Su tempus mau at fatu dannus mannus ma is giogus po is scuadras sardas sighint a andai ainnantis

E duncas, a cantu parit, seus arribbaus a s'ùrtima cida de su mesi de Ladàmini, e no mi parit nemmancu berus, chi pròpriu si ddu depu narai. 
E po custa cosa (po essi arribbau a custu puntu de sa storia cosa mia) ndi depu torrai gràtzias a su Cielu: po su tempus chi sighit a andai ainnantis po mei puru (e po bosateus chi ligeis, chi seis ligendi custas rigas, ballit aguali), ca is dannus e is arroris in custa vida no ammancant de seguru, e dònnia dì chi mi bivu (chi mi potzu scroxai, chi arrannèsciu a scroxai, po ddu narai mellus puru) chentza de tenni tropus draboris, est unu regalu de Deus, a su mancu diaici mi praxit a pentzai a sa cosa. 

E duncas, cumenti scieis giai chi eis lìgiu a su mancu unu artìculu tra cussus chi ndi pesu in sardu (in su sardu chi si fueddat innoi in su Campidanu de mesu, a su mancu, e duncas, po essi prus pretzisus, puru, ca mabi no fait, su sardu cumenti ddus fueddaus innoi in Bidd'e Sorris, chi est sa bidda innoi seu stètiu pàsciu e innoi m'agatu, ancora, apustis de corantatres annus), mi praxit a mi strollicai (a mi strollicai ma feti po unu pagheddeddu) impari a bosatrus, est a nai ca ainnantis de mi ponni a si torrai a contai is novas prus callentis (o prus friscas, chi si praxit de prus) chi nd'arribbant de su mundu de is scuadras de is diletantis sardus chi currint me is campionaus pesaus de is de sa Federatzioni Italiana de su Giogu de su Càlciu e, mi parit craru, de is de sa Lega Natzionali de is Diletantis, mi praxit a ciaciarrai unu pagheddeddu (chentza, mancai, de si ndi furai totu su tempus chi, mancai peròu nemmancu teneis) de atras legas puru; e at a essi berus, puru, cumenti si arrapitu fatu fatu, ca no sciu mai cali ant a essi is legas chi ant a brintai in s'artìculu in sardu ainnantis de mi ponni a ddu scriri, si potzu narai, puru, ca mi praxit a incumentzai is artìculus fadendi su contu de su tempus chi passat e de su tempus chi fait (est a nai, chi proit o no proit, chi proit tropu o chi fait basca de si morri, cumenti si narat in bidda mia). 

E duncas, torrendi a nous, custa est una cida de importu mannu, fadendi su contu ca si eus a lassai is pabas su mesi de Ladàmini e eus a tenni duncas sa possibbilidadi de si fuiai, a fundu 'e susu (cumenti si narat in Bidd'e Sorris, a su mancu; o mellus: cumenti apu sèmpiri intèndiu narai de is atrus piciocheddus, mescamente a is tempus de sa scola) in su mesi de Donniasantu, chi est su de undixi mesis de s'annu, e su segundu po su chi pertocat su mesi de s'atonzu. 

E duncas, pròpriu custu giòbia, nemmancu a ddu fai aposta (cumenti si iat a podi narai, a trassa de cumenti si narat in italianu etotu), at a essi su trintunu, est a nai s'ùrtima dì de su de dexi mesis de s'annu, e nc'at a essi de fai festa po cussu ca, a sa moda de is ingresus, tzerriaus Halloween, chi est sa festa chi pertocat, mescamente (segu a crutzu sa chistioni), is animeddas de is mortus, e custu ballit mescamente po is americanus, ma no feti, est craru, chi pentzaus chi ddoi funt traditzioni chi funt giai giai agualis, innoi in Sardìnnia puru, e megu a pentzai a sa festa chi ndi pesant in Seui, e chi tzerriant Su Prugadòriu, mancai no seu ancora arrannèsciu a andai a biri sa festa cun is ogus cosa mia. 
E duncas, isperu chi su mesi de Ladàmini si ndi potzat andai in manera selena, pròpriu cumenti nd'est arribbau (e sa cosa ballit po mei, est craru, ma isperu chi potzat balli po bosatrus puru, est craru), e su pròpriu si iat a podi narai po su mesi de Dònniassantu, chi po mei, a su mancu, est unu de is prus tostaus, e fadiosus, tra is doxi mesis chi si tocat a si scroxai in un annu, fortzis tostau cantu (chi no de prus) de su mesi de Martzu, chi est bellu tostadatzu, a su mancu po su chi mi pertocat.

E duncas, a fai is contus nci poneus pagu meda, in su mesi de Donniàssantu ant a bessiri cuatru artìculus in sardu: su primu at a essi su cuatru, e eus a sighiri, sèmpiri chi su Cielu bollit, puru po s'undixi, su dexiotu e eus a acabbai su binticincu. 

E duncas, mi parit mi parit ca custa cida mi tocat a nci ghetai, in mesu a custu artìculu etotu, cuatru fueddus apitzus de su tempus chi est fadendi e, mescamente, de su tempus malu chi at fatu custu fini de cida passau. E a narai sa beridadi, is previsionis de is dotoris chi sighint is fainas acapiadas a su tempus fiant craras: sciestus giai, de su restu, ca in cincu-ses oras ndi podiat arrui unu bellu tanti de acua (chistionànt de calincuna cosa cumenti a ses centimetrus de acua) e difatis is cosas funt andadas diaici etotu. S'allerta chi nd'ant bogau aforas is dotoris chi sighint sa cosa po contu de is de sa Regione fiat a cabori de aràngiu, ddi nau diaici: custu bollit narai ca is previsionis no fiant bonas, ma de su chi pariàt, a su mancu de su chi pariàt in unu primu momentu, su tempus no depiat essi diaici malu e invècias, mi parit de ddu podi narai diaici, is cosas funt andadas peus meda de su chi podestus timi, fadendi su contu, mescamente, de totus is dannus chi su tempus mau (e po crupa, pruschetotu, de sa cantidadi manna meda de acua chi nd'est protzia, totu paris) at fatu me in sa zona de Bidd'e Sorris etotu, ma nareus, puru, ca ddoi funt stètius dannus mannus puru in sa zona de Silicua e de Deximeputzu. 
E fadendi su contu ca scriu sèmpiri po unu giàssu chi sighit is fainas de is scuadras sardas de bòcia, si potzu narai puru ca su tempus mau at ghetau a pari su campu de is de su Silicua, e in Silicua, si potzu narai custu puru, immoi chi nci seus, andant a giogai is de su Deximeputzu puru (ca currint in su campionau de sa Primu Categoria), ca duncas, custu domìnigu passau no funt arrannèscius a giogai sa partida poita su campu, cumenti s'apu giai arremonau, fiat totu ghetau a pari, po ddu narai diaici, e gei si cumprendit. 

A nai sa beridadi, deu apu castiau su temporali de sa fentana de s'aposentu innoi dromu, e diaderus, no est stètiu su primu temporali chi apu biu in vida mia (fadendi su contu ca tèngiu corantatres annus giai fatus de diora), ma de seguru, est stètiu unu de is prus fortis, ca giai giai m'est bènniu de timi, po su bentu forti chi fiat suendi e pruschetotu po s'acua chi at fatu. E difatis, me in totus is sartus de sa zona acanta de Bidd'e Sorris is terras, prenas a canciofa, si funt prenas de acua e immoi is massajus funt disisperaus, poita timint chi s'annada siat giai arrovinada, ainnantis de s'ora. E gei si cumprendit (e de su restu ndi chistionu e nd'arraxonu impari a bosatrus fatu fatu) ca su trabballu de su massaju (nonnu miu e is atrus otu fradis chi teniàt trabballànt totus sa terra, duncas est una cosa chi potzu cumprendi beni poita dda apu bivia de acanta, cumenti si narat, mancai nè deu e nemmancu babu miu si seus postus a sighiri su trabballu me is campus) est apicau a su tempus, e nci funt annadas bonas meda, custu est berus, ma depis fai sèmpiri su contu ca is cosas potzant andai mabi, e meda puru. 

E custa cosa ballit po sa vida (sa vida de totus, poberus e arricus, bellus e lègius, giòvunus e matucus de edadi), e ballit puru po su giogu de sa bòcia. 

E duncas, deu ia a podi serrai sa chistioni cun una pregadoria po totus cussas personas chi ant pèrdiu totu su chi teniànt: po cussus chi nd'ant tentu dannus mannus meda a is domus, po cussus chi ant pèrdiu, mancai, totu su bestiami, ca apustis chi est acabbau su temporali, cumenti ddu tzerriaus, a trassa de s'italianu etotu, nci funt stètius medas pastoris chi ant agatau is bestias mortas, e spratas in totu su logu, e de seguru no funt scenas togas de biri, antzis. Ca mi prangit su coru feti a ddas ligi, custas cosas, figuraisì ita depit essi a ddas biri; cantu depit essi mannu su dabori chi provat unu omini a biri totu su chi tenit (totu su chi teniàt, po ddu narai mellus puru) fuiau in mesu a su ludu, mi ddu potzu feti imaginai, cumenti si narat. 
E po custa cida puru, si iat a podi narai ca cun is strollichiminis apu giai giai acabbau (e Deus gràtzias, s'at a megai calincunu de bosatrus), ma nd'aprofitu po si arragodai, torra, ca chi boleis ligi feti (e feti, si ddu torru a scriri, mancai diaici si cumprendit mellus, e megu a brullai, est craru!) is novas chi pertocant su giogu de sa bòcia si ndi podeis prandi cun totus is artìculus chi ndi bessint, dònnia dònnia dì (chentza de ndi sartai nemmancu una) in su giàssu etotu de is amigus de su Diàriu Sportivu e chi funt scritus, peròu, in italianu. 
E duncas, po is artìculus chi ndi pesu in sardu si domandu, torra, unu pagheddeddu de passièntzia, isperendi ca is strollichiminis chi ndi bogu aforas, e chi nci sticu in mesu, no si pighint a dabori de conca. E duncas, immoi chi nci seu, si arragodu ca seu fadendi custu gioghiteddu (est a nai su de mi strollicai, impari a bosatrus) po circai de manigiai, mancai (sa ispera mia, de su restu, est pròpriu custa) unu pagheddeddu de fueddus in prus de cussus chi seu costumau a manigiai, e chi manigiu po si torrai a contai totu su chi sucedit me is campus innoi is scuadras sardas giogant is partidas cosa insoru. 

Duncas, po immoi si potzu feti narai ca seu atachendi, seu incumintzendi a scriri custas rigas (chi bosatrus eis a ligi feti de giòbia, a partiti de su mengianu) candu seu arribbau a su megama de su martis: custa cida su trabballu chi ndi depu pesai po su chi pertocat is artìculus in italianu est de prus de su chi apu fatu sa cida passada, ma a sa fini, e no mi parit nemmancu berus, seu arrannescendi a acoitai cun su trabballu cosa mia, est a nai ca seu currendi cumenti unu trenu, e mi praxit, e meda puru, candu arrannèsciu a fai beni, e allestru, su trabballu chi mi pertocat: e po trabballai allestru, sa cosa de importu chi potzu fai est cussa de circai de no perdi tempus cun is tontesas e, duncas, depu feti circai de pentzai (e ddu torru a scriri: feti), a su chi depu fai (chi est su de scriri is artìculus, gei si cumprendit beni, deu creu). 
De su restu, candu trabballas cun su computer (e candu depis manigiai cussu tialu de Facebook, po trabballai, cumenti mi tocat a fai) depis sèmpiri fai su contu ca nci podit essi sèmpiri calincuna cosa chi ndi cassat s'atentzioni cosa tua (e po su prus de is bortas, seus chistionendi, si ddu torru a narai, de tontesas); e deu creu chi custa cosa de abarrai cuncentraus (cumenti si iat a podi narai, a trassa de cumenti si narat in italianu etotu) no ballat feti po mei, ca circu de fai su giornalista, ma ballit unu pagheddu po totus. E is allenadoris chi intendu fatu fatu, est a nai, dònnia cida, po ndi pesai is ciaciarradas e duncas is intervistas, no ammancant mai de narai, de arrapiti ca una de is cosas chi serbint po binci is partidas est sa conca sbuida de totus is pentzamentus grais, e mancai tontus, chi nci brintant pagu, po no narai nudda, cun su giogu de sa bòcia. 
E duncas, unu piciocu, candu est in campu, iat a depi circai de abarrai cuncentrau, est a nai con sa conca in sa partida; e candu mancai fais unu sbàlliu est poita (cumenti m'at sèmpiri nau babbu miu, e mescamente candu fia unu piciocheddu piticu) no ses pentzendi a cussu chi ses fadendi e, mancai, ses pentzendi a cras. E chi pròpriu potzu serrai sa chistioni cun una botada, a mei, fintzas de candu seu unu notzenteddu, m'est sèmpiri sucèdiu de sonnai, mancai, a ogus obertus, e pròpriu po custu depu circai de pentzai feti a su chi seu fadendu in su momentu, chi, a cantu parit (de sa bidea chi mi seu fatu bivendi in custu mundu e ligendi is libbrus scritus de personas prus sàbius de mei) est una cosa dificili meda: su de si bivi su presenti chentza pentzai a cras, a su futuru, duncas, e chentza de abarrai arrèscius, ddi naru diaici isperendi ca si cumprendat cussu chi bollu nai (e isperendi, puru e mescamente, chi potzat sonai beni), a su passau e, duncas, a is cosas chi si funt sucèdias, chi mancai si donant ancora daboris. 
Ma cumenti narant is sàbius, su passau no si podit mudai, e duncas tenis axiu (cumenti si megat sa bon'anima de mamma mia, e m'est sèmpiri praxu meda custu modu de narai chi teniat) tui a abarrai a totu dì pentzendi a cussu sbàlliu chi, mancai, as fatu annus e annus fait, poita tanti no nci podis fai prus nudda. E in su presenti, invècias, chi si depeus fai balli; e duncas est pròpriu candu pigaus is iscedas, candu scioberaus su chi boleus fai e cussu chi, invècias, no boleus fai, ca seus gioghendi sa partida de importu prus mannu. 
E seu seguru ca de custa cosa nd'eus a chistionai torra, mancai mellus puru, ma po custa cida nareus ca mi potzu intendi pràndiu po totu su chi nd'apu bogau aforas, e duncas, cun su coru lèbiu e selenu, potzu incumentzai a si chistionai de bocias, de partidas, e de resultaus. Ca no bieis s'ora, berus est? 

Deu (e cun custu acabbu diaderus cun is strollichiminis, a su mancu po custa cida) mi potzu feti augurai (cumenti si iat a podi narai, a trassa de cumenti si narat in italianu etotu) ca chistionendi de atras cosas puru, e no feti de bòcias e de resultaus e de gol, si potzat cassai s'atentzioni de cussas personas chi, mancai, no funt acapiadas a istrintu cun is fainas de is scuadras de bòcia, e sa chistioni ballit, pruschetotu, po is femineddas. Mi nci scapat s'arrisu, difatis, dònnia dònnia borta chi calincuna mi domandat ita trabballu fatzu e, candu benint a sciri ca po ndi pesai custus cuatru arriabis abarru a totu dì scriendi, intzandus bolint sciri de ita scriu, e po chini scriu; e duncas, candu benint a sciri ca a sa fini in custa vida m'est tocau de scriri de bòcias, e de partidas de càlciu, intzandus si dda podeis immaginai, a solus, sa faci lègia chi faint is femineddas (mescamente is femineddas, ma dònnia tanti gei mi capitat de atobiai calincunu maschiteddu chi no tenit a gradessu su giogu de sa bòcia, mancai siant pagus); sa faci trota, cumenti apu sèmpiri intèndiu narai de babbu miu, chi ndi bogant. Ca ddoi funt personas ca timint a bentu su giogu de sa bòcia, est a nai ca giai giai ddu odiant, e difatis su chi circu de fai (a su mancu me is artìculus chi ndi pesu in sardu, si cumprendit) est cussu de circai de pigai is contus e is contixeddus chi m'arregalant is allenadoris (mescamente candu ndi pesaus is ciaciarradas e duncas po is intervistas) circhendi de cumprendi chi su chi mi scoviant potzat balli, puru, po sa vida chi si biveus, totus, dì po dì; est a nai ca unu cumentu apitzus de una partida pèrdia (o apitzus de una partida binta, ballit aguali) si podit donai sa possibbilidadi de arraxonai, puru, de atras cosas de importu prus mannu, cumenti iant a podi essi sa vida, sa morti, is mobadias e, duncas, totus is dannus chi si ndi podint arrui (chi si ndi iant podi arrui, chi si praxit de prus cumenti sonat su verbu, e megu a brullai, berus est?) in conca de unu segundu a s'atru. 

E duncas, pròpriu cumenti s'apu promìtiu, e chi seis de acòrdiu cun mei, podeus andai a castiai ita totu est sucèdiu, ita totu nd'est bèssiu aforas, de importu, apustis de s'ùrtima giorronada de partidas chi s'est giogada custu domìnigu passau, est a nai su bintiseti. 
E duncas, chi seis de acòrdiu cun mei (torra!) deu ia a incumentzai (mi iat a praxi a incumentzai, a su mancu, cumenti si iat a podi narai puru, gioghendi a fai is galantis, cumenti si iat a podi nara), cun is partidas chi ballint po su campionau de sa Segunda Categoria, ca cust'annu, cumenti eis giai a sciri beni, est stètiu pretziu, ddi nau diaici, in otu listas, partendi de sa Lista A (est craru!) fintzas a arribbai a sa Lista H, ca a fai is contus nc'est pagu de si perdi. 

Duncas, po su chi pertocat sa Lista A, a su primu postu agataus is de sa Gioventù de Sarroch (diaici si tzerriat sa scuadra) chi cust'annu funt sighius de un allenadori de importu mannu cumenti est Nunzio Falco, ca me is annus passaus at allenau scuadras me is campionaus de s'Ecellenza, de sa Promotzioni e fintzas in Sèrie D. Fait unu pagheddu de ispantu, duncas (chi cumprendeis su chi si bollu narai) a du agatai setziu in una panchina de una scuadra chi currit in su campionau de sa Segunda Categoria, ma custu bollit narai, po primu cosa, ca is de su Sarroch ant cuncodrau una rosa forti e toga meda, e duncas funt circhendi de ndi cassai s'artziada in su campionau de sa Primu Categoria, e po dda cassai, est craru, tocat a binci, po primu cosa, su campionau de sa Segunda Categoria. E is de su Sarroch funt fadendi unu trabballu bonu meda, e gei si cumprendit; de su restu, un allenadori cumenti a Falco si nci ghetat in su giogu, mescamente cun una scuadra de sa Segunda Categoria, e gei si cumprendit, feti chi podit e depit puntai a su primu postu, feti chi tenit totus is cartas bonas, duncas, po ndi cassai sa bìncida de su campionau, desinò, si cumprendit beni, un allenadori cumenti a Falco, chi est unu de cussus chi tenit s'esperièntzia prus manna a is pabas tra totus is allenadoris chi s'agatant in dì de oi in Sardìnnia, no iat a essi mai decìdiu, si dda coxinu diaici, de acetai una avansada diaici. E

 duncas, sa giogada chi ant postu in peis is dirigentis de su Sarroch (est a nai cussa de donai is crais in manu de sa scuadra cosa insoru a Nunzio Falco) est boghendindi giai is primus froris, chi no is primus frutus (cumenti si iat a podi narai, de su restu, a trassa de s'italianu etotu), fadendi su contu ca is grosus-brau, in dì de oi, apustis de cuatru partidas giogadas, s'agatant cun calincuna cosa cumenti 12 puntus allogaus in buciaca; est a nai, duncas, chi ant bintu totu is partidas chi ant giogau e nd'ant cassau totus is puntus chi ddoi fiant badda badda in su campu. In s'ùrtima bessida, parteus pròpriu de innoi, is de sa Giòventu de Sarroch funt stètius bonus a binci sa partida, de importu mannu meda, contras a is fradibis de su Pula (ddus tzerriaus diaici, e si tzerriant diaici tra de issus etotu poita tra is duas biddas, e seus chistionendi de Sarroch e de Pula, gei si cumprendit, berus est?, ddoi funt feti una parighedda de chilometrus de tretu de fai), una de is scuadras prus togas e prus bonas chi ddoi funt in sa Lista A, fadendi su contu ca in atacu is arrùbius – biancus podint fai su contu apitzus de unu giogadori forti cumenti est Danieli Zucca. Ma is de su Sarroch puru, mi parit bastanti craru, podint contai apitzus de giogadoris de esperièntzia, cumenti iat a podi essi, tanti po nd'arremonai unu, Andruetto Blas, ca pròpriu custu domìnigu passau, tra is atras cosas, nd'at cassau su gol de s'unu a zeru; in atacu, is de su Sarroch podint contai apitzus de unu giogadori de esperièntzia manna cumenti podit essi Giuseppi Mura, chi deu, tra is atras cosas, apu acutu a biri gioghendi candu bistiàt sa camisedda de is de su Bidd'e Sorris, sa scuadra de sa bidda mia, e potzu narai, duncas, ca Mura fiat unu de is giogadoris prus fortis chi ddoi fiant cuss'annu in su Bidd'e Sorris, unu de cussus piciocus chi, in campu, po su prexu de is allenadoris chi at tentu, donat su centu e dexi po centus, cumenti si narat candu unu giogadori, mancai, arrannèscit a fai fintzas de prus de su chi ddi iat a pertocai. 
Is de su Sarroch podint fai su contu apitzus, puru, de Gianluca Recano, un antru de cussus piciocus chi at girau sa Sardìnnia in totus custus ùrtimus annus, gràtzias a su giogu de sa bòcia, fadendi su contu ca su difensori at giogau cun is scuadras de sa zona de Casteddu (s'ùrtima est stètiu su Cabuderra, pròpriu s'annu passau) ma at lassau arragodus bonus puru a is tifosus ollastrinus (fadendi su contu ca, me is annus passaus, gigàt in sa zona de s'Ollastra). In sa rosa de su Sarroch, e cun custu acabbu e serru sa chistioni, ddoi est puru unu giogadori de esperièntzia manna cumenti est Davide Vitellaro, un atacanti nàsciu in su milli e noicentus norantaduus ca in custas primus cuatru giorronadas est giai stètiu bonu a ndi pesai calincuna cosa cumenti a cincu gol, e pròpriu s'ùrtimu ddu at cassau in sa partida contras a is de su Pula chi s'apu arremonau ainnantis. 
Ma is de su Sarroch no currint de segurus a solus, est a nai chi ddoi funt atras scuadras chi funt cuncodradas beni e chi, duncas, iant a podi curri po su primu postu de sa lista e duncas po sa bìncida de su campionau. 
E duncas, a su segundu postu de sa lista, cun noi puntus giai postus in busciaca, agataus is de s'Accademia Sulcitana, sa scuadra chi nd'ant pesau in Santu Perdu, chi pròpriu in s'ùrtima bessida (est a nai, duncas, est craru, sa partida chi s'est giogada pròpriu custu domìnigu passau) funt stètius bonus a binci, cun su resultau de tres a unu, in domu cosa insoru etotu, contras a is de su Bindua. A su de tres postus in sa lista, invècias, agataus un'antra scuadra de sa zona de su Sulcis, e seus chistionendi de is de sa Fermassenti, ca cust'annu funt sighius de Robertu "Bobo" Cani: est stètiu pròpriu issu, fiat custa istadi passada, a mi narai, a mi fai sciri (po ddu nai mellus puru) ca iat agatau s'acàpiu cun is de su Fermassenti, apustis de sa stagioni, toga meda, fait a ddu narai chentza timi de si sballiai, chi iat fatu sètziu in sa panchina de is de su Santadi, chi at agiudau, e meda puru, si cumprendit (ca su trabballu de un allenadori est de importu mannu), a ndi cassai sa bìncida de su campionau de sa Segunda Categoria po s'annu duamilla e bintitres – duamilla e binticuatru. 
E immoi Robertu Cani, deu creu ca si potzat narai custu puru, at a fai de totu po nci torrai a artziai in su campionau de sa Primu Categoria impari a is de sa Fermassenti, ca in atacu podint fai su contu apitzus de unu giogadori forti (forti a totu coddu, si narat in Bidd'e Sorris, mescamente tra is piciocheddus prus giòvuneddus) cumenti est Samuele Curreli (ca issu puru no est de seguru de duas giòbias chi est cabendindi in campu), chi tra is atras cosas, custu domìnigu passau, in sa partida chi is de sa Fermassenti ant giogau, e bintu, in domu de is casteddaius de su Club San Paolo, est stètiu bonu a ndi pesai tres gol de is cuatru chi at fatu sa scuadra cosa sua. E candu tenis giogadoris diaici fortis in scuadra, si cumprendit, is cosas benint a essi in cabada, cumenti si iat a podi narai, a trassa de s'italianu etotu. 

Po su chi pertocat is scuadras chi currint in sa Lista B, invècias, e seus chistionendi sèmpiri de sa Segunda Categoria, a su primu postu agataus is cuartesus de sa Ferrini, cun noi puntus in totu, chi fintzas a immoi, est a nai in custas primus cuatru partidas, funt stètius bonus a binci po tres borta e ant pèrdiu feti una partida. Is de sa Ferrini, duncas, in s'ùrtima bessida funt stètius bonus a binci contras a is de su Sporting de Mandas, cun su resultau de duus a unu, e immoi podint castiai totus is atras scuadra de su primu gradinu de sa lista. Ma a is pabas de is de sa Ferrini ddoi funt is campidanesus de sa Deximu 07 (ca funt bixius de domu, ddi ia a podi narai diaici, fadendi su contu ca tra Bidd'e Sorris e Deximu ddoi ant a essi ses-seti kilometrus de tretu de fai), ca pròpriu custu domìnigu passau ant bintu, cun una surra de gol (cumenti si iat a podi narai, ma chi no si praxit cumenti sonat sa cosa, si ia a podi narai chi ant bintu sa partida pesendindi una biga manna de gol), sa partida chi ant giogau in domu cosa insoru contras a is casteddaius de Su Planu, ca in dì de oi s'agatant, peròu, a s'ùrtimu postu de sa lista. E duncas, is de su Deximu, cun cussa de domìnigu, ant bintu giai duas partidas in totu, e nd'ant serrau atras duas cun su resultau siddau in paridadi; e duncas, in totu (a fai is contus nci poneus pagu meda), allogaus in busciaca, tenint calincuna cosa cumenti a otu puntus. Pròpriu sa cida passada is de sa Deximu 07 ant fatu sciri a totus de essi agatau s'acòrdiu cun unu giogadori forti, e torra, de esperièntzia manna, cumenti est Umberto Festa, un antru de cussus atacantis ca, in totus is annus de sa carriera cosa sua (at essi gioghendi de prus de bint'annus, a fai beni is contu) at tentu sa possibbilidadi de giriotai (cumenti apu sèmpiri intèndiu narai de sa bon'anima de mamma mia) me is scuadras de totu sa Sardìnnia, o giai. E duncas, seu bènniu a sciri ca is de su Deximu ant dèpiu fai is contus cun su dannu chi est protziu apitzus a s'atacanti prus forti chi tenint in sa rosa, e seus chistionendi, est craru, de Marcu Mingoia (issu puru tenit una carriera de importu a is pabas, fadendi su contu chi est arribbau a giogai fintzas in Sèrie D), chi s'est segau unu genugu (e si dispraxit meda po issu!) pròpriu in sa partida ca is deximesus ant giogau contras a is de su Cabuderra; e immoi, fadendi su contu ca Mingoia est giai matucheddu de edadi (e custus funt is fueddus de una persona, no si potzu fai su nomini, chi at giogau po annus e annus cun is de sa Deximu 07 e est arribbau a essi puru su capitanu de sa scuadra me is annus passaus), tocat a biri chi at a arrannesci, diaderus, a torrai in campu; po ndi sanai de unu dannu, de un arrori diaici mannu, tocat a narai custu puru, serbint mesis e mesis, e is tempus s'allonghiat (cumenti si iat a podi narai a trassa de s'italianu etotu) candu tenis giai una certa edadi, candu ses giai matucheddu, candu, duncas, no ses prus unu notzenteddu. E is de sa Deximu, duncas, pròpriu po custu, pròriu po circai de arreparai su dannu chi nd'ant tentu cun Mingoia, ant agatau s'acòrdiu cun Umberto Festa ca, tra is atras cosas, at fatu giai su primu gol cun sa scuadra noba cosa sua, e fait a narai, duncas, ca sa scumissa chi si funt tentaus is dirigentis de sa Deximu 07 est donendi giai is primus prexus, is primus resultaus bonus, is primas satisfatzionis, mescamente a totus is tifosus de sa scuadra. 

Sigheus, duncas, immoi chi nci seus, a su mancu fintzas a candu apa a tenni su logu e su tempus po scriri cust'artìculu, andendi a castiai, duncas, cumenti funt cuncodradas is cosas po su chi pertocat sa Lista C, sèmpiri in su campionau de sa Segunda Categoria (e po custa cida no eis de seguru podi narai ca no si apu chistionau de bòcias, de resultaus e de partidas): e duncas, a su primu postu agataus is de su Cardedu, chi tenint dexi puntus allogaus in buciaca, e chi ndi funt arribbaus gràtzias a tres partidas bintas e a una partida chi ant serrau cun su resultau in paridadi; custu bollit narai, est craru puru, ca me is primus cuatru bessidas de cust'annu, est a nai de sa stagioni nova, chi est cussa de su duamilla e binticuatru – duamilla e binciticincu, is biancus – arrùbius (ddu tzerriaus diaici po su cabori de is camiseddas chi manigiant po ndi cabai in campu, mescamente po is partidas chi giogant in domu cosa insoru) no ant ancora pèrdiu nemmancu una borta, e parit chi tèngiant, custu est su chi ndi podeus narai apustis de trescentus e sessanta minudus de giogu e de partidas, totus is cartas bonas po curri concas a su primu postu de sa lista; est a nai ca ndi iant a podi artziai torra in Primu Categoria giai a sa fini de custa stagioni etotu, apustis de nd'essi cabaus, in su campionau de sa Segunda, est craru, pròpriu s'annu passau. Ma is de su Cardedu, custu est pagu ma seguru, no funt currendi a solus de seguru, fadendi su contu ca a su segundu postu de sa lista, cun feti unu puntixeddu in mancu (est a nai duncas, ca a fai is contus nci poneus pagu meda, dexi puntus contras a noi), agataus una bella truma de tres scuadras, partendi, po incumentzai, de is de s'Osini (una bidda chi fait seticentus animas, cun sa scuadra chi nd'est torra artziada in Segunda Categoria apustis de una pariga de annus chi ant dèpiu fai in su campionau de sa de tres categorias, chi est sa prus pitichedda tra totus cussas chi si giogant in s'isula), passendi po is de su Triei, chi pròpriu domìnigu passau, peròu (est a nai in s'ùrtima bessida), funt arrutus, e mabi puru, in sa isfida contras a is de su Biddamanna Strisàili, chi nd'ant cassau is tres puntus gràtzias a su resultau de duus a unu. Is de s'Osini, invècias, nd'ant cassau una surra manna de gol in sa partida chi ant giogau in domu allena, contras a is de su Lotzorai, cun su resultau, tundu tundu (cumenti si iat a podi narai a trassa de cumenti si narat in italianu) de seti a duus. Ma is de su Cardedu puru, torrendi a is primus de sa lista, podint essi prexaus, fadendi su contu chi ant fatu ses gol a is de su Burcei, un'atra de is scuadrixeddas chi ndi funt artziadas cust'annu de sa de tres categorias. 


E duncas, a cantu parit, su logu po scriri s'artìculu in sardu po custa cida puru est spacendi, est a nai, mellus, chi est giai spaciau, giai giai acabbau (chi fessit po mei ndi ia a preni un antru tanti de paginas, cumenti apu fatu fintzas a immoi, ca gei si ddu apu giai narau, de su restu, ca a scriri mi praxit meda e mi benit a beni, est a nai ca no mi fadiat prus de su tanti); e duncas, s'ùrtima cosa chi ia a bolli fai, po oi, est cussa de spendi (ddi nau diaici), de ndi bogai aforas una pariga de fueddus (de fueddus bonus, si cumprendit, est craru) po cussu poberu piciocu chi si tzerriat Davide Manca e chi est sparèssiu pròpriu in sa noti tra su sabudu e su domìnigu passau (po torrai a s'apicai, ddi nau diaici, a sa lega apitzus de su tempus mau chi at fatu custu fini de cida chi si seus lassaus a is pabas); e ndi chistionu poita no m'est mai praxa, chi pròpriu si ddu depu narai, custa cosa de mi serra, de mi tupai is ogus, de no pigai in consideru totus is cosas chi sucedint in custu mundu, cun sa scusa (ca poi scusa no est, ma est feti sa beridadi, cumenti si iat a podi narai e cumenti m'est bèssiu de narai, de su restu) ca scriu, a sa fini, po unu giàssu chi sighit is fainas de is scuadras sardas de bòcia de is campionaus de is diletantis. E custu, duncas, no bollit narai ca in s'artìculu in sardu no si potzat arraxonai puru apitzus de atras legas, mancai no sciu mai, ainnantis de mi ponni a scriri, cali ant a essi is chistionis chi nd'ant a bessiri aforas, cumenti s'arrapitu fatu fatu po no narai giai sèmpiri. 
E duncas, cumenti eis a sciri giai (e chi no ddu scieis ancora, intzandus a mei tocat a fai, po diaderus, su trabballau de su giornalista e andu a si contai, chentza de si ndi furai tropu tempus, mancai, cumenti funt andadas is cosas, a su mancu po su chi ndi potzu e ndi podeus sciri), Davide Manca s'agatàt in s'oasi de su Monte Arcosu, apitzus de sa machina cosa sua, e candu fiat passendi in unu arriu s'acua nci ddu at scavuau bai e circa innoi (m'est bènniu de ddu narai diaici, isperu ca si cumprendat su chi si bollu narai), e is fueddus chi seu manigenti mi parint chi cratzint beni, fadendi su contu ca est de su mengianu de su domìnigu chi ddu funt circhendi ma a oi (seu acabbendi de scriri cust'artìculu in su mengianu de su mèrcuis, po si cumprendi a pari) ancora no si ndi sciri nudda e no s'est agatau nudda. 
Me is ùrtimas oras, de su chi seus benius a sciri, is chi ddu funt circhendi ant agatau unu mallioni, chi iat a podi essi su suu, e spratus in giru (sèmpiri de su chi seus bènius a sciri ligendi is artìculus de is giornalis), puru una pariga de arrogus de sa machina cosa sua, ma de su corpus de cussu poberu piciocu ancora no si ndi sciri nudda. De su chi sciu, is circas ant a andai ainnantis po un'antra pariga de oras e apustis s'ant a firmai, est a nai ca no nc'at a essi prus nudda de fai. Pròpriu po custu, is amigus e is parentis de Davide Manca funt circhendi de ndi pesai, de cuncodrai una truma de personas chi tèngiant sa gana, e duncas sa possibbilidadi, de sighiri a ddu circai, a su mancu po un'antra pariga de diis. 
E deu no potzu fai atru ca sighiri a pregai po issu e po s'anima cosa sua.

E po custa cida dda serru diaici e si saludaus; ma si promitu, de su restu, ca chi m'apa ancora agatai in custu mundu, e in saludi, nc'ant a essi, torra, un antru bellu tanti de rigas scritas in sardu tra seti diis, est a nai giòbia chi at a benni. Sèmpiri chi su Cielu bollit custu beni po mei puru, est craru.



Attività realizzata col contributo della Regione Sardegna - IMPRENTAS 2023-2024. LR 22/2018, art. 22