Spantus mannus in su campionau de sa Primu Categoria: Cannonau Jerzu, Samugheo, Thiesi e Campanedda s'agatant a su primu postu me is cuatru listas

E duncas, cumenti s'apu giai narau a sa fini de s'artìculu chi nd'est bèssiu aforas (chi nd'apu bogau aforas, po ddu narai mellus puru) sa cida passada, po custa cida (e est una cosa chi no mi sucedit fatu fatu, chi pròpriu si ddu depu narai, antzis, si iat a podi narai ca no mi sucedit giai mai, chi pròpriu depu essi sanzeru cun bosatrus) tèngiu in conca, a su mancu po su tanti chi mi serbit po incumentzai, po atacai, is legas chi mi iat a praxi a nci ponni me in s'artìculu de oi. 
E duncas, chi si nd'arregodais de totu su chi apu scritu sa cida passada (e chi no si ddu arregodais, deu seu innoi pròpriu po custu puru), si iat a podi narai ca s'apu fatu sa conca a acua chistionendusì de resultaus, de listas, de partidas e de totus is scuadras de importu prus mannu chi s'agatant, in dì de oi, in su mundu de su càlciu diletantisticu sardu, chi est, de su restu, sa farra chi manigiaus (ddi naru diaici, gioghendi unu pagheddeddu a fai su poeta, ca est una de cussas cosas chi mi praxit a fai, fintzas a m'amachiai, fintzas a ndi bessiri aforas de conca, me is artìculus chi ndi pesu in sardu, e feti in cussus chi ndi pesu in sardu, ca candu scriu in italianu nc'est diaderus pagu tempus po si strollicai) po ndi pesai su trabballu po su chi pertocat su giàssu de su Diàriu Sportivu. 

E duncas, eia, m'eis cumprèndiu beni, po una borta (si iat a podi narai diaici) s'apu fatu sa conca a acua (cumenti si megàt fatu fatu sa bon'anima de mamma mia) a cropus (ddi nau diaici, isperendi ca su fueddi si sonit beni) de contus e de cointixeddus apicaus a is chistionis de importu prus mannu chi ndi funt arribbadas apustis de sa de ses giorronadas po su chi pertocat sa lista de partidas de sa torrada (e chistionu po su chi pertocat su campionau de sa Promozioni). 
E mi seu fatu pigai diaici meda de is chistionis (nc'eis a crei?) ca po una borta no seu arrannèsciu a si chistionai (cumenti invècias fatzu giai sèmpiri) de su tempus chi est fadendu, ma feti de su tempus chi passat (e candu chistionu de su tempus chi passat, apustis de essi torrau gràtzias a su Cielu po essi ancora biu, e po no tenni, a su mancu in dì de oi, a su mancu po immoi, daboris o arroris de cumbati, chistionu de su tretu chi eus giai fatu, o ballit aguali, chi si ammancat de fai, aintru de su mesi, aintru de s'annu, e chistionu puru, duncas, de is campionaus de càlciu: est a nai ca fatzu su contu, mi parit craru, de is partidas chi is scuadras ant giai giogau e, mescamente, de is partidas chi depint giogai ancora). 

E duncas, deu creu, custa est sa primu cosa chi tèngiu de fai po oi, po s'artìculu de custa cida. 
E ita boleis chi si naru, intzandus, apitzus de su tempus chi est fadendi? 
Seus in s'ierru, e duncas no si podeus abertai (s'at a parri una tontesa...) sa basca chi fait in s'istadi (e mancu mali puru, s'at a megai calincunu de bosatrus, berus est?); ma a nai sa beridadi, a su mancu mi parit de podi narai custu, no est fadendi totu custu frius; antzis. Is diis, mescamente aintru de sa cida (e parit giai giai fatu aposta, parit giai giai fatu a dispetu, e immoi si ispiegu puru su poita apu scritu custus fueddus), e mescamente po su chi pertocat su mengianu (a su mancu, po su chi pertocat su mengianu apustis chi ndi artziat su sobi in cielu) e, pruschetotu, po su chi pertocat su megameddu, funt bellas e callenti, chi pareus giai brintaus in su beranu, mancai po ndi lompi su beranu ammancant ancora (chi su tialu de calendàriu no est contendumì brullas, e ddu seu narendu po arriri, si cumprendit, berus est?) trinta diis a partiri de oi, prus o mancu. 
E de su chi potzu biri cun is ogus cosa mia, is matas de sa fruta funt incumintzendi a ndi bogai is primus froris (e no parit berus, e gei si cumprendit): no chistionu tanti de is matas de sa mendua (chi a su mancu innoi in Sardìnnia, e in bidda mia puru, bogant is froris giai me is primus diis de su mesi de Gennàrgiu), e no megu a chistionai de is matas de sa nèspula (ndi tèngiu una matixedda bella bella pròpriu in su corratzu de domu mia), chi funt is primas, tra totus cussas chi ndi bogant su frori in su beranu, a bogai is primus frutus; sa cosa istramba meda, e cun custu dda serru, est ca is matas de sa pruna puru funt incumintzendi a bogai is primus frorixeddus. Su piciocu chi seu agiudendi in s'ortu cosa sua (candu scapu de su trabballu cosa mia dongiu una manu a issu) nd'at bogau aforas unu fueddu togu meda: s'est megau ca "sa mata si bisat", pròpriu diaici at narau; est a nai, duncas, ca sa mata si bisat (si sonnat, po manigiai un antru fueddu puru) de essi giai in su beranu, mancai no siat berus, fadendi su contu ca seus ancora arrèscius in mesu in mesu a s'ierru (po ddu narai a trassa de poeta, prus ca de giornalista, e m'eis a iscusai). E duncas m'est praxia meda sa cosa, e mi fait prexei chi seu arrannèsciu a nci dda stichiri aintru de s'artìculu de custa cida. Eia, candu chistionu cun is personas de su trabballu chi fatzu, e candu arribbu a chistionai cun is personas de is artìculus chi ndi pesu in sardu, mescamente, mi domandant (e mi parit giustu puru, e nci iat a mancai atru, cumenti si narat) de ita totu chistionu, cali funt is legas chi pigu, e chi sigu (chi mi fadeis giogai a ndi pesai custa rima puru). 
E duncas, mi capitat, de su restu, de chistionai e de m'atobiai cun personas chi, candu ddis arremonu su giogu de sa bòcia, faint una faci stramba meda, cumenti chi essint intèndiu, cun su nasu cosa insoru, calincuna genia de fragu pudèsciu (mi benit de ddu narai diaici, isperendi ca si cumprendat su chi seu circhendi de si narai, e isperendi chi si cumprendat, prus de totu, sa genia de faci chi faint, e megu a brullai!). 
Ca sa beridadi est ca ddoi funt meda personas ca no funt acapiadas a istrintu cun is fainas chi pertocant su giogu de sa bòcia (e chi pertocant, mescamente, su giogu de sa bòcia de is diletantis sardus), mancai su giogu de sa bòcia, cumenti eis a sciri (cumenti eis a sciri mancai mellus de mei puru, ca in su mundu de sa bòcia nci trabballu de su duamilla e undixi, e duncas, a fai is contus nci poneus pagu meda, de calincuna cosa cumenti a cuindixi annus), est unu de is prus sighius in Itallia (e in Sardìnia puru, duncas). 

Ma nci funt personas chi si stesiant de is chistionis chi pertocant su giogu de sa bòcia cumenti chi siant stesiendusì de su fogu, o de una mobadia maba meda. 
E duncas, su chi circu de fai, po acuntentai puru, po su chi fait, mancai feti po unu pagheddeddu, is personas chi grisant is chistionis acapiadas a is partidas de bòcia (ma chi mancai tenint a gradessu a ligi calincuna riga pesada in sardu), est cussu de circai de sighiri atras legas puru, cumenti podint benni a essi (dda segu a crutzu...) is chistionis acapiadas a su tempus. 
E fadendu diaici (fadendi custu giogu, ddi naru diaici), no nc'eis a crei, arrannèsciu, puru, a manigiai calincunu fueddu chi, desinò, no mi iat a benni nemmancu in conca. 
E fadendu su giogu de circai de nci stichiri, in mesu a is chistionis chi pertocant sa bocia e is resultaus, atras legas puru, mi capitat de imparai, puru, calincuna cosa chi no sciia. 
E duncas, fatzu totu custu cun sa ispera de podi ammanniai sa cantidadi de personas chi benint a ligi cust'artìculus, ma pruschetotu, circu de ammanniai sa cantidadi de fueddus (e sa cantidadi de legas) chi manigiu po ndi pesai is artìculus etotu. 

E duncas, torrendi a nosu e a su tempus chi est fadendi, e po si nd'arregodai (e sa cosa ballit po mei po primus, po incumentzai) ca no seus ancora arribbaus a su beranu, si potzu feti narai ca, eia, candu ndi cabat su sobi (mescamente candu est scurighendu, cumenti si narat o cumenti, a su mancu, apu sèmpiri intèndiu narai in bidda mia, chi est Bidd'e Sorris), o a su mengianeddu chitzi, ma mancai giai de is primus oras de su noti, ndi cabat unu bellu frius, e unu bellu tanti de ùmidu puru, chi mi cumprendeis po su chi si bollu narai (e si ddu narat unu chi a s'ùmidu chi s'agatat in s'aria, e chi ndi cabat fatu fatu apustis chi ndi cabat su sobi, est allergicu, cumenti si iat a podi narai in italianu etotu, est a nai, duncas, ca mi bastat pagu pagu ùmidu in s'aria po atacai cun is sturridus, a trassa de cussus chi funt arresfriaus); e duncas, a su mancu po su chi mi pertocat, mi depu ancora callentai aranti de su fogu. 
Ma sa cosa prus toga (e ddu naru po brullai, eia), ca parit unu dispetu, cumenti s'apu giai arremonau ainnantis, est chi, mancai, fait diis bellas (e mengianus prenus fintzas a cucuru de luxi e de callenti) de su lunis a su giòbia o, mancai, fintzas a su cenabara a mengianu, ma apustis, cumenti ndi brintat su sabudu e duncas cumenti ndi brintat su fini de cida, intzandus est cumenti chi su tempus si furriat (m'est bèniu de ddu narai diaici, torra gioghendi a fai su poeta) e atacat cun su tempus mau, e duncas abarrat totu proi proi (e nci funt sèmpiri una pariga de partidas, po s'acapiai a is chistionis chi si pertocant de acanta, chi dònnia cida no si podint giogai po crupa de su tempus mau), e atacat puru cun su bentu fridu. 
E pròpriu a custu puntu de sa chistioni chi bolia arribbai, e custu de una pariga de cidas. 
Un'amiga mia, chi stimu meda, e chi mi bendit sa fruta e sa birdura, e chi tenit prus de otant'annus, una pariga de cidas fait nd'at bogau aforas unu dìciu, mellus, unu modu de narai, ca no ia mai intèndiu. E mi praxit custa cosa de imparai (de torrai a iscoberri, chi si praxit de prus cumenti sonat) fueddus nous, chi mancai no apu mai intèndiu, e, mancai, mi speddiat meda ma meda su de ddus podi stichiri me in s'artìculu chi ndi pesu in sardu su giòbia. E duncas, torrendi a nosu (e po dda acabbai puru!), s'amiga mia, unu de custus sabudus passaus, s'est megada ca ddoi fiat "araxi a canabi fatu"; est a nai duncas, ca ddoi fiat bentu frius, cumenti (po circai de si ddu ispiegai mellus puru) chi nci fessit unu canabi de aria frida, chi mi cumprendeis su chi si bollu narai. E su chi m'at narau s'amiga mia m'est abarrau in conca (a nai sa beridadi, m'abarrant in conca giai totus is cosas chi sa genti mi narat...), cumenti podeis biri e cumprendi a solus, e immoi chi apu arrimmau su fueddu (araxi) aintru de s'artìculu, mi potzu intèndi prexau e potzu sighiri, cun su coru lèbiu, a andai ainnantis cun is chistionis chi pertocant su mundu de sa bocia de is diletantis (ca funt cussus, si ddu torru a arrapiti oi puru, ca est una cosa de importu mannu meda, a su mancu po su chi mi pertocat, a su mancu a parri miu, chi ndi cabant in campu feti po si spreviai e po si spassiai e no po guadangiai surras e surras de dinai, cumenti si iat a podi narai e cumenti m'est bèniu de narai, cumenti faint is grandus campionis, is grandus giogadoris chi currint me in su campionau de sa Sèrie A, po nd'arremonai unu). 

E duncas, de sa cida passada m'est abarrau de si chistionai, de fai is contus, po ddu narai mellus puru, apitzus de is scuadras chi ddoi funt me is campionaus de sa Primu Categoria e de sa Segunda Categoria. E duncas, cumenti s'apu promitiu immubagora (e deu creu ca no nci siat nudda de mellus, nudda de prus togu de mantenni su fueddu donau, de mantenni una promissa) podeus incumentzai andendi a castiai cumenti funt cuncodradas, in dì de oi, is cosas po su chi pertocat sa Lista A (e seu chistionendi, mi parit craru puru, de su campionau de sa Primu Categoria, gei si ddu arregodais a solus, berus est?). 
E me in s'ùrtima giorronada, cussa chi s'est giogada, po si cumprendi mellus a pari, custu fini de cida passau (seu chistionendi de su de su sexi, po essi pretzisus cumenti unu giornalista iat a depi essi, de su restu), is ispantus no funt stètius pagus, fadendi su contu ca is de su Deximeputzu si funt dèpius acuntentai de feti unu puntixeddu, ddi naraus diaici, a s'acabbu de sa partida chi ant giogau in domu de is de su Sestu. Po is campidanesus, chi funt sighius de un allenadori bravu e forti meda, e de esperièntzia manna, iat a fai a narai custu puru, cumenti est Titti Podda, nd'est arribbada, duncas, sa de cuatru partidas de s'annu chi ant serrau cun su resultau in paridadi, e immoi is biancus-asullus s'agatant a su segundu postu de sa lista, cun calincuna cosa cumenti a corantanoi puntus in buciaca, chi funt duus in mancu de is chi tenint allogaus in buciaca is primus de sa lista de su Cannonau de Jerzu, ca invècias funt arrannèscius a ndi cassai sa de sexi partidas bintas in custa stagioni, gràtzias a s'unu a zeru chi nc'ant scutu a faci (m'est bèniu de ddu narai diaici, gioghendi giai giai a fai su poeta prus ca su giornalista, ma ddu scieis cumenti mi pigat a mi strollicai e a giogai cun is fueddus candu ndi pesu in artìculus scritus in sardu) a is de sa Next Gen Himalaya, chi est una scuadra de Casteddu etotu. E duncas, is biancus-birdis sighius de un allenadori giòvanu e forti cumenti Andrea Piccarreta, immoi podint castiai totus de su primu postu de sa lista, candu ammancant feti (feti po modu de narai, ca benint a essi prus de duus mesis de partidas de giogai) dexi partidas a sa fini de sa stagioni, chi s'at a serrai su cuatru de su mesi de maju, fadendi su contu peròu (sa nova chi si bollu donai est pròpriu custa) ca is scuadras chi currint in su campionau de sa Primu Categoria no ant a cabai in campu su fini de cida de sa Pasca Manna, a s'imbressi de su chi ant a fai is scuadras de sa Promotzioni, chi eus arremonau ainanntis etotu (ma feti arremonadas, ma peròu) in custu artìculu. E duncas, a su mancu in dì de oi, is scuadras de sa Lista A chi currint po su sartidu, po s'artziada in Promotzioni funt tres: de is de su Deximeputzu nd'eus giai chistionau (nd'apu giai chistionau, si iat a podi narai diaici, chi sonat meda ma meda mellus puru), de is de su Cannonau de Jerzu nd'eus chistionau pròpriu immoi, e no m'abarrat atru de fai ca si chistionai de is de sa Baunese, cun is ollastrinus chi ant serrau sa partida chi ant giogau, pròpriu custu domìnigu passau, in domu de is de s'Azzurra de Pauli, sa scuadra sighida de Davide Canosa, cun su resultau chi est abarrau siddau in su zeru a zeru; cumenti fiat in su primu segundu, duncas, est abarrau. E duncas (ca a fai is contus nci poneus pagu meda) is de sa Baunese tenint allogaus in buciaca, a su mancu in dì de oi, calincuna cosa cumenti a corantases puntus, chi funt cincu in mancu de is chi tenint is primus de sa lista de su Cannonau de Jerzu. E immoi eus a biri ita totu nd'at a bessiri aforas me is dexi bessidas chi abarrant po acabbai sa stagioni, partendi de is partidas chi s'ant a giogai tra una pariga de diis, est a nai custu domìnigu chi est arribendindi allestru, cumenti chi fessit unu leporeddu chi currit a totu coddu in mesu in mesu a su sartu (po sighiri a giogai a fai unu pagheddeddu su poeta). 

E duncas, is de su Cannonau de Jerzu si dda ant a depi biri contras a is de s'Ulassa, ca in dì de oi tenint calincuna cosa cumenti a trintunu puntus allogaus in buciaca. Is de sa Baunese, invècias, ant a depi arriciri sa visita de is de su Tertenia, ca in dì de oi tenint feti bintiduus puntus in sa lista (e feti cuatru scuadras a is pabas), est a nai ca tra is de sa Baunese e is aversàrius ddoi baddant (ddi naru diaici, isperendi ca si potzat cumprendi su chi si bollu narai) calincuna cosa cumenti a binticuatru puntus, e no funt pagus de seguru, ma a sa fini in su giogu de sa bòcia no podis mai sciri cumenti ant a andai is cosas; est a nai ca sucedit, e capitat, ca una scuadra chi no est annadendi in acua bonas, po ddu narai diaici, est a nai, una scuadra chi s'agatat me is primus postus de sa lista, nc'arrannèsciat a ndi sciusciai a terra una scuadra chi, mancai, s'agatat me is primus postus de sa lista. Is de su Deximeputzu, invècias, e cun custu giai giai estus a podi serrai is contus po su chi pertocat sa Lista A, a su mancu po sa cursa a sa primu postu, si dda ant a depi biri, in domu cosa insoru etotu, contras a is de su Cuartu 2000. 

E immoi chi nci seu (e immoi chi nci seus, ca a sa truma potzu aciungi bosatrus chi ligeis puru, e megu a brullai, si cumprendit, berus est?), e ainnantis de andai a castiai cumenti funt cuncodradas is cosas po su chi pertocat sa Lista B (e seu chistionendi, est craru, sèmpiri de su campionau de sa Primu Categoria), mi iat a praxi a si intregai is fueddus chi m'at regalau (candu chistionu cun calincunu, e no feti de is legas acapiadas a su mundu de su giogu de sa bòcia de is diletantis sardus, ma chistionu de totus is cosas chi mi contant, e mi scoviant is personas chi atobiu in sa vida mia de dònnia di, po mei est cumenti chi mi fessint fadendi unu regalu, cumenti s'apu giai narau atras bortas) Max Piras, chi est s'allenadori de is de su Sestu, chi apu arremonau immubagora, una pariga de rigas fait (chi mi permiteis de manigiai custus fueddus), candu s'apu contau de sa partida ca is de su Deximeputzu ant serrau in paridadi, pròpriu contras a is de su Sestu. 

E duncas, chini mellus de un allenadori si podit fai a cumprendi cumenti funt andadas is cosas in una partida? E diaici si intregu is fueddus de Piras, cumenti seu costumau a fai, de su restu. «Sa partida chi eus giogau contras a is de su Deximeputzu est stètia bella cantu tostada; si iat a podi narai ca, po su chi s'est biu in campu, a su mancu, totus e duas is scuadras ndi podiant cassai is tres puntus, est a nai ca siat nosu de su Sestu e siat is aversàrius de su Deximeputzu ant tentu unu bellu tanti de ocasionis, ddi naraus diaici, po ndi cassai su gol. Issus ant tentu un ocasioni manna cumenti una crèsia, cumenti si iat a podi narai, me is primus segundus de giogu, cun su portieri cosa nosta chi at fatu unu miràculu, cumenti si iat a podi narai candu unu giogadori fait una giogada toga meda, e apustis is aversàrius cosa nosta ant pigau in prenu su palu de sa porta cosa nosta, cun su portieri chi no podiat prus fai nudda; est a nai ca sa porta fiat oberta, ma sa bona sorti s'at donau una bella manu de agiudu, si iat a podi narai diaici. Cumenti si ndi seus scidaus, apustis de s'essi lassaus a is pabas custu perìgulu, seus arrannèscius a giogai beni meda, cumenti scieus fai, de su restu; est a nai ca eus aguantau, e meda puru, contras a una de is scuadras prus fortis chi nci funt in dì de oi in sa Lista A; est a nai ca seus stètius bonus a arrespundi a is atacus de is de su Deximeputzu cun is armas chi teneus, cun is cartas chi teneus de si giogai. E chi fadeus beni is contus de cumenti funt andadas is cosas, podeus narai ca cussus chi ant tentu is ocasionis prus togas po ndi cassai su gol seus stètius pròpriu nosu; e si iat a podi narai, puru, ca eus pigau in prenu unu palu, e in prus, me is ùrtimus minudus de giogu, Luca Tassi, chi est unu de is atacantis prus fortis chi teneus in sa rosa cosa nosta, no at intzertau sa porta po unu nudda, chi mi cumprendeis su chi si bollu narai: est a nai ca sa bòcia nd'est bessida aforas de su campu, ma est passada rasenti rasenti a sa porta de is aversàrius cosa nosta, diaici, mancai, si cumprendit mellus puru. Po nosu est stètia una partida de importu mannu meda – at sighiu a mi contai Max Piras – fadendi su contu ca in sa primu parti de sa stagioni, e duncas me in totus is bessidas chi pertocant sa lista de s'andada de is partidas, eus sèmpiri fadiau, e meda puru, po si ddu narai diaici, me is isfidas chi eus giogau contras a is scuadras chi s'agatant me is primus postus de sa lista. Custa borta invècias, a custu giru, cumenti si iat a podi narai puru, eus fatu un antru passu concas a su mellus, est a nai ca seus arrannèscius a mellorai, una cosa de importu mannu meda mescamente chi fadeus su contu, chi fadeis su contu, po ddu narai mellus puru, ca sa rosa de su Sestu est stètia pesada cun una surra manna meda de piciocus giòvunus. Su de binci is partidas, duncas, candu tenis sa possibbilidadi de trabballai cun giogadoris piticus meda de edadi, agiudat po su chi pertocat sa conca, s'umori de sa truma, ddi nau diaici; candu bincis, o candu arrannèscis a no perdi, mancai, contras a is primus de sa classi, intzandus benis a essi prus seguru apitzus de sa fortza cosa tua etotu e, duncas, mi parit craru, arrannèscis a curri prus a forti puru me is allenamentus chi ndi pesaus aintru de sa cida, e no feti, est craru, me is partidas de su domìnigu. Apu domandau a is piciocus mius – at sighiu a mi contai Piras – de ndi cabai in campu e de si giogai sa partida chentza timorias e pentzamentus lègius; fadendi su contu ca me is partidas contras a is primus de sa classi nosu teneus pagu, po no narai nudda, de perdi. Depeus peròu fai su contu, e si depeus arregodai, duncas, ca in sa rosa de su Sestu, a su mancu in dì de oi, ddoi funt calincuna cosa cumenti a cuindixi piciocheddus chi funt nàscius tra su duamilla e cuatru e su duamilla e otu; e po su chi pertocat is piciocus chi funt nàscius in su duamilla e otu, si potzu narai ca cuatru funt giai arribbaus a giogai me in sa Primu Scuadra, est a nai in su campionau prus mannu tra totus cussus chi sigheus, e seu chistionendi, est craru, de sa Primu Categoria. A custu contu depeus aciungi, puru, ca ddoi funt una bella pariga de piciocus, tra cussus nàscius tra su duamilla e cincu e su duamilla e seti, ca giogant dònnia domìnigu in sa Primu Scuadra, est a nai ca tenint su postu seguru». 

E duncas, immoi che, si iat a podi narai diaici, eus acabbau cun is contus acapiaus a sa Lista A de su campionau de sa Primu Categoria, deu creu pròpriu chi si potzat sighiri cun sa Lista B, andendi a castiai, po incumentzai, cumenti funt cuncodradas is cosas po su chi pertocat sa cursa po su primu postu e, duncas, po ndi cassai s'artziada in su campionau de sa Promotzioni. Is de su Samugheo, in dì de oi, apustis de binti bessidas, tenint allogaus in buciaca calincuna cosa cumenti a corantotu puntus, chi ndi funt arribbaus gràtzias a cuindixi partidas bintas e tres partidas chi si funt serradas cun su resultau in paridadi; is primus de sa classi (cumenti m'est beniu de ddus tzerriai) ant serrau s'ùrtima bessida (eia, pròpriu cussa chi ant giogau custu domìnigu passau) cun su resultau de duus a duus, in domu de is de sa Don Bosco Fortitudo, una de is duas scuadras chi ddoi funt in dì de oi in Gùspini, ma tocat a narai puru ca is arrùbius – biancu – birdis, chi funt sighius, po cust'annu puru, de un allenadori giòvunu ma giai forti e bravu meda cumenti Giorgiu Ferraro, ant incumentzau sa lista de partidas de sa torrada (cumenti seus costumaus a tzerriai sa segunda parti de sa stagioni, chi cumprendeis su chi si bollu narai) cun tre bìncidas, incumentzendi de s'unu a zeru chi nd'ant cassau in domu de is de s'Isili, po sighiri, apustis, cun su duus a unu chi nd'at portau is tres puntus a sa fini de sa partida chi iant giogau in domu de is de su Cortoghiana; e duncas is de su Samugheo ant bintu puru contras a is de su Segariu, cun su resultau, togu meda, de tres a unu. A sa segunda bessida de sa torrada, peròu, is de su Samugheo ant pèrdiu sa partida contras a is serramannesus de sa Gialeto, chi funt arrannèscius a ndi cassai is tres puntus gràtzias a su resultau de duus a unu. Is de su Samugheo, de su restu, in totu sa stagioni, a su mancu fintzas a immoi, est craru, ant pèrdiu feti po duas bortas. Po sa bessida chi at a balli po sa de ses giorronadas, invècias, is piciocus sighius de Giorgiu Ferraro si dda ant a depi biri contras a is de su Perdaxius. A su segundu postu de sa lista agataus, invècias, is de s'Arbus, chi immoi (e de una pariga de cidas feti) funt sighius de unu de is allenadoris cun s'esperièntzia prus manna chi ddoi est in Sardìnnia in dì de oi, e seus chistionendi de Virgilio Perra. 
E duncas, cumenti eus fatu pròpriu immubagora po is de su Samugheo, podeus andai (sèmpiri chi seis de acòrdiu cun mei) a castiai cumenti funt andendi is cosas poi is biancus-arrùbius. E duncas, sa primu cosa chi si potzu contai est ca is de s'Arbus ant incumentzau sa lista de partidas de sa torrada cun una surra (ddi nau diaici), est a nai, mellus, ca ant pèrdiu in sa primu bessida, in domu de is de su Segariu etotu, chi est una scuadra chi s'agatat, in dì de oi, cun dexesseti puntus in buciaca e feti duas scuadras a is pabas (e seus chistionendi, po essi prus crarus puru, de is de su Santadi e de is de su Ruinas). 
E custu bollit narai, cumenti mi contant fatu fatu is allenadoris chi intendu po is ciaciarradas aintru de sa cida e apustis de is partidas, ca in su giogu de sa bòcia ndi podint arribbai ispantus mannus in dònnia partida, puru candu s'agatant, una aranti de s'atra, una scuadra pitichedda (ddi naraus diaici), cumenti iat a podi essi cussa de su Segariu, de su restu, cun una meda ma meda prus manna e prus forti, fadendi su contu ca tra is de s'Arbus e is de su Segariu ddoi funt, in mesu, badda badda, calincuna cosa cumenti a bintitres puntus (e no funt pagus de seguru); e chistionaus de una scuadra matuca cumenti est s'Arbus, po narai ca, eia, tenint sa possibbilidadi (cumenti est sucèdiu po cust'annu puru, de su restu) de podi spendi unu pagheddeddu de dinai po cuncodrai sa rosa cosa insoru cun giogadoris fortis, chi mancai nd'arribbant de aforas de sa Sardìnnia; nci funt atras scuadras, invècias (su prus de is scuadras, a fai beni is contus e a bolli narai sa beridadi), ca si depint acuntentai (ddi naraus diaici) de ndi pesai sa rosa fadendi su contu apitzus, feti (feti po modu de narai) de is piciocus chi giogant a bòcia e chi bivint in sa bidda etotu o, candu andat beni, mancai podint domandai s'agiudu de una pariga de piciocus chi nd'arribbant de atras biddas (e m'eis a scusai po su giogu de fueddus chi mi nd'est bèssiu aforas), ma chentza de spendi, e si cumprendit, surras e barcas de dinai, cumenti invècias podint fai is assòtzius prus arricus chi doi funt in su mundu de is diletantis sardus. 
Ca giai giai no parit berus, e nd'aprofitu po si ddu narai, immoi chi nci seu, immoi chi apu pigau sa lega, ca in su mundu de is giogadoris diletantis (ca funt cussus chi ndi cabant in campu pruschetotu po si spassiai e no, de seguru, po trabballu, cumenti invècias faint is grandus campionis chi currint in su campionau de sa Sèrie A, po nd'arremonai unu) girant (chi mi permiteis de manigiai custu fueddu) una bella biga de dinai; est a nai ca ddoi funt scuadras, ddoi funt assòtzius chi arribbant a spendi unu bellu tanti (mannu meda) de arriabis; ma custu no bollit narai ca sa scuadra prus forti (e prus arrica) a sa fini est cussa chi ndi cassat sèmpiri is tres puntus prenus, cumenti si iat a podi narai. E torra, sa cosa prus bella de su giogu de sa bòcia, deu creu (ma no est feti una bidea cosa mia, e si cumprendit beni puru), est ca no podis scri mai cumenti ant a andai is cosas. 
E duncas, apustis de essi pèrdiu sa partida in domu de is de su Segariu, is de s'Arbus ant serrau in paridadi, po duas bessidas de sighiu, is partidas chi ant giogau contras a is de sa Don Bosco Fortitudo de Gùspini, chi eus arremonau pròpriu ainnantis, e contras a is de su Perdaxius (chi eus giai arremonau, sa cosa ballit po issus puru): sa primu partida, cussa contras a is guspinesus, s'est serrada cun su resultau de duus a duus; cussa contras a is de su Perdaxius, invècias, est acabbada cun su resultau de unu a unu. E duncas, is de s'Arbus funt arrannèscius a nd'artziai torra sa conca feti a sa de cuatru bessidas in sa lista de partidas de sa torrada, gràtzias a s'unu a zeru chi nd'ant pesau in sa sfida contras a is de s'Antiochense (chi est sa scuadra, gei si cumprendit de su nomini etotu, deu creu, chi nd'ant pesau in sa bidda de Sant'Antiogu). 
E in s'ùrtima bessida, invècias (eia, seu chistionendi pròpriu de cussa chi s'est giogada custu domìnigu passau), is de s'Arbus funt arrannèscius a binci, cun su resultau togu e tundu tundu de duus a zeru, in domu de is de su Ruinas (e custa borta, eia, sa scuadra prus forti est arrannèscia a binci contras a sa scuadra prus piticheddedda). 
E immoi, a fai is contus nci poneus pagu meda, is de s'Arbus tenint coranta puntus allogaus a su callenti (cumenti si iat a podi narai, sèmpiri chi mi permiteis de giogai unu pagheddeddu a fai su poeta puru), ca funt otu in mancu de is chi tenint is de su Samugheo. 
A sa fini de sa stagioni, intzandus, mancant feti dexi partidas (contendi, puru, cussas chi s'ant a giogai custu fini de cida chi est arribendindi) e, duncas, badda badda in su pratu ddoi funt trinta puntus in totu, e cumenti narant is allenadoris etotu, is cosas iant a podi mudai, e meda puru, me is cidas chi ant a benni. Ma is de su Samugheo e is de s'Arbus no funt currendi a solus concas a sa bìncida de su campionau, est a nai ca a is pabas tenint duas scuadras, e seus chistionendi de is de su Gonnos e is de sa Frecia Parte Montis, sa scuadra chi nd'ant pesau (de unu bellu arrogu de tempus, a nai sa beridadi) in Mòguru: custas duas scuadras s'agatant impari a su de tres postus in sa lista, cun trintotu puntus, est a nai duus in mancu de is chi tenint is de s'Arbus e dexi in mancu de is chi tenint allogaus is primus de sa lista de su Samugheo. 

E serru andendusì a si contai, po su chi acudu a fai, cumenti funt cuncodradas is cosas me in sa Lista C e me in sa Lista D puru, e chistionaus sèmpiri de su campionau de sa Primu Categoria. E intzandus, po su chi pertocat sa Lista C a su primu postu agataus is nieddus-birdis de su Thiesi, sighius de GianMario Rassu, chi tenint in dì de oi calincuna cosa cumenti a corantanoi puntus, unu in prus de is chi tenint is de s'Ozierese, sa scuadra de Otieri (si cumprendit beni de su nomini de s'assòtziu etotu, berus est?). 

E duncas, is nieddus-birdis de su Thiesi ant bintu sa primu partida de sa lista de sa torrada, in domu cosa insoru etotu, pròpriu contras a is de s'Ozierese, cun su resultau, togu meda, de cuatru a duus, ma apustis de cussa partida spassiosa (e si cumprendit beni cantu est stètia toga, fadendi su contu ca is duas scuadras funt cumandendi su campionau, cumenti si narat e funt is duas scuadras prus fortis chi ddoi funt in sa lista), is piciocus sighius de Gian Mario Rassu nd'ant bodditu feti duus puntixeddus: unu in sa partida chi iant giogau in domu de is de su Siligo, e su segundu in sa partida chi iant giogau in domu de is de sa Dorgalese. Me is ùrtimas duas bessidas, peròu, is de su Thiesi funt arrannèscius torra a binci contras a is de su Putumajore, cun su resultau de duus a zeru, e in s'ùrtima bessida ant bintu contras a is de su Pasada, cun su resultau, tundu tundu, de seti a zeru. Is de s'Ozierese, invècias, apustis de essi pèrdiu sa partida contras a is de su Thiesi, funt arrannèscius a binci po cuatru bortas de sighiu (est a nai una avatu de s'atra), contras a is de sa Dorgalese, a is de su Pasada, contras a is de su Fonne e contras a is de su Patada, in s'ùrtima bessida chi ant giogau. 

E serraus s'artìculu de custa cida andendi a castiai, po su chi acudu a fai, cumenti funt postas, cumenti funt cuncodradas is cosas me in sa Lista D, chi est s'ùrtima chi andaus a circai, sèmpiri po su chi pertocat su campionau de sa Primu Categoria. A su primu postu, duncas, agataus is de su Campanedda, chi est una biddixedda pitica meda, e chi fait parti de su comunu de Tattari, cun corantacincu puntus allogaus a su callenti in buciaca; a su segundu postu de sa lista, invècias, cun corantaduus puntus (chi funt tres in mancu, a fai is contus nci poneus pagu meda), agataus is de s'Oschirese, ma is giogus po ndi cassai sa bìncida de su campionau funt obertus, a su mancu in dì de oi, puru po is de su Santu Giorgiu de Pèifugas, chi tenint in buciaca calincuna cosa cumenti a coranta puntus, ma a su contu de is scuadras chi funt currendi po ndi cassai su primu postu nci podeus aciungi puru is de su Badesi, sighius de Simone Deliperi, chi tenint peròu trintanoi puntus, ses in mancu de is chi tenint in dì de oi is de su Campanedda. 

E cun custu mi pari mi parit ca apu spaciau, po custa cida puru, su chi si bollia narai. E duncas, chi su Cielu at a bolli custu beni po mei, si torraus a agatai, sèmpiri apitzus de is pàginas de su giàssu de su Diàriu Sportivu, tra seti diis, est a nai, duncas, mi parit bastanti craru, giòbia chi at a benni. E in s'interis si imprassu a forti.






Attività realizzata col contributo della Regione Sardegna. IMPRENTAS 2024-2025. LR 22/2018 art. 22