Is de sa Torres sighint a annadai in acua lègias; is scuadras de sa Segunda Categoria ant a depi giogai sa de tres giorronadas, cun una biga manna de partidas togas

In s'artìculu de custa cida andaus a castiai cumenti funt andendi is cosas a is tattaresus de sa Torres, ca in dì de oi s'agatant a annadai in acua lègias, fadendi su contu ca ant pèrdiu tres partidas, una avatu de s'atra, e s'agatant cun feti cincu puntixeddus in sa lista, po su chi pertocat su campionau de sa Sèrie C. Apustis, incumentzaus a castiai cumenti funt cuncodradas is cosas me is listas po su chi pertocat su mundu de sa Segunda Categoria puru, cun una storia toga meda, tra is atras, chi nd'arribbat de is de su Pula.


E duncas, a cantu parit, su mesi de ladàmini puru est sighendi a andai ainnantis, e custu bollit narai, puru, ca is campionaus de bòcia, po su chi pertocat is diletantis sardus (e is scuadras de is diletantis sardus, intzandus, e mi parit bastanti craru puru) funt andendi ainnantis diaici etotu: custu bollit narai ca, a su mancu po su chi mi pertocat, a su mancu po su chi ballit po mei, seu costumau, e giai de una pariga de annus (fadendi su contu ca scriu artìculus po is amigus de su Diàriu Sportivu de calincuna cosa cumenti a catodixi annus, chi no apu pèrdiu su contu, e megu a brullai, e si cumprendit), a fai su contu de su tempus chi passat (e mancu malli, m'acudu a ddu narai, ca su tempus sighit a curri, a passai po mei puru; ca su de benni a essi sèmpiri prus becius, de su restu, est una cosa chi no mi dispraxit po nudda, antzis; candu no imbecias, bolit narai ca nc'est stètiu calincunu dannu mannu, chi mi cumprendeis po su chi si bollu narai) castiendi a ita puntu (chi mi permiteis de manigiai custus fueddus, e chi cumprendeis su chi seu circhendi de si narai) funt arribbaus is campionaus. 

E diaici apa a fai po custa cida puru (e sèmpiri chi seis de acòrdiu cun mei, est craru), ca una de is primus cosas chi andaus a castiai, impari, ainnantis de incumentzai a atacai cun is legas chi si pertocant prus de acanta (e megu a chistionai, duncas, mescamente de is resultaus de is partidas), est a fai su contu de su tretu chi eus giai fatu, po custa stagioni puru, e de su tretu chi s'ammancat acora de fai, a su mancu, po circai de serrai custu duamilla e binticincu. 

E duncas, eia, seus giai giai po arribbai a sa metadi de su mesi de ladàmini puru (mancai a sa metadi de su mesi, a narai sa beridadi, nc'eus a arribbai feti sa cida chi at a benni, e sèmpiri chi su Cielu at a bolli custu beni po nosu), e si potzu incumentzai a narai, immoi chi nci seu (e si ndi depeis arregodai, peròu, e si ddu domandu po prexei, ca no sciu mai cali ant a essi is legas chi apa a pigai me is artìculus chi ndi pesu, chi scriu in sardu, ainnantis de mi ponni a trabballai), ca is de sa Sèrie C (is scuadras chi currint in su campionau de sa Sèrie C, po ddu narai mellus puru) funt arribbaus, in s'interis, a sa de otu giorronadas; est a narai ca in custu fini de cida (chi est arribendindi allestru meda, ca giai giai no mi parit berus ca nci seus giai torra...) ant a cabai in campu po sa de noi giorronadas; e duncas, eia, si iat a podi narai, puru, ca su campionau de sa Sèrie C est cussu chi est incumentzau po primu (a su mancu chi fadeus su contu de totus is campionaus chi si giogant in Sardìnnia, e megaus a chistionai, intzandus, mi parti bastanti craru, de is campionaus de s'Ecellenza, de sa Promotzioni, de sa Primu, de sa Segunda Categoria e de sa de Tres Categorias puru, mancai custa siat sa categoria prus pitichedda e duncas, po immoi, no arrannèsceus a dda sighiri cumenti si iat a minesci, e cumenti si iat a praxi a fai. Ma si sciit: is fortzas, is energias funt cussas chi funt, chi mi permiteis custu giogu de fueddus, e prus de custu tanti de trabballu, a su mancu in dì de oi, no arrannèsceus pròpriu a fai, a ndi pesai), est a narai chi est incumentzau su binticuatru de su mesi de agustu. 

E duncas, immoi chi nci seus, immoi chi apu pigau custa lega, podeus andai a castiai, impari, cumenti funt postas is cosas po s'ùnica scuadra sarda chi ddoi est, e seus chistionendi, duncas, de is de sa Torres, cun is tattaresus ca fintzas a immoi ant bintu feti una partida (in sa primu bessida, po essi prus pretzisus puru, contras a is de su Pontedera, cun su resultau de unu a zeru), nd'ant pèrdiu cincu e po duas bortas ant serrau sa isfida cun su resultau siddau in paridadi. 
E duncas, a fai is contus nci poneus pagu meda, is de sa Torres s'agatant, in dì de oi, cun calincuna cosa cumenti a cincu puntus in sa lista, impari a is de su Bra, e cun feti duas scuadras a is pabas, e seus chistionendi de is de su Perugia e de is de su Rimini. 
A narai sa beridadi, calincunu fiat pentzendi, e megu a chistionai de is tifosus, mescamente, ca fortzis iat a cumbenni a nci bogai s'allenadori chi ddoi est immoi, e chi est Andrea Pazienza, po circai de aderetzai is cosas, ca ddu scieis cumenti andant is fainas in su mundu de sa bòcia (e sa chistioni ballit siat po is professioneris e siat po is diletantis, mi parit bastanti craru): candu is cosas andant mabi, o no andant beni cumenti is dirigentis, mancai, si podiant abertai, intzandus su primu a pagai su contu (e ddu pagat po totus, mi parit craru puru) est sèmpiri s'allenadori. In s'ùrtima bessida, cussa chi s'est giogada domìnigu passau, is de sa Torres ant pèrdiu, torra, in domu (e duncas, eia, aranti de is pròprius tifosus) contras a is de sa Sambenedettese (e tocat a narai, puru, ca is de sa Sambenedettese s'agatant a su de cuatru postus in sa lista, e duncas, cumenti apu sèmpiri intèndiu narai in bidda mia, chi est Bidd'e Sorris, si iat a podi narai ca no funt pròpriu is ùrtimus arribbaus, chi mi sigheis po su chi seu circhendi de si narai), cun su resultau de duus a zeru, e custus funt is fueddus chi su diretori sportivu de s'assòtziu arrùbiu – brau, e megaus a chistionai de Colombinu, at intregau a is giornalistas apustis de sa partida: «S'allenadori de sa Torres, Andrea Pazienza, at a abarrai in sa panchina de sa scuadra; est craru, seus dispraxius, e meda puru, e si cumprendit, po cumenti funt andendi is cosas in custas ùrtimas giorronadas; sa scuadra no est gioghendi cumenti, invècias, isperastus a s'incumintzu de s'annu sportivu, e is resultaus chi ndi funt arribbendi funt peus, meda peus, de su chi si podestus abertai. S'allenadori, peròu, est ancora cunvintu ca sa scuadra siat forti, e est cunvintu, puru, ca su trabballu chi at fatu fintzas a oi at a portai is puntus chi isperaus, po su chi pertocat sa lista. Nosu, duncas, boleus crei ca, eia, sa scuadra potzat curri a forti in custu campionau de sa Sèrie C, e credeus, e isperaus, chi Andrea Pazienza potzat essi s'allenadori mellus po nosu. Credeus ca s'allenadori est fadendi totu su chi podit, a partiri de is allenamentus chi ndi pesat aintru de sa cida, ma sa cosa chi ammancat immoi funt is resultaus bonus. E chi nosu seus dispraxius, e si cumprendit, po cumenti funt andendi is cosas, podeus narai sa pròpriu cosa, ndi seu seguru, po su chi pertocat is tifosus cosa nosta. Pròpriu po custu depeus domandai scusa a totus is personas chi si sighint, chi s'ant sighiu fintzas a custu puntu de sa stagioni. Duncas, su dannu prus mannu est ca is puntus chi teneus in dì de oi, po su chi pertocat sa lista, benint a essi pagus meda, e gei si cumprendit. Sa scuadra est forti, ma fortzis is piciocus no ant ancora cumprèndiu cantu podint curri, cantu podint essi fortis: e custa cosa, deu creu, dda agatas feti trabballendi, e meda puru, aintru de sa cida, ma serbit puru a binci is partidas. Deu no pentzu ca nci siat su tanti po abarrai innoi a murrungiai po totus is giogadoris chi si funt ingotus e chi depint abarrai atesu de su campu; e no pentzu ca nci siat su tanti po abarrai innoi a murrungiai apitzus de is decisionis chi is arbitrus ant pigau e chi si nd'ant portau dannus mannus: is arbitrus puru funt ominis, a trassa de is giogadoris etotu, e duncas, eia, megu a narai ca, est craru, podint sbàlliai issus puru. S'unica arratzeta ca deu connosciu, po ndi bessiri aforas de su stampu innoi seus arrutus, ddi naru diaici, e po torrai a ndi strantaxai sa conca, est cussa de trabballai, a totu coddu, me is allenamentus chi s'allenadori ndi pesat aintru de sa cida. Immoi tocat a fai calincuna cosa in prus de su chi eus fatu fintzas a oi, poita, est craru e si cumprendit, custu bollit narai ca su chi eus fatu fintzas a immoi, e in sa truma mi nci sticu deu puru, no est bastanti. Est una cosa chi si increscit, chi si increscit a su coru: no pentzastus, custu est pagu ma seguru, de s'agatai diaici in basciu in sa lista, e cun pagu puntus, apustis de otu giorronadas, ma custa est sa situatzioni chi si seus bivendi. S'ùnica cosa chi mi potzu augurai est cussa de arrannèsci a torrai a partiri, prus a forti, est craru, de su chi seus stètius bonus a fai fintzas a immoi». 

E s'allenadori de sa Torres, Andrea Pazienza, no podit essi, custu est pagu ma seguru, prexau po cumenti ddi funt andendi is cosas. «Su resultau chi nd'eus bodditu custu domìnigu passau est lègiu meda, e immoi s'agataus in acua prus lègias puru, e megu a chistionai, est craru, po su chi pertocat sa lista. Ancora no arrannèsciu a cumprendi cumenti eus fatu a pigai su primu gol apustis de coranta segundus de giogu; e no si potzu cuai ca no mi seu mai agatau, de candu apu incumentzau sa carriera cosa mia cumenti a allenadori, a bivi una situatzioni diaici lègia. Peròu deu creu ca s'ùnica cosa chi podeus fai in dì de oi est cussa de torrai a partiri; depeus circai de strantaxai sa conca, e acoitu puru; po su chi pertocat is resultaus, si podit narai custu puru, seus arribbaus a tocai su fundu e immoi depeus circai de abarrai selenus, po su chi fait, e ddu sciu deu puru ca no est facili, e circai de limpiai sa conca de totus is pentzamentus lègius chi, est craru, ti nd'arribbant candu no arrannescis a ndi cassai is resultaus ca, invècias, iast a bolli. Depeus circai de si strantaxai, e custu ddu podeus fai chi abarraus cumpatus, chi curreus, totus impari, concas a sa pròpria destinatzioni, chi cumprendeis su chi si bollu narai. Po immoi sa cosa de importu prus manna est cussa de torrai a ndi cassai calincunu puntixeddu. Sa crupa de totus is partidas chi eus pèrdiu in custas ùrtimas cidas est feti sa nosta: seus fadendi sbàllius chi, mancai, podestus avitai de fai; e no pentzu ca is scuadras de is aversàrius siant diaici meda prus fortis de sa Torres; seus nosu ca no seus arrannèscendi a ndi pesai is cosas chi, invècias, seus bonus a fai. Po immoi, est craru, no podeus pentzai de torrai a partiri fadendi a biri a sa genti, a is tifosus cosa nosta, unu giogu bellu e togu meda; sa primu cosa est cussa de torrai a ndi cassai calincunu puntixeddu, po incumentzai, e apustis, mancai, nd'at a arribbai totu su restu puru. Candu si naru ca seu seguru de su fatu ca podeus torrai a curri, prus a forti puru de su chi eus fatu fintzas a immoi, de su chi seus stètius bonus a fai fintzas a immoi, est poita creu ca custa scuadra siat forti; chi is cosas no fessint diaici, ia apa a essi su primu a narai sa sociedadi ca su trabballu miu impari a is de sa Torres est bellu ca acabbau, e invècias deu creu ca nci siat ancora su tanti po si ndi torrai a strantaxai. Deu creu in custa scuadra, me is bideas de giogu chi tèngiu in conca e creu ca is piciocus cosa mia si ndi potzant pesai, e ndi potzant bessiri de custu dannu mannu innoi nci seus arrutus». 

E custu, duncas, po su chi pertocat sa Torres e su campionau de sa Sèrie C. 
Ma torraus a nosu. 
Po su chi pertocat su tempus chi passat, duncas, gei apu acutu a si ndi chistionai bastanti, mi parit de podi narai custu. 
De su tempus chi est fadendi, invècias, no apu acutu ancora a si narai nemmancu mesu fueddu: e duncas, eia, s'ùnica cosa chi si potzu narai, po acoitai, e po segai sa cosa allestru, est ca eia, est torrau su friscu, e no parit berus, chi pentzaus ca fintzas a una pariga de cidas fait, festus giai giai po s'allupai de sa basca, e invècias in dì de oi, in custa cida mescamente, is temperaduras ndi funt cabadas fintzas a arribbai a undixi gradus, mescamente a su mengianeddu chitzi, e no funt pagus de seguru. Antzis, parit de essi giai torraus a is mesis de s'ierru, ca parit ca po una brulla nd'eus sartau s'atonzu. Ma gei est berus ca s'at a tocai calincuna atra dì de bella basca, chi eus a tenni, sa passièntzia, po primu, de ddas abertai, e sa bona sorti, ca su tempus (cumenti a sa genti puru), in custus ùrtimus annu parit unu pagheddeddu machillotu, e no si cumprendit prus cumenti andant is cosas, chi cumprendeis su chi si bollu narai. 

Ma torraus a nosu, e duncas, apustis de s'essi chistionau de cumenti funt andendi is cosas in su campionau de sa Sèrie C, chi est su campionau de importu prus mannu tra totus is chi sigheus cun su Diàriu Sportivu, po su chi pertocat is tattaresus de sa Torres, deu creu ca sa cosa mellus chi si podit fai (sa cosa mellus chi m'est bènnia in conca, a su mancu) siat cussa de andai a castiai, impari (e sèmpiri chi seis de acòrdiu) cumenti funt postas is cosas po su chi pertocat su mundu de sa Segunda Categoria, e duncas, eia, mi parit bastanti craru, totus is otu listas, fadendi su contu ca su campionau est arribbau a sa de tres giorronadas (est a narai, mellus puru, ca sa de tres giorronada, po su chi pertocat sa Segunda Categoria, s'at a giogai custu fini de cida chi est arribbendindi) ma is ispantus no ammancant, ddu podeus narai giai, custu est pagu ma seguru. 

E duncas, eia, mi parit craru, andaus a biri cumenti funt cuncodradas is cosas po su chi pertocat sa Lista A, po incumentzai: e duncas, a su primu postu ddoi funt tres scuadras, chi, est facìli de cumprendi (e chi no ddu cumprendeis, nci seu deu a fai custu trabballu puru), ant bintu is primas duas partidas e duncas tenint ses puntus allogaus a su callenti in buciaca (cumenti si iat a podi narai, e cumenti si narat, de su restu, a trassa de s'italianu etotu): seus chistionendi, duncas, de is casteddaius de s'Himalaya, de is de La Salle e de is pirresus de sa Jupiter; a is pabas de custas tres scuadras, cun cuatru puntus in totu, ddoi funt is de s'Uragano de Pirri, sighius de mister Alberto Chessa, e is de s'Academia Sarrabese. E duncas, andaus a castiai ita totu s'abertat po su chi pertocat sa giorronada chi at a benni, a su mancu po sa cursa a su primu postu: is de s'Uragano, chi eus arremonau pròpriu immoi immoi si dda ant a depi biri, in domu cosa insoru etotu, contras a is de s'Himalaya, po una de is partidas de importu prus mannu de sa giorronada; is de s'Academia Sarrabese, invècias, ant a depi arriciri sa visita (cumenti si narat) de is de sa Castiadese, cun s'assòtziu biancu-birdi chi nd'arribbat a sa isfida cun tres puntus in buciaca, chi ndi funt arribbaus pròpriu custu domìnigu passau, gràtzias a sa bìncida chi is sarrabesus nd'ant cassau contras a is de su Sinnia, in domu cosa insoru; is de sa Jupiter, invècias, si dda ant a depi biri contras a is de sa Ferrini de Cuartu Sant'Aleni, chi no ant bintu nemmancu una partida e immoi nc'ant a provai torra in sa giorronada chi s'at a giogai custu fini de cida. 

Po su chi pertocat sa Lista B (e seus chistionendi, mi parit bastanti craru, sèmpiri de su campionau de sa Segunda Categoria) agataus feti una scuadra a su primu postu, cun ses puntus, e seus chistionendi de is de su Cortoghiana, ca fintzas a immoi nd'ant pesau cuatru gol e no nd'ant bodditu nemmancu unu: unu gol in sa partida, binta, contras a is meris de domu de su Sant'Anna Arresi, e tres gol in sa partida chi ant giogau in custu fini de cida passau, in domu cosa insoru, contras a is de su Teulada. Immoi is primus de sa Lista B si dda ant a depi biri contras a is de sa Gioventudi de Assemini, in domu allena; a su segundu postu de sa lista, invècias, nc'est una truma manna de scuadras, ca funt cincu: is de su Pula, is de su Bindua, is de sa Matzaccarese, is de su Villaperuccio e is de s'Asseminese. 
E pròpriu de is de su Pula nd'arribbat una de is storias prus togas, a su mancu po custa cida, e immoi andu a si dda intregai, sèmpiri chi seis de acòrdiu cun mei. E duncas, eia, no nc'eis a crei, ma in su Pula, in sa rosa de cust'annu, e si cumprendit, ddoi est unu piciocu chi si tzerriat Antoniu Murtas ( e chi domìnigu passau, in sa partida contras a is de su Bindua, est abarrau in campo po calincuna cosa cumenti a otantatres minudus, e no funt pagus, e immoi andaus a cumprendi mellus de ita seu chistionendusì) e chi est torrau a giogai apustis de un annu, fadendi su contu ca, de cussu chi seus bènius a sciri, de su chi s'ant contau, un annu fait iat tentu unu dannu mannu, est a narai, un incidenti (eia, a trassa de cumenti si narat in italianu etotu, diaici nd'aprofitaus puru po fai unu pagheddeddu de grammatica. Chi mabi no si fait, custu est pagu ma seguru) in s'interis chi fiat sètziu apitzus de unu motorinu, cumenti ddu tzerriaus, a trassa de s'italianu etotu. Nareus puru ca, sèmpiri po su chi s'ant contau, Antoniu Murtas est una de cussas personas chi funt bias po sa Gratzia chi nd'ant arriciu de su Cielu, est a narai, mellus puru, eia, ca funt bius po miràculu. E duncas, eia, sa primu cosa chi si potzu narai, apitzus de custu contixeddu, apitzus de custa storia, est ca in custu mundu ddoi funt una biga manna, unu muntoni de personas chi funt bias po sa Gràtzia chi nd'ant arriciu de su Cielu, e duncas, eia, po miraculu: ca sa vida est unu giogu istrambu meda, e nd'eus giai chistionau meda, ma meda bortas; pròpriu s'atra dì, chi pròpriu si ddu depu scoviai, m'est bèniu in conca ca, a sa fini, seus totus apicaus a unu filu, a unu filixeddu, po ddu narai mellus puru, e po du segai, po si scapiai de s'acapiu, a bortas bastat fintzas una mesu tontesa: bastat a ponni mabi unu pei, a ponni su pei innoi no depis, e nc'arruis mancai a terra, nci sbatis sa conca e adiosu; sa pròpriu cosa podit sucedi, duncas, po arremonai torra sa storia de Antoniu Murtas, candu ses sètziu apitzus de sa machina, o candu ses caminendi in sa bia, ca bastat pagu, pagu diaderus, po s'agatai cun is ossus totus sciasciaus. E duncas, torrendi a nosu, e torrendi a sa storia de Murtas, su piciocheddu, chi est nàsciu in su duamilla e otu (e duncas no tenit nemmancu dexiotu annus fatus, ca a fai is contus nci poneus pagu meda), at dèpiu fai un annu frimu, est a narai, chentza de podi giogai, chentza de ndi podi cabai in campu, in s'interis chi circàt de ndi sanai de totu is arroris chi ddis funt protzius apitzus apustis de essi tentu s'incidenti (chi mi permiteis de manigiai custus fueddus e, duncas, chi si cumprendit su chi si bollu narai). E Deus feti sciri (ma a narai sa beridadi, est una cosa chi podeus cumprendi nosu puru) sa passièntzia chi serbit, candu stais mabi, candu mancai ti intendis su corpus prenu de daboris, po ndi sanai: mesis e mesis de trumentus, e de tristuras, ca parint no depant passai mai. Ma is dannus a bortas si ndi andant (e mancu mali, mi megu a solu a solu) diaici cumenti nd'arribbant, e duncas, eia, su piciocheddu est torrau a ndi cabai in campu, e si podeis imaginai su prexu chi nd'at tentu (e su prexu chi nd'ant tentu is de sa famìllia cosa sua), po su de podi torrai a fai su chi ddi praxit de prus; ca po unu giogadori de bòcia, e si cumprendit beni, sa cosa mellus chi nci podit essi in custu mundu est cussa de si podi allenai impari a is cumpàngius, e apustis, su de podi giogai is partidas in su fini de cida. E sa istoria de Antoniu Murtas, chi s'apu contau immoi, fait beni a su coru cosa mia: in custu duamilla e binticincu, difatis, nci funt stètias diis fadiosas meda, ma s'ùnica cosa chi podis fai candu ti nd'arribbant is arroris, est cussa de tenni passièntzia, de no perdi sa fidùtzia ca is cosas s'ant a arrangiai, sèmpiri chi tenis sa passièntzia e sa fortza de sumportai, de assachitai, cumenti si iat a podi narai. Ca is giogadoris fortis, po arremonai unu dìciu chi seus costumaus a intendi fatu fatu, mescamente in italianu, si biint pròpriu candu is cosas si faint tostadas, is giogadoris si biint pròpriu candu nc'est de stringi is dentis, contras, mancai, a un aversàriu chi est meda, ma meda, ma meda prus forti de tui. E duncas, eia, sa storia de Murtas si prenit su coru de prexu e de afròddiu, e ballit po totus cussus giogadoris chi, mancai, depint abarrai frimus, po una bella pariga de mesis, poita si funt ingotus, o peus puru, poita si funt strupiaus; ma ballit, puru, po totus cussus (e no funt pagus de seguru) ca funt cumbatendi, in sa vida consa insoru, po si ndi scabulli de calincunu dannu, de calincunu arrori. Ca s'ùnica cosa chi podeus fai, in custa vida, est cussa de sighiri a andai ainnantis, e mancai is diis si parint iscuras e nieddas cumenti a sa pixi (cumenti apu sèmpiri intèndiu narai innoi in Bidd'e Sorris e, pruschetotu, da sa bon'anima de mamma mia), no depeus perdi sa ispera ca is cosas potzant andai mellus de cumenti, mancai, funt andendi. E ddu sciu deu puru chi no est una cosa facìli de fai, fadendi su contu ca deu seu su primu, seu su maistu (chi mi permiteis de giogai unu pagheddeddu cun is fueddus) po mi fai pigai de su disisperu e de sa tristura candu is cosas no mi andant cumenti invècias mi abertammu. E duncas, eia, sa istoria de Murtas si iat a podi donai unu pagheddeddu de prexu, de isperas bonas; e deu no potzu fai atru ca fai is augurius a Murtas: ca potzat essi una stagioni prena, fintzas a cucuru, de partidas, de prexu e de afròddiu. E duncas, sigheus a andai ainnantis e andaus a castiai, impari (e sèmpiri chi ndi teneis gana) cumenti funt cuncodradas is cosas po su chi pertocat sa Lista C de su campionau de sa Segunda Categoria (eia, chi no si ndi seis acataus, custa cida seu chistionendi de su campionau prus piticheddu chi sigheus, chistionu po mei e po is collegas cosa mia puru, cun su Diàriu Sportivu, fadendi su contu, mescamente, ca cust'annu no nd'emus ancora chistionau, a su mancu po su chi pertocat s'artìculu chi ndi bessit aforas po is novas de su Diàriu Sportivu, scritas in su sardu chi si chistionat innoi in su Campidanu de Mesu): e duncas, a su primu postu de sa lista agatsus is de su S. Lucia, chi pròpriu ariseu, chi fiat de mercuis, e fiat s'otu de su mesi de ladàmini, ant giogau sa partida, in domu cosa insoru, contras a is de su Perdasdefogu, cun is meris de domu chi ant bintu cun su resultau de unu a zeru; e duncas, is de su S. Lucia tenint in busciaca calincuna cosa cumenti a ses puntus, e si podit narai, puru, ca a fai is contus nci poneus pagu meda, ca funt s'ùnica scuadra a essi bintu totus is primus duas partidas chi si funt giogadas fintzas a immoi. A su segundu postu, cun cuatru puntus, agataus invècias cuatru scuadras, partendi de is de su Scalepranu, passendi po is de su Santu Basibi, fintzas a arribbai a is de s'Ussana e a is de su Monreale de Santu Engiu; e andaus a castiai, immoi chi nci seus, cumenti funt cuncodradas is cosas po sa giorronada chi at a benni, chi at a essi sa de tres: e duncas, is de s'Arixi S. Lucia si dda ant a depi biri contras a is meris de domu de su Senorbì, po una de is partidas de importu prus mannu; is de su Scalepranu, invècias, ant a depi giogai in domu de is de sa Virtus de Mara Arbarei, cun is meris de domu chi arribbant a sa isfida cun duus puntixeddus allogaus in buciaca. Is de su Santu Basibi, invècias, ant a depi arriciri sa visita de is de su S. Vitoria; partida aforas de domu po is de sa Monreale puru, chi ant a circai de ndi cassai is tres puntus in sa isfida contras a is de su Lunamatrona; at a essi una partida tostada meda, ndi seus segurus, po is de s'Ussana puru, chi si dda ant a depi biri contras a is de su Seulo. 

E andaus ainnantis in custu arrastu etotu, immoi chi nci seus (fadendi su contu, mescamente, ca tèngiu ancora unu pagheddeddu de tempus, e unu pagheddeddu de logu, po sighiri a scriri cust'artìculu), andendi a castiai cumenti funt postas, cumenti funt cuncodradas is cosas (po ddu narai mellus puru) po su chi pertocat sa Lista D: a su primu postu, in dì de oi, apustis de centu e otanta minudus de giogu, ddoi funt duas scuadras, e seus chistionendi de is de su Circulu Ricreativu de Arborea, e de is de sa Busachese (sa scuadra chi nd'ant pesau in Busache, si cumprendit, berus est?); a su segundu postu de sa lista, cun cuatru puntus, ddoi funt is de su Marrubiu e is de su Sini Masullas. E duncas, in sa giorronada chi at a benni (chi at a essi sa de tres, po sa lista de partidas de s'andada, mi parit bastanti craru, berus est?) is de sa CR Arborea (acoitaus de prus a ddus tzerriai diaici) ant a depi arriciri, in domu cosa insoru, sa visita de is de sa Folgore de Aristanis; is de sa Busachese puru ant a depi giogai in domu cosa insoru, contras a is de su Gesturi. Is de su Marrubiu, invècias, si dda ant a depi biri contras a is allenus de su Nurachi; partida in domu po is de su Sini puru, chi si dda ant a depi giogai contras a is de su Ruinas. 
E duncas, arribbaus chi seus a custu puntu de sa lega, podeus andai ainnantis e andai a castiai cumenti funt cuncodradas is cosas po su chi pertocat sa Lista E: tres scuadras a su primu postu de sa lista, apustis de is primus centu e otanta minudus de giogu, cun is de su Sedilo, is de su Minerva e is de su Bòrore chi tenint giai allogaus in buciaca ses puntus; a su segundu postu de sa lista ddoi funt atras tres scuadras, cun cuatru puntus: partendi de is de su Putumajore, passendi po is de su Bunnànnaru (cumenti si scriit in sardu, e mi parit craru puru) po serrai cun is de su Bortigali. E intzandus, in sa giorronada chi at a benni, is de su Sedilo ant a circai de ndi cassai atrus tres puntus, gioghendi, in domu cosa insoru, contras a is de su Turalva, chi po immoi no funt arrannèscius a ndi cassai nemmancu unu mesu puntixeddu (cumenti si iat a podi narai), ma nc'est de abarrai segurus chi ant a fai de totu po circai de frimai sa cursa de is biancus-grogus-arrùbius. Is de su Minerva si dda ant a depi biri, sèmpiri in domu cosa insoru, contras a is de su Urtei, is de su Borore, invècias, ant a depi giogai sa partida, aranti de is tifosus cosa insoru, contras a is de sa Bolotanese (sa scuadra chi nd'ant pesau in Golothene, cumenti si scriit in sardu, e mi parit craru puru). Is de su Putumajore puru ant a depi giogai in domu cosa insoru, po sa isfida contras a is de sa Narboliese (sa scuadra, gei si cumprendit, deu creu, chi nd'ant pesau in Narabuia); sigheus cun is de su Bunnànnaru, chi ant a depi andai a giocai in Bosa contras a is de sa Calmedia. Partida aforas de domu po is de su Bortigali puru, chi si dda ant a depi biri contras a is de su Burgos. 
Po su chi pertocat sa Lista F, invècias, a su primu postu, cun ses puntus allogaus in buciaca, agataus is de su Sporting Paduledda; a is pabas de is primus de sa classi (cumenti si iat a podi narai, e cumenti de su restu naraus in italianu puru) ddoi funt cincu scuadras: partendi de is de su Fiolinas, passendi po is de su Sporting de Sassari (ca pròpriu in s'ùrtima partida ant bintu contras a s'atra scuadra de Tattari etotu, e megaus a chistionai, est craru, de is de su Centru Storicu) e de is de su Tzaramonte, fintzas a serrai is contus cun is de su Laerru e cun is de su Monte Muros. E duncas, andaus a castiai, impari, e sèmpiri chi ndi teneis sa gana, cumenti funt cuncodradas is cosas po su chi pertocat sa giorronada chi s'at a giogai pròpriu in custu fini de cida: is de su Sporting Paduledda si dda ant a depi biri contras a is de su Turritana (chi arribbant a sa isfida cun zeru puntus allogaus in buciaca, unu gol fatu e seti gol, no funt pagus, e si cumprendit, po su chi pertocat is chi nd'ant ingotu); is de su Fiolinas, invècias, ant a depi arriciri sa visita de is de su Tzaramonte, po una de is partidas de importu prus mannu po su chi pertocat sa de tres giorronadas. Nd'at a bessiri aforas una partida toga meda, ndi seus segurus, tra is de su Lerru e is allenus de su Codaruina; is de su Monte Muros, invècias, ant a depi arriciri sa visita de is de su Sporting Sassari, po un'antra partida, po un'antra isfida de importu mannu. 
Po su chi pertocat sa Lista G, a su primu postu agataus feti una scuadra, cun ses puntus in buciaca, e seus chistionendi de is de s'Irgolese (sa scuadra chi nd'ant pesau in Irgoli, deu pentzu chi si cumprendat); a is pabas de is de s'Irgolese agataus una truma manna de scuadras, cincu, a fai beni is contus (e a fai beni is contus gei acoitaus, mi parit de podi narai diaici etotu), partendi de is de su Calagonone, passendi po is de s'Osini e is de s'Otzana; fintzas a arribbai a is de su Girasole e a is de su Lodine. E duncas, andaus a castiai, puru, immoi chi nci seus, cumenti funt cuncodradas is cosas po sa giorronada chi at a benni: is primus de sa lista de s'Irgolese si dda ant a depi biri contras a is de s'Osini; una partida de importu mannu, ndi seus giai segurus, at a essi cussa tra is de su Calagonone e is de su Lodine, ma nc'at a essi de sighiri, cun totu s'atentzioni chi si minescint is duas scuadras, sa partida tra is de s'Otzana e is ollastrinus de su Girasole. 
E seus arribbaus, e no mi parit nemmancu berus (e megu a brullai, peròu, e gei si cumprendit puru, berus est?), a s'ùrtima lista, sa Lista H, po su chi pertocat, sèmpiri, su mundu de sa Segunda Categoria: a su primu postu de sa lista, intzandus, agataus duas scuadras, e seus chistionendi de is de su Biasì e is de sa La Salette, una de is scuadras chi ddoi funt in Olbia – Terranoa (cumenti si iat a podi tzerriai puru, sa citadi, e cumenti seu fadendi deu puru, de su restu); a su segundu postu, invècias, ddoi funt tres scuadras, e seus chistionendi de is de su Porto San Paolo, is de s'Alà e is de su Tavolara. Is de su Biasì, immoi, si dda ant a depi biri, in domu cosa insoru etotu, contras a is de su Golfo Aranci, cun is allenus chi nd'ant cassau su primu puntixeddu in custu campionau pròpriu in sa bessida de sa cida passada, contras a is de su Tavolara, cun su resultau de duus a duus. Is de La Salette, invècias, ant a giogai, in domu cosa insoru, contras a is de s'Alà, chi domìnigu passau ant bintu sa primu partida de sa stagioni noba, gràtzias a su tres a unu scutu in faci a is de su Funtanaliras. Is de su Porto San Paolo si dda ant a depi biri contras a is de su Loiri; partida in domu, est a narai, aranti de is tifosus cosa insoru, po is de su Tavolara puru, chi ant a depi arriciri sa visita de is de su Porto Rotondo Academy. 

E cun custa nova, deu creu, apu acabbau su tempus e pruschetotu su logu chi tèngiu a dispositzioni po custa cida puru; cumenti eis a podi biri e cumprendi a solus, custa cida mi seu strollicau pagu e nudda (e mancu mali, e gràtzias a su Cielu, s'at a megai calincunu de bosatrus, berus est?), e apu chistionau giai feti de partidas, de resultaus e de listas; e custu bollit narai, duncas, ca in s'artìculu chi nd'at a bessiri aforas sa cida chi at a benni (e chi at a essi, 'tendei 'tendei, su sexi de su mesi de ladàmini) eis a podi agatai, mancai, calincunu contixeddu in prus, ma a sa fini, bai e circa cumenti m'at a pigai sa cosa, est a narai, duncas, bai e circa ita totu apa a tenni, badda badda in conca, ca no sciu mai cali legas e cali arrastus apa a sighiri, candu scriu is artìculus in sardu. E su spàssiu, mi parit de podi narai custu puru, est pròpriu su de no sciri de ita apa a chistionai: lassu fai sa parti prus manna de su giogu (chi mi permiteis de manigiai custus fueddus e chi mi permiteis de giogai a fai su poeta, po unu pagheddeddu feti, prus ca su giornalista sportivu) a is musas, ca funt cussas, duncas, chi, sighendi su chi narànt is antigus aregus, si donant s'ispiratzioni. 
E cun custu "mesu strollichimini", eia, si saludu po custa cida puru, si imprassu a forti e si auguru chi si ndi potzant arribbai, cumenti unu regalu, atru seti diis drucis cumenti a su tzucuru, chi no de prus puru. 
A si torrai a ligi, cumenti a sèmpiri, a giòbia chi at a benni, chi su Cielu at a bolli custu beni po me, e po bosatrus puru.




Attività realizzata col contributo della Regione Sardegna. IMPRENTAS 2024-2025. LR 22/2018 art. 22