Salta al contenuto principale
Seconda categoria
Su carràsciu prus mannu est in Secunda Categoria

Is campionaus sighint a andai ainnantis ma dònnia domìnigu ndi sartant su binticincu po centu de is partidas; Cadoni: «Depeus bivi impari a su virus»

A nai sa beridadi, estus a depi essi totu cuntetus feti po su fatu chi is giogus funt torraus a partiri: chi pentzaus chi funt passaus calincuna cosa cumenti a duxentus diis de s'incumintzu de cussu chi tzerriant "lockdown", in su mesi de Martzu, candu pariat chi no nci depessit prus essi luxi o spàssiu in custu mundu, est giai meda cussu chi seus bidendi in dii de oi, a su mancu po su chi pertocat su mundu de sa bòcia de is diletantis in Sardinnia.

Sciestus puru chi cussu tiau de virus no podiat sparessi drabessi, diaici cumenti si ndi bogat su ludu de is crapitas apustis de una partida. E pròpriu po custu si cumprendit totu su prexiu de su presidenti de sa FIGC sarda, Gianni Cadoni, candu fait is contus po cumprendi cumenti funt andendi diaderus is cosas: «Depeus sighiri a bivi impari a custu dannu, a custu strobu mannu — scoviat Cadoni — no nc'est meda de acciungi; seus circhendi de agiudai totus is sociedadis de bòcia chi ndi tenint abisongiu, isperendi de podi torrai chitzi e allestru a sa vida e a is fainas cumenti dha sas connoscestus ainnantis».

Is numerus, a dhu sus castiai in dii de oi, faint unu pagheddu a timi: me is primus duuas giorronadas de is campionaus de su duamilla e binti \ duamilla e bintunu, chistionaus feti de is partidas de is scuadras de Eccellenza, Promozione e Primu Categoria, funt sartadas sexi garas, po su chi pertocat sa primu cida, e atras catodixi in custa cida; seus chistionendi de, prus o mancu, su binticincu po centu de totus is bessidas cuncodradas de is de sa Lega.

Ma is pentzamentus e is daboris prus mannus nd'arribant de is scuadras de sa Secunda Categoria: in su Girone B funt sartadas duas partidas; cuatru in su Girone C; tres in su Girone E, chi est su prus ghetau apari poita nci funt giai duas scuadras, Ollasta e Cullieri, chi ant scerau de ndi bessiri giai aforas de is giogus; cuatru in su Girone F; duas in su Girone G e feti una in su Girone H. In totu faint sexi. Su chi podeus aciungi, a su mancu po oi, est chi at a serbiri passièntzia meda, pruschetotu de parti de is giogadoris e de is allenadoris, isperendi chi is partidas chi amancant si potzant giogai chitzi.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In questo articolo
Campionato:
Argomenti:
Stagione:
2020/2021
Tags:
Seconda Categoria