Is scuadras de sa Primu Categoria torrant in campu in custu fini de cida po atacai torra cun is partidas de su campionau, e sa pròpriu cosa ballit po is scuadras de sa Segunda Categoria puru

E duncas, eia, po sa segunda cida de sighiu seu atachendi a ndi pesai s'artìculu chi at a balli po is Novas de su Diàriu Sportivu (e cumenti eis a sciri giai, e cumenti eis a cumprendi a solus, custu benit a essi s'artìculu chi scriu in su sardu chi si chistionat, e chi si fueddat in su Campidanu de mesu e mescamente innoi in Bidd'e Sorris) de lunis, e custu bollit narai, mescamente (cumenti s'apu contau sa cida passada, de su restu) ca po custa cida puru su trabballu ca depu fai po su chi pertocat is artìculus in italianu at a essi unu pagheddu prus pagu, unu pagheddeddu prus lèbiu (chi mi permiteis de ddu narai mancai diaici) de su chi invècias m'at a tocai, e m'at a spetai, de su lunis chi at a benni (de su lunis de sa cida chi at a benni), candu, duncas, ant a torrai a partiri is campionaus de sa Primu Categoria puru, e cussus de sa Segunda Categoria: e duncas, eia, eis cumprèndiu beni, custu fini de cida su mundu de sa bòcia, po su chi pertocat is assòtzius diletantis chi nci funt innoi in Sardìnnìa, s'at a torrai a ponni in motu (cumenti si iat a podi narai, e isperu ca nesciunu de bosatrus potzat tenni calincuna cosa de murrungiai po cumenti m'est bèssida aforas sa fràsia) e duncas, eia, no nc'ant a essi prus scuadras frimas a castiai is atrus (cumenti est sucèdiu in custas ùrtimas duas cidas) ma totus is giogadoris nd'ant a cabai in campu, e is giogus ant a andai ainanntis fintzas a su binti de su mesi de idas, e chentza de ndi sartai nemmancu unu fini de cida, e mi parrit una cosa toga, e megu a chistionai pentzendi giai a su spàssiu mannu chi si nd'ant a fai is tifosus. E duncas, eia, fiat ora puru, si iat a podi narai diaici, ca totus is campionaus torrint a incumentzai, e immoi eus a biri ita totu at a sucedi, ita totu nd'ant a bogai aforas. 

E duncas, po su chi mi pertocat, custu bollit narai ca de sa cida chi at a benni apa a tenni una surra, una biga manna (cumenti si narat innoi in Bidd'e Sorris, invècias de manigiai su fueddu "muntoni", diaici fadeus unu pagheddeddu de grammatica puru, ca mabi no s'at a fai de seguru) de artìculus in prus de ndi pesai, e de scriri, e m'apa a podi scaresci de tenni su tempus, su lunis, po incumentzai a incarrerai cun s'artìculu in sardu (chi ndi bessit aforas de giòbia, e feti de giòbia, e dònnia dònnia giòbia, chentza de ndi sartai nemmancu unu). 

E si iat a podi narai puru, immoi chi nci seu, ca su trabballu cosa mia torrat a partiri abellu abellu (chi mi permiteis de ddu narai diaici), chentza de mi fai sunfriri tropu, e custa est una cosa chi mi praxit, e meda puru, e si cumprendit. 
Ma de sa cida chi at a benni no apa a tenni prus scusas, e no nc'at a essi, diaderus, prus pàsiu; ma de su restu, est berus puru ca seu de cuindixi annus, prus o mancu (de su mesi de donniasantu de su duamilla e undixi, po benni a essi prus pretzisu puru, cumenti iat a depi essi unu giornalista candu bollit fai beni su trabballu cosa sua) ca seu sighendi custa faina, est a narai ca seu apicau a custu trabballu, e immoi potzu narai de sciri beni, bastanti beni, e si cumprendit, cumenti andant is cosas e totu su chi depu fai (e puru su chi no depu fai), e custu gràtzias a s'esperièntzia chi nd'apu ingotu (ddi naru diaici) in totu custu tempus; ca s'esperièntzia benit a essi una cosa de importu mannu, siat po unu chi fait unu trabballu, e siat po unu chi giogat a bòcia (po arremonai is giogadoris e incumentzai a chistionai de bòcias e de partidas); e duncas, eia, s'esperièntzia, est a narai su de sciri cumenti andant is cosas in una certa faina, ti permitit, po primu cosa, de ti ndi scabullu de su trabballu in prus pagu tempus de su chi nci iast a ponni a fai una cosa po sa primu borta. 
Cumenti chi su de fai, mancai, su pròpriu sbàlliu, su pròpriu arrori po una biga de bortas de sighiu, intzandus ti potzat agiudai a imparai sa letzioni, est a narai ca chi tui fais po dexi bortas, po centus bortas sa pròpriu tontesa, intzandus arribbas a cumprendi (su maistu prus mannu est su tempus, cumenti si narat) cumenti andat fata sa tali cosa o, ballit aguali, cumenti no andat fata. 
E custus funt, de su restu, is vantàgius de tenni unu bellu tanti de esperièntzia a is pabas. E in prus (sa cosa ballit puru, e mescamente, po su giogu de su càlciu) chi tui tenis una bellu tanti de esperièntzias a is pabas (cumenti iat a podi essi cussa chi tenit unu giogadori chi, mancai, giogat a bòcia e ndi cabat in campu de calincuna cosa cumenti a binti, binticincu annus) intzandus iast a podi puru arribbai a podi agiudai is atrus, chi est cussu chi sucedit me is scuadras. E custu, duncas, si ddu seu narendi po su chio pertocat s'esperièntzia. 

Ma torraus a nosu. 
E duncas, eia, fia narendusì ca custu fini de cida chi at a benni ant a torrai a partiri is campionaus puru po su chi pertocat su mundu de sa Primu Categoria e po su chi pertocat su mundu de sa Segunda Categoria, cumenti a dònnia, dònnia annu, de su restu: ca is giogus de sa Primu Categoria incumentzant prus o mancu duas cidas apustis de candu torrant a partiri is giogus de sa Promotzioni, e is atrus annus passaus sa Segunda Categoria, invècias, torràt a incumentzai in su primu fini de cida de su mesi de ladàmini, e duncas, nc'est su tanti po narai ca, eia, po sa stagioni chi at a balli po su duamilla e bintises – duamilla e bintiseti is giogus de sa Segunda Categoria funt torrendi a partiri cun una cida de antìcipu (cumenti si narat e cumenti fait a narai, pighendi po bonu su chi m'at consillau su fueddariu). 
E immoi chi seus arribbaus a custu puntu de sa storia, e immoi chi seu arribbau a ndi pesai s'ùrtimu artìculu in sardu po su chi pertocat su mesi de cabudanni, e po sighiri a fai su contu de su tempus chi passat e de totu su chi s'abertat po su benidori (est a narai, po is noi mesis de sa stagioni, chi s'at a serrai, po su chi pertocat sa Primu e sa Segunda Categoria, su primu fini de cida de su mesi de maju), andaus a castiai, mellus, impari, cumenti funt cuncodradas is cosas po su chi pertocat is calendàrius chi is de sa Lega Natzionali de is Diletantis e is de sa Federatzioni Italiana de su Giogu de su Càlciu nd'ant pesau, po andai a castiai, prus de totu, chi nci funt festas e dì de pàsiu aintru de su torneu, de su campionau. 

E intzandus, torrendi a nosu, si potzu narai, po incumentzai, ca po cust'annu nc'ant a essi trinta partidas in totu po su chi pertocat su campiuonau de sa Primu Categoria, cun is giogus (si ddu torru a arregodai), chi ant a partiri pròpriu custu domìnigu chi est arribendindi, e chi at a arrui su bintiseti (de su mesi de cabudanni, mi parrit bastanti craru) e ant acabbai, s'ant a serrai su duus de su mesi de maju (e gei ammancat una dì, s'at a megai calincunu de bosatrus, e megu a brullai, gei si cumprendit); po su chi pertocat su mesi de ladàmini, invècias, nc'ant a essi partidas dònnia domìnigu, partendi de su cuatru, passendi po s'undixi, su dexiotu e su binticincu; po su mesi de donniàsantu, intzandus, is giogus ant a partiri sa primu dì, est a narai s'unu (est a narai, mellus puru, sa dì innoi fadeus sa festa po totus is santus), chi at a essi, est craru, de domìnigu, e diaici eus a andai ainanntis, cun is partidas chi s'ant a giogai s'otu de su mesi de donniasantu (po su chi pertocat sa de seti giorronadas de sa lista de partidas de s'andada), su cuindixi (po su chi pertocat sa de otu giorronadas), su bintiduus e su bintinoi puru. 
Po su chi pertocat su mesi de idas, invècias, nc'ant a essi feti tres partidas: sa primu, in su fini de cida chi nd'at a arrui su ses (po sa de undixi giorronadas), su trexi e apustis su binti, chi at a essi su domìnigu chi at a serrai totus is giogus, ddi naru diaici, po su duamilla e bintises. 
E duncas, is scuadras chi ant a curri in su campionau de sa Primu Categoria ant a torrai in campu, apustis de is festas de su Nadali e po s'annu nou (diaici ddas tzerriaus), su ses (chi at a essi sa dì innoi eus a fai sa festa po sa Befana, cumenti si iat a podi tzerriai, furendindi sa trassa e su fueddu de cumenti si narat in italianu etotu) de su mesi de gennàrgiu, e apustis, nd'ant a cabai in campu, torra, puru su dexi (po s'ùrtima giorronada de partidas po sa lista de s'andada), su dexesseti (po sa primu partida de sa lista de sa torrada), e apustis su binticuatru e su trintunu (chi at a essi s'ùrtima dì po su chi pertocat gennàrgiu, e manera mellus po serrai su mesi no nc'est, a su mancu, sa cosa ballit po is tifosus e po is giogadoris); po su mesi de friàrgiu nc'ant a essi partidas su seti, su catodixi, su bintunu e fintzas su bintotu (e custu bollit narai, eia, ca su mesi de friàrgiu puru s'at a serrai cun totus is scuadras in campu, po su prexu chi nd'ant a tenni is tifosus); su mesi de martzu eus a biri is scuadras de sa Primu Categoria in campu su seti e su catodixi, e apustis, 'tendei 'tendei, su campionau s'at a frimmai po una cida (e sa pròpriu cosa, si ddu bollu arregodai, immoi chi nci seu, at a capitai, at a sucedi e duncas, eia, at a balli po su campionau de s'Ecellenza e de sa Promotzioni puru), poita nc'ant a essi is partidas de su chi tzerriant Trofeu de is Regionis, chi est su campionau chi ndi pesant mescamente po totus is piciocheddus prus giòvuneddus chi giogant a bòcia: e deu creu ca scieis giai cumenti funtzionant is cosas, fadendi su contu ca no est sa primu borta chi si ndi chistionu, ma mancai calincunu, o calincuna de bosatrus s'est pèrdiu sa letzioni ddi naru diaici, e intzandus si dda torru a arrapiti: su Trofeu de is Regionis est pesau cun is scuadras chi nd'arribbant de dònnia regioni de Italia (gei si cumprendit, gei s'at a cumprendi de su nomini etotu, deu creu), e nc'ant a essi scuadras de is Giovanissimi (cumenti ddus tzerriaus in italianu etotu), de is Allievi e de is de sa Juniores puru (dònnia scuadra, duncas, pertocat una edadi po is giogadoris: is de sa Juniores, po nd'arremonai una, no podint tenni prus de dexiotu – dexennoi annus fatus); ma de custa cosa nd'eus a chistionai mellus candu at a arribbai s'ora, est a narai, candu ant a ammancai feti una pariga de cidas, ainnantis de s'incumentzu de is giogus. 

E duncas, eia, apustis de sa pàusa chi nc'at a essi po permiti a is piciocheddus (chi aintru de s'annu, aintru de sa stagioni, mi parrit bastanti craru, currint po is scuadras cosa insoru, chi cumprendeis su chi seu circhendi de si narai) de giogai po su Trofeu de is Regionis, is giogus e, duncas, su campionau de sa Primu Categoria at a torrai a partiri su bintiseti, chi at a essi de sabudu, e po essi prus pretzisus puru, at a essi su sabudu de sa Cida Santa, e duncas, eia, su sabudu ainnantis de sa Pasca Manna, e candu ddu apu scrobertu (cumenti si narat innoi in Bidd'e Sorris, cumenti apu sèmpiri intèndiu narai, a su mancau, mancai su fueddariu mi consillat de manigiai su fueddu scritu diaici: scobertu; po fai unu pagheddu de grammatica puru, isperendi ca sa cosa no si dispraxiat prus de su tanti chi serbit) m'est cabau giai giai guta (e megu a brullai, ma feti unu pagheddeddu), poita custu bollit narai ca po mei, po su chi mi pertocat, nc'at a essi trabballu de fai poi sa dì de sa Pasca Manna puru. 
E chi pròpriu si depu narai sa beridadi, pentzammu de tenni sa giorronada sbuida e lìmpia de su trabballu (chi mi permiteis de cuncodrai sa fràsia diaici, gioghendi mancai prus a fai su poeta ca su giornalista sportivu), fadendi su contu ca su primu calendàriu chi nd'est bèssiu est stètiu cussu de sa Promotzioni, e is scuadras de sa Promotzioni s'ant a pigai duas cidas de pàsiu, est a narai, sa cida innoi nc'at a essi su Trofeu de is Regionis, e sa cida avatu puru. 
E duncas, eia, me is ùrtimus cincu-ses annus annus tocàt pròpriu (est tocau, chi si praxit de prus diaici, mancai, po cumenti sonat sa fràsia e, pruschetotu, po cumenti est cuncodrau su verbu) a is scuadras chi currint in su campionau de sa Promotzioni a ndi cabai in campu su sabudu de sa Pasca Manna, e invècias cust'annu is de sa Federatzioni Italiana de su Giogu de su Càlciu, impari a is de sa Lega Natzionali de is Diletantis ant pentzau beni (po su prexu cosa mia, e megu a sighiri a brullai) de ndi pesai, po su Sabudu Santu, sa de dexi giorronadas de sa lista de is partidas chi ant a balli po sa torrada. E po su chi mi pertocat, eia, si potzu incumentzai a narai ca chi nc'at a essi trabballu de fai, trabballu de sighiri e rigas de nci bogai aforas, intzandus deu m'apa fai agatai prontu (e sèmpiri chi su Cielu at a bolli custu beni po mei, est a narai, duncas, pruschetotu, chi su Cielu m'at a donai gana bona e mescamente saludi) e no m'apa a fai pigai de sa timoria; ca no at a essi s'ùrtima borta, deu creu de podi narai custu puru, ca m'at a capitai de trabballai in dì de festa (de trabballai in s'interis ca totus is atrus faint festa, po ddu narai mellus puru), fadendi su contu ca po trabballu sigu is partidas de is diletantis, e is giogadoris diletantis (chi giogant po si spreviai apustis chi acabbant cun su trabballu cosa insoru) funt costumaus a giogai, mi parrit bastanti craru, puru me is diis de festa (cumenti iat a podi essi sa primu dì de su mesi de donniasantu, o sa primu dì de su mesi de maju). 
Ma tocat a narai, puru (po serrai sa chistioni in sa manera mellus chi si podit), ca torru gràtzias a su Cielu, dònnia dònnia dì, po su de tenni unu trabballeddu ca mi permitit de mi ndi scabullu de is ispesas chi nci funt de sighiri in s'interis chi bivis in custu mundu. 

E duncas, torrendi a nosu, si potzu narai ca po su mesi de abrili puru (e seu chistionendi, est craru, po su mesi de abrili de su duamilla e bintiseti) nc'ant a essi partidas dònnia, dònnia fini de cida, a partiri de su chi nd'at a arrui su cuatru (chi at a essi de domìnigu), e fintzas a arribbai a su de s'undixi, de su dexiotu e de su binticincu puru (torra is partidas in dì de festa, mancai su binticincu cust'annu nd'arruat de domìnigu, e custu bollit narai ca no nc'ant a essi vacantzas in prus po is piciocheddus chi andant a iscola e po totus is trabballadoris, chi cumprendeis su chi seu circhendi de si narai; mi parrit bastanti craru, de su restu: su binticincu benit a essi dì de festa, ma candu nd'arruit de domìnigu, intzandus, nc'est pagu ispantu, poita, cumenti si cumprendit beni, su domìniogu est giai dì de festa po contu sù). 

E apustis, is scuadras chi currint in su campionau de sa Primu Categoria nd'ant a torrai a cabai in campu su duus de su mesi de maju, chi at a essi de domìnigu, e chi at a essi, 'tendei 'tendei, s'ùrtima giorronada po su chi pertocat sa stagioni de su duamilla e bintises- duamilla e bintiseti, ma apustis nc'ant a essi is partidas finalis (cussas chi ant a balli po nd'artziai de categoria, e chi tzerriaus, a sa moda de is ingresus etotu, play-off, e chi ant a pertocai totus is scuadras chi ant a arribbai a su segundu postu de sa lista; e nc'ant a essi de giogai, puru, totus is partidas, totus is isfidas chi ant a balli po circai de no ndi cabai de categoria, est a narai, ant a balli po circai de evitai sa retrocessioni, e chi tzerriaus, a sa moda de is ingresus etotu, play-out) chi ant a sighiri a andai ainnantis po un antru mesi, est a narai, duncas, po totu su mesi de maju (sa stagioni de su duamilla e binticincu – duamilla e bintises, de su restu, s'est serrada su duus de su mesi de lampadas). 

E duncas, immoi chi s'apu contau cumenti funt spratas is partidas me is noi mesis chi ant a arribbai. E su mesi de cabudanni mi praxit meda poita si fait su contu de totu su trabballu chi nc'est de fai, chi nc'at a essi de fai po totu sa stagioni; e custa cosa torrat paris paris cun su chi si fait po is campus de preni e, duncas, po su chi pertocat su trabballu de su massaju, ca in custu perìodu etotu, est a narai, cumenti nd'arribbat su mesi de cabudanni, intzandus incumentzat a decidiri cali ant a essi is terras de preni (mancai a trigu, o a canciofas, ca funt is duas fainas chi si sighint innoi in Bidd'e Sorris) e cali ant a essi, invècias, is terras de lassai sbuidas, o cruas (cumenti si iat a podi narai, puru).
E immoi chi nci seus, andaus a castiai cumenti funt cuncodradas is cosas me is cuatru listas de sa Primu Categoria, est a narai, duncas, cali funt is scuadras prus fortis ca, a su mancu po su chi ndi podeus cumprendi in dì de oi, ant a podi curri (fadendi su contu de su nomini de is giogadoris, fortis meda, chi tenint in sa rosa) po ndi cassai su primu postu de sa lista e duncas, eia, mi parrit bastanti craru, sa bìncida de su campionau. E duncas, eia, po su chi pertocat sa Lista A, tra is scuadras prus fortis agataus, custu est pagu ma seguru, is de su Decimo07, sa scuadra ca, cumenti si cumprendit de su nomini, nd'ant pesau in Deximumannu, e custu de calincuna cosa cumenti a bint'annus, fadendi su contu ca in su duamilla e bintiseti s'assòtziou at a fai is annus, chi mi permiteis de ddu narai diaici; e duncas, eia, si potzu narai puru, immoi chi nci seu, po su chi acudu, ca s'annu passau is de su Decimo07 fiant giai giai po ndi cassai sa bìncida de su campionau, fadendi su contu, mescamente, ca po mesis e mesis de sighiu si funt agataus a su primu postu de sa lista, ma apustis, ita est sucèdiu? Est sucèdiu ca in una de is ùrtimas partidas chi ant giogau, in domu de is de su Deximeputzu (is fradibis de su Decimo 07, fadendi su contu ca is duas biddas abarrant, giai giai, s'una a su costau de s'atra), ant pèrdiu, est a narai ca nd'ant bodditu una surra (chi no mi sbàlliu, e megu a no mi sballiai, cussa partida si fiat serrada cun su resultau, togu meda, de cuatru a duus po is putzesus) e duncas, eia, is deximesus ndi funt cabaus a su de tres postus in sa lista, e immoi, est bastanti craru, nc'ant a torrai a provai in custa stagioni puru; ca de su restu (est su chi m'arrapitu a solu, ca sa cosa, ca sa letzioni ballit, puru, po is chistionis chi pertocant sa vida cosa nosta, cussa de dònnia dì), candu no arrannèscis a fai su chi teniast in conca, candu no arrannèscis a fai su chi as incumentzau, intzandus podis fai feti una cosa: est a narai, ca s'ùnica cosa chi t'abarrat de fai est cussa de nci provai torra, ancora ed ancora, fintzas a candu sa cosa chi ses circhendi de fai no ti bessit beni; e duncas, is dirigentis de s'assòtziu de sa Decimo 07 si funt arramangaus is manigas, cumenti si iat a podi narai (e cumenti seu narendu, de su restu) e ant fatu unu trabballu bonu, po incumentzai, in su mercau (in sa fentana de su mercau de cust'istadi, po ddu narai mellus puru), fadendi su contu ca ant agatau s'acòrdiu cun Mboup (unu giogadori forti meda ca me is ùrtimus annus at giogau me in su campionau de sa Promotzioni e in cussu de s'Ecellenza puru), ca me is ùrtimus annus est arrannèsciu a ndi pesai cosas togas meda, est a narai, duncas, ca at fantu spantus cun sa camisedda de is de su Castiadas in pitzus; e po cumprendi mellus su chi seu contendusì si potzu narai, in prus de su chi s'apu narau fintzas a immoi, ca Carlos Mboup est stètiu su giogadori chi nd'at pesau su tanti de gol prus mannu (est a narai, eia, ca est bènniu a essi su capu de is cannonieris, est a narai su giogadori chi at fatu prus gol de totus is atrus) in sa stagioni de su duamilla e bintiduus – duamilla e bintitres (po su chi pertocat su campionau de sa Promotzioni); e immoi is de su Decimo07, e mi parrit craru puru, s'abertant cosas togas meda de issu, e mescamente, seus chistionendi de su tanti de gol chi su giogadori ndi iat a podi pesai; ca si cumprendit, chi tui bolis binci is partidas, e duncas su campionau, depis fai una bella biga de gol e, mancai, circai de ndi ingolli pagu gol, chi cumprendeis su chi seu circhendi de si narai. 
E duncas, est craru, is de su Decimo07 no ant a curri a solus, no ant a essi is ùnicus, si iat a podi narai diaici puru, a curri po ndi cassai su primu postu de sa lista e sa bìncida de su campionau: impari a issus nc'ant a essi, torra, is de sa Gioventù de Sarroch, ca s'annu passau ant pèrdiu sa partida finali, cussa chi balliàt po s'artziada de sa categoria e po su primu postu de sa lista, contras a is de s'Academia Sulcitana, e immoi nc'ant a provai torra po cust'annu puru, e si cumprendit beni, po su chi s'apu contau ainnantis, immubagora etotu, cumenti andant is cosas; e mancu mali, m'acudu a si narai custu puru immoi chi nci seu, ca in custa vida fatu fatu teneus s'ocasioni (e gràtzias a su Cielu, m'acudu a si narai custu puru) po si fai balli torra apustis chi nd'arrueus, apustis chi imbrunchinaus. 
E duncas, sighendi a curri in cust'arrastu etotu (e megu a chistionai, mi parrit bastanti craru, de sa lega chi apu pigau), in sa truma de is scuadras prus fortis de sa Lista A nci depeus stichiri puru is de sa Baunese, chi ndi funt cabaus pròpriu cust'annu, torra in Primu Categoria, apustis de una bella pariga de annus chi ant fatu in su campionau de sa Promotzioni; e si cumprendit beni cumenti andant is cosas (deu creu ca ddu cumprendeis beni a solus puru, chentza de s'agiudu cosa mia): candu ndi cabas de categoria sa primu cosa chi circas de fai est cussa de ti ndi torrai a strantaxai acoitu, po su chi fait; ca candu ndi cabas de categoria, est craru, bollit narai ca in sa stagioni is cosas no ti funt andadas beni cumenti, invècias, mancai, podiast bisai; e custu bollit narai ca po is tifosus cosa tua is cosas funt benidas a essi marigosas meda; e duncas, eia, po incumentzai, candu ndi cabas de categoria, nc'est de ndi pesai torra s'umori de sa genti chi ti sighit, de is tifosus; e immoi eus a biri cumenti ant a andai is cosas. 
Tra is scuadras ollastrinas, tra is scuadras chi parrint prus fortis (o tra is prus fortis, po ddu narai mancai diaici puru) nci funt puru is de su Tertenia, ca funt arrannèscius a ndi pesai unu mercau de importu mannu meda. Po su chi pertocat sa Lista B, invècias, is de sa Verde Isola, sa scuadra chi nd'ant pesau in Carluforti, parrint tra cussus chi tenint is cartas prus bonas, mescamente chi pentzaus a su chi ant fatu a biri in sa stagioni passada, mancai no siant arrannèscius a partiri beni, cun su pei deretu (cumenti si iat a podi narai, furendindi sa trassa e su modu de narai de s'italianu etotu), ma apustis, in sa segunda parti de sa stagioni (est a narai me in sa lista de partidas de sa torrada), is grogus-birdis funt arrannèscius a ndi pesai una cursa toga meda; e immoi, fadendi su contu ca custu at a essi su segundu annu de sighiu chi ant a fai impari a Albertinu Melis setziu in sa panchina (e chi est s'allenadori, gei s'at a cumprendi bastanti beni, deu creu), eus a biri ita totu ant a arrannèsci a ndi bogai aforas, cumenti si narat, cumenti si iat a podi narai. 
Tra is scuadras prus fortis, seus sèmpiri chistionendi de sa Lista B, nci depeus ponni puru is de s'Isili, ca s'annu passau ant fatu ispantus mannus, fadendi su contu ca funt arrannèscius a abarrai me is primus positzionis de sa lista po totu su campionau, e immoi cust'annu, mancai, ant a provai, ant a circai de fai mellus puru; e sa pròpriu chistioni ballit po is de su Deximeputzu (ca s'apu arremonau ainanntis, in custu artìculu etotu, candu megami a si chistionai de is de sa Decimo 07), ca cust'annu ant a curri peròu in sa Lista B (invècias de sa Lista A innoi fiant s'annu passau). 
Sa Lista C puru parrit toga e spassiosa meda, a su mancu in dì de oi, cun is de su Supramonte (sa scuadra chi nd'ant pesau in Orgosolo, e giai de una pariga de annus, chi pròpriu si depu narai sa beridadi) chi s'annu passau funt arrannèscius a ndi pesai una stagioni toga meda e de importu mannu, fadendi su contu ca funt abarraus, si funt agataus, po cidas e cidas de sighiu, me is primus tres postus de sa lista; sa pròpriu cosa si iat a podi narai de is de su Bitzi, po is de su Tuttavista e po is de sa Lulese puru, chentza de si ndi scaresci de is de sa Dorgalese; sa Lista C, a castiai is nominis de is scuadras e mescamente is nominis de is giogadoris, parrit sa prus toga, chi fadeus su contu, in prus, ca agataus duas scuadras fortis meda ca ndi funt artziadas pròpriu cust'annu de su campionau de sa Segunda Categoria, e megu a chistionai de is de su Tavolara (chi s'annu passau funt arrannèscius a binci su campionau cosa insoru, in sa Lista H de sa Segunda Categoria) e de is de su Golfu Aranci puru (chi funt arrannèscius a binci totus is partidas finalis, is partidas de is play-off chi ant giogau, apustis de essi acabbau, de essi serrau sa stagioni regulari a su segundu postu, a is pabas, pròpriu, de is de su Tavolara); is de su Santu Predu nd'arribbant in Primu Categoria apustis de essi bintu su campionau cosa insoru de sa Segunda Categoria, e seus segurus ca s'afroddiu chi ant a tenni, in conca e in su coru, iat a podi donai una bella manu de agiudu a is giogadoris de s'assòtziu nugoresu. E in totu cussu chi s'apu narau, chi s'apu contau fintzas a immoi, no si ndi podeus scaresci de is de su Ilartzi, chi ant fatu una biga de stagionis de sighiu, est a narai una avatu de s'atra, in su campionau de s'Ecellenza, ca benit a essi a trassa de sa Sèrie A po is diletantis sardus, est a narai, duncas, su campionau de importu prus mannu tra cussus chi si giogant in s'isula cosa nosta; e in custu contu, mi parrit bastanti craru, no nci podeus ponni, no nci podeus stichiri su campionau de sa Sèrie D, fadendi su contu ca medas partidas de custu campionau, in custa categoria, si giogant no feti innoi in Sardìnnia, ma puru me is atras regionis de s'Italia. 

E serru is chistionis acapiadas a su mundu de sa Primu Categoria, andendi a castiai, impari a bosatrus, cumenti funt postas is cosas po su chi pertocat sa Lista D: totus is ogus, o giai, ant a essi apitzus de is de su Istintinu, chi ndi funt cabaus pròpriu cust'annu, apustis de essi fatu annus e annus de sighiu in su campionau de sa Promotzioni; nc'at a essi de cumprendi, in prus, cumenti s'ant a cumportai (est a narai: su chi ant a arrannèsci a ndi bogai aforas) is de su Valledoria (ca s'annu passau funt partius po ndi cassai su primu postu de sa lista, ma depint ai tentu una biga manna de strobbus, de arroris e de problemas, ddi naraus diaici), is de su Badesi e, mescamente, is de sa Lanteri, ca s'annu passau si dda funt giogada, fintzas a is ùrtimas giorronadas de su torneu, impari (o contras, chi si praxit de prus mancai diaici po cumenti sonat) a is de su Monte Alma (ca invècias cust'annu currint in su campionau de sa Promotzioni, e fait a narai, immoi chi nci seus, ca is cosas ddis funt andendi beni meda, fadendi su contu ca sa scuadra sighida de Falchi est arrannèscia a binci is primus duas partidas, me is primus duas bessidas chi ant fatu fintzas a immoi po su chi pertocat su campionau). Is de su Porto Torres puru iant a podi tenni totus is cartas bonas po ndi pesai una stagioni de importu, chentza de si ndi scaresci de is de su Sorso, is de su Malaspina e is de s'Olmedo. 

E immoi chi seus arribbaus a custu puntu de s'artìculu, de sa chistioni e de sa lega, deu creu ca sa cosa mellus chi si podit fai, po acabbai, est cussa de andai a castiai cumenti funt postas is cosas po su chi pertocat su mundu de sa Segunda Categoria, a partiri, duncas, de is datas innoi s'ant a giogai is partidas, fadendi giai su contu, po incumentzai, ca is scuadras de sa Segunda Categoria ant a tenni calincunu fini de cida de pàsiu in prus de su chi at a tocai, de su chi at a spetai a is scuadras chi ant a curri in su campionau de sa Promotzioni, de s'Ecellenza e, cumenti eus biu fintzas a immoi, a is scuadras de sa Primu Categoria puru. 
E duncas, sa primu nova chi si potzu donai est ca, eia, cumenti s'apu giai arremonau in custu artìculu etotu, is scuadras de sa Segunda Categoria puru ant a torrai a incumentzai a curri, cun is giogus, custu fini de cida chi at a benni, e immoi fiant, diaderus, una bella pariga de annus ca no incumentzant is campionaus impari a is de sa Primu Categoria e duncas, eia, in s'ùrtimu fini de cida de cabudanni, fadendu su contu ca fiant costumadas a torrai a partiri cun is giogus feti me in su primu fini de cida de su mesi de ladàmini. 

E duncas, acoitu e acudu a si narai ca po su chi pertocat sa lista de partidas de s'andada, is scuadras de sa Segunda Categoria ant a curri impari, ddi naru diaici, cun is scuadras de is atrus campionaus, e duncas, eia, nd'ant a cabai in campu dònnia, dònnia fini de cida, chentza de ndi sartai nemmancu unu, fintzas a su binti de su mesi de idas, chi at a essi s'ùrtimu domìnigu de partidas ainanntis chi nd'arribbit su Nadali (e prus scriu custa cosa, e prus mi benit s'afròddiu po una de is festas prus togas e prus drucis chi nci funt aintru de s'annu, mancai ammanchint ancora calincuna cosa cumenti a tres mesis, e no funt pagus de seguru); apustis de is festas. is giogus de sa Segunda Categoria ant a torrai a partiri su dexi de su mesi de gennàrgiu, cun sa primu bessida chi pertocat sa lista de partidas de sa torrada; e tocat a fai su contu, puru, immoi chi nci seus, ca po su chi pertocat su campionau de sa Segunda Categoria nc'ant a essi de giogai trexi giorronadas (e no cuindixi cumenti me is campionaus de sa Primu Categoria e de sa Promotzioni), po seti partidas in totu in dònnia giorronada. 
E duncas, po su chi pertocat, sèmpiri, sa stagioni de is scuadras chi ant a curri in su campionau de sa Segunda Categoria, is novas de importu prus mannu nd'arribbant po sa segunda parti, est a narai, po sa lista de partidas de sa torrada: chi est berus (cumenti est berus) ca po su mesi de gennàrgiu nc'ant a essi partidas in dònnia fini de cida (po su spàssiu de is tifosus, ca ant a tenni una manera toga meda de si spreviai me in su mesi prus fridu, e prus tostau, po su chi mi pertocat, de s'annu), est a narai, duncas, su dexi, su dexesseti, su binticuatru e su trintunu; in su mesi de friàrgiu, invècias, is giogus ant a partiri feti su catodixi, candu eus a essi, 'tendei 'tendei, giai in su perìodu de sa caresima, e duncas, eus incumentzai a fai su contu de is coranta diis chi ant a mancai po nci lompi a sa Pasca Manna; e duncas, bollit narai ca su sabudu innoi is campionaus de sa Segunda Categoria abarrant frimus, nc'ant a essi is festas po su Carrasciali. E fadendi su contu ca is giogadoris diletantis ndi cabant in campu po su spàssiu chi nd'arricint, e no de seguru po trabballu, o po incasciai una surra manna de dinai cumenti, invècias, sucedit e capitat, biaus issus, a is giogadoris professioneris chi currint, po nd'arremonai unu, po arremonai su torneu prus mannu de totus, in su campionau de sa Sèrie A, e intzandus nc'est de fai su contu ca po is festas de su Carrasciali is giogadoris diletantis sardus iant a podi fai a malus, est a narai ca iant a podi ponni is allenamentus e su giogu de sa bòcia de una parti, e preferriri de si bufai, mancai, una tassa de birra in prus, una tassa de binu in prus, cun totu cussu chi custu pertocat.
E nc'est de narai ca is de sa Federatzioni de su Giogu de su Càlciu funt sèmpiri atentus a cuncodrai su calendàriu circhendi de rispetai is giogadoris, circhendi de rispetai is impegnus (o impignus, cumenti si iat a podi scriri, puru, sighendi e pighendi po bonu su chi mi consillat su fueddàriu, mancai deu apa sèmpiri intèndiu, innoi in bidda, su fueddu cun sa "E", e diaici nd'aprofitaus puru po fai unu pagheddeddu de grammatica, ca mabi no s'at a fai de seguru) chi tenint, e ddu scieis (ddu scieis mellus de mei puru) ca innoi in Sardìnnia, e mescamente in certas zonas, e mescamente in sa zona de su Cab'e susu (cumenti seus costumaus a dda tzerriai innoi in Campidanu), su Carrasciali benit a essi unu de cussus impegnus de importu prus mannu de totus. 
Su mesi de friàrgiu, a fai beni is contus, at a essi cussu prus poberu de partidas tra totus is noi mesis de sa stagioni (e seu chistionendi, feti, e si ddu torru a arrapiti: feti!, po su chi pertocat su campionau de sa Segunda Categoria), fadendi su contu ca su campionau s'at a frimmai torra su bintotu puru, e custu bollit narai, intzandus, ca nc'ant a essi partidas su bintunu (e megu a chistionai sèmpiri de su mesio de friàrgiu) e apustis su seti de su mesi de martzu, su catodixi de su mesi de martzu e apustis nc'ant a essi is pausas, e duncas, su pàsiu, siat po su fini de cidas de su bintunu (innoi nc'at a essi de sighiri su Trrofeu de is Regionis, ca tra is atras cosas s'at a giogai innoi in Sardìnnia etotu, e custa mi parrit una nova de importu mannu meda, chi ancora, peròu, no si ia donau), e su fini de cida avtu, chi at a essi cussu de sa Pasca Manna. 

E duncas, a fai beni is contus nci poneus pagu: is scuadras de sa Segunda Categoria in su mesi de martzu nd'ant a cabai in campu feti duas bortas e ant a torrai a partiri cun is giogus su cuatru de su mesi de abrili, e no s'ant a frimai prus fintzas a arribbai a su duus de su mesi de maju, chi at a essi sa dì innoi s'at a serrai cussa chi seus costumaus a tzerriai "stagioni regolari". 

E po oi, duncas, eus fatu su contu, po beni, chentza de si perdi nemmancu una virgula, de totu su chi s'abertat po sa stagioni de su duamilla e bintises – duamilla e bintiseti, e immoi m'auguru feti (e si auguru) ca totus is tifosus sardus potzant tenni sa saludi e sa gana bona po sighiri sa scuadra de su coru cosa insoru. E cun custu serru s'artìculu po custa cida e chi su Cielu at a bolli custu beni po mei, si torraus a ligi (cumenti si iat a podi narai, e cumenti seu narendu, de su restu) tra seti diis a partiri de oi, cun su primu artìculu de is Novas po su chi pertocat su de dexi mesis de s'annu (e gei currit pagu su tempus!), e duncas, eia, po su chi pertocat su mesi de ladamini. In s'interis chi abertais, si imprassu a forti.




Attività realizzata col contributo della Regione Sardegna. IMPRENTAS 2025-2026. LR 22/2018 art. 22