In Sèrie D is de su Muristeni s'agatant a su segundu postu; tres scuadras a su primu postu in su campionau de s'Ecellenza

E duncas, a cantu parrit, nci seus po custa cida puru, e megu a brullai, e si cumprendit, ma nemmancu diaici tanti cumenti estis a podi pentzai: sa giorronada cosa mia, difatis, est incumentzada cun una nova unu pagheddeddu trista, ddi naru diaici, fadendi su contu ca seu bènniu a sciri ca pròpriu s'atra dì est morta una picioca de bidda mia etotu, e chi teniat corantacincu annus cumenti a mei etotu; dda biemu candu beniàt a fai is allenamentus in sa palestra chi nc'est pròpriu a su costau de domu e mi saludàt sèmpiri cun rispetu, chi est una de cussas cosas chi faint prexei, mancai su mundu, mancai sa genti fatu fatu si ndi scaresciat ca esistit su rispetu puru (chi mi permiteis de ndi pesai custu gioghiteddu cun is fueddus). 

E duncas, eia, po primu cosa iat a essi beni a si nd'arregodai, cumenti arrapitu fatu fatu, ca seus apicaus a unu filu, e po ddu segai abbastat pagu diaderus: e custu bollit narai, mescamente, ca oi nci ses, ses allirgu e ses totu pigau de is fainas cosa tua (chi cumprendeis su chi seu circhendi de si narai), e s'incras, mancai, ses crocau in unu letu in s'aposentu de unu uspidali, po no circai cosas peus puru. 
Sa vida de su restu est diaici, e a mei mi fait unu pagu de spantu a benni a sciri ca sa morti est incumintzendi a ndi pigai is personas chi tenint s'edadi cosa mia etotu, e chistionu de sa genti chi connòsciu innoi in Bidd'e Sorris, ma de su restu, su chi m'arrapitu dònnia, dònnia dì, est ca s'ùnica cosa segura chi nc'est in custa vida est sa morti; e ddu sciu beni deu puru chi parrit una brulla, torra, ma a sa fini est sa beridadi: una de is beridadis prus marigosas chi nci funt de nci cabai, de nci inguti, ddi naru diaici. 
E pròpriu po custu motivu, intzandus, chi apu atacau cun s'artìculu de custa cida cun cussa botada: "a cantu parrit nci seus ancora", chi est su modu chi tengu, chi scioberu, chi manigiu, po torrai gràtzias a su Cielu de essi ancora in peis, de essi ancora in custu mundu, de tenni sa gana bona, po oi puru, po mi ponni a trabballai, po mi ponni a scriri totus is artìculus chi mi spetant e chi ndi bessint aforas in su giàssu de is amigus de su Diàriu Sportivu. 
Ca estus a depi torrai gràtzias a su Cielu, po sa vida, po sa saludi, po totu su de bonu chi si nd'arribbat e chi arriceus; e invècias sucedit ca si nd'arregodaus de su Cielu (e de Deus, po chini nci creit, est craru) feti candu is cosas andant mabi, feti candu nd'arribbant is daboris. 

E duncas, eia, po su chi mi pertocat mi intendu basau de sa bona sorti (o de sa fortuna, chi si praxit mancai de prus scritu diaici) po oi puru: su trabballu de fai no m'amancat de seguru e po custu mengianu puru seu arrannèsciu a mi ndi scidai a s'ora chi mi tocat e chi mi spetat (tengu sa sveglia, cumenti dda tzerriaus furendindi su fueddu de s'italianu etotu, ca sonat a is cincu e binti, dònnia dì' de su lunis a su cenabara; e invècias su sabudu e su domìnigu mi ndi potzui scidai pagu pagu prus a tradu, est a narai a is ses mancu dexi, sèmpiri de su mengianu, est craru; ma custu feti candu no nci funt partidas de su campionau de sa Promotzioni a su sabudu a merì, poità desinò mi tocat, cumenti est sucèdiu custu domìnigu passau, de su restu, a mi ndi scidai a is cincu de su chitzi etotu, po mi ponni a scriri. E mancu malli ca tengu unu trabballu, mi benit de narai custu, poita desinò is cosas iant a essi peus meda de cumenti, invècias, mi funt andendi in dì de oi puru); e duncas nci iat a essi su tanti po ndi pesai, giai giai, una mesu festa (chi mi permiteis de sighiri a brullai unu pagheddeddu, e chi mi permiteis de giogai cun is fueddus, cumenti seu sighendi a fai, a trassa de poeta prus ca de giornalista sportivu), feti poita no tengu daboris, o arroris tropus mannus de mi ndi scabulli de pitzus. 

E duncas, eia, ainnantis de atacai cun is legas chi pertocant is campionaus sardus de is diletantis, e po serrai sa chistioni chi apu scerau po atacai cun s'artìculu chi teneis asuta de is ogus, intzandus mi iat a praxi a dedicai custas rigas (cumenti si iat a podi narai, a trassa de cumenti si narat in italianu etotu) a totus is personas chi in dì de oi no staint beni, e chistionu mescamente po su chi pertocat sa saludi; dedicu s'artìculu de oi, s'artìculu chi teneis asuta de is ogus, a totus is personas chi, mancai, depint abarrai crocadas in su letu poita no si intendint beni; dedicu custas rigas a totus is personas ca no funt annadendi in acuas bonas; isperendi ca po totus potzat torrai a nd'arribbai sa luxi, e sa saludi. 
E no mi parrit nemmancu berus, ma custa nova trista, chi s'apu arremonau ainanntis, nd'arribbat unu mesi apustis de sa morti de un antru piciocu sorresu (est a narai, de un antru piciocu chi biviàt in Bidd'e Sorris, chi est su logu innoi m'agatu, innoi seu stètiu nàsciu e pàsciu), chi est stètiu unu cumpàngiu cosa mia a is tempus de is scolas medias, e duncas, ddu podeis cumprendi a solus, tengu su coru prètziu a metadi: una perra intendit dabori e tristura, ma s'atra mi nd'arregodat chi seu ancora biu, e duncas, su chi potzu fai in dì de oi, est cussu de mi nci fuiai me is fainas chi mi pertocant, circhendi de ndi pesai una giorronada chi potzat essi bona, bona po diaderus, in dònnia cosa chi mi spetat de fai, partendi de is cosas prus piticheddeddas, e fintzas a arribbai a is fainas de importu prus mannu. 
Custa est sa manera chi apu agatau, a su mancu po oi, po torrai gràtzias a su Cielu po su de essi in bona saludi, po su de m'agatai ancora in bona saludi (chi fortzis sonat mellus puru), e cun sa gana bona chi m'at a serbiri po nc'arribbai, po oi puru, a s'ora innoi mi nd'apa a andai a mi crocai (chi cumprendeis su chi seu circhendi de si narai). 

E duncas, m'eis a iscusai chi si nd'apu furau su tempus chi mancai nemmancu teneis cun totus custus strollichiminis, ma ddu scieis cumenti andant is cosas, cumenti mi pigat candu mi pongiu a scriri s'artìculu in sardu: ainanntis de si nci fuiai, a fundu 'e susu, me is chistionis chi pertocant, e chi nd'arribbant de is campionaus de bòcia de is diletantis chi sigheus cun su giàssu de su Diàriu Sportivu, mi praxit a mi strollicai unu pagheddeddu cun bosatrus (e mancai cun bosatras puru), e mi praxit a nci stichiri, tra una nova e s'atra, totu su chi tengu badda badda in conca: e podeis abarrai segurus de su fatu ca cumenti nci funt sèmpiri novas chi pertocant is partidas chi si giogant su sabudu e su domìnigu, de si torrai a contai, intzandus no ant a mancai nemmancu is contus, is contixeddus e is strollichiminis chi tengu sèmpiri badda badda in sa conca mia. Isperendi ca potzant essi contus e contixeddus drucis e spassiosus, po su chi fait, mancai custa vida a bortas siat marigosa e tostada, e trista. 
E su de nci stichiri una farrancada de contus e de contixeddus, tra is novas chi pertocant su mundu de su càlciu de is diletantis sardus, mi serbit puru e mescamente po circai de ndi cassai s'atentzioni, puru, de totus cussas personas chi mancai no funt acapiadas a istrintu cun is legas chi pertocant is assòtzius de bòcia de is diletantis chi s'agatant innoi in Sardìnnia; poita, mancai, nci iant a podi essi personas (chi est cussu chi isperu, est bastanti craru) chi iant a podi tenni agradessu de fai unu pagheddeddu de esercìtziu ligendi custas rigas, ligendi un artìculu pesau (e duncas scritu) in su sardu chi si fueddat innoi in su Campidanu de mesu. 

E duncas, eia, torraus a nosu e provaus a sighiri a andai ainnantis, currendi in s'arrastu chi connosceis beni, a su mancu chi eis lìgiu unu de is artìculus chi ndi bogu aforas dònnia dònnia giòbia de su mesi, dònnia giòbia de s'annu, chentza de ndi sartai nemmancu unu, po su chi pertocat is Novas de su Diàriu Sportivu: e duncas, megamu a si contai, ca ainanntis de atacai cun is contus chi pertocant is partidas chi si funt giogadas in custu ùrtimu fini de cida, intzandus mi tocat a fai su contu de su tempus chi est fadendi, e de su tempus chi si seus lassaus a is pabas; eia, pigu custa cosa cumenti chi fessit giai giai a trassa de unu ritu, una de cussas cosas chi fadeus, chi ndi pesaus fatu fatu, e chi torrant sèmpiri agualis, e chi serbint, tra is atras cosas, po si portai unu pagheddeddu de fortuna, de bona sorti, chi est una cosa chi no fait dannu, custu est pagu ma seguru. 

E duncas, eia, incumentzaus de su tempus chi est fadendi: no est stètiu unu fini de cida lègiu, ma nc'est de narai, puru, ca est torrada s'acua e duncas, eia, custu bollit narai ca at protziu; no meda, ma nemmancu diaici pagu; nareus ca fadendi su contu ca seus in sa primu parti de s'atonzu (sa parti prus druci e prus bonitedda de s'atonzu, si iat a podi tzerriai diaici), cust'acua chi at fatu at donau una bella afriscorada a su logu, fadendi su contu, mescamente, ca is temperaduras minimas ndi funt cabadas fintzas a nc'arribbai a trexi-catodixi gradus; e po su chi pertocat is temperaduras massimas, invècias, no nci spundint prus de bintitres – binticuatru gradus. E duncas, a su mancu po su chi mi pertocat, a su mancu a parri miu, custu perìodu sighit a essi unu de cussus chi mi praxint de prus aintru de s'annnu: est a narai ca no est fadendi tropu basca, ma nemmancu tropu frius, e custa benit a essi sa cosa mellus candu depis trabballai; e immoi tocat a biri fintzas a candu ant a durai is cosas, fintzas a candu ant a andai ainnantis diaici. De su chi ndi podeus cumprendi castiendi is previsionis de su tempus, nci iant a depi essi diis bellas a su mancu fintzas a su domìnigu (e custu andat beni meda po is giogadoris chi ndi depint cabai in campu siat po is allenamentus e mescamente po giogai is partidas), cun is temperaduras massimas chi iant a depi abarrai, badda badda, tra is bintises e is bintiseti gradus, e is minimas chi no si iant a depi abasciai prus de catodixi-trexi gradus, e fadendi su contu ca seus arribbaus a sa metadi de su mesi, nc'est su tanti po podi narai ca su tempus est fadendu a bonu. 
Ca de su restu, seus bivendi in unu mundu macu meda: eis biu totus is dannus chi su tempus malu at fatu in continenti, e mescamente in Sicilia? 
Funt cosas chi, feti a ddas a biri, mi lassant a buca oberta, e chentza de fueddus: machinas amuntonadas, is unas apitzus de is atras, cumenti chi fessint gioghiteddus, ddi naru diaici, a trassa de cussus chi donaus a is pipius po ddus fai spreviai; e in prus, at fatu bentu forti (po cussas ca, a trassa de cumenti naraus in italianu etotu, tzerriaus "tromba d'aria", e chi furriau in sardu, sighendi su consillu de fueddariu, iat a depi bessiri cumenti a trumba marina, o trumba de aria) e fintzas is domus chentza de crabeturas (est a narai, po si cumprendi mellus, ca su bentu forti nc'at fatu bobai is craberturas, chi mi cumprendeis po su chi seu circhendi de si narai, de is domus e fintzas de is iscolas); e dònnia borta chi mi capitat de biri is dannus e is arroris chi nd'arribbant de su tempus malu, mi benit de pentzai a cantu poit essi maba sa natura candu si inchietat; e po oi potzu feti pregai su Cielu ca su tempus no fetzat dannus tropus mannus, e potzu feti pregai su Cielu ca is personas ca s'agatant in mesu in mesu a su disisperu, apustis chi mancai nc'ant pèrdiu giai totu (a partiri de sa domu innoi bivint, e fintzas a arribbai a totus is cosas chi teniant, mancai, aintru de domu etotu), si ndi potzant torrai a strantaxai acoitu. 

E duncas, eia, custu po su chi pertocat su tempus chi est fadendi: e po su chi mi pertocat, chi pròpriu si ddu depu scoviai, est incumintzendi a mi speddiai a abarrai a pigai su sobi, mescamente a su megama e a su mericeddu, e mancu mali ca su sobi bellu no ammancat, e duncas, eia, no biu s'ora chi nd'arribbit su fini de cida po mi pigai unu pagheddeddu de pàsiu, cumenti si spetat. 
E duncas po oi no m'abarrat atru de fai ca fai su contu de su tempus chi est passendi, e duncas, de totus is diis e is cidas ca, po cust'annu puru, seus giai arrannèscius a si lassai a is pabas. 
E nemmancu a ddu fai aposta s'artìculu de custa cida ndi bessit pròpriu su cuindixi de su mesi de ladàmini: e custu bollit narai ca sa primu perra de su de dexi mesis de s'annu (manigiu su fueddu "perra", ca apu sèmpiri intèndiu po chistionai de sa petza, e mescamente: una perra de proceddu, una perra de angioni) si dda seus giai papada (chi mi permiteis de manigiai custus fueddus e chi mi permiteis de sighiri a ndi pesai custa metafora), e est giai giai bella ca scarèscia. 

E duncas, no podeus fai atru (e chistionu po mei, po primu) ca circai de si gosai is diis bellas chi s'abertant, a su mancu fintzas a lunis chi at a benni, candu iat a podi torrai a proi, e no podeus fai atru ca sighiri a curri concas a su mesi de donniasantu, e duncas, eia, a is festas po totus is santus (chi nd'arruit, cumenti eis a sciri beni, sa primu dì de su mesi de donniasantu) e po totus is mortus (chi nd'arruit, invècias, su duus de su mesi de donniasantu), e chi funt is ùrtimas duas festas chi teneus de fai, ainnantis chi nd'arribbit su mesi de idas, chi invècias, at a essi prenu fintzas a cucuru de diis drucis, a incumentzai de s'otu, chi at a essi dì de festa. 
Ma de sa cosa, mi parrit bastanti craru, eus a tenni modu, e maneras, po ndi chistionai beni in su benidori. 

Ma torraus a nosu: is domus e is negòtzius, a su mancu innoi in Bidd'e Sorris, funt giai totus cuncodraus po sa festa de Halloween (diaici seus costumaus a dda tzerriai, a trassa de cumenti faint is americanus etotu, ca funt cussus ca, de su restu, custa festa dda ant inventada; mancai peròu innoi in Sardìnnia puru nci siat su costumu de fai sa festa ainanntis de sa dì de is mortus, e mescamente in calincuna biddixedda pitica, cumenti iat a podi essi, po nd'arremonai una, Seui); e ddu scieis beni, de su restu, cumenti andant is cosas (ddu eis a sciri mellus de mei puru): apustis chi si lassaus a is pabas sa festa de Halloween (chi a mei sighit a no mi cunvinci, est a narai ca no tengu totu s'afròddiu chi, mancai, tenint atras personas, a su mancu de su chi ndi potzu cumprendi), apustis chi ndi scuncodraus totus is apicajonis chi pertocant is mascheras chi faint a timi, apustis chi ndi bogaus is crocorigas (su fueddariu ddas tzerriat crocorigas spagnolas, e custa cosa no dda sciia mancu deu; e sa cosa prus toga chi nci podit essi, est cussa de imparai calincuna cosa de nou, mancai unu fueddu nou, dònnia dì, po su chi fait) e apustis chi ndi bogaus is arrataspignatas (is tintzimurredus, cumenti si iant a podi tzerriai, puru, e cumenti ddus apu sèmpiri intèndiu tzerriai innoi in bidda, a su mancu), intzandus nd'arribbat, acoitu meda, su tempus po ndi pesai e po cuncodrai is matas po su Nadali, chi mi cumprendeis po su chi seu circhendi de si narai. 
Ma de custa cosa puru eus a tenni s'ocasioni de ndi chistionai mellus me is cidas chi ant a benni, e sèmpiri chi su Cielu at a bolli custu beni po mei e po bosatrus e bosatras puru. 

Su chi si potzu narai, in dì de oi, po serrai sa lega apitzus de su tempus chi passat, est ca custu fini de cida chi est arribendindi at a essi s'ùrtimu cun s'ora legali, poita de su domìnigu chi nd'at a arrui su binticincu (e chi at a essi s'ùrtimu po su chi pertocat su mesi de làdamini, fadendi su contu ca su mesi de donniasantu s'at a oberri, est a narai ca at a incumentzai pròpriu cun unu domìnigu) nc'at a essi torra s'ora solari (cumenti seus costumaus a dda tzerriai, e cumenti ddi naraus in italianu etotu); e po su chi pertocat, po is chistionis chi si pertocant prus de acanta, si potzu giai narai ca custu fini de cida at a essi s'ùrtimu, a su mancu po custu duamilla e bintises, innoi is partidas ant a incumentzai a is cuatru, poita de su binticincu, 'tendei 'tendei, is partidas ant a incumentzai a is tres; e custu bollit narai, tra is atras cosas, ca candu acabbant, est a narai a is cincu (apustis de cussa ora e mesu de giogu, cun is cuindixi minudus de pàsiu chi nci nci funt tra su primus tempus e su segundu tempus) de su merì, est giai giai scurigau; e custa iat a podi essi una cosa chi si donat unu pagheddeddu de tristura, chi arrannèsceis a mi sighiri po su chi seu circhendi de si narai: su de biri sa noti chi incumentzat a is cincu e mesu no est una cosa allirga, ddi naru diaici, ma a sa fini, totu dipendit de su modu, de sa manera chi sceraus po si bivi is diis: po si fai a cumprendi mellus de ita seu chistionendi, si potzu narai ca fadendi su contu ca a mei praxit meda, ma meda a ligi, e mescamente a ligi is lìbbrus chi pertocant sa circa chi seu fadendi giai de una pariga de annus, e intzandus custus mesis innoi ddoi at a essi s'ora solari benint a essi su perìodu mellus chi nc'est po studiai, siat po su tempus chi fait (de seguru no at a fai corantacincu gradus dònnia dònnia dì, cumenti at fatu giai giai po totu s'istadi; e si cumprendit, candu fait diaici basca benit a mabi a si nd'abarrai sètzius in domu cun su lìbbru in manus, mescamente chi seis de cussus, cumenti a mei etotu, de su restu, ca no tenint de cussas machineddas po infriscai s'aria me is aposentus de domu) e siat poita cumenti nd'arribbat su frius speddiat a si nd'abarrai aranti de su fogu, e duncas, eia, aranti de sa forreda: e sa arratzeta prus toga, a su mancu po su chi mi pertocat, po nci passai is mesis frius de sa segunda parti de s'atonzu, e po su chi pertocat is tres mesis de s'ierru, est cussa de ligi, po oras e oras de sighiu, mancai cun sa cumpàngia de unu callelleddu (po chini tenit custa fortuna) o de unu pisiteddu (ballit aguali). 

E duncas, eia, giai giai no biu s'ora chi nd'arribbit su binticincu de custu mesi, e megu a brullai, ma nemmancu diaici meda. E duncas, po oi puru apu serrau is chistionis acapiadas a su tempus chi est fadendi e a su tempus chi est passendi; e mancu mali chi su tempus est sighendi a curri po mei puru, po mi torrai a apicai a sa chistioni, de importu mannu, chi apu pigau a s'incumintzu de custu artìculu etotu. 

E duncas, diaici cumenti est passendi su tempus (est a narai, eia, is diis, is cidas e is mesis puru) diaici funt sighendi a andai ainnantis is campionaus de bòcia, chi s'ant a fai cumpangìa, ddi naru diaici, a su mancu fintzas a su binti de su mesi de idas, chi at a essi (cumenti s'apu arremonau candu ndi funt bèsssius aforas is calendàrius de is giogus, is calendàrius de is campionaus pesaus de is de sa Federatzioni Italiana de su Giogu de su Càlciu) s'ùrtimu domìnigu de giogus ainanntis de su Nadali; e duncas, eia, fadendi su contu de is giorronadas chi passant po su chi pertocat is campionaus podeus fai puru, su contu de su tempus chi passat po su chi pertocat sa vida cosa nosta; e si cumprendit: fadendi su contu ca is diletantis ndi cabant in campu no feti su domìnigu, ma puru me is diis de festa, intzandus podeus narai ca fadendi su contu de is giorronadas chi si seus giai lassadas a is pabas fadeus su contu de su puntu de s'annu, ddi naru diaici, innoi seus arribbaus, chi arrannèsceis a mi cumprendi po cussu chi seu circhendi de si contai. 

E duncas, eia, po su chi pertocat is scuadras sardas chi currint in su campionau de sa Sèrie D, seus arribbaus a sa de seti giorronadas, e custu bollit narai ca in custu fini de cida chi est arribendindi, nc'ant a essi e s'ant a giogai is partidas chi ant a balli po sa de otu giorronadas de sa lista de s'andada, est craru; e fadendi su contu ca ddoi funt dexesseti partidas de giogai po sa lista de s'andada (e sa pròpriu cosa, mi parrit bastanti crara, at a balli po sa lista de is partidas de sa torrada), podeus narai ca po su chi pertocat su campionau de sa Sèrie D seus arribbaus a sa primu metadi de partidas (e sèmpiri po su chi pertocat sa lista de s'andada, si ddu torru a narai diaici seus segurus de si cumprendi a pari); e duncas, sa nova prus manna chi si potzu donai in dì de oi est ca, 'tendei 'tendei (cumenti si megàt sèmpiri sa bon'anima de mamma mia), a su segundu postu de sa lista, agataus is de su Muristeni, cun calincuna cosa cumenti a sexi puntus in buciaca, chi ndi funt arribbaus gràtzias a cincu partidas bintas e a una partida chi is piciocus sighius de Marcellu Angheleddu ant serrau cun su resultau siddau in paridadi (e seus chistionendi, po essi prus pretzisus, po essi pretzisus cumenti iat a depi essi unu giornalista chi bollit fai beni su trabballu cosa sua, de sa partida chi is campidanesus ant giogau in domu cosa insoru etotu, su bintiseti de su mesi de cabudanni, contras a is de s'Albalonga, e chi s'est serrada cun su resultau de duus a duus); e duncas, a fai is contus nci poneus pagu meda, fait a narai puru ca is de su Muristeni fintzas a immoi ant pèrdiu feti una partida, cussa chi ant giogau in domu de is de s'Anzio Calciu 1924, candu fiat su sexi de su mesi de cabudanni etotu, cun su resultau de tres a unu; e duncas, a contus fatus, si iat a podi narai ca is cosas po is de su Muristeni funt andendi beni meda: in dì de oi, apustis de sa de seti giorronadas, is piciocus sighius de Angheleddu tenint tres puntus in prus de is chi tenint is de sa Paganese e is de sa Vigor Campagnano Gialloblù, chi s'agatant, mi parrit bastanti craru, a su de tres postus in sa lista (fadendi su contu, in prus, ca is de su Muristeni s'agatant a su segundu postu in sa lista a solus, est a narai chentza de sa cumpangìa de atras scuadras) e immoi tenint feti unu puntixeddu in mancu de cussus chi tenint is de sa Sarnese, chi funt is primus de sa lista cun dexesseti puntus giai allogaus a su callenti, e chi nd'ant cassau gràtzias a cincu partidas bintas e a duas partidas chi is primus de sa classi (ddus tzerriaus diaici, e isperu ca nesciunu de bosatrus tengiat calincuna cosa de murrungiai) ant serrau cun su resultau siddau in paridadi; e duncas, eia, nc'arribbais a solus puru, fait a narai ca is de sa Sarnese funt is ùnicus, in sa Lista G de su campionau de sa Sèrie D, chi no ant pèrdiu ancora nemmancu una partida. 
E immoi is de su Monastir ant a depi abertai s'otu de su mesi de donniasantu, candu ant a arraciri sa visita, pròpriu, de is primus de sa lista, ma a cussa partida ammancant ancora calincuna cosa cumenti a cuatru cidas (est a narai: tres partidas ancora de giogai, ponendinci in su contu puru sa partida chi s'at a giogai custu domìnigu chi est arribendindi), e duncas is cosas iant a podi mudai, fadendi su contu ca is de su Muristeni, in s'interis, ndi iant a podi cassai puru su primu postu, ma eus a biri ita totu at a sucedi. 
Po immoi si potzu narai ca is piciocus sighius de Angheleddu custu fini de cida si dda ant a depi biri in domu de is de sa Vigor Campagnano Gialloblù, chi de su restu eus arremonau immoi etotu, poita s'agatant a su de tres postus in sa lista, a is pabas de sa scuadra sarda, duncas, e cun feti tres puntus in mancu. Is de su Muristeni nd'arribbant cun s'afròddiu a is isteddas (cumenti si iat a podi narai), apustis chi nd'ant cassau sa bìncida, de importu mannu meda, e si cumprendit, in domu cosa insoru e contas a is tattaresus de su Latte Dolce, cun su resultau, togu meda, de duus a unu. E si iat a podi narai, puru, immoi chi nci seus, ca is de su Muristeni benint a essi, a su mancu in dì de oi, a su mancu po cust'annu, sa scuadra prus forti e prus toga tra totus cussas chi s'agatant in sa zona de Casteddu etotu, e innoi in su Campidanu de mesu, e no podeus ca essi prexaus po issus, cumenti iant a depi andai is cosas candu unu sardu chistionat de una scuadra sarda chi giogat me in su campionau de sa Sèrie D e, duncas, contras a is scuadras de is atras regionis; e su de podi giogai in su Muristeni e, duncas, in su campionau de sa Sèrie D, benit a essi unu bisu mannu, ndi seu seguru de su chi seu narendusì, po una biga manna de giogadoris chi, mancai, in dì de oi currint in calincuna scuadra tra totus cussas chi nci funt in sa zona de Casteddu e in sa zona de su Sulcis puru. 
Is de s'Ossese puru funt andendi bastanti beni, mancai tengiant feti tres partidas bintas, e tocat a s'acudi a narai ca ant serrau in paridadi calincuna cosa cumenti a tres partidas, po doxi puntus in totu, ca funt cuatru in mancu, a fai is contus acoitaus, e meda puru, de is chi tenint is de su Muristeni; ma is de s'Ossese tenint apicigadas a is pabas duas scuadras: is de s'Anzio Calcio, chi apu arremonau pròpriu immubagora, e is de su Trastevere Calcio; impari a is de s'Ossese ddoi funt is de s'Unipomezia; e fait a narai puru ca is cosas no funt andendi diaici mabi po is biancus-nieddus, fadendi su contu ca po is de s'Ossese custa est sa primu stagioni chi giogant in su campionau de sa Sèrie D, cun totu su chi custu cumportat, e si podit narai ca su campionau de sa Sèrie D no benit a essi una passillada, custu est pagu ma seguru, e duncas is tifosus de is de s'Ossese podint castiai a su benidori, est a narai, a is partidas chi ammancant po serrai sa stagioni, cun su coru prenu de afròddiu. 

E duncas, torrendi a is de su Muristeni, in s'ùrtima bessida funt arrannèscius a ndi cassai is tres puntus in sa partida chi ant giogau, in domu cosa insoru, contras a is de su Latte Dolce, ca s'agatant cun feti una scuadra a is pabas, e seus chistionendi de is de s'Atletico Lodigiani, chi ant acutu, a su mancu po immoi, a su mancu fintzas a oi, a ndi cassai feti unu puntixeddu; is de su Latte Dolce, invècias, ant bintu feti una partida e nd'ant serrau duas cun su resultau in paridadi, e duncas tenint feti cincu puntus in buciaca, cun cuatru partidas pèrdias; e s'ùrtima partida chi is tattaresus ant pèrdiu est stètia pròpriu cussa de domìnigu passau, chi ant giogau, cumenti s'apu arremonau pròpriu immubagora, contras a is de su Muristeni. 
E cumenti fia narendusì, su bisu de una surra manna de piciocheddus, mescamente candu incumentzant a giogai a bòcia, est su de ndi podi arribbai a giogai cun is scuadras prus fortis chi currint me is campionaus prus mannus: e seus chistionendi, mi parrit bastanti craru, de sa Sèrie A (biau duncas chini nci lompit a giogai in su campionau de importu prus mannu tra totus cussus chi ndi pesat sa Federatzioni Italiana de su Giogu de su Càlciu, feti puru po sa barca de dinai ca is giogadoris incasciant po ndi cabai in campu, e sa pròpriu cosa si iat a podi narai, est craru, po is allenadoris de is assòtzius), de sa Sèrie B e de sa Sèrie C puru; e duncas, po arribbai mancai a curri e a giogai in su campionau de sa Sèrie B e de sa Sèrie C, ndi depis pesai una stagioni de importu mannu, mancai cun una biga manna de gol, cun calincuna scuadra chi currit, mancai, in su campionau de sa Sèrie D e chi abarrat, mancai, acanta de sa zona innoi bivis; e si cumprendi poita chistionaus de bisus, candu andaus a chistionai de is piciocheddus chi, mancai, a sexi-dexesseti annus s'agatant a giogai in unu campionau inter-regionali, est a narai, in unu campionau innoi nci funt scuadras aversàrias chi no nd'arribbant feti de sa Sardìnnia (cumenti sucedit, po nd'arremonai unu, in su campionau de s'Ecellenza), ma de is atras regionis de s'Italia puru. 
E duncas, unu de cussus giogadoris chi funt fadendi a biri is cosas prus togas, po su chi pertocat sèmpiri is de su Muristeni, est de seguru Mahmoud Ech Cheick, unu piciocu chi giogat in atacu e chi est nàsciu in su duamilla e otu (in dì de oi tenit feti dexiotu annus): duncas si iat a podi narai ca a Muristeni at agatau sa scuadra mellus, su logu mellus innoi podit sighiri a cresci (candu tenis feti dexiotu annus a is pabas, intzandus podis mellorai meda in su benidori, sèmpiri chi is cosas ti andant beni): Marcellu Angheleddu, mancai siat un allenadori tra is prus giòvuneddus tra totus cussus chi nci funt in Sardìnnia in dì de oi, sciit su fatu cosa sua; is dirigentis de su Muristeni (a partiri,a  incumentzai de Marcu Carboni, ca fintzas a s'annu passau fiat su presidenti de s'assòtziu ma che de cust'annu, est a narai apustis chi at agatau s'acòrdiu cun Romi Fuke, benit a essi su vice-presidenti) sciint beni ita funt fadendi, e si podit narai ca ndi funt pesendi unu trabballu togu meda e de importu mannu, chi fadeus su contu, po incumentzai, ca in su duamilla e undixi (pròpriu s'annu innoi deu apu incumentzau a scriri po is amigus de su Diàriu Sportivu) s'agatànt a curri in su campionau de sa Segunda Categoria (chi est unu de is prus piticheddus tra totus cussus pesaus de sa Federatzioni Italiana de su Giogu de su Càlciu); e duncas, eia, in cuindixi annus funt arribbaus a essi una de is scuadras de importu prus mannu tra totus cussas chi nci funt in Sardìnnia, a is pabas, in dì de oi a su mancu, feti de is de su Casteddu (chi currint in su campionau de sa Sèrie A, cumenti eis a sciri beni) e a is pabas de is de sa Torres de Tattari (chi currint, invècias, in su campionau de sa Sèrie C). 

E duncas, torrendu a nosu, si podit narai ca Ech Cheick fait parti de una truma de giogadoris toga meda, e sa cosa de importu prus mannu est ca est giai arrannèscendi a fai biri a totus cantu est forti, e nosu ddi auguraus, est craru, ca potzat sighiri in cust'arrastu etotu. Ech Cheick, cumenti si fia narendu, at fatu duus gol in sa partida contras a is de su Latte Dolce (ca currint in su campionau de sa Sèrie D de una bella pariga de annus de sighiu, po si fai a cumprendi ca no funt de segurus is ùrtimus arribbaus, cumenti si iat a podi narai), e chistionaus duncas de duus gol de importu, fadendi su contu ca funt bàllius po is tres puntus; e tocat a narai, puru, ca Ech Cheik fiat giai giai po ndi cassai su de tres gol puru in sa pròpriu partida: is primus duus gol ddus at pesaus cun duus tirus cun su pei deretu, invècias in sa de tres ocasionis chi at tentu est arrannèsciu a donai una bella carvada de pei a sa bòcia in cussa chi, in italianu, seus costumaus a tzerriai "semi-rovesciata"; e duncas, Ech Cheick est a sa primu aventura cun una scuadra sarda (ddi naraus diaici, isperendi ca nesciunu tengiat calincuna cosa de murrungiai po is fueddus chi apu scerau de manigiai), fadendi su contu ca me is annus passaus at giogau me is scuadras piticas (est a narai, me is scuadras po is piciocheddus chi no tenint prus de dexesseti annus e de dexiotu annus; e megu a chistionai de cussas scuadras chi in ingresu tzerriant Under 17 e Under 19, ma nosu puru seus costumaus a ddas tzerriai diaici, a trassa de is ingresus, mancai seus sardus) de is de su FC Sudtirol, chi in dì de oi s'agatant a curri in su campionau de sa Sèrie B, e custu de sa stagioni de su duamilla e bintiduus – duamilla e bintitres. 

Ma seus segurus ca in dì de oi nci funt una biga manna de piciocus chi bisant de lompi a giogai impari a is de su Muristeni, e nosu no podeus fai atru ca fai su tifu po s'assòtziu campidanesu, cumenti estus a depi fai, de su restu, cun totus is scuadras chi currint in su campionau de sa Sèrie D, po no chistionai de su campionau de sa Sèrie C innoi sighint a curri is de sa Torres. 

E immoi chi nci seus, po su chi apa acudi a fai, fadendi su contu de su logu chi m'abarrat e pruschetotu de su tempus chi tengu ancora de spendi, ddi naru diaici, ainnantis de acabai s'artìculu de custa cida, andaus a biri cumenti funt postas is cosas po su chi pertocat su campionau de s'Ecellenza, ca mi parrit mi parrit ca de candu funt incumentzaus is giogus, me is Novas de su Diàriu Sportivu no si nd'apu ancora chistionau. 

Po primu cosa, duncas, si potzu narai ca po su chi pertocat su campionau de s'Ecellenza, seus arribbaus a su de cincu giorronadas, sèmpiri po su chi pertocat sa lista de partidas de s'andada, e castiendi sa lista, agataus tres scuadras a su primu postu, cun calincuna cosa cumenti a undixi puntus; e duncas, eia, sa primu cosa chi mi benit de si narai est ca, est craru, no nc'est nesciuna scuadra chi apat bintu (chi siat arrannèscia a binci, chi si praxit de prus mancai diaici po cumenti sonat) totus is partidas chi si funt giogadas fintzas a immoi, e duncas, no nc'est nesciuna scuadra chi siat arrannèscia a ndi cassai totus is puntus chi nci fiant in su pratu (e duncas, seus chistionendi de calincuna cosa cumenti a cuindixi puntus in totu). 
E duncas is scuadras chi po immoi funt currendi prus a forti funt is de su Santa Teresa, is de su Lanusè e is de s'Ilva de sa Maddalena: custus ùrtimus, a narai sa beridadi, funt sighendi in su pròpriu arrastu de s'annu passau, candu fiant arribbaus a is pabas de is de s'Ossese (chi s'apu giai arremonau in custu artìculu etotu de su restu); is de s'Ilva in sa stagioni passada iant tentu s'ocasioni de giogai puru is partidas finalis, po circai de ndi cassai s'artziada in su campionau de sa Sèrie D, ma no fiant arrannèscius a sartai s'ùrtimu steculu (cumenti mi consillat de narai su fueddàriu), est a narai s'ùrtimu impedimentu, e duncas no si ndi fiat fatu prus nudda; is de su Lanusè e is de su Santa Teresa puru nd'arribbant de una stagioni bona meda (e megaus a chistionai de sa stagioni de su duamilla e binticincu – duamilla e bintises, ma deu creu ca siat bastanti craru) e immoi, de su chi ndi podeus cumprendi, parrit ca tengiant totus is cartas bonas po ndi cassai is primus postus de sa lista e po curri, fintzas a s'ùrtimu segundu de giogu, po ndi cassai s'artziada de sa categoria; totus custas tres scuadras, duncas, ant bintu tres partidas e nd'ant serrau duas cun su resultau in paridadi; fait e tocat a narai, puru, ca is primus tres scuadras de sa lista no ant ancora pèrdiu nemmancu una partida, po su prexu chi ndi podint tenni is tifosus cosa insoru; is de su Santa Teresa funt arrannèscius a ndi pesai, funt stètius bonus a ndi pesai calincuna cosa cumenti a doxi gol e nd'ant bodditu feti duus; is de su Lanusè e is de s'Ilva, invècias, nd'ant pesau sa metadi de is gol chi nd'ant pesau is de su Santa Teresa, e duncas ses in totu, ma is de su Lanusè po immoi nd'ant bodditu feti unu gol, e invècias is de s'Ilva duus (cumenti is de su Santa Teresa etotu). 
A su segundu postu de sa lista, invècias, agataus is de su Bonorva, cun calincuna cosa cumenti a dexi puntus in buciaca, cun tres partidas bintas, una partida innoi nd'ant cassau feti unu puntixeddu, e una partida pèrdia: e po essi una de is scuadras chi ndi funt artziadas cust'annu e chi nd'arribbant, duncas, de su campionau de sa Promotzioni, intzandus si podit narai ca puru in domu de is biancus-arrùbius si funt spassiendi, e meda puru. E immoi eus a biri, intzandus, cumenti ant a sighiri a andai is cosas, e sèmpiri chi su Cielu bollit custu beni po mei e po bosatrus e bosatras puru. In s'interis, si imprassu a forti. E si torraus a lìgi tra seti diis.



Attività realizzata col contributo della Regione Sardegna. IMPRENTAS 2025-2026. LR 22/2018 art. 22