In Eccellenza bincint cincu scuadras aforas de domu, ma tres partidas ndi sartant po crupa de su Covid

Pròpriu ariseu merì, su trinta de su mesi de Cabudanni, si funt giogadas is partidas chi ballint po sa de duus giorronada po su chi pertocat su campionau de Eccellenza: cincu is bìncidas po is scuadras aforas de domu, partendi de is de su Castiadas, chi ant fatu tres gol a is de su Quartu Sant'Aleni, sighendi cun is de s'Idolo de Arthana, chi currint sèmpiri prus a forti gràtzias a is duus gol scutus a faci a is de su Poltu Ridundu.

Duus gol puru po is de su Ilartzi, chi si ndi pinnigant is tres puntus in sa batalla contras a is castedhaius de sa Ferrini. Bincint, po unu a zero, sa Nuorese, in domu de su Buduni, e is de s'Atletico de Uri, in domu de s'Arbus.

In s'interis, arribat puru sa secunda bìncida de sighiu po is biancus-nieddus de s'Ossese: is ominis de mister Giuseppe Cantara, aranti a is tifosus cosa insoru, funt arrannescius a si ndi scabulli de is de su Gùspini.

Is pentzamentus peròu nd'arribant pruschetotu po is tres partidas sartadas po crupa de su Covid: seus chistionendi de sa gara tra is de su Bosa e is de sa San Marco, tra is de sa Kosmoto de Muristeni e is de Li Punti de Tàtari, e tra is de su Taloro de Gavoi e is de s'Ilvamaddalena.

Duncas, chi pentzaus chi seus feti a sa primu dii de su mesi, podeus crei chi nc'at a essi totu su tempus po dha sa recuperai me is cidas chi ant a benni, ma is daboris prus mannu, fortzis, pertocant is scuadras de sa Primu e pruschetotu de sa Secunda Categoria.

Chi is regulas po frimai su spaniamentu de su virus in su mundu de sa bòcia, e chistionaus pruschetotu de cussu chi tzerriant "isolamento fiduciario", point andai bei po is professionistas e po is giogadoris de sa Serie D fintzas, mancai, a is de sa Promozione, is cosas iant a podi essi prus marigosas e difìcilis po totus is atrus.

Po is giogadoris de is categorias prus piticas, duncas, a cantu si cumprendit, est unu strobu mannu meda su de depi abarrai serraus in domu po cuindixi diis, chenza mancu podi bessiri po andai a traballai, feti poita, mancai, si funt atobiaus cun d-un antru giogadori, mancai feti po una partidedha tra amigus aintru de sa cida.

Pròpriu po custu motivu, is de s'Àllai, scuadra chi iat a depi curri in su Girone C de sa Secunda Categoria, sighius me is ùrtimas oras de is de s'Ollasta, in su Girone E, ant giai fatu sciri chi no ant a podi essi de is giogus; ci funt dudas, in s'interis, puru in domu de su Meana, chi giogat in Primu Categoria, ma is grogus-birdis no funt is unicus a tenni custus pentzamentus legius, poita, chi si ndi arregodaus, me is cidas passadas, puru is de su Nurri, cun totu sa genti de sa bidha chi est fadendi is contus cun su virus, ant artziau sa boxi po si fai intendi de su presidenti de su Cumitau Regionali Sardu de sa FIGC, Giovanni Cadoni.

Est a nai: su campionau de Secunda Categoria no est mancu ancora patiu chi est giai perdendi arrogus.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020