Su campionau de sa Primu Categoria s'arregalat giai is primus spantus

E duncas, atacu a scriri is rigas chi ant a balli po s'artìculu de sa primu cida de su mesi de Ladàmini candu seus lòmpius (chi su calendàriu no est contendumì brullas, e ddu megu a narai po arriri unu pagheddeddu, gei si cumprendit, berus est?) a su duus de su de dexi mesis in s'annu, e no mi parit nemmancu berus. 

Po primu cosa, si depu narai ca po mei s'atonzu est sa stagioni prus druci (mi praxit a coxinai sa chistioni diaici, chi mi permiteis de manigiai custu fueddu) tra totus cussas chi ddoi funt aintru de s'annu; at a essi ca apustis de s'istadi, ca in s'isula abarrat bascosa meda (acataus si ndi seis, cust'annu puru, ca nci funt diis ca pareus de essi in su tialu de desertu? Cumenti si iat a podi narai), is temperaduras torrant a ndi cabai (e gràtzias a Deus, nc'aciungu deu), e mancu mali, e duncas mi torrat sa gana bella po dromiri, po trabballai, po papai e po nci bessiri de domu, mancai po mi fai calincuna bella passillada me is sartus chi ddoi funt totu a giru a giru de sa bidda mia, est a nai de sa bidda innoi seu nàsciu e pàsciu, chi est Bidd'e Sorris (cumenti s'apu narau giai una bella pariga de bortas), in mesu a su Campidanu. 

E duncas, candu ndi torrat a arribbai s'atonzu, est cumenti chi mi torrit su sànguini a conca (cumenti si narat, cumenti apu sèmpiri intèndiu narai innoi in bidda e mescamente de sa bon'anima de mamma mia puru), e mi benit prus facili a sighiri totus is cosas chi mi pertocant, partendi, pròpriu, de su scriri is artìculus chi ndi bogu aforas, dì po dì, cida po cida, e mesi po mesi puru, a totu annu (e custa cosa andat ainnantis, e gràtzias a su Cielu, m'acudu a narai, puru, de su duamilla e undixi). 

E po s'artìculu chi ndi bessit a pilu su giòbia (cumenti podeis a biri a solus, ndi bessit unu dònnia giòbia, chentza de ndi perdi nemmancu unu), mi potzu permiti de mi strollicai unu pagheddeddu de prus (bastat pagu, gei si cumprendit) de su chi fatzu, mancai, me is artìculus chi ndi pesu in italianu. A nai sa beridadi, in totus is artìculus chi ndi pesu in italianu (si ddu torru a arrapiti po custa cida puru, chi mabi no fait, ca mancai nc'est calincunu chi ligit po sa primu borta is novas de su Diàriu Sportivu e no cumprendit cumenti andant is cosas) nc'est pagu logu po nci stichiri is stròllichiminis chi tèngiu totu badda-badda in conca (no nd'ammancant mai, si iat a podi narai diaici puru); est a nai, duncas, ca me is artìculus chi scriu in italianu chistionu feti (e si ddu torru a narai: feti) de resultaus de is partidas, de is giogadoris chi, mancai, ant fatu su gol, e de cumenti funt postas is scuadras in sa lista. E apustis, a partiri de su martis, o a bortas de su mèrcuis puru, su chi fatzu est su de intendi (a su telefunu, si cumprendit?) is allenadoris de is assòtzius, po circai de cumprendi, impari a issus, cumenti funt andendi is cosas me is campionaus chi sigheus cun su giàssu cosa nosta. 

E duncas, dònnia dònnia cida (chentza de ndi sartai nemmancu una, est craru, ca seus professioneris po su chi pertocat su trabballu cosa nosta. E chi su giàssu cosa nosta, seu chistionendi, est craru, de su giassu de is amigus de su Diàriu Sportivu est ancora in peis apustis de doxi-trexi annus est poita, ndi seu seguru, seus fadendi beni su trabballu cosa nosta, cosa chi ballit no feti po mei, ma duncas puru po totus is collegas cosa mia; est a nai ca no nc'est una dì innoi no nci funt artìculus de lìgi e, duncas, novas de si torrai a contai) sigheus totus is chistionis de importu chi nd'arribbant de is campus chi ddoi funt spratus in totu s'isula bella e stimada cosa nosta, a partiri de is campus innoi si giogant is partidas de su campionau de s'Ecellenza (ca, iat a fai a ddu narai diaici, est sa Sèrie A po su mundu de is diletantis), cussas de su campionau de sa Promotzioni, e fintzas a arribbai a is partidas chi ballint po su campionau de sa Primu Categoria e de sa Segunda Categoria. 

E duncas, chi seis de acòrdiu (e fiat ora puru, s'at a megai calincunu de bosatrus, ndi seu giai giai seguru) si contu giai is primus duas novas de importu, po custa cida, diaici circu de no si fai perdi atru tempus, cumenti si narat (o, po ddu narai mellus puru, no si fatzu perdi su tempus chi, mancai, nemmancu teneis): duncas, is giogus po su chi pertocat su campionau de sa Primu Categoria funt torraus a incumentzai (po su prexu de totus is tifosus e, mescamente, de is giogadoris chi, a sa fini, funt cussus chi ndi cabant in campu po si spàssiai, po si spreviai apustis de una cida fadiosa), cumenti a dònnia, dònnia annu, in s'ùrtimu fini de cida de su mesi de Cabudanni. Sa festa (dda tzerriu diaici, gioghendi a fai unu pagheddeddu su poeta) est torrendi giai giai a incumentzai puru po is scuadras chi ant a curri me is otu listas de sa Segunda Categoria: custu fini de cida chi est arribendindi giai (ca su tempus a bortas parit ca currat allestru cumenti chi fessit unu leporeddu in su sartu, po sighiri a giogai a fai unu pagheddeddu su poeta puru, chi no si dispraxit tropu), intzandus, nc'ant a essi unu bellu tanti de partidas in prus, e si podit narai, duncas, ca sa stagioni noba est partendi, e sa cosa ballit po totus, e no feti po is giogadoris de is scuadras chi currint me is campionaus de s'Ecellenza e de sa Promotzioni (chi eus arremonau immoi) e chi funt stètius, ddu scieis beni poita si nd'apu giai chistionau me in totus custas cidas passadas, is primus a torrai a ndi cabai in campu. 

E duncas, torrendi a nosu, su mesi de Cabudanni si ddu seus lassau a is pabas, e immoi no nc'est atru chi si podit fai ca si nci fuiai a fundu e susu, cumenti si narat innoi in bidda mia, de su restu, in su mesi de Ladamini. A nai sa beridadi, chi pròpriu si ddu depu narai, su mesi de Cabudanni est stètiu bellu e fadiosu po mei: apu dèpiu sighiri una surra manna de chistionis, de fainas de importu mannu, ca m'ant suciau is fortzas, is enèrgias, cumenti si iat a podi narai, ma sa cosa chi mi fait prus prexei (e mancai no nc'eis a crei, ma si giuru ca seu narendisì sa beridadi) est ca a partiri de oi, e fintzas a candu no at a arribbai su Nadali (e tanti gei ammancat una dì, s'at a acudi a narai calincunu de bosatrus!), apa a depi pentzai feti a su mundu de is diletantis sardus, apa a depi pentzai feti a scriri is artìculus,  su trabballu cosa mia, duncas, e a nudda de atru. E custa cosa mi fait intendi selenu, chi si depu narai sa beridadi: cumenti at scritu Herman Hesse (ca est unu de is scritoris chi mi praxint de prus) me is diàrius cosa sua, no timu is mesis fridus de s'atonzu e mescamente de s'ierru; no timu de m'arrosci, duncas, a abarrai acanta a su fogu in s'interis chi mi lìgiu calincunu lìbbru bonu; no timu de abarrai a solu po oras e oras a pregai, a meditai e, immoi chi nci seu, torru puru gràtzias a su Cielu ca tèngiu unu trabballeddu (ca a sa fini mi praxit, e meda puru) ca mi permitit de ndi pesai cussu tantixeddu (mi bastat pagu, a narai sa beridadi, e dda pigu cumenti chi custa siat una cosa bona) de dinai, de arriabis (cumenti apu sèmpiri intèndiu narai de candu seu piticheddu) chi mi serbint po mi comperai su pani, ddi naru diaici. 

E duncas, apa a andai ainnantis, cun gana bona e coru allirgu, fintzas a su mesi de Idas e duncas fintzas a sa fini de sa lista de partidas de s'andada (cumenti seus costumaus a tzerriai sa primu parti de is campionaus). Po serrai sa chistioni (e po dda acabbai, ma custa borta po diaderus, cun is stròllichiminis) si potzu narai puru ca oi (s'apu giai narau, a s'incumintzu de custu artìculu etotu, chi apu incumentzau a ddu pesai, a ddu scriri su duus de su mesi de Ladàmini) nc'est unu bellu sobiteddu, e una bella basca in foras (sa primu parti de s'atonzu abarrat giai giai aguali a s'istadi, a su mancu po su chi pertocat is temperaduras, e custa cosa mi fait pentzai, duncas, ca bivu in unu de is logus prus togus, prus bonus e prus bellus ca ddoi funt in custu mundu macu meda innoi s'agataus), e no biu s'ora de nci bessiri unu pagheddeddu po mi gosai su megameddu. 

De cras, invècias (est a nai: de su tres de su mesi de Cabudanni, chi at a essi giòbia), a cantu parit, a su mancu, nd'at a torrai su frius puru, cun is temperaduras chi nd'ant a cabai fintzas a doxi-trexi gradus (diaici apu lìgiu, diaici megant a narai is dotoris chi sighint is previsionis acapiadas a su tempus), e de cussu chi podeus sciri in dì de oi, at a torrai s'acua puru (chi mabi no fait). E duncas, apa a circai de mi pigai s'ùrtima culleredda (torra, giogu a fai su poeta, e mi benit de si ddu narai diaici) de callenti, ainnantis chi nd'arribbit su frius. Ca no seus mai cuntentus, de su restu, cumenti apu intèndiu narai custu mengianu a su forru de su pani de unu piciocu chi connòsciu: sa genti abarrat sèmpiri totu murrungia murrungia, e chi no est po una cosa est po un'antra: a candu fait tropu basca, a candu fait tropu frius, a candu proit fintzas tropu, a candu no proit nudda ca parit ca si podeus sicai de unu segundu a s'atru. E apustis de s'essi narau totu custu, chi seis de acòrdiu, podeus andai a castiai, impari, cumenti funt andadas is cosas me in su mundu de sa Primu Categoria, apustis de sa primu giorronada de giogus, partendi, duncas, de is resultaus chi ant fatu is ispantus prus mannus. 

E duncas, po su chi pertocat sa Lista A, is de sa Baunese funt partius a forti meda, cun sa bìncida, po cuatru a unu (su resultau prus togu de totu sa primu giorronada) contras a is casteddaius de su Vecchio Borgo Sant'Elia. Si iat a podi narai, puru, ca is de sa Baunese funt tra cussas scuadras chi ant a curri po ndi cassai su primu postu de sa lista e, duncas, s'artziada in su campionau de sa Promotzioni, fadendi su contu ca s'annu passau (est a nai in sa stagioni de su duamilla e bintitres – duamilla e binticuatru, ca a fai is contus nci poneus pagu meda) funt arribbaus a su segundu postu de sa lista, est a nai, duncas, ca ant serrau sa stagioni a is pabas de is de s'Uda, ma cun feti unu puntixeddu in mancu. E duncas, custu est pagu ma seguru, podeus pentzai, chentza de timi de si sballiai, ca is nieddus – asullus (ddus tzerriaus diaici, mi parit craru, po su cabori chi tenint me is camiseddas, mescamente candu giogant is partidas in domu cosa insoru) nc'ant a torrai a provai. E in s'interis, Marco Nieddu, chi est unu de is giogadoris prus de importu tra totus cussus chi tenint in sa rosa (ma no est s'ùnicu, gei si cumprendit), est sighendi a fai is gol (cumenti si iat a podi narai, a trassa de s'italianu etotu), mancai tèngiat fatus prus de corant'annus (corantatres, po essi prus pretzisus, e su trabballu de unu giornalista, cumenti s'arrapitu fatu fatu meda, est bonu po diaderus candu est pretzisu). 

E custu si fait a cumprendi sa passioni, e totu sa gana bona, ca is piciocus chi ndi cabant in campu me is campionaus de is diletantis nci ponint, e de seguru no si podit narai ca cabant in campu feti po incasciai su dinai, cumenti, mancai, iant a podi fai (e faint, de su restu) is professoneris, ma feti po su spàssiu chi ndi tenint, e po si spreviai, mancai. E una de is novas prus togas chi funt acapiadas a Marco Nieddu (a sa carrièra de Marco Nieddu, si iat a podi narai diaici puru) est chi de cust'annu at a tenni sa possibbilidadi de giogai, 'tendei 'tendei (cumenti si megàt sa bon'anima de mamma mia, e custu modu de narai ca teniat, e chi intendu ancora in bidda mia, m'est sèmpiri praxu meda meda meda), cun su fillu, chi si tzerriat Mattia e chi tenit sexi annus. E duncas, sa primu borta ca Marco Nieddu at giogau impari a su fillu est stètia in sa primu partida uficiali chi is de sa Baunese ant fatu cust'annu, e seu chistionendi, duncas, de sa primu partida chi est bàllia po sa Copa Italia, cun is asullus-nieddus chi si dda funt dèpia biri contras a is de su Lanusè, chi currint me in su campionau de sa Promotzioni. E duncas, candu ammancant feti cincu minudus a sa fini de sa isfida, s'allenadori de sa Baunese, Mario Masia, nc'at ghetau in campu (cumenti si iat a podi narai, e cumenti si narat, de su restu, a trassa de s'italianu etotu) Mattia Nieddu po s'ùrtimu arroghededdu de sa partida, candu is meris de domu de su Lanusè fiant giai bincendi cun su resultau, bellu e tundu-tundu, de cuatru a duus. E duncas, si iat a podi narai, puru, ca in su mundu de sa bòcia no sucedit fatu fatu de podi biri custus ispetaculus: unu babbu chi giogat, in una partida pesada de is de sa Federatzioni Italiana de su Giogu de su Càlciu, e duncas impari a is de sa Lega Natzionali de is Diletantis, impari a su fillu. « A nai sa beridadi, est stètia una cosa toga meda po mei – at contau Marco Nieddu a unu giornalista -, mi seu intèndiu cun su coru prenu fintzas a cucuru de afròddiu, e si cumprendit, po essi tentu sa possibbilidadi de giogai un arrogheddeddu de sa partida impari a Mattia. Chi si depu contai sa beridadi, apu sèmpiri pentzau ca, chi is cosas mi fessint andadas beni, podia benni a essi s'allenadori de fillu miu, ma custu est pagu ma est seguru, no pentzammu de arrannesci a giogai impari a issu in sa pròpriu scuadra». 
Fait a narai puru, immoi chi nci seus arribbaus, ca Marco Nieddu est gioghendi a bòcia (est a nai, est currendi avatu a sa bòcia, cumenti si iat a podi narai, mellus) de calincuna cosa cumenti a binti annus, chi no de prus puru (e no funt pagus, gei ddu cumprendeis a solus deu creu) e in totu sa carrièra cosa sua est stètiu bonu a ndi pesai calincuna cosa cumenti a cuatrucentus e sessantacincu gol (is ùrtimus duus, cumenti s'apu contau ainnantis, ddus at fatus in sa partida de domìnigu passau). Po Marco Nieddu, duncas, est sa de tres stagionis chi fait, chi giogat, mellus puru cumenti sonat, impari a is de sa Baunese, cun sessantotu gol fatus in totu. Su fillu Mattia, invècias, est cresciu (po su chi pertocat su giogu de sa bòcia, est craru) me in sa scuadra de is piciocheddus piticus de su Tortolì e de cust'annu est gioghendi me in sa scuadra de is giòvuneddus de sa Baunese, e cumenti sucedit fatu fatu, is allenadoris de is scuadras de is mannus (cussas chi, a trassa de s'italianu, podeus tzerriai sa "primu scuadra", po circai de ddu narai mellus), funt costumaus, fatu fatu meda, a tzerriai is piciocus prus piticheddus, ma prus fortis, chi ddoi funt in cussa chi tzerriaus pipiniera, (chi est unu fueddu chi no manigiammu ma chi in dì de oi mi fait amachiai, diaderus, po cumenti sonat) po ddus fai giogai, est craru, e si cumprendit, impari a is giogadoris prus fortis, chi tenint s'esperièntzia prus manna. 

Ma torraus a nosu e, duncas, a is resultaus chi ndi funt bessius aforas, chi ndi funt arribbaus apustis de sa primu giorronada de giogus po su chi pertocat sa Primu Categoria. Is de su Deximeputzu ant bintu, in domu cosa insoru, po tres a zeru, sa partida contras a is ollastrinus de s'Ulassai. Tres gol po is de La Palma puru, chi ant bintu su "derby" (ddu naraus a trassa de is ingresus, ca cun custu fueddu tzerriant is partidas, mescamente is partidas de càlciu, si cumprendit, tra duas scuadras chi abarrant, chi s'agatant in sa pròpriu bidda, in sa pròpriu citadi e fintzas, in sa pròpriu regioni) de Casteddu contras a is de sa Next Gen Himalaya (e bai e circa cumenti ddi est bèniu in conca de tzerriai sa scuadra cosa insoru diaici, mi megu a solu a solu immoi). Semàfuru birdi (cumenti si narat candu una scuadra bincit e torrat a domu sua cun totus is tres puntus in buciaca) puru po is de su Setimu, chi funt stètius bonus a binci, in domu de is de su Sadali, cun su resultau, bellu e tundu tundu de tres a zeru. De importu mannu est stètia puru sa bìncida de is de s'Azzurra de Pauli, sighius de un allenadori giòvuneddu, ma bravu meda, cumenti a Davide Canosa, cun is asullus chi funt arrannèscius a binci sa partida cun su resultau de tres a duus contras a is de su Tertenia. E pròpriu ariseu apu tentu sa possibbilidadi de ndi chistionai (de chistionai de sa partida, po ddu narai mellus e po essi prus crarus) a su telefunu cun Davide Canosa chi, est, de cust'annu (cumenti s'apu giai arremonau, de su restu) s'allenadori de is de s'Azzurra. E immoi, chi seis de acòrdiu (fadendi su contu ca a mei iat a fai prexei meda), si contu ita totu m'at scoviau. «Su de arrannèsci a binci in domu allena, mescamente candu depis giogai in Ollastra, est sèmpiri una cosa de importu mannu, e si cumprendit beni – m'at narau Davide Canosa, arraxonendi impari a mei apitzus de sa primu partida de sa stagioni nova chi is de s'Azzurra de Pauli ant giogau in Tertenia -. Seus chistionendi de tres puntus de oru po nosu; seus meda, ma meda prexaus de cumenti si funt andadas is cosas custu domìnigu passau. Is piciocus cosa mia ant fatu, diaderus, una partida toga e bona meda e deu creu ca sa bìncida cosa nosta siat giusta, est a nai, duncas, po ddu narai mellus puru, ca no ndi eus furau nudda. Nc'est de narai, peròu, ca is aversàrius cosa nosta, est a nai is de su Tertenia, me is ùrtimus minudus de sa partida funt arrannèscius a si fai unu gol chi at torrau a oberri sa chistioni, sa storia de sa partida. E in prus, in una de is ùrtimas atzionis de sa partida, issus (megaus a chistionai de sa scuadra de is aversàrius de s'Azzurra, e duncas de is de su Tertenia, gei si cumprendit berus? Ndr) ant pigau in prenu su pau de sa porta cosa nosta, e duncas, si iat a podi narai ca fiant acanta acanta de ndi cassai su gol de sa paridadi, cumenti si iat a podi narai; est a nai, duncas, ca me is ùrtimus segundus de giogu fiant giai giai po ndi cassai su gol de su tres a tres. Pròpriu po totu custu chi t'apu contau immubagora, no podeus ca essi prexaus meda, est craru». 
Davide Canosa, duncas, podit sighiri a trabballai cun su coru prenu, fintzas a cucuru (cumenti si narat) de afròddiu e de isperas bonas. E issu etotu at aciuntu: «Sa nosta est una scuadra pesada cun una biga manna de piciocheddus giòvunus; sa media de s'edadi de sa truma de giogadoris est de binticuatru annus. Torrendi a sa partida contras a is de su Tertenia, seu abarrau cuntentu meda de cumenti si funt cumportaus is piciocus cosa mia in campu. Apustis de nd'essi incasciau su gol de s'unu a unu no si seus lassaus andai, cumenti si narat; est a nai, duncas, ca seus arrannèscius a abarrai cumpatus, e fortis. Est craru, su de incasciai su gol est stètia una bella bussinada po nosu, e nc'eus postu una pariga de minudus a cumprendi ita fiat sucedendi, ma apustis eus torrau a incumentzai a giogai cumenti scieus. Eus fatu a biri a totus ita seus bonus a fai; custa scuadra tenit unu coru mannu, e su carateri forti ca tenint is scuadras cun s'esperièntzia prus manna. E nosu, mancai no teneus totu custa esperièntzia a is pabas, po cussu chi ti fia contendi ainnantis, seus arrannèscius a si fai balli a su pròpriu. Iat a bastai a fai su contu ca seus arrannèscius a fai tres gol, in domu allena, e no est cosa de pagu contu, e si cumprendit. De su restu, me is noranta minudus de sa partida podit capitai de totu, e difatis sucedit fatu fatu meda de s'agatai in acua lègias, cumenti si narat, ma nosu seus arrannèscius a abarrai selenus, po su chi est possibbili a fai in una partida de importu cumenti cussa de domìnigu passau. Su de abarrai calmus, su de abarrai postus beni in campu, chentza de si ghetai a pari, est stètia una de is cosas de importu prus mannu po binci sa partida e, duncas, po ndi cassai is tres puntus. Seu prexau meda, duncas, po totu cussu chi ant fatu a biri in campu is giogadoris chi seu sighendi». 
E immoi chi nci seu, immoi chi seus arribbaus a custu puntu de sa chistioni, deu creu chi potzat essi de importu su de andai a castiai impari, sèmpiri chi seis de acòrdiu cun mei, cali est sa storia, sa carriera de Davide Canosa in su mundu de sa bòcia de is diletantis sardus. E duncas, Canosa me is ùrtimus annu at tentu s'ocasioni (ocasioni de oru, si iat a podi narai diaici) de sighiri is piciocheddus chi ant fatu parti de sa Rapresentativa de is Allievus, est a nai, duncas, chi at sighiu e trabballau impari a totus is piciocheddus prus fortis, e prus giòvunus, chi giogant in dì de oi in Sardìnnia (est a nai, mellus, impari a totus is piciocheddus chi giogant in Sardìnnia me is campionaus pesaus de is de sa Federatzioni Italiana de su Giogu de su Càlciu e pesaus, est craru, de sa Lega Natzionali de is Diletantis e chi apustis currint po cussu chi tzerriaus Trofeo delle Regioni). Me is annus ainnantis, invècias, e po unu bellu arrogu de tempus, at trabballau in sa pipiniera, ddi naraus diaici, de is de sa Ferrini de Casteddu; est a nai, duncas, chi at sèmpiri trabballau cun is giòvunus. Duncas, cust'annu, Canosa s'agatat po sa primu borta in sa vida sua a trabballai cun una scuadra de mannus, o, cumenti si narat, cun una primu scuadra. E duncas, Canosa at sighiu a mi contai: «Po immoi no potzu essi ca prexau meda, ma meda, po cumenti si funt andendi is cosas. Is piciocus benint a su campu po s'allenai cun su coru prenu fintzas a cucuru de afròddiu, benint po si spassiai ma po cumenti trabballant parint, giai giai, giogadoris professionerie, e po un'allenadori, si cumprendit, est sa cosa de importu prus mannu po circai de fai beni is cosas. Is allenamentus chi eus fatu in s'istadi (cussus chi, a trassa de s'italianiu, estus a podi tzerriai "preparatzioni atletica" ndr) funt andaus beni meda; nesciunu s'est ingotu, chi est sèmpiri s'arriscu prus mannu, nesciunus s'est strupiau e duncas podeus sighiri a curri in sa bia cosa nosta. S'ispera est cussa de ndi pesai una stagioni bona e toga meda; de sa bidea ca mi seu fatu, teneus totus is cartas bonas po serrai su campionau me is primus postus de sa lista, ma feti su campu at a tenni s'ùrtimu fueddu apitzus de sa chistioni. Sa cosa de importu prus mannu, a su mancu po mei, est cussa de arrannèsci a ndi bogai aforas unu giogu chi potzat essi spassiosu de biri, e custu ballit, po incumentzai, po is tifosus cosa nosta etotu, e mi parit craru puru».  
Su campionau de sa Primu Categoria de cust'annu parit togu meda: is scuadras fortis, cussas chi ant a curri po ndi cassai su primu postu de sa lista, funt medas. «Depeus fai su contu ca cust'annu no nc'est prus s'òbbrigu, in su campionau de s'Ecellenza (chi est su prus mannu, cussu de importu prus mannu, po ddu narai mellus, tra totus cussus chi si giogant in s'isula ndr), de mandai in campu is piciocheddus piticheddus chi faint parti de sa rosa (e chi, a trassa de s'italianu, tzerriaus "fuori quota"). Duncas, medas de custus piciocheddus funt cabaus, ant scerau, po ddu narai mellus puru, de andai a giogai me is scuadras chi currint me is campionaus de sa Promotzioni e, duncas, de sa Primu Categoria puru. De seguru nci funt scuadras chi funt cuncodradas mellus de sa nosta, est a nai, duncas, chi nci funt medas scuadras chi tenint is cartas prus bonas de is nostas, cumenti si iat a podi narai puru; e de su restu, nc'aciungu custu puru, nosu no teneus sa possibbilidadi de spendi totu cussu dinai chi, mancai, ant potziu spendi is atrus assòtzius po comperai is giogadoris e po ndi pesai is rosas. Ma custu no bollit narai, antzis, ca no eus a bendi sa peddi cosa nosta a caru prètziu (cumenti si narat in italianu etotu ndr), custu est pagu ma est seguru. Custu domìnigu passau, difatis, ainnantis de s'incumintzu de sa partida, apu narau a is piciocus cosa mia, a is giogadoris de s'Azzurra, de ndi cabai in campu con sa bidea de si spassiai, ma chenta de si ndi scaresci de giogai cun su corteddu tra is dentis, cumenti si narat, e duncas, cun sa chighirra, cun su coràgiu chi serbit po ndi cassai is tres puntus e po benni a essi prus fortis de is aversàrius cosa tua. Apu domandau a is piciocus cosa mia, duncas, de curri, a totu coddu (manigiu custu fueddu ca in Bidd'e Sorris apu sèmpiri intèndiu narai fintzas de candu fia unu pipieddu pitichinninniu ndr), chentza de si frimai nemmancu po unu segundu, fintzas a s'ùrtimu minudu de giogu, fintzas a s'ùrtimu minudu de sa partida. Is cosas si funt andadas beni meda, est craru, e gei nci arribbais a solus a ddu cumprendi. Ma immoi depeus sighiri a curri in cust'arrastu etotu, cumenti si narat, circhendi de ndi cassai su tanti prus mannu de satisfatzionis, po su chi arrannèsceus a fai, si cumprendit». 
E duncas, custu fini de cida chi est arribbendindi giai, allestru cumenti chi fessit unu leporeddu de sartu (sèmpiri chi mi permiteis de manigiai custus fueddus e de giogai a fai, a su mancu po unu pagheddu feti, su poeta), is scuadras de sa Primu Categoria ant a torrai a cabai in campu po sa segunda giorronada. Po is de s'Azzurra de Pauli, nc'at a essi sa partida, de importu mannu, in domu cosa insoru, est a nai aranti a is pròprius tifosus, contras a is de sa Next Gen Himalaya. Is giogus ant a incumentzai a is cuatru de su mericeddu de su sabudu (e no duncas su domìnigu). Davide Canosa, est craru, est giai trabballendi po cuncodrai sa scuadra sua concas a sa partida. «Eus a depi giogai contras a una truma de giogadoris chi, no parit berus, funt prus piticus de edadi de is giogadoris cosa nosta. Po su chi mi pertocat, connòsciu beni meda is dirigentis chi faint parti de s'assòtziu, prus de is giogadoris chi tenint in sa rosa. Seu seguru, de su restu, chi ant a benni a giogai de nosu cun su corteddu in mesu a is dentis, cumenti si narat, e cun sa famini chi serbit po circai de ndi cassai is primus puntixeddus de sa stagioni cosa insoru, fadendi su contu chi ant pèrdiu sa primu partida de s'annu, de su campionau nou, duncas, contras a is de La Palma. E, tra is atras cosas, deu seu arrannèsciu a andai a castiai sa partida, fadendi su contu chi ant giogau de sabudu. Po sa bidea chi mi seu fatu, e duncas, a parri miu, fortzis, po su chi ant fatu a biri in campu, is de s'Himalaya si minesciant de ndi cassai a su mancu unu puntixeddu. Eia, deu creu ca no si minescessint de perdi, ma su càlciu, a bortas, andat diaici. Cun unu stìddiu de esperièntzia in prus, cumenti si narat, iant potziu binci sa partida chentza tropus strobbus o a su mancu unu puntixeddu. Pròpriu po totu cussu chi apu narau, chi s'apu contau fintzas a immoi – at sighiu a mi scoviai Canosa – seu seguru chi sa partida de sabudu at a essi bella cantu tostada po nosu. Issus giogant beni meda e ndi cabant in campu po si spassiai, e duncas deu creu ca nd'at a bessiri aforas unu spetàculu togu meda po totus cussus chi ant a tenni sa gana, e su prexei, de benni a biri sa sfida, e seu chistionendi, est craru, de is tifosus de is duas scuadras. Sa cosa de importu prus mannu, immoi, est cussa de no ndi cabai in campu cun sa cunvintzioni de essi sa scuadra prus forti de su campionau, feti poita seus arrannèsci a binci in sa prima bessida. In Ollastra, contras a is de su Tertenia, seus stètius bravus meda, ma po ndi pesai una stagioni de importu mannu, depis abarrai sèmpiri scidu, po ddu narai diaici, cun sa conca apitzus de su chi ses fadendi. Scieus beni innoi boleus e podeus arribbai in su campionau de cust'annu, ma pròpriu po custu depeus imparai, e in pressi puru, a nai sa beridadi, a no cunsiderai is aversàrius cumenti chi siant una scuadrixedda de nudda, cumenti chi depessint essi, po fortza, prus dèbbilis de su chi seus nosu». 
E, tra is atras centus cosas, sa partida de sabudu at a tenni unu tastu druci druci po su chi pertocat is de s'Azzurra de Pauli. E duncas, tocat a Canosa a si fai cumprendi su poita. «De cussu chi m'ant scoviau is de sa sociedadi, sa partida chi eus a depi giogai contras a is casteddaius de s'Himalaya capitat pròpriu in sa dì innoi arragodaus sa morti de su presidenti bèciu de s'Azzurra, chi fiat, cumenti scieis beni, Salvatori Murru». Est a nai, duncas, po manigiai atrus fueddus (isperendi ca si cumprendat su chi si bollu narai) ca sabudu chi benit, chi at a essi su cincu de su mesi de Ladàmini, sèmpiri chi su calendàriu no est contendumì fabas, at a essi s'anniversàriu, cumenti si narat, cumenti ddu tzerriaus, de sa morti de su presidenti de is asullus. «De su chi seu bènniu a sciri – at sighiu a mi contai Davide Canosa – a castiai sa partida nc'at a essi puru su sindigu de su comunu de Pauli, est una cosa chi si fait prexei meda e, duncas, eus a fai de totu po circai de fai una bella figura, cumenti si narat». 
E duncas, apustis de m'essi strollicau diaici meda cun is chistionis chi nd'at bogau aforas Canosa, podeus sighiri, sèmpiri chi seis de acòrdiu cun mei, po su chi fait, po su tempus (e su logu) chi m'abarrant po custa cida, andendi a castiai, puru, cumenti funt andadas is cosas po su chi pertocat sa Lista B, sèmpiri po su campionau de sa Primu Categoria. 

E duncas, andaus a castiai una parighedda de resultaus, chi seis de acòrdiu cun mei. Is de s'Arbus, chi ndi funt cabaus pròpriu s'annu passau de sa Promotzioni a su campionau de sa Primu Categoria, funt partius cun su pei giustu, cun su pei deretu, cumenti si narat a trassa de s'italianu, gràtzias a sa bìncida, po unu a zeru, chi nd'ant cassau in sa primu partida chi ant giogau in domu cosa insoru, contras a is de su Segariu. Su resultau prus tundu (cumenti si narat, torra, a trassa de s'italianu) est stètiu, custu est pagu ma seguru, su tres a zeru chi is de su Samugheo ant scutu in faci a is fradibis de s'Isili. E pròpriu is de su Samugheo si minescint duus fueddus in prus, fadendi su contu, mescamente, ca me is ùrtimus annus ant fatu sèmpiri campionaus de importu mannu meda, mancai sa rosa cosa insoru siat pesada, e ballit puru po cust'annu, cun una biga, cun unu muntoni de piciocheddus giòvunus. Tres gol, aforas de domu (chi est sèmpiri una cosa de importu) po is de su Perdaxius puru, chi si funt fatus balli in sa primu partida de sa stagioni nova (seus chistionendi, est craru, de cussa de su duamilla e binticuatru e duamilla e binticincu) chi ant giogau in domu de is de su Santadi. Ndi funt arribbaus tres puntus prenus puru po is de s'Antiochense (sa scuadra de Sant'Antiogu ndr), chi funt arrannèscius a binci, po unu a zeru, in domu de is de sa Virtus de Pauli Arbarei, chi ndi funt artziaus in su campionau de sa Primu Categoria apustis de essi bintu, a manus bascias (cumenti si iat a podi narai, a trassa de s'italianu etotu), su campionau de sa Segunda Categoria, in sa Lista A, de s'annu passau. Giorronada bona meda puru pois de su Cortoghiana, chi funt arrannèscius a binci, cun su resultau de duus a unu, in domu de is de su Gonnos, chi s'annu passau ant serrau su campionau de sa Promotzioni a s'ùrtimu postu de sa lista, e duncas ndi funt dèpius cabai (est craru, e de su restu deu creu chi scieis beni cumenti funtzionant is giogus) a giogai in su campionau de sa Primu Categoria, ma po immoi funt dèpius abarrai a buca asciuta, po su chi pertocat is puntus, est craru. Prexu a is isteddas, cumenti si narat (a trassa de s'italianu etotu, torra) po is de sa Libertas de Barumini puru, cun is grogus-arrùbius, sighius, po cust'annu puru, de Marco Piga, chi est trabballendi cun s'assòtziu de sa bidda cosa sua de unu bellu arrogu de tempus: duncas is grogus-arrùbius funt arrannèscius a binci, cun su resultau de duus a zeru, in domu cosa insoru, est a nai, duncas, aranti de is tifosus cosa insoru, contras a is de su Ruinas. 

E po custa cida puru, mi parit mi parit, apu acabbau su tempus e pruschetotu su logu po si scriri in sardu. Ma si promitu, giai de immoi, ca eis agatai un antru tanti de rigas, pròpriu cumenti a custas, giòbia chi benit. Sèmpiri chi su Cielu at a bolli. 
E in s'interis, si imprassu a forti.





Attività realizzata col contributo della Regione Sardegna - IMPRENTAS 2023-2024. LR 22/2018, art. 22