Girone E: s'Oristanese circat de si ndi fuiri, su Macumere abarrat apicigau cun feti duus puntus in prus pagu

A pustis de is primus cuindixi partidas, in su Girone E nci funt a su mancu ses scuadras chi funt currendi po nd'artziai in Primu Categoria. Cussus chi staint peus, po imui, funt is grogu-braus de su Circolo Ricreativo de Arborea, bintises puntus in totu, noi in mancu de sa primu de sa lista Oristanese. Gabriele Aroffu, unu piciocheddu de feti binticincu annus chi po imoi at fatu ses gol, e is cumpangius funt partius a forti meda e funt abarraus in su primu postu fintzas a s'urtimu domìnigu de su mesi de dònniasantu, ma a pustis de su tres a zero arregotu in domu, contras a cussus de su Cullieri, calincuna cosa s'est arrogada e de intzandus, in seti bessidas, ant bintu feti una borta, contras a su Nurachi, cun duus paregius contras a su Tramatza e, pròpriu dominigu passau, in sa partida cun su Montiferru.

Staint meda mellus Norbello, bintinoi puntus, cun Massimo Marras chi at fatu dexaseti gol, mancai no s'iat prus unu piciocheddu, difatis est nasciu su cincu de su mesi de austu de su milli e noicentu setantatres; Nurachi, unu puntu in prus, trinta in totu, cun Pasquale Cossu e Roberto Muroni chi tenint ses gol a cada unu e funt is duus giogadoris chi funt fadendindi de prus in sa scuadra cosa insoru, e Simaxis, trintunu puntus, chi dominigu perou at perdiu sa partida in domu de su Sabarussa, po unu a zero, ma nc'est de nai chi funt stetius incrichius de sa malasorti e imoi bollint torrai a curri, partendi giai de sa bessida cun s'Ollasta. A su secundu postu de sa lista ddoi funt cussus de su Macumere, cun trintatres puntus, chi perou ant perdiu sa partida de importu mannu meda contras a s'Oristanese, su doxi de su mesi de gènnarju; is biancu-arrubius, pròpriu gratzias a cussus tres puntus, s'agatant imoi in su primu postu de sa lista. Totus is ogus funt in pitzus a is piciocus de mister Federico Trogu, chi dominigu depint giogai a Cullieri.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020