Andaus a castiai impari is calendàrius de is partidas po su chi pertocat su campionau de s'Ecellenza e de sa Promotzioni

E duncas, atacu a scriri custas rigas, chi ant a fai parti de s'artìculu in sardu, e duncas, de s'artìculu chi at andai a fai parti de is Novas de su Diàriu Sportivu po sa segunda cida de su mesi de cabudanni puru, candu seus ancora in sa dì de su lunis (chi est s'otu de su de noi mesis de s'annu), e custu mancai s'artìculu nd'at a bessiri aforas feti su giobia, cumenti a sèmpiri, chi at a essi s'undixi de su mesi de Cabudanni. 

Eia, immoi chi apu scritu chi custu giòbia nd'at a arrui s'undixi, sa conca cosa mia, ca parit unu carruciu prenu fintzas a cucuru de pentzamentus e de bideas, s'est acapiada acoitu (est a narai chi est torrada agoa in su tempus de calincuna cosa cumenti a binticuatru annus, ca pagus no funt de seguru) a su chi fiat sucèdiu s'undixi de su mesi de Cabudanni de su duamilla e unu. 
Si ddu arregodais? De totus is arroris e is dannus chi fiant sucèdius me in America? Cun is aereus chi fiant andaus a si prantai contras a is palatzus ("torri gemelle", cumenti seus costumaus a ddas tzerriai in italianu, e sa cosa, furriada in sardu, iat a bessiri calincuna cosa cumenti a: "turris sorris") , cun totu cussa biga manna, cun totu cussu muntoni de mortus. Si ddu arregodais, berus est? 
E duncas, eia, mancu malli, cumenti mi megu a solu a solu su prus de is bortas, ca deu depu scriri feti (e naru feti po brullai, po modu de narai, si cumprendit, berus?) de is resultaus de is partidas chi pertocant is assòtzius sardus de bòcia, po su chi pertocat, est craru, totu su mundu de is diletantis chi s'agatant in s'isula cosa nosta, bella e stimmada. 
E duncas custu bollit narai, po incumentzai, ca no apa a spendi medas fueddus apitzus de totu su dannu e de totus is arroris chi ndi fiant bèssius s'undixi de su mesi de cabudanni de su duamilla e unu; podeus feti serrai sa chistioni (immoi chi dda eus oberta) narendu ca, eia, candu s'omini si podit in conca de ndi pesai dannus e arroris mannus, (arrori tengiat, cumenti si narat), parit pròpriu fatu aposta, cumenti si iat a podi narai: eia, candu s'omini si ponit in conca de depi fai dannus a calincunu, podeis abarrai segurus de su fatu chi nc'at a ponni totu sa gana, totus is fortzas e totus is energias chi tenit in cropus. Est a narai, duncas, ca a bortas mi parit de podi narai ca no nc'est animabi, tra totus cussus chi s'agatant in custu mundu, chi ndi potzat bessiri cun mabioris peus de cussus chi ndi sforrat s'omini (peus de cussus chi arrannescit a ndi sforrai s'omini, po ddu narai mellus puru). 
E sa cosa ballit po is gherras ca is ominis ndi pesant e si faint is unus cun is atrus, po is fogus ca is ominis alluint feti po sa gana de distruiri su logu innoi bivint (e no nc'apa a arribbai mai a cumprendi su poita unu arribbit a fai una cosa diaici tonta, si iat a podi narai diaici puru) e po totus is atrus arroris chi ndi pesaus, giai giai in su fetianu. 
E po bona sorti ca sa chistioni no ballit po totus: nci funt personas, difatis, diaici mi praxit a dda pentzai, ca no iant a fai mabi nemmancu a una musca (nemmancu a unu muschitu, po ddu narai mellus puru, fadendi su contu ca su muschitu abarrat prus pitichinninniu puru de sa musca e, si cumprendit, a bortas capitat de bociri is moschitus chentza de nci pentzai prus de tanti, giai giai chentza de si nd'acatai), e chi arrannèscint a si cumportai sighendi sa gràtzia de Deus in dònnia cosa chi faint, e biaus issus, mi benit de serrai sa chistioni diaici. 

E mancu mali, m'acudu a narai custu puru, ca in custu mundu nci funt puru is personas chi faint a bonas: serbint, mi megu a solu a solu, po circai de aparixai is cosas, fadendi su contu, cumenti s'apu arremonau pròpriu immubagora, ca custu mundu est prenu (prenu fintzas a cucuru, si iat a podi narai custu puru) de genti ca bistit is pannus de su dimòniu (chi mi permiteis de cuncodrai sa chistioni diaici) e chi, a sa fini, si cumportat mabi cantu su dimòniu etotu, chi no de prus puru. 
E duncas, s'unica cosa chi potzu aciungi, po torrai a nosu, e po torrai a is chistionis chi si pertocant prus de acanta (e mescamente, chi pertocant prus de acanta is legas chi pigaus in su giàssu de is amigus de su Diàriu Sportivu, chi, a s'acabbada, e gei ddu scieis beni, est unu giàssu innoi sigheus, gràtzias a totu sa biga manna de artìculus chi scrieus e chi ndi bogaus aforas giai dònnia dì, mancai siant diis de festa, is resultaus de is partidas, e duncas, is fainas, de is scuadras de bòcia de is diletantis chi s'agatant spratas in totu sa Sardìnnia), e po torrai a una lega chi pigu sèmpiri, cida po cida, e chi est cussa de su tempus chi passat: e duncas, eia, de s'undixi de su mesi de Cabudanni de su duamilla e unu, de una de is diis prus nieddas po totu sa storia de s'omini (mi benit de ddu narai diaici), funt passaus calincuna cosa cumenti a binticuatru annus. 
E no mi parit nemmancu berus. 
Est a nai, duncas, ca a s'epoca de is fatus chi seu arremonendi, deu tenia calincuna cosa cumenti a bintunu annus; immoi ndi tèngiu corantacuatru fatus (ant a essi corantacincu tra una pariga de mesis) e potzu narai, chentza timi de mi sballiai, ca sa vida mi parit, ancora, e gràtzias a Deus, una de is cosas prus togas, unu de is arregalus prus bellus, e de importu prus mannu, ca Deus m'at fatu. Ma si potzu narai, puru, chi pròpriu si depu narai cumenti dda pentzu, ca custu mundu, su mundu innoi m'agatu a bivi, impari a bosatrus etotu, mi parit craru, a bortas mi parit una cabbia prena de macus (cumenti si megàt fatu fatu sa bon'anima de mamma mia), o, peus ancora, custu mundu mi parit s'inferru, po totus is dannus, is arroris, is lagrimas e is daboris chi nci funt, chi Deus spraxit in longu e in largu (po ndi furai unu modu de narai ca apu sèmpiri intèndiu in italianu) in totu su mundu, chentza, a su mancu diaici mi parrit in dì de oi, de ndi sartai nemmancu unu cristianu. 

Est a narai, eia, ca totus is chi bivint in custu mundu depint fai su contu de depi cumbati contras is dannus, is arroris, is disprexeis, puru, is lagrimas, is daboris; eia, cumenti si megàt unu tziu de mamma mia etotu, is ominis (ma sa cosa ballit puru po is femineddas, gei mi parit bastanti craru) ca s'agatant a bivi in custu mundu, funt totus cumbidaus a bufai de sa pròpriu cupa (diaici mi contàt sa chistioni su tziu de mamma mia chi s'apu arremonau pròpriu immubagora), e aintru de sa cupa nc'est una bevida, una cosa de bufai, duncas, chi abarrat marigosa meda. E si cumprendit, berus? 
E mancu malli, ma peròu, m'acudu a narai custu puru, ca in custu mundu nci funt is personas bonas, est a narai, personas chi arrannèscint a fai su beni (e no su mabi); e duncas, serrendi sa chistioni cun unu stìddiu de filosofia puru (chi mai ammanchit a su mancu unu stìddiu de filosofia me is artìculus chi ndi pesu in sardu!), Platone si megàt ca unu iat a depi pregai su Cielu po arriciri calincuna cosa de bonu, dònnia tanti; e totu su bonu chi tui arricis, duncas, intzandus serbit feti a si ndi fai scaresci de totus is dannus, is daboris, is arroris chi si ndi funt arrutus in conca, e chi si ndi iant podi arrui in conca in dònnia segundu, in dònnia momentu de sa giorronada, de sa dì, de sa cida, e de su mesi. 
Ca su de bivi in custu mundu (e cun custu dda acabbu, po diaderus, de mi strollicai cun bosatrus), a bortas, mi parit una cosa bella cantu difìcili. 
Ma de totu custu (de custas chistionis ca abarrant prus acapiadas a sa filosofia chi a su giogu de sa bòcia) nd'eus a chistionai, mellus, mancai, in unu de is artìculus chi nd'apa a pesai de oi fintzas a sa fini de s'annu. 

Mancai si potzat narai, puru, sa pròpriu cosa po is scuadras chi currint me is campionaus chi sigheus (su trabballu cosa nosta de su restu est pròpriu custu) po su giàssu de su Diàriu Sportivu (e sa cosa ballit, est craru, po mei e duncas po totus is collegas cosa mia): dònnia domìnigu podis binci sa partida, o dda perdi in maba manera. 
E candu bincis, iast a depi circai de mantenni is peis in terra (a trassa de cumenti si cumportant, o si cumportànt, is stoicus), est a narai, duncas, chentza de ti fai pigai tropu de s'afròddiu (fadendi su contu, comentecasiat, ca su de si fai pigai de s'afròddiu, mescamente chi arrannescis a binci una surra de partidas s'una avatu de s'atra, benit a essi una cosa normali, cumenti si iat a podi narai); e sa pròpriu cosa ballit, mancai a s'imbressi, candu mancai ti sucedit de perdi una biga, una barca manna de partidas, s'una avatu de s'antra; e intzandus, candu nc'arruis, s'ùnica cosa chi podis fai est cussa de ti ndi torrai a strantaxai acoitu, chi cumprendeis su chi si bollu narai. 

E apustis de s'essi scrocorigau sa conca po beni (cumenti si iat a podi narai), e apustis, duncas, de s'essi fatu sa conca a acua (cumenti si megàt, de su restu, sa bon'anima de mamma mia etotu, e mi fait prexei meda, chi pròpriu si ddu depu narai, custa cosa chi mi benint in conca is cosas chi mi naràt issa etotu, mescamente is cosas chi intendia candu fia unu pipieddu piticu, candu mi pongiu a scriri is artìculus in sardu), si nci podeus fuiai, e sèmpiri chi seis de acòrdiu, me is chistionis chi funt, chi abarrant acapiadas a su mundu de sa bòcia de is giogadoris (e de is allenadoris, est craru) diletantis chi s'agatant in Sardìnnia. 

E duncas, eia, po mi torrai a acapiai a su chi fia narendusì ainnantis, sa cida passada funt bèssius is calendàrius de is partidas chi s'ant a depi giogai in sa stagioni de su duamilla e binticincu – duamilla e bintises, po su chi pertocat, a su mancu, su mundu de s'Ecellenza, e po su chi pertocat, puru, est craru, is duas listas de scuadras chi ant a curri in su campionau de sa Promotzioni. 

E duncas, sciu beni ca s'afròddiu de is tifosus fiat mannu meda, ma ballit a su pròpriu, s'afròddiu de is giogadoris e de is allenadoris puru fiat mannu meda: nci fiat sa curiosidadi, de benni a sciri cumenti ant a essi cuncodradas is cosas, partendi de is partidas prus togas, passendi, duncas, de is sabudus innoi is scuadras de s'Ecellenza nd'ant a cabai in campu (po cussus chi, a trassa de s'italianu etotu, estus a podi tzerriai "anticipus", cumenti difatis seus costumaus a fai, tra is atras cosas), fadendi su contu ca giai de s'annu passau, e po unu sabudu a su mesi, is scuadras de s'Ecellenza (ma sa cosa at a balli puru po is scuadras de sa Promotzioni) nd'ant a cabai in campu, totus in pari, in truma manna, chentza duncas de depi abertai su domìnigu. 

Eia, eis cumprèndiu beni: seu circhendi de si narai ca po unu sabudu a su mesi, pròpriu partendi de su mesi de cabudanni, nc'ant a essi partidas a su sabudu antzis ca a su domìnigu. Ma de custu si nd'apa a chistionai mellus apustis, candu eus a torrai a pigai sa lega. 
Po immoi, duncas, si potzu narai feti ca sa primu giorronada de sa stagioni noba (e duncas de sa stagioni de su duamilla e binticincu – duamilla e bintises, cumenti s'apu giai arremonau) at a torrai a partiri pròpriu custu fini de cida chi est aproillendindi, est a narai, su dominigu chi at a essi catodixi. 
E duncas, eia, in campu ant a torrai is scuadras de s'Ecellenza e de sa Promotzioni puru, cun is partidas chi ant a torrai a incumentzai a is cuatru de su megama. 
E duncas, eia, chi seis de acòrdiu cun mei andaus a biri cumenti funt cuncodradas is cosas o, mellus, cumenti is dotoris de su Cumitau Regionali Sardu ant decìdiu de ndi pesai sa faina po cust'annu puru. 
Duncas, una de is novas prus callentis (o prus friscas, e fortzis est mellus manigiai custu fueddu, fadendi su contu ca est sighendi a fai una bella basca, a su mancu in custas ùrtimas diis, e a su mancu po su chi pertocat sa zona de Bidd'e Sorris, e seu chistionendi, duncas, de su Campidanu de mesu. E immoi chi s'apu arremonau puru de su tempus chi est fadendu, est a narai de is temperaduras, intzandus potzu sighiri a scriri cun su coru prus selenu, e megu a brullai, e si cumprendit, ma miga diaici meda) chi pertocat su campionau de s'Ecellenza est ca de cust'annu nc'at a essi torra s'obbrigu, ddu tzerriaus diaici, de tenni in campu a su mancu duus piciocheddus "fuori-quota", po tzerriai sa cosa a trassa de cumenti si fait in italianu, e duncas, eia, in campu is scuadras ant a depi tenni a su mancu unu piciocheddu nàsciu in su duamilla e ses e unu nàsciu in su duamilla e seti (eia, a fai is contus nci poneus pagu meda: seus chistionendi, duncas, de unu piciocheddu de dexannoi annus e de unu de dexiotu). 
In prus, podeus narai ca cust'annu, in su campionau de s'Ecellenza, ant a curri cincus scuadras chi nd'arribbant, deretas deretas, de su campionau de sa Promotzioni de s'annu passau, e seu chistionendi (a fai is contus nci poneus pagu meda, de su restu) de is de su Uddusò e de is de su Lanusè chi, cumenti si nd'eis a arregodai (e chi no si ddu arregodais, intzandus deu seu innoi pròpriu po fai custu trabballu puru), ant bintu su campionau cosa insoru (po su chi pertocat sa Lista B is primus, e po su chi pertocat sa Lista A is segundus) in sa stagioni de su duamilla e binticuatru – duamilla e binticincu (ca fiat, est craru puru, cussa de s'annu passau). 
In prus ndi funt artziadas po curri in su campionau de s'Ecellenza puru atras duas scuadras chi s'annu passau fiant, e duncas curriant, in su campionau de sa Promotzioni, e seus chistionendi de is arrùbius-brau de su Tortolì e de is de su Sant'Aleni, ca s'annu passau si funt giogadas, is unus contras a is atrus, faci a faci si iat a podi narai puru, sa partida finali po su chi pertocat is play-off. 
In prus, in su campionau de s'Ecellenza ant a curri puru is de su Santa Teresa (is de su Lungone, po ddus tzerriai sa sarda), chi nd'ant pigau su postu de is de su Santu Tiadoru - Poltu Ridundu chi, de su chi seu bènniu a sciri, de su chi si potzu narai, ant decìdiu de ndi sciusciai s'assòtziu. 
De sa Sèrie D, invècias, ndi funt cabaus, po curri, est craru, in su campionau de sa Promotzioni, is de s'Ilvamaddalena e is de s'Atletico de Uri, chi ant a circai (cumenti si iat a depi fai dònnia borta chi ndi arruis) de ndi strantaxai torra sa conca acoitu. Tra is scuadras chi currint, a su mancu de cussu chi ndi podeus cumprendi in dì de oi, po ndi cassai su primu postu de sa lista e duncas sa bìncida de su campionau, agataus puru is de s'Ossese e is de su Tèmpiu, ma eus a biri, immoi, cumenti ant a andai is cosas in campu, poita, a sa fini, cumenti si narat, s'ùrtimu fueddu at a tocai pròpriu a su campu. 

E duncas, cumenti s'apu narau immubagora, is giogus po su chi pertocat su campionau ant a torrai a incumentzai su catodixi de su mesi de Cabudanni e de su chi podeus cumprendi castiendi is calendàrius, nc'ant a essi partidas fintzas a su binti de su mesi de Idas, est a narai, duncas, fintzas a cincu diis ainnantis de su Nadali. S'ùrtima giorronada de giogus po su chi pertocat su duamilla e binticincu, e po su chi pertocat, duncas, su campionau de s'Ecellenza, s'at a giogai de sabudu, ma no at a essi s'ùnica de seguru, po su chi s'apu arremonau ainnantis. E duncas, is de s'Ecellenza ant a giogai de sabudu (e sa cosa at a balli po totus is scuadras chi ddoi funt in sa lista) in s'ùrtimu fini de cida de su mesi de Cabudanni, est a narai, duncas, su bintiseti; su segundu at a essi in su mesi de ladàmini (su binticincu), e po su chi pertocat su de undixi mesis de s'annu (cussu de donniasantu) is partidas a su sabudu ant a essi, s'ant a giogai su bintiduus. 
Po su chi pertocat su duamilla e bintises, si potzu incumentzai a narai, duncas, ca is giogus ant a torrai a partiri, apustis de is festas po su Nadali e po s'Annu Nou, pròpriu su cuatru de su mesi de gennàrgiu, chi at a essi de sabudu (e duncas, eia, is giogus ant a torrai a partiri, pròpriu, mi parit bastanti craru, cun is partidas chi pertocant su campionau de s'Ecellenza); po su sabudu de su dexesseti, invècias, nc'at a essi su segundu sabudu de s'annu nou cun totus is scuadras de s'Ecellenza in campu. 
Su binticincu, invècias, chi at a essi s'ùrtimu domìnigu de su mesi de gennàrgiu, is scuadras de s'Ecellenza no ant a depi cabai in campu, e custu poita nc'at a essi sa partida finali po su chi pertocat sa Copa Italia (sèmpiri po su chi pertocat su mundu de s'Ecellenza, e mi parit bastanti craru puru, berus est?). 
Is scuadras de s'Ecellenza ant a depi cabai in campu a su sabudu puru po su chi pertocat is mesis de friargiu e de martzu: su sabudu de su bintunu de friàrgiu e su sabudu de su bintunu de su mesi de martzu funt cussus chi is de su Cumitau Regionali Sardu ant scerau po is partidas de su campionau prus mannu chi teneus in s'isula. Su bintinoi de su mesi de martzu, invècias, is scuadras de s'Ecellenza ant a abarrai torra frimas, est a narai, duncas, mi parit bastanti craru, chentza de ndi cabai in campu, e custu poita nc'ant a essi is partidas de su chi tzerriaus Trofeu de is Regionis, ca funt is giogus, ddi naraus diaici, chi pertocant totus is piciocheddus prus fortis e chi ant a benni sceraus po giogai su campionau cun is scuadras chi ant a curri, e dònnia scuadra at a rapresentai una regioni de s'Italia, chi eis cumprèndiu su chi si bollu narai.

S'ùrtimu sabudu innoi is scuadras de s'Ecellenza ant a cabai in campu, totus paris, in truma manna (cumenti si iat a podi narai, puru) at a essi cussu de su cuatru de su mesi de abrili, chi, tra is atras cosas, at a essi su sabudu de sa cida santa, e duncas, eia, eis cumprendiu beni, su sabudu ainanntis de sa Pasca Manna. 
Po s'ùrtima giorronada de giogus, invècias, eus a depi abertai su bintises de su mesi de abrili (e cumenti dònnia borta chi chistionu de sa fini de is giogus ainnantis ca is giogus siant torraus a partiri, mi parit ca mi bengiat unu cropu a su coru, e unu cropu a sa conca puru, chi cumprendeis su chi seu circhendi de si narai, e megu unu pagheddeddu a brullai, mi parit craru, berus est?). Duncas, a fai is contus nci poneus pagu meda, seus chistionendi de calincuna cosa cumenti a seti mesis e mesu de giogus (e de spàssiu), cun is partidas chi ant a balli po is "play-off" (e duncas, is partidas finalis de sa stagioni chi s'ant a giogai tra totus is scuadras chi ant a essi arribbadas me is primus duus-tres postus, a is pabas de is primus de sa lista) chi s'ant a giogai me is primus tres mesis de su mesi de maju. Is partidas finalis chi ant a balli po sa sarvesa (cussas chi, a sa moda de is ingresus, seus costumaus a tzerriai "play-out") s'ant a giogai, invècias, su tres de su mesi de maju (po su chi pertocat sa partida de s'andada) e su dexi, sèmpiri de su mesi de maju, po su chi pertocat sa partida de sa torrada. 

E duncas, immoi chi seus arribbaus a custu puntu de sa chistioni, e de sa lega chi apu pigau (at a essi berus ca no sciu mai cali lega apa a pigai, cali lega apa a sighiri po su chi pertocat s'artìculu chi ndi pesu in sardu, ma po custa cida, invècias, tenia una promissa cun bosatrus, ca fiat, de su restu, cussa de andai a castiai impari is calendàrius de sa Promotzioni e de s'Ecellenza chi ndi funt bèssius pròpriu sa cida passada, fadendi su contu ca no apu acutu a si ndi chistionai in s'artìculu chi nd'est bèssiu su cuatru de su mesi de cabudanni), podeus andai a fai su pròpriu giogu, ddu tzerriu diaici, e sèmpiri chi seis de acòrdiu, andendi a castiai cumenti funt stètias cuncodradas is cosas. 

E duncas, po incumentzai si potzu narai ca, eia, is scuadras de sa Promotzioni ant a depi giogai dexesseti partidas po su chi pertocat s'andada e atras dexesseti, mi parit bastanti craru puru, po su chi pertocat sa torrada, cun calincuna cosa cumenti a trintacuatru partidas in totu. Sa primu partida, duncas, gei ddu scieis giai poita s'apu arremonau sa cosa giai unu muntoni mannu de bortas (ma una borta in prus, deu creu, potzu narai custu, no s'at a bociri de seguru), s'at a giogai, pròpriu cumenti at a sucedi po is de s'Ecellenza, custu domìnigu chi nd'at a arribbai (sèmpiri chi su Cielu at a bolli custu beni, e sa cosa ballit po mei, est craru, ma a su contu nci pongiu bosatrus e bosatras puru, chi seis de acòrdiu cun mei), est a narai su catodixi. 
Is giogus acapiaus a su campionau (chentza duncas de nci ponni in su contu is partidas chi ant a balli, cumenti ddas tzerriant is ingresus, e cumenti seus costumaus a fai nosatrus puru, ca ingresus no seus ma seus italianus, play-off) ant a acabbai su bintises de su mesi de abrili. Po custu domìnigu, si potzu narai custu puru, est a narai ca acudu a si narai custu puru, is partidas ant a incumentzai a is cuatru de su megama, isperendi ca po cussus poburus piciocus (seu chistionendi, est craru, de is giogadoris, chi a sa fini funt cussus chi ndi cabant in campu e andant a curri avatu de sa bòcia po noranta minudus) no nci siat tropu basca, cumenti si iat a podi narai. E apu castiau immoi immoi is previsionis po su chi pertocat su tempus, e custa iat a depi essi una cida unu pagheddeddu prus frisca, a su mancu chi fadeus is contus cun is temperaduras chi ndi funt bessidas aforas me is cidas passadas. 

E duncas, immoi chi seus arribbaus a custu puntu de sa istoria, de sa chistioni, po ddu narai mellus puru, andaus a castiai candu e po cantus bortas nc'ant a essi partidas aintru de sa cida e po cantu bortas (e mescamente: candu) nc'ant a essi partidas a su sabudu invècias ca in su domìnigu. E duncas, ca is giogus ant a torrai a partiri su catodixi si ddu apu narau pròpriu immubagora: sighendi a andai ainnantis si potzu narai ca is de sa Promotzioni, po su chi pertocat sa Lista A, a su mancu, ant a torrai a cabai in campu sa domìnigu avatu, chi at a essi su bintunu, e in prus ant a torrai a cabai in campu, po sa prima passada (ddi naru diaici) de partidas chi s'ant a giogai aintru de sa cida, su mercuis chi at a essi su binticuatru: est a narai, duncas, in cussu chi at a essi, castiendi su calendàriu, (ca no pentzu siat contendumì brullas, e ddu megu a narai po arriri, gei si cumprendit), s'ùrtimu mercuis de su mesi de Cabudanni. 
Sa cida avatu, invècias, chi at a essi sa primu cida de su mesi de ladàmini, po si cumprendit mellus puru, is scuadras chi ant a fai parti de sa Lista A (seu chistionendi sèmpiri de su campionau de sa Promotzioni, gei si cumprendit e gei si ddu eis a arregodai, berus est?) nd'ant a cabai in campu su sabudu (chi at a essi su cuatru) e apustis nd'ant a torrai in campu, sèmpiri su domìnigu, est a narai su domìnigu de su doxi, cussu de su dexennoi e su de su bintises. Nc'ant a essi partidas po su chi pertocat sa Lista A de sa Promotzioni puru su duus de su mesi de donniassantu, chi at a essi de domìnigu, e sa cida avatu, peròu, nc'at a essi un antru sabudu prenu de partidas po su chi pertocat, sèmpiri, is scuadras de sa Lista A, chi ant a torrai in campu su sabudu de s'otu e, apustis, torra su dominigu, candu at a essi su sexi. E duncas, sigheus a andai ainnantis diaici, nc'ant a essi partidas puru su bintitres e is de sa Lista A ant a serrai su mesi (su mesi de donniassantu) cabendi torra in campu de sabudu, candu at a essi su bintinoi (po sa de trexi giorronadas). 

In su mesi de Idas, invècias, sa primu partida s'at a giogai su seti, chi at a essi de domìnigu (e custu bollit narai, puru, ca s'otu de su mesi de Idas, ca po medas de bosatrus at a essi dì de festa, po mei, e po totus is collegas mius, at a essi dì de trabballu, ma no ndi fatzu unu dannu, o un arrori, antzis! E de su restu seus costumaus a trabballai me is diis de festa, e nci iat a mancai atru puru. Podeis abarrai segurus de su fatu, duncas, ca in su giàssu chi sigheus, e chi est su giàssu de su Diàriu Sportivu, eis a agatai totus is artìculus cun is novas prus callentis chi, cumenti a sèmpiri, nd'ant a arribbai de is campus de giogu de is partidas de is scuadras diletantis sardas); sigheus diaici fintzas a arribbai a su trexi de su mesi de Idas (chi at a essi de sabudu), e apustis s'at a mancai feti s'ùrtima giorronada de s'annu, chi at a essi cussa chi s'at a giogai su bintunu de su mesi de Idas (candu eus a tenni s'afròddiu po su Nadali a cucuru, chi mi permiteis de manigiai custus fueddus). 

Is giogus ant a torrai a partiri, po cussa chi at a essi sa primu partida de s'annu nou, est a narai, mellus, de su duamilla e bintises, ma s'ùrtima puru, e parit una brulla, po su chi pertocat sa lista de partidas de s'andada, su cuatru de su mesi de gennàrgiu, chi at a essi de domìnigu (e custu bollit narai ca po cust'annu apa a fai is annus de lunis, est a narai su cincu, eia, sa dì ainnantis de sa festa de sa befana; e cumenti mi sucedit de una bella pariga de annus, de candu seu scriendi po su Diàriu Sportivu, apa a passai sa dì de su cumpleannu cosa mia sighendi is fainas chi pertocant su trabballu cosa mia. Ma sa cosa chi si podit narai est: e mancu mali chi tèngiu unu trabballeddu de sighiri, chi mi permitit de mi ponni in busciaca cussus cuatru arriabeddus chi mi serbint po mi comperai sa cosa de papai e po mi ndi scabulli de totus is pesas chi nci funt e chi ti nd'arribbant in custa vida in custu mundu macu meda). 
E sigheus, duncas, a andai ainnantis diaici, e arribbaus a su dexi, sèmpiri de su mesi de gennàrgiu, cun is scuadras de sa Lista A de sa Promotzioni chi nd'ant a cabai in campu de sabudu (su primu sabudu de partidas de s'annu nou, chi at a essi su primu sabudu de giogus in su mesi de gennàrgiu puru). 
E nc'ant a essi partidas su dexiotu, chi at a essi de domìnigu, ma puru su mercuis avatu, po su segundu mercuis de partidas de totu su campionau, e seus chistionendi, duncas, de su mercuis chi at a essi su bintunu. Po su chi pertocat su mesi de gennàrgiu, nc'ant a essi partidas su dominigu de su binticincu e is giogus ant a torrai a partiri in su primu dominigu de su mesi de friàrgiu puru (ca at a essi s'unu de friàrgiu, ca a fai is contus nci poneus pagu meda), cun is partidas chi s'ant a giogai, apustis, su domìnigu, chi at a essi s'otu, e apustis, torra de sabudu, chi at a essi su catodixi (sèmpiri po su chi pertocat su mesi de friàrgiu, mi parit craru). 
Nudda de narai po is partidas chi ant a balli po sa de otu e po sa de noi giorronadas in sa lista de sa torrada, cun is partidas chi s'ant a giogai sèmpiri de domìnigu, e seus chistionendi, duncas, de de su bintiduus de su mesi de friàrgiu e de sa primu dì de su mesi de martzu (chi at a essi, eia, si ddu apu scoviau immubagora, sèmpiri de domìnigu). 
Is scuadras de sa Lista A de sa Promotzioni nd'ant a cabai torra in campu s'otu (sèmpiri de domìnigu, chi at a essi sa dì, tra is atras cosas, innoi eus a fai sa festa po is feminas, cumenti seus costumaus a fai), e apustis, torra de sabudu (po su chi pertocat su mesi de martzu, mescamente) e seus chistionendi de su sabudu chi at a essi su catodixi. 
Su mesi de martzu s'at a serrai cun duas giorronadas postas a su domìnigu, candu eus a essi, eia, in prenu in prenu a sa caresima (ma est una cosa, custa, chi eus a torrai a pigai, po su chi pertocat is legas e is chistionis chi nci funt acapiadas, candu at a essi s'ora, e no de seguru immoi in cabudanni. E megu a brullai, unu pagheddeddu, e gei si cumprendit, ma no diaici meda cumenti podeis pentzai): e seu chistionendi, duncas, de su domìnigu de su bintiduus e de su bintinoi. 
Sa de catodixi giorronadas (sèmpiri po su chi pertocat is partidas de sa torrada, est craru puru, mi parit de podi narai) s'at a giogai su sabudu de sa cida santa, su sabudu de Pasca Manna, duncas (e torra, eis a agatai is artìculus cun totus is novas su domìnigu avatu, su domìnigu de Pasca, mancai siat festa) su domìnigu chi at a essi su cincu. 
Is giogus po su chi pertocat sa Lista A de sa Promotzioni s'ant a serrai cun duas giorronadas a su dominigu, e seu chistionendi de su dexannoi e de su bintises de su mesi de abrili. 

E immoi chi nci seus, no s'abarrat atru de fai ca andai a castiai cumenti funt postas is cosas po su chi pertocat sa Lista B, e seu chistionendi, est craru (a su mancu, a mei parit bastanti crara cumenti a cosa) de is partidas, sèmpiri, chi pertocant su mundu de sa Promotzioni. E duncas, eia, est craru, is scuadras chi faint parti de sa Lista B ant a sighiri, prus o mancu, is giorronadas de sa Lista A, e custu po su chi pertocat is partidas chi ant a depi giogai aintru de sa cida, e po su chi pertocat is festas (s'ùrtima partida de s'annu at a essi su bintunu, e sa primu partida de s'annu nou at a arrui su cuatru de su mesi de gennàrgiu). Sa cosa chi depeus andai a castiai impari, po no circai de ndi bessiri de s'arrastu chi seus sughendi, est cussa chi pertocat is partidas chi is scuadras de sa Lista B ant a giogai de sabudu. Su primu sabudu innoi is scuadras chi s'agatant in sa zona nord de sa Sardìnnia (si iat a podi narai diaici puru) ant a cabai in campu, totas impari, est cussu de s'undixi de su mesi de ladamini (apustis de unu mesi de s'incumintzu de is giogus po sa stagioni duamilla e binticincu – duamilla e bintises, ca a fai is contus nci poneus pagu meda); e duncas, nc'ant a essi partidas sa primu dì (chi at a essi de sabudu) de su mesi de donniassantu puru, e apustis, nc'ant a essi partidas a su sabudu su ses de su medi de Idas. 
Sa nova prus manna, a su mancu po su chi mi pertocat (fadendi su contu de su chi s'apu narau ainnantis, fadendi su contu, si ddu torru a narai, ca su de cincu de su mesi de gennàrgiu at a essi su cumpleannu cosa mia) est acapiada a s'incumintzu de is giogus apustis de is festas po su Nadali e po s'annu nou: e duncas, eia, is scuadras chi ant a curri (chi currint) in sa Lista B po su chi pertocat sa Promozioni ant a cabai in campu, torra, su ses de su mesi de gennàrgiu, chi at a essi de martis (sa dì de sa festa de sa befana, po si cumprendi mellus), e apustis, sèmpiri de domìnigu fintzas a sa fini de su mesi. 

Is scuadras de sa Lista B nd'ant a cabai torra in campu su sabudu de su seti de su mesi de friàrgiu, e apustis su seti de su mesi de martzu. Is scuadras de sa Lista B ant a serrai is giogus, po s'ùrtima giorronada, pròpriu de sabudu, chi at a essi su binticincu de su mesi de abrili. 

E mi parit ca po su chi pertocat is calendàrius s'apu contau pròpriu totu su chi nci fiat de si contai, chentza de mi ndi scaresci nemmancu una virgula, cumenti si iat a podi narai. 

E duncas si iat a podi narai ca po custa cida seus arribbaus a s'acabbu, a sa fini de su tempus e mescamente de su logu chi tèngiu po si scriri s'artìculu in sardu; su chi potzu fai, in dì de oi, est su de s'augurai, a totus cantu seis (cumenti si iat a podi narai, e cumenti apu sèmpiri intendiu innoi in Bidd'e Sorris), de arrannèsci a passai oras e diis prenas de paxi, e po su restu, po su chi pertocat is novas chi nd'arribbant, deretas deretas, de su mundu de is giogadoris diletantis de bòcia sardus, si potzu feti narai ca depeis tenni passièntzia po atras seti diis, e custu bollit narai, gei si cumprendit beni, ca chi su Cielu at a bolli custu beni po mei, eis agatai un antru bellu tanti de rigas, cumenti custas chi teneis asuta de is ogus, giòbia chi at a benni, candu eus a essi in mesu in mesu (diaici si narat) a su mesi de Cabudanni puru. 






Attività realizzata col contributo della Regione Sardegna. IMPRENTAS 2024-2025. LR 22/2018 art. 22