aa

E duncas, a cantu parrit, de su chi ndi potzu cumprendu, e sèmpiri chi su tialu de calendàriu est narendumì sa beridadi (e no est contendumì fabas), seus arribbaus, puru, a s'ùrtima dì po su chi pertocat su de cuatru mesis de s'annu; de cras, duncas, eus a incumentzai a si bivi (ddi naru diaici, poita diaci m'est bessida sa cosa) su mesi de maju. 

E po fai su contu de su tempus chi passat (chi est una de is cosas chi fatzu, dònnia dònnia cida, po incumentzai s'artìculu chi ndi pesu in su sardu chi si fueddat innoi in su Campidanu de mesu, e ainanntis de atacai a arraxonai impari a bosatrus apitzus de is resultaus de is partidas e de is novas chi nd'arribbant de is campus innoi si giogant is campionaus) podeus narai (e fait a ddu narai a forti puru!) ca po su chi pertocat is primus cuatru mesis de s'annu, su trabballu est bellu ca fatu: est a narai ca si seus scroxaus, chi mi permiteis de manigiai custu fueddu, su mesi de gennàrgiu (longu trintunu diis, ma chi parrit, dònnia annu, chi no depat spaciai mai), su mesi de friàrgiu (unu de is prus drucis de s'annu, a su mancu po su chi mi pertocat, fadendi su contu de totus is tzipulas e is parafritus chi si papaus, ballit po totus, deu creu, prus o mancu, in su perìodu de su carrasciali), su mesi de martzu puru (trintunu diis longus e fadiosus cumenti benit a essi longa e fadiosa sa caresima, a su mancu chistionu po mei, ca de bosatrus no sciu cumenti si dda biveis) e immoi est giai ora de saludai puru su mesi de abrili, ca s'est obertu cun sa festa po sa Pasca Manna (ca fiat su cincu) e s'est serrau, giai giai, cun sa festa po su binticincu de abrili (chi fiat pròpriu sabudu passau) e immoi, si tocat un'antra festa: cussa po is traballadoris, ca nd'arruit, eia, gei ddu eis a sciri mellus de mei puru, su primu de maju, est a narai, cras. 

E fatzu su contu de candu nd'at a bessiri aforas s'artìculu chi teneis asuta de is ogus, poita, chi pròpriu si depu narai sa beridadi, apu atacau a ddu scriri su giòbia ainnantis, est a narai, su bintitres. 
E bosatrus estis a podi narai: e is novas chi si contas, chi ligeus innoi, no si pudescint? 
A trassa, mancai, de cumenti sucedit cun su pisci, o cun sa petza. 
E deu tengu sa respusta giai pronta: nou, is novas chi si torru a contai in custus duus – tres mesis (e seu chistionendi de is mesis chi nd'arribbant apustis chi si serrant is giogus de is campionaus) no si pudescint, poita seu costumau a chistionai, mescamente, de totus is scuadras chi nd'ant cassau sa bìncida, est a narai su primu postu de sa lista, de su campionau cosa insoru: e sigumenti su de binci praxit a totus, e no feti a is professioneris chi sigheus po su prus me is partidas chi donant a sa televisioni (o a su stadiu, po chini si ddu podit permiti, po chini tenit su prexei), ma puru a is diletantis, intzandus s'afroddiu po sa bìncida de unu campionau durat po cidas e cidas de sighiu, e si cumprendit beni: po binci unu campionau serbit, po primu cosa, a atacai cun is allenamentus giai in s'istadi, giai de sa metadi de agustu, po ti fai agatai prontu po candu incumentzat sa stagioni, po candu torrat a incumentzai sa stagioni (po ddu narai mellus puru), cun cussa chi tzerriaus, a trassa de s'italianu etotu, "preparatzioni atletica", e apustis, cumenti incumentzat is giogus, e intzandus is partidas, tocat a fai su contu ca is scuadras s'atobiant, po is allenamentus, duas e fintzas tres-cuatru bortas a sa cida, e duncas, eia, nc'est de curri, de fadiai, e de fai sacrifìcius, cumenti si narat e cumenti mi contant is allenadoris e is giogadoris chi intendu, dònnia dònnia cida, po ndi pesai is ciaciarradas e, duncas, is intervistas. 

E in prus, a su contu, tocat a nci ponni no feti is allenamentus ma, est craru, puru is partidas, a partiri intzandus de su mesi de cabudanni e fintzas a arribbai a su mesi de abrili, o de maju puru. 
E duncas, apustis chi curris e chi trabballas, in su campu, po noi mesis de sighiu, candu arribbat ora de fai sa festa, si cumprendit ca su prexu benit a essi mannu meda, e duncas, su tempus de sa festa benit a essi longu meda, e mi parrit giustu puru, fadendi su contu de totu su chi s'apu contau, e fadendi su contu, mescamente, de cantu benit a essi fadiosa una stagioni, mancai seus chistionendi de is diletantis, chi funt cussus, a sa fini, chi ndi cabant in campu po si sprèviai, po si spàssiai. 

E duncas, candu ammancant una pariga de cidas feti po serrai is giogus (is ùrtimus a acabbai ant a essi is de sa Primu Categoria, e megu a narai, intzandus, is scuadras chi currint me is cuatru listas de sa Primu Categoria, po ddu narai mellus puru), intzandus incumentzant a ndi bessiri aforas, ddi naru diaici, is scuadras chi ant bintu su campionau, est a narai, duncas, e mi parrit bastanti craru, ca cumenti sa stagioni est spacendi, intzandus beneus a sciri is nominis de totus cussas scuadras chi funt arribbadas a su primu postu de sa lista. 

E is scuadras serrant is giogus prus o mancu in su pròpriu perìodu, mancai nci siant scuadras chi acoitant, e meda puru (cumenti est sucèdiu, po si fai un esèmpiu, a is de s'Alighera, chi ant serrau is giogus po su chi pertocat su campionau de sa Promotzioni, in sa Lista B, po primus, in totu su mundu de su càlciu sardu), ma nci funt scuadras, puru, chi arrannèscint a serrai is giogus feti a s'ùrtimu segundu. 

E duncas, megamu a si narai, apustis ca una scuadra bincit su campionau cosa sua, mi parrit giustu ca si ndi chistionit, ca de su restu, custu est su trabballu chi depit fai, ca iat a depi fai, a su mancu, unu giornalista: nosu de su Diàriu Sportivu, po si fai a cumprendi cumenti andant is cosas, cumenti andat sa faina acapiada a su trabballu cosa nosta, sigheus totus is campionaus chi si giogant in Sardìnnia, e chistionu, est bastanti craru, deu creu, de cussus pesaus de sa Federatzioni Italiana de su Giogu de su Càlciu, e de sa Lega Natzionali de is Diletantis (partendi de cussu de s'Ecellenza, e fintzas a arribbai a su campionau de sa Segunda Categoria, pretziu in otu listas. E si dispraxit po is scuadras chi currint in su campionau de sa de Tres Categorias, ma su tempus est su chi est, e a sighiri a issus puru, po immoi, no nci dda fadeus. Ma ispereus ca in su benidori is cosas potzant andai mellus puru de cumenti si funt andendi in dì de oi; e custu bollit narai, pruschetotu, ca in su benidori nci iant a podi essi prus personas, de is chi nci funt immoi, po sighiri su trabballu chi nc'est de fai in su giàssu cosa nosta). 

E duncas, cumenti s'apu arremonau immubagora, candu acabbant is campionaus, e cumenti ndi bessint a pillu, ddi naru diaici, is scuadras ca arrannèscint a ndi cassai su primu postu de sa lista, intzandus parteus, acoitu e allestru, a intendi is allenadoris, est a narai, duncas, ca su trabballu cosa nosta benit a essi su de ndi pesai is ciaciarradas po cumprendi cumenti est andada sa stagioni, ca de su restu, chini mellus de un allenadori podit sciri cumenti ddis funt andadas is cosas in domu sua? 

E duncas, si potzu narai custu puru: in custus ùrtimus duus-tres annus deu fia costumau (e megu a chistionai, sèmpiri, po su chi pertocat is artìculus in sardu) a si torrai a contai cumenti funt andaus is giogus, me is duus-tres mesis de s'istadi, a bòcia frimas, cumenti si iat a podi narai. 

Est a narai ca, in totus custus annus passaus, chistionammu de totus is scuadras chi iant bintu su campionau cosa insoru: una scuadra dònnia giòbia, po catodixi-cuindixi cidas de sighiu. Ia a podi fai sa pròpriu cosa cust'annu puru, ma a si narai sa beridadi no apu ancora decìdiu cumenti nd'apa a pesai su trabballu (tengu un antru paghededdu de tempus, de su restu, po cumprendi mellus cumenti mi iat a praxi a cuncodrai is cosas), ma po immoi, eia, potzu incumentzai a si chistionai, a su mancu unu pagheddeddu, de cumenti funt andadas is istorias, ddi naru diaici, po su chi pertocat is campionaus de su duamilla e binticincu – duamilla e bintises. 

E cumenti eis a cumprendi, de cosas de si torrai a contai nci nd'est una biga manna (manna cumenti unu palatzu, mi benit de narai diaici), e fadendi su contu ca po custa cida no tengu gana de mi strollicai e de si fai sa conca a acua cun contus, contixeddus e strollichiminis, intzandus si iat a podi atacai, puru, cun is chistionis chi nd'arribbant deretas deretas de is campus. 

Ma ainnantis de si chistionai de is scuadras chi nd'ant cassau su primu postu de sa lista, mi iat a praxi a si chistionai de cumenti funt andadas is cosas cust'annu in sa Lista B de sa Promotzioni, poita, candu ammancant feti centu e otanta minudus po serrai is giogus, est sucèdia una cosa chi at fatu unu pagheddeddu de ispantu tra is tifosus. E immoi andu a si contai cumenti funt andadas is cosas. 
Po su chi pertocat sa Lista B, intzandus, apu tentu giai s'ocasioni de si contai sa stagioni de oru chi nd'ant pesau is de s'Alighera, chi funt arrannèscius a binci trinta partidas apitzus de trintacuatru bessidas, e si cumprendit, ant lassau feti is pimpirillas a is scuadras aversàrias. E fadendi su contu ca de is de s'Alighera si nd'apu giai chistionau, a su mancu unu pagheddeddu, si potzu chistionai, ma si promitu puru chi apa a acoitai, de sa cursa concas a su segundu postu in sa lista, e se da cursa a su de tres e a su de cuatru postus puru, fadendi su contu ca is de su Comitau (est a narai, cussus chi nd'ant pesau is regulas chi funt bàllias, ddi naraus diaici, cust'annu) iant dècidiu de donai sa possibbilidadi a is cuatru scuadras chi iant a essi arribbadas a is pabas de is primus de sa lista de giogai is partidas finalis, tra de issas etotu, po ndi cassai, eia, unu postu po su campionau de s'Ecellenza de s'annu chi at a benni; a narai sa beridadi, is de su Cumitau ant pentzau (pentzau beni, m'acudu a si narai deu) de ndi pesai sa partida finali, sa finalissima (cumenti si iat a podi narai a trassa de s'italianu etotu), tra sa scuadra chi at a binci is partidas finalis po su chi pertocat sa Lista B, contras a sa scuadra chi at a binci is partidas finalis in sa Lista A: e duncas, gei si cumprendit bastanti beni cumenti funtzionant is play-off, sa scuadra chi bincit totus is partidas at a essi sa scuadra chi nd'at a artziai, impari, pròpriu, a is primus de sa classi, in su campionau de s'Ecellenza. 

E duncas, torraus a nosu, po su chi pertocat sa Lista B no funt stètius feti is de s'Alighera a fai ispantus mannus, cun calincuna cosa cumenti a norantunu puntus in buciaca, ma puru is de su Bonorva ant giogau una stagioni toga meda, e de importu mannu, fadendi su contu ca funt stètius bonus a ndi cassai calincuna cosa cumenti a setantacuatru puntus, gràtzias a bintitres partidas bintas e a ses partidas chi ant serrau cun su resultau siddau in paridadi. 
Duncas, sighendi is regulas, is de su Bonorva si depiant giogai sa possibbilidadi de nc'arribbai a sa partida finali cun is partidas contras a is de s'Ozierese, de su Coghinas e de su Logusantu. Ma a sa fini, ita est sucèdiu? Est sucèdiu ca is de su Bonorva ant serrau sa stagioni regolari cun calincuna cosa cumenti a catodixi puntus in prus de is chi teniànt is de s'Ozierese, chi nd'ant cassau su de tres postus in sa lista. E duncas, is de su Cumitau ant pentzau de ndi bogai is partidas chi si depiant giogai tra sa segunda e is atras scuadras, poita sa diferèntzia de puntus fiat tropu manna. Is de su Bonorva, duncas, iant a arriscai (cun is regulas bècias, ddas tzerriu diaici) de perdi totu su bonu chi nd'ant pesau cust'annu in sa partida contras a una scuadra chi, mancai, in sa stagioni regolari, at acabbau is giogus cun cuindixi-binti puntus in mancu, e si cumprendit ca no est una cosa futa meda, poita po su chi ant fatu, is de su Bonorva si iant a minesci de podi fai balli totus is puntus de vantàgiu chi tenint apitzus de is scuadras aversàrias, chi mi cumprendeis po su chi seu circhendi de si narai. 

E si cumprendit, su de mudai is regulas a centu e otanta minudus de sa fini de sa stagioni no benit a essi una cosa toga, mescamente po is scuadras, e chistionu de is de s'Ozierese, de su Coghinas, de su Logusantu e de s'Usinese puru, ca mancai, cumenti mi parrit giustu puru, si fiant fadendi is contus cosa insoru, ma immoi, e totu paris, de una dì a s'atra, megu a narai custu, s'agatant aforas de is giogus. 
E si podeis immaginai a solus totu su febi, ddu tzerriu diaici, chi nd'ant tentu, chi si funt pigaus (po ddu narai, mancai, diaici etotu) is tifosus de is scuadras chi fiant currendi po is play-off, po is partidas finalis, chi immoi si nd'acatant ca, giai giai fiant currendi po nudda, cumenti si iat a podi narai. E immoi custas scuadras, ca fintzas a s'atra dì fiant batallendi, ddi naru diaici, po ndi cassai sa possibbilidadi  de ndi artziai in su campionau de s'Ecellenza, s'agatant chentza nudda me is manus, ddi naru diaici, e ndi iant a podi cabai in campu chentza gana, mancai me is partidas contras a cussas scuadras ca, invècias, funt currendi po ndi cassai sa sarvesa, cun totu su chi custu cumportat. 
Custa cosa, duncas (e seu chistionendi, mi parrit bastanti craru, de is regulas chi funt stètias mudadas, cambiadas pròpriu a sa fini de sa stagioni), pertocat feti is scuadras de sa Lista B, chi de su restu s'apu giai arremonau, ma po su chi pertocat sa Lista A, intzandus, cambiat pagu e nudda, fadendi su contu ca is primus cuatru scuadras s'agatant a unu-duus puntus is unas de is atras. 
E duncas, is ùnicus chi ant a essi prexaus po is regulas novas chi ant postu is de su Comitau ant a essi is de su Bonorva, e a sa fini, chi nc'arraxonaus beni impari, sa cosa no benit a essi diaici aforas de conca cumenti, mancai, si podiat parri in unu primu momentu, fadendi su contu ca is de su Bonorva funt stètius bonus a ndi pesai una stagioni de importu mannu meda, e fadendi su contu ca, feti po su chi pertocat s'ùrtimu mesi de giogus, is de s'Ozierese, chi in dì de oi s'agatant a su de tres postus de sa lista, e duncas, eia, a is pabas de is de su Bonorva, funt passaus a tenni feti (e naraus feti po modu de narai) seti puntus in mancus de cussus chi teniànt is biancus-arrùbius, a ndi tenni sexi in mancu. 

E duncas, mi parrit giustu (ma chistionu po mei, po su chi ndi potzu cumprendi) ca is de su Bonorva gioghint feti sa partida cun sa scuadra chi nd'at a arribbai de sa Lista A, in sa partida finali, antzis, po ddu narai mellus, me is duas partidas finalis, fadendi su contu ca nc'ant a essi de giogai siat sa partida de s'andada e siat sa partida de sa torrada. E duncas, po su chi pertocat sa Lista A, scieus giai ca sa scuadra chi nd'at a cassai su segundu postu de sa lista (in dì de oi a su segundu postu agataus is de su Castiadas, po fai un esèmpiu) no ant a depi giogai sa partida contras a sa scuadra chi at a arribbai a su de cincu postu (cumenti narant is regulas a s'incumintzu de s'annu), poita is puntus chi baddant tra is duas scuadras funt prus de dexi (tra is de su Castiadas e is de s'Arborea in dì de oi nc'est una forada, ddi naru diaici, de calincuna cosa cumenti a cuindixi puntus, e cun noranta minudus feti de giogai is cosas ant a abarrai diaici etotu); e duncas, megu a chistionai sèmpiri po su chi pertocat sa Lista A, sa scuadra chi at a lompi, at a serrai sa stagioni a su segundu postu, si dda at a depi biri contras a sa scuadra chi at a binci sa partida tra sa de tres scuadras de sa lista e sa de cuatru scuadras de sa lista. E custu, duncas, no si ddu apu contau po si fai sa conca a acua, ma si cumprendit, is regulas fatu fatu funt trobeddadas meda, e a is giornalistas no abarrat atru de fai ca circai de nci cumprendi calincuna cosa, e apustis, su chi unu giornalista iat a depi fai est cussu de torrai a contai a is atrus su chi s'est cumprendiu. 
E deu nc'apu provau, ma immoi spetat a bosatrus a mi fai sciri chi nci seu arrannèsciu, o chi at a serbiri un antru artìculu po si cumprendi a pari, e megu a brullai, ma nemmancu diaici tanti. 


E duncas, chi seis de acòrdiu cun mei, arribbaus a custu puntu de sa storia, mi iat a praxi a si incumentzai a contai de sa bìncida de su campionau chi nd'ant cassau is de su Macumer, sa scuadra sighida de Romano Marchi, e chi currit in su campionau de sa Primu Categoria, e in sa Lista C, po essi pretzisus. E duncas, cumenti s'apu giai arremonau, is de su Macumer funt stètius is primus, tra totus is scuadras chi currint in su mundu de sa Primu Categoria, a serrai is giogus po su primu postu, e po s'artziada in su campionau de sa Promotzioni, cun duuscentus e setanta minudus ancora de giogai (est a narai, eia, a fai is contus nci poneus pagu: tres partidas), e no est una cosa chi si biit dònnia annu, a narai sa beridadi. E duncas, seghendi a crutzu, e po no abarrai innoi a mi strollicai, deu creu ca sa cosa mellus chi potzu fai, est pròpriu cussa de si intregai is fueddus chi m'at regalau Romano Marchi in sa ciaciarrada chi nd'eus pesau po chistionai impari, e po arrexonai impari, apitzus de sa stagioni de oru chi nd'ant pesau is grogus-arrùbius ca, si bollu arregodai feti custu, me is ùrtimus duus annus funt arrannèscius a torrai in su campionau de sa Promotzioni, partendi de sa Segunda Categoria. E custu, eia, si iat a depi fai arregodai ca sa cosa de importu prus mannu, candu nd'arruis (apustis chi nd'arruis, po ddu narai mellus puru) benit a essi sa capacidadi, s'abbilidadi de ndi artziai acoitu sa conca, de si ndi strantaxai, intzandus, apustis chi nd'arruis e apustis chi ti sciascias a terra, po ddu narai diaici puru. E duncas, si intregu is fueddus de Romano Marchi, ca mi parit sa cosa mellus chi si podit fai, arribbaus a custu puntu de s'artìculu. Is de su Macumere, mancu a ddu fai aposta, nd'ant cassau is tres puntus prus drucis de sa stagioni (druci cumenti benit a essi druci su mesi de fràrgiu, po m'apicai a su chi s'apu scrittu e contau ainnantis in custu artìculu etotu), in sa partida chi ant giogau in domu cosa insoru etotu, e duncas, aranti a is tifosus cosa insoru, e contras a sa scuadra chi s'agatat, in dì de oi puru, a su segundu postu de sa lista; e duncas, eia, fait a ddu narai diaici puru, is de su Macumere ant fatu biri a totus cantu funt stètius fortis cust'annu, andendi a binci contras a is segundus de sa lista, contras a is aversàrius prus tostaus. E duncas, Marchi m'at contau ca «sa partida chi eus giogau contras a is de su Fonne no fiat, e si cumprendi beni, cumenti totus is atras, poita nosu si giogastus sa bìncida de su campionau; in una partida, duncas, tenestus de si giogai totu su trabballu chi eus fatu in custus noi mesis. Aintru de sa cida, candu si seus atobiaus po is allenamentus, eus circau de si cuncodrai, po sa partida megu a narai, in sa manera mellus chi eus potziu, chi seus arrannèscius; a narai sa beridadi, apu decìdiu de no mudai nudda, mancai sa partida contras a is de su Fonne fessit de importu mannu. Custu bollit narai, duncas, ca eus trabballau e si seus allenaus cumenti eus fatu po totus is partidas chi eus giogau in custa stagioni, fadendi su contu ca, comentecasiat, is cosas si fiant andadas beni meda, e duncas ita importu nci iat a essi stètiu a mudai su modu de trabballai diaici a s'ùrtimu? Si potzu narai, custu est berus, ca mancai domìnigu passau, po sa partida chi eus giogau contras a is de su Fonne, tenestus unu pagheddeddu de timorias in prus in conca, mancai, ca candu arribbas a unu passu de su bisu cosa tua, intzandus, e si cumprendit, est cumenti ca ti bengiant a mancai is fortzas, e su coràgiu. Is piciocus cosa mia, peròu, e gràtzias a su Cielu, funt stètius bonus a mantenni sa cuncentratzioni, e sa serenidadi puru, e duncas in campu is cosas si funt andadas beni meda. Is de su Fonne, invècias, teniànt meda ma meda prus pagu de nosu de perdi: po primu cosa, depiant circai de binci sa partida, e apustis peròu depiant circai de recuperai atrus cincu puntus in tres partidas (cincu puntus apitzus de noi in su pratu ndr), e si cumprendit, no est una cosa facìli. Po nosu, invècias, custus noranta minudus podiant balli po sa bìncida de su campionau, chi est una cosa, de su restu, ca seus circhendi, ca seus bisendi de s'incumintzu de sa stagioni cosa nosta, in su mesi de agustu, candu seus partius cun sa preparatzioni. Is cosas, de su restu, no si podiant andai mellus: no si podestus immaginai, e mi parrit bastanti craru puru, una partida, e unu domìnigu prus druci de su chi si seus bìvius. Nd'eus cassau sa bìncida de su campionau gioghendi in domu cosa nosta, e duncas, aranti de is tifosus de su Macumere e pròpriu in sa partida contras a is segundus de sa lista. Tocat a narai custu puru, immoi chi nci seus: is de su Fonne funt stètius bonus a ndi pesai una stagioni de importu manna, e s'ant donau de fai, ddi naru diaici, giai giai fintzas a s'ùrtima giorronada de sa stagioni. Po nosu, est stètiu unu domìnigu de oru, una de is diis prus bellas chi si seus bìvius cust'annu, custu est pagu ma seguru. Deu creu, de su restu – at sighiu a mi contai Romanu Marchi – ca sa cosa de importu po ndi cassai sa bìncida siat stètia sa fortza chi at tentu, chi nd'at bogau aforas sa truma de giogadoris chi, a sa fini, at fatu parti de sa rosa de su Macumere. E chistionaus de una rosa pesada, po su prus, cun giogadoris piticus meda de edadi, ma no eus mai pèrdiu sa conca, ddi naru diaici, no si seus mai fatus pigai de su disisperu, o de is pentzamentus lègius, nemmancu me is momentus prus difìcilis e dilicaus. Ma nc'est de narai ca pròpriu me is momentus prus lègius, is giogadoris prus espertus funt stètius bonus a guidai, ddi naru diaici, is piciocus prus giòvuneddus: s'ant agiudau, duncas, a mantenni s'atentzioni sèmpiri arta, chentza de abasciai mai sa guàrdia. Pròpriu po custu, mi benit de torrai gràtzias a totus is piciocus, a totus cussus giogadoris chi, mancai, ant tentu s'ocasioni de giogai prus pagu, meda prus pagu, a bortas, de is giogadoris titolaris, cumenti ddus tzerriaus. E custus piciocus, custus giogadoris funt stètius de importu mannu giai a partiri de is allenamentus: no mancant mai, nci fiant sèmpiri totus, e custu s'at permìtiu, est craru, de podi trabballai beni meda, in truma manna, ca si cumprendit: chi a su campu nd'arribbant feti dexi-cuindixi giogadoris, intzandus su de s'allenai puru benit a essi unu problema. Diaici invècias, eus potziu fai totu su trabballu in gràtzia de Deus. E candu ddus apu mandaus a giogai in campu, mancai po pigai su postu de calincunu antru giogadori chi no podiat giogai, poita fiat ingotu o scualificau, ballit aguali, intzandus chini nd'est cabau in campu s'est sèmpiri fatu balli, chi cumprendeis su chi seu circhendi de si narai; custu bollit narai ca seus arrannèscius a fai de mancu puru de is giogadoris prus fortis chi tenestus in sa rosa cosa nosta. E custa cosa, a sa fini, s'at agiudau, s'at permìtiu de ndi cassai su primu postu de sa lista. E de su restu, sa stagioni, su campionau, benit a essi longu e fadiosu meda, e no depis pentzai a binci feti una partida, iat a essi tropu facìli, ma depis pentzai a binci sa cantidadi prus manna de partidas apitzus de trinta bessidas, e si cumprendit, no funt pagus, e serbit passièntzia, e gana bella, dònnia domìnigu. Sa cosa de importu prus mannu est su de arrannèsci a binci sa cantidadi prus manna de partidas, una avatu de s'atra, e deu creu de podi narai ca in custu seus stètius is prus fortis; e fortzis, bollu narai custu feti, est gràtzias a totus is partidas chi eus bintu de sighiu chi nd'eus cassau su primu postu de sa lista, ainnantis de acabbai sa stagioni, cun tres partidas ancora de giogai. Tra is giogadoris prus fortis, custu est pagu ma seguru, ddoi est puru Pietru Falchi, chi nd'est arribbau a metadi de su campionau, ma s'at donau una manu manna meda a binci e, duncas, a ndi cassai su primu postu. A narai sa beridadi, is dirigentis fiant circhendi de ddu cunvinci a benni a giogai cun nosu giai de s'incumintzu de sa stagioni, est a narai, duncas, giai de s'istadi passada, ma a sa fini no s'at ascurtau, s'est fatu pregai, cumenti si iat a podi narai, e at decìdiu de benni a giogai cun nosu, innoi a Macumere, feti po sa segunda parti de su campionau, e andat beni aguali, e nci iat a mancai atru. E duncas, eia, apustis de una pariga de cidas chi ddis funt serbidas po pigai sa cunfiantzia cun is cumpangius nous,  intzandus at incumentzau a giogai cumenti sciit fai, po cumenti seus costumaus a ddu biri, de annus e annus. A narai sa beridadi, mi tocat a aciungi cosa puru, sa scuadra, sa rosa cosa nosta, est stètia pesada, po s'otantacincu – noranta po centu, cun piciocus chi nd'arribbant de Macumere etotu, ma tocat a fai su contu, puru, ca Pietru Falchi est de Putumajore, chi abarrat a feti duus chilometrus de Macumere, e duncas, eia, seus bixius. E de su restu, sa bidea de is dirigentis est sèmpiri stètia cussa de circai de ndi pesai sa scuadra cun piciocus, cun giogadoris de custa zona etotu, e pighendi cun nosu a Pietru, duncas, eus sighiu a curri in custu arrastu etotu. Chistionaus, de su restu, de unu de is giogadoris prus fortis chi nci funt in dì de oi in Sardìnnia, ma mescamente, chistionaus de unu omini de oru, cun unu coru mannu. Duncas, sa segunda parti de sa stagioni – at sighiu a mi contai Romanu Marchi – est benida a essi giai giai perfeta, cumenti si iat a podi narai, e duncas seus arrannèscius a ndi pesai unu bellu vantàgiu, ddi naru diaici, apitzus de is scuadras chi tenestus a is pabas. Chi castiaus is numerus, de su restu, nc'est pagu de si perdi, pagu de si cunfundi: s'unica partida innoi no eus giogau beni, antzis, fait a narai ca s'unica partida innoi eus giogau mabi meda est stètia cussa chi eus giogau in domu de is de s'Oschirese, in Oschiri, chi est una cosa, de su restu, chi podit capitai a totus. Su de perdi no praxit a nesciunu, est craru, ma nosu seus arrannèscius a aguantai, a no si fai pigai de is timorias, de su disisperu; antzis, seus andaus ainnantis, eus sighiu a curri, cun coru selenu, chi est sa mexina mellus. Eus sèmpiri fatu su contu ca no podis pretendi de essi perfetu po trinta partidas apitzus de trinta bessidas, chi cumprendeis su chi seu circhendi de si narai; est a narai ca, in una stagioni diaici longa, podit sucediri a totus de lisciai, de ponni mabi unu pei, de nd'arrui, de no giogai cumenti, mancai, iast a podi. Is de s'Oschirese invècias, contras de nosu, ant giogau sa partida de sa vida. Nosu eus sballiau totu su chi podestus sballiai, e no parrit berus, ca a bortas candu sa dì est trota iast a podi abarrai a giogai po oras e oras, ma chentza de ndi cassai nemmancu unu mesu gol. Ma diaderus, si ddu torru a arrapiti, iast a depi fai su contu ca is cosas ti iant a podi andai mabi, a su mancu in una partida. Ma apu cumprèndiu chi podestus binci su campionau a s'acabbada, a sa fini de sa partida chi eus giogau in domu de is de sa San Marcu de Crabas: seus chistionendi, torra, de una partida toga meda, e fait a narai, puru, ca is aversàrius cosa nosta, sa dì, no s'ant fatu nemmancu mesu regalu, cumenti est giustu ca siat. De seguru no s'ant regalau is tres puntus, chi cumprendeis su chi seu circhendi de si narai. Seus arrannèscius a ndi cassai su primu gol, po primus, ma una pariga de minudus ainnantis de sa fini de su primu tempus nd'eus ingotu duas bussinadas, ddi naru diaici, e duncas si seus agataus asuta in su resultau, cun is meris de domu chi fiant bincendi po duus a unu apustis de is primus corantacincu minudus de giogu. Mancu mali, peròu, ca seus arrannèscius a si ndi scabulli, e custu bollit narai, mescamente, ca seus arrannèscius a ndi pesai atrus duus gol; e s'ùrtimu gol est arribbau pròpriu a sa fini de sa partida, a su de norantacuatru minudus. E apitzus de custa cosa, tengu unu contixeddu de si torrai a contai: sa dì, apustis de sa partida chi eus giogau contras a sa San Marco, candu seu torrau a Gavoi (Romano Marchi est de Gavoi, cumenti s'at a cumprendi, cumenti at a essi bastanti craru ndr) un amigu miu chi fiat sighendi is partidas de sa lista cosa nosta, m'at fatu sciri, m'at scoviau, ca nosu nd'eus cassau su gol de su tres a duus, su gol chi s'at permìtiu, a sa fini, de binci sa partida, pròpriu candu is de su Supramonte nd'ant cassau su gol chi est bàlliu po s'unu a unu in sa partida contras a is de su Fonne. E duncas, est pròpriu diaici chi apu cumprèndiu chi nci fiat su tanti po pentzai ca, fortzis, custu podiat benni a essi s'annu giustu po nosu, s'annu giustu po ndi torrai in su campionau de sa Promotzioni, passendi, est craru, de sa porta prus manna, cumenti si iat a podi narai. De su restu, cun is dirigentis e su presidenti nc'est sèmpiri stètiu un acàpiu bonu e mannu: m'ant sèmpiri fatu intendi cumenti chi fessi in domu mia, e custu fintzas de sa primu dì, e no potzu fai atru ca ddis torrai gràtzias po cumenti m'ant craculau. Innoi a Macumere m'agatu beni meda, mi parrit craru puru, e m'ant postu sèmpiri in sa cunditzioni mellus po podi fai su trabballu cosa mia: po un allenadori, su de podi trabballai cumenti bisas, cumenti disigias, est una cosa de importu mannu meda, mancai tui siast feti un allenadori de una scuadra de diletantis. Si ia a bolli arregodai, immoi chi nci seu, ca seu arribbau innoi in sa panchina de su Macumere pròpriu s'annu chi ndi seus cabaus de categoria, de sa Primu a sa Segunda; e deu apu pigau in manu is crais de sa scuadra feti a metadi de s'annu, in sa segunda parti de sa stagioni, si cumprendit. No seus arrannèscius a ndi cassai sa sarvesa, cumenti s'apu contau immubagora, ma is dirigentis de s'assòtziu m'ant fatu sciri, acoitu, ca bolliànt sighiri a trabballai cun mei, e si cumprendit beni, custa est stètia una cosa chi m'at fatu prexei meda. De sa dì, eus incumentzau a curri a forti, chentza de si frimai prus: nd'eus cassau s'artziada, torra, in su campionau de sa Primu Categoria, bincendi is partidas finalis (cussas chi is ingresus tzerriant play-off) e su chi est sucèdiu cust'annu, in custa stagioni, invècias, est asuta de is ogus de totus. A contus fatus, duncas, nd'eus cassau s'artziada de categoria po duus annus de sighiu, chi no est una cosa de pagu, e mi parrit craru puru. Mi seu agatau beni meda no feti cun is dirigentis e su presidenti de s'assòtziu, ma s'acàpiu est stètiu togu, e forti meda, puru cun is tifosus cosa nosta: a narai sa beridadi, una de is cosas de importu prus mannu, po nosu, e megu a chistionai de is giogadoris, de is dirigentis e de is personas chi m'ant agiudau a sighiri sa scuadra, est sèmpiri stètiu cussu de torrai a biri una biga de genti a su campu, de torrai a portai sa genti a su campu, po ddu narai mellus puru, fadendi su contu ca me is ùrtimus annus, me is ùrtimas stagionis, su Macumere s'est agatau a curri, a giogai in categorias prus bascias de su chi, invècias, sa scuadra e is tifosus minesciant, fadendi su contu ca seus chistionendi de una de is scuadras de importu prus mannu, po sa storia chi tenit s'assotziu a is pabas, tra totus cussas chi s'agatant innoi in Sardìnnia. Po primu cosa, duncas, bolestus cassai torra sa stima, s'amori de is tifosus cosa nosta, e est andau totu beni: is tifosus, de su restu, funt stètius su de doxi ominis in campu, cumenti si narat». 





Attività realizzata col contributo della Regione Sardegna. IMPRENTAS 2025-2026. LR 22/2018 art. 22