Arregodus : torraus a bivi sa stagioni de oru chi nd'ant pesau is decimesus de sa Decimo 07

E duncas, atacu cun s'artìculu chi at a balli po sa de cuatru cidas de su mesi de Treulas (chi nd'at a tenni cincu, est a narai, duncas, ca s'ùrtimu artìculu, po su de ses mesis de s'annu, nd'at a bessiri pròpriu s'ùrtima dì, fadendi su contu, eia, ca s'ùrtimu giòbia at a arrui su trintunu) e incumintzu a si narai ca a custu giru (cumenti m'est bèniu de narai) m'apa a strollicai, sèmpiri chi nc'apa a arrannèsci, unu pagheddeddu prus pagu de su chi apu fatu seti diis fait, fadendi su contu ca sa cida passada (chi si ddu arregodais, desinò agatais s'artìculu etotu in sa pagina de is Novas, e sèmpiri, mi parit craru, in su giàssu de is amigus de su Diàriu Sportivu) mi seu fatu pigai sa manu e apu acutu a chistionai de bocias, de resultaus e de is chistionis acapiadas a su mundu de sa bòcia feti in s'ùrtima parti de s'artìculu etotu. 
E no chi sa cosa siat unu dannu, mi parit craru puru (ca is dannus in custu mundu benint a essi atrus, e si cumprendit, e bastat a castiai cincu minudus de is tialus de is telegiornalis po ddu cumprendi, chi andaus a fai su contu, mancai feti, de totus is gherras chi sighint a nc'essi in custu mundu macu e totu ghetau a pari, cumenti mi benit de narai), ca a sa fini cun is strollichiminis cosa mia, cun is strollichiminis chi mi ndi bessint aforas de sa conca (eia, cumenti s'acua bessit aforas de su grifoni apustis chi ddu oberris, chi mi permiteis de manigiai custa metafora, e chi mi permiteis, intzandus, de giogai a fai su poeta, mancai feti po unu pagheddeddu) no apu bociu a nesciunus, e si cumprendit, a su mancu, mi parit de crei custu (e no pentzu ca calincunu de bosatrus siat mortu in s'interis chi ligiàt s'artìculu chi nd'apu bogau aforas sa cida passada, e megu a brullai, gei si cumprendit, berus est?). 

Ma chi pròpriu si depu narai sa beridadi, nci pongiu prus pagu a si chistionai feti (e naru feti!) de resultaus de is partidas e de totus is novas chi, mancai, nd'arribbant de totus is campus innoi si giogant is isfidas de su mundu de is diletantis, antzis ca mi ponni a mi spremi is crobeddus, po circai calincuna cosa de bonu de si narai, mancai is contus e is contixeddus (e gràtzias a su Cielu, mi benit fintzas de narai) no ammanchint mai in sa conchitedda cosa mia. E chi seis costumaus a sighiri is artìculus chi ndi bogu aforas po is Novas de su Diàriu Sportivu, intzandus, deu creu custu a sa fini, scieis beni cumenti andant is cosas. Ca su de mi strollicai cun bosatrus est una de is cosas chi mi praxit fintzas a m'amachiai. E chi pròpriu si ddu depu narai, su trabballu chi ndi pesu po s'istadi (e po su prus, in s'istadi, fadendi su contu ca is campionaus si frimmant, cumenti mi parit craru e giustu, depu scriri is artìculus in sardu) est su chi mi praxit de prus, mancai siat fadiosu, ca cumenti s'apu giai arremonau un'antra borta (chi no megu a mi sballiai, ma mi parit de podi narai ca no mi seu sballiendi, chi mi permiteis de giogai unu pagheddeddu cun is fueddus), ca a sa fini is giorronadas cosa mia benint a essi totus agualis: est a narai ca mi ndi scidu, papu calincuna cosa po fai su smurtzu (ca su de incumentzai a trabballai cun su stògumu sbuidu est una cosa ca mi benit mabi meda a fai, chi pròpriu si ddu depu narai), e allestru, apustis chi nci cabu s'ùrtimu unconi (cumenti naràt sa bon'anima de mamma mia etotu, ma su fueddu si iat a podi scriri "buconi" puru, cumenti apu agatau immubagora etotu in su fueddàriu), atacu a scriri. 
E sa cosa (megu a chistionai de su trabballu cosa mia, si cumprendit, berus est?) andat ainnantis fintzas a s'ora de prandi, est a narai, duncas, fintzas a s'una e mesu e, a bortas, fintzas a is duas de su megama (fintzas a is duas passadas, puru); e mancai deu no tèngia orarius po papai (no castiu prus s'orologiu po sciri candu est ora de prandi, o de cenai, e no castiu prus s'orologiu ainnantis de andai a dromiri, diaici no sciu mai cantus oras dromu e cantus oras fatzu de scidu); e candu mancai acabbu de scriri, no tèngiu prus famini e duncas preferru a mi pasiai unu pagheddeddu sa conca, a ogus serraus e atesu (atesu meda, po su chi fait, po su chi est possibbili) de su tialu de computer e, mescamente, atesu, po su chi fait, de su schermu de su tialu de computer, chi benit a essi (mescamente apustis chi nci passas aranti una bella pariga de oras dònnia, dònnia dì) unu dannu mannu meda (de su chi narant is dotoris e de su chi ndi potzu cumprendi deu etotu). 
E duncas, eia, candu nd'arribbat s'ora de papapi intzandus m'agatu chentza apetitu (chi iat a essi, duncas, su bisòngiu de papai), e sciu puru ca nci funt personas chi, eia, sartant su prangiu cumenti, mancai, seu fadendi deu in custu ùrtimu mesi. Ca a sa fini, su de si preni sa brenti, e su de digidire sa cosa chi ti papas, mi parint siant fainas chi mi fadiant prus de su tanti chi mi serbit. Eia, su de matziai sa cosa de papai, su de nci dda depi inguti mi parit unu trumentu aforas de contu (e unu pagheddeddu megu a brullai, si cumprendit?), ca preferru circai de mi pasiai, mancai de mi dromiri po un'orixedda, e apustis, eia, gei s'at a cumprendi beni, intzandus atacu torra a scriri. E custu fintzas a is ses e mesu, fintzas, mancai, a is seti de su merì. E apustis, po s'ammarolla (mancai no ndi tengia gana), mi nci ghetu in sa bia po mi fai sa passilladedda chi seu costumai a fai dònnia, dònnia dì chi su Cielu fait proi apitzus de sa conca cosa mia (po giogai a fai unu pagheddeddu su poeta). 
E duncas, eia, custa cosa (no sciu poita ma m'est bèniu in conca de dda tzerriai: custu brodu, custa minestra) andat ainanntis de su lunis e fintzas a su giòbia, e a bortas fintzas a su cenabara puru. 

E mancu mali, mi megu a solu a solu, ca po trabballu depu abarrai feti innoi a cracai butoneddus in sa tialu de sa tastiera, e in s'interis ca scriu is artìculus (ballit po cussus in italianu ma, pruschetotu, po cussus chi ndi pesu in su sardu chi si fueddat innoi in su Campidanu de mesu, e mescamente in Bidd'e Sorris, chi est sa bidda innoi seu stètiu pàsciu e crèsciu), tèngiu sa bona sorti (sa fortuna, si iat a podi narai diaici puru) de podi ascurtai muntonis (ma muntonis mannus, labai) de musica, ca est una cosa ca seu costumau (gràtzias a su Cielu, gràtzias a Deus) a fai fintzas de candu fia unu piciocheddu piticheddu, est a narai, fintzas de is primus annus de is iscolas superioris, candu apu scobertu, eia, ca podia, ca fia bonu (po ddu narai mellus puru) a lìgi e a scriri in s'interis chi ascutu sa musica. E antzis, si potzu narai ca su de ascurtai sa musica in s'interis chi lìgu o chi scriu m'agiudat a mi fadiai prus pagu de su chi mi sucedit candu no tèngiu sa musica a mi fai cumpangia (cumenti si iat a podi narai), e no nc'eis a crei, mancai, ma a mei mi pigat pròpriu diaici cumenti s'apu apena narau. 

E duncas, eia, mi benit in conca ca po curri puru sa musica agiudat, e meda puru (tanti ca candu fais sa maratona, de su chi m'ant fatu sciri a su mancu, fadendi su contu ca deu no nd'apu mai fatu una, sa musica est pigada a trassa de doping, po manigiai unu fueddu ingresu, est a narai ca est una cosa proibbida, chi cumprendeis su chi si bollu narai; est a nai, duncas, ca candu fais sa maratona no podis ascurtai musica, poita benit a essi a tipu droga, eia, sa musica t'agiudat, mancai, a curri prus a forti de su chi iast a arrannèsci a fai a su naturali. 

E mancu mali, mi megu a solu a solu, ca a s'incumintzu de custu artìculu etotu, si ia promìtiu ca no m'apa a essi strollicau, e invècias, ddu bieis a solus, cun is ogus cosa de bosatrus, cumenti funt andendi is cosas. 

E duncas, sigu a scriri cun gana bona, e mi parit de podi narai ca prus scriis e prus benis a essi abbili, e allestru; e mi benit in conca su chi mi contant, fatu fatu (fatu fatu meda, a si narai sa beridadi) is allenadoris chi intendu apustis de is partidas, po arraxonai impari a issus apitzus de sa stagioni sportiva, e apitzus de cumenti ddis funt andendi is cosas cun is scuadras chi sighint, e duncas, eia, m'arrapitint fatu fatu ca su de binci is partidas, est craru puru, agiudat a curri prus a forti; ca s'afròddiu, cumenti a s'amori etotu, est una de is mexinas prus fortis chi nci funt in custu mundu, a su mancu a parri miu. E duncas, eia, prus scriu e prus arrannèsciu a abarrai cuncentrau apitzus de su chi seu fadendi; ca su dannu prus mannu, mi parit de podi narai custu puru, immoi chi nci seu, benit a essi su de pentzai a cras, cumenti si megàt babbu miu candu fia piciocheddu piticu, candu, mancai, ses fadendi un'antra cosa. 
Eia, e si cumprendit, sa cosa ballit puru po is giogadoris de càlciu, is dannus nd'arribbant candu, mancai, no ses pentzendi a su chi ses fadendi (e bai e circa ita totu teneus in sa conca, ca sa cosa ballit po mei, custu est pagu ma seguru, ma ballit po bosatrus puru, berus est?), candu no arrannèscis a abarrai cuncentrau. 
E duncas, eia, potzu narai (po serrai cun is strollichiminis, e fiat ora puru, s'at a megai giai calincunu de bosatrus) ca is cosas po su chi pertocat su trabballu no mi siant andendi mabi, pròpriu no si podit narai: antzis, est sèmpiri unu prexu mannu, po mei, su de podi scriri custus artìculus in sardu, ca a scriri in sa lingua cosa mia mi fait beni a su coru, cumenti si iat a podi narai, e in prus, eia, candu scriu mi torrant a benni in conca, ca mi parit giai giai de dda torrai a intendi, totus is fueddus chi, mancai, mi naràt sa bon'anima de mamma mia, mescamente candu fia unu pipieddu piticu, e custa est una de is maghias prus togas chi m'est tocau de bivi: e megu a narai, duncas, de cumenti is arragodus potzant essi acapiaus, a strintu puru, a is fueddus. E duncas, est craru, bastat a torrai a arramonai unu fueddu (e a bortas mi capitat, puru, de arramonai unu fueddu chi, mancai, no mi beniat in conca de annus e annus, chi cumprendeis su chi si bollu narai) po m'agatai torra is arragodus aintru de su coru, partendi, duncas, pròpriu de is arragodus acapiaus a mamma mia, chi est stètia cussa, est craru, ca po prima m'at imparau a chistionai, e duncas, a chistionai su sardu puru, e no feti s'italianu. 

E immoi chi seu arribbau a custu puntu de s'artìculu, mi parit totu de podi narai ca, eia, po custa cida puru apu spàciau cun is contus e is contixeddus e mescamente cun is strollichiminis: prexaus seis ca, a su mancu po oi, no s'apu fatu sa conca a acua? 

E duncas, torraus a nosu. 
Custa cida, intzandus, sigheus cun sa faina chi eus incumentzau sa cida passada etotu, e megu a chistionai, duncas, de is artìculus chi pertocant is scuadras chi nd'ant cassau su primu postu de sa lista e, duncas, sa bìncida de su campionau cosa insoru, in su mundu de sa Segunda Categoria. 
E duncas, eia, cumenti est craru, sa cida passada eus atacau (apu atacau, chi si praxit de prus cumenti sonat) contendusì de sa stagioni de oru chi nd'ant pesau is de sa Gioventudi de Sarroch, sighius de un allenadori bravu cumenti est Nunzio Falco. E po custa cida, duncas, apustis de s'essi chistionau de cumenti funt andadas is cosas in sa Lista A de su campionau de sa Segunda Categoria, podeus incumentzai a castiai cumenti funt andadas is cosas po su chi pertocat sa Lista B. E acoitu, e m'acudu a si narai, duncas, ca a su primu postu de sa lista agataus is de sa Decimo 07 (sa scuadrixedda chi nd'ant pesau in Deximumannu, e si cumprendit bastanti beni de su nomini, deu creu de podi narai custu, a su mancu, chenta timi de mi sballiai), chi in sa segunda parti de sa stagioni funt stètius sighius de un allenadori giòvuneddu, ma chi sciit giai su fatu cosa sua, custu est pagu ma seguru, e chi est Albertinu Melis. 

E duncas, po primu cosa, deu creu ca sa cosa mellus chi si potzat fai, po cumprendi mellus cumenti siant andadas is cosas in su torneu, est cussa de andai a castiai (impari? Eia, sèmpiri chi ndi teneis gana) is numerus chi sa scuadra primu de sa classi est arrannèscia a ndi pesai. E duncas, si potzu narai ca is de su Deximu funt arrannèscius a ndi cassai calincuna cosa cumenti a setantacuatru puntus in totu, e custu in bintotu bessidas (est a nai, duncas, in bintotu partidas giogadas). E duncas, a fai is contus nci poneus pagu, ma pagu meda, is deximesus funt arrannèscius a binci po bintitres bortas (e no funt pagus de seguru) e po cincu bortas ant serrau sa partida cun su resultau siddau in paridadi e, duncas, eia, si funt dèpius acuntentai de feti unu puntixeddu (chi peròu no si fuliat mai, ca schifu no fait, antzis, unu puntixeddu, cumenti si narat fatu fatu, e cumenti de su restu m'arrapitint is allenadoris etotu, est sèmpiri mellus de su de abarrai a buca asciuta, chi cumprendeis su chi si megu a narai, su chi seu circhendi de si narai, po ddu narai mellus puru). 

E custu bollit narai, puru, ca is de su Deximu no ant mai pèrdiu nemmancu una partida cust'annu, e si podeis imaginai, a solus, de totu su prexu e de totu s'afròddiu chi nd'ant tentu po custa cosa. E duncas, e mi parit craru puru, s'annu chi at a benni (e megu a chistionai de sa stagioni sportiva de su duamilla e binticincu – duamilla e bintises) ant a podi curri, torra, in su campionau de sa Primu Categoria, po su prexu mannu, si cumprendit, de is tifosus, ma sa cosa ballit puru po is dirigentis e po is piciocus, e megu a chistionau de is giogadoris, est craru, ca a sa fini funt cussus chi ndi cabant in campu. 

E po cumprendi cantu funt stètius fortis is de su Deximu, podeus andai a castiai, immoi chi nci seus, cumenti funt andadas is cosas in domu de is de su Cabuderra, sighius de Daniele Cadelano. E duncas, is biancus-arrùbius funt arrannèscius (funt stètius bonus) a ndi cassai, a ndi pesai calincuna cosa cumenti a setanta puntus (chi funt cuatru in mancu de is chi tenint is de su Deximu, mi parit bastanti craru e de su restu a fai is contus giei nci poneus pagu), e custu bollit narai, duncas, ca ant bintu calincuna cosa cumenti a bintiduus partidas (una in mancu de is chi funt arrannèscius a binci is deximesus) e ant serrau sa partida cun su resultau siddau in paridadi po cuatru bortas (est a narai, eia, una borta in mancu de su tanti chi est tocau a is de su Deximu, chi ant serrau sa partida in paridadi po cincu bortas in custa stagioni), ma tocat a narai, puru, ca is de su Cabuderra nd'ant dèpiu inguti duus unconis marigosus, est a narai ca ant pèrdiu duas partidas, cun is de su Deximu, invècias, chi no nd'ant pèrdia nemmancu una. A trassa, duncas, de su chi est sucèdiu, de su chi funt stètius bonus a fai is de sa Gioventudi de Sarroch, chi s'apu arremonau ainnantis in custu artìculu etotu e puru in s'artìculu chi nd'est bèssiu a pillu sa cida passada, e chi agatais, impari a totus is atrus, me is paginas de is Novas de su Diàriu Sportivu (e mi parit craru puru). 

E duncas, si potzu narai puru, immoi chi nci seu, ca is de su Deximu nd'ant cassau feti dexennoi gol (e no nc'est stètia nesciuna atra scuadra, a su mancu po su chi pertocat sa Lista B, chi apat incasciau prus pagu gol de issus) e po su chi pertocat s'atacu puru, is cosas ddis funt andadas beni meda, fadendi su contu ca funt arrannèscius a ndi pesai calincuna cosa cumenti a noranta gol, chi funt tres in mancu (feti tres in mancu, si iat a podi narai diaici puru) de is chi nd'ant pesau, de is chi ant fatu is de su Cabuderra (chi ant serrau sa stagioni cun norantatres gol fatus in busciaca, cumenti si iat a podi narai e cumenti m'est bèniu de narai, de su restu). 

E duncas, po su chi pertocat is numerus, deu creu de podi narai ca s'apu contau totu su de importu chi nci fiat de si contai, e immoi, chi seis de acòrdiu cun mei, sa cosa mellus chi si podit fai (a su mancu a parri miu) est cussa de andai a arraxonai, impari, si cumprendit, apitzus a is fueddus chi m'at regalau s'alleandori de is deximesus, e seu chistionendi, est craru, de Albertinu Melis, chi apu intèndiu, a su telefunu, pròpriu una pariga de oras apustis chi nd'ant cassau sa bìncida de su campionau. E si cumprendit, si ddu podeis imaginai a solus, deu creu, totu s'afròddiu chi Melis teniàt in su coru. «Seu arribbau in sa panchina de is de sa Deximu 07 – m'at contau issu etotu – candu su campionau fiat giai fatu po sa metadi, chi cumprendeis su chi si bollu narai e su chi megu a si narai; sa scuadra s'agatàt cun cincu puntus in mancu de is chi teniant is primus de sa classi, e megu a chistionai, est craru, de is de su Cabuderra. Sa primu partida chi apu sighiu me is pannus de s'allenadori de sa Deximu 07, a narai sa beridadi, cumenti mi tocat a fai, de su restu, no est andada pròpriu beni, no est andada beni cumenti mi podia bisai, a su mancu, fadendi su contu ca sa dì seus arrannèscius a ndi cassai feti unu puntixeddu e, duncas, apustis de cussa giorronada (ca fiat sa de noi partidas de sa lista de s'andada, e chi s'est giogada, si ddu naru po essi prus pretzisu puru, sa primu dì de su mesi de Idas) si seus agataus cun seti puntus in mancu de is chi teniànt is de su Cabuderra. E duncas, totu su chi apu dèpiu e apu pòtziu fai – at sighiu a mi contai Albertinu Melis – est stètiu cussu de m'arramangai is maigas, cumenti si narat, a trassa de s'italianu etotu, e circai de trabballai apitzus de sa conca de is giogadoris cosa mia, apitzus de sa mentalidadi, chi si praxit de prus cumenti sonat sa cosa. Apu cumprèndiu, fintzas de is primus allenamentus, ca chi bolestus diaderus cassai sa bìncida de su campionau, chi fiat sa cosa, de su restu, ca m'ant domandau de fai is dirigentis de s'assòtziu etotu, intzandus nci fiat de mudai sa mentalidadi, su modu chi tenestus, duncas, de ndi cabai in campu e de giogai is partidas e, mescamente, nci fiat de trabballai apitzus de su carateri  etotu de is giogadoris, fadendi su contu ca is piciocus chi ddoi fiant in sa rosa de is deximesus no fiant pròpriu is prus fortis po su chi pertocat sa ghigna (cumenti si iat a podi narai, mancai deu no apa mai intèndiu custu fueddu, est a narai ca ddu apu agatau po sa primu borta, immoi, in su tialu de fueddàriu ndr). A narai sa beridadi, is dirigentis de s'assòtziu, is dirigentis de sa Deximu 07 boliant binci su campionau, teniant custu bisu, a su mancu, e fiant prontus a fai dònnia calidadi de sacrìficiu po nc'arrannesci, chi cumprendeis su chi si megu a narai; ant fatu de totu, duncas, po circai de mellorai sa scuadra: nc'est stètiu su bisòngiu, mancai, de ndi sciusciai s'acàpiu chi teniànt cun calincunu giogadori, e nc'est stètiu su bisòngiu de ndi portai, in sa rosa, calincunu giogadori forti, chi si podessit donai una manu de agiudu.  E duncas, funt arribbaus, po giogai cun nosu, giogadoris de importu mannu cumenti funt Umbertu Festa e Danieli Zucca, ma feti po nd'arremonai duus, tra is atrus. Sa beridadi est ca si seus postus in conca sa bidea de serrai sa stagioni a su primu postu, ma is dirigentis no s'ant mai postu nesciunu tipu de nervosu in pitzus, chi mi cumprendeis; est a narai ca no depestus binci po s'amarolla, e antzis, eus potziu trabballai cun su coru selenu e cun sa conca sbuida de is pentzamentus lègius, ca a sa fini est una de is cosas chi contant de prus candu t'agatas a curri in unu campionau tostau cumenti su chi eus bintu nosu. Custu bollit narai, duncas, ca festus prontus a pigai po bonu dònnia resultau: su campu a sa fini, est craru, est su chi tenit s'ùrtimu fueddu, e chi mancai festus arribbaus puru a su segundu postu de sa lista, deu creu ca nesciunu de nosu nd'iat a essi fatu una mobadia, o unu dannu mannu. Ca si cumprendit, ca is dannus mannus, in sa vida, benint a essi atrus. Po su restu, si potzu narai feti ca eus giogau totus is partidas, a su mancu cussas chi apu sighiu deu de sa panchina, est craru, sèmpiri cun sa pròpriu mentalidadi: e custu bollit narai, duncas, ca eus giogau sèmpiri in sa pròpria manera, chentza de abarrai ingunis a fai contus apitzus de sa fortza de is aversàrius chi tenestus aranti: po nosu fiat aguali, eus sèmpiri giogau cumenti chi festus currendi po sa partida finali de sa cupa de is campionis, cumenti si narat. De candu seu arribbau, duncas, sa scuadra cosa mia est stètia bona a ndi cassai calincuna cosa cumenti a dexennoi partidas bintas, s'una avatu de s'atra; deu creu ca po su mundu de is diletantis de sa Sardìnnia siat unu resultau de importu mannu meda, e in dì de oi no sciu chi nci funt stètias atras scuadras, innoi in s'isula, chi siant arrannèscias a ndi pesai una cosa diaici, e megu a chistionai, est craru, de is partidas chi eus bintu totu de sighiu. E si cumprendit ca no benit a essi una cosa facili, su de arrannèsci a binci totus custas partidas, fadendi su contu, de su restu, e mi parit craru, ca in campu ddoi cabant puru is aversàrius. E no est stètiu facili nemmancu su de ndi cassai su primu postu de sa lista, e su de binci su campionau: po ndi cassai s'artziada de sa categoria, passendi de sa porta prus manna, cumenti si narat e cumenti sucedit a chini ndi cassat su primu postu de sa lista, de su restu, nc'est su bisòngiu ca totus is cosas andint in sa manera mellus, chentza tropus strobbus, duncas, est craru; totu depit andai beni, partendi, duncas, de su trabballu chi pertocat is dirigentis de s'assòtziu; po bona sorti, po fortuna, apu tentu sa possibbilidadi de trabballai impari cun una truma de dirigentis chi sciint su fatu cosa insoru: nd'est bessiu aforas unu bellu ammesturu tra su carateri cosa mia e is bisus chi teniànt in conca is dirigentis de s'assòtziu. E si potzu narai puru, immoi chi nci seu, ca su de essi arrannèscius a si lassai a is pabas una scuadra forti cumenti cussa de su Cabuderra no est stètiu facili, antzis, ddis depeus fai is cumplimentus po su chi funt stètius bonus a fai cust'annu. Nosu, de su restu, seus arrannèscius a ddis abarrai apicigaus a is carronis po cidas e cidas de sighiu, cumenti si iat a podi narai e cumenti si narat, a trassa de s'italianu etotu; fintzas a candu seus arribbaus a sa dì de sa partida contras de issus, innoi seus arrannèscius a ndi cassai cussus tres puntixeddus chi s'ant permìtiu, a sa fini, de ndi artziai a su primu postu de sa lista. E de cussa giorronada, funt stètius issus chi s'ant dèpiu curri. Ma cumenti t'apu giai narau, po nosu dònnia partida fiat cumenti sa partida finali po binci una cupa; no eus mai mudau sa mentalidadi cosa nosta e su giogu cosa nosta, chentza de abarrai a pentzai a su nomini de sa scuadra chi tenestus aranti: po nosu fiat aguali, eus giogau sa pròpriu partida contras a is de su Cabuderra, contras a is de su Santu Basibi e contras a is de sa Gioventudi de Assemini, po nd'arremonai feti tres. Po nosu is aversàrius funt sèmpiri stètius agualis e ndi seus sèmpiri cabaus in campu cun sa bidea in conca de ndi cassai is tres puntus prenus, giai giai po s'amarolla. Festus prontus a si svenniri puru, in campu, po arrannèsci a binci sa partida e po arrannèsci a ndi cassai is tres puntus, chi cumprendeis su chi si megu a narai». 

S'apu giai arremonau puru,chi no mi megu a sballiai, ca is de sa Deximu 07 funt arrannèscius a binci po bintitres bortas, apitzus de bintotu bessidas, e candu m'est bèniu in conca de domandai a Albertinu Melis cali fessit stètia sa bìncida de importu prus mannu, nc'at pentzau feti unu segundu, e intzandus at atacau a mi contai ca «cussa contras a is de su Cabudera est stètia sa gara prus toga, prena fintzas a cucuru de emotzionis, e sa cosa ballit siat po is piciocus, siat po mei, e siat po totu sa genti chi ddoi fiat a castiai sa isfida de sa tribbuna. Eus tentu s'ocasioni de giogai aranti de una biga manna de genti; no capitat de seguru dònnia dì de biri una cantidadi diaici manna de tifosus, e nd'aprofitu, duncas, po ddis torrai gràtzias po totu sa passioni chi s'ant regalau cust'annu, e ballit, est craru, de sa prima a s'ùrtima partida, po totu sa stagioni, duncas. Totu custa genti in unu campu no si biint giai mai nemmancu po is partidas de su campionau de sa Sèrie D, figuraisì po una partida, po una gara de su campionau de sa Segunda Categoria. Sa dì de sa partida contras a su Cabuderra su campu fiat prenu de personas, e is tifosus cosa nosta, megu a chistionai mescamente de cussus prus callentis (cussus ca, a trassa de s'ingresu etotu, tzerriaus ultrà ndr) s'ant donau una bella manu de agiudu, fadendi su tifu po nosu, est craru, e s'ant portau a donai su centu e dexi po centus; est a narai, mellus, ca s'ant agiudau a nci fuiai in campu su coru e puru totus is fortzas chi tenestus me is cambas, prus de su chi podestus fai, a su naturali. Deu creu de podi narai, chentza timi de mi sbàlliai, de su restu, ca sa bolta po su chi pertocat sa stagioni cosa nosta, e sa bolta, duncas, po su chi pertocat sa cursa concas a su primu postu, ndi siat arribbada pròpriu sa dì, a sa fini de sa partida chi eus giogau contras a is cabuderredus». 

E duncas, si iat a podi narai, puru, immoi chi seus arribbaus a custu puntu de sa chistioni, e de s'artìculu, ca po is de sa Decimo 07 is cosas funt andadas beni meda, ca fortzis, mellus de diaici no podiant fai, po diaderus. 
E tra is cosas prus togas, tra is cosas prus togas chi ddis funt bènidas prus beni, a su mancu in custa stagioni, nc'est, custu est pagu ma seguru, cumenti s'apu giai arremonau, de su restu, su trabballu chi ant fatu is atacantis, ma Melis s'at scoviau cumenti funt andadas, diaderus, is cosas, ca nesciunu de su restu ddu podit sciri, mellus de issu. «Eus bintu su campionau gràtzias a su trabballu chi nd'at pesau totu sa rosa, totu sa truma de giogadoris chi ant fatu parti de sa scuadra; totus, e naru totus, ant fatu sa parti cosa insoru. Peròu, mi iat a fai prexei, puru, arremonai unu giogadori ca, a parri miu a su mancu, at fatu unu trabballu bonu meda, chentza de ndi bogai nudda a totus is atrus. Seu chistionendi de Matta, ca nd'at pesau, a solu, calincuna cosa cumenti a dexennoi gol: seus chistionendi de unu piciocu chi deu no connoscia, tra is atras cosas, ma che m'at fatu a biri, in totus custus mesis, ita totu est bonu a fai, e seu abarrau spantau meda, e si cumprendit; tenit gana meda de mellorai, dì po dì, e impari a is cumpàngius cosa sua etotu s'est sèmpiri allenau a totu coddu, currendi a tres mila chilometrus a s'ora, chi cumprendeis su chi si bollu narai. Est arrannèsciu a ndi pesai prus de dexi gol e no potzu ca essi prexau meda po issu; at fatu a biri a totus cantu est forti, e deu creu ca po unu giogadori, po unu giogadori de sa Segunda Categoria, mescamente, est una de is cosas de importu prus mannu. Po ndi cassai sa bìncida de su campionau, e custu po mei est su de tres campionaus chi apu bintu in sa Segunda Categoria, e duncas sciu beni de ita seu chistionendi, mi parit de podi narai custu puru, sa cosa de importu prus manna est cussa de ndi ingolli pagu gol, e candu t'agatas a giogai cun sa difesa prus forti de su torneu, is cosas benint a essi meda ma meda prus facilis, gei nc'arribbais a solus puru a ddu cumprendi, deu creu. Nosu, po su chi si pertocat, eus potziu fai su contu apitzus de unu portieri forti cumenti a Pisanu, e una copia de difensoris chi s'ant sèmpiri fatu dromiri sonnus selenus, cumenti si iat a podi narai a trassa de s'italianu etotu, e seu chistionendi de Denotti e Martini». 

Melis est arrannèsciu a agatai s'acapiu bonu puru cun is dirigentis, chi est una de cussas cosas de importu prus mannu chi tui ndi bolis pesai una stagioni toga. «A Deximu apu agatau, apustis de una bella pariga de annus chi megu a fai s'allenadori, un assotziu de oru, chi mi permiteis de manigiai custus fueddus e sèmpiri chi cumprendeis su chi megu a si narai; deu creu ca in sa zona de Casteddu, e megu a chistionai, duncas, puru de totus is biddas chi ddoi funt totu a giru a giru, funt cosas chi no si biint fatu fatu, custu est pagu ma seguru, e megu a chistionai de sa passioni chi nc'ant postu is dirigentis, de totu su trabballu e is sacrìficius chi ant fatu. Apu tentu s'ocasioni de curri impari, chi mi permiteis de imboddiai sa cosa diaici, manigendi custus fueddus, a un assotziu tropu togu; is dirigentis nd'ant pesau una famìllia, custu est su chi mi intendu de narai, a sa fini, mancai ancora deu no sciu chi apa a podi sighiri s'aventura impari a issus. No s'ant mai fatu mancai nudda, e chistionu de is dirigentis est craru, e si cumprendit, berus est? Est berus, is de sa Deximu s'agatànt in su campionau de sa Segunda Categoria, ma po cumenti s'ant sèmpiri tratau, e sa cosa ballit siat po mei ma siat po is giogadoris, est craru, parestus de essi in una scuadra de su campionau de sa Sèrie D; est a narai, duncas, ca candu arribastus a su campu po is allenamentus ddoi fiant sèmpiri dexi dirigentis chi s'agiudànt a cuncodrai totus is cosa, e totu custu deu ddu apu potziu bivi de su mesi de Idas, fintzas a arribbai a su mesi de Maju, po si fai a cumprendi totus is sacrìficius, chi, diaderus, ant fatu. Deu po immoi no potzu fai atru ca isperai de podi sighiri a curri cun s'assòtziu de sa Deximu 07, ma in su mundu de sa bòcia no si podit mai sciri cumenti andant custas cosas». 

E a sa fini, tocat a mei, ca seu su giornalista ca nd'at pesau cust'artìculu (e sa cosa mi parit bastanti crara), a si contai cumenti funt andadas is cosas, fadendi su contu ca funt passaus duus mesis de candu apu intèndiu a Albertinu Melis. E duncas, a narai sa beridadi, est stètiu issu etotu ca mi ddu at fatu sciri: e duncas, eia, is cosas tra Albertinu Melis e is dirigentis de sa Decimo 07 si funt sciusciadas, est a nai, eia, ca s'acapiu chi teniànt est stètiu sciusciau; ma in su mundu de sa bòcia, custas cosas sucedint fatu fatu meda, cumenti in sa vida, de su restu, e nc'est pagu de nc'aciungi: deu seu seguru (e unu pagheddeddu megu a brullai, ma nemmancu diaici tanti cumenti si iat a podi pentzai) ca is de sa Deximu 07 ant a agatai un antru allenadori, chi nd'at a pigai is crais de sa scuadra po sa stagioni chi at a benni (e duncas, po su campionau de sa Primu Categoria) mancai, in dì de oi, ancora no si scipiat su nomini (a su mancu, deu no ndi sciu nudda, e nd'apu pesau custu artìculu, apu acabbau de ddu pesai candu fiat su bintunu de su mesi de maju, ma podeis abarrai segurus ca sa nova chi pertocat s'allenadori nou de is deximesus at a bessiri a pillu allestru, sèmpiri chi no ndi siat giai bessida aforas in custas ùrtimas cidas), ca de su restu is allenadoris innoi in Italia (e sa cosa ballit puru po sa Sardìnnia, mi parit craru) no ammancant de seguru. E sa pròpriu cosa at a balli, seu seguru de custu puru, po Albertinu Melis, ca fadendi su contu de s'esperièntzia chi est fadendu, chi est ponendusì me is pabas (cumenti si iat a podi narai) no at a fadiai, a trigai prus de su tanti po agatai un'antru assòtziu chi ddi donit fidutzia. Ma de totu custu, mancai, nd'eus a chistionai me is artìculus chi ant a bessiri aforas me is cidas chi ant a arribbai, sèmpiri chi su Cielu at a bolli custu beni po mei e, immoi chi nci seu, auguru su pròpriu beni a bosatrus puru chi custus artìculus ddus ligeis.




Attività realizzata col contributo della Regione Sardegna. IMPRENTAS 2024-2025. LR 22/2018 art. 22