Orane e Piaghe currint giai prus de is atrus e si gosant su primu postu de sa lista in su Girone C e in su Girone D

Est craru: a nosu de su DiarioSportivo s'iat a praxi meda a sighiri de chistionai de is partidas de bòcia, ca de su restu istorias de contai nci d'est sèmpiri. S'iat a praxi chistionai de is de s'Orane, po nd'arremonai una, cun is piciocus sighius de mister Salvatore Mastio chi, apustis de cuatru partidas, s'agatant a su primu postu de sa lista po su chi pertocat su Girone C, cun noi puntus in totu, aici cumenti a su Macumere. Su spantu, peròu, nd'arribat de su fatu chi is birdis-asullus funt atziaus pròpriu cust'annu de sa Secunda a sa Primu Categoria, apustis de otu annus de s'ùrtima borta. Is atacantis de s'Orane, seus chistionendi mescamente de Fadda, Brau e Soddu, funt giai fadendi ammachiai is difensoris de is atras scuadras, cumenti est capitau a is de sa Tonarese, chi a sa de tres bessida, s'undixi de su mesi de Làdamini, nd'ant arregotu una surra cun seti gol in totu. Sa cida ainnantis, invècias, fiat tocau a is de s'Ovodda, chi nd'ant buscau cincu. In totu, is gol fatus de s'Orane funt cuindixi, unu in mancu de is chi ant fatu cussus de s'Atletico de Bono.

In su Girone D, a su primu postu ci funt invècias is de su Piaghe chi, mancu a dhu fai aposta, cust'annu ndi funt artziaus de sa Secunda a sa Primu Categoria, aici cumenti a s'Orane atotu. Pròpriu po custu motivu, nisciunus penzàt chi podessint curri diaici a forti giai de is primu bessidas.
Po s'allenadori de sa scuadra, Tore Porqueddu, su prexu est meda, e si cumprendit beni: doxi puntus in buciaca, apustis de cuatru partidas, cun is bìncidas arregotas contras a is de s'Ozierese, in domu, po tres a zero; agoa est tocau a is tataresus de s'Ottava, chi ant perdiu po unu a zero; no nc'est stetiu nudha de fai mancu po is de su Coghinas, chi nd'ant arregotu duus gol, e po is de su Putumajore, chi pròpriu domìnigu passau ant perdiu sa partida po unu a zero.

Dhu torraus a arrapiti: s'iat a praxi a sighiri a chistionai de custas cosas, fintzas a su mesi de Maju, candu s'ant a serrai totu is giogus, aici cumenti narat su calendàriu, ma a nai sa beridadi imoi teneus sa conca e su coru, e sa brenti puru, tottu buddi buddi de is pentzamentus, poita a cantu parit su presidenti de sa Regione, Christian Solinas, pròpriu in custas ùrtimas oras, est penzendi de torrai a serrai totu e acorrai torra sa genti me is domus, mancai feti po cuindixi diis, in cussu chi eus imparau a tzerriai "lockdown", po cumbati su spaniamentu de su Covid. Chi fessit diaderus diaici, s'iant a studai puru totus is giogus de bòcia, e bai cica de cumprendi po cantu tempus. Comentecasiat, nd'eus a sciri calincunca cosa in prus giai de crasi. Po imoi, no podeus fai atru chi sighiri a isperai chi totu andit beni.



Attività realizzata col contributo della Regione Sardegna. LR 22/2018 art. 22, comma 2. Avviso 2019-2020