastat feti unu segundu po ndi bessiri aforas de sa bia e po ti strupiai, po ti strupiai, mancai, po totu vida puru. E duncas, cussus poberus piciocheddus, ca fiant giòvuneddus meda, si funt prantaus (cumenti si narat), cun sa tialu de machina etotu, e chini ddus at potziu biri, a pustis de s'incidenti, at narau ca una cosa diaici lègia si biit, e mancu mali, ddi nau deu, pagu bortas in custa vida. E si podeis immaginai beni de totu su stracòsciu (ddi nau diaici po manigiai unu fueddu chi arrapitiàt fatu fatu sa bon'anima de mamma mia) chi ddoi fiat, tra su sangui e is arrogus de is cropus de cussus poberus piciocheddus. Unu de issus, Coinu, gigàt puru in sa scuadra de su Fonne, e mi parit craru puru ca is de su Fonne no ndi siant cabaus in campu, custu fini de cida passau, po giogai sa partida contras a is de su Posada, ca su dabori, is lagrimas, su disisperu, fiant tropus, po diaderus, po si podi permiti de pentzai a una partida de bòcia. E deu, po oi, no potzu fai atru ca pregai a su Cielu, isperendi chi potzat tenni piedadi de nosu, ca a bortas si bastat pagu meda po dda acabbai totu sciaciaus, cumenti si iat a podi narai, manigendi unu fueddu chi apu sèmpiri intèndiu narai innoi in bidda e chi m'est sèmpiri praxu meda po cumenti sonat. 

E immoi mi intèndiu prandiu (cumenti si iat a podi narai de unu chi si ndi pesat de sa mesa, apustis de s'essi satzau a tipu procededdu), apustis de nd'essi bogau aforas totus custus strollichiminis (ma podeis abarrai segurus chi ndi ia a tenni un antru tanti puru, badda badda in conca, ma mi ddus allogu po s'artìculu de sa cida chi at a benni! e megu a brullai!), e duncas, custu bollit narai, puru, ca podeus andai a castiai cali funt is cosas prus togas, is cosas de importu prus mannu, is novas prus callentis (o prus friscas, chi si praxit de prus diaici) chi ndi funt arribbadas de s'ùrtima giorronada de giogus. 
E de su restu, is cosas de si torrai a contai no m'ammancant de seguru, fadendi su contu ca cun is amigus de su Diàriu Sportivu sigheus is scuadras sardas chi currint in su campionau de sa Sèrie C (e chistionaus de is de sa Torres, mescamente), is scuadras sardas chi currint in su campionau de sa Sèrie D, fintzas a arribbai, est craru, a totus is scuadras chi currint me is campionaus de s'Ecellenza, de sa Promotzioni, de sa Primu Categoria e de sa Segunda Categoria puru, chi est cussa prus pitichedda (a su mancu tra totus cussas chi sigheus), fadendi su contu, de su restu, ca una pariga de cidas fait, est a nai duas cidas fait, po essi prus pretzisus puru, cumenti tocat a essi candu fais su trabballu de su giornalista, est torrau a incumentzai su campionau de sa de Tres Categorias puru). E duncas, si cumprendit beni e ddu cumprendeis beni, ca is cosas de si torrai a contai no funt pagus, antzis. A mei, duncas, pertocat feti su de scerai calli podint essi is cosas de importu prus mannu. 

E chi seis de acòrdiu (diaici po oi puru atacaus a chistionai de bòcias, de partidas, de giogadoris, mancai de cussus diletantis e no de cussus professioneris), e fiat ora puru, s'at a megai calincunu de bosatrus, deu ia a partiri de su bisu a ogus obertus (cumenti si narat, cumenti si iat a podi narai, a trassa de s'italianu etotu) chi si funt bivendi is de su Bonnanaro, chi est una biddixedda, pitica meda, chi s'agatat in sa zona de su tattaresu, e chi fait calincuna cosa cumenti a noicentus animas. 
E duncas, su chi apa circai de fai, po oi puru (e de su restu ddu scieis beni cumenti mi praxit a ndi pesai su trabballu cosa mia) est cussu de cumprendi chi, tra totus is cosas chi mi torrant a contai, chi mi scoviant is allenadoris de is assòtzius chi intendu, dònnia dònnia cida, po ndi pesai is ciaciarradas e, duncas, po ndi pesai is tialus de intervistas (cumenti ddas tzerriaus, a trassa de s'italianu etotu), nci podint essi storias de importu chi potzant balli (su giogu chi fatzu, a s'acabbada, est pròpriu custu) no feti po su mundu de sa bòcia, ma po sa vida cosa nosta, sa vida de dònnia dì. E ddu sciu beni ca bosatrus pentzais (mescamente chi no eis mai lìgiu nemmancu un artìculu tra totus cussus chi nd'apu pesau in custus ùrtimus annus, e duncas, fintzas a oi) chi custu giogu chi fatzu no m'at a mai a bessiri beni, e invècias deu seu cunvintu ca de dònnia contu, e fintzas de dònnia contixeddu, unu ndi potzat bogai aforas, e ndi potzat agatai, sèmpiri chi ndi tenit gana (eia, po giogai, po fai dònnia calidadi de giogu tocat a ndi tenni gana, parit una tontesa, berus est?; poita, desinò, su giogu nemmancu bessit), una motivu bonu po arraxonai, po movi su crobeddu, cumenti si iat a podi narai. E custu giogu mi bessit beni (a su mancu mi praxit a dda pentzai diaici) poita, mescamente, circu de nci stichiri in mesu cussa chi podeus tzerriai filosofia, e chi est una de is passionis prus mannas chi apu agatau in totu sa vida mia, una de is cosas chi mi funt agiudendi (e m'agiudant dì po dì) a andai ainnantis in custa cosa, maca meda, chi est sa vida cosa mia. 

E duncas, torraus a nosu. 
In sa Lista G de su campionau de sa Segunda Categoria (cumenti eis a sciri beni, e chi no ddu scieis deu seu innoi pròpriu po custu, po si ddu arragodai, est craru, su campionau de sa Segunda Categoria est stètiu pretziu in otu listas, partendi de sa Lista A e fintzas a lompi, intzandus, a sa Lista H), nc'est una scuadra chi est fadendi ispantus mannus meda. E su poita si cumprendit allestru, e de seguru is numerus chi is arrùbius nieddus nd'ant pesau in custas primus cincu bessidas de sa stagioni noba (est a nai sa de su duamilla e binticuatru – duamilla e binticincu) chistionant crarus, chi mi permiteis de ddu narai diaici. Duncas, is puntus ca is piciocus sighius de Lorenzu Uneddu, chi est s'allenadori de s'assòtziu, de sa scuadra, est craru, funt cuindixi, e ndi funt arribbaus gràtzias a cincu partidas bintas, s'una avatu a s'atra, totu de sighiu. Is de su Bonnanaro, in prus, funt arrannèscius a fai, a intzertai (cumenti si iat a podi narai, puru) una biga manna de gol, funt giai dexennoi, difatis, ca a fai is contus nci poneus pagu meda. Ma po su chi pertocat sa difesa puru, cumenti dda estus podi tzerriai, a trassa de s'italianu etotu, is cosas funt andendi beni meda, e si cumprendit, fadendi su contu ca is de su Bonnanaro, a su mancu fintzas a oi, apustis de cincucentus e coranta minudus de giogu, ant incasciau feti seti gol. Totu beni, duncas, e si cumprendit, ma deu creu ca po si fai a cumprendi diaderus cumenti funt andendi is cosas in domu de is tattaresus, si depu intregai is fueddus chi m'at arregalau Lorenzo Uneddu in sa ciaciarrada chi eus fatu, chi nd'eus pesau pròpriu s'atra dì, ca fiat de martis, e difatis su martis est sa dì innoi scriu, e ndi pesu, is artìculus, scritus in italianu, ma peròu, chi pertocant totus is partidas de sa Segunda Categoria, e apustis intendu puru is allenadoris po ciaciarrai unu pagheddu, e po cumprendi cumenti ddis funt andendi is cosas. E diaici eus fatu, intzandus, cun Uneddu puru. 
Si bollu arragodai, duncas, ca cun is amigus de su Diàriu Sportivu, e in su giàssu de su Diàriu Sportivu, chi si sonat mellus, sigheus feti is scuadras de diletantis, est a nai, duncas, de totus cussus piciocus (ballit po is giogadoris, po primu cosa, ma po is allenadoris puru, est craru) chi ndi cabant in campu, sa cosa ballit siat po is allenamentus chi si faint aintru de sa cida, ma ballit puru, mescamente, po is partidas chi si giogant su domìnigu (e mancai su sabudu puru, a seguna de sa giorronada), feti po si spreviai, po si spassiai unu pagheddeddu, e no de seguru po guadangiai cussas barcas de dinai (cussus muntonis de dinai, iat a fai a ddi narai diaici puru) cumenti sucedit, biaus issus, s'at a megai calincunu de bosatrus, a is grandus campionis chi currint me is scuadras mannas de su campionau de sa Sèrie A, e chi tzerriaus professioneris. 

E duncas, si seu contendi totu custu po si narai ca candu apu domandau su prexei a Lorenzo Uneddu de mi arregalai calincunu fueddu po ndi pesai s'intervista, si seus postus de acòrdiu de si intendi su martis a su mengianu; e issu m'at pròpriu narau ca su mengianu ddu tenit acapiau cun su trabballu (m'est bènniu de ddu narai diaici), est a nai ca su mengianu trabballat, cumenti faint in medas; e mancu mali ca su trabballu nc'est e s'agatat ancora, mi megu a solu a solu, mancai siat fadiosu. Ma iat a essi peus, fortzis, a s'agatai chentza nudda de fai. E intzandus eia, candu no tenis nudda de fai su tempus parit chi no ndi depat passai mai, ma Uneddu m'at fatu sciri ca po cincu minudus (una ciaciarrada durat cussu tanti de tempus, ca no est miga ca si depeus cojai tra de nosu. E ddu megu a narai po brullai unu pagheddeddu, si cumprendit, berus est?) si podiat scabulli, a su mancu unu pagheddeddu, de su trabballu po chistionai cun mei de bòcias. 
E cussu chi naru a is amigus e a is amigas cosa mia, ma tanti po arriri unu pagheddeddu, est ca chi fiat po issus (po is allenadoris e po is giogadoris megu a narai, e deu creu ca gei si cumprendit) estus a depi abarrai a totu dì, po binticuatru oras, a ciaciarrai de partidas e de resultaus. E si cumprendit ca deu puru su chi fatzu (est a nai su de scriri a totu dì is artìculus po su giàssu de su Diàriu Sportivu) ddu fatzu po trabballu, e arribbau a cuss'ora, mancai, mi speddiat puru a mi pasiai unu pagheddu, e mancai, mi speddiat e mi benit sa gana, puru, si nd'apu giai chistionau meda ma meda bortas, de mi ligi calincunu lìbbru, chi est unu de is modus mellus chi apu agatau in custa vida po nci passai, beni, beni meda si iat a podi narai, su tempus. 

Ma torraus a nosu, duncas, e si domandu iscusa chi mi seu stròllicau prus de su tanti chi mancai serbiàt.

Is de su Bonnanaro funt fadendi ispantus mannus poita, tra is atras cosas, s'annu passagu giogànt me in su campionau de sa de Tres Categorias, e duncas funt una "neo-promossa", cumenti si narat in italianu, chi est su modu chi manigiaus po tzerriai is scuadras chi ndi funt artziadas de una categoria prus bàscia in una prus matuchedda. E candu ndi artzias de categoria, si cumprendit, is cosas si faint prus tostadas, feti puru poita is scuadras de is aversàrius funt prus fortis (iant a depi essi prus fortis, chi si praxit de prus diaici), e duncas iat a podi serbiri unu pagheddeddu de tempus po cumprendi cumenti andant is cosas in sa categoria nova, ma is de su Bonnanaro si funt agataus beni acoitu meda, ca parit giai giai chi siant gioghendi in su campionau de sa Segunda Categoria de annus e annus e annus. Pròpriu po custu chi s'apu apena acabbau de narai, de contai, deu creu ca sa cosa mellus chi si potzat fai, po incumentzai (o po sighiri cun sa chistioni) est cussa de andai a castiai, impari, mancai, cumenti ddis funt andadas is primus cincu bessidas, partendi, est craru, e nci iat a mancai puru, de sa primu, chi s'est giogada su ses de su mesi de Ladàmini (e a fai is contus nci poneus pagu: custu bollit narai, duncas, ca su campionau de sa Segunda Categoria est incumentzau giai de unu mesi, torrendi a sa chistioni de cumenti si ndi bobat su tempus, o mellus, diaici mi parit a su mancu), e is de su Bonnanaro ant arrìciu (cumenti si iat a podi narai, a trassa de cumenti si narat in italianu etotu) sa visita de is de su Fiolinas , cun is meris de domu chi funt stètius bonus a binci sa partida cun su resultau de duus a unu, chi esgt bàlliu, est craru, po is primus tres puntus, drucis drucis (drucis cumenti a su tzucuru, cumenti apu sèmpiri intèndiu narai innoi in bidda). In sa segunda bessida, invècias, is de su Bonnanaro funt andaus a giogai contras a is de su Santu Nicola de Othieri, e ingunis puru nd'ant bogau aforas una partida giai giai perfeta, cumenti si narat, fadendi su contu, tra is atras cosas, chi funt arrannèscius a binci cun su resultau de cuatru a duus. In sa de tres bessidas de s'annu (in sa de tres giorronadas, si iat a podi narai puru), cussa chi s'est giogada su binti de su mesi de Ladàmini, po essi prus pretzisus puru, is de su Bonnanaro nd'ant cassau sa bìncida prus toga, a su mancu chi fadeus su contu de su tanti de gol chi ant fatu, chi funt stètius bonus a fai, ddi naraus diaici puru, contras a is de su TresIsteddas, un assotziu tattaresu, cun sa partida chi s'est serrada cun su resultau de noi a tres po is meris de domu. In sa bessida apustis, chi s'est giogada, est craru, su bintiseti de su mesi de Ladàmini (iat a fai a narai puru chi est stètia s'ùrtima giorronada de su mesi passau) is de su Bonnanaro ant bintu torra, aranti de is pròprius tifosus, est a nai, in domu cosa insoru etotu, contras a is bosanus de sa Calmedia, cun su resultau, togu togu meda, fait a ddu narai, de duus a zeru. E in sa primu bessida de su mesi de Donniasàntu puru, is de su Bonnanaro nd'ant cassau atrus tres puntus, gràtzias a bìncida, po duus a unu, chi nd'ant cassau contras a is de su Sporting de Tattari. E duncas, si ddu imaginais e ddu podeis cumprendi a solus de totu su prexu e de totu s'afròddiu chi tenint in su coru is giogadoris, is tifosus e, est craru, s'allenadori. Candu est arribbau su martis a mengianu, a is undixi, cumenti festus abarraus de acòrdiu, intzandus apu intèndiu a su telefunu a Lorenzu Uneddu, chi est stètiu bonu a si scapiai de su trabballu cosa sua po chistionai cun mei, e po custu, po sa disponibilidadi chi m'at arregalau (cumenti mi praxit a narai), no potzu ca ndi torrai gràtzias a issu etotu, e ddu scriu innoi puru, diaici est prus craru. 
«Contras a is de su Sporting de Tattari – m'at scoviau Lorenzo Uneddu – nd'est bessida aforas una partida toga meda, ma tostada puru, a su mancu po su chi si pertocat. Est a nai, duncas, ca is aversàrius cosa nosta no s'ant regalau pròpriu nudda, antzis. Ndi funt cabaus in campu cun su corteddu tra is dentis, cumenti si narat, a trassa de s'italianu etotu. Si seus agataus aranti una bella scuadritedda, nc'est pagu de narai, cun una biga de giogadoris giòvuneddus de edadi, chi currint, si cumprendit, a trassa de macus. Mancai in sa lista sa scuadra cosa mia e sa scuadra de is aversàrius siant atesu meda (is de su Bonnanaro, ddu eus giai nau, tenint calincuna cosa cumenti a cuindixi puntus in buciaca; is de su Sporting de Tattari, invècias, ndi tenint allogaus in buciaca  feti tres), is de su Sporting funt arrannèscius a si donai de fai, e meda puru, chi fadeus su contu, mescamente, ca ant agatau su gol de s'unu a zeru po primus. E duncas, apustis de nd'essi ingotu su gol, de nd'essi incasciau su gol, is piciocus cosa mia funt stètius bravus meda, bravus diaderus, a ndi torrai a artziai sa conca, cun gana bella, cun su carateri giustu, po ddu narai diaici. Potzu narai, puru, ca nc'apu mandau in campu tres piciocus, totus paris; est a nai chi apu fatu tres càmbius, cumenti si iat a podi narai a trassa de s'italianu etotu, e po bona sorti cosa nosta, is cosas si funt andadas beni meda. Seus arrannèscius a ndi cassai su gol de s'unu a unu e seus stètius bonus fintzas a agatai su gol de su duus a unu chi est bàlliu po sa de cincu bìncidas totu de sighiu, sa de cincu bìncidas in cincu bessidas». 

Is de su Bonnanaro, duncas, s'agatant a su primu postu de sa lista e si iat a podi narai, puru, ca mellus de diaici, custu est pagu ma seguru, is cosas no ddis podiant andai. «No si ndi podeus scaresci ca is de su Bonnanaro ndi funt artziaus in sa Segunda Categoria feti cust'annu, fadendi su contu ca fintzas a s'annu passau sa scuadra curriàt in su campionau de sa de Tres Categorias. Is personas chi faint parti de s'assòtziu, de sa dirigenza, duncas, funt a sa primu esperièntzia in unu campionau tostau cumenti est sa Segunda Categoria, ma po bona sorti cosa nosta podeus fai su contu apitzus de una bella pariga (pariga a sa sarda, est craru ndr) de giogadoris ca me is annus passaus ant tentu s'ocasioni de giogai in campionaus e in categorias prus mannas, meda prus mannas, de sa Segunda Categoria, cumenti est sucèdiu, de su restu, a Mazoni e Andrea Mura, tanti po nd'arremonai feti duus». 

Lorenzo Uneddu, apustis, at sighiu a mi contai ca «in s'istadi seus stètius bonus, chistionu po mei ma pruschetotu po totus is dirigentis, chi a sa fini funt cussus chi ant fatu is sacrifìcius prus mannus, a cuncodrai, a ndi pesai una rosa bastanti bona, chi si potzat permiti, custa a su mancu fiat e abarrat sa bidea nosta, de ndi cassa sa possibbilidadi, ddi nau diaici, de giogai po s'annu chi benit puru in su campionau de sa Segunda Categoria. Est a nai, duncas, ca curreus, ca seus currendi po ndi cassai sa sarvesa, cumenti si iat a podi narai e si narat. No pentzastus, duncas, est craru, de arrannesci a partiri diaici forti e de s'agatai cun custa biga de puntus in buciaca apustis de feti cincu giorronadas. Duncas, s'ispantu po su chi seus fadendi, po su chi seus arrannèscendi a fai, ballit po nosu puru. E duncas, iat a essi de iscrempius, de istupidus a si ponni limitis, est a nai ca a bisai no costat nudda, e duncas, poita nosu no estus a podi bisai de ndi cassai calincuna cosa de importu prus mannu de sa sarvesa? Eus a biri, duncas, ita totu at a sucedi e ita totu eus a essi bonus a ndi bogai aforas de custa stagioni. De seguru, in sa Lista G, chi est cussa innoi seus currendi nosu puru, ddoi funt scuadras prus fortis, cuncodradas meda ma meda mellus, e chistionu de is rosas, mescamente, de sa nosta, e pentzu, mancai, a is de su Sorso, po nd'arremonai una, chi est una scuadra chi at a fai una cursa po contu insoru o, a su mancu, tenint is cartas bonas po curri po contu insoru, lassendi feti is pimpirillas a is aversàrius. A sa truma de is scuadras prus fortis de sa lista nci depeus aciungi is de su Centro Storico de Tattari, is de s'Ottava e is bosanus de sa Calmedia, chi eus giai tentu modu de isfidai. Ma no si ndi podeus scaresci de is de su Fiolinas, chi funt un'antra scuadra forti e toga meda e mi funt praxus a totu coddu, deu creu ca s'allenadori cosa insoru siat fadendu unu trabballu mannu e bonu meda». 
Lorenzo Uneddu peròu sciit beni ca no est currendi a solu: est a nai, po primu cosa, ca in campu cabant is piciocus cosa sua, e po segunda cosa, tocat sèmpiri a fai su contu chi, a sa fini, funt is dirigentis chi cuncodrant is scuadras, e a is allenadoris tocat feti (feti po modu de narai, poita su de sighiri binticincu piciocus no est una cosa facili, e si cumprendi) a guidai is allenamentus aintru de sa cida, e apustis nc'est de sighiri sa scuadra po is partidas, cun is tzerrius (megu a brullai, si cumprendit, ma is allenadoris, candu funt in panchina a sighiri sa panchina, fatu fatu meda abarrant totu tzerria tzerria po si fai intendi e mescamente po si fai a cumprendi de is piciocus cosa insoru) e cun is murrungius, ma puru cun is cumplimentus, candu is cosas andant beni. 

«Candu arrannèscis a binci totus custas partidas, cumenti est sucedendi a nosu, bolit narai ca totus is personas chi faint parti de s'assòtziu funt currendi impari, funt trabballendi impari. Deu, a custu puntu, ia a bolli torrai gràtzias a totus is dirigentis, po su chi ant fatu fintzas a immoi: funt pighendi sa chistioni, est a nai sa scuadra de su Bonnanaro, cun seriedadi e pruschetotu cun afròddiu mannu, e fait a prexei, ti ddu depu scoviai, a tenni a che fai cun personas diaici bonas, e diaici acapiadas a sa scuadra. Is de sa sociedadi, duncas, no si faint ammancai mai nudda; est a nai chi dònnia dònnia cida s'agataus me is cunditzionis mellus chi nci iant a podi essi po podi trabballai me is allenamentus, ma sa cosa prus de importu de totus est chi no si funt ponendi nè pressi de binci is partidas pos'ammarolla, e in prus si lassant selenus, est a nai ca no murrungiant po nudda. Po su chi pertocat sa rosa de piciocus chi sigu, no tèngiu pròpriu nudda de nai de mabi, fadendi su contu ca de sa primu dì de sa preparatzioni, is giogadoris ant sèmpiri fatu de totu po no sartai nemmancu un allenamentu, e ddis depu torrai gràtzias, fadendi su contu ca issus puru trabballant, est a nai ca no podint pentzai feti a su giogu de su càlciu, ma candu ndi cabant in campu si limpiant sa conca de totus is pentzamentus lègius, chi iant a serbiri pagu candu giogas una partida de bòcia; antzis, chi nd'arribbas cun sa conca totu ghetada a pari po is pentzamentus, ddi naru diaici, intzandus benit meda ma meda prus dificili su de giogai beni. In totus custus mesis apu sèmpiri tentu totus is giogadoris, in truma manna, po is allenamentus, e custa benit a essi una cosa de importu mannu; su càlciu est unu giogu de scuadra, de su restu, e unu giogadori depit imperai, duncas, a giogai cun is cumpàngius cosa sua; est a nai ca serbit a agatai unu pagheddeddu de cunfiantza, cumenti si iat a podi narai. Sa cunfiantza tra cumpàngius, e sa cunfiantza, puru, tra totus is giogadoris e s'allenadori. E si torru a arregodai ca me is campionaus de sa Segunda Categoria is giogadoris ndi cabant in campu po si spassiai e po si spreviai apustis de una cida de trabballu, e duncas no est chi ddi podeus pediri de fai miraculus, cumenti si narat, ma po nosu bandat totu beni diaici, est craru, fadendi su contu ca s'agataus, a solus a solus, in su primu postu de sa lista. Deu creu, duncas, ca chi is cosas si funt andendi diaici beni est poita aintru de sa cida, candu s'atobiaus po is allenamentus, fadeus unu trabballu bonu, e sa cosa ballit po totus is giogadoris cosa mia, e po unu giogadori sa cosa de importu prus manna benint a essi, pròpriu, is sacrifìcius chi ses prontu a fai. Immoi seus gioghendi beni meda, est serbiu unu pagheddu de tempus in prus de su chi s'abertastus, mancai, ma immoi seus currendi aforti cumenti unu trenu, chi mi permiteis de manigiai custus fueddus. E immoi eus a biri cumenti s'ant a andai is cosas in su benidori, incumintzendi, pròpriu, de sa partida chi depeus giogai custu fini de cida chi nd'at a benni, contras a is de su Centru Storicu de Tattari. A sa isfida nc'arribbaus cun totu s'afròddiu chi teneus, e si cumprendit beni cantu potzat essi mannu, apustis de essi bintu cincu partidas de sighiu, ma scieus beni, puru, ca candu is scuadras aversàrias s'agatant a giogai contras a nosu, e duncas, contras a sa primu de sa classi, intzandus ndi cabant in campu prontus a fai sa gherra, cumenti si iat a podi narai. E apustis de sa partida chi eus a depi giogai contras a is de su Centru Storicu, nd'at a arribbai un'antra isfida de importu mannu meda, contras a is de su Sorso. Ma nosu, deu seu cunvintu de custu, a su mancu, teneus totus is cartas bonas po fai a biri a totus cantu balleus. S'ùrtimu fueddu, peròu, est craru, spetat a su campu. E duncas, eus a biri ita totu nd'at a bessiri aforas». 



Attività realizzata col contributo della Regione Sardegna - IMPRENTAS 2023-2024. LR 22/2018, art. 22