"Isolamento fiduciario" po su mundu de is giogadoris diletantis de bòcia: su giogu ballit sa candeba?

Sa chistioni prus ispinosa, aici si parit a su mancu, tra totus is regulas cuncodradas de is de su Guvernu e de su CTS po firmai su spaniamentu de su virus in su mundu de sa bòcia,  est cussa acapiada a su chi tzerriant "isolamento fiduciario": est a nai ca, candu una persona si nd'acatat de tenni sa mobadia, depit abarrai serrada in domu, abetendi de sanai, e custu du sciestus giai; sa pròpriu cosa peròu ballit puru po totu sa genti chi at atobiau su mobadiu in s'interis.

Po is giogadoris diletantis is strobus chi nd'arribant no funt pagus, e podeus puru fait un esèmpiu po essi prus crarus: poneus chi, cumenti sucedit giai dònnia cida, su giobia duas scuadras decidint de ndi pesai una partida po s'allenamentu; agoa, si benit a sciri, mancai su sabudu, chi unu giogadori de una de is duas scuadras nd'at ingotu su mabi.

Su chi tzerriant "protocollo", est a nai totu sa lista de regulas chi depeus sighiri, narat chi totus is giogadoris chi ant giogau cussa partida, ma ballit puru po cussus chi funt abarraus setzius in panchina a castiai, depint abarrai in domu po catòdixi diis, abetendi de fai is esamis po podi cumprendi chi nci funt atrus apuntoraus in sa rosa.

Sa cosa de importu prus mannu est ca, chentza nemancu sciri chi sa mobadia nc'est diaderus o nou, unu no potzat bessiri mancu po andai a trabballai, e si cumprendit puru cumenti una persona, chenza trabballai, no potzat abarrai, pruschetotu chi depit donai a papai a mulleri e fillus.

Unu contu, difatis, est chi su "isolamento fiduciario" tocat a unu giogadori professionista, o a unu piciocu chi guadangiat su dinai cun su sport, mancai no siant millionis cumenti sucedit po is de Sèrie A e siant feti una pariga de eurus, cumenti sucedit in Sèrie D e in Eccellenza; ma is strobus legius nd'arribant candu sa chistioni pertocat is giogadoris de sa Secunda e de sa Primu Categoria, chi dhu faint feti po spassiu e, mancai, po curri avatu a sa bòcia ndi bogant su tempus a is fainas in familla e in su trabballu. Si cumprendit diaici poita nci funt giai una parig de scuadras, pentzaus a is de s'Allai, o de s'Ollasta, po nd'arremonai duas, chi funt bessendindi aforas de is campionaus: is arriscus funt tropus e cumenti si narat, su giogu no ballit sa candeba.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020