Po binci is partidas serbit unu stìddiu de atrìviu: is de s'Usinese sighint a curri po ndi cassai s'artziada in Ecellenza

E duncas, eia, a cantu parit nci dda eus fata: su mesi de Abrili est brintau de una pariga de diis (a bolli essi pretzisus, cumenti unu giornalista iat a depi essi, sèmpiri chi bolit fai beni su trabballu cosa sua, in dì de oi seus arribbaus a sa de tres diis de su de tres mesi de s'annu) e no mi parit nemmancu berus, fadendi su contu ca su mesi de martzu est stètiu bellu longu (po imboddiai sa chistioni cun una brulla, cun una botada, cumenti si iat a podi narai puru, e gioghendi a fai unu pagheddeddu su poeta, m'est partu, giai giai, ca su mesi de Martzu teniàt trintunu mila diis, antzis ca trintunu) e bellu fadiosu de si scroxai, ma nci dda eus fata po cust'annu puru. 
E immoi no depu fai atru ca fai su contu (a trassa de pipiu chi abertat sa dì de festa) de is diis ca ammancant (ca ammancant ancora de si scroxai, cumenti mi praxit a narai) po nci lompi a sa Pasca Manna; e m'acudu a si narai ca, eia, apu incumentzau a fai su giogu de sa Caresima (diaici mi praxit a ddu tzerriai, a su mancu) su cincu de su mesi de Martzu (ca fiat sa dì, su mercuis de su cinixiu, cumenti si iat a podi tzerriai a trassa de cumenti si narat in italianu etotu), e immoi chi seu arribbau a su de tres de Abrili mi benit de narai ca su tempus, a bortas, si nci bobat, a su mancu diaici mi parit. 

E candu mancai fais una cosa chi ti fadiat (cumenti iant a podi essi, po mei a su mancu, is esercìtzius chi ndi pesu me is coranta e prus diis de sa Caresima), e candu arribbas giai giai a su traguardu (o a sa tenta, a sa tarea, cumenti si iat a podi narai, puru, sighendi cussu chi m'at consillau su fueddariu) intzandus ti intendis su coru prenu de afroddiu, e de prexu. E mi parit de essi unu de cussus giogadoris chi currint avatu de sa bòcia, e de is aversàrius, po noi mesis de sighiu, e incumentzant a biri sa fini de sa stagioni, e incumentzant, mancai, a bisai de ndi cassai su primu postu de sa lista e duncas, si cumprendit beni, s'artziada de sa categoria. 
Ma sa chistioni ballit aguali, est craru custu puru, po cussus giogadoris chi currint impari a is scuadras (o currint po is scuadras, chi si sonat mellus diaici) po ndi cassai sa sarvesa. 

Sa chistioni, duncas, benit a essi: podis curri po binci su campionau, e duncas po ndi cassai su primu postu de sa lista, o podis curri, puru, mancai feti po tenni sa possibbilidadi de mantenni sa categoria, cumenti mi benit de narai; est a nai po tenni sa possibbilidadi de curri in sa categoria etotu innoi t'agatas, ma a sa fini, podis curri po su chi bolis, ca candu ses giai giai po cassai su chi as bisau po mesis e mesis, e intzandus no ti parit nemmancu berus e, cumenti chi fessit una maghia, si cumprendit, ti intendis su coru prenu de afròddiu, cumenti si iat a podi narai, sighendi a giogai a fai unu pagheddeddu su poeta puru e no feti su giornalista.

E cun su coru prenu de afròddiu, duncas, andu a incarrerai cun is chistionis acapiadas a is novas de importu prus mannu chi nd'arribbant de totus is campus innoi si giogant is partidas de is Prima Squadras (cumenti seus costumaus a ddas tzerriai, ca funt is scuadras de is mannus, e custu ddu naraus po ddas distinghi de is scuadras innoi giogant is piciocheddus prus piticheddus), e chi sigheus cun su giàssu de su Diàriu Sportivu, e chi funt, duncas, is scuadras chi currint in su campionau de s'Ecellenza, chi est su prus matucheddu de totus, cussu de importu prus mannu, si iat a podi mancai narai diaici; is scuadras chi currint me is duas listas chi pertocant su campionau de sa Promotzioni, is assòtzius chi agataus me is cuatrus listas chi faint parti de su campionau de sa Primu Categoria e fintzas a arribbai a is otu listas chi faint parti de su mundu (chi parit diaderus unu mundu a parti), de su campionau de sa Segunda Categoria. Ma chentza de si ndi scaresi, mi parit craru puru, de is scuadras sardas chi sigheus, cun sa pròpriu atentzioni e cun sa pròpriu stima, e chi currint me in su campionau de sa Sèrie D. 
E mancai apa a partiri pròpriu de custas, po su chi pertocat s'artìculu de custa cida, fadendi su contu ca seus de meda, immoi, ca no ndi chistionaus. 

Ma ainnantis de mi nci ghetai, a fundu 'e susu (cumenti si narat, cumenti apu sèmpiri intèndiu narai in Bidd'e Sorris, a su mancu, ca est sa bidda innoi seu stètiu pàsciu e innoi ancora bivu e m'agatu), me is chistionis acapiadas a su mundu de sa bòcia, e duncas, ainnantis de si fai sa conca a acua cun is resultaus de is partidas e cun is chistionis chi pertocant is listas, e fadendi su contu ca sa cida passada mi seu strollicau pagu e nudda (chi si ddu arregodasi, e desinò podeis andai a torrai a ligi s'artìculu chi nd'apu pesau seti diis fait, e chi agatais sempìiri, est craru, me in su giàssu de su Diàriu Sportivu, impari a totus is atras novas chi ndi funt bèssidas in custus ùrtimus cuatru-cincu annus), po custa cida fia pentzendi de si intregai, e de arraxonai apitzus de unu fueddu chi deu (chistionu po mei, a su mancu) no apu mai intèndiu, o po ddu narai mellus, no ia mai intèndiu. Ma a sa fini mi praxit (e meda puru) custa cosa de scoberri calincuna cosa de nou dònnia dì: e candu mi capitat de chistionai, cun is personas chi atobiu, de su trabballu chi fatzu (e mi capitat, fatu fatu, de chistionai cun personas chi no sighint, ma nemmancu po sbàlliu, cumenti si iat a podi narai, is chistionis chi pertocant su mundu de sa bòcia e, mescamente, su mundu de is scuadras de is diletantis sardus), e candu ddis contu ca, tra is atras cosas, scriu artìculus in sardu, intzandus incumentzant a giogai cun mei, e m'agiudant a ammanniai su fueddàriu, cumenti si iat a podi narai, e duncas, sa cantidadi de fueddus chi connosciu e chi, duncas, manìgiu. 

E si ddu torru a arrapiti, mancai, po sa de centumila bortas: chi depessi abarrai innoi a si chistionai feti de partidas e de resultaus ia a fai meda ma meda prus allestru de su chi nci pongiu a mi spremi su crobeddeddu, circhendi calincuna cosa de togu de si torrai a contai, ma su dannu prus mannu iat a essi ca, eia, ia a manigiai sèmpiri is pròprius dexi-binti fueddus, e duncas nci iat a essi, ddu naru diaderus, pagu spàssiu po mei ca custus artìculus ddus scriu, e pagu spàssiu po bosatrus puru, ca custus artìculus ddus ligeis (ddus sigheis a ligi, apustis de totu custu tempus). 
Fadendi su contu, pruschetotu, ca sa bidea de is de sa Regioni de Sardìnnia, chi a sa fini de is giogus funt cussus chi ndi pesant (e sighint a ndi pesai, gràtzias a su Cielu), su bandu IMPRENTAS, est cussa de circai de mantenni sa lìngua sarda bia, est a nai, sa bidea est cussa de agiudai is personas a no si dda scaresci (ca s'arriscu est mannu, e si cumprendit, fadendi su contu ca nci funt medas pipius ca, in dì de oi, no sciint fueddai nemmancu unu fueddu in sardu); sa bidea est cussa, duncas, de agiudai is personas a torrai a chistionai in sa lingua chi po annus e annus e annus si chistionàt in custa isula innoi, ancora, s'agataus nosu puru. E gràtzias a su Cielu, m'acudu a si narai, chi nci funt ancora personas chi s'agatant a bivi apitzus de custa isola. Ma de custa chistioni, mancai, nd'eus a torrai a chistionai mellus in su benidori.

E duncas, po custa cida apu scerau de mi strollicai, o chi si praxit de prus cumenti sonat, apu decìdiu de arraxonai, ma feti po unu pagheddeddu, apitzus de su fueddu chi est: atriviu. 
E duncas, si depu narai sa beridadi, no ddu ia mai intèndiu, e depu torrai gràtzias a Marcu, s'amigu miu chi est fadendu custu gioghiteddu cun mei, e chi in s'interis chi ddu agiudu (po su chi potzu, est craru) cun is fainas e is trabballus chi ddoi funt de fai a su giardinu cosa sua (tra is matas de pudai, sa linna de abruxai apustis chi dda amuntonas, fintzas a arribbai a totu sa fruta chi ddoi est de scudi de is matas: in s'ierru una surra manna meda de arangius, e cumenti brintat s'istadi, intzandus arribbat s'ora de sa pruna), si ponit a circai (eia, a trassa de cussas personas chi abarrant oras e oras a circai sparau in su sartu, po si fai un esèmpiu e po sighiri, a su mancu po unu pagheddeddu, a giogai a fai su poeta) fueddus chi, mancai, pentzat chi no apu mai intèndiu. E a bortas nci intzertat puru. 
Opuru, e ballit aguali, e si cumprendit, seu deu chi ddi cassu, cumenti ddu intendu, est craru, (gei si cumprendit, berus est?) calincunu fueddu chi no connosciu, in s'interis chi chistionat, e intzandus ddu frimu, mi ddu fatzu arrapiti a su mancu una pariga de bortas (una pariga a sa sarda, est craru), ddi domandu ita bollit narai e, su prus de is bortas, m'acudu a mi ddu scriri in su tiali de cuaderneddu chi mi portu sèmpiri avatu, pròpriu po mi scriri calincuna cosa de importu chi timu chi mi nci potzat bessiri de sa conca, drabessi pròpriu cumenti nc'est brintada. 

E duncas, megamu a si narai, ca su fueddu de oi (su fueddu chi apu scerau po oi, a su mancu, mi praxit a narai diaici) est atriviu, chi naraus, po si fai un esèmpiu (diaici s'agiudu a cumprendi mellus) de una persona chi mancai, fait calincuna cosa cun coràgiu mannu; mancai una cosa dificili, mancai nci siant arriscus. 

A narai sa beridadi, chi pròpriu si depu contai beni (po essi pretzisu, si iat a podi narai diaici) cumenti funt andadas is cosas, su fueddu ddi est bèssiu aforas pròpriu candu su tziu, chi si tzerriat Gennaro, e chi tenit calincuna cosa cumenti a otantacuatru annus fatus, friscus friscus, custu mesi de Friàrgiu chi si seus lassaus a is pabas, e chi trabballat, tocat a ddu nai (e mancai nc'apa a torrai puru, apitzus a sa chistioni), cun sa fortza de unu piciocheddu (chi no de prus, est a nai chi, mancai tengiat otantacuatru annus fatus, si iat a ponni in buciaca, a su mancu custu est su chi biu, chi mi capitat de biri cun is ogus mius, piciocheddus meda ma meda prus giòvunus de issu puru); e duncas, fia nerendus' ca Gennaro fiat portendi, a coddu, una scaba manna meda e grai (gei si cumprendit cantu podint pesai, candu podint essi grais cussas scabas fatas totu de ferru), e custu a solu, chentza de s'agiudu cosa nosta, mancai Marcu, su nabodi, abarressit totu a ddi nai cosa, a ddu strunciai.

E duncas, Marcu m'at castiau e s'est megau: - ita naras chi est atriviu? 
E est pròpriu in cussu momentu chi ddi apu domandau: e ita bolit narai? 
E duncas, no nc'eis a crei, ma gràtzias a custu fueddu (e gràtzias a totu s'arraxonamentu chi nd'est bèssiu aforas, e si domandu scusa chi mancai si nd'apu furau prus de su tempus chi mi podia permiti), arrannèsciu a m'acapiai (e fiat ora puru, s'at a megai calincunu de bosatrus) a is chistionis chi pertocant su giogu de sa bòcia, poita, a narai sa beridadi, custa cosa de tenni atrìviu candu fais is cosas, est una de is chistionis, de is legas, chi ndi bessint aforas fatu fatu (po no narai giai sèmpiri) candu chistionu cun is allenadoris e candu mi contant cumenti ddis funt andadas is cosas me is partidas chi sighint de sa panchina. 
Po si fai un esèmpiu (e po ndi piscai un'intervista frisca frisca, o callenti callenti, chi si praxit de prus), sa cida passada apu intèndiu a su telefunu a Fabio Levacovich, chi, cumenti apu giai tentu s'ocasioni de si torrai a contai, nd'est arribbau in sa panchina de is de s'Usinese (e duncas, po sighiri is fainas de sa scuadra arrùbia-brau) pròpriu una parighedda de cidas fait. E tocat a narai, immoi chi nci seus (e immoi chi potzu manigiai unu fueddu ca, custu est pagu ma seguru, no ia mai manigiau ainnantis de oi), ca Levacovich at tentu unu bellu atrìviu a s'acapiai cun sa scuadra de s'Usinese, fadendi su contu ca nd'est arribbau in s'assòtziu (cumenti allenadori, est crarus berus?) candu fiat giai incumentzau su mesi de marzu, fadendi su contu, duncas, ca sa primu partida chi at sighiu sètziu in sa panchina de is arrùbius-brau est stètia cussa, in domu, contras a is de s'Abbasanta; e duncas, eia, cumenti eis a sciri giai (e chi no ddu scieis deu seu innoi pròpriu po si ddu arregodai) Fabio Levacovich nd'at pigau su postu (cumenti si iat a podi narai a trassa de s'italianu etotu) de Giampieru Loriga, chi est stètiu bogau (bogau a sou de corru, si narat, in sardu, candu mancai un acapiu tra duas personas, o tra una persona e un assòtziu, si segat in maba manera) de sa panchina de s'Usinese apustis de sa partida pèrdia (pèrdia in maba manera) in domu de is de su Logusantu. 

E duncas, eia, Levacovich at tentu un atrìviu mannu, fadendi su contu ca at pigau sa guida de sa scuadra candu fiat a su segundu postu, cun calincuna cosa cumenti a cincuanta puntus, e cun feti otu partidas de giogai. E issu etotu m'at contau, m'at scoviau, mellus puru, cumenti funt andadas is cosas.
«Pròpriu tres diis ainanntis de arriciri sa proposta, sa propònnida de is de s'Usinese, ndi ia sciusciau s'acapiu chi tenia cun is de su Recanatese, e de su restu, cun is dirigentis de s'assòtziu, festus abarraus de acòrdiu diaici, ma feti a fueddus. E mancu mali, mi megu a solu a solu, chi apu agatau personas futas, chi ant fatu su chi mi iant promìtiu, e m'ant permìtiu de mi nc'andai, de lassai sa scuadra cosa insoru, si cumprendit, fadendi su contu ca po issus fademu s'allenadori in segunda, (o su vice-allenadori, chi si praxit de prus cumenti sonat ndr). Is dirigentis de s'Usinese, duncas, ant fatu totus is cosas cumenti andant fatas: ant circau de cumprendi, po primu cosa, chi tenia sa disponibilidadi, sa possibbilidadi de andai a trabballai po issus, e duncas, impari a issus; ant circau de cumprendi chi, diaderus, deu fia arrannèsciu a mi scapiai de su cuntratu chi tenia. E duncas, deu no apu potziu fai atru ca acetai sa proposta chi mi fiant fadendi. E de su restu, deu ia giai tentu s'ocasioni, sa possibbilidadi de trabballai impari a issus me in custus annus passaus, e duncas custa cosa at fatu meda de su tanti in sa sceda chi apu pigau. Tèngiu un arragodu mannu meda de totus is dirigentis chi ant trabballau cun mei candu fia s'allenadori de s'Usinese, e medas de is dirigentis chi ddoi funt immoi ddus connoscia giai, duncas seu meda prexau de nd'essi torrau a Usini, mi parit craru puru. E de su restu, sa situatzioni chi apu agatau est stètia bona meda, no si ddu potzu cuai: sa scuadra est stètia sighida, est stètia allenada beni meda de chini nci fiat ainnantis de mei, e seu chistionendi, est craru, de Giampieru Loriga e de is personas chi ant trabballu cun issu, de is personas chi ddi ant donau una manu de agiudu. A narai sa beridadi, e mi parit craru puru, chi arribbas a ti setzi in sa panchina de una scuadra chi est stètia bona a ndi cassai calincuna cosa cumenti a cincuanta puntus, e s'agatat a su segundu postu de sa lista, custu bollit narai ca tenit una fortza manna, bollit narai ca est una scuadra, una rosa de importu. Custu bollit narai, peròu, ca is cosas benint a essi tostadatzas, e chistionu po su trabballu chi mi tocat a fai. At a essi berus ca sa scuadra est forti, ca is giogadoris chi ddoi funt in sa rosa funt su mellus chi un allenadori iat a podi bisai e disigiai, ma custu bollit narai, peròu, ca deu no potzu fai atru, cumenti a mìnimu, de ndi cassai su segundu postu. Est a nai ca, chi mi bollu intendi prexau po su trabballu chi apa a arrannesci a fai, prus in bàsciu de su segundu postu no ndi potzu cabai, de innoi no ndi bessu e nc'est pagu chi potzu aciungi, mi parit craru. Apu agatau is piciocus de sa scuadra in saludi, cumenti si iat a podi narai, e custa chistioni ballit siat po is cambas, ma ballit puru po sa conca, po s'umori; sciint beni cumenti si bincint is partidas, is giogadoris funt costumaus a curri po ndi cassai su primu postu, e duncas, no tenint timorias. E de su restu, candu nd'arribbas in sa panchina de una scuadra chi s'agatat a su segundu postu de sa lista, tenis sa bona sorti de no t'agatai una rosa totu ghetada a pari, o primada, cumenti si iat a podi narai; antzis, apu agatau una truma de giogadoris chi tenint sa gana de curri prus a forti, chi fait, de su chi fiant fadendi ainnantis, e deu seu innoi po ddis donai una manu de agiudu. No potzu ponni buca, est a nai ca no potzu narai nudda, apitzus de sa decisioni chi is dirigentis ant pigau de nci bogai a Giampieru, de ndi scuncodrai s'acàpiu, s'acordu chi teniànt cun issu, no potzu sciri ita siat sucèdiu, ma nc'est de narai chi at fatu unu trabballu bonu meda, e ddu iat a cumprendi puru unu pipieddu. Bollu narai ca chi funt arrannèscius a si ponni in buciaca cincuanta puntus, calincuna cosa de bonu, calincuna cosa de importu, dda ant ai fata. In su mundu de sa bòcia, peròu, e sa chistioni ballit puru po is atrus centumila trabballus chi ddoi funt de fai in custu mundu, is regulas abortas funt marigosas; bollu narai ca no est unu ispantu diaici mannu su de nci bogai un allenadori, mancai siat fadendi beni, mancai ndi siat cassendi resultaus bonus. Ma tocat a narai ca, e mi parit craru puru, is dirigentis trabballant po su beni de s'assòtziu cosa insoru, e duncas, is de s'Usinese funt circhendi de fai andai is cosas mellus puru de cumenti ddis fiant giai andendi; bolint sighiri a mellorai, e deu seu innoi pròpriu po custu. E custas cosas, bollu narai, su de nci bogai un allenadori chi s'agatat a su segundu postu de sa lista, capitant e sucedint me is categorias prus mannas puru de sa Promotzioni, me is categorias de importu prus mannu, cumenti iat a podi essi sa Sèrie A, po si nd'arremonai una. Nc'est su tanti po narai, de su restu, ca medas de is giogadoris chi faint parti de sa rosa de s'Usinese iant a podi giogai, e beni puru, chentza strobbus o chentza bregùngias me in su campionau de s'Ecellenza, ma puru in cussu de sa Sèrie D. Custa, a su mancu, est sa bidea chi mi seu fatu deu. Is piciocus funt fortis, e no megu a chistionai feti de su chi sciint fai cun sa bòcia tra is peis, cumenti si iat a podi narai, ma po su chi pertocat, puru e mescamente, sa conca. Ca si cumprendit, si sciit ca is partidas si bincint, puru, gràtzias a s'atrìviu chi nci ghetas in campu, gràtzias a s'atrìviu chi tenis candu ndi cabas in campu». 

E Fabiu Levacovic, de su restu, est unu de is prus fortis allenadoris chi ddoi funt in dì de oi in Sardìnnia, feti puru po s'esperièntzia chi at tentu s'ocasioni de fai me is ùrtimus annus, candu at agiudau a unu maistu, megu a chistionai de su mundu de su càcliu, est craru, cumenti a Filippi, fadendi, pròpriu, s'allenadori in segunda cosa sua, cumenti si iat a podi narai, in su campionau de sa Sèrie C. «Un allenadori, chi fait beni su trabballu cosa sua, tenit sa possibbilidadi de imparai calincuna de nou, calincuna cosa chi no sciiat, dònnia dònnia dì. Imparas calincuna cosa siat candu is cosas ti andand beni, gràtzias a su Cielu, ma imparas calincuna cosa de importu puru candu is cosas ti andant mabi, o, mancai, no ti andant beni cumenti podiast isperai. In totus custus ùrtimus annus apu tentu s'ocasioni de cumprendi cali funt is cosas ca un allenadori depit fai, e cali funt invècias is cosas ca un allenadori no iat a depi fai mai, nemmancu po sbàlliu, cumenti si iat a podi narai. Apu donau una manu de agiudu a Filippi, nareus chi seu stètiu su vice-allenadori cosa sua, e seus chistionendi de unu grandu allenadori, unu de is prus mannus chi ddoi funt in dì de oi po su chi pertocat sa Sèrie C e sa Sèrie D, e s'arrolu de su vice, su trabballu chi depit fai s'allenadori in segunda est de importu poita est cussu chi acapiat, ddi nau diaici, sa conca de is giogadoris cun is bideas chi tenit in conca s'allenadori, chi cumprendeis su chi si bollu narai. Depis fai cumenti chi tui fessist sa colla, cumenti mi benit de ddu narai, tra is piciocus e s'allenadori etotu. S'arrolu de su segundu allenadori est unu pagheddeddu cussu chi, in dì de oi, fait su dotori de sa conca (cussu ca in italianu tzerriaus psicologo ndr), ca de su restu seus sèmpiri chistionendi de binti-binticuatru piciocus ca, mi parit craru puru, no arraxonant totus in sa pròpriu manera, chi mi cumprendis, e sa cosa ballit po is chistionis chi pertocant su giogu de sa bòcia, e duncas, is chistionis chi pertocant su campu, ma ballit, puru, est craru, po is cosas chi pertocant is fainas chi is piciocus sighint aforas de su campu; ca chi unu piciocu tenit calincunu strobbu in sa vida cosa sua, cussa de dònnia dì, intzandus ndi iant a podi arribbai strobbus po sa calidadi de su giogu chi nc'arrannèscit a bogai aforas, candu s'agatat in campu. Tocat a narai, puru, ca me is categorias prus artas is fainas de sighiri benint a essi prus trabballosas, is diferèntzias tra is categorias ddoi funt, est craru, antzis, deu creu ca is categorias nci siant pròpriu po custu motivu: po permiti, a is giogadoris, ma sa cosa ballit po is allenadoris puru, de podi mellorai, de annu in annu, de podi cresci, siat po su chi pertocat su trabballu cosa tua, ballit po is giogadoris e po s'allenadori, e siat po sa conca, chi mi cumprendeis su chi si bollu narai. Est craru ca unu giogadori chi currit in sa Sèrie A depit pentzai a una surra de cosas in prus chi, mancai, candu curris, candu giogas po una scuadra de sa Segunda Categoria, no nci funt. Deu creu, seu cunvintu de custa cosa, ca su trabballu, a sa fini, est s'ùnica bia, s'ùnicu arrastu chi tui podis sighiri. E duncas, candu fais beni su trabballu cosa tua, ballit siat po un allenadori, po unu giogadori chi currit, mancai, in sa Primu Categoria, ma sa chistioni ballit aguali puru in su campionau de sa Sèrie C, intzandus podis abarrai seguru de su fatu chi nd'as a arriciri is resultaus chi ti minescis. Su chi apu imparau in totus custus annus de s'amigu miu Filippi, e de su restu, sa cosa chi apu imparau de totus is diretoris sportivus chi ant trabballau cun mei, est acapiada a su de essi professioneris; est a nai ca chi tui trabballas cumenti unu professoneri, intzandus ses giai a sa metadi de su chi depis fai. E su de benni a essi professoneri, in totu su chi fais, partendi de cumenti ti cumportas in campu cun is piciocus cosa tua e cun is aversàrius, e fintzas a nc'arribbai a su modu chi tenis de arraspundi a is giornalistas, duncas, fait sa diferèntzia, cumenti si iat a podi narai». 

E po torrai a sa chistioni chi apu pigau ainnantis in custu artìculu etotu, e megu a chistionai, mi parit bastanti craru, de s'atrìviu chi serbit, a bortas (po no narai giai giai sèmpiri) po fai un allenadori, e mescamente chi tui nd'arribbas a campionau giai po prus de sa metadi bellu ca fatu, cumenti est sucèdiu, de su restu, a Fabiu Levacovich, ellus, custu atrìviu etotu ddu depint tenni is giogadoris candu ndi cabant in campu. Depis tenni s'atza giusta, chi ndi bolis cassai is tres puntus chi ddoi funt, badda badda in su pratu, in dònnia partida. E duncas, eia, mi seu intèndiu cun Levacovich apustis chi iant bintu sa partida, de importu mannu meda, contras a is de su Coghinas, chi at permìtiu a is de s'Usinese de ndi cassai torra su segundu postu de sa lista. 

E duncas, Levacovich m'at scoviau: «Seu giai giai seguru de su fatu ca sa crai po binci sa partida, (cumenti si iat a podi narai a trassa de s'italianu etotu ndr), est stètiu s'atrìviu chi is piciocus nc'ant postu in campu; sa trassa chi tenis candu ndi cabas in campu fait sa diferèntzia; sa scuadra cosa mia at tentu totu sa fami chi serbit po ndi cassai is tres puntus, e custu bollit narai ca depis curri prus de is aversàrius cosa tua, e depis essi prus mau, chi mi permiteis de manigiai custu fueddu, fadendi su contu ca seus sèmpiri chistionendi de unu giogu, mi parit craru, de su chi funt is aversàrius cosa tua, e custu ballit po dònnia atzioni de sa partida, po dònnia minudu de is noranta chi ddoi funt de giogai in una partida, chi no calincuna cosa de prus puru. Contras a is de s'Altzaghena puru, a nai sa beridadi, eus giogau una partida de importu, una partida bona meda, po calincuna cosa cumenti a otantotu – otantanoi minudus, ma apustis tocat a narai puru ca seus arrannèscius, e mi dispraxit meda ma meda, e si cumprendit, a si fai torrai a cassai de is aversàrius cosa nosta, ca in unu minudu e mesu de giogu s'ant fatu calincuna cosa cumenti a duus gol. E a perdi duus puntus diaici, est craru, no benit a essi una cosa bona, no praxit a nemus, ma in su giogu de sa bòcia no est de seguru sa primu borta chi sucedint cosas cumenti a cussa chi est sucèdia a nosu una pariga de dominigus fait». 
E po serrai sa chistioni chi apu pigau, chi apu obertu gràtzias a su fueddu atrìviu, e chi mi nc'at portau, duncas, a chistionai de sa isfida chi at scerau de pigai, me is manus cosa sua, Fabiu Levacovich, no m'abarrat atru de fai ca andai a castiai, impari a bosatrus etotu (sèmpiri chi ndi teneis gana, ca tanti nci poneus unu mesu segundu) cumenti funt andadas is cosas po su chi pertocat s'ùrtima giorronada, cussa chi s'est giogada domìnigu passau, est craru, in su campionau de sa Promotzioni, po su chi pertocat sa Lista B. 

E duncas, is de su Uddusò funt sighendi a binci totus is partidas: s'ùrtima chi ant giogau, e bintu, est stètia cussa contras a is de su Istintinu, cun su resultau, de importu, de unu a zeru. Is de su Uddusò nd'ant cassau, duncas, sa de binti bìncidas in custu campionau, e no funt pagus de seguru. Is de s'Usinese, invècias, funt arrannèscius a binci in domu de is de s'Ovodda cun su resultau, togu meda, de cuatru a zeru. 
Immoi, tra is primus de sa classi de su Uddusò e is de s'Usinese ddoi funt seti puntus de diferèntzia, chi no funt pagus, e si cumprendit, mescamente chi fadeus su contu ca a sa fini de sa cursa, a sa fini de su campionau ammancant feti (e naru feti po modu de narai) cuatru partidas, e duncas, eia, is giogus s'ant a serrai, ant a acabbai a sa fini de custu mesi de Abrili etotu, est a nai, duncas, sa cida avatu de sa cida santa de sa Pasca Manna. In sa cursa po ndi cassai is play-off (po ddu narai a trassa de is ingresus etotu) ddoi funt puru is de su Coghinas, chi in dì de oi s'agatant a su de tres postus in sa lista, cun calincuna cosa cumenti a cincuantotu puntus in buciaca, chi funt, de su restu (ca a fai is contus nci poneus pagu meda) feti duus in mancu de is chi tenint is de s'Usinese. Is de su Bonorva puru ant bintu sa partida cosa insoru, in domu de is de su Atleticu de Bono, cun su resultau de unu a zeru, e immoi s'agatant a su de cuatru postus in sa lista, cun calincuna cosa cumenti a cincuantases puntus, chi, de su restu, funt unu in prus de is puntus chi tenint is de su Logusantu, sa scuadra sighida de Tony Madeddu, cun cincuantacincu puntus allogaus a su callenti. E is de su Logusantu funt arrannèscius a binci sa partida chi ant giogau, in domu cosa insoru etotu, contras a is de su Tonara.

Custas cuatru scuadras, duncas, ant a podi curri po ndi cassai is duus postus a is pabas de is de su Uddusò, chi est berus, cumenti parit, a su mancu, ca is de su Uddusò funt giai giai segurus de essi bintu su campionau; est a nai ca, cun totu cussa biga de puntus chi tenint in prus de is aversàrius, feti issus nci iant a podi fuiai a s'aliga sa bìncida de su torneu, su primu postu e, duncas, s'artziada in su campionau de s'Ecellenza passendi de sa porta prus manna, chi est cussa chi tocat a chini bincit su campionau, mi parit craru. 

E immoi chi seus arribbaus a custu puntu de is chistionis, no m'abarrat atru de fai chi andai a castiai, po su chi fait, po su tempus (e pruschetotu, po su logu) chi m'abarrat ancora, cumenti funt cuncodradas is cosas po su chi pertocat is scuadras sardas chi currint in su campionau de sa Sèrie D, chi est su chi s'apu promìtiu, de su restu, a s'incumintzu etotu de custu artìculu, e no nci podit essi cosa prus bona, prus futa, ca fai su chi naras de bolli fai. E custu ballit po su trabballu de su giornalista, ma ballit po sa vida de dònnia dì de totus, puru. 

E duncas, a su de dexi postus de sa lista agataus duas scuadras sardas: seus chistionendi de is de s'Ilva de Sa Madalena e de is de s'Olbia – Terranova, chi tenint allogaus in buciaca calincuna cosa cumenti a trintacuatru puntus: e duncas, si potzu feti narai ca is de s'Ilva ant bintu cuatru partidas de sighiu, est a nai, una avatu de s'atra, e seu chistionendi, po essi prus crarus, de is partidas chi ant giogau contras a is tattaresus de su Latte Dolce, sa partida contras a un'antra scuadra sarda chi est s'Atleticu de Uri, contras a is de s'Anzio Calcio 1924, cun su resultau bellu e tundu tundu de ses a unu, chi nd'est arribbau, tra is atras cosas, in domu allena; e in s'ùrtima giorronada, est a nai, est craru, pròpriu cussa chi s'est giogada sa cida passada, ant bintu cun su resultau de duus a zeru contras a is de sa Flegrea Puteolana. 

E immoi, candu ammancant feti cincu giorronadas po serrai is giogus, po serrai su campionau e duncas sa stagioni po su duamilla e binticuatru – duamilla e binticincu (e no mi parit nemmancu berus!, chi pròpriu si ddu depu narai), is de s'Ilva ant a depi andai a giogai contras a is de su Guidonia Montecelio 1937. Sa pròpriu cosa, est a narai ca is cosas ddis funt andendi beni meda, si iat a podi narai po is de s'Olbia – Terranova puru, ca me is ùrtimas cincu bessidas funt stètius bonus a ndi cassai calincuna cosa cumenti a dexi puntus (apitzus de is cuindixi chi ddoi fiant badda badda in su pratu), incumintzendi de sa bìncida, de importu mannu, chi nd'ant cassau in sa partida chi ant giogau, in domu cosa insoru etotu, contras a is de su Trastevere, cun su resultau de tres a zeru, fintzas a arribbai a su tres a unu chi nd'ant scutu in faci (mi benit de ddu narai diaici) a is de sa Flegrea Petulana; e apustis, is de s'Olbia, in sa partida contras a is de s'Atleticu de Lodigiani, nd'ant cassau sa de tres bìncidas de sighi, cun su resultau de unu a zeru. In sa partida contras a is de su Savoia, chi ant giogau in domu cosa insoru, is de s'Olbia si funt dèpius arrendiri, est a nai, chi ant pèrdiu cun su resultau de unu a zeru. E in s'ùrtima bessida, cussa de domìnigu passau, ant serrau sa partida in domu de is de su Cos Sarrabus – Ollasta cun su resultau de unu a unu. A su de doxi postus in sa lista, e seu giai giai po acabbai, a su mancu po oi, a su mancu po custa cida, agataus is de su Latte Dolce de Tattari, cun trintatres puntus, chi funt, de su restu (a fai is contus seis bonus bosatrus puru), unu in mancu de is chi tenint is de s'Olbia e de s'Ilva, chi s'apu arremonau pròpriu immubagora. Is de s'Atleticu de Uri, invècias, tenint in buciaca bintinoi puntus, cun feti duas scuadras a is pabas cosa insoru, e immoi funt currendi, est craru, po ndi cassai sa sarvesa, cun is de s'Atleticu de Lodigiani chi tenint feti unu puntixeddu in prus (est a nai trinta contras a bintinoi) e is de su Real Monterotondo Scalo chi ndi tenint, invècias, feti duus in prus. E cun feti una scuadra a is pabas, e cun bintises puntus, agataus is de su Cos Sarrabus-Ollasta, chi funt, est craru, cussus postus peus tra totus is scuadras sardas chi currint in su campionau de sa Sèrie D. 

E duncas, po custa cida, podeus serrai totus is chistionis andendi a castiai cali funt (cali ant a essi, po ddu narai mellus puru!) is partidas chi is de su Cos Sarrabus – Ollasta ant a depi giogai: e duncas, cumenti eis a sciri beni, po serrai is giogus in su campionau de sa Sèrie D ammancant cincu partidas, fadendi su contu ca sa de trexi giorronadas s'at a giogai pròpriu custu domìnigu chi est arribendindi, e nc'ant a essi partidas, est craru, puru su trexi (sèmpiri de su mesi de Abrili, est craru), su dexeseti, chi at a essi su giòbia de sa cida santa (cussa de sa Pasca Manna, po si cumprendi mellus), su bintiseti (chi at a essi, est craru, su domìnigu apustis de sa Pasca) po acabbai su cuatru de su mesi de Maju, po s'ùrtima giorronada. E duncas, is de sa Cos si dda ant a depi biri contras a is de su Terracina 1925, in domu cosa insoru; apusti ant a depi andai a giogai in domu de is de su Savoia; duncas ant a depi pentzai a sa partida contras a is de su Cynthialbalonga; po serrai sa stagioni cun sa partida contras a is de sa Gelbison e, po s'ùrtima bessida, in domu, contras a is de sa Sarnese. 
Po su chi pertocat is de s'Alteticu de Uri, invècias, si dda ant a depi biri, po primu (e duncas, custu domìnigu) contras a is de su Trastevere, in domu allena; apustis ant a depi arriciri sa visita (cumenti si narat) de is de su Real Monterotondo Scalo; su giòbia de sa cida santa, is grogus-arrùbius ant a depi giogai contras a is de sa Paganese, a sa de sexi giorronadas, invècias, nc'at a essi sa partida (su derby, po ddu narai a trassa de is ingresus etotu) contras a is de s'Olbia. In s'ùrtima bessida, invècias, ant a depi giogai contras a is de s'Atleticu Lodigiani. 

E cun custu, e po diaderus, po custa cida puru si saludu e si naru giai ca, chi su Cielu at a bolli, eis a agatai un antru artìculu scritu in sardu, po is Novas de su Diàriu Sportivu, tra seti diis, est a nai, duncas, giòbia chi benit. E in s'interis...si imprassu a forti!!!




Attività realizzata col contributo della Regione Sardegna. IMPRENTAS 2024-2025. LR 22/2018 art. 22