Arragodus: is de su Santeru si lassant totus is scuadras aversàrias a is pabas e ndi cassant s'artziada in Primu Categoria

E duncas, deu creu pròpriu ca sa manera mellus chi nci podis essi po incumentzai cun s'artìculu de custa cida est cussa de si torrai a arremonai cumenti funtzionat su gioghiteddu, mi benit de ddu tzerriai diaici, po su chi pertocat is rigas chi ndi bessint aforas dònnia giòbia de su mesi e de s'annu, chentza ndi sartai nemmancu unu, e chi a sa fini bosatrus agatais, cumenti a sèmpiri, cumenti sucedit de calincuna cosa cumenti a cuatru annus (chi depu fai beni is contus, ca seu innoi puru po custu) in su giàssu de is amigus de su Diàriu Sportivu. 

E duncas, su chi scieis giai (ma deu seu innoi po si ddu torrai a arragodai, puru, ca mancai teneis sa conca prena fintzas a cucuru de atrus pentzamentus e no podeis abarrai a sighiri is cosas mias puru, e megu a brullai, unu pagheddeddu, si cumprendit?) est ca me in s'istadi dedicaus is artìculus chi scrieus in sardu a totus is scuadras chi ant bintu is campionaus cosa insoru: e ddu sciu deu puru, e fintzas tropu beni, ca cun su giàssu de su Diàriu Sportivu sigheus feti (e naru feti, ca si cumprendat beni!) is giogus e duncas is partidas de is assòtzius de bocias chi currint in su mundu de is diletantis (chentza ndi bogai aforas, duncas, nemmancu unu mesu fueddu apitzus de is professionieris, diaici tzerriaus, intzandus, mi parit craru puru, totus cussus giogadoris ca, invècias, ndi cabant in campu po ndi guadangiai una bella barca de dinai, cumenti faint, de su restu, is grandus campionis de sa Sèrie A etotu), ma a narai sa beridadi, e sa chistioni est pròpriu custa, a binci, ddi nau diaici, praxit a totus. E cust'annu, fait a narai custu puru, de su restu, nci funt stètias scuadras chi nd'ant pesau cursas togas medas, siat in su campionau de sa Primu Categoria, siat in su campionau de s'Ecellenza, de sa Promotzioni e fintzas in sa Segunda Categoria, chi est sa prus pitichedda fra cussas chi sigheus, peròu su de essi sa prus pitichedda no bollit narai, e nci iat a mancai atru puru, ca no tenit importu. Antzis, de su mundu de sa Segunda Categoria puru, fatu fatu (po no narai giai sèmpiri) nd'arribbant storias togas medas, cumenti a cussa chi seu po si torrai a contai, po fai un esèmpiu. Scieis puru (e cun custu seu po dda acabbai cun is stròllichiminis chi tèngiu badda badda in conca) ca su giogu (torra!) chi megu a circai de fai po su chi pertocat is articulus in sardu (candu scriu in italianu, difatis, si iat a podi narai diaici puru, is stròllichiminis funt pagu e nudda) est cussu de cumprendi, arraxonendindi impari a bosatrus, si cumprendit beni, chi ddoi funt, chi agataus, in su mundu de su càlciu, e in su chi mi torrant a contai is allenadoris etotu, mescamente, candu chistionant de is stagionis cosa insoru etotu, letzionis chi potzant balli, puru, po sa vida cosa nosta, cussa de dònnia dì, po si cumprendi mellus. 

Seghendi a crutzu sa chistioni, si potzu feti narai ca mi ndi seu acatau, cun su tempus, ca ddoi est una genia de filosofia apicada a su sport, e mescamente a su giogu de sa bòcia: mi parit de podi narai chi nc'est totu una biga de chistionis chi ndi bessint aforas candu is allenadoris fueddant apitzus de is partidas chi bìncint ma, mescamente, chi ndi bessint aforas apustis de is partidas chi perdint. Nc'est totu una filosofia acapiada, po nd'arremonai una, a sa chistioni de si ndi torrai a strantaxai apustis chi nd'arruis; e nci nd'est, de seguru, un'antra acapiada a sa chistioni de no si fai pigai tropu de su prexu candu, mancai, arrannèscis a binci cuatru o cincu partidas de sighiu, e in custu, po sighiri cun s'esèmpiu, deu agatu prus de una cosa chi torrat, paris paris, cun sa filosofia de is antigus stoicus (cumenti si iant a podi tzerriai), e chi ballit siat po is stoicus chi ddoi fiant in s'antiga Grecia, e chi torrat giai agualis po su chi pertocat su chi pentzànt is stoicus cinesus. 

Su giogu chi mi praxit de prus fait, duncas, est cussu de circai, me is fueddus chi mi regalant dònnia dònnia cida is allenadoris, candu ddus intendu po ciaciarrai unu pagheddeddu, apustis de is partidas de importu prus mannu, letzionis chi si potzant donai sa fortza (ta cosa bella ca iat a essi, mi megu a solu a solu) po sighiri a andai ainnantis, cun totus is fainas cosa nosta, mancai is cosas a bortas, no andint pròpriu cumenti disigiaus (o, po ddu nai mellus: mescamente candu is cosas no andant pròpriu cumenti disigiastus). E duncas, chi seis costumaus a ligi is artìculus in sardu chi ndi bogu aforas dònnia giòbia, scieis puru (e beni), ca in mesu a totus is chistionis e is novas chi nd'arribbant de is campus de càlciu (e chi funt su pani chi sforraus, giai dònnia dì, cun is collegas cosa mia chi trabballant po su Diàriu Sportivu), fatu fatu nci sticu calincunu de cussus stròllichiminis (cun su tempus apu incumentzau a ddus tzerriai pròpriu diaici) chi tèngiu badda badda in conca, e chi pertocant atras legas, chi mancai no nci brintant diaici tanti cun is fainas de is campionaus de càlciu chi si giogant in Sardìnnia (ma chi mi nd'arribbant, mancai, de unu libbru chi lìgiu, o chi mi nd'arribbant, mancai, de calincuna cosa chi mi contant is personas chi atobiu in sa bia), ma chi mancai mi iant a podi agiudai (custa est s'ispera mia, a su mancu, e gei si cumprendit, berus est?) a ndi cassai s'atentzioni puru de totus cussas personas chi mancai no funt acapiadas a strintu cun is storias de is assòtzius de bòcia chi ddoi funt, spratus in Sardìnnia, giai giai in dònnia biddixedda (fadendi su contu, duncas, de is biddixeddas prus pitichinninnias puru), ma chi mancai tenint aggradessu, ddi naraus diaici (po manigiai, tra is atras cosas, unu fueddu chi m'est sèmpiri praxu meda po cumenti sonat, e cun custu iat a fai a narai puru ca no nci iat a depi essi nesciuna bregungia a chistionai, a fueddai sa limba nosta, fadendi su contu, pruschetotu, ca is fueddus tenint unu sonu togu meda, a su mancu, custu est su parri miu, ca no tenit nudda, ma pròpriu nudda in manco de su sonu chi tenint is fueddus ingresus, ca si praxint e chi manigiaus diaici meda, tra is atras cosas, o is fueddus in italianu, ca eus imparau, po su prus, me is scolas), de fai unu pagheddeddu de pràtica, ddi naraus diaici, cun sa lingua cosa nosta, fadendi su contu ca, de su chi si cumprendit (e po ddu cumprendit, nareus puru ca abbastat pagu meda, ca nci poneus pagu meda, chi mi cumprendeis su chi si bollu narai) is personas chi sciint chistionai, ligi e pruschetotu scriri in sardu funt sèmpiri prus pagu, ca sa timoria prus manna est cussa chi su sardu ndi potzat sparessi de custu mundu. E si cumprendit cumenti andant is cosas: una lingua si morit e acabbat, duncas, cun su sparessi, candu no nc'est prus nesciunu chi dda fueddat in su logu innoi sa lingua est nascia, chi arrannèsceis a mi sighiri. Est a nai, duncas (e cun custu serru po diaderus cun custa lega e, duncas, cun totus is strollichiminis) ca chi in Sardìnnia no nci fessit prus nesciunus a chistionai su sardu, intzandus po sa lingua sarda sa storia iat a essi acabbada. Est a nai, duncas, ca, in dì de oi, su sardu est sighendi a bivi feti gràtzias a cussus chi ddu chistionant, ancora (ancora po pagu? Isperu de nou, est craru e si cumprendit), in su fetianu, siat in logu de domu (cun sa famìllia, duncas, e cun is amigus puru) e siat in su logu de trabballu. Poita s'arriscu est ca innoi in Sardìnnia nesciunu fueddit prus in sardu, e duncas, custa iat a essi sa morti de sa lingua, mancai si iant a podi agatai scientis, spratus in giru in su mundu, chi mancai iant a podi puru studiai sa lingua sarda (e dda chistionai, puru), ma custu no iat a serbiri a sarvai sa lingua cosa nosta de sparessi. Po bivi, duncas, una lingua depit essi chistionada in su logu innoi est nascia, de sa genti de su logu etotu; feti diaici, duncas, podit andai ainnantis; feti diaici sa vida de una lingua podit essi acapiada, ancora, a sa vida de sa genti. Desinò abarrat feti una cosa, una chistioni passada, bona feti po ndi preni is paginas de is libbrus. E cun custu, mi megu a solu a solu, ia a podi acabbai cun is stròllichiminis e mi nci ia a podi ghetai (cumenti seu po mi ponni a fai, de su restu) me is fainas chi pertocant is giogus de is scuadras de diletantis chi ddoi funt in Sardìnnia. 

S'arragodu acapiau a una stagioni (s'arragodu de una stagioni, si iat a podi narai diaici puru), nci ia a podi aciungi custu puru a su chi s'apu narau fintzas a immoi, si ndi bobat chitzi de sa conca de sa genti: est a nai ca is arragodus abarrant in sa conca cosa nosta po un annu? Po duus annus? Mancai po dexi annus puru. Fadeus puru su contu ca su prexu po unu campionau bintu (e totus is arragodus chi nd'arribbant, apustis de una stagioni toga meda) potzat durai po cuindixi-bint'annus (ma poi no est berus, fadendi su contu ca ddoi est una stagioni noba dònnia, dònnia annu, e duncas is arragodus, in su mundu de sa bòcia, a su mancu, durant pagu meda, deu creu), ma su de podi serrai is fueddus de un allenadori aintru de un artìculu, s'agiudat a allogai cussus sentidus, mescamente chi s'artìculu ndi bessit in internet, po cincuant'annus puru: est a nai ca cussu artìculu si iat a podi agatai (e duncas ligi) in su benidori, mancai, apustis de annus e annus. E su sentidu (unu de is sentidus prus mannus, po ddu nai mellus) acapiau a su giàssu de su Diàriu Sportivu est custu etotu: cun su trabballu cosa nosta si donaus is novas prus callentis (o prus friscas, ca in s'istadi arrachedint de prus puru) chi nd'arribbant dònnia, dònnia dì; ma in s'interis, cumenti ddas bogaus aforas e ddas fadeus "pùbbricas", cumenti si iat a podi narai candu un artìculu benit bogau aforas in su mundu de s'internet, fadeus in modu ca cussus artìculus etotu potzant essi lìgius puru tra centu annus. Custa, a su mancu, est sa ispera cosa nosta. E duncas, at a essi po custu puru (e immoi atacaus, e fiat ora puru, s'at a megai calincunu de bosatrus, cun is chistionis chi pertocant su mundu de su càlciu de is diletantis sardus) ca apu decìdiu de tzerriai is artìculus chi ndi bogu aforas in s'istadi (e chi pertocant totus is scuadras chi ant bintu is campionaus cosa insoru) "arragodus". 

E po is arragodus de custa cida, andaus a castiai, impari, sèmpiri chi seis de acòrdiu, si cumprendit, cumenti funt andadas is cosas in sa Lista D de su campionau de sa Segunda Categoria: si ddu apu giai arremonau, mi parit mi parit pròpriu, ca cussa de sa Segunda est sa categoria prus pitichedda tra totus cussas chi sigheus, dì po dì, cida po cida, mesi po mesi, cun su giàssu cosa nosta, ma su fatu ca siat sa prus pitichedda no bolit narai ca no siat spassiosa, o no nci siant cosas de importu de torrai a contai. E duncas, deu creu ca sa primu cosa chi podeus fai est cussa de andai a castiai cumenti funt acabbadas is cosas, e duncas, sa primu cosa chi podeus fai est cussa de andai a castiai unu pagheddeddu de numerus, ca si iant a podi agiudai a cumprendi mellus cumenti funt andadas is cosas in custus ùrtimus seti-otu mesis. 

Sa primu cosa chi ia a podi narai, intzandus, est ca is giogus de sa Segunda Categoria funt is ùrtimus chi torrant a partiri (impari a is campionaus de sa de Tres Categorias, chi peròu no sigheus cun su giàssu de su Diàriu Sportivu), apustis (sa cida avatu, si iat a podi narai diaici, po essi prus pretzisus puru, e unu giornalista, si cumprendit, depit circai de essi prus pretzisu chi podit, chi bolit fai beni su trabballu cosa sua) de cussus de sa Promotzioni e de sa Primu Categoria, e apustis puru de is campionaus de s'Ecellenza, ca, chi pròpriu ddu depeus narai, immoi chi nci seus, funt is primus chi torrant a partiri, dònnia annu. E duncas, is scuadras de sa Segunda Categoria cust'annu ant giogau calincuna cosa cumenti a bintises partidas, e no funt pagus de seguru, est a nai ca su tanti po si spassiai, po si spreviai, nc'est stètiu de seguru. Po su chi pertocat sa lista D, duncas, a su primu postu agataus is de sa Sanverese, sa scuadra chi nd'ant pesau in Santeru (si cumprendit bastanti de su nomini etotu), e chi nd'at cassau calincuna cosa cumenti a cincuantaseti puntus, chi ndi funt arribbaus gràtzias a dexiotu partidas bintas e tres partidas chi ant serrau cun su resultau siddau in paridadi. Tra is atras cosas, si iat a podi narai puru (e andu acoitu a si ddu narai, immoi chi nci seu) ca is biancus-bleu funt arrannèscius a ndi pesai calincuna cosa cumenti a setantunu gol, ca no funt pagus de seguru, e de custa cosa nd'apu chistionau, puru, con Robertu "Bobo" Sau, chi est s'allenadori de sa scuadra. Ma ainnantis de andai a cumprendi, impari, gràtzias, pròpriu, a is fueddus de Sau, cumenti ddis funt andadas is cosas in sa stagioni de su duamilla e bintitres – duamilla e binticuatru, podeus andai a castiai cumenti ddis funt andadas is cosas giorronada po giorronada. E duncas, is cosas po is de su Santeru no funt incumentzadas beni, fadendi su contu ca in sa primu bessida de sa stagioni (fiat sa primu dì de su mesi de ladamini) is biancus-bleu iant pèrdiu (ndi fiant arrutus, chi si sonat mellus) sa partida in domu de is de su Gesturi, cun su resultau de tres a unu. E deu creu ca su dìciu ca narat ca sa cosa de importu prus manna est cussa de partiri cun su pei bonu ddu connosceis totus, ma a sa fini, sa cosa de importu prus manna, in sa vida e in su giogu de sa bòcia puru, est cussa, mancai, de si torrai a strantaxai, mancai acoitu, apustis chi nd'arruis. E de seguru no fait prexei a nesciunus a perdi is partidas, e de seguru incumentzai sa stagioni, e sa cursa, cun una partida pèrdia no est sa mexina prus druci po s'umori, mi benit de narai diaici, ma custu si iat a depi agiudai a si nd'arragodai, puru, ca mancai su dannu siat mannu, tenis sèmpiri su tempus (ballit, torra, po sa vida e po su giogu de sa bòcia puru) po ti ndi scabulli torra de is mabis. E difatis, in sa segunda bessida de s'annu (po sa primu partida chi is de su Santeru iant giogau in domu cosa insoru) nd'est arribbada sa primu partida binta, contras a is allenus de su Sabarussa, cun su resultau, togu meda, de cuatru a unu. E a fai beni is contus, nci poneus pagu meda, mi parit de podi narai: apustis de essi pèrdiu sa partida contras a is gesturesus, is de su Santeru ant bintu po cincu bortas de sighiu, contras a is de su Lunamatrona (in domu allena, cumenti si iat a podi narai e cumenti, de su restu, seu narendu), cun su resultau de tres a duus; sa cida avatu (in sa bessida de su bintiduus de su mesi de lampadas), is de su Santeru ant pigau a bussinadas (cumenti si iat a podi narai), is de su Nurachi (chi est una biddixedda chi fait calincuna cosa cumenti a milli e cincucentus cristianus, e custu po si fai a cumprendi, mellus, ca su giogu de sa bòcia pertocat, po diaderus, fintzas is biddixeddas prus pitichinninnias), cun sa partida chi s'est serrada cun su resultau, bellu e tundu tundu, cumenti si iat a podi narai, de ses a zeru. Sa cida avatu, intzandus (fiat su bintinoi de su mesi de ladamini e, duncas, s'ùrtima bessida po cussu mesi etotu), is de su Santeru funt stètius bonus a ndi cassai is tres puntus in sa partida chi iant giogau in domu de is de s'Allai, cun su resultau de cincu a unu (e immoi chi nci seus, sigheus a fai unu pagheddeddu de giografia puru, cumenti si narat in sardu, chi est una cosa ca, comentecasiat, no mi dispraxit po nudda; e duncas, apitzus de is de s'Allai, si potzu narai, allestru, ca est una bidda chi fait calincuna cosa cumenti a trescentus animas, ma in s'isula, est berus custu puru, ddoi funt una biga de biddas pitichinninnias innoi nci bivint pagus cristianus). Is de su Santeru, torraus a nosu e a sa lista de resultaus de sa Lista D de su campionau de sa Segunda Categoria, ant bintu cun su resultau de cincu a zeru sa primu partida de su mesi de donniassantu puru, contras a is de su Simaxis. Su doxi de su mesi de donniassantu (est a nai, duncas, giai a sa metadi de su mesi) is piciocus sighius de Roberto Sau si funt dèpius acuntentai feti de unu puntixeddu, cumenti si iat a podi narai, fadendi su contu ca sa sfida chi ant giogau in domu de is de su Meana Sardu (una bidda chi contat calincuna cosa cumenti a milli e cincucentus personas) s'est serrada cun su resultau de unu a unu. Su dexennoi, sèmpiri de su mesi de donniassantu, si cumprendit beni, is de su Santeru ant bintu, cun su resultau, torra, togu meda de cuatru a unu, contras a is de su CR Arborea (una de is duas scuadras chi ddoi funt in sa bidda, fadendi su contu ca s'atra, sa prus manna, currit, e giai de una bella pariga de annus, in su campionau de sa Promotzioni); in s'ùrtima bessida de su mesi de donniassantu, invècias, is biancus-bleu nd'ant cassau feti unu puntu (si funt dèpius acuntentai feti de unu puntu, po ddu narai mellus, chi si praxit de prus), fadendi su contu (e a fai is contus nci poneus sèmpiri pagu meda, e megu a brullai, si cumprendit, berus est?) ca sa partida chi ant giogau in domu de is de s'Oristanese (una de is scuadras chi ddoi funt in dì de oi in sa citadi de Aristanis) s'est serrada cun su resultau finali de cuatru a cuatru, po su spassiu mannu, est craru, e custu est pagu ma seguru, de totus is personas chi funt andadas a su campu a castiai sa partida e, mescamente, a fai su tifu po is duas scuadras. Apustis de cussa partida, peròu, is de su Santeru funt stètius bonus a serrai sa lista de partidas chi tzerriaus "de s'andada" (e chi faint parti, duncas, de sa primu parti de sa stagioni) cun cuatru bìncidas, una avatu de s'atra, partendi de su tres a unu scutu in faci a is de su Sini (una bidda chi fait cincucentus animas, chi funt pagus meda, gei si cumprendit) e ant sighiu cun sa bincida, de importu mannu meda, in domu de is de su Ruinas, cun su resultau de tres a unu; e podeus narai ca sa bìncida est stètia toga meda mescamente chi pentzaus ca is de su Ruinas ant serrau sa stagioni a su segundu postu, cun cincuanta puntus allogaus in buciaca, chi funt seti in mancu de is chi funt stètius bonus a ndi cassai is de su Santeru. E duncas, is ruinesus funt stètius tra is aversàrius prus fortis chi ant tentu is de su Santeru cust'annu, e si cumprendit beni, sa fortza de sa scuadra chi bincit su campionau si cumprendit, mellus, de sa fortza chi ant tentu is scuadras aversàrias. In sa bessida de su dexesseti de su mesi de Idas (s'ùrtima giorronada chi is de sa Segunda Categoria ant giogau, ainanntis de is festas po su Nadali), is de su Santeru iant bintu in domu de is de sa Busachese (sa scuadra chi nd'ant pesau in Busache, gei si cumprendit, deu creu, de su nomini de sa scuadra etotu), cun su resultau de tres a duus (e custu bolit nai, mescamente, ca sa partida no est stètia tra is prus facilis chi ant dèpiu giogai cust'annu). E duncas, serraus, po su chi pertocat is partidas chi faint parti de sa lista de s'andada, cun sa bessida de su trinta de su mesi de Idas (is scuadras de sa Segunda Categoria funt stètias is ùnicas a ndi cabai in campu sa dì ainnantis de s'ùrtima dì de s'annu, chi mi permiteis custu giogu de fueddus!), innoi is de su Santeru ant bintu, aranti de is tifosus cosa insoru etotu, cun su resultau de unu a zeru, contras a is de s'Atzara. A sa torrada in campu apustis de is festas de sa Befana (is giogus, difatis, po su chi pertocat su duamilla e binticuatru, funt torraus a partiri su seti de su mesi de gennàrgiu), is de su Santeru ant bintu cun su resultau de cuatru a unu contras a is de su Gesturi (e custu bollit narai, tra is atras cosas, cumenti si fia arremonendu ainnantis de su restu, ca su giogu de sa bòcia, e a bortas ballit po sa vida puru, si donat sèmpiri una segunda possibbilidadi po fai a biri a totus cantus seus abbilis, e sa cosa toga de una stagioni de partidas, est pròpriu cussa chi ddoi est un'andada e una torrada puru). Is de su Santeru, intzandus, funt arrannèscius a binci contras a is de su Sabarussa, in domu allena (candu fiat su catodixi de su mesi de gennàrgiu) cun su resultau de unu a zeru; in sa partida apustis (sa de su bintunu de su mesi de gennàrgiu) is de su Santeru ant bintu, aranti a is pròprius tifosus, est a nai, duncas, in domu, contras a is de su Lunamatrona, cun su resultau de cuatru a duus. In s'ùrtima bessida de su mesi de gennàrgiu, is de su Santeru ant serrau sa partida chi ant giogau in domu de su Nurachi cun su resultau de unu a unu. Apustis, po su chi pertocat su mesi de friàrgiu, ndi funt arribbadas tres partidas bintas de sighiu, una avatu de s'atra, partendi de cussa contras a is de s'Allai, cun su resultau de duus a unu, passendi po su tres a zeru (fiat sa partida de su dexiotu de su mesi de friàrgiu, in mesu in mesu a is festas po su carrasciale, duncas) scutu a faci a is de su Simaxis, e su binticincu de su mesi de friàrgiu est tocau puru a is de su Meana Sardo, chi ant dèpiu torrai visita a is de su Santeru e nd'ant ingotu cuatru gol. In sa primu partida de su mesi de martzu (ca fiat su tres) is de su Santeru funt arrutus po sa primu borta in sa stagioni, in sa isfida contras a is de s'Arborea, cun is meris de domu chi ant bintu cun su resultau de duus a unu. E si sciit cumenti andant is cosas: candu nd'arruis una borta, intzandus t'agatas sa conca prena de timorias, e a su mancu cussu chi sucedit a mei, iast a podi perdi unu pagheddeddu de sa seguresa in tui etotu. Is de su Santeru, intzandus, ndi funt arrutus a terra puru in sa bessida de su dexi de su mesi de martzu, candu ant giogau in domu de is de s'Oristanese, chi funt stètius bonus a ndi cassai is tres puntus gràtzias a su resultau de unu a zeru. Ma po sa bona sorti de is de su Santeru, is dannus funt acabbaus diaici: est a nai, duncas, ca de su dexesseti de su mesi de martzu is primus de sa classi ant incumentzau torra a binci, partendi de sa partida chi ant gigoau in domu de is de su Sini, e chi s'est serrada cun su resultau de tres a duus; gràtzias, pròpriu, a custus tres puntixeddus, is de su Santerù nd'ant cassau sa seguresa de essi bintu su campionau e, duncas, nd'ant cassau sa seguresa de ndi artziai in sa Primu Categoria, ca si cumprendit, po unu giogadori (e po un allenadori puru, ma ballit, est craru, po totus is personas chi trabballant po s'assòtziu) sa cosa prus toga e spassiosa est pròpriu cussa de podi giogai in unu campionau prus mannu e, si cumprendit, prus dificili puru. Me is ùrtimas tres bessidas de s'annu, peròu (at a essi ca candu no tenis prus famini, cumenti si narat, ti passat sa gana de papai; e duncas, apustis chi ndi cassas su primu postu, fait a narai custu puru, no tenis prus cussa gana bella chi mancai teniàst in sa primu parti de sa stagioni, e chi t'at permìtiu a ndi pesai totu cussu tanti mannu de puntus) is de su Santeru ant pèrdiu po duas bortas: po cincu a unu, in domu cosa insoru etotu (e su de perdi una partida in domu, aranti de is tifosus cosa tua, est sèmpiri, unu pagheddeddu, una bregungia, chi mi permiteis de imboddiai sa cosa diaici), contras a is de su Ruinas; e contras a is de s'Atzara, in s'ùrtima bessida de s'annu (sèmpiri po su chi pertocat su duamilla e binticuatru, si cumprendit), candu fiat su catodixi de su mesi de abrili, cun su resultau de cuatru a unu. E apustis de essi fatu su contu de cumenti funt andadas is cosas, cun custa zuba manna de numerus, sa cosa mellus chi podeus fai (a su mancu po su chi mi pertocat, a su mancu a parri miu, po si ddu narai diaici) est cussa de andai a arraxonai, impari, si cumprendit, apustis de totus is cosas chi m'at contau s'allenadori de is biancus-bleu, Roberto "Bobo" Seu, apustis de sa cursa chi funt stètius bonus a fai, e partendi, pròpriu, de sa bìncida de sa partida in domu de su Sini, po tres a duus, chi est stètia una de is bessidas de importu prus mannu de totu s'annu. E si cumprendit beni su motivu. «Cussa chi eus giogau contras a is de su Sini est stètia, diaderus ddu naru, una partida toga meda: apustis chi apu pòtziu biri cumenti giogant, e fait a narai ca giogant beni meda, custu est pagu ma seguru, deu creu de podi narai ca no si minescint, ma mancu po nudda, su postu chi tenint in sa lista, fadendi su contu chi s'agatant me is partis prus bàscias. Su pecau prus mannu, peròu – at sighiu a mi contai Bobo Sau – est ca sa partida est stètia arrovinada de s'arbitru ca, diaici m'est partu, a su mancu, no nd'at intzertada nemmancu una, cumenti si narat. Po su chi mi pertocat, est stètia sa partida peus, po su chi pertocat s'arbitru, est craru, tra totus cussas chi mi funt capitadas de giogai, de sighiri, in custus ùrtimus dexi annus. Giai giai si nd'arruiànt is bratzus in terra, cumenti si narat, de totus is sbàllius chi at fatu s'arbitru. Is meris de domu funt stètius avantagiadus de is decisionis chi at pigau s'arbitru, e chentza musciai, chentza depi narai nemmancu "mesu bah" cumenti si narat. Po nosu, duncas, no fiat possibbili giogai sa bòcia e andai ainnantis de sa linea de su centrucampu, poita s'arbitru fischiàt sèmpiri po calincunu fallu chi, peròu, biiàt feti issu. Estus potziu serrai sa chistioni acapiada a sa partida giai in su primu tempus, e invècias eus dèpiu cumbati fintzas a s'ùrtimu segundu, ma andat beni diaici, e nci iat a mancai atru puru. Pròpriu po custu depu torrai gràtzias a is giogadoris cosa mia, chi si minescint totus is cumplimentus, est craru, po cumenti si funt scabbullius in campu, po cumenti si funt cumportaus, duncas, poita is cosas fiant unu pagheddeddu grais de sumportai, ddi nau diaici. Seus chistionendi, duncas, de una bìncida chi nd'eus cassau cun is ungas e cun is dentis, cumenti si narat, a trassa de s''italianu etotu». 

Cun cussus tres puntus, duncas, is de su Santeru ant potziu atacai cun sa festa po su primu postu de sa lista e po s'artziada in Primu Categoria. «Chi ti depu narai sa beridadi, no pentzamu de arrannèsci a serrai is chistionis acapiadas a su primu postu, e duncas a sa bìncida de su campionau, cun una bella pariga de partidas ancora de giogai. Naru diaici poita is dannus, is strobbus, mescamente po su chi pertocat sa primu parti de sa stagioni, no funt stètias pagus, fadendi su contu ca no arrascestus a agatai is echilìbbrius giustus. Is piciocus de sa bidda (seus chistiondi, est craru, de Santeru ndr) funt cussus chi ant tentu is strobbus prus mannus, e fortzis poita fiant ancora primaus apustis de nd'essi cabaus de categoria, sa stagioni ainnantis de custa (sa de su duamilla e bintiduus – duamilla e bintitres ndr). Su de t'agatai a trabballai cun un allenadori nou, chi mancai tenit atrus modus po fai allenai sa scuadra, no est mai una cosa facili de nci inguti, ddi nau diaici; serbit tempus po arrangiai totus is cosas, po aderetzai totus is cosas chi, mancai, no andant beni. Nosu, peròu, de su restu, seus partius cun sa bidea de giogai unu campionau de importu: est berus ca nci eus postu una pariga de giorronadas po arrannèsci a agatai is giogadas prus bonas, ma cumenti si seus postus in motu, intzandus no si seus prus firmaus e is cosas si funt andadas beni meda. Ellus, mi dispraxit meda, ma meda, su de essi pèrdiu is partidas contras a is de su Circulu Ricreativu de Arborea e contras a is de s'Oristanese, desinò estus potziu serrai is giogus una pariga de cidas ainnantis de su chi eus fatu». Is de su Santeru si funt fatus pigai de is timorias a una pariga de metrus de sa raja, cumenti si iat a podi narai. «Deu creu de podi narai ca nc'est stètiu calincunu piciocu, tra cussus chi fadiant parti de sa rosa de su Santeru, chi s'est fatu pigai tropu de sa sprama: Cr Arborea e Oristanese, de su restu, tocat a ddu narai, ant giogau duas partidas de importu mannu contras de nosu, e duncas, po incumentzai, podeus narai, puru, ca no ant furau nudda, e nci iat a mancai atru puru. Po su chi pertocat is primus, duncas, podint fai su contu apitzus de una bella biga de giogadoris fortis e de esperièntzia; e sa pròpriu cosa si iat a podi narai de is aristanesus etotu, chi apu sighiu, chi apu allenau, de su restu, mancu a ddu fai aposta, me is stagionis passadas. Funt una scuadra toga e forti, mancai is cosas po su chi pertocat sa lista no siant pròpriu diaici drucis po issus». Is de su Santeru, torrendi a fai is contus apitzus de is numerus chi nd'ant bodditu (chi funt stètius bonus a ndi boddiri, chi si praxit de prus puru cumenti sonat), ant serrau sa stagioni cun s'atacu prus forti de totus, e cun s'atacanti chi nd'at pesau su tanti de gol prus mannu, e seus chistionendi, duncas, de Nicola Orrù, chi est stètiu bonu a ndi cassai calincuna cosa cumenti a bintunu gol in bintises bessidas, e chi torrat, a fai is contus seis bonus a solus, ma s'agiudu deu, giai giai unu gol a partida. «S'atacu est una de is cosas prus togas chi at fatu a biri cust'annu su Santeru, ma nc'est de narai, puru, ca totus is scuadras chi sigu, chi apu sighiu in totu custu tempus, in atacu arrannescint sèmpiri a fai a biri cosa bonas meda. Orrù est, custu est pagu ma seguru, unu de is piciocus de importu prus mannu chi ddoi funt in sa rosa cosa nosta, ma at giogau impari a giogadoris fortis cumenti a Pili, Cugusi, Cossu e Putzolu; is centrucampistas, cumenti ddus ia a podi tzerriai, funt stètius bonus, de su restu, a ndi pesai unu bellu tanti de gol. Ma chi depeus narai is cosas cumenti funt, fait a narai ca s'atacu cosa nosta fiat diaderus unu de is prus fortis in custa lista, e duncas, is cosas si funt andadas beni po custu motivu, pruschetotu». 

Tra totus is partidas chi is de su Santeru funt arrannèscius a binci in custa stagioni, Sau ndi scerat una: «Cussa chi s'at agiudau a crei de prus apitzus de nosu etotu, chi s'at agiudau a curri ancora prus a forti de su chi festus fadendi, est stètia cussa contras a is de su Busachi, chi eus giogau giai a sa fini dpo su chi pertocat sa lista de partidas de s'andada, ainnantis de is festas po su Nadali. In cussu momentu issus s'agatànt a su segundu postu, a tres puntus de nosu, fadendi su contu, pruschetotu, ca nosu nd'arribbastus apustis de essi giogau sa partida, tostada e fadiosa meda, in domu de is de su Ruinas. Pròpriu in cussas duas partidas, eus cumprèndiu totu su chi ballestus, eus cumprèndiu su chi podestus e sciestus fai. Me is partidas avatu funt arribbaus otu resultaus bonus meda, cun seti partidas bintas e feti una chi s'est serrada cun su resultau in paridadi. Pròpriu custas otu partidas s'ant agiudau, e meda puru, s'ant permìtiu, duncas, po ddu narai mellus, de ndi cassai su primu postu de sa lista e, duncas, s'artziada in su campionau de sa Primu Categoria». 


Attività realizzata col contributo della Regione Sardegna - IMPRENTAS 2023-2024. LR 22/2018, art. 22