Is ùrtimas partidas de sa stagioni: is de s'Antiochense bincint contras a is de su Fonne; festa manna po is de su Golfu Aranci; is de s'Ilva de Sa Maddalena sighint a bisai s'artziada in Sèrie D

E duncas, a cantu parrit, de su chi potzu biri e de su chi ndi potzu cumprendi (e megu a brullai, est craru) seus arribbaus puru a su de ses mesis de s'annu: e duncas, eia, ddu podeus narai a forti puru: su mesi de lampadas est incumentzau de una pariga de oras e deu isperu po bosatrus ca is cosas si siant andendi beni (bastanti beni, a su mancu) e chi sa saludi no s'ammanchit (ca candu ammancat sa saludi, cumenti narant is bècius, ma no feti is bècius, intzandus nd'arribbant is arroris, is dannus, is problemas mannus). 

E duncas, po su chi mi pertocat, e po su chi pertocat is chistionis chi nd'apa a bogai aforas in s'artìculu de custa cida (sa primu cida de su mesi nou), si potzu incumentzai a narai ca apu incumentzau, apu atacau a ddu scriri, a ddu pesai, candu fiat su martis, su duus de su mesi de lampadas, ca cumenti eis a sciri beni, est dì de festa (sa dì de sa Repubblica, diaici seus costumaus a dda tzerriai), ma cumenti mi capitat de fai fatu fatu me is diis de festa (e mescamente me is diis de festa chi nd'arruint in s'istadi), deu mi pongu a trabballai unu paghededdu, ca po oi, a su mancu, m'est pigau diaici: at a essi ca mi seu intèndiu debbili fintzas de is primus oras de sa dì (a bortas, de su chi mi parrit de cumprendi, nci funt diis trotas e diis bonas, e oi fortzis est stètia una dì cun pagu bona sorti), cun pagu gana (e cumenti nd'arribbat sa basca, est una cosa chi mi sucedit, chi mi podit sucedi, e duncas no nc'est su tanti po tzerriai agitoriu) e candu m'agatu a mi bivi, a mi scroxai diis diaici, intzandus su chi mi benit a beni a fai est de mi nd'abarrai chietu (po su chi fait), e de circai de no nci fuiai a travessu (a prasoni, si iat a podi narai diaici puru) is energìas chi nemmancu tengu, chi nemmancu mi intendu in cropus. 
E gei m'at a passai, mi megu a solu a solu, fadendi su contu ca apu drommiu prus de su tanti chi fatzu a su normali, in su fetianu, e dònnia tanti mi sucedit custu puru, e tocat a tenni passièntzia candu mi pigat diaici, tocat a aturai selenus, po su chi fait, e abertai ca sa dì acabbit; est a narai, ca tocat a abertai ca su sobi, po oi puru (diaici giogu unu pagheddeddu a fai su poeta, prus ca su giornalista sportivu), ndi cabit a is pabas de is montus chi nci funt in Biddacidru (chi est su chi biu candu est po scurigai, de sa bidda innoi seu nàsciu e pàsciu, e chi est Bidd'e Sorris; e duncas, eia, po si du spiegai mellus puru, su sobi ndi cabat concas a su Monti Mannu, diaici seus costumaus a ddu tzerriai); e candu su sobi ndi cabat e incumentzat a scurigai (ca tra is atras cosas est unu fueddu, unu verbu chi mi praxit meda, ma meda), intzandus mi intendu prus selenu puru, poita intendu pròpriu sa dì chi spaciat, e intzandus mi intendu assèbiau, e in custu perìodu, cantu incumentzat a scurigai, su cielu si prenit fintzas a cucuru de arrondibis ca bobant arresenti arresenti a is crabeturas de is domus, o fintzas arresenti arresenti a sa bia; e diaderus, est una de is cosas ca mi prenint su coru de paxi, e mancai, sa maghia at a arribbai (ddi naru diaici) custu merì puru, ca est cussu chi isperu, a su mancu. 
E chi megu a trabballai oi puru, in dì de festa, ddu fatzu cun sa ispera de no depi trumentai prus de su tanti crasi, chi at a essi mercuis, e chi at a essi sa dì innoi eus a torrai totus a trabballai (e a scola, po su chi pertocat is piciocheddus), fadendi su contu ca ariseu, ca fiat lunis (sa primu dì de su mesi de lampadas) medas funt abarraus in vacantza (chi mi permiteis de manigiai custu fueddu) e ant fatu su "ponti" (cumenti si iat a podi narai, a trassa de cumenti naraus in italianu etotu), fadendi su contu ca nci fiat s'ùrtimu fini de cida de su mesi de maju in mesu in mesu, e duncas, eia, calincunu at fatu totu una tirada de festas (e de pàsiu) de su cenabara fintzas a custu merì. 
Ca su de si pigai unu pagheddeddu de pàsiu, est craru, benit a essi una cosa de importu mannu, mescamente immoi in s'istadi, e mescamente candu incumentzat a nd'arribbai sa basca. 

E immoi chi nci seu, andaus a castiai, unu pagheddeddu (cumenti fatzu dònnia cida, de su restu) cumenti funt andadas is cosas po su chi pertocat su tempus, e mescamente po is temperaduras: e duncas, eia, fait a narai puru ca sa basca est incumintzendi a nd'arribbai, totu paris puru, fadendi su contu ca custa cida su tialu de termometru est arribbau a tocai (ddi naru diaici, isperendi ca nesciunu de bosatrus tengiat calincuna cosa de murrungiai po su fueddu, po is fueddus chi apu scerau de manigiai) prus de trinta e de trintunu gradus puru; e poberus cussus piciocus (e tra pagu nc'eus a arribbai a pigai sa lega, a pigai sa chistioni) chi in custu fini de cida passau ndi funt dèpius cabai in campu po giogai is ùrtimas partidas (e megu a narai diaderus: funt stètias, 'tendei 'tendei, is ùrtimas isfidas) po su chi pertocat sa stagioni de su duamilla e binticincu – duamilla e bintises, ca no depit essi stètia una cosa facìli, giogai cun trintacincu gradus apicigaus apitzus (ddi naru diaici, torra, gioghendi a fai prus su poeta ca su giornalista sportivu, e mi ndi rendu contu a solu; ma isperu ca sa cosa no si dispraxiat, isperu ca sa cosa, e is fueddus chi apu scerau, no si dispraxiant tropu, a su mancu), e megu a chistionai, mescamente, de is de s'Antiochense e de is de su Fonne, chi si funt agataus is unus aranti a is atrus po giogai sa partida finali po su chi pertocat su campionau de sa Primu Categoria, e sa pròpriu cosa est tocau a is de su Golfu Aranci, ca ant giogau s'ùrtima partida po su chi pertocat su campionau, po su chi pertocat su mundu de sa Segunda Categoria, contras a is paulesus de su La Salle. 

E duncas, po custa cida s'apu giai fatu sa conca a acua fadendi su contu de su tempus chi si seus lassaus a is pabas (est a narai, su mesi de maju est bellu ca scroxau), e de su tretu chi eus fatu, po immoi, in su mesi de lampadas (e chi Deus at a bolli custu beni po mei, e po nosu, eus circai de nc'arribbai fintzas a su trinta, chi at a essi s'ùrtima dì po su chi pertocat su de ses mesis de s'annu, e nd'at a arrui de martis etotu, tra is atras cosas), e apu acutu, giai, a si chistionai puru de su tempus chi est fadendu, e duncas, eia, nc'est su tanti po si narai ca si nci podeus fuiai a fundu 'e susu me is chistionis de importu prus mannu chi ndi lompint de is campus innoi si funt giogadas is ùrtimas partidas de sa stagioni (cumenti s'apu arremonau pròpriu immubagora, de su restu), chentza de si ndi scaresci ca cumenti si frimant is bocias (e duncas, cumenti acabbant is partidas) intzandus is scuadras incumentzant (atacant, si iat a podi narai puru), acoitu e cun gana bona, a trabballai po cuncodrai is rosas po sa stagioni chi nd'at a arribbai, po sa stagioni chi at a benni, e chi at a essi, est craru, cussa de su duamilla e bintises – duamilla e bintiseti (e sèmpiri po sighiri a fai su contu de su tempus chi sighit a curri, e mancu mali, mi megu a solu a solu, ca su tempus sighit a andai ainnantis po mei puru, mancai custu bollat narai, puru, su de depi imbeciai, chi no est una cosa chi megu a timi, in dì de oi a su mancu, chi pròpriu si depu narai sa beridadi). 

E duncas, nc'est su tanti po si narai ca, eia, po custa cida puru eus a tenni unu bellu pagheddeddu de legas po preni cust'artìculu, chi ndi pesu in sardu (in su sardu chi si fueddat innoi in su Campidanu de mesu) cumenti fatzu dònnia cida, de su restu, chentza de ndi sartai nemmancu una. 
E duncas, eia, deu ia a partiri, peròu, chistionendusì de is de s'Ilva de Sa Maddalena, chi ndi funt cabaus in campu custu domìnigu passau po giogai sa partida de sa torrada (e chistionu de is partidas finalis po su chi pertocat su campionau de s'Ecellenza) contras a is de su Viaregiu; e duncas, is de s'Ilvamaddalena funt arrannèscius a passai su turnu (chi cumprendeis su chi seu circhendi de si narai, e chi mi permiteis de manigiai custus fueddus, a trassa de cumenti si narat in italianu etotu) e immoi ant a depi giogai feti atras duas partidas (po su chi pertocat sa stagioni de su duamilla e binticincu – duamilla e bintises, mi parrit bastanti craru) contras a is de sa Pietralunghese, una scuadra chi currit in su campionau de s'Ecellenza de s'Umbria. 
E intzandus, is cosas mi parrint fàcilis meda de cumprendi: chini at a binci, a sa fini de custas duas partidas, intzandus at a tenni sa possibbilidadi, nd'at a cassai sa possibbilidai (chi si praxit de prus, mancai, scritu diaici) de curri in su campionau de sa Sèrie D in s'annu chi at a benni (e megaus a chistionai, est craru, de sa stagioni de su duamilla e bintises – duamilla e bintiseti). 

E si cumprendit ca sa cursa de s'Ilvamaddalena, est a narai, is ùrtimas duas partidas chi tenint de giogai, funt de importu mannu po su chi pertocat is scuadras chi cust'annu ant giogau po su campionau de sa Promotzioni, de sa Primu e de sa Segunda Categoria, e immoi andu (o a su mancu: circu) de si fai a cumprendi su poita, su motivu: e duncas, chi is de s'Ilva arrannèscint a binci contras a is de sa Pietralungheze, intzandus iant a lassai su campionau de s'Ecellenza po curri in cussu de sa Sèrie D (chi est sa cosa, mi parrit bastanti craru, ca ddis auguraus); e duncas in su campionau de s'Ecellenza nci iat a essi unu postu sbuidu (ddi naru diaici), e custu bollit narai ca in su campionau de s'Ecellenza ndi iant a artziai is de sa Villacidrese de Biddacidru (ca po su chi s'apu contau ainnantis, eia, funt bixinus de domu, bixinus de Bidd'e Sorris etotu), sa scuadra sighida, po cust'annu puru, de su presidenti Mateu Marrocu, e chi ant pèrdiu sa isfida contas a is de su Bonorva (ca funt giai segurus de podi curri, de depi curri in su campionau de s'Ecellenza chi s'at a giogai s'annu chi benit, in sa stagioni chi at a benni), chi s'est giogada duas cidas fait. E chi is de s'Ilva de sa Maddalena ndi depessint cassai s'artziada in su campionau de sa Sèrie D, e is de sa Villacidrese s'artziada in su campionau de s'Ecellenza (cumenti s'apu narau immubagora, de su restu), intzandus nci iat a essi unu postu sbuidu (sigu a ddi narai diaici) po su chi pertocat su campionau de sa Promotzioni, cun is de s'Antiochense (sa scuadra chi nd'ant pesau in Sant'Antiogu, e si cumprendit beni de su nomini, deu creu; ma po essi prus segurus si ddu scriu craru e tundu) chi s'agatant, in dì de oi, a su primu postu de sa lista de is scuadras chi abertant (ddi naru diaici) de essi torra piscadas. E duncas, eia, sa chistioni abarrat sèmpiri sa pròpria: chi is de s'Antiochense depessint artziai in su campionau de sa Promotzioni, intzandus in su campionau de sa Primu Categoria nci iat a essi unu postu sbuidu (torra), e duncas, eia, is de su Golfu Aranci (chi ant bintu sa partida contras a is de su La Salle cun su resultau, togu meda e tundu tundu, de duus a zeru) s'agatant, in dì de oi, a su primu postu de sa lista de is scuadras chi abertant de sciri chi ant a depi giogai sa stagioni chi at a benni in Primu Categoria, o torra in su campionau de sa Segunda Categoria. Ma eus a cumprendi mellus cumenti ant a essi cuncodradas is cosas feti me is cidas chi ant a benni, poita iat a podi sucedi ca calincuna scuadra (sucedit giai dònnia annu, a narai sa beridadi) iat a podi sparessi (chi cumprendeis su chi seu circhendi de si narai); est a narai ca nci funt assòtzius ca si ndi sciusciant, est a narai, ca no faint s'iscritzioni po giogai in sa stagioni, in su campionau avatu, e duncas, eia, custu cumportat chi nci bengiant a essi atrus postus lìbberus, cumenti si iat a podi narai; e duncas, eia, sa lista de is scuadras chi abertant de sciri chi ant a benni a essi torra piscadas serbit pròpriu po custu, chi cumprendeis su chi seu circhendi de si contai (ca a bortas sa basca m'atrotoxiat totus is bideas, totus is pentzamentus, cumenti si iat a podi narai). 

E duncas, arribbaus chi seus a custu puntu de sa lega, de sa chistioni, e de s'artìculu, chi seis de acòrdiu cun mei deu ia a andai, po primu cosa, a castiai (impari a bosatrus) cumenti funt andadas is cosas me in sa partida chi is de s'Ilva de Sa Maddalena (chi s'apu giai arremonau, de su restu) ant giogau contras a is de su Viarègiu. Is piciocus sighius de Giancarlu Favarin ant giogau, nd'ant pesau una partida bona meda, e ant fatu a biri a totus cantu podint, cantu sciint essi fortis, e si cumprendit beni chi andaus a castiai su resultau finali de sa partida, chi s'est serrada cun unu cuatru a unu, bonu e togu meda, po is meris de domu, po is maddaleninus. E immoi, cumenti s'apu giai arremonau in custu artìculu etotu, is maddaleninus si dda ant a depi biri contras a is de sa Pietralunghese, chi ant bintu sa partida cosa insoru contras a is de sa Fermana, ma feti apustis de is tirus de is undixi metrus (chi est su chi tocat a fai, su chi spetat a fai, po ddu narai diaici puru, candu sa partida abarrat siddada in su resultau de paridadi). E duncas, is de s'Ilva de Sa Maddalena fiant arrannèscius a serrai cun su resultau de unu a unu sa partida chi iant giogau in domu allena, est a narai in Viarègiu etotu, e deu creu ca si cumprendat beni. E duncas, is cosas si funt postas beni, po is meris de domu de Sa Maddalena, apustis de feti bintunu minudus de giogu, cun su gol chi nd'at cassau Casazza, ma is aversàrius funt stètius bonus a ndi pesai su gol de s'unu a unu cun Purro, chi nd'at cassau su tiru giustu apustis de una mes'oredda de giogu. Ma is de s'Ilva funt arrannèscius a mantenni me is manus is crais de su giogu, e de sa partida, ddi naru diaici, fadendi su contu ca in su segundu tempus nd'ant cassau su gol chi est bàlliu po su duus a unu, cun Mondino; apustis De Ceco nd'at cassau su de tres gol puru e, pròpriu me is ùrtimus segundus de giogu (pròpriu me is ùrtimus segundus de sa partida e de su chi, a trassa de cumenti si narat in italianu, estus a podi tzerriai "tempus de su recuperu"), est arribbau su de cuatru gol de Alvarez. E duncas, si podeis immaginai beni a solus totu su prexu chi nd'ant tentu is tifosus de sa scuadra de domu (e megaus a chistionai, est craru, de is de s'Ilva de sa Maddalena) chi immoi, domìnigu chi at a benni (e chi at a essi su seti de su mesi de lampadas), ant a depi arriciri is de sa Pietralunghese, cun sa partida chi at a balli po sa torrada chi s'at a giogai sa cida avatu, su domìnigu avatu, po essi prus pretzisus puru (cumenti unu giornalista iat a depi essi chi bollit fai beni su trabballu cosa sua), in Umbria etotu. E eus a biri, immoi, cumenti ant a andai is cosas o, po ddu narai mellus puru, cumenti ddis ant a andai is cosas, fadendi su contu ca ant a essi issus (e megu a chistionai de is giogadoris de is de s'Ilva, mi parrit bastanti craru) a ndi depi cabai in campu, e a nosu, invècias, at a abarrai feti de fai su tifu, cumenti dònnia borta. 

E immoi chi seus arribbaus a custu puntu de sa chistioni, e de s'artìculu, estus a podi sighiri (ddi naru diaici poita no sciu chi bosatrus seis de acòrdiu cun mei, ma fatzu su contu ca siat una cosa ca si potzat andai beni, e megu a ddu narai po brullai unu pagheddeddu, ca su de brullai, e de arriri, mabi no fait de seguru, e megu a chistionai de s'umori e de sa saludi puru) a castiai cumenti funt andadas is cosas a is de s'Antiochense e a is de su Fonne, chi, cumenti s'apu giai arremonau, si funt agataus, is unus aranti de is atrus, po giogai s'ùrtima partida po su chi pertocat sa stagioni, su campionau de sa Primu Categoria. E intzandus, is de s'Antiochense funt lòmpius a sa partida finali apustis de nc'essi bogau de is giogus, e de sa cursa, est a narai apustis de essi bintu sa partida contras a is de sa Gioventudi de Sarroch (s'apu chistionau de sa cosa, de sa isfida pròpriu in s'artìculu chi nd'est bèssiu sa cida passada, chi si ddu arregodais, e desinò, chi no si ddu arregodais, intzandus nci pentzu deu, ca su trabballu cosa mia benit a essi custu puru); e invècias is de su Fonne funt arrannèscius a binci contras a is tataresus de sa Lanteri, sighius de Luca Rusani. E duncas, is de s'Antiochense funt arrannèscius a binci s'ùrtima partida puru, cun su resultau, tundu tundu e togu meda (si iat a podi narai diaici) de duus a zeru; e immoi is piciocus sighius de Piras s'agatant a su primu postu in sa lista de scuadras chi ant a depi abertai (po atras duas cidas) de cumprendi cumenti ant a andai is cosas a is de s'Ilva de Sa Maddalena, po sciri chi nc'at a essi su tanti po essi torradas a piscai. Sa partida finali s'est giogada a Terraba (in su campu innoi is de sa Frantziscu Bellu ant giogau is isfidas in domu cosa insoru, in su campionau de sa Promotzioni de cust'annu, e chi funt arrannèscius a binci, tra is atras cosas), e tocat a narai puru ca domìnigu nci fiat bentu forti meda. 
Apustis de feti duus minudus de giogu, intzandus, is de s'Antiochense nd'ant pesau sa prima ocasioni, ddi naru diaici, cun Momo Cosa (unu de is giogadoris prus fortis chi tenint in sa rosa cosa insoru) chi at pigau sa bòcia de conca (chi mi permiteis de ddu narai diaici, de manigiai custus fueddus), apustis de su passàgiu fatu de Marreddu, ma Catta est stètiu bonu a cassai sa bòcia. Apustis de cuatru minudus de giogu, Marreddu, sèmpiri issu, nc'at provau cun unu bellu tiru, apustis de una bella atzioni chi nd'at pesau a solu a solu. Is de s'Antiochense sighint a atacai a totu coddu (cumenti si iat a podi narai, a trassa de cumenti si narat innoi in Bidd'e Sorris etotu), e Podda sparat sa bòcia (ddu naru diaici) concas a sa porta de Catta, chi si fait aturai atentu. Is de su Fonne circant de ponni in motu Goulart, is de s'Antiochense peròu no faint regalus a is aversàrius e sighint a si fai a biri me in s'area de rigori de is de su Fonne, cun Sabiu chi po calincuna cosa cumenti a mesu segundu no arrannèscit a binci sa cursa contras a su portieri aversàriu Catta. S'ocasioni prus toga, s'ocasioni mellus po is de su Fonne nd'arribbat candu funt passaus calincuna cosa cumenti a trintanoi minudus de giogu: Goulart regalat unu palloni de oru (est a narai: fait unu passàgiu bonu meda) a Pili, ca provat a nci spundi sa bòcia concas a sa porta de is aversàrius, ma Pintus narat ca nou (chi mi permiteis de manigiai custus fueddus, a trassa de cumenti si narat, e de cumenti naraus in italianu etotu). In su segundu tempus sa partida abarrat bella e oberta, e spassiosa puru: is de su Fonne podint giogai cun su bentu a is pabas (una cosa ca, ddu eis a cumprendi a solus, agiudat, e no pagu), ma is de s'Antiochense funt bonus e abbilis a sighiri a atacai, pròpriu cumenti iant fatu in sa primu parti de sa partida etotu, est a narai, duncas, in su primu tempus. Is de su Fonne circant de si fai balli gràtzias a is atzionis pesadas de Tedeu e Emerson, ma is de s'Antiochense abarrant in peis, e su resultau, invècias, abarrat siddau cumenti fiat a s'incumintzu de sa partida, est a narai, de zeru a zeru. Candu totus is tifosus fiant incumintzendi a pentzai ca sa partida podiat andai ainnantis fintzas a is "tempus suplementaris" (cumenti seus costumaus a ddus tzerriai, furendindi sa trassa, e is fueddus, de s'italianu etotu), intzandus is de s'Antiochense ndi pesant sa giogada toga chi ballit po su gol de s'unu a zeru: Ciccu scudit sa bòcia in mesu a s'area, cun unu tiru de sa bandieredda; Podda arrannèscit a donai unu bellu corpu de conca a sa bòcia, ma Catta arrannèscit a si sarvai, mancai gràtzias, puru, a sa linna de sa traversa; ma apustis nd'arribbat Madeddu ca, de una pariga de metrus de sa linea de porta, intzertat su tiru giustu. Is de su Fonne nci ponint in campu Sorighe (chi iat giai fatu su gol de sa bìncida in sa partida contras a is de sa Lanteri), ma apustis de una pariga de minudus feti, a su de coranta minudus de giogu, abarrant cun feti dexi ominis in campu po crupa, ddi naru diaici, de su cartellineddu arrùbiu ingotu de Pili (chi nd'at cassau duus cartellineddus grogus in sa pròpriu partida, e is regulas chistionant craras: apustis de duus cartellineddus grogus, intzandus nci depis bessiri de su campu). Is de su Fonne, peròu, po pagu no ndi cassant su gol de s'unu a unu, cun su tiru scutu de Staffa chi andat a sbàtiri contras a sa traversa de sa porta de is aversàrius; is de s'Antiochense torrant gràtzias a su Cielu, po sa bona sorti chi ant tentu in cussa ocasioni, e agatant puru su gol de su duus a zeru a su de cincuanta minudus de giogu, cun Cosa chi serrat in sa manera mellus chi podit s'atzioni, toga meda, incumentzada e pesada de Sabiu. 

E duncas, arribbau (e arribbaus, chi a su contu nci pongu bosatrus puru ca custu artìculu ddu seis ligendi) a custu puntu, deu creu ca sa cosa mellus chi si potzat fai siat acabbai sa lega acapiada a is play-off (chi est su modu chi manigiaus, a trassa de is ingresus etotu, po chistionai de is partidas finalis chi si giogant tra totus is scuadras chi funt arribbadas a su segundu postu de sa lista me is campionaus cosa insoru), e duncas, eia, no m'abarrat atru de fai ca si contai cumenti funt andadas is cosas me in sa partida tra is de su Golfu Aranci e is paulesus de La Salle, chi s'apu arremonau, de su restu, in custu artìculu etotu. E duncas, eia, acoitu a si narai ca is de su Golfu Aranci ant bintu sa partida (sa finali fiat una partida feti, una partida sica, si iat a podi narai a trassa de cumenti si narat in italianu etotu) cun su resultau tundu tundu e togu meda de duus a zeru e immoi s'agatat a su primu postu in sa lista de is scuadras chi abertant novas bonas de is de sa Federatzioni; est a narai ca chi nci depessit essi unu postu sbuidu in su campionau de sa Primu Categoria (sa cosa iat a podi sucedi, po incumentzai, chi is de s'Ilva de Sa Maddalena ant a binci is duas partidas cosa insoru, e chi ant a serbiri po nd'artziai in su campionau de sa Sèrie D), intzandus iat a tocai pròpriu a is piciocus sighius de Bagatti a fai sa festa po s'artziada de categoria. 
Ma chi is de s'Ilva no nci dda depessint fai, a binci sa partida cosa insoru, iat a tocai a biri chi calincunu assòtziu, tra cussus chi tenint sa possibbilidadi de curri in su campionau de sa Primu Categoria po sa stagioni de su duamilla e bintises – duamilla e bintiseti, si ndi sciusciat o, mancai, arrefudat de curri in su campionau chi ddi spetat (ca po is assòtzius de bocia ballit su chi ballit po is cristianus: oi nci ses e, mancai, ses e t'agatas in saludi bona, ma mancai cras ses sciasciau a terra). 
E duncas, po is de su Golfu Aranci, a sa fini, chi fadeus beni is contus, cussa chi s'est serrada custu fini de cida passau est stètia una stagioni de importu mannu, una stagioni de oru, si iat a podi narai diaici puru, fadendi su contu chi nd'ant cassau su segundu postu in sa lista, a is pabas de is de su Tavolara, cun calincuna cosa cumenti a centu e cincu gol fatus, ca no benint a essi pagus de seguru. E intzandus, si potzu narai puru, immoi chi nci seu, ca in sa partida chi ant giogau contras a is de La Salle (chi funt arribbaus a su segundu postu de sa lista, a is pabas de is casteddaius de s'Himalaya), in campu, po su chi pertocat is de su Golfu Aranci, est craru, nci fiant una bella pariga de giogadoris ca fintzas a is ùrtimus annus passaus giogànt (megànt a giogai, chi si praxit mancai de prus diaici cumenti sonat) me in su campionau de s'Ecellenza e si cumprendit beni, giogadoris diaici fortis in su campionau de sa Segunda Categoria benint a essi unu lussu, mi benit de ddu narai diaici, chi cumprendeis su chi seu circhendi de si contai: est a narai ca unu giogadori chi at fatu annus e annus gioghendi in su campionau de s'Ecellenza (chi est su prus mannu, su de importu prus mannu tra totus is campionaus chi nci funt innoi in Sardìnnia), intzandus candu s'agatat a giogai in su campionau de sa Segunda Categoria (ca est unu de is prus piticheddus, chi ndi bogaus su campionau de sa de Tres Categorias; e chi est su prus piticheddu tra totus cussus chi sigheus cun su giàssu de su Diàriu Sportivu), podit fai sa diferèntzia a solu, mancai feti cun una giogada, cun una atzioni, chi mi cumprendeis, ma deu creu ca sa cosa siat bastanti crara. E duncas, is de su Golfu Aranci nd'ant cassau su primu gol de sa partida apustis de feti undixi minudus de giogu: Martinez (unu de is prus fortis in sa scuadra cosa sua) ndi brintat in area de rigori de is aversàrius, gràtzias a una atzioni toga meda, e apustis donat sa bòcia a Mulas: s'atacanti de su Golfu Aranci, ca me is ùrtimus annus at giogau cun is camiseddas de is de su Budune e de is de su Poltu Ridundu – Santu Tiadoru (eia, pròpriu duas scuadras che me in custus ùrtimus annus curriant in su campionau de d'Ecellenza, po totu su chi cumportat po s'esperièntzia chi unu giogadori podit tenni a is pabas), nci ponit pagu meda a nci spundi sa bocia in porta, de pagu metrus. Apustis de bintunu minudus, intzandus, is de su Golfu Aranci nci torrant a provai, est a narai ca ndi pesant un'antra atzioni de importu manna, sèmpiri cun Martinez, unu de is giogadoris prus fortis e prus perigulosus po sa difesa de is paulesus; apustis sa bòcia nd'arribbat me is peis de Mulas ca arrannescit a ddi donai una bella carvada de pei, ma no intzertat sa porta (cumenti si iat a podi narai, a trassa de cumenti si narat innoi in Bidd'e Sorris). Nc'est de narai, puru, ca sa partida s'est giogada cun calincuna cosa cumenti a trintacuatru-trintacincu gradus, asuta de unu sobi chi at callentau su campu in una manera aforas de contu (chi mi permiteis de manigiai custus fueddus, e chi si cumprendit su chi seu circhendi de si contai); is de La Salle circant de fai su chi podint po ndi artziai sa conca e ndi cassai, a su mancu, su gol de s'unu a unu, ma no arrannèscint a essi abbilis in area de rigori candu arribbat su momentu de nci scudi sa bòcia concas a sa porta de is aversàrius. In s'atra parti de su campu, est a narai in s'area de rigori de is paulesus, su portieri Pau frimat sa cursa de Mulas, chi fiat arribbendi giai giai in porta cun sa bòcia in mesu a is peis; a su de bintotu minudus, e seu chistionendi sèmpiri de su primu tempus de sa partida, Fiori, cun unu tiru de frimu, nci spundit sa bòcia in area de rigori de is de La Salle e circat, diaici, a Mulas, chi cassat sa bòcia ma no arrannescit, torra, a intzertai sa porta, fadendi su contu ca su tiru cosa sua si ndi artziat apitzus de sa traversa (chi mi cumprendeis, chi mi permiteis de manigiai custus fueddus). Is de su Golfu Aranci, intzandus, serrant su primu tempus de sa partida a s'atacu, cun Fiori, Martinez e Mulas chi funt is giogadoris prus perigulosus, torra, ma Pau arrannescit a si sarvai, e a mantenni in giogu sa scuadra cosa sua. A su de corantases minudus, est a narai candu su primu tempus fiat acanta acanta de acabbai, De Caria po pagu no ndi pesat su gol, ma su tiru cosa sua ndi bessit aforas de su campu. In su segundu tempus puru is de su Golfu Aranci partint a forti meda e si nci ghetant a s'atacu (chi mi permiteis de ddu narai diaici): Martinez guadangiat unu tiru de frimu, Ruzzitu nci provat ma Pau cassat sa bòcia. A su de cuatru minudus, sèmpiri de su segundu tempus, su Golfu Aranci ndi cassat su segundu gol puru: Garcia ndi pesat una atzioni toga merda in sa parti dereta de su campu e nci scudit sa bòcia in mesu a s'area, Pau circat de ndi cassai sa bòcia ma no nc'arrannescit (est a narai ca arrannèscit feti a dda tocai, ma no a dda cassai, a dda frimai cun is manus) e diaici sa bòcia arribbat in mesu in mesu a is peis de Ruzzitu ca intzertat sa porta, cun unu tiru scutu de una pariga de metrus feti de sa linea de sa porta. A su de dexesseti minudus, sèmpiri de su segundu tempus, torra Ruzzitu ci provat cun unu tiru de frimu, ma Pau arrannèscit a si sarvai. A su de bintiduus minudus nci provat puru Loddo, sèmpiri po is de su Golfu Aranci, ma chentza de sa bona sorti chi serbit po ndi cassai su gol. A su de binticincu minudus, is de La Salle si torrant a incarai in s'area de rigori de is de su Golfu Aranci cun Apice, ma is aversàrius arrannèscint a si ndi scabulli de su perigulu, mancai cun unu stìddiu de timorias in prus de su chi si podiant abertai, chi mi cumprendeis po su chi seu circhendi de si contai. In custa atzioni, is de La Salle pedint a s'arbitru unu tiru de is undixi metrus, poita un aversàriu, segundu issus, at tocau sa bòcia cun sa manu, ma po s'arbitru de sa partida no nc'est su tanti po frimai su giogu e donai sa punitzioni a is paulesus. Cun totu cussu chi custu cumportat: is tifosus de is de La Salle ant incumentzau a pigai a fueddus malus s'arbitru, e m'eis a iscusai chi si ddu naru, ma no nc'arribbu a cumprendi cumenti cristianus mannus de edadi si potzant fai pigai diaici de su febi po una partida de bòcia tra scuadras diletantis, fadendi su contu ca arribbant a tzerriai, diaderus, de totu a cussu poberu arbitru. Ma dda serru innoi, ca no ndi bollu pesai discussionis, cumenti si iat a podi narai. Ma, custu est pagu ma seguru, sa cosa sighit a mi sonai mabi, sighit a mi parri una cosa aforas de conca, custu de si dda pigai contras a s'arbitru, cun totus is fueddus malus chi ddi tzerriant, e ddi narant fintzas ca est corrudu, e ddi circant sa mamma, e atras porcherias puru ca fortzis, diaderus, est mellus (est meda mellus) chi mi citu e chi sigu a si contai cumenti funt andadas is cosas po su chi pertocat sa partida. 
A su de trinta minudus de giogu Pandori circat de brintai in area de rigori de is de su Golfu Aranci, ma is cosas no ddi andant beni, cumenti mancai bisàt; a su de trintacuatru minudus is de La Salle ndi pesant (arrannèscint a ndi pesai, chi si praxit de prus mancai diaici) una de is atzionis prus togas de sa partida cosa insoru: Apice sfundat in sa parti manca de su campu, e arrannèscit a scudi sa bòcia concas a sa porta de is aversàrius, ma Deiana arrespundit cun una parada toga meda. A su de trintacuatru minudus, s'arbitru no donat unu gol a is de su La Salle, chi nd'ant pesau una giogada toga meda cun Pandori (e torra, is tifosus de is de La Salle ca si dda pigant cun s'arbitru, cun una biga de fueddus malus chi, mancai, est mellus chi no abarru innoi a si ndi chistionai prus de su chi serbit); e pròpriu Pandori, una pariga de minudus prus a tradu, ndi cassat su cartellineddu arrùbiu e depit lassai su campu, cun is paulesus chi, intzandus, acabbant de giogai sa partida cun feti dexi ominis in campu, cun totu cussu chi custu cumportat: sa basca sighit a essi manna meda e is duas scuadras no arrannèscint prus a curri cumenti, mancai, iant fatu in su primu tempus. Me is ùrtimus minudus de giogu, me is ùrtimus minudus de sa partida, Arpice tenit s'ocasioni po ndi cassai, a su mancu, unu gol po is paulesus, ma sa difesa de is de su Golfu Aranci arrannèscit a si ndi scabulli de su perigulu, mancai feti a s'ùrtimu momentu. Apustis de cincu minudus de recuperu (chi mi permiteis de ndi furai sa trassa de cumenti si narat in italianu etotu; e megu a chistionai, mi parrit bastanti craru, de su tempus chi si depit giogai, in prus, apustis chi acabbant is corantacincu minudus de su primu e de su segundu tempus), sa partida acabbat, po su prexu mannu, mannu meda, de is de su Golfu Aranci e de is tifosus cosa insoru chi nci fiant a su campu po castiai sa partida. 

E cun custa nova, deu creu pròpriu de si podi narai custu, apu acabbau su tempus e mescamente su logu chi tengu po s'artìculu de custa cida, ma custu bollit narai, est craru, ca eis a agatai un antru artìculu (e un antru tanti de rigas cumenti a custu) tra seti diis, est a narai, giòbia chi at a benni, e chi at a essi s'undixi de su mesi de lampadas. E sèmpiri chi su Cielu at a bolli custu beni po mei (e po bosatrus puru), est craru. 
In s'interis, si saludu e si imprassu a forti meda, si imprassu a forti a totu coddu (po ddu narai a sa sorresa).



Attività realizzata col contributo della Regione Sardegna. IMPRENTAS 2025-2026. LR 22/2018 art. 22