Sergio Mauro Talloru, una perda de oru po su Meana: «Tengiu gana meda de agiudai a torrai in Primu Categoria»

Chi unu bollit chistionat de su Meana Sardo, sa scuadra chi est primu in sa lista de su Girone C, cun trintacuatru puntus, depit po fortza arremonai Sergio Mauro Talloru, lòmpiu in s'istadi in sa crica de is grogu-birdis po donai una manu de agiudu a sa sotziedadi de su presidenti Michele Pes, chi s'annu passau nd'est arruta a bàsciu de sa Primu Categoria, cun dabori mannu.

Talloru, nàsciu su binticinu de su mesi de maju de su otantacincu, est torra fadendi biri a totus cantu est forti, apustis de is campionaus giogaus cun su Tonara, Ovodda, Arborea, Brebì, Atzara e Tonarese: in totus custus annus at fatu calincuna cosa cumenti a trexentus gol, una cosa foras de conca po unu piciocu chi, a parti sa bòcia, depit sighiri su traballu, fait s'infermieri, e sa familla, cun d-una pipia pitica, tenta impari a sa cumpàngia Valentina.

Pròpriu su traballu est su strobu prus mannu, ma s'amori po su calciu no est una cosa chi si podit scaresci de una dii a s'atra: Talloru iat a podi giogai in Promozione o in Eccellenza, ma su tempus po is allenamentus e is partidas est pagu, e intzandus si depit acuntentai de abarrai acanta de domu sua, bivit in Sorgono, e Meana est feti a cuindixi chilometrus.

Mister Fabrizio Miceli at agatau una perda de oru: Talloru at fatu gol giai dònnia domínigu, fintzas de sa primu bessida contras a su Colonia Julia; nc'est fintzes arrannesciu contras a cussus de su Biddanoa Franca, Futei, Santu 'Asili 'e Monti, Allai, Gesturi, po duas bortas, pròpriu cumenti cun su Senorbì; nd'at fatu cuatru a cussus de su Sorgono, at fatu su gol chi est serbiu po binci in Segariu, at sighiu cun Sini, Lunamatrona, duus gol, Santa Lucia e domínigu passau, torra cun su Colonia Julia, po tres bortas.

«Po imoi seus andendi beni meda, ma si podit fai de prus — contat Talloru —; deu seu fatu diaici, no m'acuntentu. Eus pèrdiu feti duas bortas, ma scieus chi no si podit binci sempri, poita nci funt puru is atrus. Seus traballendi po fai mellus, boleus binci su campionau, no si podeus prus cuai».
Talloru est su giagodiri chi at fatu prus gol in sa scuadra cosa sua e in totu su girone. «No mi fiat mai sutzèdia una cosa diaici; est craru, tengiu gana meda de giogai e de agiudai su Meana a torrai in Primu Categoria».


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020