Segunda Categoria: is de su Cardedu funt is primus de sa lista, is de sa Virtus Furtei sighint a fai spassiai is tifosus cosa insoru; is de sa San Marcu de Crabas ndi cassant is de su Macumer

E duncas, eia, a cantu parit, de su chi ndi potzu cumprendi castiendi su tialu de su calendariu (candu trabballu, tra una cosa e s'atra, abarru apicigau a su calendàriu e a s'orologiu, puru, chi cumprendeis su chi si bollu narai cun su fueddu "apicigau", ca custu de abarrai a castiai ita ora est, deu creu custu, a su mancu, est una de is mobadias prus mannas chi si ndi funt protzias apitzus in custus tempus modernus chi si tocat a si bivi), seus arribbaus, puru, a su de tres mesis de s'annu, e no mi parit nemmancu berus, a si narai sa beridadi. 

E duncas, po primu cosa, custu bollit narai ca, eia, su tempus est sighendi a andai ainnantis po mei puru, chi no est una cosa chi podeus pigai po segura, e gei ddu scieis, gei ddu eis a sciri, mellus de mei puru, ca in custa vida podit sucedi de totu, eia, podit sucedi de totu in dònnia segundu (po giogai unu pagheddeddu a fai su poeta, e no feti su giornalista, ca gei ddu scieis, de su restu, ca mi praxit unu pagheddeddu a mi strollicai, impari a bostrus etotu ca custus artìculus ddus ligeis e ddus sigheis puru, chi potzu manigiai custu fueddus), ca seus fatus de petza moddi, e is ossus si podint arrogai in centumilla arrogheddus, e duncas, eia, no s'estus a depi scaresci mai (custu est su giogu chi fatzu deu, a su mancu; de cumenti si biveis sa vida bosatrus no ndi potzu sciri meda, mi parit craru) ca dònnia segundu chi si biveus, in custa vida maca meda e totu ghetada a pari, est unu regalu de su Cielu (cumenti m'est bènniu de narai, gioghendi, torra, a fai su poeta). 

E duncas, eia, fadendi su contu ca sa vida mia iat a podi spaciai de unu segundu a s'atru (una de is mobadias chi carriant a s'omini modernu, ddi nau diaici, prus ca a is femineddas, a nai sa beridadi, est cussa chi pertocat su coru, e duncas, eia, seu chistionendi de is infartus, est a nai de candu su coru cosa tua si frimat de bati. E is cosas funt strambas medas: oi ses allirgu cumenti una Pasca Manna, e cras, mancai, ses crocau in su letu de un uspidali), no potzu fai atru ca torrai gràtzias a Deus, (o a su Cielu, chi si praxit de prus cumenti sonat sa cosa) po su bisu miu, diaici mi megu, dònnia dònnia di, candu mi ndi pesu e mi pongiu a pregai, chi est sighendi a andai ainnantis, e po su fatu de no tenni daboris o arroris de cumbati. 
E isperu chi sa pròpria cosa si potzat narai de bosatrus puru, de su restu, e mi parit craru. 

Ma torraus a nosu: apu incumentzau a mi scroxai (cumenti mi praxit a narai) sa primu cida de su mesi de martzu, ca a cantu parit (sèmpiri po pigai po bonu su chi est narendumì su calendàriu: at a essi contendumì brullas?) at a essi bellu longhiteddu. E de seguru at a essi prus longhiteddu de su chi est stètiu su mesi de Friàrgiu, chi m'est partu chi si ndi siat giai giai bolau; at a essi poita ddi ant postu feti bintotu diis, at a essi ca mi seu gosau, ddi nau diaici, sa possibbilidadi de fai calincuna festa in prus de su chi fatzu in su fetianu (e po festa bollu narai ca, eia, mancai mi seu papau cussu druciteddu in prus de su chi fatzu in su fetianu o, mancai, cuss'arrogheddu de ciuculati in prus de su chi fatzu in su fetianu), ma, sa chistioni est chi, eia, su mesi de friàrgiu nc'est passau currendi allestru, cumenti chi fessit unu leporeddu chi si scapat a curri in mesu a su sartu. 
E duncas, immoi nc'at a essi de fai sa parti de su trabballu prus tostada, e prus fadiosa, a su mancu, po custus primus ses mesis de s'annu, fadendi su contu ca su mesi de martzu est bellu longhiteddu (trintunu diis, e seu seguru, giai de immoi, ca m'at a parri cumenti chi no ant a passai mai prus, e megu a brullai, e si cumprendit) e fadendi su contu, mescamente (mescamente po su chi mi pertocat, est craru) ca custa cida etotu, su mercuis de su cincu, at a incumentzai sa caresima, chi seu costumau a sighiri giai de una pariga de annus, chi pròpriu si depu narai sa beridadi. 

E duncas, eia, po s'acapiai unu pagheddeddu a su mundu de sa bòcia de is giogadoris diletantis (chi est sa lega de importu prus mannu po su chi pertocat su giàssu de su Diàriu Sportivu, chi est su giàssu, de su restu, innoi ndi bogu aforas is artìculus chi ndi pesu in su sardu campidanesu, dònnia dònnia giòbia de s'annu, chentza de ndi sartai nemmancu unu, e sa cosa ballit, est craru, puru po is diis de festa), mi intendu cumenti cussus piciocheddus chi incarrerant, chi incumentzant cun is allenamentus in s'istadi po si cuncodrai po sa stagioni de giogus, cussa ca, a trassa de s'italianu etotu, tzerriaus "preparatzioni atletica". 

E ita benit a essi, custa preparatzioni chi si seu arremonendi? Est, chi pròpriu si depu spiegai sa cosa in cuatru fueddus, s'allenamentu chi pertocat mescamente is cambas e su restu de su corpus, ca unu giogadori fait po si cuncodrai po su campionau; e duncas, eia, is cosas andant diaici, prus o mancu: po calincuna cosa cumenti a trinta diis, is giogadoris abarrant totu curri curri, po duas, tres oras a sa dì, chentza de ndi sartai nemmancu una (seu chistionendi de is diis, si cumprendit, berus est?). E duncas, eia, in custas trinta diis de trabballu, chi incumentzant, prus o mancu, apustis de is festas po sa metadi de su mesi de Agustu, chi cumprendeis su chi si bollu narai, is giogadoris currint e no faint nudda de atru, ca giai giai no tocant, mancu pagu pagu, est a nai, giai giai nudda, sa bòcia (mancai siant gigoadoris de bòcia, e parit una brulla, berus est?); ma passant totu su tempus de s'allenamentu a fai esercìtzius, cumenti ddus tzerriaus a trassa de s'italianu etotu. 
Ma po su prus, eia, si ddu torru mancai a arrapiti, passant is oras a curri. E parit una brulla. 
Ma feti fadendi diaici, est a nai, feti currendi, su corpus cosa tua benit a essi allenau, est a nai ca, feti currendi po una biga de oras, e po unu mesi de sighiu, ainanntis chi incumentzit su campionau, su corpus cosa tua arrannescit a curri, a totu coddu (cumenti si iat a narai in Bidd'e Sorris, e cumenti si narat, de su restu, in sa bidda innoi seu crèsciu e innoi ancora m'agatu), po cussa ora e mesu de partidas chi ti depis giogai, dònnia dònnia fini de cida (mancai nci siant partidas aintru de sa cida puru, a bolli narai sa beridadi e a bolli narai is cosas cumenti funt), po noi mesis de sighiu. 

E duncas, eia, mi intendu, torrendi a nosu, o mellus, torrendi a mei, cumenti chi fessi unu piciocheddu chi est po atacai, po incumentzai cun sa preparatzioni atletica, fadendi su contu ca apu atacau a scriri custas rigas (chi bosatrus eis a ligi feti su giòbia, cumenti seis costumaus a fai de calincuna cosa cumenti a cuatru annus, de su restu) su martis (su cuatru de su mesi de martzu) e fadendi su contu ca su cincu (chi fiat de mercuis) incumentzat, po is cristianus, a su mancu, e duncas, po is catolicus, sa caresima, chi s'apu giai arremonau ainnantis. 
E ita benit a essi sa caresima chi no is coranta diis chi ddoi funt ainnantis de is festas de sa Pasca? 
E duncas, a fai s'esèmpiu nci poneus pagu meda: sa Pasca Manna, o, mellus ancora, is festas po sa Pasca Manna benint a essi, po unu catolicu – cristianu, a trassa de s'incumintzu de sa stagioni, e duncas, s'incumintzu de su campionau, po unu giogadori de bòcia. 
E sa chistioni de sa preparatzioni atletica, si ddu naru immoi chi nci seu, ballit aguali siat po is giogadoris diletantis, e siat po is giogadoris chi tzerriaus professioneris: e duncas, is primus funt cussus chi ndi cabant in campu e abarrant po noranta minudus a curri avatu de sa bòcia feti po su spàssiu, po su prexiu chi ndi tenint, invècias is atrus (chistionu de is professioneris, est craru, berus?) ndi cabant in campu, puru (e fortzis si iat a podi narai: mescamente? No sciu cumenti dda pentzais...) po ndi incasciai una barca manna, una surra (cumenti si narat in bidda mia etotu) de dinai. 

E duncas, eia, su chi mi contant, chi mi narant, chi m'arrapitint fatu fatu is allenadoris (deu intendu, cumenti s'apu ispiegau immubagora, feti is allenadoris diletantis, ma is pròprius cosas ddas narant is allenadoris chi sighint is scuadras de professioneris) est ca chentza de sa preparatzioni atletica, chentza de trabballai, e de curri, po cussu mesiteddu chi ddoi est ainnantis de s'incumintzu de is giogus, intzandus is giogus benint a essi pagu spassiosus meda, chi mi cumprendeis su chi si bollu narai. Ca chi no ses allenaus, intzandus no arrannescis a troddi su passu, cumenti si narat in bidda mia, a su mancu. 

E duncas, si iat a podi furriai totu custa chistioni chi nd'apu pesau, puru po su periodu de sa Caresima: a su mancu a parri miu, a su mancu po su chi mi pertocat, chi no fais sa caresima, est a nai is coranta diis de allenamentu chi ddoi funt ainnantis de arribbai a is festas de sa Pasca, intzandus is festas, a su mancu po su chi mi pertocat, si ddu torru a arrapiti (ca mancai po bosatrus is cosas andant in manera diversa, e nci iat a mancai atru puru) benint a essi meda, ma meda prus pagu togas de su chi iant a podi essi. 

E duncas, su chi apa a circai de fai, e cun custa cosa dda acabbu de mi strollicai e de si ndi furai su tempus chi mancai no teneis, est cussa de mi allenai, de circai de mi cuncodrai, in sa manera mellus chi potzu, po candu nd'at a arribbai sa dì de sa festa. E cumenti unu giogadori de bòcia (ma sa cosa ballit, puru, est craru, po totus is atrus giogus) apa a depi aturai atentu (apa a depi abarrai atentu, chi si sonat mellus diaici) a totu su chi m'apa a stichiri in buca e a totu su chi nc'apa a cabai in su stògumu cosa mia: in unu fueddu, eia, apa a depi sighiri una dieta, cumenti seus costumaus a dda tzerriai, a trassa de cumenti si narat in italianu etotu. 

E duncas, a su mancu po su chi mi pertocat (ca dònnia unu de nosu ndi podit pesai sa caresima in sa manera chi pentzat sia su mellus, e nci iat a mancai atru, ca no seu innoi po strunciai a nemus, mi parit craru), apa a depi abarrai chentza de mi bufai nemmancu unu stiddieddu de cafei, po incumentzai cun un esèmpiu, e de cust'annu puru apa a circai de fai sa pròpriu cosa, mancai, cun su tè puru. E no m'apa a podi permiti de papai nemmancu un arrogheddedu (mancu piticheddu) de casu, e nemmancu un ou (fadendi su contu ca petza e pisci non ddi tocu mai), sèmpiri po su chi at a fai, fadendi su contu ca, mi parit bastanti craru, coranta diis no funt pagus de segurus, e in coranta diis, si cumprendit, podit sucedi de totu. 
E cumenti unu giogadori ndi iat a podi sartai una dì de allenamentus (in sa vida fatu fatu ddoi funt atras chistionis de sighiri, e no feti is chistionis apicadas a su giogu de sa bòcia, e mescamente sa chistioni ballit chi no ses unu giogadori professioneri, e si cumprendit beni, berus est?), a mei iat a podi capitai de lassai a perdi sa dieta, a su mancu po unu pagheddeddu, a su mancu po una dì. 
Ma in dì de oi (ca no apu ancora incumentzau cun sa Caresima) si naru ca, eia, mi iat a praxi a sighiri totus is regulas chi deu etotu mi pongiu (po cussa chi si tzerriat, a sa moda, a trassa de is italianus etotu, "autodisciplina"), e s'apa a fai sciri, de cida in cida, cumenti mi funt andendi is cosas po su chi pertocat s'allenamentu cosa mia, ddu tzerriu diaici. 
Po incumentzai, po oi, e duncas, po custa cida, si potzu narai ca, eia, po atacai cun su pei deretu (cumenti si iat a podi narai, a trassa de cumenti si narat in italianu etotu) no apa a tocai nè cosa de papai e nè acua (binu e birra no ndi bufu giai a su naturali, mi benit de narai diaici, chi cumprendeis su chi si bollu narai), e custa cosa ballit, custa cosa at a balli, mellus, po su mercuis de is cinixius (cumenti si iat a podi furriai, in sardu, su ca in italianu, est craru, tzerriaus "mercoledì delle ceneri") e siat po su primu cenabara de sa caresima chi, deu isperu, a su mancu, nd'at a lompi tra una pariga de diis. Ma nareus ca apa a fai sa pròpriu cosa in totus is cenabaras chi ddoi funt in su mesi de martzu, e fintzas me is cenabaras chi ddoi funt in su mesi de Abrili puru, a su mancu fintzas a su chi tzerriaus Cenabara Santu. Chi cumprendeis su chi si bollu narai. 
E totu custu, duncas, ballit po fai su contu de su tempus chi passat, e ballit po fai su contu, po incumentzai a fai is contus, de su tempus chi s'abarrat de si scroxai (ddi nau diaici) ainnantis chi nd'arribbit sa Pasca Manna. 

E chi seis bonus a si fai duus contus a solus, eis a cumprendi mellus, immoi chi s'apu scoviau unu pagheddeddu de cosas, poita s'apu narau, a s'incumintzu de custu artìculu etotu, ca su mesi de martzu abarrat diaici fadiosu, a su mancu po su chi mi pertocat. Ca de bosatrus, cumenti s'apu giai narau, ndi sciu pagu e nudda; e eia, mi iat a praxi a sciri cumenti si dda biveis, cumenti si cuncodrais po sa Pasca Manna, ma no mi ndi potzu scaresci ca, comentecasiat, custu est un artìculu chi depit chistionai, puru, de partidas e de resultaus. 
E si domandu scusa chi mi seu strollicau prus de su tanti, ma de su restu, a su mancu chi eis lìgiu unu de is artìculus chi ndi pesu in sardu, scieis ca mi praxit a mi strollicai, unu pagheddeddu, ainanntis de mi ponni a chistionai de partidas, de resultaus e de gol. 

E duncas, andaus a castiai, sèmpiri chi seis de acòrdiu, cun mei, su chi est sucèdiu in s'ùrtima giorronada po su chi pertocat sa Lista C, e megu a chistionai, ancora, de su campionau de sa Segunda Categoria: chi si nd'arregodais, de su restu, est de sa cida passada (de s'artìculu chi nd'est bèssiu sa cida passada, po du narai mellus puru e in manera unu pagheddu prus galanti) chi seu chistionendusì de cumenti funt cuncodradas is cosas me is otu listas chi faint parti de su mundu de sa Segunda Categoria, mi benit de ddu narai diaici, e chi est, tra totus cussus chi sigheus me is paginas de su giàssu de su Diàriu Sportivu, su campionau prus piticheddeddu, ma nosu ddi donaus su pròpriu importu chi donaus a totus is atrus campionaus prus matucheddus. 

E duncas, sa cida passada ia acutu a si contai de su chi est sucedendi me in sa Lista A e me in sa Lista B, e po custa cida ia a podi andai ainnantis chistionendusì de cumenti funt postas, de cumenti funt cuncodradas is cosas in sa Lista C. E duncas, incumentzu a si narai custu, po primu cosa: unu de is giogus chi mi praxit de prus a fai (e si nd'eis a essi acataus a solus, deu creu, in totu custu tempus) est cussu de ammesturai is chistionis chi pertocant su mundu de sa bòcia cun is chistionis chi pertocant sa vida cosa nosta de dònnia dì; e candu ndi chistionu cun is personas, de cumenti seu circhendi de ndi pesai su trabballu cosa mia (a su mancu po su chi pertocat is artìculus chi ndi pesu in sardu, poita, cumenti eis a cumprendi beni, po is artìculus chi scriu in italianu su giogu, e su spàssiu, benint a essi pagu meda, cumenti si narat, gioghendi unu pagheddeddu cun is fueddus), bollint sciri, iant a bolli cumprendi mellus cumenti custa cosa siat possìbbili. 
Deu circu de ddis ispiegai (megu a chistionai de totus cussus chi mi domandant cumenti funtzionat su trabballu cosa mia, est craru, berus est?) ca a bortas bastat a chistionai de una partida chi ndi sartat (mancai po crupa de su tempus mau) po dda acabbai, apustis, a arraxonai apitzus de atras chistionis (cumenti iat a podi essi cussa chi tzerriaus, a trassa de s'italianu etotu, "crisi climatica"). 
E duncas, nemmancu a ddu fai aposta, cumenti si narat in italianu etotu, custa cida, po su chi pertocat sa Lista C de sa Segunda Categoria, si funt giogadas feti ses partidas, apitzus de is seti chi depiant essi. E su motivu si cumprendi allestru: no nc'est stètiu spàssiu po is de s'Irbono e nè po is de sa Castor de Tortolì poita a Irbono ant prantu (m'est bèssiu de si ddu narai diaici) po sa morti de unu piciocheddu de bintiduus annus (feti bintiduus annus, si narat diaici, fadendi su contu ca, eia, fiat giòvuneddu meda), e no abarru innoi a si scriri su nomini po arrispettu, chi est stètiu bociu in Barì, cun una gorteddada (est a nai, eia, cun unu corpu de gorteddu) in mesu a is piturras, in s'interis chi fiat fadendi is festas po su Carrasciali. 
E, eia, no parit berus, po torrai a arremonai una lega, una chistioni chi apu pigau in consideru me is cidas passadas (e unu pagheddeddu, puru, in s'artìculus de custa cida etotu), de cantu modus, de cantu maneras nci funt, in custu mundu macu e totu ghetau a pari (cumenti mi parit de podi narai, a bortas), po si morri, po s'agatai, mancai, totu trobeddaus in mesu a su disisperu, de unu segundu a s'atru. 
Ca no apa a acabbai mai de si ddu arrapiti: oi ses totu allirgu e fais festa impari a is amigas e a is amigus cosa tua, e s'incras ses bellu ca crocau in su letu de unu uspidali, candu is cosas ti andant beni. 
Poita, eia, eis cumprèndiu beni (e de su restu, deu creu chi custa nova dda eis giai intendia de calincuna atra parti), a cussu piciocu de Irbono is cosas ddi funt andadas peus de su chi podeus imaginai, fadendi su contu ca in Barì at agatau sa morti cosa sua, in mesu in mesu a una festa. Ca a bortas bastat pagu diaderus, mi benit de narai custu, po perdi sa conca: una tassa in prus de biu, mancai, o unu fueddu narau in malu modu, cumenti si iat a podi narai, o fintzas una tontesa cumenti una castiada trota (mi benit de dda tzerriai diaici, e seu seguru ca cumprendeis beni su chi seu circhendi de si narai), e su dannu est bellu ca pesau, cumenti si iat a podi narai. Bastat a atobiai sa persona sballiada, e t'agatas in mesu a is dannus mannus. 
E cussu pòberu piciocheddu depit ai atobiau sa persona peus chi si podiat agatai aranti, a su mancu po sa dì, fadendi su contu chi nd'at ingotu una gorteddada, e bai e circa poita s'ant a essi pigaus a pari. Ca a bortas, eia, mi parit pròpriu de ddu podi narai, perdeus sa conca po tontesas, e nci fuiaus sa vida a s'aliga (sa nosta, eia, ma puru cussa de is atrus, chi benit a essi su pecau, su dannu prus mannu, chi pròpriu si depu narai cumenti dda pentzu) po tontesas ancora prus mannas. 
E duncas, po torrai a nosu, su sindigu de Irbono no at potziu fai atru ca ndi pesai su lutu in totu sa bidda, e duncas, mi parit craru puru (mi parit su mìnimu, cumenti si iat a podi narai), at dèpiu frimai is giogus de sa scuadra de bòcia de sa bidda puru. 
A nai sa beridadi, chi pròpriu si depu narai cumenti funt is cosas, in totu s'Ollastra ant serrau cun is festas po su Carrasciali ainnantis de s'ora, chi cumprendeis su chi si bollu narai; est a nai, duncas, ca no nci funt stètias prus isfiladas de is maschereddas, ma nc'est stètiu feti su tempus (e su logu, cumenti si iat a podi narai), po is lagrimas e po su prantu. E pentzu ca no nci siat su tanti (a su mancu custu est su parri miu) po nc'aciungi nemmancu unu mesu fueddu in prus de su chi apu fatu, apitzus de sa chistioni. 

E mancu mali, mi megu a bortas, a solu a solu, tra mei e mei (cumenti si narat puru, e mi praxit meda cumenti sonat), ca mi tocat a scriri de bòcias, de resultaus e de partidas, e no m'est tocau a abarrai a totu dì a si contai de motus e de genti chi si pigat a pari s'una cun s'atra. 
E po custu, diaderus, mi intendu basau de sa bona sorti, de sa fortuna. 
Ma a sa fini, si iat a podi narai ca no est ca feti poita sigu is chistionis de is giogadoris diletantis e de is scuadras chi ddoi funt spratas in totu sa Sardìnnia, intzandus depu abarrai a ogus e origas tupadas, chentza de podi arraxonai, duncas, nemmancu po unu pagheddu, apitzus de totus is atras cosas chi sucedint, aforas de is campus de giogu. 
E a bortas bastat pagu meda, po incumentzai cun un arraxonamentu chi, mancai, no nci brintat nudda (ma pròpriu nudda) cun is resultaus de is partidas. Ma po oi, po s'artìculu de custa cida, si potzu narai, e si promitu, ca no nc'apa a stichiri nemmancu unu mesu strollichimini in prus de su chi apu fatu fintzas a oi. 
E ddu sciu chi benit unu pagheddu a mabi a torrai a chistionai de partidas apustis chi contas sa storia de unu piciocheddu chi ant motu diaici, a trassa de cani, in mesu a sa bia, ma est cussu chi si tocat a bivi, de su restu, e mi dispraxit meda meda, diaderus, po su mundu macu meda innoi si tocat a bivi (e mi dispraxit, puru, chi pròpriu si ddu depu narai, po totus is personas mabas e foras de conca chi ddoi funt). 

Ma torraus a nosu, ca fortzis fortzis est mellus, ma mellus meda. 
E duncas, a su primu postu de sa lista, cun corantanoi puntus in totu, agataus is de su Cardedu, chi fintzas a oi ant bintu calincuna cosa cumenti a sexi partidas, nd'ant serrada feti una cun su resultau siddau in paridadi (cumenti si narat e cumenti mi praxit a narai, de su restu) e ant pèrdiu feti po duas bortas apitzus de dexennoi partidas in totu. E duncas, is de su Cardedu tenint calincuna cosa cumenti a dexi puntus in prus de is chi tenint is segundus de sa lista de s'Irbono, chi de su restu eus arremonau pròpriu immubagora, ma po chistionis ca cun su mundu de sa bòcia, est craru, si cumprendit, nci brintant pagu e nudda. 
E duncas, est berus ca is de s'Irbono ant giogau dexennoi partidas, cumenti dexennoi funt is partidas chi ant giogau is biancus-arrùbius de su Cardedu, ma is de s'Irbono nd'ant a depi cabai in campu po giogai, puru, sa partida contras a is de sa Castor de Tortolì (e de sa cosa si nd'apu arremonau ainanntis puru, chi si nd'arregodais). 

Po cumenti funt postas is cosas in dì de oi, parit difìcili meda ca is de s'Irbono nc'arrannèsciant a ndi cassai is aversàrius, ma a sa fini, in su giogu de sa bòcia no si podit mai sciri cumenti ant a andai is cosas; e sa cosa prus toga, deu creu, est pròpriu custa. Ca su giogu de sa bòcia no est unu film, mancai a bortas siat spassiosu, chi no de prus, de unu film, pròpriu po su motivu ca, eia, in unu film su regista est cussu chi scriit sa storia, chi sciit ita totu at a sucedi; in su giogu de sa bòcia, invècias, nesciunu podit sciri cumenti ant a acabbai is partidas. 
E de su restu, no est sa primu borta chi si intendit de una scuadra chi, mancai, est abarrada po mesis e mesis a su primu postu de sa lista, e chi apustis, mancai me is ùrtimas seti – otu partidas de sa stagioni, nc'at fuiau a s'aliga sa bìncida de su campionau. E de su restu, intendeus dònnia domìnigu de scuadras mannas (chi mancai funt stètias pesadas cun una biga manna de giogadoris fortis, e chi mancai funt stètias cuncodradas gràtzias a una barca de dinai spèndiu po pagai is giogadoris prus fortis) chi, mancai, nd'arruint (e benint atzapuadas a terra, cumenti si iat a podi narai, manigendi unu fueddu chi intendemmu sèmpiri narai de is cumpangeddus cosa mia a is tempus de is scolas medias) contras a scuadras prus piticheddas, chi, mancai, s'agatant me is ùrtimus postus de sa lista. 
Cun trintanoi puntus, e duncas, a su segundu postu de sa lista (e custu po torrai a nosu e a is chistionis chi festus sighendi) agataus, puru, is de su Triei, chi cust'annu funt arrannèscius a binci po calincuna cosa cumenti a trexi bortas, ma ant pèrdiu ses partidas (chentza de ndi serrai nemmancu una cun su resultau in paridadi, ca a fai is contus nci poneus pagu meda). Cun trintotu puntus, e cun custu serru is chistionis acapiadas a sa Lista C, agataus duas scuadras: is de su Scalepranu e is de su Biddamanna Strisàili, chi tenint in buciaca, a su mancu in dì de oi, trintotu puntus, chi funt undixi in mancu de is chi tenint is de su Cardedu. Ma po acabbai is giogus e duncas po serrai sa stagioni mancant ancora noi giorronadas, e custu bollit narai ca, eia, nci funt ancora bintiseti puntus in totu, chi no funt pagus. Ma chi is de su Cardedu sighint a curri diaici a forti, sa beridadi prus manna est pròpriu custa, po is scuadras chi funt circhendi de ddus sighiri no nc'at a essi pròpriu nudda de fai. 

E duncas, cumenti s'apu narau pròpriu immubagora, no podeus fai atru ca abarrai a biri cumenti ant a andai is cosas, cumenti si narat, de su restu. 

E immoi chi nci seu, podeus sighiri in cust'arrastu etotu, e andaus a castiai, invècias, cumenti funt cuncodradas is cosas po su chi pertocat sa Lista D, e megu a chistionai, mi parit bastanti craru (ma si ddu torru a arregodai, ca tanti no mi costat nudda! E fessint diaici drucis totus is trumentus de custa vida, mi megu a solu a solu), sèmpiri de su campionau de sa Segunda Categoria. 
E duncas, a su primu postu, is cosas mi parint bastanti craras, agataus is de sa Virtus de Futei, chi in dì de oi tenint allogaus in buciaca calincuna cosa cumenti a cincuanta puntus (cincuanta puntus tundus tundus si iat a podi narai), chi ndi funt arribbaus gràtzias a sexi partidas bintas e duas partidas chi is biancus-brau ant serrau cun su resultau in paridadi. Fintzas a oi, si iat a podi narai custu puru, immoi chi nci seus, is de su Futei ant pèrdiu feti una partida, in domu de is de su Meana Sardo, cun su resultau (marigosu meda de inguti, e si cumprendit ca pigai surras, e seus chistionendi de partidas de bòcia, est craru, no praxit a nemus) de cuatru a unu po is grogus-birdis. Is de sa Virtus de Futei s'agatant, duncas, cun otu puntus in prus de is chi tenint is de su Seulu (sa scuadra innoi giogat Salvatori "Tori" Boi, unu de is atacantis prus fortis, e prus matucheddus de edadi, tra totus cussus chi s'agatant in dì de oi in su mundu de sa bòcia in Sardìnnia), est a nai, duncas, ca is de su Seulu tenint corantaduus puntus allogaus in buciaca, ma is de su Seulu, tocat a narai custu puru, tenint una partida giogada in prus (funt arribbaus a binti bessidas), invècias is de su Futei ndi tenit giogadas dexennoi. 
Tra is atras cosas, pròpriu duas cidas fait, is de sa Virtus de Futei funt arrannèscius a binci, cun su resultau togu meda de cuatru a unu, in domu de is de su Seulu etotu, po una de is bìncidas de importu prus mannu de totu sa stagioni, fadendi su contu ca is de su Seulu funt una de is scuadras prus fortis de sa lista. 
E immoi, is de sa Virtus de Futei podint incumentzai a fai su contu de cantu giorronadas ammancant a sa fini de is giogus, e nosu fadeus is contus impari a issus: is giogus ant a spaciai su cuatru de su mesi de maju, tra duus mesis, prus o mancu, a partiri de oi, cun is de su Seulu chi ant a depi abarrai frimus, po si pigai su domìnigu de pàsiu su trexi de su mesi de Abrili, chi at a essi su Domìnigu de is Pramas, cumenti si narat a trassa de s'italianu etotu, e sèmpiri chi giogaus a pigai po bonu su calendariu de festas chi sighint is cristianus catolicus. 

E po chini no ddu sciessit, o chi no ddu eis cumprèndiu beni, mancai si ddu torru a ispiegai, ca tanti no si costat nudda: is otu listas chi pertocant su campionau de sa Segunda Categoria, cust'annu funt stètias pesadas cun cuindixi scuadras in totu, po seti partidas a sa cida. E custu bollit narai, mi parit bastanti craru, ca dònnia cida nc'est una scuadra ca, si iat a podi narai diaici, e diaici est benendumì de ddu narai, po giogai a fai unu pagheddeddu su poeta, abarrat a castiai is atrus. Po si fai un esèmpiu, custu fini de cida, su domìnigu de pàsiu at a tocai (e megu a chistionai sèmpiri de sa Lista D) a is de sa Cr Arborea, ca cust'annu funt currendi a forti meda, fadendi su contu ca in dì de oi s'agatant a su de cincu postus de sa lista cun calincuna cosa cumenti a trintacincu puntus in buciaca, e funt currendi diaici a forti gràzias, puru, a un atacanti bravu meda, chi est pesendindi una surra manna meda de gol, cumenti si iat a podi narai, chi si tzerriat Mattia Gallon. Ma in dì de oi, po totu cussu chi s'apu narau fintzas a immoi, parit dificili meda, po ddu narai diaici, chi calincuna atra scuadra ndi potzat cassai su primu postu, a parti is de sa Virtus de Futei, chi a su primu posu ddoi funt giai (e parit giai giai una brulla, ma deu creu ca is brullas dònnia dònnia tanti serbant!), e a parti is de su Seulu, chi s'apu arremonau pròpriu immubagora. 

E duncas, podeus andai a castiai, immoi chi nci seus, cumenti funt cuncodradas is cosas me in sa Lista E puru. Ma ainnantis de andai a castiai cali funt is scuadras chi funt currendi prus a forti, si iat a podi fai su contu de su spàssiu chi si funt fadendi is tifosus chi sighint is campionaus, e megu a chistionai, po custa cida a su mancu, feti (e si naru feti!) de sa Segunda Categoria. E duncas, de sa Lista A si nd'apu chistionau pròpriu in s'artìculu de sa cida passada (chi si nd'arregodais, e desinò nci pòngiu unu segundu a si ddu arregodai deu!): a su primu postu, cun una biga manna de puntus in prus apitzus de sa scuadra chi s'agatat a su segundu postu, agataus is de sa Gioventù de Sarroch; e duncas, torrendi a sa chistioni, su spàssiu prus mannus si ddu funt gosendi is tifosus de is grogus-brau ca, chi sighint a curri diaici a forti, iant a podi fai sa festa po s'artziada in su campionau de sa Primu Categoria (e duncas sa festa po sa bìncida de su campionau cosa insoru etotu, si cumprendit) una pariga de cidas ainnantis de sa Pasca Manna. In sa Lista B, invècias, s'apu giai contau ca ddoi funt duas scuadras a su primu postu, e seus chistionendi de is de su Cabuderra e de is de sa Deximu, e duncas, si iat a podi narai ca custa est una de is batallas prus spassiosas de totus cussas chi ddoi funt: nc'est su tanti po crei, a su mancu po cumenti funt cuncodradas is cosas in dì de oi, ca sa batalla po su primu postu (manigiu custu fueddu mancai custu fueddu no mi praxiat prus de su tanti, ma seus chistionendi de partidas de bòcia, e no de gherras innoi is ominis si bocint is unus cun is atrus, e duncas po custu mengianu andat beni diaici. E megu a brullai, si cumprendit, ma nemmancu diaici meda...). 
De sa Lista C, invècias, si nd'apu chistionau immubagora, e duncas, fadendi su contu ca seu giai giai po spaciai su tempus e mescamente su logu (est a nai su numeru de cropus chi dòngiu a sa tialu de tastiera, fadendi su contu, immoi si ddu scoviu puru, ca tanti no tèngiu nudda de cuai, ca nci depu stichiri, in dònnia, dònnia artìculu chi ndi pesu, calincuna cosa cumenti a trintamila cropus a sa tastiera) chi tèngiu po si scriri s'artìculu in sardu, andaus a castiai, po su chi fait, po su chi acudu, impari (sèmpiri chi ndi teneis gana!), cumenti funt cuncodradas is cosas po su chi pertocat sa Lista E. 

E duncas, agataus duas scuadras a su primu postu, a su mancu in dì de oi: seus chistionendi de is grogus-arrùbius de su Macomer (una de is duas scuadras chi ddoi funt in Macumere, fadendi su contu ca s'atra, sa prus matuchedda, e seu chistionendi de is de sa Macomerese, currint in su campionau de sa Promotzioni, in sa Lista B, po essi pretzisus cumenti unu giornalista iat a depi essi), chi tenint allogaus in buciaca calincuna cosa cumenti a corantotu puntus, e chi ndi funt arribbaus gràtzias a cuindixi partidas bintas e tres partidas chi si funt serradas cun su resultau siddau in paridadi. Is de su Macomer, fait a narai custu puru, immoi chi nci seus, ant pèrdiu feti duas partidas, apitzus de binti bessidas fatas, e pròpriu custu domìnigu passau, si funt dèpius acuntentai de feti unu puntixeddu, fadendi su contu ca ant serrau sa isfida contras a is de sa Nikeyon de Sune cun su resultau de duus a duus, mancai is de sa Nikeyon s'agatint a s'ùrtimu postu de sa lista, cun feti cincu puntus (ma si ddu apu narau in custu artìculu etotu, berus est?, ca su giogu de sa bòcia est togu pròpriu poita podit capitai, cumenti capitat, de su restu, ca sa scuadra prus pitichedda de totus, a su mancu po su chi pertocat sa positzioni in sa lista, est craru, arannèsciat a ndi sciuscia a terra una scuadra meda, ma meda prus forti. O comentecasiat, chi mancai no arrannescit a binci, podit sèmpiri sucedi ca arrannèsciat a ddi ponni, cumenti si iat a podi narai a trassa de s'italianu etotu, is bastonis tra is arrodas). 
A su primu postu impari a is de su Macomer agataus is de sa San Marco de Crabas, chi peròu (po su chi s'apu contau ainnantis) tenint giogadas feti dexennoi partidas, e duncas una in mancu de is chi tenint fata is de su Macomer. E a su segundu postu in sa lista agataus is de su Sedilo, chi peròu tenint binti partidas fatas, e feti (feti po modu de narai, e si cumprendit) corantaduus puntus, chi funt, a fai is contus nci poneus pagu meda, ses in mancu de is chi tenint is primus duas scuadras de sa lista. 

E cumenti si narat, eus a biri cumenti ant a sighiri a andai ainnantis is cosas, fadendi su contu ca po acabbai sa stagioni ammancat ancora unu bellu arrogu de tempus. Ma po custa cida no potzu fai atru ca si imprassai a forti, e chi su Cielu at a bolli custu beni po mei e po bosatrus puru, si torraus a intendi (o a ligi, mellus ancora) tra seti diis, est a nai, duncas, giòbia chi at a benni.





Attività realizzata col contributo della Regione Sardegna. IMPRENTAS 2024-2025. LR 22/2018 art. 22