Salta al contenuto principale
nurri festa

Girone D: Su Nurri bisat giai sa Primu Categoria ma Baunese e Irbono nci creint ancora

Su Nurri càstiat totu is atrus de s'artu de su primu postu de sa lista, a pustis de cuindixi partidas, cun trintotu puntus allogaus in buciaca, chi nd'arribant gràtzias a doxi bìncidas e duus paregius. S'unicu borta chi su Nurri at pèrdiu est stètiu in sa partida contras a cussus de su Triei, su bintiseti de su mesi de làdamini. In sa primu bessida de su duamilla e binti is arrubiu-asullus ant bintu aforas de domu, contras a su Cardedu, po cuatru a duus; domìnigu passau invècias si funt dèpius acuntentai de s'unu a unu contras a cussus de Santu Idu. De su cincu de su mesi de gènnarju, perou, funt gioghendi in su campu nou, cun s'erba frisca; unu bellu agiudu, nc'est pagu de aciungi, po Alberto Schirru, chi at fatu giai noi gol, e totus is cumpangius, chi imoi bollint sighiri a curri forti, cun su bisu de nci artziai in Primu Categoria.

A is pabas de su Nurri, cun feti cuatru puntus in mancu, ddoi funt is piciocus de sa Baunese, impari a cussus de s'Irbono. Is primus tenint corantasesi gol fatus fintzas a imoi e nisciunu est arrannèsciu a fai mellus; is segundus ndi tenint corantacincu e nd'arribant de su ses a zero scutu a faci a cussus de s'Amatori Jerzu in s'urtimu bessida. Su giogadori chi at fatu prus gol in sa Baunese est Cristiano Carta, una vida cun is nieddu-asullus, frimu po imui a doxi gol; in s'Irbono, invècias, Edoardo Mameli est currendi cumenti unu macu: po imoi at fatu catodixi gol, unu in sa primu bessida contras a su Lotzorai, chi at decìdiu sa batalla, unu in sa partida contras a cussus de Foghesu, duus a su Cardedu e a su Gàiru, unu in sa partida avatu contras propriu a sa Baunese, unu in domu de su Scalepranu, unu in su cuatru a zero arribau contras a su Gelisuli, po duas bortas contras a su Santu Idu e a s'Amatori Jerzu; in mesu su gol torra contras a su Lotzorai.

In questo articolo
Squadre:
Campionato:
Argomenti:
Stagione:
2019/2020
Tags:
Seconda Categoria
Girone F