Is scuadras de sa Primu Categoria funt prontas po torrai in campu po su campionau

E duncas, atacu a scriri custas rigas candu seus lòmpius a su dexennoi de su mesi de Cabudanni, ma bosatrus eis a ligi s'artìculu chi ndi seu pesendi pròpriu immoi, feti su bintises de su mesi, sèmpiri, de Cabudanni, est craru. 

Est de una bella parighedda de cidas, a nai sa beridadi, ca sigu a andai ainnantis cun unu dìciu chi mi sonat (ddi naru diaici, isperendi ca si cumprendat su chi si bollu narai), e forti puru, in conca e chi fait, prus o mancu, diaici: "chini tenit su tempus po fai is cosas no iat a depi abertai a s'incras po ddas fai". 
E diaici seu fadendi, de su restu. 
E duncas, si potzu incumentzai a contai poita tèngiu custa barca de tempus (de tempus in prus, ia a podi narai, puru) scapia de su trabballu, e poita mi potzu permiti de incarrerai cun su trabballu po sa cida chi at a benni (e chi, tra is atras cosas, at a essi s'ùrtima de custu mesi, e no mi parit nemmancu berus, chi pròpriu si ddu depu narai, de cumenti si nci bobat su tempus a bortas, o diaici mi parit, a su mancu). 
E duncas, cust'annu (apu giai arremonau a sa cosa me is artìculus chi funt bessius me is cidas passadas) is campionaus funt torraus a partiri unu pagheddu prus chitzi de su chi festus costumaus a biri, e mescamente, e pruschetotu, sa chistioni ballit po su campionau de sa Promotzioni, chi me in custus ùrtimus dexi annus (cumenti a mìnimu) incumentzàt sèmpiri (chi no mi sbàlliu, e mi parit mi parit ca no mi seu sbàlliendi...megu a brullai, si cumprendit?) s'ùrtimu domìnigu de su mesi de Cabudanni (e mi ddu arragodu beni meda, fadendi su contu ca in s'ùrtimu fini de cida de su mesi de Cabudanni nc'est sa festa po Sant'Arega, in Deximumannu, chi est sa bidda chi abarrat giai a su costau de sa bidda innoi bivu, e seu chistionendi, duncas, de Bidd'e Sorris, chi est su logu innoi seu stètiu pàsciu e crèsciu po prus de corantannus). 

Ma po cust'annu is dotoris chi sighint is fainas de su mundu de sa bòcia de is diletantis sardus (e seu chistionendi, est craru, e si cumprendit beni, de is de sa Federatzioni Italiana de su Giogu de su Càlciu, e de is de sa Lega Natzionali de is Diletantis) ant decìdiu de fai partiri is giogus de su campionau de sa Promotzioni impari a cussus de su campionau de s'Ecellenza, chi, in totus custus ùrtimus annus, est berus custu puru, fiat su primu campionau chi torrat a partiri, a su mancu innoi in Sardìnnia, apustis de is vacantzas de s'istadi, cumenti ddas estus podi tzerriai, mancai siat berus, puru, ca is assòtzius de bòcia, e duncas totus is dirigentis chi ddoi trabballant, no serrant mai po ferias, cumenti si iat a podi narai, fadendi su contu ca est pròpriu in s'istadi ca cussus chi tzerriaus "diretoris sportivus" faint su tanti de trabballu prus mannu, est a nai, faint su trabballu de importu prus mannu, in sa fentana de su mercau; est a nai, mellus, duncas, ca is diretoris sportivus, pròpriu me is tres mesis de s'istadi, trabballant, dì e noti, po circai de cuncodrai is rosas de sa scuadra cosa insoru, o po ddu nai mellus puru, circant de mellorai sa rosa, circhendi de cunvinci totus is giogadoris prus fortis chi ddoi funt in s'isula, ma sa chistioni ballit puru po cussus chi nd'arribbant de foras, est craru, a andai a giogai po issus. 

E duncas, mi praxit a dda coxinai diaici (chi mi permiteis de manigiai custu fueddu, ca candu scriu is artìculus in sardu mi praxit, a su mancu po unu pagheddeddu, a giogai a fai su poeta, e isperu ca custa cosa no si dispraxiat meda), mi praxit a pentzai ca is de sa Lega Natzionale de is Diletantis, impari, pròpriu, est craru, a is de sa Federatzioni Italiana de su Giogu de su Càlciu, ant decìdiu de fai incumentzai su campionau de sa Promotzioni impari a cussa de s'Ecellenza po donai (mi benit de ddu narai diaici, isperu ca si cumprendat su chi seu circhendi de si narai) su pròpriu importu a is duus campionaus, chi funt, de su restu, is prus mannus chi si giogant innoi in s'isula (ma sa chistioni ballit, est craru, puru po totus is atras regionis in Italia). 

E de su restu, de custa nova si nd'apu giai (mesu) chistionau me is cidas passadas, is giogus po su chi pertocat su campionau de sa Primu Categoria ant a torrai a cumentzai, cumenti a sèmpiri, cumenti a dònnia annu, in s'ùrtimu fini de cida de su mesi de Cabudanni. E duncas, fiat ora (s'at a megai calincunu de bosatrus), ma nci seu arribbau, est pròpriu po custu motivu (po su fatu ca is campionaus no funt torraus a partiri totus impari, ma a pagu a pagu) ca po custa cida puru tèngiu unu pagheddeddu de tempus po incumentzai a incarrerai su trabballu po sa cida chi benit, e no mi parit mancu berus. E duncas diaici seu fadendi. 

Duncas, cumenti scieis giai, mi praxit, e meda puru, a mi stròllicai apitzus de su tempus chi fait e de su tempus chi passat, e sa primu cosa chi andu a castiai, candu incarreru a scriri po s'artìculu de su giòbia (cussu chi ndi pesu in sardu, duncas, e po essi prus pretzisus, ca unu giornalista depit essi pretzisu prus chi podit, chi bollit fai beni su trabballu cosa sua, gei si cumprendit), est su calendàriu. Ma po custa cida, andu a castiai su calendàriu po su chi pertocat sa lista de partidas de su campionau de sa Promotzioni po su campionau de su duamilla e binticuatru – duamilla e binticincu. 
Chi si depu contai sa beridadi, candu fiat bèssiu su calendàriu de is partidas de s'Ecellenza, mi femu acutu a narai ca su calendàriu de sa Promotzioni fiat potziu essi giai giai aguali, e invècias mi seu sbàlliau. E immoi andaus a circai de cumprendi, impari, sèmpiri chi ndi teneis gana, sèmpiri chi seis de acòrdiu cun mei (e megu a brullai, est craru, si cumprendit?), cumenti funt cuncodradas is cosas. E duncas, is giogus funt partius su cuindixi de su mesi de Cabudanni (cumenti apu acutu giai a s'arremonai) e ant a acabbai su bintiseti de su mesi de Abrili, est a nai, a fai is contus nci poneus pagu, sa cida apustis de sa PascaManna. Mi parit bastanti craru, duncas, ca chi is giogus torrant a partiri unu pagheddeddu prus chitzi de cumenti andànt is cosas me is annus passaus, ant a acabbai prus chitzi de cumenti festus costumaus (s'annu passau, po si fai un esèmpiu, immoi chi nci seu, is campionaus de sa Promotzioni po sa stagioni de su duamilla e bintitres – duamilla e binticuatru si fiant serraus feti a sa metadi de maju, e apustis ddoi fiant stètias is partidas finalis, cussas chi, a trassa de is ingresus, podeus tzerriai, cumenti seus costumaus a fai, de su restu, play-off), e si depu narai sa beridadi, est una cosa chi no mi dispraxit diaici meda, antzis. E duncas, deu po primu pentzamu ca su calendàriu de su campionau de sa Promotzioni fiat giai aguali aguali a cussu de s'Ecellenza, e invècias seu abarrau ispantau, deu po primu, de totus is novas chi nc'ant a essi cust'annu. E immoi chi nci seu, mi parit giustu puru, andu a si contai cali funt is cosas de importu prus mannu chi pertocant su campionau de sa Promotzioni. E duncas, po primu cosa si potzu narai ca is scuadras chi ant a curri in sa Promotzioni ant a cabai in campu po duas bortas aintru de sa cida; est a nai, po circai de ddu narai mellus, ca nc'ant'essi duas giorronadas chi s'ant a giogai de mèrcuis, e no de dominigu. E una de is duas giorrònadas s'est giogada su binticincu de su mesi de Cabudanni, est a nai ariseu (fadendi su contu ca custu artìculu at a bessiri su bintises, cumenti s'apu giai scoviau, tra is atras cosas), ma deu no potzu ancora sciri is resultaus de totus is partidas, fadendi su contu ca, cumenti s'apu giai nau a s'incumintzu de custu artìculu etotu, seu atachendi a ddu scriri, a ddu pesai in su mengianu (bellu e prenu de sobi, chi mi permiteis de nc'aciungi custa mesu tontesa puru...) de su dexennoi, e no sciu chi apa a arrannèsci a ddu acabbai oi, o chi nc'apa depi ponni torra is manus, mancai a s'incumintzu de sa cida chi at a benni. 

Sa segunda giorronada ca is de sa Promotzioni ant a depi giogai aintru de sa cida at a arribbai feti in su mesi de Gennàrgiu (in su mesi de Gennàrgiu, duncas, de su duamilla e binticincu, mi parit bastanti craru, ma no si podit mai essi bastanti segurus, candu si scriit un artìculu, chi sa genti chi ddu ligit ddu cumprendat beni, ca su riscu prus mannu est cussu de si perdi tra custus centu mila fueddus chi ndi bogu aforas dònnia cida), e at a balli po sa de tres giorronadas de sa lista de sa torrada (cumenti si narat e cumenti seus costumaus a dda tzerriai). 
Duncas, in mesu a is partidas chi ant a balli po sa segunda giorronada (sèmpiri po su chi pertocat sa lista de partidas de sa torrada, est craru) e po sa de cuatru giorronadas (chi s'at a giogai su bintises, sèmpiri de su mesi de Gennàrgiu, mi parit bastanti craru), su bintiduus de Gennàrgiu nc'at a essi spàssiu mannu po totus is tifosus e, pruschetotu, po totus is giogadoris puru (e sa cosa ballit, est craru, ddu cumprendeis a solus a solus, po cussus prus giòvuneddus de edadi, ma ballit, aguali, ndi seu prus ca seguru, po is prus matucheddus), chentza de si ndi scaresci de totus is allenadoris de is assòtzius. Sa cosa prus toga (a parri miu a su mancu, est craru), ma ballit puru po s'Ecellenza, est ca is giogus no s'ant a frimai nudda nudda nudda (est a nai chi no ant a sartai nemmancu unu domìnigu), e ant a andai ainnantis fintzas a s'ùrtimu domìnigu ainnantis de su Nadali. E a mei fait prexei meda custa cosa, mancai su trabballu miu unu pagheddeddu, ma unu pagheddeddu feti, mi fadiat. Ma de su restu, torru gràtzias dònnia, dònnia dì a su Cielu po sa possibbilidadi, sa fortuna chi tèngiu, cumenti si narat, de ndi podi pesai cussus cuatru arriabis chi mi serbint po bivi in custu mundu macu meda e totu ghetau apari, gràtzias a is cosas chi scriu. E mancu mali, mi megu a solu a solu, ca in custu mundu ddoi funt trabballus chi abarrant meda, ma meda, ma meda prus grais e fadiosus de su chi depu fai deu. E pentzu, mancai, a totus is ominis ca, in s'isula cosa nosta bella e stimada puru, ant dèpiu passai annus e annus, est a nai duncas mesis e mesis e mesis de sighiu, asuta de terra, in cussas chi tzerriaus minieras, po ndi bogai aforas su craboni e atrus mineralis de importu. Ma po chistionai de trabballus prus fadiosus de su miu, si potzu arremonai, puru, cussu de su paneteri, fadendi su contu ca deu bivu pròpriu a su costau de unu de is forrus de su pani chi ddoi funt in bidda, e duncas, dònnia dònnia noti, a faciora de is dexi e mesu, intendu su bixinu cosa mia, e duncas su paneteri, chi atacat cun su trabballu cosa sua, e sighit a andai ainnantis, gei si cumprendit, gei nci arribbais mancai a solus, po totu sa noti e fintzas a candu no obrexit. 

Ma torraus a nosu, duncas, e a su calendàriu de su campionau de sa Promotzioni.
E duncas is partidas de sa torrada ant a torrai a incumentzai su cincu de su mesi de Gennàrgiu (cumenti a cussas de s'Ecellenza), chi est, eia, sa dì ainnantis de sa Befana, e ant a sighiri a andai ainnantis, cumenti s'apu giai arremonau, fintzas a sa cida apustis de pasca. Eia, chentza de si frimai nemmancu po una cida, nemmancu po unu domìnigu. Custu po incumentzai, duncas. 

Ma sa nova de importu prus mannu, a mei parit, est cussa acapiada a is partidas chi s'ant a giogai su sabudu. A narai sa beridadi, is dotoris chi sighint is fainas de su mundu de is diletantis (siat cussus de sa FIGC e siat cussus de sa LND, duncas) nci iant giai provau a nci stichiri calincuna partida de sabudu, giai me is annus passaus (e mescamente s'annu passau etotu), e custu po regalai prus spassiu a sa genti (e si cumprendit, po chini sighit is partidas de bòcia de is diletanti at a essi unu spàssiu mannu su de podi fai su tifu po sa scuadra cosa sua puru su sabudu, e no feti su domìnigu, e megu a brullai, a su mancu unu pagheddeddu, si cumprendit?), ma mescamente, deu creu chi siat custu su motivu prus mannu, is de sa FIGC e is de sa LND ant pentzau de fai custa giogada poita, a su mancu po su chi sucediat me is atrus annus passaus, is arbitrus funt sèmpiri prus pagus, est a nai, duncas, po si cumprendi mellus, ca a bortas no nc'est su tanti de arbitrus bastanti po podi sighiri totus is partidas chi si giogant dònnia fini de cida in Sardìnnia, fadendi su contu, duncas, ca nci funt, est craru, is partidas de is campionaus de s'Ecellenza e de sa Promotzioni, e a custas tocat a nc'aciungi (nci depeus aciungi, chi si sonat mellus cumenti sonat) puru is partidas de sa Primu Categoria, cussas de sa Segunda (cun is giogus chi, si ddu incumintzu a arremonai, ma mancai, custu est pagu ma seguru, nd'eus a torrai a chistionai mellus in totus is cidas chi ant a benni, ant a torrai a partiri feti su primu fini de cida de su mesi de Ladàmini, e duncas de su ses, po essi prus pretzisus), po arribbai a cussus de sa de Tres Categorias, chi est sa prus pitichedda tra totus cussas chi s'agatant in su mundu de is diletantis. Ma no si ndi podeus scaresci, peròu, ca dònnia fini de cida, mescamente su mengianu de su domìnigu, in campu ndi cabant puru una truma manna, manna meda, si iat a podi narai, de piciocheddus piticheddus chi giogant me is campionaus de is Allievus, de is Giòvunissimus e de is Esordientis puru, chentza de si ndi scaresci de is piciocheddus unu pagheddeddu prus matucus, chi currint in su campionau de sa Juniores. 

E duncas, po totus custas partidas, mi parit craru puru, serbint arbitrus chi ddas sigant. E cun custa giogada (sa giogada de pretziri is partidas in duas listas, a su mancu po su chi pertocat sa Promotzioni), est craru, e ndi fai giogai una a su sabudu e una a su domìnigu, iat a depi benni a essi una cosa de agiudu. 
E duncas, nc'ant a essi doxi giorronadas a su sabudu, ses po su chi pertocat sa Lista A, e is atras ses po su chi pertocat sa Lista B. Si incumentzat, cun custa novidadi chi mi parrit toga meda, su ses de su mesi de Ladàmini, e si sighit su trexi puru (est a nai sa cida avatu, gei si cumprendit beni); duncas, a fai is contus nci poneus pagu meda, nc'ant a essi duas cidas a su mesi innoi nc'ant a essi totus is partidas de una de is duas listas de sa Promotzioni a su sabudu. Me is atras cidas, invècias, at a sucedi chi una pariga de scuadras ant a cabai in campu su sabudu, ma no totus. 

Sa nova, sa cosa de importu prus manna, mi parit, est pròpriu custa. Sa pròpriu cosa, sigu a andai ainnantis sighendi custu arrastu etotu (ca no sciu mai cali lega apa a pigai, cali arraxonamentu nd'apa a pesai, po su chi pertocat is artìculus in sardu, ainnantis de mi ponni a ddus pesai), at a sucediri in su mesi de Donniassantu puru, cun sa Lista A chi at a cabai in campu su duus e sa Lista B chi at a cabai in campu su sabudu apustis, est a nai su noi. Sa Lista A at a torrai a si pigai unu bellu tanti de spàssiu in s'ùrtimu sabudu de su mesi de Donniassantu (sa dì ainnantis, a fai is contus nci poneus pagu meda, de su primu domìnigu de su mesi de Idas, chi at a essi s'unu), e apustis at a tocai a sa Lista B (sèmpiri po su chi pertocat su mesi de Idas, chi est unu de is prus drucis e saborius chi ddoi funt aintru de s'annu, a su mancu po su chi mi pertocat, e custu poita in su mesi de Idas, cumenti scieis beni, e mellus de mei puru, deu creu, nci funt is duas festas de importu prus mannu, est a nai cussa de su Nadali, o Paschixedda, cumenti si narat puru, e cussa acapiada a su primu dì de s'annu nou e, duncas, a s'ùrtima noti de s'annu bèciu, cumenti si iat a podi narai, e cumenti si narat puru). 

In su mesi de Gennàrgiu, cumenti s'apu arremonau immubagora, is de sa Lista A ant a torrai a partiri po primus, giai de su cincu de su mesi de Gennàrgiu chi, tra is atras cosas, est sa dì innoi fatzu is annus, ma mi praxit custa cosa de mi dda trabballai, e de su restu no est sa primu borta chi mi capitat, antzis. E mi fait prexei a mi dda trabballai mescamente poita apu acabbau, e giai de una bella pariga de annus, de fai festa po sa dì innoi fatzu is annus. Ma custa est un'antra chistioni. Est a nai, chi nd'apu apena bogau aforas, fuiau aforas, chi si praxit de prus cumenti sonat, un antru de cussus stròllichiminis chi tèngiu, fatu fatu, badda badda in sa conchitedda maca chi tèngiu apicigada a su tzugu, e seu brullendi, ma miga diaici tanti!

Po su mesi de Gennàrgiu, invècias, torraus a nosu, is de sa Lista B ant a cabai in campu s'undixi. E arribbaus, duncas, a su mesi de Friàrgiu: nc'ant a essi partidas sa primu dì de su mesi (chi at a essi de sabudu) e sa cida avatu puru, est a nai s'otu. Po su mesi de martzu, invècias, e cun custu acabbaus, totus is scuadras de sa Lista A de sa Promotzioni (chi est cussa chi pertocat is assòtzius de bòcia chi abarrant in sa parti prus bàscia de s'isula, cussa chi podeus tzerriai sa parti meridionali de sa Sardìnnia) ant a cabai torra in campu de sabudu su otu, e is de sa Lista B ant a sighiri cust'arrastu torrendi in campu su cuindixi. E cun custu apu giai giai acabbau cun is novas acapiadas a su campionau de sa Promotzioni, e pruschetotu, a is novas acapiadas a su calendàriu. 

Fadendi su contu ca cust'artìculu (cumenti s'apu giai nau) at a bessiri a pilu feti su bintises, e fadendi su contu ca is campionaus de sa Primu Categoria ant a partiri su domìnigu avatu, est a nai su bintinoi, deu creu chi sa cosa mellus chi potzu fai immoi est cussa de andai a castiai, impari a bosatrus, mi parit craru, cali funt is scuadras, is assòtzius, chi ant a curri me is cuatru listas chi is de sa FIGC e is de sa LND nd'ant pesau po cust'annu puru. E mancai, me is diis chi ant a benni at a bessiri puru su calendàriu de partidas po su chi pertocat is de sa Primu Categoria (si tocat feti a abertai, custu est pagu ma seguru; e su de abertai, mi ddu arrapitu asolu asolu, ca mabi no mi fait de seguru, est unu de is esercìtzius prus bonus chi potzu fai. Ca su de tenni sa passièntzia, in unu mundu innoi sa genti currit a trassa de is macus, mi parit un abbilidadi de importu mannu, e chi si podit agiudai, mancai, a no ndi bessiri aforas de conca. Ca a bivi totu curri curri, nci sticu custu stròllichimini puru, immoi chi nci seu, s'arriscat, diaderus, ca su crobeddu si potzat scallai, a trassa de gellau lassau asuta de su sobi forti e callenti de s'istadi e, duncas, apa a arrannèsci a si donai totus is novas chi ancora ammancant. Eus a biri. 

Po immoi, duncas, potzu feti fai sa lista de totus is scuadras chi ant a curri in su campionau de sa Primu Categoria, partendi, duncas, de is de sa Lista A, innoi agataus is de sa Bariese (sa segunda scuadra chi ddoi est in Barì, gei si cumprendit e deu creu ca arrannèsceis a nc'arribbai a solus, fadendi su contu ca sa scuadra prus manna, chi est cussa de su Barisardo, currit in su campionau de s'Ecellenza, cun Di Carlo chi tenit is crais in manu de sa rosa), is de s'Asseminese, is de sa Baunese (chi ant giogau is primus partidas de s'annu in Copa Italia impari a totus is scuadras de sa Promotzioni), is casteddaius de su Vecchio Borgo de Sant'Elia, is de su Deximeputzu, is ollastrinus de s'Ulassa, is biancus-birdis de su Cannonau de Jerzu, is de su Cuartu 2000; is casteddaius de sa Next Gen Himalaya, is de La Palma de Monte Urpinu, is de su Santu Idu, is de su Sestu, is de su Sadali e is de su Setimu de Santu Pedru; is de su Tertenia e is de s'Azzurra de Pauli. 

Po su chi pertocat sa Lista B, invècias, e seus sèmpiri chistionendi de su campionau de sa Primu Categoria, est craru, agataus is de s'Arbus (chi ndi funt cabaus cust'annu apustis de una bella pariga de annus chi ant giogau in su campionau de sa Promotzioni); is de su Segariu, is mogoresus de sa Frecia Parte Montis, is gùspinesus de sa Don Bosco Fortitudo; is de su Gonnosfanadiga (chi fiant, issus puru, a su mancu fintzas a s'annu passau, in su campionau de sa Promotzioni, po annus e annus de sighiu), is de su Cortoghiana, is de sa Libertas de Barumini, is de su Ruinas, is de su Samugheo, is de s'Isili, is de su Santadi (chi nd'ant cassau s'artziada in su campionau de sa Primu Categoria apustis de essi bintu, seu seguru chi si ddu arregodais beni); is de su Perdaxius, is carlofortinus de sa Verde Isola, is serramannesus (funt bixius de domu, si iat a podi narai diaici) de sa Gialeto, is de sa Virtus de Mara Arbarei, e is de s'Antiochense (sa scuadra chi nd'ant pesau in Sant'Antiogu). 

Po su chi pertocat sa Lista C, invècias, ddoi funt is de sa Bittese (sa scuadra de Bitzi), is de sa Dorgalese, is de su Botidda, is de su Pasada (chi ndi funt cabaus in Primu apustis de essi acabbau su campionau de s'annu passau in Promotzioni me is ùrtimus postus de sa lista), is de sa Corrasi de Uliana, is de su Fonne, is de sa Fanum de Orosei, is de su Patada, is de s'Ozierese de Othieri, is de su Thiesi, is arrùbius-brau de su Pozzomaggiore, sa scuadra chi nd'ant pesau in Putumajore; is de sa Paulese, is de su Silanus, is de su Santa Giusta, is de su Siligo e is de sa Sanverese. E bai e circa, mi domandu a solu a solu, cali at a essi sa scuadra chi nd'at a cassai sa bìncida de su campionau. 

E immoi chi nci seus, andaus a castiai, puru, cumenti funt cuncodradas is cosas po su chi pertocat sa Lista D, innoi agataus is de su Badesi, is de su San Paolo Apostolo, is de su Campanedda, is de su Poltu San Paolu, is de su Laerru, is de sa FC Alghero, una de is duas-tres scuadra chi ddoi funt in dì de oi in s'Alighera; is de s'Ittiri Sprint, is de su Valledoria, sa scuadra de Codaruina; is de su Malaspina de Osilo (chi ndi funt artziaus in Primu Categoria pròpriu cust'annu); is de La Salette de Olbia – Terranoa (ca ant bintu, ballit po issus puru, su campionau de sa Segunda Categoria); is de su Monte Alma, is de su Santu Giòrgiu de Pèifugas; is de s'Ulumedu, is de su Ploaghe, is de s'Oschirese de Oschiri e is de su PortoTorres. 

E duncas, fadendi su contu ca seu sighendi a scriri custu artìculu candu seus arribbaus a su bintitres de su mesi de Cabudanni, podeus andai a castiai impari, sèmpiri chi ndi teneis gana, de cumenti funt cuncodradas is cosas po su chi pertocat is calendàrius, chi ndi funt bèssius a pilu pròpriu me in custas ùrtimas diis. E nareus, acoitu, ca is novas ca ddoi funt de si torrai a contai no funt medas, fadendi su contu ca is giogus de su campionau de sa Primu (de is cuatrus campionaus chi ballint po sa Primu Categoria, po ddu narai mellus puru) ant a andai ainnantis prus o mancu cumenti ant a fai is de sa Prmotzioni, cun s'ùnica diferentzia ca is scuadras de sa Primu Categoria ant a torrai a partiri cun is giogus duus domìnigus apustis de su chi ant fatu is assòtzius chi currint me is campionaus de s'Ecellenza e de sa Promotzioni; e duncas, chi est berus ca is scuadras de sa Promotzioni e de s'Ecellenza funt torradas in campu po is partidas de su campionau su cuindixi de custu mesi etotu (est a nai, duncas, de su mesi de Cabudanni), e invècias, cumenti s'apu giai arremonau po una bella pariga de bortas, a is scuadras de sa Primu Categoria at a tocai su bintinoi, est a nai, duncas, tra una pariga de diis feti (e fiat ora puru, s'ant a megai totus is tifosus de is scuadras chi currint me is campionaus de su duamilla e binticuatru – duamilla e binticincu). 

E duncas, is de sa Primu Categoria ant a giogai totus is partidas me is finis de cidas; est a nai, duncas, ca no nc'at a essi nemmancu una partida chi s'at a giogai aintru de sa cida (is de sa Promotzioni, invècias, ant a giogai po duas bortas de mercuis, e sa prima est stètia pròpriu ariseu, ca tenestus su binticincu). 

Is scuadras de sa Primu Categoria, fait a narai custu puru, e difatis si ddu contu acoiutu, ca mi parit una nova de importu (mescamente po mei ca trabballu cun custas cosas, e ca tèngiu is tialus de vacantzas, cumenti si iat a podi narai, acapiadas a sa stagioni de su càlciu de is diletantis sardus), no ant a cabai in campu po su fini de cida de Pasca Manna; est a nai, duncas, ca su sabudu ainnantis de sa Pasca Manna, intzandus, ant a cabai in campu feti is scuadras de sa Promotzioni, cumenti s'apu giai scòviau me is artìculus chi ndi funt bèssius aforas me is cidas passadas. Is giogus po su chi pertocat su campionau de sa Primu Categoria, duncas, apustis de totu su chi s'apu narau benit prus facili a fai is contus, ant a acabbai, s'ant a serrai (po ddu narai diaici puru) su cuatru de su mesi de maju, chi mi parit una data bona meda, fadendi su contu, prusapestus, ca s'annu passau nci funt stètias partidas fintzas a is ùrtimas diis de su mesi de Maju. E immoi chi nci seus, podeus andai a castiai, impari, cali ant a essi is partidas prus togas, cussas de importu prus mannu chi nc'ant a essi po sa primu giorronada de su campionau, cun is isfidas chi ant a partiri a is cuatru de su megama, a su mancu fintzas a candu no at a cambiai torra s'orariu, ma de custa cosa puru nd'eus a chistionai mellus in su benidori, candu at a essi su momentu, naraus tra unu mesi a partiri de oi, prus o mancu. 

E duncas, po su chi pertocat sa Lista A, is de sa Baunese ant a depi arriciri sa visita de is casteddaius de su Vecchio Borgo Sant'Elia, tra duas scuadras chi me is annus passaus ant fatu a biri sèmpiri cosas togas, partendi, pròpriu, de is meris de domu, ca s'annu passau (si ddu arragodais? Desinò nci pentzu deu cumenti a dònnia, dònnia borta) ant serrau sa stagioni, est a nai su campionau, a su segundu postu in sa lista. Ant a partiri cun una partida in domu cosa insoru puru is campidanesus de su Deximeputzu (ca funt bixinus cosa mia puru, fadendi su contu ca tra Bidd'e Sorris e Deximeputzu nc'ant a essi ses kilometrus tra una bidda e s'antra). Is biancus-asullus si dda ant a depi biri contras a is ollastrinus de s'Ulassa, ca me is ùrtimus annus funt arrannèscius a ndi bogai aforas cosas togas medas, cun unu giogu bonu e spassiosu chi at prenu su coru de is tifosus de prexu fintzas a cucuru. Nd'at a bessiri aforas una bella partida, ndi seus segurus, puru tra is de su Cannonau de Jerzu e is de su Sant'Aleni de Cuartu; totus abertant de cumprendi, invècias, cali ant a essi is bisus, e is obietivus, de una scuadra nova cumenti a sa Next Gen Himalaya; totus is ogus funt apitzus a is de su Sadali e a is de su Tertenia puru, cun is primus ca funt una de is scuadras prus togas chi ddoi funt in totu sa lista e is segundus chi funt prontus a si dda gherrai, custu est pagu ma seguru, apustis de nd'essi cabau s'artziada in su campionau de sa Primu Categoria apustis de essi bintu su campionau de sa Segunda. 
Po su chi pertocat sa Lista B, invècias, is de s'Arbus ant a torrai a partiri, concas a s'artziada torra in Promotzioni, e duncas, concas a sa bìncida finali de su campionau, cun sa partida chi ant a giogai in domu cosa insoru (est a nai, duncas, aranti de is pròprius tifosus) contras a is de su Segariu, e nc'est de crei, duncas, ca is meris de domu ant a fai de totu po ndi cassai is primus tres puntus de sa stagioni noba. De importu mannu at a essi puru sa isfida, sa partida tra is de sa Frecia Parte Montis e is de sa Don Bosco Fortitudo; totus is tifosus funt giai abertendi, de su restu, de cumprendi ita totu nd'ant a bogai aforas (mellus: ita totu ant a arrannèsci a ndi bogai aforas) is de su Gonnosfanadiga, chi po sa primu bessida ant a depi arriciri una scuadra forti cumenti cussa de su Cortoghiana, cun is duas scuadras ca fintzas a is annus passaus curriant in su campionau de sa Promotzioni e nc'est de crei, duncas, chi ant a essi tra is prus fortis in sa Lista B de sa Primu Categoria. Eus a biri, duncas, pròpriu cumenti si narat, ita totu nd'at a bessiri aforas. Primu partida in domu po is grogus-arrùbius de sa Libertas de Barumini, chi si dda ant a depi biri contras a is de su Ruinas, chi s'annu passau ant fatu una cursa de importu mannu meda. At a bessiri aforas una bella partida, invècias (nci scumiteus giai, e scumiteus, puru, ca is duas scuadras ant a fai unu muntoni mannu de gol), tra is de su Samugheo e cussus de s'Isili. Is de su Santadi si dda ant a depi biri contras a is de su Perdaxius; una de is partidas prus togas, peròu, at a essi cussa tra is carlofortinus de sa Verde Isola, contras a is campidanesus (torra, seus chistionendi de bixinus de domu) de sa Gialeto de Serramanna (un'antra bella biddixedda ca, diaici fadeus puru unu pagheddeddu de giografia, ca mabi no fait de seguru, e megu a brullai, si cumprendit?), cun is duas scuadras chi si connoscint beni meda, fadendi su contu ca s'annu passau curriant, ballit po totus e duas, in su campionau de sa Promotzioni. 

Po su chi pertocat sa Lista C, invècias, is partidas togas in sa primu giorronada no ammancant de seguru, partendi de cussa chi at a biri, is unus aranti de is atrus, is de sa Bittese contras a is fradibis de sa Dorgalese; at a essi bella meda, ndi seus segurus, puru sa partida chi ant a giogai is de sa Corrasi, chi si dda ant a depi biri contras a is de su Fonne. Is de sa Fanum de Orosei, invècias, ant a depi arriciri sa visita de su Patada; nd'at a bessiri una partida toga meda puru tra is de su Putomajore e is de sa Paulese; Silanus e Santa Giusta, invècias, funt tra is duas scuadras chi iant a podi sforrai su giogu prus spassiosu, ddi nau diaici isperendi ca si cumprendat su chi si bollu narai. Sa primu giorronada, po su chi pertocat sa Lista C, a su mancu, s'at a serrai cun sa partida tra is de su Siligo e is de sa Sanverese de Santeru. 

Po su chi pertocat sa Lista D, invècias, is partidas prus togas, cussas chi mi parint de importu prus mannu, e chistionu sèmpiri de sa primu giorronada de su campionau, funt cussas tra is de su Badesi e is de su San Paulu Apostolu; cussa tra is de su Laerru e is de s'FC Alghero (sa scuadra de s'Alighera, cumenti s'apu giai arremonau ainnantis), chentza de chistionai de sa partida tra is matrìculas, cumenti ddas tzerriaus, a trassa de s'italianu etotu (cun su fueddu matricula boleus chistionai de cussas scuadras chi nd'ant cassau s'artziada in su campionau de sa Primu Categoria feti cust'annu, apustis de nd'essi bintu su campionau de sa Segunda Categoria), Malaspina e La Salette de Olbia-Terranoa, cun is primus chi ant a tenni su vantàgiu, ddu tzerriu diaici, de podi giogai sa primu partida in domu cosa insoru, ca mabi no fait, e si sciit cantu funt dificilis is cosas po is scuadras chi giogant aforas de domu. Ant a essi partidas togas meda puru cussas tra Monte Alma e Santu Giorgiu de Peìfugas, cussa tra s'Ulumedu e is de su Ploaghe, chentza chistionai de sa isfida tra is meris de domu de s'Oschirese e is allenus de su Porto Torres, chi ndi funt cabaus, friscus friscus, in Primu Categoria apustis de essi saludau, cumenti si narat, su campionau de sa Promotzioni.




Attività realizzata col contributo della Regione Sardegna - IMPRENTAS 2023-2024. LR 22/2018, art. 22