Festa manna po noi scuadras in Secunda Categoria: su Calcio Pirri est sa prus forti de su Girone A; Gialeto e Don Bosco funt is meris de su Girone B

Otu gironis e centu-doxi scuadras in totu: custa est, in duus fueddus, sa Secunda Categoria in Sardìnnia; est a nai su coru, ddu podeus tzerriai a forti, de su mundu de sa bòcia.
Seus chistionendi, difatis, de unu movimentu chi pertocat medas biddas de s'isula, partendi de Pula fintzas a lompi a Palau, passendi de Cullieri e Lotzorai. Sa genti penzat, mancai, chi su giogu bellu e spassiosu s'agatat feti me is categorias prus artas, cumenti a s'Eccellenza o a sa Promozione, ma nosu de DiarioSportivo scieus beni chi no est diaici, antzis, de dexi annus cicaus de contai, a chini si ligit e si sighit, is storias de custus campionaus.

Po sa Secunda Categoria puru, intzandus, is giogus si funt sciusciaus, si ddu arregodaus beni, me is primus diis de su mesi de Martzu e immoi, pròpriu candu seus brintaus in su mesi de Trìulas, est arribada s'ora de fai unu pagheddu de contus, pighendi po bonas is detzisionis de su Cunsillu Diretivu de su Cumitau Regionali chi s'est atobiau me is cidas passadas.

In su Girone A, intzandus, prexu mannu e grandu festa po is de su Calcio Pirri, chi in binti giorronadas nd'at pesau calincuna cosa cumenti a cincuanta puntus, gratzias a sexi bincidas: is arrubius – brau, est craru, funt stetiu is prus fortis de totus, cun setanta gol fatus.

In su Girone B, invecias, su primu postu de sa lista andat pretziu in duus: is serramannesus de sa Gialeto e is de sa Don Bosco atziant impari in Prima Categoria, cun cincuanta-cuatru puntus a cada unu. Nudda de fai, duncas, po cussus de sa Verde Isola, chi abarrant a buca asciuta, cun feti unu puntu in mancu de is primu duas de sa classi. Unu pecau, poita nci fiant de giogai atras otu partidas e podiat sutzedi diaderus de totu.

In su Girone C faint festa is de su Meana de bomber Sergio Talloru, cun corantanoi puntus, cuatru in prus de s'Arixi de Santa Lucia e de su Segariu.

In su Girone D, cussu chi pertocat s'Ollastra, ndi atziant in Primu Categoria is de su Nurri, cincuanta-tres puntus e dexiaseti bìncidas, chi funt abarraus in su primu postu de sa lista po meda tempus.

In su Girone E, s'Oristanese frigat cussus de sa Macomerese, cun corantacincus puntus, feti duus in prus de is grogus-arrubius. Nudda de fai puru po Norghiddo, Simaghis e Cr Arborea.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020

In su Girone F, is primus de sa lista, candu si funt frimaus is giogus, fiant is de s'Atletico de Bono, chi ant bintu sa batalla contras a is de s'Orani; is piciocus sighius de mister Canu funt stetius a su primu postu de sa lista po totu sa prima parti de su campionau, ma no est bastau.

Festa manna meda po su Sènnaru, Girone G, chi cun cincuanta puntus in totu befant is de su Ploaghe de bomber Borrotzu, corantotu puntus.

In su Girone H, ndi torrant in Primu Categoria is biancu-birdis de su Patada.