In su mundu de sa Segunda Categoria nci funt giai tres scuadras chi ant serrau is giogus: apustis de is de su Bunnànnaru arribbat s'ora de sa festa po is de su Cabuderra e de su Santu Basibi puru

E duncas, de su chi mi parrit de cumprendi, de su chi mi parrit de si podi contai, nci seus (e nci seu, partendi de mei) po custa cida puru, e gràtzias a su Cielu, m'acudu a si narai, e drabessi puru: cumenti fatzu giai giai in dònnia artìculu, difatis, e chistionu mescamente de is artìculus chi ndi pesu in su sardu chi si fueddat innoi in su Campidanu de mesu e chi bessint aforas po is Novas de su Diàriu Sportivu, estus a depi fai su contu ca is dannus si podint arribbai (arribbai in pitzus, si cumprendit beni, berus est?), si podint ferri de unu segundu a s'atru, e duncas, eia, una cida (un'antra cida, po ddu narai mellus puru) chentza de arroris, e chentza de daboris, mescamente, est unu motivu bonu, giai giai, po fai festa. Ca a bortas po sciusciai totu su bonu (e chistionu, mescamente, de su bonu chi pertocat su cropus, chi arrannèsceis a mi sighiri in cust'arrastu chi apu pigau po incumentzai cun s'artìculu de oi, cun s'artìculu de custa cida) intzandus bastat a ponni mabi unu pei, cumenti si contu fatu fatu, e chentza giai giai de ti nd'acatai, t'agatas totu sciasciau in terra. E de su restu est su chi est sucèdiu a un amigu stimmau cosa mia, una pariga de diis fait, chi fiat fadendi unu trabballeddu (unu trabballeddu de nudda, si iat a podi narai diaici puru) in domu cosa sua, in corratzu, po essi prus pretzisus puru (cumenti unu giornalista iat a depi essi, e sèmpiri chi bollit fai beni, in gràtzias de Deus, su trabballu cosa sua), e po crupa de is botineddus chi portàt a is peis, est lisciau (lisciau in terra, si cumprendit) e at pistau beni beni sa schina, e de su chi ddi ant narau a che su dotori, s'est fintzas arrogau (o segau, chi si praxit de prus) duus ossus de is costas, e gràtzias a su Cielu (e megu a chistionai po issu) chi no at intendiu daboris fortis, antzis, giai giai, chi fessit stètiu po issu, no si ndi fiat acatàu de nudda. 
Sa cosa chi abarrat, intzandus, est su dannu chi nd'at tentu, e si estus a depi arregodai, mancai, ca sa domu cosa nosta, sa domu innoi biveus, est unu de is logus innoi ti capitat de prus de ti strupiai, e duncas, eia, estus a depi aturai atentus a dònnia mòvida chi fadeus, a dònnia passu, giai giai. E torrendi a m'acapiai a su chi s'apu scritu pròpriu immoi, eia, fortzis po dònnia dì chi si passaus chentza de daboris (chentza de daboris tropu lègius, po ddu narai mellus puru) intzandus estus a depi torrai gràtzias a su Cielu; e invècias, cumenti apu lìgiu in unu libbru, su Cielu ddu circaus feti candu stadeus mabi, candu teneus is daboris, e is dannus e is arroris cosius apitzus (po coxinai sa chistioni a trassa de poeta, prus ca de giornalista sportivu). 

E duncas, eia, megamu a si narai, megamu a si contai, ca deu seu pighendi su costumu (si iat a podi narai, intzandus, ca seu costumau) de torrai gràtzias a su Cielu po dònnia dì chi arrannèsciu a mi bivi, e a mi lassai a is pabas chentza tropus trumentus. E duncas, eia, est po custu motivu chi apu atacau cun s'artìculu, scriendusì ca po custa cida puru, nci seus, est a narai ca seus sanus e in bona saludi, e cun gana bella e bona po fai totu su chi nc'est de fai, e megu a chistionai, po incumentzai, de su trabballu chi mi tocat, chi mi spetat a ndi pesai. 

E duncas, po sighiri cumenti a dònnia cida cun is fainas chi pertocant cust'artìculu (e duncas, eia, si ddu torru a narai, po sighiri cun is fainas chi pertocant s'artìculu chi ndi pesu in sardu), podeus e depeus fai su contu de su tempus chi, e mancu mali, sighit a curri, sighit a passai po mei, e po bosatrus puru chi custus artìculus, a sa fini, a s'acabbada, ddus ligeis: e duncas, eia, no mi parrit nemmancu berus, ma seus arribbaus, est craru, a sa metadi giusta-giusta po su chi pertocat su de cuatru mesis de s'annu, fadendi su contu ca custu giòbia nd'arruit, eia, nemmancu a ddu fai aposta, cumenti si iat a podi narai, su sexi de su mesi. E duncas, a fai is contus acoitaus meda (est a narai, chi si praxit mancai mellus diaici: a fai is contus nci poneus pagu meda) nc'ant a essi feti atrus duus giòbias de si scroxai (ddi naru diaici, isperendi ca nesciunu de bosatrus, e de bosatras, tengat cosa de narai, de murrungiai, po su fueddu chi apu scerau de manigiai, po su fueddu chi mi nd'est bèssiu aforas, po ddu narai mancai diaici puru): e seu chistionendi de su giobia chi nd'at a arrui su bintitres, e apustis, de s'ùrtimu giòbia po su chi pertocat su mesi de abrili, chi nd'at a arrui su trinta de custu mesi etotu. E custu bollit narai, intzandus, ca sa primu dì de su mesi de maju (e chi at a essi festa, tra is atras cosas) nd'at a arrui de cenabara; e abellu abellu (mancai a mei su tempus mi parrit ca est bobendusì, po cust'annu puru, cumenti chi fessit un arrondibi chi bobat me in su cielu in custas diis friscas de beranu), seus arribbendi a sa metadi de s'annu puru, ma de custu nc'at a essi su modu, e s'ocasioni duncas, de ndi chistionai mellus candu at a brintai su mesi de lampadas. Po immoi, potzu feti sighiri a mi bivi custas diis, chi mi parrint drucis cumenti a su tzucuru, cun su coru prenu fintzas a cucuru de afròddiu, mancai feti po su fatu ca, eia, is temperaduras (diaici chistionaus puru, ma acoitendi meda, e si cumprendit, de su tempus chi est fadendi, e no feti de su tempus chi passat, cumenti seu costumau a fai dònnia cida de su restu, cumenti eis a sciri beni chi eis lìgiu a su mancu unu de is artìculus chi nd'apu bogau aforas, chi nd'apu pesau, chi apu scritu in custus ùrtimus duus-tres annus) no funt tropus bàscias (est a narai, duncas, ca no est fadendi, custu est pagu ma seguru, su frius chi, mancai, fait, e at fatu, in s'ierru) e no funt, mancai, nemmancu diaici artas cumenti est costumau a fai (e mescamente in custus ùrtimus cincu-dexi annus) in s'istadi, ca parrit ca su logu potzat pigai fogu, eia, de unu segundu a s'atru. 

E duncas, eia, custu perìodu de s'annu, megamu a si narai, sighit a mi parri su prus druci, druci cumenti a su tzucuru, e custa cosa acapiada a is temperaduras iat a depi essi bastanti po si bivi custas diis cun su coru selenu, est a narai, chentza tropu disisperu (mancai is gherras chi ancora nci funt, in custu mundu macu e totu ghetau a pari, iant a essi bastantis, eia, po si fai pigai de is pentzamentus lègius, fadendi su contu ca funt sighendi a narai ca po crupa de cussu chi est sucedendi in Iran, e in cussas zonas, intzandus iat a podi spaciai su tialu de su carburanti chi serbit po fai bobai is aereus, cun totu cussu chi custu cumportat e iat a podi cumportai po is vacantzas, ma no feti po is vacantzas, de is cristianus). 

Ma torraus a nosu.
In custas ùrtimas diis, a narai sa beridadi, e chistionu a su mancu de sa zona, de su logu innoi m'agatu a bivi, est torrendi a fai tempus malu, fadendi su contu ca est proendi torra e su cielu est prenu de nuis, e sa cosa iat a podi sighiri fintzas a sa dì de su mercuis (e po cumprendi mellus su chi si seu narendi, depeis fai su contu ca apu atacau a scriri cust'artìculu su megama de su martis, apustis de su lunis innoi at protziu unu pagheddeddu), innoi iat a podi fai fintzas lampus e tronus, po cussu chi seus costumaus a tzerriai temporada. E po custa cida, mi parrit mi parrit ca no si fatzu perdi atru tempu (no si fatzu perdi su tempus chi, mancai, e si naru fortzis, nemmancu teneis de perdi, e de nci fuiai) e duncas, antzis ca mi strollicai, po rigas e rigas de sighiu, atacu de immoi etotu a si chistionai de cumenti funt andendi is giogus, e duncas is campionaus de is scuadras diletantis sardas, chi est, de su restu, sa farra chi manigiaus innoi in su giàssu de su Diàriu Sportivu, po ndi pesai is artìculus, fadendi su contu, mescamente, ca is campionaus de s'Ecellenza, de sa Promotzioni e de sa Segunda Categoria puru, funt arribbadas (e no mi parrit nemmancu berus, si ddu torru a arrapiti po sa de tres, o de cuatru bortas) a is ùrtimas duas partidas po custa stagioni. 
E custu bollit narai, mescamente, ca su bintises de su mesi de abrili, chi at a essi de domìnigu, s'ant a giogai is partidas po su chi pertocat s'ùrtima giorronada, e intzandus, in totu su mesi de maju, eus a tenni sa possibbilidadi de sighiri feti is partidas finalis, chi ant a pertocai sa batalla po no ndi cabai de categoria (e duncas, eia, sa batalla po ndi cassai sa sarvesa) e sa batalla po ndi cassai s'artziada in sa categoria prus arta (e seu chistionendi de is partidas chi tzerriaus, a sa moda, a sa manera de is ingresus etotu, play-off, e play-out puru). E custu bollit narai, e chistionu mescamente po mei, ca apa a tenni unu stìddiu de trabballu in mancu de sighiri, fadendi su contu ca, cumenti est craru, nc'ant a essi prus pagu partidas chi s'ant a giogai, e duncas, eia, potzu narai ca custu mesi est druci cumenti a su tzucuru po custu motivu puru. 

E duncas, eia, cumenti s'apu promìtiu pròpriu immubagora, deu pentzu ca sa cosa mellus chi potzu fai est cussa de mi nci fuiai (a fundu 'e susu, cumenti narant in Bidd'e Sorris, cumenti apu sèmpiri intèndiu narai in bidda cosa mia, fintzas de candu seu unu pipieddu), giai de immoi, chentza de perdi nemmancu un antru mesu segundu, me is chistionis chi nd'arribbant de is campus innoi si giogant is partidas. 

E duncas, eia, megamu a si narai, megamu a si contai ca po su chi pertocat su mundu de sa Segunda Categoria puru, ammancant feti duas giorronadas po serrai is giogus, e cumenti eis a podi cumprendi a solus, nci funt giai is primus scuadras chi funt serrendi is chstionis, ddi naru diaici, po su chi pertocat sa bìncida de su campionau. E intzandus, is primus, in totu su mundu de sa Segunda Categoria (cumenti mi praxit a ddu tzerriai) chi funt arrannèscius a serrai is giogus, funt stètius is de su Bunnànaru, chi est una biddixedda chi, tra is atras cosas, fait calincunca cosa cumenti a noicentus animas, prus o mancu, e chi s'agatat in sa zona de Tattari; antzis, a bolli narai sa beridadi, a bolli narai is cosas cumenti funt, nemmancu nci funt noicentus animas in sa biddixedda, fadendi su contu ca de su chi potzu ligi, in sa bidda s'agatant calincuna cosa cumenti a otucentus e norantacuatru animas, po essi prus pretzisus puru. 
Is de su Bonnanaro, intzandus, ant bintu su campionau in sa Lista E, e fintzas a custu domìnigu passau iant pèrdiu feti una partida (e megu a chistionai de sa partida chi iant giogau contras a is de su Minerva, chi s'agatant, in dì de oi puru, a su segundu postu de sa lista), ma nci funt arrutus torra, in s'ùrtima bessida, cussa chi s'est giogada pròpriu custu fini de cida passau, contras a is de su Bòrore, e si iat a podi fintzas pentzai, e ddu megu a narai po brullai, est craru, ca si siant fatus pigai de sa festa prus de su tanti chi serbiat. 
Ma de su restu, su de binci unu campionau praxit a totus, no feti a is professioneris, e si cumprendit beni; e apustis chi abarras curri-curri po noi mesis de sighiu, chentza de ti frimmai giai nudda, intzandus candu nd'arribbat s'ora de fai sa festa, mi parrit craru, e mi parrit giustu, ca is piciocus si fatzant balli in custu puru. 
E passièntzia, duncas, chi mancai no arribbas a giogai is ùrtimas partidas a su centu po centu de sa cuncentratzioni, chi mancai as tentu in totus is atras partidas, o in sa cantidadi prus manna de partidas chi as giogau e bintu, e custu, de su restu, si fait a cumprendi de cantu funt stètius fortis (e megu a chistionai, mi parrit craru, de sa cantidadi manna de partidas chi ant bintu).

E de sa cosa nd'eus a chistionai mellus, mancai, candu, me is tres mesis de s'istadi, s'apa a torrai a chistionai de cumenti funt andadas is cosas in sa stagioni. 
Po immoi, duncas, si potzu feti intregai un arrogu (un arrogu piticicheddu) de totus is chistionis chi m'at regalau Andrea Mura, chi est unu de is giogadoris cun s'esperiètzia prus manna a is pabas, tra cussus chi faint parti de sa scuadra de su Bunnànaru etotu, fadendi su contu ca Mura at giogau, fintzas, in su campionau de sa Sèrie D e in Ecellenza. «Sa rosa chi is dirigentis funt stètius bonus a ndi pesai est forti meda; si iat a podi narai puru, giai giai, ca po sa Segunda Categoria est tropu forti. Seus prexaus, de su restu, e nci iat a mancai atru puru, e si cumprendit bastanti beni, de sa stagioni, de su campionau chi seus stètius bonus a fai, ma est craru, nci fiant atras scuadras chi teniànt totus is cartas bonas po ndi podi cassai su primu postu: e seu pentzendi a is de sa Calmedia de Bosa, po nd'arremonai una, o a is de su Putumajore puru, e in sa lista, in sa truma de is scuadras prus fortis de su campionau deu nci ia a ponni puru is de su Borore, a su mancu fintzas a candu funt abarraus a su passu cosa nosta». E pròpriu is de su Borore, cumenti s'apu giai arremonau de su restu, funt arrannèscius a binci contras a is de su Bunnànaro in s'ùrtima partida chi s'est giogada pròpriu custu fini de cida passau. 
Apustis Mura at sighiu a mi contai: «Is de su Bunnànaru, duncas, no fiant currendi a solus, e deu creu ca una de is isfidas prus tostadas, de is partidas prus togas, est stètia pròpriu cussa contras a is de su Putumajore etotu,e megu a chistionai mescamente de sa partida chi s'est giogada a sa torrada, chi mi nd'arregodu beni meda, e cun prexei, poita in cussa ocasioni fia arrannèsciu a fai duus gol, e intzandus seus stètius bonus a binci po tres a duus, a s'ùrtimu segundu de giogu». 
Cumenti a narai ca, eia, at a essi berus puru (cumenti est berus, de su restu) ca is de su Bunnànaru funt stètius is prus fortis de totus, ma a sa fini ant dèpiu sudai is camiseddas, dònnia borta chi ndi funt cabaus in campu, po ndi cassai is tres puntus, poita, custu est pagu ma seguru, is aversàrius no ddis ant regalau nemmancu mesu puntixeddu, cumenti si iat a podi narai, e cumenti seu narendusì de su restu. 
Intzandus, Mura at sighiu a mi contai: «Sa partida chi eus giogau a s'andada contras a is de su Borore est stètia bella, toga e fadiosa, fadendi su contu ca seus stètius bonus a ddis fai tres gol, apustis chi nd'eus incasciau duus gol; e custu bollit narai ca sa dì seus arrannèscius a bogai aforas totu su coru mannu chi is cumpangius miu tenint, ma sa cosa ballit po mei puru. Ca po binci custas partidas no bastat a essi is prus fortis cun is peis, ma serbint puru su carateri, sa fami de binci, sa gana de ndi cassai is tres puntus. E custa cosas ddas depi tenni dònnia domìnigu, in dònnia bessida, e no una cida eia e sa cida avatu nou. Mi nd'arregodu cun prexei mannu puru sa partida, sa isfida chi eus giogau, siat po su chi pertocat s'andada e siat po su chi pertocat sa partida de sa torrada, contras a is de su Turalva; in prus, una de is partidas prus togas est stètia cussa contras a is de Su Burgu». 
E si cumprendit: chi ses bravu, chi ses sèriu a fai su trabballu cosa tua, apustis chi bincis unu campionau, e cumenti spacias de fai sa festa chi ti ses minèsciu, intzandus iast a depi atacai, acoitu e allestru, chentza de perdi nemmancu mesu segundu, a pentzai a sa stagioni chi at a benni, e chi is de su Bunnànaru (de issus megu a sighiri a chistionai) ant a depi fai, est craru, in su campionau de sa Primu Categoria. «Is dirigentis de sa scuadra – m'at contau apustis Andrea Mura – funt giai trabballendi po cuncodrai, po su mellus chi fait, po su mellus chi podint, po su mellus chi ant a arrannèsci, sa rosa, est a narai sa truma de giogadoris chi ant a curri s'annu chi benit, chi su Cielu at a bolli custu beni po nosu, in sa stagioni de su duamilla e bintises – duamilla e bintiseti, in su campionau de sa Primu Categoria. Eus a depi pentzai, po primu cosa, a curri po ndi cassai sa sarvesa, e no at a essi facìli poita, si cumprendit, cumenti ndi artzias de categoria, intzandus is giogus si faint prus dificilis, prus tostaus, cumenti est craru, cumenti est giustu chi siat, de su restu. Eus a circai, duncas, de ndi cassai, de ndi ingolli totus is puntus chi s'ant a serbiri po ndi cassai sa sarvesa, mancai, est cussu chi mi auguru immoi, chentza de depi sunfriri prus de su tanti, mancai in unu campionau nci siant sèmpiri cussus periodus ca abarrant prus fadiosus. Deu creu ca meda at a dipendi, po ddu narai diaici, de sa lista innoi eus a curri e, intzandus, e si cumprendit, meda at a dipendi de sa fortza de is scuadras de is aversàrius, ca nci funt listas innoi nc'est, mancai, una cantidadi prus manna de scuadras fortis. Ma deu creu puru ca, fadendi su contu de su campionau chi seus stètius bonus a ndi pesai cust'annu, chi is dirigentis ant a arrannèsci a pigai calincunu giogadori nou, e mancai bellu forti, intzandus, mancai estus a podi curri, puru, po ndi cassai calincuna cosa de prus de sa sarvesa, chi megais a mi cumprendi po su chi seu circhendi de si narai. Ma is cosas ant a essi prus craras feti me is mesis de s'istadi, candu s'at a torrai a oberri su chi tzerriaus mercau de is giogadoris». 

Po immoi, invècias, podeus e depeus fai is contus po cumenti funt andadas is cosas cust'annu, ca de su restu po chistionai de totu su chi at a sucediri in su mercau gei eus a tenni su tempus, est a narai, duncas, ca is ocasionis no ant a ammancai de seguru. E duncas, eia, Andrea Mura est abarrau prexau meda de su chi est arrannèsciu a fai cust'annu: «Po immoi – m'at contau su centrucampista – apu fatu otu gol e seu arrannèsciu a sforrai, ddi nau diaici, dexiotu passagius bonus chi ant permìtiu a is cumpangius cosa mia de ndi cassai su gol (cussus ca, in ingresu, a sa moda, a sa trassa de is ingresus, tzerriaus assist ndr). Si potzu narai, puru, ca cust'annu mi seu spassiau meda ma meda: sa scuadra fiat forti a totu coddu e candu arrannèscis a binci una biga de partidas, cumenti est capitau, cumenti est sucèdiu a nosu, intzandus, eia, ti spassias a tipu macu, a tipu pipiu. E sa cosa de importu prus mannu po unu giogadori diletanti, est a narai po unu giogadori chi ndi cabat in campu feti po si spreviai unu pagheddeddu, e no de seguru po si ponni in buciaca una surra de dinai, cumenti sucedit, invècias, a is giogadoris professioneris, intzandus eia, su spàssiu est una de is cosas de importu prus mannu, e deu creu ca si cumprendat bastanti beni. Po mei est stètiu unu prexeri mannu meda, su de podi giogai torra impari cun giogadoris fortis chi funt amigus puru, e megu a pentzai, po nd'arremonai feti duus, a Gavinu Fiori e a Alessandru Mazoni. Seu prexau meda, intzandus, po cumenti si funt andadas is cosas. Cun s'allenadori cosa nosta, e megu a chistionai, est craru, de Marcellu Fois, no eus tentu nesciunu problema: eus sèmpiri cuncodrau, est a narai ca seus stètius sèmpiri de acòrdiu; no nci funt stètius strobbus o dannus e de su restu seus chistionendi de un allenadori chi sciit su fatu cosa sua, e potzu fintzas narai ca, po cantu est bravu, in unu campionau piticheddeddu cumenti est cussu de sa Segunda Categoria no nci fait nudda, e megu a narai, duncas, ca si iat a minesci de sighiri scuadras chi currint me is campionaus prus mannus. E duncas, isperu po issu ca is cosas ddi potzant andai beni in su campionau de sa Primu Categoria puru, partendi, pròpriu, de su chi s'at a giogai in sa stagioni chi at a benni. Mi iat a fai prexei, po serrai sa ciaciarrada, a saludai, e a torrai gràtzias, mescamente, a totus is dirigentis de s'assòtziu, chi no s'ant mai fatu mancai nudda e antzis ant fatu de totu po permiti a nosu giogadoris de podi giogai, e de si podi allenai, puru, in sa manera mellus. Ia a bolli torrai gràtzias, cun custa dedica etotu, a sa famìllia cosa mia etotu, a is fillas cosa mia, Greta e Zoe, fadendi su contu ca po giogai a bòcia, po curri avatu de sa bòcia, po ddu narai mellus puru, ndi depu bogai su tempus a issas. E megu a narai, e si cumprendit mellus, ca po sighiri is allenamentus e is partidas,  no potzu abarrai cun issas. Una dedica de importu mannu andat a babbu miu, chi peròu no s'agatat prus in custu mundu, e chi est sèmpiri stètiu su tifosu prus mannu chi apu tentu». 

E duncas, immoi chi seus arribbaus a custu puntu de s'artìculu deu creu ca, po custa cida a su mancu (ma sa faina at a andai ainnantis po un antru pagheddu, chi cumprendeis su chi seu circhendi de si narai), sa cosa mellus chi si potzat fai siat cussa de sighiri a chistionai, a su mancu unu pagheddeddu, de is scuadras chi currint in su campionau de sa Segunda Categoria e chi ant bintu, giai, sa cursa po ndi cassai su primu postu de sa lista e, intzandus, s'artziada in su campionau de sa Primu Categoria, po sa stagioni chi at a benni e chi at a essi, mi parrit bastanti craru, cussa de su duamilla e bintises – duamilla e bintiseti. 

E duncas, cumenti fia pentzendi pròpriu una pariga de oras fait, candu mi fia pasiendi, ainnantis de atacai torra cun su trabballu, is scuadras chi funt bincendi su campionau (chi mi permiteis de fai custu giogu de fueddus, e de manigiai una metafora, dda tzerriu diaici) funt fadendi a tipu sa fruta candu est cota e nd'arruit de sa mata. E is scuadras chi currint me is campionaus chi is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis, ndi funt pesendi po su chi pertocat sa Sardìnnia, eia, funt incumintzendi a serrai is giogus, e prus andaus ainnantis cun su tempus, e cun is giorronadas, e prus eus a tenni chistionis de si torrai a contai me is artìculus de is Novas (ma puru, est craru, me is artìculus chi scrieus in italianu, e sa cosa ballit siat po mei e siat po is collegas cosa mia puru). 

E duncas, eia, in s'interis chi abertaus chi ndi bessat aforas su nomini de sa scuadra chi at a binci sa cursa po ndi cassai su primu postu de sa lista po su chi perticat s'Ecellenza (in dì de oi a su primu postu sighint a nc'essi is de s'Ossese, chi tenint feti unu puntixeddu in prus de is de s'IlvaMaddalena, candu ammancant feti duas giorronadas po serrai sa stagioni regulari, cumenti dda estus a podi tzerriai, furendindi sa trassa de s'italianu etotu), e in s'interis chi abertaus, puru, chi si cumprendat cali scuadra nd'at a cassai su primu postu de sa lista, tra is cuatru chi si funt gioghendi sa bìncida de su campionau in sa Lista A po su chi pertocat su campionau de sa Promotzioni (e megu a chistionai de is de su Terraba Frantziscu Bellu, de is de su Castiadas, de is de sa Villacidrese, chi est sa scuadra chi nd'ant pesau in Biddacidru, e de is de su Gùspini), e duncas sa scuadra chi nd'at a artziai in su campionau de s'Ecellenza (passendi, cumenti naru fatu fatu, de sa porta prus manna), e fadendi su contu ca po su chi pertocat su campionau de sa Primu Categoria, in totus e cuatru is listas is giogus po ndi cassai su primu postu funt ancora totus obertus, intzandus no nc'est nudda de mellus de fai (si ddu torru a arrapiti) ca sighiri cun s'arrastu, cun sa lega chi apu pigau fintzas a immoi, e duncas, eia, chi ainanntis, in cust'artìculu etotu, s'apu giai chistionau de is de su Bunnànaru, chi currint in sa Lista E, po mei si iat a podi sighiri chistionendi, e arraxonendi impari, chi fait, chi si benit a beni, chi nc'arrannèsceus, apitzus de is de su Cabuderra, chi ant bintu sa cursa po ndi cassai su primu postu in sa Lista B, cun duas giorronadas ancora de giogai, est a narai, centu e otanta minudus ainnantis de s'acabbada, de sa fini de sa stagioni. 

E duncas, po primu cosa, e sèmpiri chi seis de acòrdiu cun mei, andaus a castiai (impari, e si cumprendit, berus est?) cumenti ddis funt andadas is cosas, e po ddu cumprendi, sa cosa mellus, sa cosa prus toga est cussa de andai a castiai, a arraxonai apitzus de is numerus chi funt stètius bonus a ndi pesai is biancus arrùbius in custas binticuatru partidas chi ant giogau, de su restu, fintzas a immoi. 
E duncas, sa primu cosa chi si potzu contai est ca a is de su Cabuderra ddis bastat feti unu puntu (feti unu puntixeddu, po ddu narai mellus puru) po serrai sa chistioni acapiada a is giogus, a sa cursa po ndi cassai su primu postu, fadendi su contu ca custu sabudu passau teniànt de giogai (e ant giogau, mi parit bastanti craru) sa partida, de importu mannu meda, e si cumprendit, pròpriu contras a is segundus de sa classi de su Domunoas, chi funt arribbaus a giogai sa partida in domu de is primus de sa lista, de is primus de sa classi de su Cabuderra cun calincuna cosa cumenti a noi puntus in mancu. 
E duncas, eia, si cumprendit, a is de su Cabuderra diis bastàt a ndi cassai unu puntu po tenni sa seguresa de binci su campionau, e is cosas funt andadas, a sa fini, pròpriu diaici, fadendi su contu ca sa partida s'est serrada cun su resultau in paridadi de zeru a zeru. E duncas, is de su Cabuderra, chi funt sighius de un allenadori giòvuneddu ma giai bravu meda, e chi si tzerriat Danieli Cadelano, funt arrannèscius a ndi cassai, a su mancu fintzas a immoi (ma is cosas diis iant a podi andai mellus puru, fadendi su contu, cumenti s'apu giai narau, de su restu, ca ammancant atras duas partidas po serrai is giogus), calincuna cosa cumenti a cincuantanoi puntus, chi ndi funt arribbaus gràtzias a dexennoi partidas chi ant bintu e duas partidas (contendi s'ùrtima chi ant giogau pròpriu sabudu passau, e chi s'apu arremonau pròpriu immubagora) chi ant serrau cun su resultau siddau in paridadi. Is de su Cabuderra, fait a narai custu puru, ndi funt arrutus cust'annu, a su mancu fintzas a immoi, feti po tres bortas (e candu naru chi ndi funt arrutus bollu narai, mi parrit bastanti craru, berus est? ca ant pèrdiu sa partida). 
Po su chi pertocat is numerus chi nd'ant pesau, acudu a si narai puru ca is biancus-arrùbius (diaici ddus podeus tzerriai, est bastanti craru custu puru, ma no si sciit mai chini at a arribbai a ligi custus artìculus, po su cabori de sa camisedda chi manigiant mescamente me is partidas in domu cosa insoru) ant fatu calincuna cosa cumenti a setanta gol (e no funt pagus de seguru) e nd'ant bodditu feti sexi, est a narai, prus pagu de unu gol a partida, po sa difesa prus forti tra totus cussas chi nci funt in sa lista (e megu a chistionai, duncas, mi parrit bastanti craru, de is difesas de is atras trexi scuadras chi currint, pròpriu, impari, chi no contras, a is de su Cabuderra in sa Lista B). 
E duncas, si cumprendit bastanti beni, totus custus numerus (ca si iant a podi pigai a conca puru, mescamente chi no seus costumaus a arraxonai apitzus de custas cosas. E megu a brullai, unu pagheddeddu, si cumprendit berus est?) s'agiudant a cumprendi, mi parrit craru puru, cantu funt stètius fortis is piciocus sighius de Danieli Cadelano, e cantu est stètiu forti, e bravu, s'allenadori puru, chi est arrannèsciu a ndi bogai aforas totu su mellus ca is piciocus cosa sua teninat me is cambas, in conca, e me in su coru puru (ca funt totus is cosas chi serbint po binci is partidas e duncas is campionaus: is peis e is cambas no bastant, mancai siant una de is cosas de importu prus mannu in su giogu de sa bòcia, chi si giogat cun is peis, cumenti eis a sciri beni, poita apustis serbit puru sa conca, sa conca sbuida de pentzamentus, po sighiri su chi ses fadendi, e feti su chi ses fadendi, est a narai, mellus, ca candu ndi cabas in campu iast a depi abarrai cuncentrau apitzus de sa partida e de s'atzioni chi megas, mancai, a sighiri e, custu est pagu ma seguru, no iast a depi abarrai a pentzai a cras, cumenti si megat babbu miu candu s'atobiat, mancai in s'interis chi est guidendi sa machina, cun calincunu chi mancai est sbelliau e tenit sa conca prena, fintzas a cucuru, de distratzionis. E in su giogu de sa bocia, e cun custu dda serru diaici, serbit puru su coru, est a narai sa gana bona de sunfriri, mancai impari a is cumpàngius cosa tua etotu, e s'abbilidadi de sighiri a curri, puru candu, mancai, is cambas no si movint prus de cantu ses stracu, chi cumprendeis, a su mancu, su chi seu circhendi de si narai); e tocat a narai puru, immoi chi nci seus, ca is dirigentis chi sighint s'assòtziu ant fatu unu trabballu bonu, in s'istadi, fadendi su contu ca funt arrannèscius a pigai (a cunvinci a giogai po sa scuadra cosa insoru, chi si praxit mancai de prus diaici po cumenti sonat sa cosa, ca mancai benit a essi prus crara puru) is giogadoris prus fortis chi ddoi fiant, e duncas, eia, candu tui arrannèscis a ndi pesai una rosa diaici forti, intzandus is cosas benint a essi prus facilis, e megu a chistionai, est craru, de su de binci is partidas e duncas, de su de binci su campionau. E de sa cosa, est craru, nd'apu chistionau, nd'apu arrexonau (chi mi permiteis de imboddiai sa chistioni diaici) cun s'allenadori, chi est Danieli Cadelano (cumenti s'apu giai narau una pariga de bortas) e cun su presidenti puru de s'assòtziu, chi est Andrea Vergari; e tra is atras cosas Vergari est stètiu unu giogadori de is de su Cabuderra e est stètiu fintzas s'allenadori (allenàt sa scuadra de su Cabuderra in su duamilla e doxi, candu deu fia a su primu annu de trabballu cun is de su Diàriu Sportivu, e mi benit totu de pentzai ca, eia, su tempus a bortas parrit pròpriu chi si nci bobit). 

E duncas, po incumentzai, mi iat a praxi (mi iat a fai prexeri) a si intregai is fueddus chi Cadelano m'at regalau (candu chistionu cun calincunu mi parrit sèmpiri de arriciri unu regalu, de cantu mi praxit a ascurtai is istorias chi mi contant is atrus. E sa cosa ballit, puru, po is personas chi no funt acapiadas a istrintu cun su giogu de sa bòcia, e mi parrit bastanti craru puru) po mi fai a cumprendi cumenti ddis funt andadas is cosas (eia, chistionu de issu e de is giogadoris cosa sua puru, de is giogadoris chi at sighiu, duncas); e sa duda chi si fatzu est giai giai sèmpiri sa pròpria: chini mellus de un allenadori podit sciri, e podit contai a is atrus, ita totu est sucèdiu in una stagioni? 
E si naru, puru, ca su chi no apa a acudi a si contai custa cida si ddu apa a contai, mancai, me is mesis de s'istadi, a bòcias frimas, cumenti si iat a podi narai, candu eus a torrai a bivi is momentus prus togus de sa stagioni de su duamilla e binticincu – duamilla e bintises, partendi pròpriu, e mi parrit craru puru, de totus cussas scuadras chi funt arrannèscias a binci su campionau cosa insoru. «Festus abertendi de binci su campionau, de tenni sa seguresa de ddu essi bintu, megu a narai, giai de una bella pariga de cidas. A narai sa beridadi, eia, nci fiat su tanti po serrai is giogus cuatru o cincu giorronadas fait, ma a sa fini tocat a narai puru ca is aversàrius cosa nosta no si funt arrèndius, e duncas dda eus acabbada a depi abertai a custu sabudu passau, candu si seus atobiaus pròpriu contras a is de su Domunoas. Ma deu creu de podi narai ca si seus minèscius, e meda puru, de ndi cassai su primu postu de sa lista, e si potzu narai ca no mi parrit unu ispantu mannu meda: apustis de essi giogau contras a totus is scuadras de is aversàrius, mi ndi seu acatau ca nosu festus, si ddu naru in una pariga de fueddus feti, is prus fortis de totus. E de su restu in sa rosa de su Cabuderra ddoi funt giogadoris ca in su campionau de sa Segunda Categoria nci brintant pagu e nudda, chi est berus ca meda de issus iant a podi giogai, chentza de nesciunu strobbu, in su campionau de sa Primu Categoria, e calincunu de is giogadoris cosa mia iat a podi giogai, chentza nesciuna bregùngia, in su campionau de sa Promotzioni puru. Potzu narai, puru, immoi chi nci seu, ca chi no festus arrannèscius a binci su campionau iat a essi stètiu unu pecau mannu meda, ddi naru diaici, mescamente chi fadeus su contu ca s'annu passau eus pèrdiu s'artziada in su campionau de sa Primu Categoria, apustis de nd'essi pesau una stagioni toga meda, po crupa, ddi naru diaici, de unu tiru sballiau de is undixi metrus. Ma bolemus strantaxai sa conca e fai a biri a totus cantu seus fortis, e gràtzias a Deus cust'annu nci seus arrannèscius; e de su restu, no podestus fai atru, e nudda de mellus, ca serrai sa stagioni a su primu postu de sa lista». 




Attività realizzata col contributo della Regione Sardegna. IMPRENTAS 2025-2026. LR 22/2018 art. 22