In su campionau de sa Promotzioni s'alluit giai sa batalla po su primu postu de sa lista

In s'artìculu de custa cida: andaus a castiai impari cumenti funt stètius cuncodraus is calendàrius po su chi pertocat su campionau de sa Primu Categoria e de sa Segunda Categoria. In s'interis, is scuadras de sa Promotzioni sighint a curri sèmpiri prus a forti.


E duncas, atacu a scriri custas rigas candu seus arribbaus (chi su calendàriu no est contendumì fabas, a su mancu, e megu a brullai, cumenti a sèmpiri: si cumprendit? Ca a sa fini, chi eis lìgiu a su mancu unu de is artìculus chi nd'apu bogau aforas in custu ùrtimus duus annus, gei ddu eis a sciri beni cumenti seu fatu e, mescamente, cumenti mi pigat a scriri is artìculus chi ndi pesu in sardu campidanesu po sa rubrica de is Noas de su Diàriu Sportivu) a su bintiduus de su mesi de Cabudanni, chi est de lunis. 

E no mi parit nemmancu berus, eia, de nc'essi lòmpiu a sa fini de s'istadi (e fiat ora puru, s'at a cudi a pentzai calincunu de bosatrus, e deu mi pongiu in su primu postu de sa lista de is chi fiant giai giai arroscius de totu custa basca apicigosa chi fiat fadendi, mescamente me in custas ùrtimas diis), de nc'essi lòmpiu sanu, e cun coru allirgu, fadendi su contu, cumenti s'apu arremonau me is cidas passadas, ca chi su mesi de agustu fessit durau, puru, po narai, mancai feti un'atra mes'oredda in prus, fortzis (e si naru fortzis, po sighiri cun is brullas) a custu giru mi iat a essi fatu sicu, cumenti si podit narai. 
E invècias, 'tendei 'tendei (cumenti apu sèmpiri intèndiu narai in bidda mia etotu, chi est Bidd'e Sorris, in su Campidanu de mesu, e cumenti apu sèmpiri intèndiu narai de sa bon'anima de mamma mia puru, tra is atras) seus arribbaus a s'incumintzu de s'atonzu po cust'annu puru (po su duamilla e binticincu puru, a bolli essi prus pretzisus, cumenti unu giornalista iat a depi circai de essi, sèmpiri chi bolit fai beni su trabballu cosa sua), e no mi parit nemmancu berus, si ddu torru a arrapiti, fadendi su contu ca chi s'istadi tenit sa capacidadi de mi ndi suciai fintzas a s'ùrtimu stìddiu de fortzas e de energias chi tèngiu in cropus (e si nd'apu giai chistionau, de su restu...), a s'imbressi, cumenti ndi brintat s'atonzu, est cumenti chi mi torrit su sangui in cropus. 

Eia, est unu pagheddeddu cumenti a torrai a nasci, mi benit de si imboddiai sa chistioni diaici: e duncas, gei ddu eis a cumprendi a solus, totu s'afròddiu chi mi intendu in su coru custu mengianu. 
E custu po su chi pertocat su tempus chi passat: eia, si naru custa cosa puru, immoi chi nci seu, circhendi de no si ndi furai su tempus chi, mancai, nemmancu teneis: mi praxit fintzas a m'amachiai ca, po incarrerai cun is artìculus, fatzu (e fadeus, duncas, ca in sa truma nci pongiu puru bosatrus, e bosatras, ca custus artìculus ddus ligeis) sèmpiri su contu de su tempus chi passat (ca a bortas parit ca si nci bobit, fadendi su contu ca custa, de su restu, at a essi s'ùrtima cida prena de su mesi de Cabudanni, chi s'at a serrai su trinta, cumenti eis a sciri beni, chi at a essi de martis, tra is atras cosas), cumenti si fadiant fai a is scolas, e pruschetotu a is scolas elementaris: chi si ddu arregodais, difatis (e custa cosa mi fait ancora arriri meda, mancai siant passaus calincuna cosa cumenti a corant'annus, prus o mancu, de candu andamu a is scolas elementaris. Torrendi a su fatu ca su tempus, a bortas, parit ca si nci bobat. E candu si nci bobat, eia, sa cosa toga, o marigosa, de sa vida, est ca cancu nci passat, intzandus no torrat prus agoa), is letzionis incumentzànt sèmpiri cun su maistu (o sa maista) chi, a sa lavagna, andàt a scriri su logu innoi s'agatastus (po su chi pertocat su contu miu, duncas: Bidd'e Sorris) e sa data de sa dì, cumenti si iat a podi narai. 
E sa cosa mi depit essi abarrada prantada beni beni in conca, de su chi ndi potzu cumprendi in dì de oi, fadendi su contu ca deu fatzu su pròpriu giogu po incarrerai cun is artìculus chi ndi bessint aforas dònnia (e si ddu torru a scriri torra: dònnia) giòbia, chentza de ndi sartai nemmancu unu. 

E duncas, de su tempus chi est passendi (chi est sighendi a passai po mimi puru, e gràtzias a su Cielu, m'acudu a narai) si nd'apu chistionau po custa cida puru (e una cosa est fata! Cumenti si megàt fatu fatu babbu miu). 
E po fai totus is cosas cumenti mi praxit a ddas fai (e m'eis a iscusai po su giogu de fueddus chi mi nd'est bèssiu aforas), depu feti chistionai (ma unu pagheddeddu feti, ca ddu cumprendu a solu puru ca no teneis totu custu tempus de nci fuiai, avatu de is strollichiminis cosa mia) de cumenti funt andendi is cosas po su chi pertocat su tempus chi fait, est a narai, duncas, ca depu chistionai de is temperaduras, po incumentzai. 
E duncas, eia, gràtzias a Deus, a su mancu po mei, a su mancu po su chi mi pertocat, is diis funt benendu a essi sèmpiri prus friscas, a su mancu po su chi pertocat su merì e, mescamente, sa noti: in s'interis ca seu scriendi custas rigas, eia, seu abertendi (chi pròpriu si depu narai sa beridadi) chi incumentzit a proi, cumenti ant narau is previsionis de su tempus, e cumenti mi parit de cumprendi castiendi aforas de sa fentana de s'aposentu chi est su logu innoi trabballu: eia, su cielu parit bastanti prenus de nuis e nci iat a podi essi, po diaderus, su tanti (cumenti si narat) po si gosai unu pagheddeddu de acua: ca s'acua serbit sèmpiri, e mescamente apustis de una istadi innoi (a su mancu innoi in su Campidanu de mesu) at protziu pagu, chi no giai nudda. 
E immoi, eia, de custu megama (sighendi, torra, su chi m'ant scoviau is previsionis de su tempus) ndi iat a depi arribbai s'acua puru, e me is diis chi ant a benni (mescamente is diis a metadi de sa cida) ndi iat a podi arribbai puru su frius (eia, eis lìgiu beni: su frius!), fadendi su contu ca is temperaduras minimas ndi iant a podi cabai fintzas a arribbai, 'tendei 'tendei, a doxi-trexi gradus puru, ca funt pagus, fadendi su contu ca s'istadi est acabbendi pròpriu in custas ùrtimas oras. 

E duncas, eia, mi parit de s'essi narau totu cussu chi tenia badda badda in conca e chi tenia su sputiori (eia, cumenti si narat innoi in Bidd'e Sorris) de si contai. 
E fadendi su contu (cumenti s'eis a arregodai) ca in s'artìculu chi nd'est bèssiu sa cida passada mi seu strollicau fintzas tropu (prus de su tanti chi mi iat a essi tocau, chi potzu manigiai custus fueddus e chi cumprendeis su chi seu circhendi de si narai), duncas, si ia giai promitiu ca po custa cida apa a essi chistionau feti (o po su prus) de partidas, de resultaus e de gol e de campionaus; ca de su restu s'artìculu chi ndi seu pesendi (a trassa de totus is atrus chi nd'apu pesau in custus annus) bessit in unu giàssu chi, de su duamilla e undixi (eia, po si torrai a apicai a sa chistioni ca a bortas su tempus currit diaici meda ca parit, giai giai, chi si ndi bobit), sigit is fainas (e duncas, eia, is isfidas) de is scuadras de càlciu de is diletantis chi currint me is campionaus pesaus de sa Federatzioni Italiana de su Giogu de su Càlciu e chi nci funt spratas in totu s'isula bella e stimmada cosa nosta. E diaici apa a fai. 

Ma ainnantis de si nci ghetai a fundu de susu me in su mari de novas chi si ndi funt arribbadas apustis de su segundu fini de cida prenu fintzas a cucuru de partidas (is campionaus de sa Promotzioni e de s'Ecellenza funt arribbaus a sa de duus giorronadas, e immoi custu mercuis ant a torrai in campu po sa primu lista de partidas chi s'at a giogai aintru de sa cida), mi iat a praxi a si ndi arragodai ca, eia, chi abarru innoi a mi strollicai cun bosatrus, est po circai, tra is atras cosas, de ndi cassai s'atentzioni, puru, mancai, de totus cussas personas chi no funt acapiadas a strintu cun is fainas chi pertocant is assòtzius de bòcia, ma chi, mancai, tenint agradessu de ligi calincuna riga scrita in sardu, e sa bidea de is de sa Regione Sardegna, chi a sa fini funt cussus chi ndi pesant, dònnia annu, su bandu IMPRENTAS, est cussa de circai de no fai sparessi de su mundu su sardu (eia, sa lingua sarda), fadendi su contu ca cussus chi sciint chistionai in sardu funt sèmpiri prus pagus, po no arremonai, duncas, totus cussus chi dda sciint ligi e de cussus chi dda scint scriri, chi ant a essi cuatru pisitus in totu, cumenti si iat a podi narai, e cumenti seu narendi de su restu. 

E duncas, eia, su de ciaciarrai de atras cosas puru, de atras legas, mi permitit, po incumentzai, de manigiai totu una surra manna, totu una biga de fueddus chi, mancai, no mi iat a benni de manigiai chi depessi abarrai innoi a si contai feti (e si ddu torru a narai: FETI) de is partidas chi giogant is scuadras sardas. 
Est a narai, duncas, ca a sa fini, chi fadeus beni is contus, ia a acoitai de prus (iat a serbiri prus pagu tempus, megu a narai custu, chi si cumprendit) a scriri feti is novas chi pertocant su mundu de sa bòcia; e invècias, a bortas abarru innoi a mi spremi is crobeddus, circhendi calincuna cosa de importu, de togu, de si torrai a contai, e de nc'aciungi a totus is novas chi funt sa parti de importu prus mannu de cust'artìculu etotu. 

E apustis (e cun custu dda serru po diaderus), mi benit fatu fatu de si narai ca, eia, no est ca feti poita scriu in unu giàssu chi sighit is partidas de is scuadras de is diletantis sardus, intzandus mi depu (e si depeis, ca sa cosa ballit po bosatrus puru ca ligeis, e po bosatras puru, e nci iat a mancai atru puru) tupai is ogus e is origas, cumenti si narat, e depu fai finta ca in su mundu innoi biveus no sucedat nudda de importu de si torrai a contai. 

Ma po custa cida, si ddu naru torra, si ia promitiu (giai de sa cida passada, a narai sa beridadi, a narai is cosas po cumenti funt diaderus) ca is strollichiminis iant a essi stètius pagus meda, e diaici apa a fai, diaici apa a circai de fai, sèmpiri chi nc'arrannèsciu (e megu a sighiri a brullai, si cumprendit?). 

E duncas, si potzu narai, puru, arribbau a custu puntu de sa chistioni chi, gràtzias a Deus, de novas e de cosas de si torrai a contai nci ndi funt a muntonis, partendi, pròpriu, est craru, de is partidas chi si funt giogadas custu fini de cida chi si seus lassaus a is pabas (s'ùrtimu fini de cida de s'istadi, tra is atras cosas, po s'apicai a sa chistioni chi pertocat su tempus chi passat e chi si nci bobat), chi fadeus su contu, mescamente, ca custu mercuis is scuadras de sa Promotzioni e de s'Ecellenza (cumenti s'apu giai arremonau, de su restu) ant a torrai a cabai in campu po giogai sa de tres giorronadas de sa lista de partidas de s'andada (e mi parit craru puru). 

E in prus, si potzu incumentzai a narai ca eia, cumenti eis a sciri giai (si nd'apu chistionau, unu pagheddeddu, giai me is artìculus chi ndi funt bèssius me is cidas passada), in s'ùrtimu fini de cida de su mesi de cabudanni, chi at a essi, po essi prus pretzisus, cussu chi nd'at a arrui su bintiseti, po su chi pertocat su sabudu, e su bintotu, ca invècias at a essi de domìnigu, ant a torrai a incumentzai, ant a torrai a partiri, puru, is campionaus de sa Primu Categoria e de sa Segunda Categoria. 

Po custa cida, duncas, seus sighendi ainnantis cun su cincuanta po centus de is campionaus allutus, e immoi at a tocai a ndi cabai in campu puru a totus is atras scuadras, e podeis cumprendi beni totu s'afròddiu chi podint tenni, aintru de su coru, is giogadoris chi po immoi si funt dèpius acuntentai de castiai is atrus gioghendi (chi no est una cosa lègia, ma si cumprendit, benit a essi pagu spassiosa, mescamente chi ses unu giogadori chi no biit s'ora de ndi torrai in campu po curri avatu de sa bòcia), ma sa cosa ballit puru po is scuadras. 
E duncas, eia, chi seis de acòrdiu cun mei, sa primu cosa chi si iat a podi fai, est cussa de andai a castiai cumenti funt cuncodraus is calendàrius: e megu a chistionai, est craru, de is campionaus de sa Primu e de sa Segunda Categoria, si ddu torru a arrapiti torra, a bortas, 'ti arrori mannu (cumenti si narat in Bidd'e Sorris e cumenti si megàt fatu fatu sa bon'anima de mamma mia. Ca mi parit de dda intendi torrai, immoi etotu...) calincunu de bosatrus apat pèrdiu su filu de is chistionis, cumenti si iat a podi narai a trassa de cumenti si narat in italianu etotu. 

E duncas, eia, po primu cosa eus a castiai candu ant a torrai a incuementzai is giogus (e custu giai ddu scieis beni, a narai sa beridadi, fadendi su contu ca si nd'apu chistionau, de sa cosa, immoi immoi etotu) e, pruschetotu, eus a cumprendi candu ant a acabbai, fadendi su contu ca is primus a serrai cun sa stagioni, cumenti s'apu giai arremonau una pariga de bortas in totus custas ùrtimas cidas passadas, ant a essi is scuadras de s'Ecellenza (e seu chistionendi, a su mancu, de is campionaus chi si giogant innoi in s'isula, chentza de nci ponni, chentza de nci stichiri, in su contu, is scuadras chi currint me is campionaus de sa Sèrie D e de sa Sèrie C puru). 

E duncas, chi seis de acòrdiu cun mei, podeus atacai. 
Duncas, sa primu cosa chi si potzu narai, sa primu cosa chi si potzu scoviai, est ca is giogus ant a spaciai, s'ant a serrai su dexi de su mesi de maju, chi at a essi, est craru, de domìnigu. E duncas, eia, custu bollit narai, po incumentzai, ca de custu fini de cida chi est arribendindi (chi est po nd'arribbai, chi si praxit de prus cumenti sonat sa frasia cun is verbus cuncodraus diaici), e fintzas a su bintunu de su mesi de Idas (chi at a essi, cumenti eis a sciri giai, e chi no ddu scieis deu seu innoi po custu puru, s'ùrtimu domìnigu ainnantis de is festas de su Nadali) nc'ant a essi partidas dònnia, dònnia, dònnia fini de cida, chentza de ndi sartai nemmancu unu. 

Is scuadras chi ant a curri in su campionau de sa Primu Categoria, peròu, no ant a depi cabai in campu a metadi de sa cida (su mercuis, po essi prus pretzisus puru) cumenti at a tocai, invècias, a is scuadras de s'Ecellenza e a is scuadras chi faint parti de su campionau de sa Promotzioni puru. 
E duncas, eia, a fai is contus nci poneus pagu meda: nc'ant a essi partidas su cincu, su doxi e su dexennoi de su mesi de ladamini, chentza de si ndi scaresci de is partidas chi s'ant a giogai su bintises (sèmpiri po su chi pertocat su mesi de ladamini); po su chi pertocat su mesi de donniasantu, invècias, nc'ant a essi partidas su duus, su noi, su sexi, su bintitres e su trinta puru (chi at a essi s'ùrtima dì de su mesi), po sighiri, apustis, (e sèmpiri chi su Cielu at a bolli custu beni po nosu, est craru) cun su mesi de Idas, innoi, invècias, eus a acudi a biri, a sighiri feti (e naru feti po modu de narai) tres giorronadas: cussa chi s'at a giogai su seti, cussa chi s'at a giogai su catodixi, e po acabbai, po serrai cun is partidas po su duamilla e binticincu su bintunu, cumenti s'apu giai arremonau, tra is atras cosas, su bintunu. 

Duncas, is giogus po su chi pertocat sa Primu Categoria puru, a trassa de cumenti ant a andai is cosas po su chi pertocat is campionaus de s'Ecellenza e de sa Promotzioni, ant a torrai a partiri, po su chi pertocat su duamilla e bintises, su cuatru de su mesi de gennàrgiu, cun sa lista de partidas chi ant a balli po s'andada (cumenti seus costumaus a dda tzerriai, a su mancu, furendindi sa trassa de cumenti si narat in italianu etotu) chi s'at a serrai s'undixi de su mesi de gennàrgiu. 
E duncas, sa primu giorronada po su chi pertocat sa torrada at a essi, s'at a giogai (po ddu narai mellus puru) su dexiotu (seus chistionendi sèmpiri de su mesi de gennàrgiu, si cumprendit berus?), e is giogus ant a andai ainnantis me in su fini de cida de su binticincu de su mesi de gennàrgiu, po nc'arribbai, deretus deretus, a su mesi de friàrgiu, cun is partidas chi s'ant a giogai su primu de su mesi (chi at a essi de domìnigu, gei nc'arribbais bosatrus puru, berus est?), apustis s'otu, e su bintiduus cun sa de cincu giorronadas po sa lista de partidas chi ant a balli po sa torrada. 
E duncas, eia, si cumprendit bastanti beni, custu bollit narai ca is scuadras de sa Primu Categoria (is scuadras chi ant a depi curri me in su campionau de sa Primu Categoria, po su chi pertocat sa stagioni de su duamilla e binticincu – duamilla e bintises, po si ddu narai mellus puru) ant a abarrai frimas (e duncas, eia, s'ant a pigai unu domìnigu de pàsiu) su cuindixi de su mesi de friàrgiu (chi at a essi, tra is atras cosas, s'ùrtimu fini de cida de su carrasciali). 
E duncas, is giogus po su chi pertocat sa Primu Categoria ant a torrai a partiri feti su bintiduus de su mesi de friargiu, candu eus a essi (po chini dda sighit, a su mancu) in mesu in mesu a sa caresima. 
Fadendi su contu ca, cumenti eis a sciri giai (e nci iat a mancai atru), su mesi de friàrgiu est cussu prus pitichinninniu de totus, is partidas ant a torrai a sighiri in su mesi de martzu: apustis de su bintiduus, duncas, nc'at a essi su fini de cida de su primu de martzu, po sighiri puru in su fini de cida de s'otu, de su cuindixi, de su bintiduus, de su bintinoi e apustis, is giogus, po su chi pertocat su mesi de abrili, ant a torrai a incumentzai feti su doxi, est a narai, duncas, sa cida avatu a sa Cida Santa (cumenti seus costumaus a dda tzerriai, a su mancu po chini dda sighit). 

E duncas, custu bollit narai, eia, ca is scuadras de sa Primu Categoria no nd'ant a cabai in campu po su fini de cida de sa Pasca, a s'imbressi, invècias, de su chi at a sucedi a is scuadras de sa Promotzioni, chi nd'ant a cabai in campu su sabudu ainnantis de sa Pasca Manna (cumenti funt costumadas a fai, a narai sa beridadi, de una bella parighedda de annus). 

E duncas, apustis de su doxi, nc'ant a essi partidas su dexennoi, e su bintises puru (e seus chistionendi, sèmpiri, est craru, de su mesi de abrili), a sa faci de cussus chi ant a fai su ponti, cumenti si tzerriat e cumenti ddu tzerriaus, a trassa de cumenti si narat in italianu etotu, po sa festa de su binticincu de abrili, chi at a essi de sabudu. 
Apustis, nc'ant a essi partidas su tres de su mesi de maju, po serrai totu (a su mancu po su chi pertocat sa stagioni regulari, cumenti si iat a podi tzerriai, e cumenti dda seu tzerriendi, tra is atras cosas), cumenti s'apu giai arremonau, su dexi de su mesi de maju. 
Apustis, nc'at a essi su tempus, e custu ballit po su fini de cida de su dexesseti e de su binticuatru e de su trintunu puru, po acabbai de giogai is partidas finalis, cussas chi seus costumaus a tzerriai, a sa moda de is ingresus etotu, partidas de is play-off. 

E immoi chi nci seus, duncas, andaus a castiai cumenti funt cuncodradas is cosas, e duncas is giogus, po su chi pertocat is scuadras chi ant a curri in su campionau de sa Segunda Categoria, e chi est su prus piticheddu (ddi naru diaici, ma chentza de boli ofendi a nesciunus) tra totus cussus chi sigheus in su giàssu de su Diàriu Sportivu. 
E duncas, is contus chi eus a depi fai, po su chi pertocat is campionaus de sa Segunda, ant a essi giai giai is pròprius chi eus fatu po is scuadras chi ant a curri in su campionau de sa Primu Categoria, ma nc'at a essi calincuna cosa chi no at a essi aguali, incumintzu a si narai, a si scoviai custu puru. 
E duncas, no podeus fai atru ca si nci fuiai a fundu 'e susu in custa lega puru. 

Po su chi pertocat s'incumintzu de is partidas, ddu scieis giai: at a essi custu domìnigu chi est arribendindi, drabessi e acoitu, cumenti currit drabessi unu leporeddu in mesu a su sartu (chi mi permiteis de giogai a fai su poeta, a su mancu e feti po unu pagheddeddu). 
E duncas, de su domìnigu chi benit, e chi at a essi su bintotu (e chi, tra is atras cosas est sa dì, o su fini de cida, po ddu narai mellus, innoi in Deximumannu si faint is festas po Sant'Arega, ca est sa santa ca sigu, a trassa de is devotus, de candu seu pipieddu. E custu gràtzias a sa bon'anima de nonna mia, chi m'at intregau custa passioni), nc'ant a essi, po is de sa Segunda puru, a trassa de su chi at a sucedi po is de s'Ecellenza, de sa Promotzioni e de sa Primu Categoria, partidas dònnia, dònnia domìnigu, fintzas a nd'arribbai, intzandus, a su domìnigu de su bintunu de su mesi de Idas, candu medas de nosu (po no narai totus) ant a tenni giai sa conca bella ca imboddiada cun is fainas acapiadas a su Nadali (gei scieis beni cumenti si pigat, ca is mannus de edadi puru, giai giai, torrant a s'edadi de s'innocèntzia, tra totu sa cosa de papai chi nc'at a essi de si nci ghetai in brenti apitzus de is mesas, is drucis e is regalus puru). 

E sa primu nova, sa primu cosa chi at a benni a essi diversa, e chistionu sèmpiri de is de sa Segunda Categoria, est ca sa lista de partidas de s'andada s'at a serrai, at a acabbai, pròpriu, in s'ùrtima giorronada chi s'at a giogai in su mesi de Idas. 
In prus, si potzu narai, puru, ca is giogus po is de sa Segunda Categoria ant a torrai a incumentzai prus a tradu de totus is atrus: eia, chi is scuadras de s'Ecellenza, de sa Promotzioni e, cumenti eus biu ainnantis, in custu artìculu etotu, is de sa Primu Categoria ant a torrai a giogai po sa Befana (ddi naru diaici), fadendi su contu ca ant a torrai in campu su fini de cida de su cuatru (cun is scuadras de sa Lista B de sa Promotzioni chi ant a cabai in campu, invècias, pròpriu su ses), is de sa Segunda Categoria ant a torrai a partiri cun is giogus e su spàssiu feti s'undixi de su mesi de gennàrgiu; e custu bollit narai, pruschetotu, ca ant a tenni prus tempus po si pasiai, prus tempus, chi boleis, po is vacantzas (mancai su disìgiu de unu chi giogat a bòcia, e ddu scieis, est cussu de abarrai in campu po cantu prus si podit. Ca ddu scieis, e ddu eis a sciri mellus de mei puru: candu tenis una passioni, intzandus iast a passai totu sa vida cosa tua sighendi custa faina, e gei si cumprendit). 

Is de sa Segunda, in prus, s'ant a firmai puru su cuindixi de su mesi de friàrgiu, cumenti ant a fai, de su restu, is scuadras de sa Primu Categoria, po is festas acapiadas a su Carrasciali. 
Is de sa Segunda Categoria no nd'ant a cabai in campu nemmancu su cuindixi de su mesi de martzu, fadendi su contu ca nc'ant a essi de sighiri, puru, is partidas e is giogus de su Torneu de is Regionis, chi tra is atras cosas, cumenti s'apu arremonau sa cida passada (chi no mi sbàlliu, e gei mi parit ca no mi seu sballiendi, chi mi permiteis de ndi pesai custu giogu de fueddus), s'at a giogai innoi in Sardìnnia, po totu cussu chi at a bolli narai custa cosa (po primu, po nosu giornalistas chi eus a depi sighiri su campionau chi pertocat totus is scuadras de is giòvuneddus. Ma de custa cosa puru, mi parit craru, nd'eus a chistionai mellus candu si nd'ant arribbai novas prus friscas). 

E duncas, is de sa Segunda Categoria no ant a cabai in campu nemmancu po su sabudu de Pasca (po su sabudu de sa Cida Santa), cumenti, de su restu, funt costumaus a fai giai de una pariga de annus, a narai sa beridadi. 
Apustis de sa cida de Pascamanna, intzandus, nc'ant a essi atras tres giorronadas de giogus feti: su doxi de su mesi de abrili, su dexennoi, e su bintises, po cussa chi at a essi, 'tendei 'tendei, s'ùrtima giorronada. 

Duncas, is scuadras de sa Segunda Categoria ant a acabbai su campionau duas cidas ainnantis de su chi ant a fai is scuadras de sa Primu Categoria, ma a su contu nc'eus a depi ponni, e si cumprendit, is partidas finalis: cussas chi ant a balli po is play-off (po imboddiai sa cosa a trassa de cumenti dda tzerriant is ingresus, furendindi unu fueddu de s'ingresu etotu, duncas) e po is play-out puru (ca funt is partidas chi si faint po ndi cassai sa sarvesa). 

E duncas, arribbaus a custu puntu de is chistionis, no m'abarrat atru de fai ca acabai de preni is paginas chi ancora m'ammancant de scriri, po custa cida puru: e duncas, fadendi su contu ca sa cida passada (cumenti si eis a arregodai, e chi no si ddu arregodais, intzandus deu seu innoi pròpriu po custu puru) s'apu chistionau (apu acutu a si chistionai, po ddu narai mellus puru) de cumenti funt andadas is cosas po su chi pertocat su campionau de s'Ecellenza, intzandus po custa cida (in s'interis chi abertaus chi torrint a partiri is giogus de sa Primu e de sa Segunda Categoria puru) no s'abarrat atru de fai chi andai a castiai, impari, e si cumprendit, cumenti funt andadas is cosas, cumenti funt andendi is cosas, mellus puru chi si imboddiu sa cosa diaici, me is duas listas de su segundu campionau (a is pabas, est craru, de cussu de s'Ecellenza), e chistionu de s'importu, tra totus cussus chi si giogant in Sardìnnia. 

E duncas, chi seis de acòrdiu, atacaus a biri, a castiai impari, cumenti funt cuncodradas is cosas apustis de is primus centu e otanta minudus de giogus. E duncas, funt feti cuatru (ca a fai is contus nci poneus pagu meda) is scuadras ca, apustis de is primus duas giorronadas, funt arrannèscias a ndi cassai duas bincidas de sighiu, est a narai, duncas, is bìncidas s'una avatu de s'atra: e seus chistionendi, po essi pretzisus (cumenti unu giornalista iat a depi essi, de su restu) de is de su Castiadas, de is de su Gùspini, de is de su Terraba Frantziscu Bellu, e de is de su Cannonau de Jerzu. 

E duncas, apu tentu s'ocasioni de intendi, a su telefunu, po ndi pesai una ciaciarrada (e depu narai ca seus arrannèscius a ndi pesai pròpriu una ciaciarrada bella e toga e spassiosa) cun Andrea Piccarreta, ca de calincuna cosa cumenti a tres annus (tres annus cun sa stagioni chi est incumentzada de cuindixi diis, si cumprendit) est sighendi is trabballus, e duncas, sa scuadra de su Cannonau de Jerzu. 
E duncas, Piccarreta at tentu s'ocasioni de mi contai cumenti ddis funt andendi is cosas, fadendi su contu, po incumentzai, ca is biancu-birdis ndi funt artziaus in su campionau de sa Promotzioni feti cust'annu, apustis de essi bintu (est sucèdiu pròpriu s'annu passau, est a narai a sa fini de sa stagioni de su duamilla e binticuatru – duamilla e binticincu) su campionau de sa Primu Categoria, po su chi pertocat sa Lista A; e duncas cust'annu is ollastrinus giogant sa parti (cumenti si iat a podi narai, cumenti m'est bèniu de narai, a su mancu) de sa matrìcula. 
E duncas, acoitu a si narai, puru, ca is de su Cannonau de Jerzu ant bintu is primus duas partidas: sa primu, in domu cosa insoru, contras a is de s'Uda, sighius cust'annu de un allenadori bravu, e de importu, e de esperièntzia manna, cumenti est Titti Podda; sa segunda, invècias, in domu allena, in Casteddu, contras a is universitarius de su Cus. 
E duncas, a custu puntu de sa chistioni, deu creu ca sa cosa mellus chi si podit fai est cussa de andai a arraxonai apitzus de is cosas chi m'at contau, chi m'at scoviau Andrea Piccarreta, ca, cumenti si naru sèmpiri, chini mellus de s'allenadori de sa scuadra podit sciri cumenti funt andendi is cosas po su chi pertocat is piciocus cosa sua e, duncas, is piciocus, is giogadoris chi allenat? 

«Sa cosa de importu prus mannu po nosu fiat cussa de torrai a partiri cun su pei giustu, chi cumprendeis su chi si bollu narai, su chi seu circhendi de si narai. Bolestus torrai a partiri cun una bìncida, apustis de essi arribbaus a su primu postu de sa lista in su campionau de s'annu passau, e podeus narai ca, po su chi eus fatu a biri fintzas a immoi, in custas duas partidas, no si podeus lamentai de seguru po cumenti si funt andadas, po cumenti si funt andendi is cosas. Is piciocus cosa mia ant giogau duas partidas de importu mannu meda, e seu prexau po issus, si cumprendit: mescamente, in sa primu partida chi eus giogau in su campionau de cust'annu, contras a is de s'Uda, eus agatau un aversàriu forti meda, chi s'at donau de fai, cumenti s'abertastus, de su restu; is campidanesus podint fai su contu, po su chi pertocat sa rosa cosa insoru, de una bella pariga de giogadoris chi sciint su fatu cosa insoru, chi funt fortis, duncas, e chi in su campionau de sa Promotzioni podint fai sa diferèntzia, cumenti si iat a podi narai. E duncas, in totus is noranta minudus de sa partida, is de s'Uda funt arrannèscius a atacai, e beni puru, ma nosu seus stètius bonus a si ndi scabulli, e a si difendi po beni. Is aversàrius cosa nosta, e megu a chistionai mescamente de s'Uda, si minescint is cumplimentus de parti nostra, po cumenti ant giogau sa partida e duncas po cumenti si funt cumportaus in campu». 
Po su chi pertocat su campionau, intzandus, Andrea Piccarreta tenit is bideas craras, apitzus de sa stagioni chi is de su Jerzu ndi iant a podi pesai. «Deu creu, e seu giai giai seguru de su chi seu narendudì, ca cussu de cust'annu at a essi unu campionau echilìbbrau meda: nc'ant a essi, cumenti sucedit de una bella pariga de stagionis, a narai sa beridadi, cussas duas o tres scuadras chi ant a circai de si ndi stesiai de totus is atras, e duncas, eia, nc'ant a essi duas o tres scuadras chi ant a curri po ndi cassai su primu postu e, intzandus, sa bìncida de su campionau, e totus is atras ant a essi in sa pròpriu barca, chi cumprendeis su chi megu a si narai. Est a narai ca, chi ndi bogaus is primus duas – tres scuadras de sa lista, totus is atras tenint, in manu, is pròpriu cartas: sa calidadi de is rosas, megu a narai custa, est giai giai aguali e duncas dònnia domìnigu nc'ant a podi essi ispantus mannus, poita custu bollit narai, po primu cosa, ca dònnia domìnigu, eia, mi parit bastanti craru, podis binci e perdi contras a totus is aversàrius. Po custu naru giai, a is piciocus cosa mia, e si ddu arrepitu dònnia, dònnia borta chi s'atobiaus po is allenamentus, ca depeus cabai in campu cun s'atentzioni arta, po su chi fait, po su chi est possibbili, cun sa cuncentratzioni chi serbit, intzandus: custa è s'ùnica manera chi deu connòsciu po si ndi scabulli de is dannus chi ti ndi podint arribbai me is noranta minudus de giogu, me is noranta minudus de sa partida, cumenti si iat a podi narai, puru. S'ùnica cosa chi potzu isperai, in dì de oi, chi mi potzu augurai, cumenti si narat, est cussa de si ndi abarrai atesu, po su chi at a fai, po su chi at a essi possibbili, a su mancu, de is partis prus bascias, e prus callentis, de sa lista. Poita su de depi cumbati, dònnia giorronada, cun sa timoria de ndi cabai de categoria, est una cosa chi iat a podi strobbai, siat po su chi pertocat s'umori de is giogadoris e siat po su chi pertocat is cambas; ca po curri a forti iast a depi tenni sa conca sbuida de totus is pentzamentus lègius, e si cumprendit puru». 

Is de su Jerzu, in dì de oi, funt sighendi a trabballai, me is allenamentus pruschetotu, po circai de si cuncodrai in sa manera mellus chi podint po totus is partidas chi nc'ant a essi de giogai, a su mancu fintzas a s'ùrtima partida de su mesi de idas, chi at a essi su bintunu, una parighedda de diis ainnantis de su Nadali. 
«Seus circhendi de trabballai a forti meda, fadendi su contu ca is duas partidas chi eus dèpiu giogai, po su chi pertocat sa Cupa Italia de sa Promotzioni, s'ant strobbau, unu pagheddu, cun is allenamentus: candu tenis una partida de giogai, e si cumprendit beni, no podis fai fadiai is piciocus cosa tua me is allenamentus, est a narai ca no podis fai totu su trabballu ca, invècias, iast a bolli. Po su chi pertocat sa rosa chi is dirigentis de s'assòtziu ant pesau po cust'annu, seu prexau meda: apa a tenni sa possibbilidadi, s'ocasioni, de podi sighiri a curri, in custu campionau puru, cun totus is piciocus ca connosciu de duus annus, e chi sighint a abarrai in sa scuadra cosa nosta; immoi chi si connosceus, e chi issus sciint ita m'abertu, ita bollu biri in campu, intzandus su trabballu chi depu fai benit a essi unu pagheddeddu prus facili. Immoi depeus feti pentzai a giogai is partidas e a ndi cassai cantu prus puntus podeus, apustis, nareus in su mesi de gennàrgiu e de friàrgiu, eus a podi fai is contus po cumprendi innoi eus a podi arribbai. Ma ancora est chitzi, e si cumprendit». 





Attività realizzata col contributo della Regione Sardegna. IMPRENTAS 2024-2025. LR 22/2018 art. 22