Is giogus si torrant a studai a su mancu fintzas a su binticuatru de su mesi de Donniasantu

Su dannu chi totus fiant timendi, si nd'est arrutu in conca, grai cumenti a unu cropu de perdigoni: is giogus de is diletantis si funt torraus a firmai, a su mancu fintzas a su binticuatru de su mesi de Donniasantu, cumenti si ligit in su decretu bogau de is de su Guvernu e bessiu aforas pròpriu me is ùrtimas diis.

A nai sa beridadi, giogadoris e allenadoris unu pagheddu si dh'abetànt, poita dònnia domìnigu sartànt giai calincuna cosa cumenti a su binticincu po centu de is partidas chi s'iant a depi giogai, e totu po crupa, est craru, de su spaniamentu de su virus.

In dii de oi, podeus narai ca, de siguru, at a essi una stagioni traballosa meda, fortzis prus de cussu chi penzàstus in su mesi de Cabudanni, e imoi si cumprendit mellus su poita. Torrai a allui is campionaus apustis de s'assètiu (su chi in ingresu si narat "lockdown") no est stetia una passillada, cun is squadras chi ant depiu diaderus fai is sartidus mortalis, e dhu scieus beni, po sighiri totus is fainas e is règulas arrecumandadas, in s'istadi, de is de su Cumitau Tecnicu Scientificu.

Is presidentis, impari a is atrus sotzius, ant spendiu dinai e nc'ant postu su coru, sa passièntzia e, cosa de importu prus mannu, su tempus, po sighiri a andai ainnantis cun cussa chi est una passioni, est berus, ma abarrat comentecasiat feti unu giogu.

E imoi, sa batalla prus manna at a essi arrannesci a dhus acabai, is giogus: fadendi is primus contus, difatis, nc'at a essi de recuperai is partidas de cuatru domìnigus, a partiri de is de sa cida chi at a benni, sa primu dii de su mesi de Donniasantu, po sighiri agoa cun is partidas de s'otu, de su cuindixi e de su binti-duus. Sperendi sèmpiri chi po su bintinoi, s'ùrtimu domìnigu de su mesi de Donniasantu, is pentzamentus s'iant spaciaus.

Fintzas a imoi, is partidas chi sartànt su domìnigu beniànt giogadas a su mèrcuis, e podeus pentzai chi is cosas ant a andai diaici puru in su duamilla e bintunu. Fortzis nc'at a essi calincunu strobu in prus po su chi pertocat sa Coppa Italia de Eccellenza e de sa Promotzione, ma a bolli sighiri imoi custa chistioni s'arriscat de fai a trassa de cussu chi si trogat sa conca candu no si dh'est ancora spistidhada.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020