Su mundu de sa Segunda Categoria sighit a regalai spàssiu e ispantus

Incumentzu a scriri s'ùrtimu articulu po su chi pertocat su mesi de Donniasantu, in su sardu chi si fuedhat in su Campidanu de mesu (cumenti a sèmpiri, de su restu), cun su coru prenu fintzas a cucuru de isperas bonas: po mei, a su mancu, custas trinta diis funt unu pagheddu tostadatzas, ddi naru diaici, no feti po su tempus mau chi dònnia tanti mi nci ghetada a terra s'umori (si nd'apu giai chistionau puru me is cidas passadas), ma poita, mescamente, chi calincuna cosa depit andai mabi, o calincuna cosa si depit arrogai, podeis abarrais segurus de su fatu chi mi capitat in custu mesi. E diaici, no mi parit mancu berus chi fra cincu diis si nd'eus a scabulli de su mesi de Donniasantus e eus a brintai in su mesi de Idas, chi abarrat (a parri miu, est craru), unu pagheddu prus druci. At a essi chi in s'aria s'incumentzat a intendi cussa allirghia chi acumpangiat is festas, at a essi chi est giai po ndi brintai s'ierru; no si sciu spiegai beni su poita ma est de candu seu pipiu chi mi pigat diaici (diaici beni, est craru) e seu prexau meda chi arrannèsciu ancora a intendi su coru lèbiu, mancai feti a pentzai a custas "tontesas" (chi poi tontesas no funt!), mancai no seu prus unu piciocheddu pitticu, est craru, de medas annus, ma si ddu torru a nai, poita po mei est una chistioni de importu mannu, mescamente in custus tempus grais e lègius: deu creu chi una de is sarvesas chi is cristianus podint aciapai in custa vida est cussa de podi castiai, ancora e sèmpiri, su mundu cun is ogus (e is spantus) de is pipius. Podeus aciungi puru chi oi nc'est su sobi (a su mancu po immoi!), e intzandus si promitu chi sa primu cosa chi apa a fai candu acabbu cun custu traballu at a essi cussa de mi nci fuiai (di nau diaici, chi mi ddu permiteis) in cancu logu bellu a mi gosai unu pagheddu de callenti e de luxi bella, cumenti feti su sobi si sciri regalai.
Si scoviu una cosa, sèmpiri chi si ndi potzu furai dexi minudus de tempus cun custas stròllichentzias (de su restu mi connosceis beni e ddu scieis, ballit po totus, chi mi praxit a arrexonai apitzus a custas cositeddas puru, ainnantis de chistionai de bòcia e de partidas e de resultaus): in una bidda pittichedda cumenti a Bidd'e Sorris (chi poi a nci pentzai beni diaici pitichedda no est, fadendi su contu chi nci bivint calincuna cosa cumenti a seti milla cristianus) is atividadis po si spreviai no funt medas: nc'ant a essi una dexina de localis (cussus chi in ingresu si tzerriant bar) innoi is piciocus prus matucheddus (impari a is ominis mannus e a is prus becius puru) s'atobiant; prus unu tzirculeddu, chi est stètiu pesau de is de sa Futura, chi est una de is scuadras de bòcia prus becias chi s'agatant innoi, e chi currit in su campionau de is Amatori UISP (e duncas no me is campionaus de sa FIGC, po si cumprendi mellus); a parti custu, nci funt duas palestras, una scolla po imparai a baddai, un assotziu pesau de is chi giogant a tennis (e chi ant pesau puru sa scola po cussus chi iant a bolli imparai custu sport), una scuadrixedda de Rugby, sèmpiri po is piciocheddus piticus chi andant me is scolas elementaris e medias, e una truma de piciocheddus piticus (mascus e feminas, est craru) chi currint apitzus a cussus chi in italianu tzerriaus "pattini a rotelle". E mi parit chi is sprévius funt acabaus diaici, e a nci pentzai beni, immoi chi ddus apu arremonaus totus, no mi parint diaici pagus. De duus annus, peròu, est a nai de candu est incumentzau totu custu trumentu (e custu segamentu de conca lègiu) acapiau a su tialu de Covid, est sparèssia puru sa scuadra de bòcia, est a nai s'Unione Sportiva de Bidd'e Sorris, chi teniat una storia chi sighiat a andai ainnantis de cincuant'annus, prus o mancu. Apu chistionau cun s'ùrtimu presidenti chi at sighiu s'assotziu de sa bidda cosa mia, Bruno Piroddi (chi at preferriu, in s'interis, brintai a fai parti de sa truma de is chi sighint sa scuadra de sa Villacidrese, est a nai s'assotziu de Biddacidru) e mi at contau chi no at agatau s'acòrdiu cun su comunu e duncas cun s'assessori a su sport, deu pentzu po una chistioni de agiudus in dinai. E duncas in su campu de bidda, chi est fatu in erba naturali (e chi est bellu meda poita is postus po arriciri is tifosus funt postus asuta a una bella cobertura, e duncas no ddoi arribbat s'acua, me is domìnigus chi mancai proit) megant a giogai, de duus annus, is asseminesus de sa San Marco. Est unu pecau mannu, si cumprendit, po totus is piciocheddus de bidda: a nai sa beridadi, nc'est feti una scola de càlciu, cussa pesada de is de sa San Biagio, ma est oberta feti po pipius e po piciocheddus pitticus de edadi, est a nai feti po cussus chi andant me is scolas elementaris o me is medias. E duncas, torrendi a su contu miu (no mi praxit su tennis, e nemmancu a curri apitzus de is arrodeddas de cussus chi tzerriaus "pattini", e no mi praxit nemancu a mi tupai aintru de is palestras), no m'abarrat atru de fai chi passilai, mescamente me is rugas de is sartus chi nci funt totu a giru de sa bidda, e potzu torrai gràtzias a su cielu po su fatu chi mi praxit meda, ma meda, a passillai me is logus de sartu, fadendi su contu chi totu a giru a giru de sa bidda mia no mancant de seguru. A nai sa beridadi, mi praxit meda a passillai puru me is rugas aintru de sa bidda, pruschetotu me is stradas prus becias, fadendi su contu chi Bidd'e Sorris est stètia pesada tantus annus fait, nareus in s'annu milli. E duncas est diaici chi mi sprèviu, e mi praxit custa cosa chi mi bastat pagu meda po abarrai allirgu: mi bastat, e cun custa serru cun is stròllichentzias, si ddu promitu po diaderus, agatai unu logu innoi potzu abarrai assèbiu, mancai (chi est una de is cosas de importu prus mannu) innoi potzu abarrai atesu de is machinas (est a nai de is veturas) e pruschetou de su tialu de su carrasciu chi faint is motoris, e si ddu narat unu chi bivit, de candu est nasciu, pròpriu aranti a una de is bias innoi ndi passant de prus. Si nau totu custu no feti po si scoviai cumenti nci passu su tempus, ma pruschetotu po atacai (e iat a essi ora puru!) cun is chistionis de custa cida.

M'iat a praxi, duncas, andai a castiai cumenti funt postas is cosas me is otu listas de sa Segunda Categoria: e intzandus, apustis de totu cussu chi s'apu nau fintzas a immoi, si nd'eis acatai a solus de cantu biddas nci funt, in Sardìnnia, chi tenint una scuadra de bòcia po su spàssiu (ma po sa saludi puru) de is piciocus; in custus duus annus, cun giai totus is giogus frimus (e is atividadis serradas po su chi tzerriant, in ingresu, "lockdown"), eus cumprendiu (e beni puru) de cantu mannu est s'importu de un assotziu sportivu po su chi pertocat is atobius tra is cristianus, no feti po cussus chi giogant me in sa pròpriu scuadra, est craru, ma puru po is tifosus, chi podint fai su tifu, totus impari, po un'oredda e mesu, scarescendisìdi duncas de totus is cosas marigosas chi sa vida, fatu fatu, ndi bogat a foras.

In sa Lista A, duncas, a su primu postu s'agatant is de s'Azzurra de Pauli, chi tenint allogaus calincuna cosa cumenti a trexi puntus, cun cuatru partida bintas, una partida chi s'est serrada in paridadi, e feti una partida perdia. Pròpriu domìnigu passau, is asullus ant bintu sa partida de importu mannu contras a is pirresus de sa Jupiter, cun unu muntoni de gol, a castiai beni: is meris de domu nd'ant fatu ses, is allenus funt arrannescius, invecias, a ndi fai feti unu. A su primu postu, pròpriu impari a is paulesus, nci funt puru is grogus-arrubius de s'Ussana, chi domìnigu peròu funt abarraus frimus a castiai is atrus, poita teniant de giogai sa partida contras a is de sa Burcerese de Brucei, chi ant peròu preferriu a ndi bessiri a foras de is giogus ainnantis de s'incumintzu de su campionau. Nc'est de nai puru chi is de s'Azzurra tenint ancora una partida de giogai, est a nai, mellus, de recuperai, contras a is de su Amatori Calcio Kalagonis, chi est sa scuadra de Maracalagonis, chi ndi fiat sartada po crupa, ddu scieus, de su tempus mau chi at ghetau a fundu e sus totu sa Sardìnnia me is cidas passadas. E po fortuna, nc'aciungeus nosu, chi custu fini de cida su tempus est stètiu bonu e no est sartada nemmancu una partida. Po su chi pertocat sa Lista B, invecias, is deximesus de sa Decimo 07 si funt depius acuntentai de su resultau de unu a unu pesau in domu de is fradibis de su Deximuputzu; nd'est arribbau, duncas, feti unu puntixeddu po is biancus – arrubius, chi no funt stètius bonus a allogai su primu postu de sa lista e ndi funt cabaus, diaici, a su de tres postus, cun trexi puntus, chi est su tanti chi tenint puru is asseminesus de sa Gioventù Assemini, cun Daniele Zucca chi est unu de is giogadoris prus fortis chi ddoi funt in sa scuadra de is asseminesus, cun s'atacanti chi est sighendi a fai a biri cosas bellas medas. A su primu postu de sa lista, intzandus, ndi artziant is de s'Atletico de Masainas, cun cuindixi puntus allogaus in buciaca, feti unu in prus de is chi tenint is de s'Is Urigus, chi est una biddixedda pitica pitica (cun feti cincucentus e cincuanta cristianus) chi fait parti de su comunu de Santu Giuanni Suèrgiu (custu po torrai a nai chi puru me is biddas piticas, piticas a tipu stampus, nci funt personas chi trabballant po ndi pesai un assotziu). Is arrubius – brau domìnigu passau ant bintu, in domu cosa insoru, cun su resultau de unu a zeru, contras a is de su Silìcua; is de su Masainas, invecias, si funt spassiaus a fai cincu gol a is de su Gonnesa, chi funt stètius bonus, peròu, a ndi fai tres, ma no funt bastaus, est craru, po cassai nemmancu unu puntixeddu. Nc'est de aciungi, puru, chi is deximesus tenint ancora duas partidas de giogai, chi ndi funt sartadas, me is cidas passadas, po crupa, torra, de su tempus mau e de totu s'acua chi nd'est arruta. Sigheus a andai ainnantis, duncas, e castiaus cumenti funt postas is cosas po su chi pertocat sa Lista C: is de sa Virtus de Futei funt currendi a totu coddu (diaici ddi naraus in bidda cosa mia candu boleus chistionai de una cosa forti meda) e s'agatant sèmpiri a su primu postu de sa lista, cun otu partidas bintas me is primus otu bessidas, candu mancant feti tres partidas po acabbai cun is batallas chi ballint po s'andada. Pròpriu domìnigu passau, is de sa Virtus ant bintu sa partida de importu prus mannu chi nci fiat contras a is de su Segariu, chi sighint a su segundu postu ma tenint, in dì de oi, calincuna cosa cumenti a noi puntus in mancu (est a nai cuindixi) de is chi tenint is biancus-brau. Chi sighit diaici, duncas, is giogus po s'artziada in sa Primu Categoria s'iant a podi serrai ainnantis de s'acabbu de sa stagioni, chi at a ferri su domìnigu ainnantis a cussu de PascaManna. A su segundu postu, sèmpiri cun cuindixi puntus, ddoi funt puru is de su Sàrdara, chi domìnigu passau peròu ant perdiu sa partida chi ant giogau in domu de is campidanesus de s'Atletico de Seddori, chi ant bintu cun su resultau, togu meda, de tres a unu. Sa Lista D, invecias, est cussa chi pertocat is doxi scuadras ollastinas chi currint, est craru, in su campionau de sa Segunda Categoria. A su primu postu nc'agataus is de sa Castor de Tortolì, impari a is foghesus de su Perdasdefogu: is duas scuadras si funt atobiadas, una contras a s'atra, pròpriu duas cidas fait, in sa partida de importu prus mannu chi nci fiat in sa de seti giorronadas: sa batalla s'est serrada cun su resultau de tres a tres. Custu domìnigu passau, invecias, is de sa Castor funt andaus a sbati, ddi naraus diaici, contras a is meris de domu de su Santu Idu, chi funt arrannescius a firmai, cun su resultau de unu a unu, una de is scuadras prus fortis chi nci funt in sa lista. Is foghesus, invecias, nd'ant aprofitau subbitu, e ant bintu, aranti de is tifosus cosa insoru,est a nai in su campu de domu, po tres a zeru in sa partida contras a is de su Triei. Sa Lista D, chi fadeus is contus, est una de is prus spassiosas chi nci funt tra totus is otu listas de sa Segunda Categoria, poita a su de tres postus, cun feti unu puntixeddu in mancu de is primas duas (chi eus arremonau pròpriu immoi), ddoi funt is de s'Accademia Calcio Sarrabese, sa scuadra de Biddeputzi,  chi in s'ùrtima bessida, cussa de domìnigu passau, est craru, si ndi funt pigaus is tres puntus chi ddoi fiant, badda badda, in sa batalla contras a is de s'Escalaplano, sa scuadra de Scalepranu, cumenti si narat in sardu, cun su resultau de unu a zeru. A su de cuatru postus in sa lista, ddoi funt invecias is Amatori de su Jerzu, cun dexiotu puntus allogaus: is ùrtimus tres ndi funt arribbaus gràtzias a sa bincida, po duus a zeru, contras a is de su Gelisuli, chi est una biddixedda de feti milli e trecentus cristianus. Puru po su chi pertocat sa Lista E, sa batalla po ndi artziai in Primu Categoria est toga meda: a su primu postu, cun dexiotu puntus, ddoi funt is de sa Bolotanese de Olothene, chi funt arrannescius a binci contras a is de su Supramonte de Garteddì; impari a is grogus-arrubius ddoi funt is de su Porto San Paolo, chi est sa scuadra de Lòiri Portu-Santu Paulu, chi no funt stètius bonus, peròu, a fai nemmancu unu gol in sa partida in domus de is de su Burgos de Su Burgu, chi est una bidda, in su tattaresu, chi contat feti otucentus e setanta-cincu cristianus. Sa partida, duncas, s'est serrada in paridadi, cun su resultau de zeru a zeru. Is de Su Burgu s'agatant a su de tres postus, cun sexi puntus in buciaca, chi est su pròpriu tanti de puntus chi tenint allogaus is de su Bòttida, atra bidda pitichedda pitichedda meda, cun feti ses-centus e cincuanta cristianus. Is de su Biasì puru (chi est unu muntoneddu de domus chi faint parti de su comunu de Padru), podint ancora isperai de ndi cassai s'artziada in Primu Categoria, poita tenint cuindixi puntus, est a nai feti tres in mancu de is puntus chi tenint is primas duas scuadras de sa lista. Po su chi pertocat sa Lista F, cussa innoi nci funt totus is scuadras de sa zona de Aristanis, a su primu postu ddoi funt sèmpiri is de sa Narboliese de Narabuia, cun dexianoi puntus; domìnigu passau is biancus-asullus ant bintu sa partida contras a is de su Norghiddo, cun unu cuatru a zeru bellu, togu e tundu tundu, cumenti si narat. A su segundu postu, invecias, agataus is de su Tramatza, cun catodixi puntus, est a nai cincu prus pagu de is aversarius chi funt circhendi de ndi cassai. Is de su Tramatza, pròpriu domìnigu passau, ant bintu sa partida, in domu cosa insoru, contras a is grogus – arrubius de su Sedilo. Puru in sa Lista G sa cursa, sa batalla po ndi artziai in Primu Categoria est sèmpiri oberta: a su primu postu, cun binti puntus fatus, ddoi funt is de su Treselighes, chi est sa scuadra pesada de is de Villassunta, una biddixedda pitica pitica, chi abarrat a metadi de su tretu chi nc'est tra sa citadi de Tattari e cussa de Alghero; acanta, duncas, de Portu Ferru e de su lagu de Baratz. A su segundu postu, cun dexianoi puntus, est a nai unu in mancu, ddoi funt is de su Santu Paulu Apostolu, chi est sa scuadra de Tattari chi tenit su campu in sa zona de Carbonazzi. Is grogus-brau domìnigu si funt depius acuntentai feti de unu puntixeddu, bodditu in domu de is de su Boyl de Potuvìgari. In sa Lista H, chi est s'ùrtima, a su primu postu ddoi funt sèmpiri is de su Casteddu Sardu, chi no ant ancora pèrdiu nemmancu una partida e ndi tenint seti bintas e feti una chi s'est serrada in paridadi, po binti-duus puntus cassaus in custas primas otu bessidas. Is arrubius-biancus ant bintu s'ùrtima partida chi ant giogau, in domu de is de su Lungone, po tres a zeru. A su segundu postu nci funt is de su Sorso, chi in s'ùrtima bessida si ndi funt pigaus feti unu puntixeddu contras a is fradibis de su Sporting Cantera, chi est s'atra scuadra chi ddoi tenint in sa bidda. E cun custu serraus is chistionis po oi e po custa cida puru e, no nc'eis a crei, ma in s'interis chi fiat scriendi totu custus fueddus su sobi si nd'est cuau torra apabas a is nuis nieddas e immoi at puru incumentzau a proi e a tronai...ma de su restu, su tempus in su mesi de Donniasantu fait custas brullas, e tocat a tenni passièntzia...

Attività realizzata col contributo della Regione Sardegna. IMPRENTAS 2020-2021. LR 22/2018 art. 22