Su campionau de s'Ecellenza est arribbau a sa de cincu giorronadas e is de su Budoni s'agatant a su primu postu de sa lista

E duncas, po custa cida puru, a cantu parit (de su chi ndi potzu cumprendi, chi mi permiteis de brullai unu pagheddeddu cun bosatrus o, po ddu nai mellus puru: chi mi permiteis de incumentzai s'artìculu cun una brulla!), nci seu e nci seus, est a nai ca sa vida sighit a andai ainnanntis po mei puru, e no potzu fai atru ca torrai gràtzias a su Cielu, fadendi su contu, est craru, ca oi stadeus beni ma de su chi at a sucedi s'incras nesciunu ddu podit sciri. E deu seu costumau a fai sèmpiri su pròpriu giogu, chi est cussu de circai de mi bivi dònnia segundu de sa giorronada circhedi de no nci fuiai su tempus chi mi nd'arribbat in regalu (diaici coxinu sa chistioni, diaici mi praxit a dda coxinai, chi si ddu depu narai cun atrus fueddus), circhendi de fai is cosas, is trabballus chi mi pertocant in sa manera mellus chi potzu, e circhendi de mi gosai, chentza de fai tropu tontesas, est craru, su tempus chi m'abarrat de mi bivi, scapiu, de su trabballu, est a nai, duncas, a trassa de cumenti si narat in italianu, su tempus libberu. 

E de su restu, gei ddu scieis mellus de mei puru cumenti andant is cosas in custu mundu, ca a si ingolli, e a si strupiai, bastat unu segundu; nci bolit pagu meda, cumenti si iat a podi narai. E de su restu, capitat, e meda meda bortas, puru, de si intendi mabi de una dì a s'atra: oi mancai ses cumbatendi, ddi nau diaici, cun sa vida cosa tua, cun is strobbus chi nd'arribbant, cun is trumentus po is cosas de pagai (po nd'arremonai una), e cras, mancai, ses bellu ca crocau in unu letu in un aposentu de un'uspidali, e mi parit de ddus intendi, is bècius chi bivint in bidda (e seu chistionendi, est craru, de Bidd'e Sorris, chi s'apu giai arremonau po unu bellu tanti de bortas, e chi est su logu innoi seu stètiu pàsciu in totus custus corantatres annus), chi si megant ca sa cosa de importu prus manna de totus est sa saludi (e no su dinai, mancai is giòvuneddus potzant pentzai s'imbressi), e fortzis no nc'est nudda de prus bidrinu de sa saludi cosa nosta (su fueddu "bidrinu" nd'arribbat deretu deretu de "imbirdi", chi est su modu ca teneus in sardu po chistionai de cussu chi, in italianu, si narat "vetro". E duncas candu manigiaus su fueddu "bidrinu", mi parit craru, chistionaus de una cosa chi si podit arrogai in centumilla arrogus, chi est, pròpriu, cumenti s'imbirdi). Ca seus fatus de ossus e, mescamente, de petza, de petza moddi (gei ddu scieis beni, de su restu) e in custu mundu nci funt centumilla modus po s'apuntorai, po s'amobadiai, ca unu, chi nci pentzat beni, arriscat de nci bessiri a foras de conca, cumenti si narat. Ma prus ca mi fai pigai de su disisperu, preferru (custu est su chi circu de fai deu, de bostrus ndi sciu pagu e nudda) a torrai gràtzias a su Cielu, cumenti de su restu apu fatu a s'incumentzu de custu artìculu etotu, po dònnia dì chi arrannèsciu, chi mi potzu bivi in paxi e cun su coru assebiau, in domu mia e no, mancai, torra, in unu uspidali. 

E chi calincunu de bosatrus, e duncas, chi calincunu tra cussus chi funt ligendi cust'artìculu est domandendusì giai ita nci potzat brintai (ita nc'apicigat, cumenti naràt fatu fatu sa bon'anima de mamma mia) totu su chi seu scriendi cun un artìculu chi ndi bessit a foras, chi ndi bessit a pilu, po ddu narai mellus puru, in unu giàssu chi sighit is chistionis, is fainas acapiadas a su giogu de su càlciu de is diletantis sardus, si potzu feti narai ca mi praxit, fintzas a m'amachiai, a mi strollicai unu pagheddeddu, ainnantis de incarrerai cun totus is novas. Ma custu giogu ddu fatzu feti me is artìculus in sardu. E apustis de m'essi strollicau, mi nci ghetu a fundu 'e susu, cumenti si narat, cun sa conchitedda lèbia lèbia, a arraxonai apitzus de totus is chistionis chi nd'arribbant de totus is campus de càlciu  chi ddoi funt spratus in totu sa Sardìnnia. 

Su trabballu cosa mia (e cosa nosta, chi a su contu nc'aciungu totus is collegas cosa mia puru) est cussu de sighirti is fainas acapiadas a su mundu de is diletantis sardus chi, nd'aprofitu po oi puru po si ddu arragodai torra (mancai ndi chistionaus fatu fatu meda), ndi cabant in campu (iant a depi cabai in campu, chi si praxit de prus cumenti sonat) feti po si spàssiai, po si spreviai apustis de una cida tostada e prena fintzas a cucuru de trabballus e de trumentus (po ddu narai diaici), e no ddu faint, custu est pagu ma seguru, po guadangiai surras mannas de dinai, cumenti invècias faint is professioneris, chi ndi cabant in campu po giogai, ma tenint sa fortuna de podi pigai su giogu de su càlciu cumenti chi fessit unu trabballu. E biaus issus, mi benit de pentzai puru, mancai sa vida po unu giogadori de bòcia no siat facili, est a nai, duncas, po torrai a su chi fia narendusì pròpriu ainnantis, in custu artìculu etotu, ca issus puru (cumenti a nosu, chi no prus de nosu) si podint strupiai in dònnia segundu de sa partida. E pròpriu in custas ùrtimas diis apu biu in cussu tialu de Facebook, cumenti seus costumaus a ddu tzerriai (chi manigiu feti, e si naru feti, po su trabballu, est a nai po fai pubblicidade, cumenti si iat a podi narai, a trassa, pròpriu, de s'italianu etotu, a is artìculus chi scriu, e chi ndi pesu, po su Diàriu Sportivu) unu giogadori, famosu meda, de su Real Madrid, chi s'est strupiau, e mabi puru, a su genugu, me is ùrtimus minudus de una partida chi fiat, tra is atras cosas, giai giai po acabbai. E benimindi prantu! Cumenti si iat a podi narai, fadendi su contu ca su giogadori de su Real Madrid est abarrau in terra, apustis de s'essi arrogau unu genugu, po unu bellu arrogheddu de tempus. E de su dabori fiat prangendi a trassa de notzenteddu, e no parit berus, tra is atras cosas, cumenti su dabori (o, chi si andat mabi, is daboris) nd'arribit po totus, giòvunus e bècius, poberus e arricus, mascus e femineddas. 

E duncas, torrendi a nosu, fatzu beni deu a torrai gràtzias a su Cielu po dònnia dì chi mi potzu bivi in saludi, chentza tropus strobbus e duncas chentza tropus daboris. 

E, torrendi a nosu, e duncas torrendi a sa chistioni chi fia circhendi de pigai ainnantis, chi calincunu de bosatrus est (ancora) domandendusì ita nci brintat totu su chi apu scritu fintzas a immoi cun unu giàssu chi sighit is partidas (e duncas is resultaus) tra totus cussas chi si giogant in su fini de cida in s'isula cosa nosta, si potzu narai feti ca me is artìculus chi ndi pesu in sardu (in su sardu chi si fueddat innoi in su Campidanu de mesu, e duncas innoi in Bidd'e Sorris), e feti po cussus chi ndi pesu in sardu, est craru (fadendi su contu ca aintru de sa cida ndi pesu un antru bellu tanti, seu chistionendi sèmpiri de is artìculus, si cumprendit berus est?), mi praxit a nci stichiri in mesu (o mi praxit a atacai, a ddu narai mellus) cun una pariga de stròllichiminis, e de contixeddus puru, mancai, tra totus cussus chi m'agatu, dònnia dònnia dì (chentza de ndi perdi nemmancu unu), badda badda in sa conca totu maca chi mi depu portai avatu in custa vida. 

E de su restu, scieis giai custu puru ma no est unu strobbu diaici mannu su de si ddu torrai a arrapiti, no sciu mai cali arrastu apa a pigai, calis ant a essi is legas chi apa a sighiri, ainnantis de mi ponni a scriri. Eia, ddoi funt, est craru, chistionis chi mi iat a praxi a pigai (ddi nau diaici), impari a bosatrus, ma s'ùrtimu fueddu (cumenti si narat in italianu etotu, de su restu) tocat a sa pagina bianca chi m'agatu aranti, a is manus e a is didus cosa mia e, duncas, a sa tialu de sa tastiera chi manigiu po trabballai. E chi nci pongiu totus custus strollichiminis (mi praxit a dda pentzai diaici, a su mancu) est po circai de ndi cassai s'atentzioni, puru, de totus cussas personas (e pentzu mescamente a is femineddas, ma no feti a issas, est craru) chi mancai no funt acapiadas a strintu cun is fainas, cun is storias de is assòtzius sardus de bòcia chi currint me is campionaus pesaus de is de sa Federarzioni Italiana de su Giogu de su Càlciu, impari, duncas, a is de sa Lega Natzionali de is Diletantis. 

E duncas, arribbaus chi seus a custu puntu de sa storia, no podeus fai atru ca andai ainnantis cun is chistionis chi si pertocant; e chi mi potzu permiti de nci stichiri un antru strollichimini puru (mi praxit custa cosa de giogai a si domandai su permissu, ca mi parit ca fadendu diaici no si ndi furu su tempus chi mancai nemmancu teneis, e si cumprendit, su tempus chi is personas s'arregallant ballit prus de s'oru, e estus a depi circai de no nci ddu fuiai a s'abiga, cumenti fia circhendi de si narai ainnantis, pròpriu in custu artìculu etotu): su de andai ainnantis (circhendi, mancai, de no torrai agoa) iat a depi essi su chi serbit a fai me in sa vida de dònnia dì puru, e no est una cosa, duncas, chi ballit feti po cust'artìculu. 
E duncas, su de andai ainnantis benit a essi una cosa de importu: est a nai, andai ainnantis chentza, mancai, de nc'arrui sèmpiri in su pròpriu stampu, de nc'arrui sèmpiri in su pròpriu sbàlliu, chi si praxit de prus cumenti sonat. E custa est una cosa chi mi capitat fatu fatu: nci funt periodus, longus puru, mancai, est a nai ca podint durai, mancai, po mesis e mesis, innoi mi parit de curri in s'arrastu deretu, est a nai chentza tropus dannus, chentza tropus arroris. Ma apustis, est berus puru ca bastat unu segundu, bastat a ponni mabi unu pei, bastat unu fueddu trotu, bastat a pentzai una tontesa (invècias de una cosa futa) e totu su chi as fatu in totu cussu tempus si ndi sciusciat a terra. Bastat a fai unu sbàlliu, mancai piticheddu, mancai una mesa tontesa (cumenti si iat a podi narai, puru) e t'agatas, torra, a su puntu de innoi fiast partiu annus e annus fait. Est cussu chi iat a podi sucedi, mancai, a cussus chi funt circhendi de serrai cun una storia, cun unu fitziu: mancai arrannèscis a fai a bonu po cidas e cidas de sighiu, chi ti parit, giai giai, de nd'essi sanau de cussu dannu, de cussu mabi chi no t'at lassau in paxi po una vida intera, ma poi abbastat unu segundu (unu segundu feti) po ndi sciusciai totu su trabballu bonu. E duncas, su chi mi arrapitu fatu fatu meda, est chi no bastat una vida po cumprendi cumenti si cumportai, e candu ddu cumprendis, depis trabballai, e meda puru, po bivi in sa manera giusta, ma apustis, bastat unu sbàlliu e depis torrai a incumentzai a fai totu de bellu e nou, cumenti si narat, e, mancai, cun s'umori asuta de is peis. Po diventai santus, est cussu chi m'arrapitu fatu fatu, no bastat una vida intera (e fortzis fortzis iant a serbiri tres o cuatru vidas, e fortzis fortzis nemmancu iant a bastai, a segunda de su chi depeus fai), ma po nci fuiai totu su trabballu a s'abiga bastat unu mesu segundu. E custa, chi si depu narai sa beridadi, est una de is cosas chi mi donant is trumentus prus mannus in custa vida. E pròpriu po custu (e immoi dda serru puru, e fiat ora, s'at a megai calincunu de bosatrus), torru gràtzias a su Cielu po totu is diis innoi arrannèsciu a mi cumportai beni, chentza de perdi su tempus avatu de is centumilas tontesas chi ddoi funt in custu mundu. 

A nai sa beridadi, ainnantis de mi ponni a arraxonai impari a bosatrus apitzus de is novas chi nd'arribbant de su mundu de is diletantis sardus, apustis de un antru fini de cida prenu, fintzas a cucuru, de partidas (e de su restu, gei ddu scieis cumenti andant is cosas: ddoi funt partidas giai dònnia dì de sa cida...), mi iat a praxi (cumenti fatzu sèmpiri, de su restu, cumenti chi fessit unu ritu, cumenti si iat a podi tzerriai sa cosa, a trassa de s'italianu etotu) a chitionai un antru pagheddeddu de su tempus: su tempus chi est fadendi, po incumentzai, e su tempus chi passat, po serrai sa chistioni (e custa borta po diaderus, a su mancu po s'artìculu de custa cida). 

E duncas, de su chi ndi potzu cumprendi castiendi su tialu de su calendàriu (e mi praxit, fintzas a m'amachiai, custa cosa de podi brullai unu pagheddeddu cun bosatrus), seus arribbaus a su dexi de su medi de Ladàmini, e custu bollit nai ca giai giai sa metadi de su mesi si dda seus giai scroxada, e mi fait prexei candu su tempus sighit a curri (e a bortas mi parit ca currat allestru meda...), chentza de mi donai tropus strobbus. E mi intendu, diaderus, basau de sa sorti bona, cumenti si iat a podi narai. E de su restu (si ddu apu giai scoviau me is cidas passadas), su mesi de Ladàmini, a su mancu po mei (de bosatrus ndi sciu pagu e nudda), est su mesi prus druci tra totus cussus chi ddoi funt in s'atonzu, e in totu s'annu puru: at a essi ca is temperaduras funt bonas (est a nai ca no fait tropu basca, cumenti capitat de si bivi in s'istadi, e no fait nemmancu su frius chi, mancai, si tocat a sumportai me is mesis de Idas e in cussu de Gennàrgiu e de Friàrgiu), at a essi ca mi potzu permiti de papai unu pagheddeddu de totu su chi bollu (est a nai ca no depu sighiri dietas, cumenti invècias apa a depi fai de sa primu dì de su mesi de Donniassantu, ma custa est un'antra chistioni ancora, e deu creu chi eus a tenni su modu, su tempus e s'ocasioni po ndi chistionai mellus puru, in totus is cidas chi ant a arribbai, de innoi fintzas a sa dì de su Nadali), e duncas, mi ia depi intendi cun su coru prenu, fintzas a cucuru, de prexu e de afròddiu. Ma a nai sa beridadi, mi intendu unu pagheddeddu sganiu (est a nai, duncas, cun pagu gana in cropus) e no sciu chi siat curpa (po ddu narai diaici) de is temperaduras chi est fadendi, ca medas diis pareus ancora in s'istadi, ma atras diis (cumenti est sucèdiu, de su restu, pròpriu custu martis passau) pareus giai giai in mesu in mesu a s'ierru, fadendi su contu ca est incumintzendi a fai bellas passadas de acua (cumenti si megant is massajus innoi in bidda mia etotu), e s'acua, po sa caridadi e po s'amori de Deus, serbit, no feti a is ominis, ma puru a is matas e a is atrus animabis. E sa cosa de importu (cumenti s'est megada sa picioca chi trabballat in su forru de su pani chi tèngiu pròpriu a su costau de domu mia etotu) est chi no apat fatu dannus, a su mancu innoi in Bidd'e Sorris is cosas si funt andadas beni, mancai su tempus fessit mau meda, cun unu bentu fridu e forti chi pariat ndi podessit fai bobai is matas e is domus puru, de unu segundu a s'atru. Ma gràtzias a Deus, ddi nau diaici, su tempus mau po custa cida puru est bellu ca scaresciu, e immoi in totus is diis chi nd'ant a arribbai (chi su Cielu at a bolli custu beni po mei puru e po bosatrus, nci iat a mancai atru puru) nc'at a essi torra unu bellu sobiteddu, e una bella basca. E difatis is chi andant a circai codrobius funt incumintzendi a pentzai a totu is codrobineddus chi ant a agatai in custu fini de cida. 

E duncas, podeus andai ainnantis, po diaderus, cun su coru prenu de isperas bonas. 
E duncas, arribbaus a custu puntu de sa chistioni, deu creu ca sa cosa mellus chi potzu fai est cussa de incumentzai a si chistionai de totus is novas de importu prus mannu chi nd'arribbant de su mundu de is diletantis sardus. E po s'artìculu de custa cida (chi est su segundu, a fai is contus nci poneus pagu meda, po su mesi de su Ladàmini) atacu a si chistionai de is de s'Olbia, chi currint in su campionau de sa Sèrie D, apustis de nd'essi cabaus (e custa cosa est sucèdia pròpriu in sa stagioni de s'annu passau, est a nai, si cumprendit beni, cussa de su duamilla e bintitres – duamilla e binticuatru) de su campionau de sa Sèrie C. E duncas, is cosas po is de s'Olbia (chi podeus furriai cun "Terranoa" puru, chi si praxit de prus cumenti sonat), mancai no ndi chistionaus meda, a su mancu me is artìculus chi ndi pesu in sardu (ma oi circaus de recuperai totu su tempus chi eus pèrdiu), no funt andendi beni, o, a su mancu, no funt andendi beni cumenti is dirigentis (e is tifosus, puru) podiant bisai, fadendi su contu ca is de s'Olbia, in custas primus cincu bessidas, funt stètius bonus, ddi naru diaici, a ndi cassai feti unu puntixeddu, e po immoi s'agatant in s'ùrtimu postu de sa lista. 
E duncas, scieis cumenti andant is cosas me in su mundu de su càlciu: candu calincuna cosa no funtzionat beni, o no andat cumenti bisàst, intzandus su primu chi depit pagai su contu (ddi naru diaici, isperendi chi si cumprendat su chi si bollu narai) est pròpriu s'allenadori. E is de s'Olbia po cust'annu iant scerau de donai is crais de sa scuadra me is manus de Marco Amelia, chi medas de bosatrus s'ant a arragodai, me is tempus innoi giogàt ancora, cumenti unu de is portieris prus fortis chi tenestus, chi ddoi fiant, po ddu narai mellus puru, in Italia e duncas in sa Sèrie A (chi est, est craru, su campionau de importu prus mannu tra totus cussus chi si giogant in Italia), fadendi su contu chi Amelia, tra is atras cosas, iat giogau puru in sa Natzionali, e at fatu parti de sa scuadra natzionali ca in su duamilla e bintises iat bintu su mondiali. E duncas, seus chistionendi, de seguru, de unu de is giogadoris prus fortis chi nci funt stètius in Italia me is ùrtimus annus, e duncas, no seus chistionendi, custu est pagu ma seguru, de s'ùrtimu arribbau, cumenti si iat a podi narai e cumenti apu intèndiu sèmpiri narai in bidda mia. Ma si sciit beni (e bosatrus, fortzis, ddu scieis mellus de mei puru, ca a bòcia no apu mai giogau, ma m'est tocau a ndi scriri...) cumenti andant is cosas me in su mundu de sa bòcia: tui podis essi forti cantu bolis, podis essi stètiu unu de is giogadoris prus fortis (cumenti fiat Amelia, de su restu), ma apustis, candu ti setzis in una panchina (cumenti dda tzerriaus, a trassa de s'italianu etotu), po sighiri una scuadra de càlciu, is cosas si iant a podi fai prus tostadas, e marigosas, de su chi podis pentzai. E duncas, dexi diis fait (prus o mancu) is dirigentis de s'Olbia ant decìdiu de nci bogai Marco Amelia, isperendi ca sa scuadra si ndi podessit scidai. Me in sa partida chi ant giogau sa cida passada, difati, a sighiri sa scuadra de s'Olbia in sa partida contras a is de su Real Monterotondo, in sa panchina ddoi fiat Mario Isoni, chi est s'allenadori chi sighit is trabballus de sa scuadra de is piciocus Under 19 (est a nai, sa scuadra pesada cun totus is piciocheddus chi no tenint prus de dexennoi annus de edadi, seu seguru chi nc'arribbais a solus puru, ma deu seu innoi pròpriu po si donai una manu). E pròpriu candu seu scriendi custu artìculu, duncas (e apu atacai a ddu scriri su noi de su mesi de Ladamini, chi fiat de mercuis, mancai s'artìculu nd'at a bessiri aforas feti su dexi, ma cumenti narat, e beni meda, su dìciu: chini tenit su tempus po fai is cosas no depit abertai, no iat a depi abertai a cras po ddas fai), is de s'Olbia ant fatu sciri a is giornalistas chi ant agatau s'acòrdiu cun Lucas Gatti, unu piciocu nàsciu a Buenos Aires (duncas est argentinu) in su milli e noicentus setantotu, ma chi bivit in Roma de calincuna cosa cumenti a dexi annus. Gatti at tentu su modu de sighiri is trabballus de is scuadras de giòvuneddus prus fortis chi ddoi funt in Italia, e apustis at trabballau in Inghilterra, impari a is piciocus de s'Under 23 de is de su Bromley. Gatti chistionat beni meda su spagnolu, s'italianu e s'ingresu puru (e gei si cumprendit su poita) e si nc'est fuiau a fundu 'e susu, cumenti si narat in bidda mia candu calincunu fait una cosa, unu trabballu cun afròddiu mannu, in s'aventura nova impari a is de s'Olbia. Su babbu de Lucas Gatti, fait a narai custu puru, immoi chi nci seus, at giogau in sa Sèrie A de s'Argentina (chi si tzerriat "Primera Division", si ddu nai po essi prus pretzisu puru, ca unu giornalista depit essi pretzisu chi bolit fai beni su trabballu cosa sua, est craru) po calincuna cosa cumenti a bintises annus (at giogau calincuna cosa cumenti a setecentu e sessantacincu partidas, e no nc'est stètiu ancora nesciunu giogadori chi nd'apat giogau prus de isssu), cun sa camisedda de is de s'Argentinos Juniors, e apustis at giogau puru in Europa, impari a is de su Dundee, in Scozia, e in Spagna impari a is de su Badajoz. Immoi Gatti at a depi sighiri sa scuadra nova cosa sua in sa partida chi is de s'Olbia ant a depi giogai in domu allena (cumenti si iat a podi narai, e cumenti seu narendi, de su restu) contras a is de su Cassino, chi in dì de oi s'agatant a su primu postu de sa lista po su chi pertocat sa Lista G. E nosu (partendi de mei etotu, est craru, e megu a brullai, torra, isperu chi si cumprendat) no podeus fai atru ca ddi fai is augùrius prus bonus. 

E immoi chi seus arribbaus a custu puntu de sa chistioni, deu creu ca sa cosa mellus chi podeus fai est cussa de andai a castiai, impari, est craru (e sèmpiri chi ndi teneis gana...) cumenti funt andadas is cosas po su chi pertocat su campionau de s'Ecellenza, ca custu domìnigu chi est giai giai po nd'arribbai at a bivi sa de cincu giorronadas de candu est incumentzau. E duncas, tra is resultaus chi ant fatu is ispantus prus mannus, nc'est de seguru sa bìncida chi nd'ant cassau is de su Muristeni, chi funt arrannèscius a ndi cassai is tres puntus in sa partida chi ant giogau in domu de is cabonischeddus de su Tèmpiu (chi no iant ancora pèrdiu nemmancu una partida fintzas a custu fini de cida passau), cun su resultau, togu meda, de duus a zeru. Is de su Tèmpiu, duncas, ant dèpiu narai adiosu, cumenti si narat, a su primu postu de sa lista; a su primu postu de sa lista, invècias, immoi agataus is de su Budoni, chi ant bintu sa partida, una de cussas de importu prus mannu tra totus cussas chi si funt giogadas po sa de cuatru giorronadas, contras a is de s'Ossese. Totu beni, duncas, po is de sa Nuorese e de s'Alighera puru: is primus funt arrannèscius a binci sa partida, in domu cosa insoru etotu, contras a is de su Ilartzi, cun su resultau, tundu tundu, cumenti si narat fatu fatu, de cuatru a unu; is segundus, chi funt is grogus-arrùbius de s'Alighera (gei si cumprendit, deu creu) funt arrannèscius a binci in domu de is de su Bidd'e Cresia, cun su resultau de duus a unu. Sighit a curri su Crabònia puru, chi est arrannèsciu a fai tres gol (e no funt pagus de seguru) contras a is meris de domu de su Barisardu (una de is scuadras chi ddoi funt in dì de oi in Barì, antzis, iat a fai a narai ca est sa scuadra prus manna tra totus cussas chi ddoi funt in Barì in dì de oi); tra is atras cosas, is de su Taloro de Gavoi, chi no ant ancora pèrdiu nemmancu una partida, funt arrannèscius (e fiat ora puru, s'ant a megai is tifosus cosa insoru) a binci sa primu partida de su campionau nou, cun su resultau de tres a duus, contras a is de su Calanzanos. Primu partida bìnta, in su campionau de su duamilla e binticuatru - duamilla e binticincu, po is de su Crabonaxa puru, cun su resultau de unu a zeru, scutu a faci (m'est bèniu de ddu narai diaici) a is de su Santu Tiadoru. Is de su Santu Tiadoru, si ddu naru immoi chi nci seus, s'agatant duncas a s'ùrtimu postu de sa lista, fadendi su contu ca is tattaresus de su Li Punti ndi funt torraus a domu cun unu bellu puntixeddu in buciaca, apustis de essi serrau sa partida in domu de is casteddaius de sa Ferrini cun su resultau de zeru a zeru, e duncas, sa partida s'est serrada chentza nesciunu gol. 

Sèmpiri chi seis de acòrdiu cun mei, arribbaus a custu puntu de s'artìculu podeus andai a castiai, puru, cumenti funt andadas is cosas me is duas listas chi ballint po su campionau de sa Promotzioni, partendi, duncas, de sa Lista A. 

A su primu postu de sa lista, cun trexi puntus in totu in buciaca, agataus is aristanesus de sa Tharros, chi custu fini de cida passau (funt cabaus in campu de domìnigu, a bolli essi pretzisus) funt arrannèscius a binci in domu de is cuartesus de su Sant'Aleni cun su resultau, bellu e tundu tundu, de cuatru a unu. A su segundu postu de sa lista, e cun feti unu puntixeddu in mancu de is chi tenint is biancus-arrùbius de sa Tharros, agataus is de sa Villacidrese (sa scuadra, est craru, de Biddacidru, pesada de su presidenti Marrocu), chi pròpriu custa cida passada at bintu sa de cuatru partidas in custu campionau, gràtzias a su tres a unu chi nd'ant pesau, in domu cosa insoru (est a nai, duncas, aranti a is tifosus cosa insoru) contras a is de s'Orrolese (sa scuadra de Arrolli), sighida po cust'annu puru de Marcu Marcialis. A su de tres postus agataus invècias duas scuadras: is ollastrinus de su Lanusè e is de su Cus de Casteddu (chi est sa scuadra chi ndi pesant, dònnia annu, is de s'universidadi de Casteddu): is primus nd'ant cassau sa de tres partidas bintas in custas primus cincu bessidas gràtzias a s'unu a zeru chi nd'ant pesau in sa partida chi ant giogau in domu de is campidanesus de s'Uda; is segundus funt arrannèscius a binci in sa partida contras a is de su Bidda Matzraxia. Is de s'Atleticu de Casteddu, sighius de un allenadori bonu e bravu, e d'esperièntzia manna cumenti est Antonio Madau, si funt dèpius acuntentai, po modu de narai, est craru, de feti unu puntixeddu, chi funt arrannèscius a ndi boddiri in sa partida, de importu mannu meda, e meda dificili, a narai is cosas cumenti funt, chi ant dèpiu giogai in domu de is de su Tortolì. Is casteddaius de s'Atleticu, duncas, in dì de oi tenint sèmpiri tres puntus in prus de is chi tenint is ollastrinus. In mesu in mesu a is duas scuadras, a su de ses postus in sa lista, agataus is de su Castiadas, sighius de Fenza, chi funt andaus a sbati (ddi nau diaici, isperu chi si cumprendat su chi bollu narai) apitzus a is de s'Idolo, sa scuadra de Arthana, cun sa partida chi s'est serrada cun su resultau de unu a zeru. Prexu mannu (prexu a is isteddas, si iat a podi narai diaici) po is de su Ceraxius puru, chi nd'ant bogau aforas sa bìncida prus tunda, e bella, tra totus cussas chi ndi funt arribbadas in sa de cincu giorronadas, gràtzias a su cincu a unu chi ant scutu in faci a is de su Guspini, cun is meris de domu chi in dì de oi tenint giai seti puntus postus in buciaca. Cun cincu puntus, est a nai duus in manu, agataus is de s'Atleticu de Masainas, chi ant pèrdiu in domu contras a is de su Terralba Frantziscu Bellu, chi, de su chi ndi podeus cumprendi, funt una de cussas scuadras chi currint po ndi cassai s'artziada in su campionau de s'Ecellenza, ma po immoi no funt currendi diaici a forti cumenti si podestus abertai, fadendi su contu ca nci funt arrutus giai po tres bortas (est a nai, duncas, chi ant pèrdiu giai tres partidas) e ant bintu sa primu partida in campionau pròpriu in sa bessida de su fini de cida chi si seus lassaus a is pabas. Unu puntu a cada unu, duncas, in sa sfida tra is meris de domu de s'Arborea e is allenus de su Pirri, sighius, po cust'annu puru, de Busanca. 

Po su chi pertocat sa Lista B, e seus chistionendi sèmpiri, est craru, de su campionau de sa Promotzioni, a su primu postu agatsus is de su Bonorva, sighius de s'allenadori nou (nd'est arribbau pròpriu in s'istadi) chi est Michele Pulina, cun doxi puntus in buciaca: is biancus-arrùbius funt stètius bonus a binci sa partida chi ant giogau in domu cosa insoru custu sabudu passau (totus is scuadras de sa Lista B funt torradas a cabai in campu de sabudu, e immoi custu sabudu chi nd'at a arribbai, si ddu naru immoi chi nci seu, at a tocai sa pròpriu cosa a totus is scuadras de sa Lista A, chi eus arremonau pròpriu immubagora) contras a is de su Istintinu, cun sa partida chi s'est serrada cun su resultau, togu e bonu meda, de tres a zeru. Is de su Bonorva tenint feti unu puntixeddu in prus de is chi tenint is de su Buddusò, chi currint sighius de Ferrucio Terrosu, chi est s'allenadori de sa scuadra, si cumprendit beni; in s'ùrtima bessida, duncas, is de su Buddusò funt arrannèscius a binci, cun su resultau de unu a zeru, sa partida contras a is de su CastedduSardu, sighius, invècias, de Antoniu Borrotzu. Is de su CastedduSardu, duncas, in dì de oi s'agatant a su de tres postus de sa lista, cun dexi puntus in totu. Cun noi puntus agataus duas scuadras: is de su Coghinas, chi peròu funt torraus a domu cun feti unu puntixeddu in buciaca, apustis de essi serrau cun su resultau in paridadi sa partida, sa isfida in domu de is de s'Ovodda, cun su resultau, togu meda e spassiosu, custu est pagu ma seguru, de duus a duus; cun noi puntus agataus puru is de su Logusantu, chi peròu sabudu passau nci funt arrutus, e mabi puru, fadendi su contu chi ant pèrdiu sa partida cun su resultau de tres a unu, in domu de is de s'Atleticu de Bono. Totu beni, invècias, po is de s'Usinese, chi apustis de nd'essi ingotu una bella surra (si narat diaici puru po is chistionis chi pertocant is partidas) in domu de is de su CastedduSardu, funt torraus a curri, e a forti puru, gratzias a su tres a unu chi nd'ant pesau, chi funt arrannèscius a ndi pesai, po ddu narai mellus, in sa partida chi ant giogau in domu cosa insoru, contras a is de sa Montalbo de Thiniscole. Is tattaresus de sa Lanteri, invècias, nd'ant cassau sa segunda partida binta in custu campionau, gràtzias a s'unu a zeru chi ant scutu a faci a is de s'Altzaghena. Giorronada toga meda, e druci cumenti a su tzucuru (cumenti naràt fatu fatu una tzia de sa bon'anima de mamma mia), po is de su Sènnaru, chi ant bintu in domu cosa insoru, cun su resultau de duus a unu, contras a is de s'Abbasanta, chi in dì de oi funt arrannèscius a ndi cassai feti unu puntixeddu. E pròpriu custu sabudu passau nd'est arribbada sa primu bìncida po is de sa Macomerese puru, sighius de un allenadori de esperièntzia manna cumenti est Pierluigi Scotto, chi funt arrannèscius a binci, in domu cosa insoru etotu, cun su resultau de unu a zeru, contras a is de su Bosa, sighius sèmpiri, e custa cosa sighit a andai ainnantis de medas annus (ant a essi calincuna cosa cumenti a dexi, chi no de prus puru), de Salvatori Carboni. Serraus is contus acapiaus a sa Lista B de su campionau de sa Promotzioni cun su duus a duus chi nd'est bessiu aforas tra is de su Tuttavista, sa scuadra chi nd'ant pesau in Garteddì, e is de su Tonara, cun is nieddus-arrùbius chi s'agatant, in dì de oi, cun feti unu puntixeddu in buciaca (chi ballit, est craru, po s'ùrtimu postu in sa lista); is de su Tuttavista, invècias, tenint tres puntus in totu, chi ndi funt arribbaus gràtzias, pròpriu, a is tres partidas chi funt stètius bonus a serrai cun su resultau siddau (cumenti si narat in Bidd'e Sorris, cumenti apu sèmpiri intèndiu narai, a su mancu, de candu femu unu pipieddu piticcu) in paridadi. 

E duncas, torru a atacai a scriri s'artìculu in sardu candu su calendàriu narat ca seus lòmpius, puru, e gratzias a su Cielu (gràtzias a Deus, o gràtzias a su chi boleis e chi si benit mellus) a su dexi de su mesi de Ladàmini. A nai sa beridadi, de novas de si torrai a contai nci ndi funt a muntonis (cumenti si iat a podi narai), ma a nai sa beridadi (torra), tèngiu sa conca prena, fintzas a cucuru, de strollichiminis. Nci pentzu fatu fatu, de su restu, chi pròpriu si ddu depu scoviai: s'artìculu chi ndi pesu in sardu e chi ndi bessit aforas dònnia giòbia (chentza de ndi perdi nemmancu unu, mi parit craru) po immoi (e da calincuna cosa cumenti a dexi annus) fait parti de is chi seus costumaus a tzerriai "Novas de Diàriu", ma in sa conca mia, a su mancu (in sa conca mia po incumentzai, chi si praxit de prus cumenti sonat) sa faina est incumintzendi a pigai su nomini de "contus e contixeddus", poita, de su restu (e chi eis lìgiu a su mancu un articulu in custus ùrtimus dexi mesis gei ddu eis cumprèndiu beni), impari a is novas chi pertocant su mundu de sa bòcia in Sardìnnia, ddoi agatais una biga manna de strollichiminis (diaici mi praxit a ddus tzerriai a su mancu, giochendi a fai su poeta, ma feti po unu pagheddeddu, ca su trabballu cosa mia, de su restu, est cussu de fai su giornalista!). E mi praxit a pentzai ca is artìculus chi ndi pesu po is amigus de su Diàriu Sportivu iant a podi balli, mancai in su benidori, po un antru giàssu puru chi, mancai, no est acapiau feti a su giogu de sa bòcia. E custu no bollit narai, est craru (ma no potzu mai essi seguru de essi bastanti craru), ca m'agatu mabi a trabballai po su Diàriu Sportivu, ma in sa vida no podeus mai sciri cumenti andant is cosas. 

E immoi chi nci seu (e fadendi su contu ca seu po spaciai su logu e su tempus po si scriri, antzis, a narai sa beridadi est giai bellu ca spaciau), serru cun custu contixeddu: a s'incumentzu de custu artìculu etotu s'apu chistionau de cumenti, in sa vida de s'omini, podit sucedi de totu, e sa chistioni ballit po dònnia dì chi su Cielu s'arregalat. E duncas, ariseu a su noti (cumenti scieis seu costumau a lìgi calincuna paginedda de unu libru ainnantis de mi nci fuiai a letu po dromiri), apu agatau, nemmancu a ddu fai aposta, una frasia toga meda, de Martinu Heidegger, chi si megàt ca sa vida de s'omini in custu mundu est filla, ddi naru diaici, de sa possibbilidadi: sa libbertade, duncas, nd'arribbat gràtzias a sa possibbilidadi chi teneus de fai is isceberus; est pròpriu sa possibbilidadi chi teneus de fai una cosa, de no dda fai o de fai a s'imbressi, chi si donat sa dignidadi de bivi cumenti a ominis (e no cumenti a bestias). E in cussu chi tzerriaus "possibbilidadi", e duncas tra totus is cosas chi si podint sucèdiri, nci depeus ponni (e cun custu m'acapiu, pròpriu, a cussu chi megamu a si narai a s'incumintzu de custu artìculu etotu) su beni e su mali, in partis agualis (chi arrannèsceis a sighiri su chi seu circhendi de si nai) e tra is atras cosas, nc'aciungit sèmpiri Heidegger, nci depeus ponni, in su contu de totu is possibbilidadis, sa morti puru, ca de su restu est s'ùrtimu fueddu (ddi nau diaici) in sa vida de una persona, chi donat dignidadi a sa vida etotu. E custu, duncas, po nci stichiri un arrogheddu de filosofia puru in s'artìculu de custa cida, chi est una de is cosas chi mi praxit a fai de prus in custa vida (megu a chistionai de sa filosofia, si cumprendit, berus est?)

E po custa cida puru, a cantu parit, de su chi ndi potzu cumprendi, seus arribbaus, seus lòmpius a sa fini. Mi ndi rendu contu chi, mancai, custa cida s'apu chistionau pagu de bòcias e de resultaus e de is partidas, ma chi su Cielu bollit custu beni po mei, apa a circai de mi fai balli, mellus de su chi seu arrannèsciu a fai custa cida, tra seti diis. 
E sèmpiri chi Deus at a bolli. 
In s'interis, si imprassu a forti.



Attività realizzata col contributo della Regione Sardegna - IMPRENTAS 2023-2024. LR 22/2018, art. 22