Sa metadi de su mesi de ladàmini si dda seus lassada a is pabas e is scuadras de sa Primu Categoria currint concas a sa de cuatru giorronadas

E duncas, eia, custa cida ddu podeus narai a forti: seus giai arribbaus a sa metadi de su mesi de ladàmini, chi est su de dexi mesis aintru de s'annu; e duncas no s'abarrat atru de fai ca si scroxai calincuna cosa cumenti a atras setantacincu diis, e su duamilla e binticincu puru at a essi bellu ca spacciau. E custu, ddu scieis beni, a su mancu chi eis lìgiu mancai feti unu de is artìculus chi ndi bessint aforas po is Novas de su Diàriu Sportivu, est po fai su contu de su tretu chi eus fatu, fintzas a immoi, e de su tretu chi s'abarrat de fai, ainanntis de si nci fuiai, a fundu 'e susu, in su duamilla e bintises. 
E cun custu no bollu narai ca tèngiu pressi, ca seu disigendi ca su tempus si ndi bobit; antzis, mi intendu prontu a mi bivi is cosas chentza de curri, chi cumprendeis su chi si bollu narai, fadendi su contu ca s'atonzu est sa stagioni chi mi praxit de prus: at a essi po su tempus chi est fadendi, no tropu frius e nemmancu tropu basca, at a essi po is caboris ca sa nadura ndi bogat aforas in custus tres-cuatru mesis; at a essi ca s'istadi mi fadiat aforas de contu, cumenti si iat a podi narai, e duncas, eia, candu ndi brintat s'atonzu intzandus mi parit ca mi siat torrendi su sangui a conca, cumenti apu sèmpiri intendiu narai de sa bon'anima de mamma mia. E candu scriu in sardu, in su sardu chi si chistionat innoi in Bidd'e Sorris, e duncas in su Campidanu de mesu, fatu fatu mi torrant in conca is fueddus chi mi naràt mamma mia, mescamente candu fia piticheddu. E custa est una de is cosas prus togas, e prus bellas, e prus drucis, e chistionu po mei, est craru, de su de scriri in sardu. 

E mancai, mi benit de dda pentzai diaici, a su mancu, iat a podi sucedi sa pròpriu cosa a bosatrus puru, e bosatras puru, est craru, candu beneis innoi a ligi custas rigas. 
E bai e circa, duncas, cantu cosas si torrant in conca, candu ligeis custas rigas. 
E duncas, in unu corpu feti, apu chistionau de su tempus chi passat (est sa primu cosa chi fatzu me is artìculus chi ndi pesu in sardu, e gei ddu eis a sciri, deu creu) e apu chistionau, puru, unu pagheddeddu, de su tempus chi est fadendi: po su chi pertocat is temperaduras, is diis funt benendi a essi ancora bellas e callenti, ca ti ndi iast a podi andai in giru, ancora, cumenti fessit s'istadi, in maigas crutzas, cumenti si iat a podi narai (e cumenti apu sèmpiri intèndiu narai innoi in bidda mia etotu), fadendi su contu ca nci funt calincuna cosa cumenti a bintitres – binticuatru gradus, a su mancu, aintru de sa dì, e de seguru no funt pagus. 
E bai e circa cantu personas nci funt, tra totus cussas chi bivint in dì de oi in Sardìnnia, ca megant a pentzai, ca sighint a pentzai, po ddu narai mellus puru, ca custa isula siat su logu mellus po bivi. E sciadaus, mancai (mi benit de narai diaici), totus cussus chi s'agatant aforas de s'isula, po trabballai, e s'agatant, mancai, in dì de oi, in logus frius, innoi proit a dònnia ora de sa dì; innoi su sobi no si biri mai, e innoi su callenti spaciat cumenti nd'arribbat su mesi de cabudanni.
 Innoi in Sardìnnia, gei ddu scieus, su tempus bellu sighit a andai ainnantis fintzas a su mesi de donniasanti; est a narai, duncas, po su chi si pertocat, ca eus a bivi diis drucis, po su chi pertocat sa temperadura, po atras cuindixi diis, mancai siat incumintzendi, puru, a fai calincuna bella passadedda de acua. E si cumprendit, apustis de un'istadi chi est stètia longa e bascosa meda, s'acua incumentzat a spaciai, e duncas, eia, serbit chi protzat, unu bellu pagheddeddu, siat po is campus e po is sartus, siat po is animabis e is bestias, ma fintzas po is ominis puru. 

E duncas, eia, ispereus feti chi su tempus (su tempus malu, mescamente) no fetzat tropu dannus; e cun custu mi torru a acapiai a unu de is misterus prus mannus chi nci funt in custa vida (in custa vida maca meda, chi mi permiteis de manigiai custus fueddus, a trassa de poeta, prus ca de giornalista sportivu): est a narai, duncas, ca no podis mai sciri cumenti ti ant a andai is cosas aintru de una giorronada, aintru de una dì: est craru, ti iant a podi andai beni meda, ma ti iant a podi andai mabi cumenti, mancai, no ti podiast nemmancu imaginai. 
E custa cosa si dda eus a depi arregodai dònnia, dònnia dì chi su Cielu s'arregalat de bivi: ca bastat pagu, a bortas, po dda acabbai totu sciasciaus, prenus de daboris de sa punta de is didus de su pei, fintzas a sa conca (chi cumprendeis su chi seu circhendi de si narai); ma a bortas, sucedit puru ca tui siast annadendi in acua lègias, e pagu bonas, duncas, e ti nd'arribbat una bona nova chi t'agiudat a ti ndi torrai a strantaxai, mancai ti donat una manu de agiudu a torrai a partiri, mancai, est cussu chi unu iat a depi isperai, prus a forti de su chi fiast fadendi ainnantis. 
E po custa chistioni, s'esèmpiu prus craru chi si podit fai, s'esèmpiu prus craru chi si potzu arremonai, est cussu de unu giogadori de bòcia, e fintzas de una scuadra de bòcia: e duncas, eia, ddu scieis beni, una partida de càlciu durat calincuna cosa cumenti a noranta minudus (chi no calincuna cosa de prus puru, a narai beni is cosas po cumenti funt), e duncas, eia, est craru, in cussus noranta minudus de giogu ti iat a podi sucedi de totu: bastat pagu, nci bolit pagu meda, duncas, po ponni su pei innoi no depis, e po t'agatai, intzandus, cun su carroni arrogau in centumila arrogheddeddus; bastat pagu e su genugu ti ndi iat a a podi sartai in aria (cumenti si iat a podi narai, a trassa de cumenti si narat in italianu etotu); bastat pagu ca, in s'interis chi ses currendi avatu de sa bòcia, impari a is cumpàngius e a is aversàrius cosa tua etotu, ti nd'arribit una bella carvada de pei a sa gamba, e duncas, t'agatas strupiau, ingotu, totu indaboriu po cidas e cidas de sighiu (e diaici serru sa chistioni fadendi una bella rima puru, ca no mi parit berus, a bortas, de cumenti sonit beni sa lingua cosa nosta, e seu chistionendi, est craru, de sa lingua sarda). 
E custu, duncas, candu is cosas ti andant mabi. 
Ma is cosas ti iant a podi andai beni meda: iast a podi fai, mancai, unu gol (o, mancai, duus o tres gol totu paris in una partida feti), o unu passagiu togu meda po calincunu de is cumpangius cosa tua; e duncas, sa scuadra iat a podi binci sa partida, o dda perdi in maba manera. Totu custu (e su giogu de sa bòcia benit a essi spassiosu pròpriu po custu motivu) po si narai, eia, ca no podis mai sciri cumenti ant a andai is cosas, e sa cosa ballit no feti po is partidas de bòcia (o po totus is atrus giogus e is atrus sport chi is ominis, e is femineddas puru, e nci iat a mancai atru puru, faint po nci passai su tempus, e po si spreviai, ddi naraus diaici), ma puru, po sa vida chi si depeus bivi dònnia dì. E de su restu, eia, si nd'apu chistionau atras bortas puru, chi no megu a mi sballiai, est a narai ca s'apu arremonau de sa cosa in calincunu atru artìculu puru, tra totus cussus chi ndi funt bèssius aforas in totus custus ùrtimus annus po is Novas de su Diàriu Sportivu: is antigus aregus (ma sa cosa ballit, puru, po is antigus egìtzius) teniant unu deus feti, siat po sa bona sorti ca po sa maba sorti; e duncas, torrendi a is antigus aregus, Zeus fiat su deus ca ti ndi podiat scudi, apitzus de sa conca, unu lampu (lampu ti pighit! Si narat in sardu, de su restu), cumenti ti iat a podi fai unu regalu, mancai una nova bona, unu stiddiu de bona sorti po calincuna faina de importu chi megas a sighiri. 

E duncas, eia, sa chistioni de sa bona sorti (o de sa maba sorti) ballit po su chi pertocat su campionau de bòcia, po su chi pertocat is giogus: dònnia giorronada ndi iant a podi arribbai cosa bonas, ma cosas lègias puru. E est craru ca deu si auguru ca in sa vida cosa de bosatrus nci potzant essi feti diis drucis e bellas, e chi depessint puru arribbai is dannus, e is arroris, s'ùnica cosa chi si potzu augurai, in dì de oi, est cussa de tenni totu sa fortza chi serbit po si ndi scabulli de is problemas (cumenti si iat a podi narai, a trassa de cumenti si narat in italianu etotu), de si torrai a strantaxai, acoitu, apustis chi nd'arruis. 

E totu custu, duncas, po su chi pertocat is strollichiminis chi mi praxit (fintzas a m'amachiai, cumenti si iat a podi narai, e cumenti seu narendi, de su restu) a nci stichiri me is artìculus chi ndi pesu in sardu (e feti me is artìculus chi scriu in sardu, ca in totu is artìculus chi deu e is collegas cosa mia ndi bogaus aforas po su giàssu de su Diàriu Sportivu, e chi benint a essi scritus in italianu, podeis abarrai segurus ca no nc'eis a agatai contus o contixeddus); e chi fatzu custu giogu (chi est cussu de mi strollicai unu pagheddeddu impari a bosatrus, ainnantis de mi nci fuiai, a fundu 'e susu, me is chistionis chi pertocant feti, e naru feti, su mundu de is giogadoris e de is allenadoris diletantis chi currint me is campionaus pesaus po diletantis, mi parit bastanti craru, e seu chistionendi de cussus ca is de sa Federatzioni Italiana de su Giogu de su Càlciu e is de sa Lega Natzionali de is Diletantis ndi pesant dònnia annu, est po ndi cassai s'atentzioni, puru, de totus cussas personas (mascus e feminas) chi, mancai no funt acapiadas a istrintu cun is legas apicigadas a su mundu de sa bòcia, ma chi mancai tenint sa gana, e su disìgiu, de podi lìgi calincuna riga, calincunu artìculu pesau e scritu in sardu, fadendi su contu ca, eia, is personas chi sciint ligi su sardu (e chi ddu scint scriri, e chi ddu scint, mancai, feti chistionai) benint a essi sèmpiri prus pagu; e custu est unu pecau mannu, e iat a essi una lastima tropu manna chi innoi in s'isula is personas no depessint prus chistionai in lingua sarda; ca chi su sardu no ddu chistionaus, po incumentzai, nosu sardus chi biveus apitzus de s'isula, intzandus, eia, si cumprendi, po sa lingua sarda no nci iat a essi benidori, chi cumprendeis su chi si bollu narai. 

E duncas, eia, mai ammanchint a su mancu unu pagheddeddu (a su mancu unu pagheddeddu feti, cumenti si iat a podi narai, a trassa de cumenti si narat innoi in Bidd'e Sorris etotu) de strollichiminis, de contus e de contixeddus dònnia cida, e mancai, si ddu torru a arrapiti, deu no sciu mai cali lega apa a pigai, cali arrastu apa a sighiri candu mi pongiu a scriri custus artìculus; totu dipendit de totu is bideas, de totus is pentzamentus chi tèngiu, de cida in cida, badda badda in conca; ca sa conca mia, eia, si potzu narai custu puru immoi chi nci seu (e sighendi a giogai a fai su poeta, prus ca su giornalista sportivu), parit una discoteca, po sa cantidadi manna de tontesas, e de bideas, po ddu narai in manera prus galanti puru, chi tèngiu me in su crobeddu. 

E duncas, eia, mi parit de podi narai ca po custa cida puru apu giai giai spaciau cun is strollichiminis (e mancu mali, e gràtzias a su Cielu, s'at a megai calincunu de bosatrus, berus est?), e duncas, sèmpiri chi seis de acòrdiu cun mei, podeus andai a castiai cumenti funt andadas is cosas apustis de custu fini de cida prenu, fintzas a cucuru, de partidas. 
E chi seis de acòrdiu, deu ia andai a castiai, po primu (pròpriu cumenti apu fatu sa cida passada, de su restu, chi si ddu arregodais, e chi no si ddu arregodais deu seu innoi pròpriu po si ddu fai torrai in conca, cumenti si iat a podi narai, puru) cumenti funt andadas is cosas a is tattaresus de sa Torres, fadendi su contu ca si nd'apu chistionau giai sa cida passada: is arrùbius-brau, duncas, chi si ddu arregodais (e chi puru no depessit essi diaici, est a narai, chi puru no si ddu arregodais, intzandus nci pentzu deu!), me is cidas passadas iant pèrdiu una bella pariga (pariga a sa sarda, e si cumprendit beni, berus est?) de partidas, s'una avatu de s'atra (tres partidas, po essi prus pretzisus puru cumenti unu giornalista iat a depi essi, sèmpiri chi bolit fai beni, est a narai in gràtzia de Deus, su trabballu cosa sua), e in dì de oi, funt de sa primu giorronada chi no arrannescint a binci una partida. E duncas, m'acudu a si narai ca in s'ùrtima bessida, cussa chi, po si cumprendi mellus a pari, ant giogau custu fini de cida passau, in domu de is de su Pesaro, is arrùbius – brau, sighius de Andrea Pazienza, funt arrannèscius a ndi cassai unu puntixeddu, fadendi su contu ca sa partida s'est serrada cun su resultau de zeru a zeru; e torraus a nosu, est seguru ca chi essint bintu (chi fessint arrannèscius a binci, chi si sonat mellus diaici) fiat stètiu meda mellus, ma a sa fini unu puntixeddu fait sèmpiri prexei, mescamente candu annadas in acuas lègias. E mancai, ddis apu portau bona sorti deu, cun s'artìculu chi nd'est bèssiu aforas sa cida passada (e ddu seu narendu po brullai, po arriri unu pagheddeddu, e isperu ca si cumprendat), e immoi, mancai, fadendi su contu chi ndi seu chistionendi torra, po custa cida puru, mancai ant a arrannèsci a binci sa partida chi ant a giogai in custu fini de cida chi est arribendindi, in domu cosa insoru, est a narai a su campu comunali Vanni Sanna, contras a is de su Forlì. Chi est cussu chi ddis auguru, a su mancu. 

E duncas, chi si ddu arregodais (desinò nci pentzu deu a si ddu arregodai, e megu a brullai, si cumprendit?), sa cida passada, apustis de s'essi chistionau de cumenti funt andendi is cosas in domu de is de sa Torres (cumenti apu fatu custa cida puru, po andai a biri chi funt arrannescendi a ndi bessiri afora de su stampu innoi nci funt arrutus), s'apu chistionau de cumenti funt postas is cosas in su mundu (mannu meda, fadendi contu ca nci funt otu listas in totu) de sa Segunda Categoria. 
E duncas, po custa cida, deu pentzu ca sa cosa mellus chi si potzat fai (sa cosa mellus chi si potzat fai tra totus cussas chi mi funt benidas in conca, po ddu narai mellus puru) siat cussa de andai a fai su pròpriu giogu, ma cun totus is scuadras chi currint in su campionau de sa Primu Categoria. Sèmpiri chi seis de acordiu cun mei, est craru. E duncas, deu ia a partiri, mi parit craru, de sa Lista A: una de is cosas prus togas, una de is cosas chi mi praxit a fai de prus, est cussa de fai su contu de su tempus chi passat, aintru de un annu, andendi a fai su contu de cantus giorronadas, po su chi pertocat su campionau de bòcia de is diletantis, ant acutu giai a giogai o, mancai, cantu partidas mancant po spaciai sa stagioni. E duncas, eia, arribbaus chi seus a sa metadi de su mesi de ladamini (cumenti s'apu arremonau giai ainnantis, fadendi su contu ca custu artìculu nd'at a bessiri aforas de giòbia, cumenti a sèmpiri, candu at a essi su de su sexi), is scuadras chi currint me in su campionau de sa Primu Categoria funt arribbaus a sa de tres giorronadas: po ddu narai mellus, intzandus, ant acutu, giai, a giogai tres partidas e immoi, in custu fini de cida chi est arribendindi, ant a giogai sa de cuatru giorronadas. E duncas, eia, in sa Lista A, cumenti s'apu giai arremonau, a su primu postu agataus duas scuadras: seus chistionendi de is de sa Decimo 07 (s'assòtziu, est craru, chi nd'ant pesau, giai de una bella pariga de annus, in Deximumannu) e de is de s'Accademia Sulcitana, ca apustis de duuscentus e setanta minudus de giogu, s'agatant cun calincuna cosa cumenti a seti puntus in totu, chi ndi funt arribbaus, est craru, gràtzias a duas partidas bintas e a una partida chi ant serrau cun su resultau in paridadi. 
E duncas, sa primu cosa chi si potzu narai, sa primu cosa chi mi benit de si narai, est ca, parit una brulla, ma is duas scuadras ndi funt artziadas, totu e duas, si cumprendit, in su campionau de sa Primu Categoria pròpriu cust'annu, fadendi su contu ca s'annu passau fiant in su campionau de sa Segunda Categoria, e in sa pròpriu lista, puru (e seus chistionendi de sa Lista B, e si ddu naru po benni a essi su prus pretzisu possibili). 
E duncas, meda bortas, su prus de is bortas (fait a ddu narai diaici puru) is scuadras chi ndi artziant de una categoria prus pitichinninnia (cumenti iat a podi essi cussa de sa Segunda, po nd'arremonai una) in una prus arta, in una prus manna, intzandus nci ponint unu pagheddeddu de tempus po pigai sa cunfiantza, ddi naru diaici, cun su campionau nou. E invècias, is de s'Accademia Sulcitana e is de sa Deximu 07 funt arrannèscius a cuncodrai duas rosas chi funt fortis meda, e duncas, eia, parint ca gioghint in su campionau de sa Primu Categoria de unu bellu tanti de annus, po totu su de bonu chi funt fadendi a biri a is tifosus cosa insoru (e puru a is tifosus de is scuadras de is aversàrius). 
Candu ia intèndiu, una bella pariga de cidas fait, a is de su Deximu po circai de cumprendi ita totu s'abertant de cust'annu, de custa stagioni sportiva, su diretori sportivu de s'assòtziu, Maurizio Carta mi iat scoviau: «De sa bidea chi mi seu fatu, apitzus a custu campionau, e apitzus, duncas, de totus is scuadras chi ant a curri impari a nosu, potzu narai ca, a su mancu a parri miu, custa at a essi una stagioni toga meda, eia, ma echilibrada puru; fortzis, e ddu naru chentza timi de mi sballiai, at a essi una de is stagionis prus togas chi ndi funt bessidas aforas in totus custus ùrtimus annus, chi cumprendeis su chi seu circhendi de si narai. Po su chi pertocat – mi iat contau Carta – teneus sa gana, sa gana bella, si cumprendit, de fai a biri a totus cantu balleus; ma s'umilesa no s'at a depi mancai mai. Eus a circai de no essi una de cussas scuadras, e si ndi intendinti medas de storias diaici, chi arribbat in su campionau de sa Primu Categoria, ddoi fait una stagioni e, apustis, ndi torrat a cabai, po annus e annus de sighiu, in su campionau de sa Segunda Categoria. Eus a circai de fai de totu, duncas, po fai una bella figura. Po primu cosa, duncas, ispereus de podi annadai in acua bonas, apustis eus a biri cumenti ant a andai is cosas, e cumenti su campionau at a andai ainnantis, mancai eus a cumprendi mellus ita podeus fai, a ita puntu podeus arribbai, e megu a chistionai, est craru, de sa positzioni in sa lista. Deu creu ca su chi sa scuadra depit fai, est cussu de circai de mellorai, dì po dì, giorronada po giorronada, e apustis, candu eus a arribai a su mesi de gennàrgiu, o mancai puru, a su mesi de friàrgiu, intzandus eus a podi fai is contus po cumprendi cumenti seus postus e, mescamente, cumenti funt postas is scuadras de is aversàrius». 
E duncas, eia, fadendi su contu ca is de su Deximu 07 in dì de oi s'agatant, cumenti s'apu giai arremonau, a su primu postu de sa lista, cun seti puntus, custu bollit narai ca Maurizio Carta nci iat biu beni, est a narai ca sa previsioni chi at fatu, apitzus de sa scuadra cosa sua etotu, est stètia toga, e giusta puru. Riccardo Spini puru, chi est s'allenadori de s'assòtziu decimesu, candu ddu apu intendiu po ndi pesai una ciaciarrada, m'at narau, prus o mancu, is pròprius cosas chi mi iat scoviau su diretori sportivu de s'assòtziu cosa sua. «Po su chi si pertocat, po su chi pertocat sa Deximu 07, intzandus, teneus sa gana, si disigiu, chi si praxit de prus cumenti sonat, de fai unu campionau de importu, fadendi su contu ca custus piciocus, is piciocus chi faint torra parti de sa rosa po cust'annu puru, ant bintu, e ddu ant bintu beni meda, su campionau de s'annu passau de sa Segunda Categoria, ma tocat a narai, puru, ca su campionau de sa Primu Categoria benit a essi meda, ma meda prus dificili. Nc'at a essi, po primu cosa, de pigai cunfiantza, cumenti si iat a podi narai, cun su campionau, cun sa situatzioni nova; eus a circai, in s'interis, de ndi cassai sa cantidadi prus manna de puntus, fintzas de is primus giorronadas de giogu, ma no seu de seguru deu cussu chi abarrat a chistionai de su chi at a fai, o de su chi no at a fai, ainnantis de incumentzai cun is giogus, chi arrannèsceis a mi sighiri po su chi seu narendi. Sa primu cosa chi eus circau de fai est stètia cussa de ndi pesai una scuadra, una rosa forti, chi potzat curri, e beni, in unu campionau dificili cumenti est cussu de sa Primu, e fait a narai ca, eia, nci seus arrannèscius, gràtzias mescamente a totu su trabballu chi ant fatu, in s'istadi, is dirigentis de s'assòtziu. Ant pigau is giogadoris chi potzant andai beni cun sa bidea de càlciu, cun sa bidea de giogu chi tèngiu deu in conca, e po un allenadori custa benit a essi una de is cosas de importu prus mannu. Seu prexau meda, duncas, e nci iat a mancai atru puru, fadendi su contu, mescamente, ca sa rosa est stètia pesada in unu mesi, in unu mesi e mesu, e custu bollit narai ca a sa metadi de su mesi de treulas estus giai acabbau de trabballai in su mercau, cun is comperas de is giogadoris chi fiant bellas ca spaciadas, chi cumprendeis su chi si seu narendi. Eus giogai dònnia partida cun totu s'afròddiu chi serbit, e de su restu s'afròddiu est una de is cosas de importu prus mannu po binci is partidas, ca candu tenis su coru prenu de afòddiu, prenu fintzas a cucuru, cumenti si iat a podi narai e cumenti si narat, intzandus ti benit mellus, ti benit prus facili puru trabballai po is allenamentus chi ndi pesaus aintru de sa cida. Ma un'antra cosa de importu prus mannu est cussa de abarrai cun is penis prantaus in terra, mescamente candu arrannescis, mancai, a binci una pariga de partidas de sighiu; candu ses unu piciocheddu giòvunu, mancai, e arrannescis a binci una pariga de partidas, s'una avatu de s'atra, intzandus nci iat a podi essi s'arriscu de pentzai de essi is prus fortis, de essi giai arribbaus, cumenti si iat a podi narai, e invècias su giogu de sa bòcia si imparat, dònnia giorronada, ca no podis abasciai sa guàrdia, cumenti si narat a trassa de s'italianu etotu, nemmancu po unu mesu segundu, desinò benit a essi facili meda a fai figuras lègias; s'umilesa, antzis, est sa crai po circai de ndi cassai is bincidas, po circai de ndi cassai sa bìncida finali, sa bìncida de su campionau». 
E duncas, eia, iat a fai a narai ca a is de sa Deximu 07 is cosas ddis funt andendi beni meda, e immoi eus a biri cumenti ant a sighiri a curri, partendi, po incumentzai, de sa partida chi ant a depi giogai custu fini de cida chi est arribendindi etotu, in domu cosa insoru, contras a is ollastrinus de s'Idolo, sa scuadra chi nd'ant pesau in Arthana, e chi nd'at a cabai, at a arribbai in Deximu cun zeru puntus in buciaca, fadendi su contu, e a fai is contus nci poneus pagu meda, ca ant pèrdiu totus is tres partidas chi ant giogau fintzas a immoi. 
Po su chi pertocat is de s'Academia Sulcitana, chi est s'atra scuadra, si ddu apu giai arremonau, de su restu, chi s'agatat a su primu postu de sa lista, impari, pròpriu, a is deximesus de sa Deximu 07, si potzu narai, po incumentzai, ca in sa giorronada chi at a balli po sa de cuatru, si dda ant a depi biri contras a is ollastrinus de su Cardedu (un'antra de cussas scuadras chi ndi funt artziadas, pròpriu cust'annu, in su campionau de sa Primu Categoria, apustis de essi bintu su campionau de sa Segunda Categoria de s'annu passau, e megaus a chistionai duncas, e si cumprendit, de su campionau de sa stagioni de su duamilla e binticincu – duamilla e bintises). 

E duncas, andaus a castiai, immoi chi nci seus, cumenti funt andadas is cosas po is de s'Accademia Sulcitana: in sa prima giorronada, duncas, funt stètius bonus a binci in domu de is de s'Idolo (chi s'apu arremonau pròpriu ainanntis, nemmancu a ddu fai aposta), cun su resultau de unu a zeru; in sa segunda partida chi ant giogau cust'annu, invècias, nd'ant cassau unu puntixeddu, 'tendei 'tendei (cumenti si megàt sa bon'anima de mamma mia, ca ddu naràt fatu fatu meda), in sa partida chi ant giogau, in domu cosa insoru, contras a is de sa Deximu 07. In sa giorronada passada, invècias, is de s'Accademia Sulcitana funt arrannèscius a binci, cun su resultau, tundu tundu e togu meda, de tres a zeru, in domu de is de su Biddamanna de Strisaili. Cun ses puntus, invècias, (est a narai, est craru, cun unu puntixeddu in mancu de is chi tenint is primus duas scuadras de sa lista) agataus una truma manna de assòtzius, cuatru scuadras duncas, ca si depint pretziri, ddi naru diaici, su segundu postu in sa lista, partendi de is de sa Gioventudi de Sarroch (issus puru ant bintu su campionau de sa Segunda Categoria de s'annu passau, in sa Lista A), is de su Tertenia, is de s'Ulassa e is de su Cardedu etotu. 
E custu, duncas, po si fai a cumprendi de cumenti funt cuncodradas is cosas cust'annu, e de cantu at a benni a essi trabballosu su de arrannesci a ndi cassai su primu postu de sa lista e, duncas, eia, sa bìncida de su campionau. 

Ma sigheus a andai ainnantis e duncas, eia, cumenti eus fatu po sa Lista A, andaus a fai su pròpriu giogu cun is scuadras de sa Lista B. 
A su primu postu, cun seti puntus in totu, giai allogaus in buciaca, agataus is de s'Atleticu de Masainas, ca a is pabas, peròu, tenint una truma de seti scuadras, cun ses puntus in buciaca (est a narai, duncas, cun unu puntu feti in mancu de is chi tenint is de su Masainas), partendi, duncas, de is de su Bidda Matzraxia, passendi po is de sa Virtus de Futei, de is de s'Isili, de is de su Perdaxius, e arribendi a is de su Segariu, de s'Antiochense e fintzas a arribbai a is de su Gonnos. Is primus de sa lista de s'Atleticu de Masainas, immoi, est a narai, in sa giorronada chi s'at a giogai pròpriu custu domìnigu chi nd'at a benni, si dda ant a depi biri contras a is de su Gonnos, in domu cosa insoru etotu; tra is partidas prus togas, nci depeus ponni, custu est pagu ma seguru, sa partida tra is de s'Isili e is de su Biddamatzraxia, ma toga meda at a essi, ndi seus segurus, cussa tra is de sa Virtus de Futei e is de su Sadali. 
E duncas, eia, una pariga de cidas fait nd'apu pesau una bella ciaciarrada cun Luca Melis, chi est s'allenadori de is de s'Isili, chi m'at contau ca si chi bisat de fai, impari a totus is chi trabballant po s'assòtziu, est cussu de «circai de fai cresi, in sa manera mellus chi si podit, totus is giòvunus chi teneus in sa rosa cust'annu, e chi no funt pagus. De su restu – at sighiu a mi contai Luca Melis – su dinai chi s'assòtziu tenit de spendi, e duncas, podit spendi, po su mercau e duncas po ndi pesai sa rosa, no est meda, antzis; e duncas su de fai giogai is piciocheddus prus piticus de edadi, is piciocheddus chi mancai nd'arribbant de sa bidda etotu, est s'ùnica bia chi podeus pigai, chi cumprendeis su chi megu a si narai. A narai sa beridadi – s'est acutu a mi narai Luca Melis – cust'annu eus circau de rafortzai, de afortigai sa rosa cosa nosta, fadendi su contu ca me is ùrtimus annus nd'eus cassau sa sarvesa feti me is ùrtimus minudus de sa stagioni, e si podeis imaginai totu su chi eus dèpiu passai, e gei si cumprendit, deu creu. Si iat a praxi duncas, po custa stagioni, po sa stagioni de su duamilla e binticincu – duamilla e bintises, a fai unu campionau chi potzat benni a essi unu pagheddeddu prus selenu, chi cumprendeis su chi megu a si narai; sa cosa de importu prus mannu, po su chi si pertocat, est cussa de arrannèsci a donai sa possibilidadi a totus is giogadoris giovuneddus chi teneus in sa rosa cosa nosta, de podi giogai e de fai a biri a totus cantu funt fortis, e megu a chistionai, est craru, de totus cussus giogadoris chi si ddu ant a minesci, partendi de cussus, duncas, chi ant a trabballai mellus aintru de sa cida, po is allenamentus. Cussu de cust'annu at a essi unu campionau tostau meda, chi cumprendeis su chi si bollu narai: nci funt una biga manna de scuadras chi tenint una storia de importu mannu a is pabas; in sa lista cosa nosta nci funt tres scuadras chi ndi funt cabadas, deretas deretas, pròpriu cust'annu, de su campionau de sa Promotzioni, e in prus si dda eus a depi giogai contras a una scuadra forti cumenti a is de s'Arbus, chi me is ùrtimus annus curriant in su campionau de s'Ecellenza e in su campionau de sa Promotzioni puru. Dònnia domìnigu, intzandus, s'abertat una batalla, ddu scieus giai de su restu, e scieus giai ca su de ndi cassai calincunu puntixeddu no at a benni a essi una cosa facili, antzis; s'ispera cosa nosta est cussa de arrannèsci a ndi cassai unu bellu tanti de puntus, giai a partiri de custas primus giorronadas, po circai de s'acostai, acoitu, a sa cantidadi de puntus chi ant a serbiri po ndi cassai sa sarvesa». 

E duncas, seu arribbau giai giai a sa fini, po custa cida puru, fadendi su contu ca su tempus, ma pruschetotu su logu chi tèngiu de preni cun custus fueddus, cun custas rigas, est giai spacendi, e intzandus, sèmpiri chi seis de acordiu cun mei, andaus a castiai, impari, e si cumprendit, cumenti funt cuncodradas is cosas po su chi pertocat sa Lista C, sèmpiri po su campionau de sa Primu Categoria. 
E duncas, a su primu postu agataus is de su Macumer, sighius de Romano Marchi, chi ant giai acutu a si ponni in buciaca calincuna cosa cumenti a seti puntus, chi ndi funt arribbaus gràtzias a duas partidas bintas e a una partida chi ant serrau cun su resultau siddau in paridadi; e duncas, a fai is contus nci poneus pagu meda (fadendi su contu, pruschetotu, ca su campionau est incumentzau feti de tres cidas), is grogus-arrùbius ant bintu in sa primu bessida de sa stagioni nova, in domu cosa insoru, contras a is de sa Montalbo de Thiniscola, cun su resultau, togu meda, fait a ddu nai, de tres a unu; in sa bessida apustis, cussa chi s'est giogad su cincu de su mesi de ladamini (po essi prus pretzisus e po si cumprendi mellus puru), is de sa Lulese funt arrannèscius a firmai sa cursa de sa scuadra de Marchi, cun sa partida chi s'est serrada cun su resultau de unu a unu; e in s'ùrtima bessida, cussa chi s'est giogada pròpriu custu domìnigu passau, is de su Macumer ant bintu cun su resultau de duus a unu contras a is de sa San Marcu de Crabas. E duncas, apu intendiu pròpriu s'allenadori de is de su Macumer, Romano Marchi, po sciri cumenti ddis funt andendi is cosas; ca, cumenti si arrapitu fatu fatu, no nc'est nesciunu ca podis sciri cumenti funt andendi is cosas in una scuadra mellus e prus de s'allenadori, chi cumprendeis su chi si bollu narai. E duncas, eia, no si fatzu perdi atru tempu (no si fatzu perdi su tempus chi, mancai, nemmancu teneis, cumenti si naru fatu fatu) e si intregu, acoitu e allestru, is fueddus chi m'at regalau Marchi: «Sa partida chi eus giogau contras a is de sa San Marco est stètia sa prima, apustis de unu bellu arrogheddu de tempus, chi eus giogau torra in su campu cosa nosta, est a narai a su Scalarba, ca in s'interis est stètiu aconciau, e immoi est stètiu fatu totu in erba naturali. Nd'est bessida aforas una isfida toga meda e deu creu de podi narai che seus arrannèscius a giogau mellus de is aversàrius cosa nosta, a su mancu po calincuna cosa cumenti a sessanta – setanta minudus; apustis de nd'essi cassau su gol chi est bàlliu po s'unu a zeru, eus tentu una bella pariga de ocasionis po ndi pesai su segundu gol puru, ma nc'est de narai ca seus stètius pagu abbilis. Invècias is aversàrius cosa nosta funt arrannèscius a fai su gol chi est bàlliu po s'unu a unu, ma gràtzias a su Cielu seus arrannèscius a strantaxai acoitu sa conca e gràtzias a su segundu gol nd'eus cassau un'antra bìncida, de importu mannu meda. De su restu, seus ancora a is primus bessidas de sa stagioni e est chitzi po cumprendi cumenti ant a andai is cosas in custu campionau; in dì de oi s'agataus a su primu postu, custu est berus, e si fait prexei, ma a sa fini no teneus tempus po abarrai innoi a castiai sa lista, ma depeus sighiri a curri, a trabballai po circai de si fai agatai prontus po totus is partidas chi s'abertant, a cumentzai, mancai, de sa partida chi eus a depi giogai in domu de is de su Pattada». 






Attività realizzata col contributo della Regione Sardegna. IMPRENTAS 2024-2025. LR 22/2018 art. 22