Arragodus: festa manna po is de sa FC de s'Alighera, sa scuadra prus forti in sa Lista E de su campionau de sa Segunda Categoria

E duncas, a cantu parit, nci seu po custa cida puru, mancai totu sa basca chi est fadendi e chi intendu (e deu creu ca sa cosa potzat balli po bosatrus puru), mancai mi intenda unu pagheddeddu fadiau (e nci iat a mancai puru, ca candu unu trabballat apustis si intendit unu pagheddeddu stracu, e cumenti podeis biri a solus, a mei tocat a trabballai, mancai feti unu pagheddeddu, candu is atrus, po su prus, funt spassiendusì in logu de mari o de montagna), e mancu mali, mi megu a solu a solu, ca su trabballu miu, a s'acabbada, est feti cussu de cracai butoneddus, mancai a totu dì, cumenti mi sucedit de fai a bortas, a segunda de totu su chi nc'est de fai. E mancu mali, mi megu a solu a solu, ca no depu abarrai a totu dì asuta de su sobi forti (cumenti cussus piciocheddus chi bivint innoi in sa bidda mia etotu, e seu chistionendi de Bidd'e Sorris, cumenti s'apu narau giai una bella pariga de bortas, e chi trabballant me is sartus e passant is giorronadas, mancai, a boddiri o a prantai is ochiellus, ca cussu eia chi est unu trabballu fadiosu meda, su Cielu ddus agiudit!), e mancu mali, mi megu a solu a solu, ca su trabballu cosa mia no m'arrogada su corpus in milli arrogheddus (cumenti iat a podi fai su trabballu de su muradori, o su trabballu de cussus chi sperrant sa linna chi serbit po fai su fogu, po nd'arremomai feti una pariga), fadendi su contu ca depu manigiai feti is didus. E duncas, po primu cosa, cumenti mi capitat de fai fatu fatu, no potzu fai atru, po incumentzai, che torrai gràtzias a su Cielo: siat po su fatu ca oi puru mi intendu beni, chentra tropus daboris, e siat po su fatu ca tèngiu unu trabballeddu (gràtzias a Deus, si iat a podi narai diaici puru) ca mi permitit, ca m'agiudat a mi ndi scabulli de totus is ispesas chi tèngiu de sighiri (e chi no funt medas, a nai sa beridadi, fadendi su contu ca, custu est pagu ma seguru, no fatzu sa vida de unu rei, fadendi su contu ca ddoi funt totu una biga de cosas chi po mei no tenint nesciunu importu, partendi de is bistiris (no mi praxint is bistiris chi, mancai, costant una barca, una surra de dinai, est a nai, duncas, ca arrannèsciu a m'acuntentai cun su pagu, e custa mi parit una fortuna manna meda, chi pròpriu si depu narai cumenti dda pentzu), no bufu bevidas chi tenint àrculu (cumenti si narat, e cumenti si scriit, in sa lingua cosa nosta) e no mi praxit duncas nè abarrai sètziu po tant'oras a su bar, e no mi praxit nemmancu a andai in giru a papai aforas me is tialus de restorantis (cumenti ddus tzerrias, a trassa de s'italianu), no consumu tabbacu, no mi praxint (ma mancu po nudda...) cussus tialus de telefunus chi seus costumaus a manigiai in dì de oi, ca abarrant diaici mannus ca parint fentanas de cresia; si potzu fintzas aciungi, de su restu, ca de su duamilla e bintiduus, chi est s'annu innoi apu fatu, po sa segunda borta de sighiu in vida mia, cussu chi si tzerriat "Caminu de Santiago" nc'apu fuiau sa machina (a casinu! Cumenti si iat a podi narai) e immoi mi movu feti a pei (una de is cosas chi mi praxit fai de prus) e cun is mezus pubbricus, cumenti si iant a podi tzerriai is trenus e is pulman. E duncas, si naru totu custu po si fai a cumprendi ca is spesas ca depu sighiri, ca depu atendi no funt diaici mannas: de su restu no apu mai domandau a su Cielu (e no ddu apa a fai nemmancu oi) de benni a essi su cristianu prus arricu ca s'agatat in s'isula in dì de oi, antzis, prus de su dinai apu sèmpiri donau importu a su tempus (su tempus libberu, cumenti si iat a podi tzerriai, a trassa de s'italianu etotu), su tempus duncas ca arrannèsciu a scapiai de su trabballu etotu. E gràtzias a su Cielu, tèngiu unu pagheddeddu de tempus, dònnia dì, po podi sighiri is fainas chi mi praxint de prus in custa vida, partendi, po incumentzai, pròpriu de su studiu de sa filosofia, ca est una cosa chi fatzu (e chi sigu a fai) de candu seu unu piciocheddu piticu meda, e duncas, de is tempus de is scolas superioris, cumenti si tzerriant, e fintzas po totus is annus chi apu passau a s'universidadi. E su tempus, ddu narat su dìciu puru, a sa fini, a bortas ballit cantu (chi no de prus) de su dinai etotu, e duncas deu mi potzu intendi, po diaderus ddu seu narendi, arricu e prexau, feti po tenni sa possibbilidadi, unu pagheddeddu dònnia dì, de liggi calincunu libbru bonu e, mescamente (no m'apa a arrosci mai de ddu arrapiti e de si ddu arrapiti, duncas) unu pagheddeddu de tempus chi mi serbit po arraxonai apitzus de totus is cosas chi lìgiu e chi, a sa fini de sa partida, ddi nau diaici, mi abarrant badda badda in conca, po oras, po diis, po cidas interas e fintzas po mesis. E duncas, apustis chi s'apu contau totu custu, si potzu narai puru ca mi intendu fortunau meda (basau de sa bona sorti, si iat a podi narai diaici puru, sèmpiri chi mi permiteis de giogai a fai unu pagheddeddu su poeta in un artìculu chi iat a depi chistionai de resultaus de partidas, de gol e de campionaus) a podi guadangiai cussus cuatru arriabeddus chi mi serbint gràtzias a s'arti de su scriri (ddi nau diaici...), e duncas, cun sa lingua sarda (fadendi su contu, e mi parit bastanti craru, ma no si podit mai sciri, ca scriu in italianu e in sardu puru). 

Ellus, si ddu fia arremonendu ainnantis, no tèngiu nudda de murrungiai apitzus de su trabballu chi fatzu, antzis; no est fadiosu cumenti iat a podi essi su trabballai in miniera (po nd'arremonai unu), no at a essi fadiosu cumenti est su trabballu de su paneteri in su forru de su pani, no at a essi fadiosu cumenti est su guidai, po oras e oras e oras de sighiu unu camiu (cumenti si narat, in sardu) ma a sa fini, cumenti totus is trabballus, e cumenti totus is chi trabballant, a sa fini de sa dì (e pruschetotu a sa fini de sa cida de trabballu, ca po mei est su cenabara, fadendi su contu ca is partidas torrant a incumentzai giai de su sabudu, e is scuadras ndi cabant in campu su domìnigu, po su prus) seu stracu deu puru, mancai no meda, mancai chentza tropus daboris. Su trabballu cosa mia, duncas, mi fadiat sa conca: est a nai ca depu scriri una surra manna de rigas dònnia dì (ma de su restu, ddu apu pediu deu etotu, a su Cielu, de podi benni a essi unu giornalista, ca fiat unu de is bisus prus mannus ca sa bon'anima de mamma mia teniat po mei), dònnia cida, e tocat a narai puru ca su trabballu ca fadeus cun is cumpàngius cosa mia, po su giàssu de su Diàriu Sportivu, no est pagu, fadendi su contu ca po otu-noi mesis sigheus (si tocat a sighiri, chi si praxit de prus, mancai, cumenti sonat) is fainas de is scuadras sardas de diletantis (chi funt cussus, duncas, chi giogant e faint sport no po trabballu, no po incasciai una barca de dinai, cumenti faint, de su restu, is grandus campionis de sa Sèrie A, ma feti po su sprèviu, po su spàssiu chi ndi tenint): e in Sardìnnia, in dì de oi, nci funt cincu campionaus, e nosu cun su giàssu de su Diàriu Sportivu ndi sigheus cuatru apitzus de cincu, partendi de su campionau de s'Ecellenza (chi est cussu de importu prus mannu tra totus cussus chi si giogant, poita chini ddu bincit ndi artziat in Sèrie D), passendi po su campionau de sa Promotzioni e su campionau de sa Primu Categoria puru, e fintzas a arribbai, duncas, a su campionau de sa Segunda Categoria (chi est su prus piticheddu tra totus cussus chi sigheus, fadendi su contu ca sa de Tres categorias, po una chistioni acapiada a su tempus, su tempus chi no teneus, su tempus chi no si bastat mai po fai totu su chi estus a bolli, no arrannèsceus a dda sighiri). 

E duncas, po si fai a cumprendi mellus cumenti funt cuncodradas is cosas, si potzu narai, in prus de su chi apu narau fintzas a immoi, ca cust'annu su campionau de sa Promotzioni est stètiu pretzidu in duas listas (s'annu passau fiant tres, cumenti fiant tres in su duamilla e bintiduus puru), su campionau de sa Primu Categoria, invècias, est stètiu pretziu in cuatru listas, e cussu de sa Segunda Categoria est stètiu pretziu in seti listas. 
E duncas, su trabballu cosa mia no at a essi diaici fadiosu (ita nci bolit a cracai cuatru butoneddus in sa tialu de sa tastiera? S'at a megai calincunu de bosatrus), e teneis arraxoni, ma a sa fini su chi pigat unu pagheddeddu a conca (immoi si ddu scoviu, ma si promitu puru, immoi chi nci seu, chi si nd'apa a furai pagu tempus), cumenti si narat, est cussu de depi abarrai a scriri, prus o mancu e giai sèmpiri, sèmpiri de is pròprias cosas. 
E immoi si fatzu un esèmpiu po si fai a cumprendi cumenti andant is cosas "in domu mia" (m'est beniu de ddu narai diaici): a sa fini de sa stagioni, e custa cosa andat ainnantis giai de una bella pariga de annus, chi si depu narai sa beridadi, seus costumaus a chistionai, me is artìculus chi ndi pesu in sardu e, mescamente, me is artìculus chi ndi bessint aforas me is tres mesis de s'istadi, de totus is scuadras chi ant bintu su campionau cosa insoru, e mi parit giustu puru, fadendi su contu, de su restu, ca su de binci praxit a totus, a is diletantis puru, e no feti a is professioneris, mi parit bastanti craru. E duncas, su chi mi tocat a fai in s'istadi, est cussu de ndi pesai un artìculu po dònnia scuadra chi at bintu su campionau cosa sua (e a fai su contu, ddoi funt catodixi listas de sighiri, partendi de s'Ecellenza e arribbendi a sa Lista G de sa Segunda Categoria, su contu si ddu apu giai fatu ainnantis): chi si depu narai sa beridadi, mi intendu, a bortas, cumenti cussus cantantis chi, mancai, tenint binti-binticincu cuncertus de fai, e duncas, si cumprendit, in dònnia cuncertu is cantzonis de fai, de sonai, de cantai funt sèmpiri is pròprias, ma chi unu cantanti est bravu, intzandus cantat is cantzonis cosa sua in sa manera mellus chi podit, mancai fetzat sa pròpriu musica (cumenti si iat a podi narai) dònnia dì. E duncas, si domandu de tenni unu pagheddeddu de passièntzia chi si nd'apu furau su tempus chi mancai no teneis cun totus custus strollichiminis, ma chi seis costumaus a ligi is artìculus chi ndi pesu in sardu, dònnia giòbia (chi nd'eis lìgiu a su mancu unu, cumenti si iat a podi narai), scieis beni ca impari a is chistionis acapiadas a su mundu de is giogadoris diletantis, fatu fatu (po no narai sèmpiri...) nci sticu aintru cussus cuatru o cincu contixeddus, cun s'ispera de ndi cassai s'atentzioni, fadendi diaici, de cussas personas puru chi, mancai, no funt acapiadas a strintu cun is fainas chi pertocant is assòtzius de càlciu chi ddoi funt spratus, giai giai in dònnia bidda e in dònnia citadi de s'isula. 
De su restu, no sciu mai, ainnantis de mi ponni a ddu fai, cali legas apa a pigai me is artìculus, ma gràtzias a su Cielu, calincuna cosa dda piscu sèmpiri. E deu creu chi s'at a fai prexei a intendi, a ligi, a sciri ca po oi puru cun is stròllichiminis eus acabbau (e fiat ora puru! S'at a megai calincunu de bosatrus) e duncas, si nci podeus fuiai, a fundu 'e susu, me is chistionis chi pertocant sa Lista E de su campionau de sa Segunda Categoria. E cumenti fatzu dònnia dònnia borta, po incumentzai (a trassa de cussus cantantis, torra cun cun cust'esèmpiu, chi incumentzant su cuncertu cosa insoru sèmpiri cun sa pròpriu cantzoni) deu creu ca sa cosa mellus chi si podit fai est cussa de andai a castiai, impari, si cumprendit, is numerus ca is scuadras nd'ant pesau, partendi, duncas, da is puntus chi tenint in sa lista. E duncas, a su primu postu de sa Lista E (chi est cussa chi apu scerau po custa cida, gei ddu eis a cumprendi) agataus is de su FC Alghero, chi funt una de is duas scuadras chi nd'ant pesau cust'annu in sa citadi de s'Alighera (e chi, tra is atras cosas, est unu de is logus prus bellus chi ddoi funt in s'isula cosa nosta, e funt unu de is logus chi si prenint de prus, fintzas a cucuru, de turistas). 
E duncas, totus is personas chi bivint in s'Alighera, e chi signint is fainas de is duas scuadras de càlciu, cust'annu si funt spàssiaus meda, fadendi su contu ca is de s'Alghero (sa scuadra prus manna tra is duas) ant serrau su campionau de sa Promotzioni, po su chi pertocat sa Lista B, a su segundu postu, a is pabas de is de sa Nuorese, e fadendi su contu ca is de su FC Alghero ant bintu su campionau cosa insoru, mancai siat cussu de sa Segunda Categoria. 
E duncas, is de sa Fc Alghero funt stètius bonus a ndi cassai calincuna cosa cumenti a setantatres puntus, chi ndi funt arribbaus gràtzias a binticuatru partidas bintas e una partidedda feti chi s'est serrada cun su resultau siddau in paridadi (cumenti mi praxit a narai). A su segundu postu, invècias, e megu a chistionai sèmpiri de sa Lista E de sa Segunda Categoria (si cumprendit, berus est?) agataus is de su Botidda, chi ant serrau sa stagioni cun setantunu puntus in buciaca, e chi funt, a fai is contus nci poneus pagu meda, feti duus in mancu de is chi nd'ant cassau is primus de sa classi. Fait a narai puru, sighendi a castiai sa lista, ca is duas scuadras (seus chistionendi sèmpiri de is de s'FC Alghero e de su Botidda) ant lassau feti is pimpirillas (cumenti si narat in italianu puru), fadendi su contu ca a su de tres postus in sa lista agataus is de su Cullieri, chi ant serrau sa stagioni regulari (cumenti eus incumentzau a dda tzerriai, nosu puru, a trassa de is ingresus etotu) cun calincuna cosa cumenti a corantotu puntus, chi funt calincuna cosa cumenti a binticincu in mancu de is chi tenint is primus de sa classi, e no funt pagus. Duncas, sa cosa chi podeus narai acoitu est ca is de su FC Alghero funt arrannèscius a ndi cassai sa bìncida de su campionau feti a sa fini de s'ùrtima partida; nci funt stètias scuadras, mescamente in su campionau de sa Primu Categoria (ma sa chistioni ballit, puru, po sa Lista A de sa Segunda Categoria, po nd'arremonai una) chi ant serrau is giogus candu nci fiant, ancora, unu bellu tanti de partidas de giogai, ma nci ndi funt stètias atras chi ant dèpiu curri, fadiai e sudai fintzas a s'ùrtimu segundu, e custu est stètia sa storia de is grogus-arrùbius. Sa fortza de una scuadra chi bincit su campionau e chi ndi cassat su primu postu de sa lista, si cumprendit mellus andendi a castiai cantu funt stètius fortis is aversàrius, e is de su Botidda si funt arrèndius feti me is ùrtimus minudus de sa stagioni, poita, de su restu, funt sèmpiri abarraus apicigaus a is carronis de is de sa Fc de Alghero (cumenti si iat a podi narai, a trassa de s'italianu etotu). 

E duncas, arribbaus a custu puntu, sa cosa chi mi benit de fai (e chi apu fatu puru po totus is atras scuadras chi ant bintu is campionaus cosa insoru) est cussa de andai a castiai, impari a bosatrus, si cumprendit, cumenti funt andadas is cosas, giorronada po giorronada, a is de su Fc de Alghero. 
Duncas, sa primu bessida de sa stagioni de su duamilla e bintitres – duamilla e binticuatru s'est giogada su primu de su mesi de ladàmini (sa primu dì de su mesi de ladàmini, po ddu narai mellus puru) e is grogus-arrùbius ant fatu a biri, fintzas de sa primu partida, cantu fiant fortis, fadendi su contu ca sa partida contras a is de su Norghiddò s'est serrada cun su resultau, bellu e tundu tundu tundu, de dexi a zeru. In sa partida de sa cida apustis, cussa de su otu de su mesi de ladamini, is de s'Alghero ant bintu, torra, contras a is de Su Burgu, in domu allena, cun su resultau finali de tres a unu. In sa de tres bessidas de s'annu (chi s'est giogada su cuindixi de su mesi de ladamini, est craru) is de s'Alghero funt arrannèscius a binci, cun su resultau togu meda de cincu a unu, contras a is de su Cullieri (chi, tra is atras cosas, eus arremonau pròpriu immubagora). Su bintiduus de su mesi de ladamini, invècias, is de s'Alghero nd'ant cassau sa de cuatru bìncidas de sighiu, gràtzias a su duus a zeru chi funt stètius bonus a ndi pesai in sa partida chi ant giogau, in domu cosa insoru etotu, contras a is de sa Calmedia de Bosa. Is cosas ddis funt andadas beni meda fintzas a sa de noi giorronadas, fadendi su contu ca su bintinoi de su mesi de ladamini (s'ùrtima bessida po su mesi) is de s'Alghero iant bintu, cun su resultau de tres a zeru, in domu de is de sa Bolotanese (sa scuadra chi nd'ant pesau in Golothene, po essi prus crarus) and apustis, in sa primu bessida de su mesi de donniassantu (cussa de su cincu) ant bintu, aranti de is tifosus cosa insoru etotu, sa partida chi ant giogau contras a is de su Minerva. A sa de seti bessidas (chi s'est giogada su doxi de su mesi de donniassantu) is de s'Alghero nd'ant cassau atrus tres puntus prenus (cumenti si iat a podi narai) in sa partida chi ant dèpiu giogai in domu de is de su Bortigale; a sa de otu bessidas, chi s'est giogada su dexennoi de su mesi de donniassantu, is de s'Alghero ant scutu a faci de is de su Treselighes tres bussinadas (cumenti si iat a podi narai, fadendi su contu ca sa partida s'est serrada, nc'eis a arribbai mancai a solus puru, cun su resultau de tres a zeru). A sa de noi bessidas (chi s'est giogada su bintises de su mesi de donniassantu, e duncas fiat s'ùrtima bessida po su chi pertocat su de undixi mesis de s'annu) is de s'Alghero ndi funt arrutus a terra po sa prima, e ùnica borta, fait a ddu narai, in custu campionau, in sa partida chi ant giogau pròpriu contras a is de su Botidda, cun is meris de domu chi ant bintu cun su resultau de duus a unu. Is allenadoris, de su restu, mi contant, fatu fatu meda, ca is surras chi ndi boddis, a bortas serbint po ti donai sa isvèllia (chi cumprendeis su chi si bollu narai...) est a nai ca su de perdi una partida podit essi de agiudu, po ti permiti de curri mancai prus a forti de su chi fiast fadendi. E is de s'Alghero funt torraus a partiri, diaderus, prus a forti de su chi fiant fadendi, chi est berus chi ant bintu sa partida de su tres de su mesi de idas, e chi ant giogau in domu cosa insoru, contras a is de su Sedilo, cun su resultau, togu meda, fait a ddu narai, de seti a zeru. Is cosas funt andadas beni meda aguali puru in sa partida de sa cida avatu, sa de su dexi, candu ant giogau in domu de is de su Thiesina (una de is duas scuadras chi ddoi funt in dì de oi in Tiesi), cun su resultau de otu a zeru (po cuindixi gol pesaus in centu e otanta minudus, e no funt pagus de seguru, gei ddu eis a cumprendi bosatrus puru). In sa de doxi bessidas de s'annu, cussa de su dexesseti de su mesi de idas, is de s'Alghero ant bintu contras a is de sa Junior Ozierese (una de is duas scuadras mannas chi ddoi funt in Otieri), cun su resultau de cincu a unu, e ant serrau sa lista de is partidas chi ballint po s'andada (cumenti seus costumaus a tzerriai sa primu parti de su campionau) cun su duus a tres chi ant scutu in faci a is meris de domu de su Borore. E duncas, no nc'est atru de fai ca andai a castiai, puru, immoi chi nci seus, est craru, cumenti ddis funt andadas is cosas po su chi pertocat is partidas de sa torrada. Sa primu bessida apustis de is festas, seus chistionendi de is partidas chi si funt giogadas su seti de su mesi de gennàrgiu, chi est sa dì apustis de sa festa de sa Befana, is de s'Alghero ant torrau sa visita a is de su Norghiddò, e nd'ant cassau is tres puntus gràtzias a su resultau de cuatru a zeru; in sa partida de su catodixi, sèmpiri de su mesi de gennàrgiu, nd'ant cassau sa bìncida contras a is de Su Burgu cun su resultau de cincu a duus; a sa de tres bessidas, seus chistionendi de sa partida chi s'est giogada su bintunu de su mesi de gennàrgiu, is de s'Alghero ant bintu po cuatru a tres in domu de is de su Cullieri e apustis ant bintu cun su resultau de duus a tres in domu, puru, de is de su Calmedia Bosa. Po sa de cincu bessidas de sa lista de partidas de sa torrada, chi s'est giogada su cuatru de su mesi de friàrgiu, is de s'Alghero ant bintu, cun su resultau de cuatru a unu, contras a is de sa Bolotanese; su dexiotu de su mesi de friàrgiu, intzandus, nd'est arribbada sa bìncida in sa partida in domu de is de su Minerva, cun su resultau, togu meda, de tres a zeru. Totu beni, duncas, in sa bessida de su binticincu de su mesi de friargiu puru (sa de seti bessidas de sa torrada, po essi prus pretzisus puru, e unu giornalista, chi bolit fai beni su trabballu cosa sua, depit essi pretzisu, po su chi fait), candu is de s'Alghero iant bintu in domu cosa insoru contras a is de su Bortigali, cun su resultau de duus a zeru. In sa primu bessida de su mesi de martzu (chi s'est giogada su tres), is de s'Alghero ant bintu sa partida contras a is de su Treselighes cun su resultau, bellu e tundu tundu tundu, de cincu a zeru; a sai de noi bessidas, duncas, is de s'Alghero ant dèpiu torrai sa visita a is de su Botidda (chi funt stètius is unicus a bati is primus de sa classi), cun sa partida de sa torrada chi, peròu, s'est serrada cun su resultau de unu a unu. Me is ùrtimas cuatru partidas de s'annu, duncas, is de s'Alghero nd'ant cassau calincuna cosa cumenti a doxi puntus (est a nai, duncas, chi ddas ant bintas totus), partendi de sa bìncida chi nc'ant tzacau (mi benit de ddu narai diaici, po manigiai unu fueddu chi imperastus tra piciocheddus etotu, candu festus pitichinninnius) in domu de is de su Sedilo etotu, cun su resultau finali de tres a zeru. Sa partida chi is de s'Alghero ant giogau contras a is de sa Thiesina, invècias, s'est serrada cun su resultau de cuatru a zeru e in sa de doxi bessidas (sèmpiri po su chi pertocat sa lista de partidas de sa torrada, mi parit craru puru) is de s'Alghero ant bintu contras a is de sa Junior Otierese cun su resultau, togu meda, de seti a unu. In s'ùrtima bessida, intzandus (e seus chistionendi de sa partida chi s'est giogada su catodixi de su mesi de abrili) is de s'Alghero ant bintu, aranti de is tifosus cosa insoru, contras a is de su Borore, cun su resultau de duus a zeru. E cun su contu de is partidas eus acabbau. E immoi, deu pentzu ca sa cosa mellus ca podeus fai (e de su restu, est cussu chi apu fatu fintzas a oi, candu apu chistionau de totus is atras scuadras puru chi nd'ant cassau sa bìncida in su campionau cosa insoru) est cussa de andai a arraxonai impari, sighendi totus is cosas chi m'at scoviau e m'at contau s'allenadori de is grogus-arrùbius, Peppone Salaris, chi nd'at pigau is crais de sa scuadra a su postu de Pipo Zani, chi in su mesi de donniassantu at dèpiu lassai su trabballu cumenti chi fessit fatu e acabbau, poita at tentu strobbus cun su trabballu cosa sua (chi, si cumprendit, no est cussu de fai s'allenadori, po torrai a s'apicai, mancai, a sa chistioni chi apu pigau ainnantis apitzus de su mundu de is diletantis). 
E duncas, cun Salaris eus incumentzau a chistionai de sa stagioni chi nd'ant pesau is de s'Alghero, partendi pròpriu de s'ùrtima bessida, cussa innoi nd'ant cassau is ùrtimus tres puntus de s'annu, cussus chi funt sèrbius, duncas, po ndi cassai sa bincida de su campionau. «Cussa chi eus giogau contras a is de su Borore, chi ant serrau sa stagioni a su de cuatru postus, est stètia una partida tostada meda, fadendi su contu ca, cumenti est giustu, is aversàrius cosa nosta no s'ant regallau nudda. Antzis. Nd'est bessida aforas, duncas, una sfida toga, chi is duas scuadras in campu ant circau de binci in dònnia manera. No ti potzu cuai ca tenestus unu pagheddeddu de sprama, fadendi su contu ca po nosu cussus tres puntixeddus chi ddoi fiant badda badda in campu fiant grais de timi, cumenti si iat a podi narai, fadendi su contu, pruschetotu, ca si serbiant po bìnci su campionau e, mescamente, po si lassai a is pabas is de su Botidda. Si cumprendit, puru, ca no si podestus permiti de sballiai nemmancu un mesu vìrgula, cumenti si narat, e mancai seus stètius bonus a agatai su gol de s'unu a zeru acoitu, eus tentu sa timoria de incasciai unu gol fintzas a is ùrtimus segundus de sa partida. Ma una borta chi seus arrannèscius a ndi cassai su segundu gol puru, intzandus is cosas si funt postas beni. Me is ùrtimus seti minudus de sa partida eus giogau cun su coru selenu, poita estus cumprèndiu ca po sa bìncida de su campionau fiat giai totu fatu. E mancu mali puru, ti nau deu». 
Is de su Botidda, duncas, si funt dèpius acuntentai (ddi naraus diaici) de su segundu postu in sa lista, ma tocat a narai, puru, ca is arrùbius-brau nc'ant provau, cumenti si narat, fintzas a sa fini de sa stagioni a si lassai a is pabas is de s'Alghero. Chi is tifosus ant potziu biri una batalla diaici toga po su primu postu, duncas, est gràtzias, mescamente, a is de su Botidda: chentza de issus, si cumprendit, sa stagioni, su campionau e sa cursa concas a sa Primu Categoria iant a essi stètias meda ma meda prus pagu spàssiosas de su chi funt stètias. 
E Peppone Salaris m'at contau, apitzus de sa cosa: «Si iant a minesci de nd'artziai in Primu Categoria impari a nosu etotu, feti po totu su de bonu chi ant fatu a biri cust'annu; seus chistionendi de una scuadra forti, forti cantu seus stètius fortis nosu. Eus fatu una cursa toga meda contras a un aversàriu chi s'est giogau totus is cartas chi teniàt me is manus, in una cursa chi est acabbada feti me is ùrtimus minudus de sa stagioni. Nosu, chi boleus fai mellus is contus, nd'eus pesau calincuna cosa cumenti a binti gol in prus de su tanti chi nd'ant fatu issus, ma cun custu no bollu narai ca siant stètius prus dèbbilis de su chi seus stètius nosu. Sa bìncida de su campionau fiat apicada a unu filu, cumenti si narat; sciestus puru ca po ndi cassai su primu postu de sa lista depestus circai de no sballiai giai nudda; issus nd'ant bodditu feti unu puntixeddu, in sa partida chi ant giogau contras a is de su Cullieri, chentza de fai nemmancu unu gol, e cussus duus puntixeddus chi ant lassau in sa bia, cumenti si narat, ant fatu sa diferèntzia, a sa fini de is giogus». 
Is de s'Alghero, tra is atras cosas, ant potziu fai su contu apitzus de un atacu forti meda. «Seus stètius sa scuadra chi nd'at pesau su tanti de gol prus mannus, no feti innoi in Sardìnnia ma po su chi pertocat totus is scuadras chi ddoi funt in Italia, e chistionaus sèmpiri, mi parit craru puru, de su mundu de is diletantis. Ma puru s'annu passau, in su campionau de sa de Tres Categoria, custa scuadra fiat arrannèscia a ndi pesai unu bellu tanti de gol, una biga manna. Nareus puru ca su de ndi pesai unu muntoni de gol fait parti de is calidadis prus bonas chi tenit custa scuadra». 
E Peppone Salaris fait is contus: «Cherchi, chi est stètiu su giogadori chi nd'at pesau su tanti de gol prus mannu in sa lista cosa nosta, at serrau sa stagioni cun bintises gol fatus; Pintus invècias nd'at pesau calincuna cosa cumenti a bintunu, po no chistionai de Nemore, chi nd'at fatu calincuna cosa cumenti a a doxi e Serra, chi nd'at pesau calicuna cosa cumenti a catodixi. In cuatru, duncas, funt stètius bonus a ndi pesai calincuna cosa cumenti a setanta gol. Seus chistionendi de unu muntoni mannu de gol, si cumprendit beni, berus est?». 
Candu bincis unu campionau, si cumprendit beni, s'afròddiu benit a essi mannu meda. E Salaris m'at contau, apitzus de sa chistioni: «Me in totus custus annus passaus mi fiat giai sucèdiu de binci unu campionau, ma cumenti a segundu allenadori, candu trabballamu impari a Cuccureddu (chi est stètiu unu de is allenadoris cun s'esperièntzia prus manna chi eus tentu in su mundu de su càlciu de sa Sardìnnia, ma sa cosa ballit po su restu de s'Italia puru, e seus chistionendi, sèmpiri, est craru, de su mundu de is diletantis ndr); duncas custu, a fai beni is contus, est su primu campionau chi arrannèsciu a binci, apustis de essi pèrdiu sa finale de is playoff a is tempus de s'Atleticu de Uri, chi balliat po ndi artziai in su campionau de sa Sèrie D. Seu prexau, est craru, e potzu narai ca in sa bìncida de custu campionau nci funt puru, est craru, is bideas cosa mia e totu su trabballu chi nd'apu pesau impari a is piciocus cosa mia etotu. S'allenadori tenit unu rolu de importu mannu meda aintru de una scuadra, ma su trabballu prus mannu, duncas, ddu faint is giogadoris, chi m'ant sighiu, in totu, po totus custus mesis de sighiu, chentza de sartai nemmancu un allenamentu, cumenti chi fessint giogadoris professioneris e no giogadoris diletantis. Unu piciocu, candu trabballat o studiat, depit fai una biga manna meda de sacrifìcius, si cumprendit beni, po sighiri is fainas de sa scuadra: e depeis fai su contu ca nosu s'atobiastus fintzas po tres bortas in una cida po cuncodrai is allenamentus, una cosa ca deu creu, in totu su campionau de sa Segunda Categoria ant fatu pagus scuadras. Is giogadoris funt stètius su motori chi at permìtiu a s'assòtziu de ndi artziai in Primu Categoria. Chi depu giogai a fai su maistu e chi pròpriu depu donai unu votu, deu creu ca is de s'Alghero cust'annu si siant minèscius unu dexi in sa pagella, cumenti si narat po is piciocus chi andant a scola». 
Sa cursa de s'Alghero est stètia, custu est pagu ma seguru, toga meda, ma Salaris tenit in conca duas o tres partidas chi funt stètias de importu prus mannu po ndi cassai sa bìncida de su campionau de totus is atras. «Deu creu chi est stètiu pròpriu in sa partida chi eus giogau contras a is de su Cullieri chi eus cumprèndiu, diaderus, cantu festus fortis, fadendi su contu ca festus perdendi, cun su resultau de tres a duus, fintzas a dexi minudus de sa fini, ma tocat a narai ca in sa primu parti de sa partida festus arrannèscius, comentecasiat, a fai cosa bonas e a ndi pesai duus gol. Su gol chi est bàlliu po su tres a tres nd'est arribbau pròpriu me is ùrtimus segundus de giogu, invècias su gol de su cuatru a tres, cussu chi s'at permìtiu, a sa fini, de ndi cassai is tres puntus. In cussa partida, duncas, deu creu chi si siat bida totu sa fortza cosa nosta, sa gana chi tenestus de bìnci, sa barrosia, chi mi permitis de manigiai custu fueddu. Sa truma de giogadoris cosa nosta, sa dì, pròpriu no ndi boliat intendi nudda de perdi sa partida, ma nemmancu de dda acabbai cun su resultau siddau in paridadi. Deu creu chi, po su chi pertocat su carateri, a su mancu, cussa contras a is de su Cullieri siat stètia una de is partidas de importu prus mannu chi eus giogau cust'annu».
 

Attività realizzata col contributo della Regione Sardegna - IMPRENTAS 2023-2024. LR 22/2018, art. 22