Salta al contenuto principale
calcio pirri
Giuseppe Mura est su capo-cannonieri de su Girone A cun dexannoi gol

Su Calcio Pirri currit a forti: nisciuna scuada at bintu diaici meda in totu sa Secunda Categoria

In totus is otu campionaus de sa Secunda Categoria, no nc'est nisciuna scuadra chi est currendi a forti cumenti a su Calcio Pirri. Su traballu chi funt fadendi Albertino Melis e Tonio Monni, is allenadoris de is arrùbius – brau, impari giai s'annu passau in su Città di Selargius, est de importu mannu, ma nc'est de arregodai puru is fainas de su DS Stefanino Siddi, chi in s'istadi at cunbintu is giogadoris prus bravus de sa zona de Casteddu a cojai sa bidea de su presidenti Gianluca Pilu, chi impari a Roberto Mannai e Alessandro Casula funt fadendi de totu po ndi artziai, cun sa sotziedadi insoru, in Primu Categoria.

A pustis de is primas trexi partidas, is puntus in buciaca funt giai trintases e arribant gràtzias a doxi bìncidas; in su Girone B is serramannesus de sa Gialeto, po nd'arremonai una, ant bintu undixi bortas, cumenti a is giogadoris de su Nurri, in su Girone D, e cumenti a is piciocus de s'Orane e de s'Atletico Bono, chi funt currendi a brazetu, in su Girone F.

Su Calcio Pirri po imoi at pèrdiu feti una borta, in sa partida contras a su Deximeputzu de su bintiduus de su mesi de Idas, ma su dannu est piticu, poita is puntus in prus apitzus de su Pula, chi est sa de duus in lista, funt dexi: unu mari. Is giogus po sa Primu Categoria parint giai fatus in su Girone A; a is atras scuadras, duncas, abarrant is pimpirillas.

In su fratempus, in sa fentana de su mercau de su mesi de Idas, Stefanino Siddi at traballau cumenti unu macu po pigai atrus giogadoris: diaici funt lompius, impari a is atrus, Oumar Diop, chi s'annu passau at fatu trintacincu gol cun cussus de su Club San Paolo, e Giampiero Demurtas.
De is cinquanta e duus gol fatus de is pirresus fintzas a imoi, dexannoi potant sa frimma de Giuseppe Mura, su giogadori primu in sa lista de is capo-cannonieri.

«Seus feti arragollendi su suci de su traballu incuminzau in s'istadi — contat Stefanino Siddi —, imoi boleus sighiri diaici e binci su campionau. Podeus scriri una pàgina de importu mannu in sa stòria de su calciu in Sardìnnia: doxi bìncidas in trexi partidas si donant s'afroddiu po bolai sempri prus in artu». Agoa aciungit. «Sa fortza de custa scuadra? S'accapiu chi nc'est intra de is giogadoris, aintru e a foras de su campu».

In questo articolo
Squadre:
Campionato:
Argomenti:
Stagione:
2019/2020
Tags:
Seconda Categoria
Girone A