Is de su Samugheo funt is primus a fai sa festa po sa bìncida de su campionau me in su mundu de sa Primu Categoria

E duncas no mi parit nemmancu berus a si ddu podi scriri, ma a cantu parit, a cantu est fadendumì sciri su tialu de calendàriu (e megu a ddu narai a trassa de brulla, deu isperu e creu pròpriu ca si cumprendat), sesus arrannèscius a nc'arribbai, totus impari (sa cosa ballit po mei, ca custus artìculus ddus scriu, est craru, ma ballit, puru, po bosatrus ca custus artìculus ddus ligeis), a su de cincu mesis de s'annu, e seus chistionendi, duncas, mi parit craru, de su mesi de Maju. 

E chi pròpriu si ddu depu narai, nc'aciungiu custu puru, difatis, mi parit ariseu (cumenti si narat, candu su tempus parit chi si ndi bobit, gei m'eis a cumprendi, deu creu) candu seu partiu cun is artìculus po cust'annu, ca est su de su duamilla e binticincu, e fiat sa segunda diis de su mesi de Gennàrgiu. 
E immoi, apustis de cincu mesis, si iat a podi narai ca, giai giai po sa metadi, is giogus funt stètius fatus, est a nai ca seus arrannèscius a si scroxai cuatru mesis, giai, de cust'annu puru (chi mi permiteis de manigiai custu fueddu, a su mancu, chi mi praxit de amachiai po cumenti sonat, chi pròpriu si depu narai sa beridadi, e chistionu de su fueddu scroxai, chi no s'est cumprendiu beni), e immoi (immoi chi nci seus, si iat a podi narai diaici etotu) no podeus fai atru ca sighiri in custu arrastu etotu, isperendi, mescamente e pruschetotu, ca su Cielu potzat essi amigu de totus nosu, chi mi permiteis de giogai unu pagheddeddu a fai su poeta puru; est a nai ca, a su mancu fintzas a immoi, e a su mancu po su chi mi pertocat, is cosas mi funt andadas (mi funt andendi, po ddu narai mellus puru) bastanti beni, est a nai ca no dda apu ancora acabbada aintru nè de un uspidali, nè aintru de s'aposentu de una presoni e nè aintru a una de cussas domus innoi serrant is macus, e chi tzerriaus, a trassa de s'italianu etotu, manicòmius. 

Ca s'arriscu (e de su restu, chi eis lìgiu a su mancu unu de is artìculus chi nd'apu pesau fintzas a oi, a su mancu in custu ùrtimu annu e mesi, chi no me is ùrtimus duus annus puru, scieis beni cumenti dda pentzu apitzus de sa chistioni) est cussu de nc'atapai aintru, in mesu in mesu a calincunu disastru, e duncas, eia, po cumenti seu fatu, po cumenti seu costumau a mi bivi sa vida, dònnia dì chi nc'arrannèsciu a serrai chentza dannus, est una dì basada de sa gràtzia de Deus, cumenti mi benit de ddu narai, ca de su restu bastat pagu (bastat pagu diaderus) po si strupiai e dda acabai a s'uspidali, e chistionu po su chi mi pertocat, bastat pagu, bivendi in custu mundu macu e totu ghetau apari, po ndi bessiri aforas de conca (e dda acabai macus, cantu, chi no de prus, su mundu innoi s'agataus a bivi), po no chistionai, apustis, de su de acabbai aintru de una prasoni: deu apu sèmpiri fatu a bonu, est a nai ca no apu mai donau nemmancu mesu bussinada a nemus, no apu mai bòciu nesciunu, est craru, e no m'ant mai cassau furendi nudda de importu, ma a sa fini po acabbai aintru de una prasoni bastat pagu a bortas, fintzas un incidenti in s'interis ca ses guidendi sa tialu de sa machina. E custu po narai ca, eia, ddoi funt totu una cantidadi manna meda de arroris chi si ndi podint proi apitzus de sa conca, de unu segundu a s'atru, o, a su mancu, diaici mi parit de podi pintai is cosas (po sighiri a giogai a fai su poeta, e po sighiri, duncas, a giogai cun is fueddus chi manigiu); e su de essi arribbau a custu puntu de sa storia chentza tropus trumentus, chentza tropus fastidius, cun gana bona e chentza de daboris, eia, mi parit ca mi donit su tanti po fai, giai giai, unu pagheddeddu de festa. 

Ca candu no nci funt daboris, dannus o arroris, intzandus s'estus a depi intendi basaus de sa bona sorti, de sa fortuna. 
E duncas, eia, fintzas a immoi, cumenti si narat, est andendu totu beni. 

Bastat a pentzai, in prus, ca is campionaus funt giai giai po acabbai, e duncas, nci funt giai is scuadras chi funt fadendi sa festa apustis de nd'essi cassau su primu postu de sa lista: su campionau de sa Promotzioni est acabbau, s'est serrau, po ddu narai mellus puru, pròpriu custu fini de cida passau (chi fiat su de su bintiseti, e custu si ddu naru no po si pigai a trassa de tontus, ma po fai beni su trabballu cosa mia, e unu giornalista fait beni su trabballu cosa sua pròpriu candu arrannèscit a essi su prus pretzisu possibbili cun su chi scriit e chi torrat a contai, e gei si cumprendit, deu creu), e invècias is giogus po su chi pertocat su mundu de sa Primu Categoria e de sa Segunda Categoria s'ant a serrai (e fiat ora puru, s'ant a megai is tifosus chi sighint is scuadras in custas doxi listas, cuatru po su chi pertocat su mundu de sa Primu Categoria, e otu po su chi pertocat su mundu de sa Segunda Categoria) feti in custu fini de cida chi est arribbendindi, e chi at a essi, tra is atras cosas, est craru, su primu fini de cida de su mesi de maju. 

E deu seu innoi, a scriri cust'artìculu, mancai su primu de su mesi de Maju siat sa festa, e duncas, po essi prus pretzisus, su primu de su mesi de Maju est sa dì de sa festa de totus is trabballadoris, e no est sa primu dì de festa, a si narai sa beridadi, chi deu passu a trabballai, e sa cosa, chi pròpriu si ddu depu narai, no mi dispraxit diaici meda, fadendi su contu ca no est sa primu borta chi mi sucedit e trabballai candu, mancai, is atrus funt pasiendusì (chi mi permiteis de ndi pesai totu custu giogu de fueddus).
Ma chi stimmas su trabballu cosa tua (est sa cosa chi m'arrapitit fatu fatu su capu cosa mia, su chi sighit su trabballu chi ndi pesu e chi estus a podi tzerriai, a trassa de s'italianu etotu, capu de sa redatzioni, e duncas, est su chi ligit is artìculus chi ndi pesu, e est su chi tenit s'ùrtimu fueddu, ddi naru diaici, apitzus de totus is cosas chi scriu, mescamente is cosas chi scriu in italianu), chi ddu fais cun gana bella, cun passioni, intzandus est cumenti chi tui no trabballist mai. 

E duncas, torrendi a nosu, no benit a essi una cosa diaici grai, una cosa diaici fastidiosa, a su mancu diaici mi benit de ddu narai in dì de oi, su de depi trabballai su primu de su mesi de maju (apu trabballau fintzas sa primu dì de su mesi de Gennàrgiu, me is annus passaus, e fintzas sa dì de Pasca Manna, o sa dì de su cuindixi de su mesi de Agustu, puru e pruschetotu, chentza de mi intendi mabi, e ddu naru brullendi, est craru berus?). Antzis, chi pròpriu depu fai is cosas cumenti su Cielu cumandat, ia a depi torrai gràtzias, po su de tenni, apustis de giai cuindixi annus de candu apu incumentzau, unu trabballeddu chi mi permitit de ndi pesai cussu tantixeddu (unu tantixeddu piticu meda, si iat a podi narai diaici etotu, ca po su chi mi pertocat mi bastat diaderus su pagu, e custa, deu pentzu, est una fortuna) de dinai, de arriabis (po ddu narai a sa sorresa, est a nai, po ddu narai manigendi unu fueddu antigu meda chi apu sèmpiri intèndiu narai de is bècius de Bidd'e Sorris, chi est sa bidda innoi mi nc'ant postu, apustis de candu seu nàsciu, e innoi ancora m'agatu, apustis de prus de corantacuatru annus), ca mi serbint po mi ndi scabulli de totus is cosas chi nci funt de pagai, e po mi ndi scabulli de is disìgius de is cosas chi mi serbint po bivi, ca no funt diaici meda cumenti si iat a podi pentzai, (ma de custu, mancai, nd'eus a chistionai torra mellus un'antra borta). 

E duncas, eia, si iat a podi narai ca seus andendi beni meda, concas a s'istadi, mancai nci siant, de si bivi, de si scroxai (torra cun custu fueddu!) atrus duus mesis de su beranu, chi est sa stagioni chi mi praxit de prus tra totus cussas chi ddoi funt in un annu, chi pròpriu si ddu depu narai, impari a s'atonzu etotu. 
E duncas, eia, ia a podi serrai sa chistioni narendusì ca est fadendi diis bellas: mancai est ghetendu puru unu pagheddeddu de acua, est a nai ca calincuna dì nd'est arribbada puru s'acua, est a nai, duncas, chi at protziu po calincuna dì, e sa cosa andat beni, e si cumprendit puru, ca cumenti nd'at a brintai sa basca intzandus (fait a crei e a narai custu, a su mancu) nd'at a torrai sa sicagna puru, ca benit a essi una de is cosas prus pagu spassiosas chi ddoi funt aintru de s'annu. Ma de sa cosa, est craru, eus a tenni su modu, e s'ocasioni, po ndi torrai a chistionai in su benidori. 

Po immoi, duncas, si gosaus is ùrtimas passadas de acua chi est ghetendi (in Bidd'e Sorris, si naru custa cosa puru, tanti po si fai arriri unu pagheddeddu, cuindixi diis apustis de is festas po sa Pasca Manna nd'arribbant is festas po Sant'Antiogu, e sa bon'anima de mamma mia, ma in bidda funt in medas is chi sighint cust'arrastu, naràt sèmpiri ca po Sant'Antiogu proit sèmpiri, e duncas eus a biri ita nd'at a bessiri aforas in custu fini de cida chi nd'est arribbendi), fadendi su contu, comentecasiat, ca est incumintzendi, puru, a fai bellas diis de sobi e de callenti, chi est berus ca sa dì de Pasca Manna mi seu abruxau totu sa conca, po crupa de su sobi chi ddoi fiat, e fadendi su contu ca no seu costumau (no mi praxit prus de su tanti, a si narai sa beridadi) a mi ponni capeddeddus o berretus (o berritas, chi si praxit de prus) in conca, e duncas su chi mi sucedit est pròpriu su chi s'apu narau: m'abruxu sa peddi de sa conca, cun totu cussu chi custu cumportat (ma gei m'at a passai, puru, mi megu a solu a solu). 

E duncas, de su tempus chi passat e de su tempus chi est fadendi mi parit ca, po custa cida puru, nd'apu chistionau bastanti, e immoi si nci podeus ghetai, a fundu e susu (pròpriu cumenti si narat in bidda cosa mia) me is chistionis chi pertocant su mundu de sa bòcia, fadendi su contu (si ddu torru a arrapiti), ca no sciu mai cali arrastu, cali legas apa a pigai me is artìculus chi ndi pesu in sardu campidanesu, ainnantis de mi ponni a ddu fai. 
E nci funt cidas innoi mi intendu sa conca prena, prena fintzas a cucuru, de strollichiminis e de contus e de contixeddus, e nci funt diis, invècias, innoi mancai mi speddiat feti, e si naru feti, de si torrai a contai is istorias prus de importu, cussas prus spassiosas, chi nd'arribbant, deretas deretas (cumenti si iat a podi narai) de su mundu de is calciadoris, de is giogadoris diletantis (cumenti diletantis funt is allenadoris chi ddus sighint). 

E su fatu ca siant diletantis no bolit narai, peròu, ca no fatzant su chi faint (est a nai su de giogai is partidas e, cosa de importu prus mannu puru, su de si cuncodrai po is partidas sighendi is allenamentus) cun gana bona e cun passioni; e nosu de su restu (nosu de su Diàriu Sportivu, megu a narai, e no sciu chi si cumprendat) seus costumaus a ddus sighiri e a ddis donai totu s'atentzioni chi si minescint; e torrendi a sa chistioni chi apu pigau ainnantis, deu impari a is collegas cosa mia, chi trabballant po su giàssu de su Diàriu Sportivu, pigaus su trabballu cosa nosta cun seriedadi, e gei si cumprendit puru. 
E po nosu, duncas, po serrai sa chistioni, is diletantis tenint su pròpriu importu, sa pròpriu dignidadi (chi mi sigheis e chi cumprendeis su chi si bollu narai, su chi seu circhendi de si narai) de cussa chi tenint, mancai, is grandus campionis chi currint is su mundu de is professioneris, e chi agataus me in su campionau de sa Sèrie A, po si cumprendi mellus puru. 

E duncas, sa cosa chi si potzu narai, po oi, e po incumentzai, est ca a binci praxit a totus, e si cumprendit: est a nai ca su de binci is campionaus fait prexei, e meda puru, a is giogadoris chi currint, chi giogant, totus impari, po una scuadra de una bidda pitichinninnia, chi mancai fait feti milli animas (ca po ti intendi prexau, est custa sa chistioni, no depis abertai de binci su campionau cun sa scuadra manna de Milano, o de Torinu, chi mi cumprendeis po su chi si bollu narai). 
E sa pròpriu cosa iat a podi balli (cumenti ballit, de su restu) po cussas scuadras chi arrannèscint a ndi cassai sa sarvesa, mescamente chi sa sarvesa nd'arribbat apustis de is duas partidas chi si depint giogai apustis chi nd'acabat sa stagioni, e, duncas, su campionau, e seu chistionendi de is duas partidas chi tzerriaus, a sa moda de is ingresus (a trassa de cumenti faint is ingresus etotu), play-out, e chi funt, pròpriu, is duas partidas chi is scuadras chi funt arribbadas giai giai me is ùrtimus postus de sa lista, depint giogai tra de issas etotu. 

E duncas, po si fai cumprendi de ita seu chistionendi, si potzu narai, po incumentzai, ca custu fini de cida chi est arribendindi, e chi at a essi su de su cuatru de su mesi de maju (po no si perdi cun is chistionis acapiadas a su calendàriu) nc'ant a essi is primus duas partidas (is partidas de s'andada, cumenti si iant a podi tzerriai, puru) po su chi pertocat is campionaus de sa Promotzioni, (e apustis at a tocai sa pròpriu cosa puru a is scuadras de sa Primu Categoria e de sa Segunda Categoria, cun is giogus chi pertocant sa stagioni de su duamilla e binticuatru – duamilla e binticincu, chi ant a andai ainnantis po atras duas cidas, e duncas, podeus narai chi nc'ant a essi partidas puru su domìnigu de s'undixi, e puru su domìnigu apustis, chi at a essi su de su dexiotu, e fortzis, e naru fortzis, po su binticiatru de su mesi de maju is giogus iant a podi essi serraus e bellu ca acabbaus, a su mancu po custa stagioni); e duncas, immoi chi nci seu, andaus a castiai, e custu po incumentzai, est craru, cali funt is partidas chi s'ant a giogai tra una pariga de diis feti. 

E duncas, po su chi pertocat sa Lista A, is de s'Uda si dda ant a depi biri contrasa is arthanesus de s'Idolo, in duas partidas; sa primu partida s'at a giogai in domu de is de s'Uda, chi funt arribbaus ainnantis de is de s'Idolo etotu; sa scuadra chi nd'at a cassai su tanti de puntus prus mannus in custas duas partidas, intzandus, e si cumprendit beni, at a tenni sa possibbilidadi de curri in su campionau de sa Promotzioni puru s'annu chi at a benni (chi su Cielu at a bolli custu beni po nosu, est craru). 
Po su chi pertocat sa Lista B (e megu a chistionai sèmpiri de su campionau de sa Promotzioni, si cumprendit berus est?), invècias, nc'at a essi sa partida tra is de su Tonara (chi ant serrau sa stagioni cun trintanoi puntus in totu allogaus in buciaca) e is de sa Lanteri de Tattari, chi ant serrau sa stagioni cun unu puntixeddu in mancu de is chi tenint is aversàrius, e duncas, cun trintotu puntus (ca a fai is contus, cumenti mi praxit a narai fatu fatu, acudeus, e meda puru). 
E duncas, sa primu partida s'at a giogai in domu de is de su Tonara, e s'ùrtima partida s'at a giogai, est craru, in domu de is tattaresus. 

E sa pròpriu cosa at a sucedi, duncas, po su chi pertocat is play-off (po ddu narai, torra, a trassa de is ingresus) e po su chi pertocat is scuadras chi funt arribbadas a su de duus e a su de tres postus in sa lista: sa segunda de sa Lista A at a depi arriciri sa visita de sa scuadra chi at serrau su campionau a su de tres postus in sa Lista B, e a s'imbressi, est a narai chi ballit aguali, sa scuadra chi at serrau sa stagioni a su segundu postu de sa Lista B at a depi arriciri sa visita de sa scuadra chi nd'at cassau su de tres postus in sa Lista A; e duncas, po si narai cumenti funt cuncodradas is cosas, immoi scieus ca is de s'Usinese (chi gràtzias a sa bìncida, de importu mannu, po tres a duus, chi nd'ant cassau, pròpriu me is ùrtimus minudus de giogu, in domu de is de su Bonorva) ant a depi arriciri sa visita de is de su Cuartu de Sant'Aleni, sa scuadra sighida de Andrea Loi, chi ant fatu totu su trabballu chi depiant, gràtzias a sa bìncida chi nd'ant pesau, cun unu cincu a zeru tundu tundu, contras a is de s'Orrolese. 
E is de su Tortolì, invècias, sighius de Tore Mereu, chi ant serrau sa stagioni a su segundu postu in sa Lista A, ant a depi arriciri sa visita de is de su Coghinas, chi ant a curri po ndi cassai s'artziada in su campionau de s'Ecellenza po sa primu borta de candu esistit s'assòtziu, e si podeis immaginai beni, podeis cumprendi beni, mancai a solus, duncas, de totu s'afròddiu chi tenint in su coru. 
E si cumprendit ca s'afròddiu est una de is cosas chi t'agiudat a curri prus a forti, a fai beni su chi depis fai, e sa cosa no ballit feti po su mundu e po su giogu de su càlciu, e si cumprendit bastanti beni, deu creu. 

E custu, duncas, po su chi pertocat su campionau de sa Promotzioni. 
In cussu de sa Primu Categoria, invècias, is giogus funt ancora obertus: est a narai, duncas, ca eus a sciri su nomini de sa scuadra chi nd'at a cassai sa bìncida de su campionau (e chi duncas nd'at a cassai su primu postu de sa lista) feti a s'acabbu de s'ùrtima partida, e feti candu ant a essi spaciaus is noranta minudus de giogu. In sa Lista A (megu a chistionai de sa Primu Categoria, a su mancu, e si cumprendit, berus est?) is de su Cannonau de Jerzu, sighius de Andrea Piccarreta, funt diaderus a unu passu feti de sa bìncida de su campionau, est a nai ca chi ant a arrannèsci a binci sa partida chi ant a depi giogai contras a is de su Sestu (ca, tra is atras cosas, no tenint prus nudda de domandai a custa stagioni), ant a essi segurus de ndi cassai su primu postu de sa lista e, duncas, s'artziada in su campionau de sa Promotzioni, chentza de depi abertai su resultau de sa partida chi is de sa Baunese (chi funt is segundus de sa Lista A) ant a depi giogai, in domu cosa insoru etotu, contras a is de su Setimu, chi funt ancora e sèmpiri currendi po ndi cassai sa sarvesa. 
Po su chi pertocat sa Lista C, invècias, nc'at a essi de cumprendi cumenti ant a andai is cosas, is giogus, tra is de su Thiesi e is de s'Ozierese, cun is segundus chi tenint, in dì de oi, duus puntixeddus in prus de is chi tenint is piciocus sighius de Gianmariu Rassu (is de s'Ozierese tenint, duncas, setantacincu puntus in busciaca, e is de su Thiesi ndi tenint setantatres). 
Sa pròpriu cosa si iat a podi narai po su chi pertocat sa Lista D, fadendi su contu ca a su primu postu, cun sessantaseti puntus, ddoi funt duas scuadras: is tattaresus de su Campanedda e is de su Santu Giorgiu de Peifugas. 
Sa primu scuadra, e immoi atacaus cun is chistionis prus callentis (o prus friscas, chi si speddiat de prus e si praxit de prus diaici), a nd'essi ingotu sa bìncida de su campionau, a su mancu po su chi pertocat su mundu de sa Primu Categoria, funt is de su Samugheo, sighius de Giorgiu Ferraro. 

E si acudu a narai, duncas, ca de sa bìncida de su campionau de parti de is arrubius – biancus – birdis nd'eus a chistionai in unu de is artìculus chi nd'ant a bessiri custa estadi chi at a benni (chi su Cielu at a bolli custu beni po mei e po bosatrus puru), fadendi su contu ca apa a agatai totu su tempus, e duncas, fadendi su contu ca nc'at a essi totu su tempus (e totu su logu chi mi serbit) po arraxonai apitzus de totus is scuadras chi funt arrannèscias a ndi cassai su primu postu de sa lista in su campionau cosa insoru, partendi duncas de is duus campionaus de sa Promotzioni, fintzas a arribbai a is cuatru listas chi faint parti de sa Primu Categoria e fintzas a arribbai, duncas, a is otu listas chi ballint po su campionau de sa Segunda Categoria. 

E chi pròpriu si ddu depu narai (e acudu a si ddu narai immoi etotu) no nc'est nudda de prus bellu, in su trabballu cosa mia (e no megu a brullai, antzis, seu narendu sa beridadi) de su de podi intendi su prexu, e totu s'afroddiu, in sa boxi de is allenadoris chi intendu po ndi pesai is ciaciarradas candu acabbant is giogus, e duncas, est craru, seu chistionendi de is allenadoris chi bincint su campionau; e si cumprendit cantu si podint prexai, apustis de giai noi mesis de trabballu e de alleamentus e de partidas, chi est berus ca Nunzio Falco, po nd'arremonai unu, e chi est s'allenadori chi at bintu su campionau de sa Segunda Categoria po su chi pertocat sa Lista A impari a is de sa Gioventudi de Sarroch, e chi s'apu arremonau (chi no mi sbàlliu, e fait a narai ca megu a no mi sballiai de seguru...) in una de is cidas passadas, e chi m'at contau ca, eia, a sa fini de sa stagioni, de totu su trumentu, est torrau mabi de calincuna cosa cumenti a dexi chilus. 

E duncas, eia, eis cumprendiu beni, is allenadoris prus prexaus, a bortas, mi parint siant pròpriu cussus de sa Segunda Categoria, e mi praxit meda custa cosa, est a nai ca, mancai sa Segunda Categoria siat su campionau prus pitichinninniu chi sigheus po su giàssu de su Diàriu Sportivu (est a nai ca sa de Tres Categorias no arrannescesus a dda sighiri po nudda, e si dispraxit, ma prus de custu no arrannesceus a fai, a su mancu in dì de oi est diaici,ma in su benidori, mancai, is cosas iant a podi andai mellus puru), candu intendu is allenadoris chi nd'ant cassau s'artziada in sa Primu Categoria mi parit de podi narai ca siant is personas prus prexadas chi nci funt in su mundu, ca su giogu de sa bòcia iat a depi essi unu spàssiu, unu sprèviu mescamente po is giogadoris, e is piciocheddus prus giòvunus, ma a sa fini su de binci est cumenti chi pighit a conca, a su coru, a sa brenti, e pagu importat chi tui siat s'allenadori de una scuadra de s'Ecellenza chi mancai nd'at cassau s'artziada in su campionau de sa Sèrie D (e chi est su bisu de totus is giogadoris sardus, est a nai, duncas, ca sa Sèrie D est sa porta, diaici dda tzerriant, chi permitit de nci passai de su mundu de is diletantis, est a narai, duncas, de is campionaus regionalis, cumenti funt cussus de sa Promotzioni, de sa Primu, de sa Segunda Categoria, ma a sa lista nci depeus stichiri puru su campionau de s'Ecellenza, est craru puru, berus est?) o pagu cambiat, diaderus, chi tui siast arribbau a su primu postu de sa lista in unu campionau de sa Segunda Categoria. 

Sa cosa chi abarrat aguali est su prexu chi t'agatas me in su coru, e diaderus, est pròpriu in custa parti de s'annu (est a narai: candu is giogus funt giai giai po acabbai) ca mi nd'acatu de totu sa fortza chi su sport, e mescamente su giogu de sa bòcia, donat a is personas, a is piciocus, a is tifosus chi sighint is partidas setzius me is tribbunas. 
Ma su giogu de sa bòcia benit a essi una faina de importu mannu pruschetotu po is piciocus, ca si sciit (ca ddu scieis, de su restu) ca me is campionaus de is diletantis is giogadoris currint, po su prus, po si sprèviai e po si spassiai (e no, custu est pagu ma seguru, po ndi boddiri una surra de dinai, cumenti invècias faint is giogadoris professioneris, e mi parit craru puru de cumenti andant is cosas, ma nc'est de narai ca is giogadoris professioneris, cussus, po fai un esèmpiu, chi currint in su campionau de sa Sèrie A, ddu faint no feti po spassiu, ma po trabballu puru); e si cumprendit cantu podit essi de importu su giogu de sa bòcia in una biddixedda (e in Sardìnnia est prenu de biddixeddas pitichinninnias, cumenti eis a sciri mellus de mei puru, e si ddu naru deu ca bivu in Bidd'e Sorris, chi est una bidda chi fait, cumenti si narat, calincuna cosa cumenti a seti milla animas, cumenti si iat a podi narai, e chi no funt pagu de seguru) innoi, cumenti si narat, no nc'est giai giai nudda de fai, e s'unica faina chi is piciocus podint sighiri (candu no trabballant e no andant prus nemmancu a iscola) est cussa, e mi prangit su coru a si ddu scriri, a si ddu contai (ma diaderus est diaici chi andant is cosas a bortas), de si nd'abarrai a totu dì sètzius in pratza, o, peus ancora, a su bar. 

E duncas, su giogu de sa bòcia ti donat sa fortza po andai ainnantis in custa vida, chi a bortas est marigosa, a bortas benit a essi trota meda. E duncas, ia a podi serrai totu custa lista de strollichiminis chi nd'apu bogau aforas narendusì ca, eia, po bona sorti, mi megu a solu a solu, ca nc'est su giogu de sa bòcia, e sa cosa ballit, mescamente, me in totus is mesis de s'atonzu e de s'ierru puru, innoi is ocasionis po si sprèviai benint a essi pagu, pagu medas, chi cumprendeis su chi si bollu narai e chi mi sigheis in s'arraxonamentu chi seu circhendi de ndi pesai. 

E duncas, torraus a nosu: arribbau a custu puntu deu fia pentzendi de si intregai una pariga (una parighedda feti) de fueddus chi m'at regalau pròpriu immubagora Giorgiu Ferraro, chi est s'allenadori de is de su Samugheo (ca, po si cumprendi mellus apari, est una biddixedda ca fait calincuna cosa cumenti a duas milla e seicentus animas, e custu po s'apicai torra a su chi festus narendu ainnantis in custu artìculu etotu): e si immaginais su prexu, ddu podeis cumprendi a solus, deu creu, totu su prexu chi nd'ant tentu po nd'essi cassau su primu postu de sa lista e, duncas, s'artziada in su campionau de sa Promotzioni po sa segunda borta in totu sa storia cosa insoru. «Deu apu incumentzau su trabballu cosa mia impari a is de su Samugheo pròpriu s'annu passau, est a nai, duncas, in sa stagioni de su duamilla e bintitres – duamilla e binticuatru; est pròpriu cun custa scuadra chi apu incumentzau sa carriera cosa mia po su chi pertocat su de fai s'allenadori, chi cumprendeis su chi si bollu narai e su chi seu circhendi de si contai. Est gràtzias a issus, duncas, ca in dì de oi m'agatu in custa situatzioni, est a nai, in sa situatzioni de mi podi bivi totu custu prexu, totu custa satisfatzioni. Funt issus, de su restu, e chistionu, est craru, de totus is dirigentis chi faint parti de s'assòtziu e trabballant, e meda puru, po s'assòtziu de su Samugheo, chi deu seu incumintzendi, e sighendi, a ndi pesai unu pagheddeddu de esperièntzia, chi cumprendeis su chi si bollu narai, in su mundu de is allenadoris. Su trabballu chi seu fadendi impari a custus piciocus, duncas, est incumentzau s'annu passau e si iat a podi narai, puru, duncas, ca is cosas si funt andendi beni meda, ma su de binci su campionau, su de ndi cassai su primu postu, no est bèniu a essi de seguru una cosa facili. In sa primu parti de sa stagioni – at sighiu a mi contai Giorgiu Ferraro -, in cussa chi si iat a podi tzerriai, puru, cumenti dda tzerriaus de su restu, lista de is partidas de s'andada, seus arranèscius a curri a forti meda, ma meda, e fortzis nemmancu nosu credestus de podi fai totu custu muntoni de puntus chi nd'eus cassau, de podi bìncis totu custu muntoni de partidas. E fortzis, potzu narai custu puru, chi pròpriu si depu narai sa beridadi, in sa primu parti de sa stagioni eus fatu prus de su tanti chi fortzis podestus fai; est a nai ca, eia, is giogadoris cosa mia ant donau su centudexi po centus, cumenti si narat. E duncas, mancai deu no sia un allenadori cun una esperièntzia manna a is pabas, sciia beni ca podiant arribbai is momentus prus marigosus, o prus dificilis, chi cumprendeis su chi si bollu narai; ca in una stagioni no ti podis abertai de binci totus is partidas chi giogas, poita in campu ddoi funt is aversàrius, puru, e mescamente poita is giogadoris funt ominis e no machinetas, e duncas, podit capitai de depi abasciai sa velocidadi, cumenti mi benit de narai e cumenti si seu narendu, de su restu. In prus, e si cumprendit beni, sa rosa de su Samugheo est pesada totu cun piciocus giòvuneddus, chi, pròpriu cumenti a mei, no tenint una esperièntzia manna a is pabas, e duncas fiat una cosa aforas de conca su de pentzai, su de podi crei ca podestus curri diaici a forti, cumenti eus fatu me is primus cuindixi partidas, po totus su restu de s'annu puru. No si podit narau, custu est pagu ma seguru, ca sa rosa de su Samugheo fessit sa prus forti de totus is atras, antzis; no festus fortis cumenti, mancai, fiant fortis is de s'Atleticu de Masainas ca s'annu passau ant pèrdiu feti s'ùrtima partida de sa stagioni e, duncas, ant lassau feti is pimpirillas a is aversàrius, cumenti si narat candu una scuadra bincit su campionau a manu bascias, po ddu narai a trassa de cumenti si narat in italianu etotu. Ma cumenti si narat, seus arrannèscius a abarrai cumpatus, is piciocus funt abarraus unidus puru candu is cosas no girant beni, candu mancai no arrannescestus a binci is partidas. Ma de su restu, deu no fia tribuliau, cumenti si narat, poita a sa fini eus sèmpiri giogau partidas bonas, de importu mannu, e mancai s'ùnicu problema fiat ca no arrannèscestus a ndi pesai, a ndi cassai is puntus, cumenti, mancai, si minescestus. Ma deu abarru seguru de su fatu ca candu tui trabballas beni, intzandus is resultaus bonus nd'arribbant, e nc'est feti de abertai, de sighiri a curri in s'arrastu bonu e, mancai, sa cosa de importu est cussa de no si fai pigai de is pentzamentus, e de sa tristura, candu is cosas no ti andant beni cumenti invècias iant a podi andai». 

Ferraro, apustis, at sighiu a mi contai: «Eus dèpiu passai unu perìodu totu trobeddau, totu ghetau apari, fadiosu meda: si capitàt, meda ma meda bortas, de fai unu mesu sbàlliu e de ndi buscai duus gol (e Ferraro si nd'arrit issu etotu, a solu, po su chi ddi est bèssiu de sa buca ndr); nci funt stètias giorronadas innoi, mancai, arribastus aranti de sa porta po dexi-cuindixi bortas in noranta minudus, e mancai arrannèscestus a fai calincuna cosa cumenti a tres, mancai cuatru gol puru; ma candu is cosas ti andant mabi, intzandus no nc'est nudda de fai: est a narai ca iast a podi abarrai totu sa dì, e no feti po noranta minudus, a giogai contras a sa scuadra de is aversàrius, ma podis abarrai seguru de su fatu ca chi sa bòcia no ndi bolit intendi nudda de nci brintai in porta, intzandus no nci brintat. E duncas, eia, is atacantis nostus funt abarraus a buca asciuta, cumenti si narat candu, mancai, un atacanti no fait gol, chi est su trabballu cosa sua, su trabballu chi depit fai, ma torru a narai, si torru a arrapiti, ca sa scuadra at sèmpiri giogau partidas bonas, de importu. Su de no ndi cassai is puntus chi si minescestus, mancai, podit dipèndiri, diaderus, de una surra de motivus; deu seu abarrau cun su coru selenu poita, a sa fini, po su chi pertocat sa cunditzioni atletica, cumenti dda tzerriaus a trassa de cumenti si narat in italianu etotu, stadestus beni meda, est a nai ca is cambas sighiant a girai, e meda puru, e duncas, depestus feti abertai ca sa maba sorti si lassessit in paxi. Si ndi depeus arregodai, puru, ca in campu nci fiant, e nci funt, sèmpiri, puru is scuadras de is aversàrius, est a nai duncas ca po sa cursa po ndi cassai su primu postu de sa lista no festus currendi a solus, cumenti si narat. E duncas, mi iat a fai prexei a si nd'arregodai ca, eia, sa lista cosa nosta, est a nai sa Lista B de su campionau de sa Primu Categoria, fiat cussa innoi ddoi fiant cuatru scuadras, e no funt pagus, e si cumprendit, chi ndi fiant cabadas de su campionau de sa Promotzioni, e seus chistionendi, est craru, de is de s'Arbus, de is serramannesus de sa Gialeto, de is de sa Verde Isola de Carluforti (cumenti si narat in campidanesu ndr) e is de si Gonnosfanadiga puru, duncas, si iat a podi narai ca binci su campionau in sa Lista B est bèniu a essi tostau meda, e custu, est craru, po sa fortza de is aversàrius cosa nosta. Podeus pentzai, po cumprendi de ita seu chistionendi, ca duus de custus assòtzius, e megu a arremonai is de s'Arbus e is de sa Gialeto de Serramanna, funt tra cussas chi tenint sa storia, e s'esperièntzia prus manna a is pabas, fadendi su contu ca me is annus passaus funt arribbadas a giogai fintzas me is campionaus inter-regionalis, est a nai in Sèrie D puru, e de su restu, sa cosa ballit pruschetotu po is de s'Arbus, ant fatu is ùrtimus annus currendi in su campionau de s'Ecellenza. E custu bollit narai, puru e mescamente, ca is dirigentis chi faint parti de s'assòtziu tenint una biga de esperièntzia a is pabas, chi est una de cussas cosas chi fait sa diferentzia, a bortas. Seus chistionendi, duncas, de assòtzius chi teniant is cartas bonas po ndi cassai su primu postu de sa lista, antzis, si iat a podi narai ca teniant is cartas prus bonas fintzas de nosu de su Samugheo, fadendi su contu ca s'assòtziu cosa mia at giogau in Promotzioni feti po un'antra borta in totu sa storia cosa sua. No bollu narai fabas, o brullas, ma pentzu de podi narai ca, eia, nci fiant scuadras meda ma meda prus fortis de su Samugheo, e sa cosa pertocat, mescamente, sa callidadi de giogadoris chi teniant me is rosas cosa insoru. Nosu nc'eus ghetau in campu totu cussu ca, de bonu, tenestus; eus giogau e bintu is partidas cun sa conca e pruschetotu cun su coru, e no feti cun is peis e cun is cambas; su trabballu chi eus fatu in custus noi mesis, ma a su contu nci depeus aciungi totu su trabballu chi eus fatu s'annu passau, s'at agiudau, s'at permitiu de si lassai totus a is pabas; eus bintu unu campionau ca pariat facili, ma feti a ddu castiai de foras, poita su trabballu chi eus dèpiu fai no est stètiu pagu de seguru».




Attività realizzata col contributo della Regione Sardegna. IMPRENTAS 2024-2025. LR 22/2018 art. 22