Girone F: sighit sa batalla po su primu postu de sa lista tra Orani e Atletico Bono

S'Orani e s'Atletico Bono sighint a si gherrai su primu postu in su Girone F: is duas scuadras funt currendi a forti, a bratzetu giai de diora, cun corantunu puntus, chi nd'arribant a pustis de trexi bìncidas e duus paregius. Is birdis-asullus de mister Mastio tenint calincuna cosa cumenti a cincuanta gol fatus e feti dexi boddius, nisciunu est arrannèsciu a fai mellus, nimancu cussus de su Bono, chi po imoi ndi tenint trintatres. Undixi, feti unu in prus, funt invecias cussus arregotus in cuindixi partidas de is biancu-arrubius. S'Orani e s'Atletico Bono no ant pèrdiu nimancu una borta.

A cantu parit, is cosas iant a podi andai a innantis diaici fintzas a s'urtima partida de su tres de su mesi de maju, ma nc'est giai afròdiu meda po sa batalla chi nd'at a bessì aforas, nc'est de ci scumiti, su primu domìnigu de su mesi de friargiu, candu s'Atletico Bono e s'Orani ant a cumbati, s'unu a facci de s'atru, po ndi ingolli is tres puntus. Sa primu partida intra is duas scuadras prus fortis de su campionau, su bintiseti de su mesi de ladàmini, est acabada chenza de gol.

S'Atletico Bono de su presidenti Antonello Orani giogat is partidas in domu in su campu “Salvatore Ena”, chi tenit totu is luxis noas e su campu in erba artifiziali; dònnia domìnigu nci funt giai trexentu personas a tzerriai e a fai is festas a is giogadoris. Sa sotziedadi est fadendi de totu po binci su campionau: imoi, in sa fentana de mercau de su mesi de Idas, est lòmpiu, tra is atrus, Sebastiano Onali, ses gol po issu, cummenti po Henry Uwadiae.

Cussus de s'Orani, invècias, funt prexaus meda poita dominigu ant a giogai sa primu partida in su campu nou, su “Comunale Nivola”, a pustis de dexi annus de traballus. In totu custu tempus, difatis, is biancu-birdis ant dèpiu domandai agiudu a is comunus e a is scuadras de Onièri, Otzàna, Sàrule e Oroteddi. Michele Fadda, giai dexaseti gol fatus fintzas a imoi, e is cumpangius ant a tenni ancora prus gana de giogai e de binci.


Attività realizzata col contributo della Regione Sardegna. LR 22/2018 art. 22, comma 2. Avviso 2019-2020