Is de su Guvernu timint de depi serrai torra totu s'Italia: ita nd'at a essi de sa saludi de is pipius e de is giòvanus?

No arribant, custu est siguru, novas bonas de is de su Guvernu, chi funt sèmpiri sighendi, e pruschetotu circhendi de firmai, sa chistioni de su spaniamentu de su virus, giai de su mesi de Martzu, cumenti si arregodaus beni.

Apustis de una istadi innoi pariat chi is cosas fessint andendi concas a su mellus (feti chi pentzaus, po nd'arremonai una, chi po is diis de festa de mesagustu in Sardìnnia nci fiant is logus innoi si badhat, est a nai cussas che in italianu si tzerriant "discoteche", obetas e impedhadas de genti), ndi seus torra arrutus, a su mancu aici parit, a duus passus de un atru "lockdown", est a nai un atra serrada generali, chi custa borta at a pertocai totus is fainas e is atividadis, cun is personas obrigadas a abarrai tupadas in domu a totu dii, e no feti de is dexi de su noti a is cincu de su mengianedhu, cumenti sutzedit in dii de oi.

Sa chistioni de importu prus mannu, si cumprendit, est chi is ospedalis no acudint a arriciri totus is apuntoraus de su Covid chi nd'aproillant a su "pronto soccorso" cun cussas che, in italianu, si tzerriant "ambulanzas", e is cosas ant a andai sèmpiri peus, custu a su mancu est su parri de certus dotoris chi funt traballendi apitzus a sa chistioni, e su motivu est craru: me is mesis chi ant a benni, partendi de su mesi de Idas e de su mesi de Gennàrgiu, nc'at a essi de fai is contus puru cun is atras callidadis de influèntzias.

Chi dha poneus diaici, po imoi no podeus sciri candu ant a podi torrai a partiri is giogus po is diletantis, ma po oi no si dha intendeus de pentzai a is giogadoris e a is allenadoris, ma obeus dedicai custas parigas de fueddus a is piciocheddus prus piticus: su sport, e su giogu de sa bòcia tra is atrus, donant una grandu manu de agiudu, mescamente me is biddas prus piticas, po su spreviu de is giovanus e duncas po sa saludi de su corpus e puru, no si dhu depeus scaresci, po cussa de sa conca: chentza giogus, e pruschetotu chi torrant a detzidi po un atru assètiu, at a essi unu dannu legiu po totus is pipius. Seus diaderus sigurus chi, in su benidori, is fillus nostus no ant a depi pagai su prètziu po totu su carraxiu chi ndi seus pesendi a custu giru?


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020