Arragodus: su bisu ad ogus obertus de is de s'Uda; is campidanesus passant de sa de Tres Categoria a sa Promotzioni in tres annus

E duncas, a cantu parit, de su chi ndi potzu cumprendi, nci seus po custa cida puru: est giòbia e, cumenti dònnia giòbia de s'annu (chentza de ndi sartai nemmancu unu, est craru!), in su giàssu de su Diàriu Sportivu agatais s'artìculu chi ndi pesu in sardu campidanesu (o, po ddu narai mellus puru, su sardu chi si fueddat in Bidd'e Sorris, chi est una biddixedda chi abarrat a binti-binticincu chilometrus a nors de Casteddu etotu): s'ispera cosa mia (e chi est s'ispera de is de sa Regione Autonoma de sa Sardìnnia, duncas, ca funt cussus chi ndi funt pesendi su bandu IMPRENTAS po circai de agiudai sa lingua cosa nosta a no sparessi e a no si morri, chi cumprendeis su chi seu circhendi de si narai) est cussa de si regalai una mes'oredda selena (custu est su tanti de su tempus chi serbit po ligi totu su chi ndi bogu aforas, ma mancai bosatrus seis prus abbilis de su chi creu e nci poneis prus pagu tempus puru a arribbai a sa fini) e, mancai, s'ispera est custa, arrannèsceis a fai unu pagheddeddu de esèrcitziu puru. E si cumprendit ca, de su chi scieus, a su mancu, innoi in Sardìnnia cussus chi fueddant su sardu, aintru de sa dì, funt sèmpiri prus pagus, fadendi su contu ca a scola su sardu si chistionat pagu e nudda, a s'universidadi prus pagu puru, e in famìllia chistionaus su sardu, candu is cosas si andant beni, feti candu seus arrannegaus. E duncas s'abarrant (a bolli essi fortunaus) feti cussus cuatru o cincu fueddus chi, mancai, si ndi bessint de sa buca giai giai pò sbàlliu, chi sigheis su chi seu narendi; e sa cosa ballit feti po is personas prus matucas (po is beciteddus, cumenti ddus estus a podi tzerriai, isperendi ca nesciunu tèngiat de murrungiai o si intendat ofèndiu), fadendi su contu ca is pipius e is piciocheddus chistionat in italianu, in ingresu, mancai puru, ma de su sardu, giai giai, nesciunus si nd'arregodat nemmancu ca esistit. E chi no ddu chistionaus nosu, su sardu, in custu mundu, chini tialu ddu iat a depi chistionai? Mancai, custu est su parri miu, sa genti no tenit prus nesciunu importu de abarrai a fueddai in sardu; ma mancai, chi calincunu sighit a ddu fueddai, podit fai benni sa gana a is atrus puru. Ma chi no nc'est prus nemus chi chistionat su sardu, intzandus sa lingua benit a si morri. Po no chistionai, duncas, de is chi dda sciint ligi (pagus meda), poita a ligi in sardu, mescamente chi no ses costumau a ddu fai, benit a essi una cosa fadiosa meda (ligi calincunu artìculu in sardu, si cumprendit, po medas personas abarrat prus fadiosu de ligi su pròpriu artìculu, ma scritu in italianu); po no chistionai (e cun custu acabbu puru) de is chi ddu sciint scriri, ca ant a essi una parighedda (ddi nau diaici) apitzus de su milioni e mesu de cristianus chi s'agatant in s'isula in dì de oi. 

Duncas, is cosas po su chi pertocat sa lingua nosta no funt postas beni, ma dònnia unu de nosu iat a podi fai calincuna cosa: po incumentzai, si iat a podi circai de ddu chistionai de prus, mancai me is butegas, me in sa bia, candu s'atobiaus cun is amigus, cun is bixinus de domu o, mescamente, candu seus impari a sa famìllia cosa nosta e, mancai, po chini ndi tenit (po chini tenit custu prexu, chi mi permiteis de giogai unu pagheddeddu a fai su poeta), si iat a podi chisionai cun is fillus (e is fillas); ca su de imparai una lingua candu ses pitichinninniu benit a essi prus facili (e si cumprendit) e duncas, benit a essi una cosa de importu mannu; e in prus, estus a podi ligi calincuna cosa in sardu dònnia dì, ma feti unu pagheddeddu, po no s'arrosci prus de su tanti chi serbit, e po no si fadiai tropu. E duncas, mi praxit a pentzai ca, scriendi custu artìculu, seu donendi una manu de agiudu po circai de no fai sparessi su sardu de custu mundu: e ddu sciu ca s'artìculu cosa mia est feti unu stìddiu de acua in su mari (cumenti si iat a podi narai, furendindi su dìciu ca arremonaus fatu fatu candu chistionaus in italianu), ma de calincuna parti, mi megu a solu a solu, eus a depi partiri cun custa faina.

E duncas, chi seis costumaus a ligi is artìculus chi ndi pesu in sardu, e chi ndi bessint su giòbia (o chi nd'eius lìgiu a su mancu feti unu) scieis ca, impari a is chistionis acapiadas a su mundu de su giogu de sa bòcia de is diletantis (chi est sa faina, sa lega de importu prus mannu, e si cumprendit, po su giàssu de su Diàriu Sportivu), mi praxit (e meda puru, fintzas a m'amachiai, duncas) a nci stichiri cussus chi, cun su tempus, apu incumentzau a tzerriai contus e contixeddus o, chi si praxit de prus cumenti sonat su fueddu, stròllichiminis. E nci nd'est po totus, ca sa conchitedda mia est prena fintzas a cucuru de chistionis, gràtzias a totu su chi agatu me is libbrus chi ligiu (creu chi siat unu costumu bonu, ddi nau diaici, su de ligi unu pagheddeddu, mancai una pariga de paginas feti, dònnia noti ainnantis de si nd'andai a crocai) e, puru e mescamente, gràtzias a totus is cosas chi mi contant is atrus. E duncas, scieis puru ca incumentzu is artìculus chistionendi de su tempus chi fait (chi proit o chi no proit, chi fait tropu basca o tropu frius, po fai un esèmpiu, isperendi ca si cumprendat su chi si bollu narai) e de su tretu chi eus fatu in un annu (e duncas, de su tempus chi passat, e mancu mali chi sighit a andai ainnantis, e ballit po mei, ca scriu, e po bosatrus, ca ligeis). 

E duncas seus arribbaus, a cantu parit, a s'istadi puru, a sa stagioni prus druci e prus spassiosa (mescamente po is piciocheddus prus piticheddus) chi ddoi est aintru de s'annu. No abarru innoi a si domandai chi seis prexaus de su tempus chi est fadendi, ca tanti, po su chi pertocat su tempus etotu, no seus mai cuntentus: a candu fait tropu frius, a candu fait tropu basca; a candu proit tropu (e no podeus bessiri de domu nemmancu po trinta segundus), a candu no proit nudda (o giai nudda), e intzandus nd'arribbant is daboris, ca s'acua no bastat po totus, chi pentzaus, mescamente, ca in s'istadi no nc'est de pentzai feti a nosu, feti a s'acua chi si bufaus (e manigiaus) nosu ca in Sardìnnia nci biveus, ma nc'est de pentzai puru a is turistas chi nd'arribbant po si vai is vacantzas, cumenti ddas tzerriaus. E unu amigu miu, brullendi, fiat narendi ca, chi s'acua no depessit bastai po totus (cumenti funt narendi is sindigus de meda comunus chi ddoi funt in s'isula, e custu ddu funt arrepitendi giai de su beranu, a nai sa beridadi), intzandus is turistas si iant a podi portai s'acua de domu (ddu naraus po brullai, po arriri, si cumprendit, berus est?), siat po si sciacuai apustis de una giorronada a mari (e cantu est bellu su mari de sa Sardìnnia gei ddu scieus beni), o apustis, ballit aguali, de una passillada in logu de montagna, e siat po bufai candu tenint sidi. 
E ddu torru a narai: seu brullendi, ma ia a bolli chi fessit una brulla puru sa chistioni acapiada a s'acua, chi cust'annu, de su chi funt narendusì (e de su chi ndi podeus cumprendi) benit a essi pagu meda, mescamente chi pentzaus a is annus passaus. E duncas, in calincunu modu nci dda eus a fai, mi megu a solu a solu, e custa est s'ispera prus bona chi ndi potzu bogai aforas po oi, a su mancu. E duncas, ddu sciu beni ca calincunu de bosatrus at a essi giai domandendusì: e ita nci brintat totu custu cun un artìculu chi iat a depi chistionai de bòcias, de partidas, de resultaus e, mescamente, de gol? E deu si potzu narai ca, eia, teneis arraxoni, nci brintat pagu meda, ma s'ispera mia, candu chistionu de atras legas chi mancai no funt acapiadas a strintu cun su mundu de is giogus de is diletantis sardus, est cussa de ndi cassai s'atentzioni, puru, de totus cussas personas (e mi parit de cumprendi chi no funt pagus) chi, mancai, no sighint dì po dì is fainas de is scuadras, de is assòtzius de bòcia chi ddoi funt giai giai in dònnia bidda de sa Sardìnnia, ma tenint su prexei, mancai, de ligi calincuna riga scrita in sardu. E mancai, fadendi custu giogu, benit prus facili puru (est cussu chi mi auguru deu etotu, de su restu) a fai a cumprendi, a is personas chi mancai no ndi sciint nudda, de s'importu mannu ca su sport, e mescamente su giogu de sa bòcia po is diletantis, tenit po is piciocheddus, po cussus giòvuneddus, po incumentzai, fintzas a arribbai a cussus prus matucus. De su restu, ddu scieis: su giogu de sa bòcia in dì de oi est una faina chi pertocat meda genti, e sa cosa prus toga de su mundu de is diletantis, a su mancu custu est su parri miu, est ca cussus chi ndi cabant in campu su domìnigu, po giogai is partidas, funt, est craru, is pròprius piciocus chi biis in giru in sa bidda cosa tua. Sa cosa prus toga, deu creu, est pròpriu ca is grandus campionis de sa Sèrie A, cussus chi abarraus a castiai a totu dì, mancai a sa televisioni etotu, parint giai giai a trassa de atoris famosus (chi mi permiteis de manigiai custu fueddu, a su mancu); est a nai ca no capitat giai mai de ddus biri in giru me is bias de is biddas o de is citadis; faint sa vida de is arricus e duncas, po su prus, andant feti me is logus innoi ddoi funt atrus arricus cumenti a issus. No capitat giai mai de atobiai unu grandu campioni in una butega, o in unu tzillereddu, po si fai un esèmpiu e po circai de si fai a cumprendi su chi si bollu narai; cun is giogadoris diletantis, invècias (e mi parit craru), sa genti tenit un antru tipu de acapiu; su portieri de sa scuadra de sa bidda cosa tua podit beni essi su piciocheddu chi, a su mengianu, ti bendit su pani, o sa fruta o sa birdura; e s'atacanti prus forti de sa scuadra, cussu chi mancai arrannèscit a ndi pesai una zuba manna de gol, iat a podi essi cussu chi ti ghetat sa benzina aintru de sa machina, o cussu chi t'arrangiat is gomas, o s'idràulicu. Duncas, si iat a podi narai (e cun custu dda acabbu de mi stròllicai e de si ndi furai, mancai, su tempus chi mancai no teneis) ca su giogu de sa bòcia de is diletantis est de sa genti, pertocat sa genti; su giogu de sa bòcia de is professioneris, de is grandus scuadras, de is grandus assòtzius sportivus chi currint in sa Sèrie A, pertocat is arricus, e andat ainnantis no tanti gràtzias a sa passioni, ma gràtzias a su dinai. Su giogu de su càlciu de is professioneris est giai giai prus sìmili a unu spetaculu: ddu podis castiai, ma no ddu podis tocai cun is manus cosa tua. Si cumprendit. Podis feti fai su aspetadori (cumenti si narat in sardu), ma su chi castias, is giogadoris chi ndi cabant in campu, duncas, est cumenti chi bivant in un antru mundu. Unu mundu innoi su prus de sa genti no podit brintai. 
Is assòtzius de càlciu de is diletantis, invècias, bivint gràtzias a s'agiudu de is personas de sa bidda etotu, chi mancai giogant a fai is sponsor (cumenti si narat in ingresu); est a nai, mellus (e in sardu), ca po fai andai ainnantis un assòtziu serbit dinai (po pagai, mancai, is camiseddas chi is giogadoris si ponint in pitzus po giogai is partidas, po pagai is iscritzionis a is campionaus, po pagai sa benzina chi serbit po manigiai is machinas e acumpangiai totus is giogadoris a giogai is partidas aforas de domu. E duncas, is impresas de is biddas (ddas tzerriu diaici) funt is primus tifosus de is scuadras de càlciu, fadendi su contu ca nci ponint calincunu arriabeddu po agiudai, po donai una manu de agiudu a is dirigentis e a is presidentis de s'assòtziu. 
E candu unu giogadori giogat in sa scuadra de sa bidda cosa sua, si cumprendit, sa passioni chi nci ponit est ancora prus manna; e candu unu fait su tifu po sa scuadra de su coru cosa sua, mescamente chi sa scuadra de su coru cosa sua est pesada cun is piciocheddus de sa bidda etotu, intzandus is sentidus chi nd'arribbat a provai, a si bivi, funt ancora prus mannus. E si cumprendit. 
E pròpriu po custu (e immoi dda serru po diaderus), ca in totus custus dexi annus (e prus) ca apu passau trabballendi po su giàssu de su Diàriu Sportivu, e duncas, in totus custus dexi annus chi apu passau sighendi is partidas de is diletantis, mi ndi seu acatau de s'importu chi tenit su giogu po sa vida de is personas, siat po cussus chi cabant in campu (e po is allenadoris, puru, est craru) e siat po cussus chi castiant is partidas de is tribunas, e chi tenint s'ocasioni (cosa chi ballit puru po is giogadoris, si cumprendit) de si spreviai po unu pagheddeddu, mancai impari a is atrus tifosus etotu. E duncas, cun su giàssu de su Diàriu Sportivu (calincunu de bosatrus custa cosa dda sciit giai, po totus is atrus: andu a si torrai a ispiegai cumenti funtzionant is cosas) sigheus is fainas de is scuadras chi currint me in su campionau de s'Ecellenza (chi est su prus mannu, su de importu prus mannu, po ddu narai mellus puru, tra totus cussus chi si giogant in Sardìnnia), passendi de su campionau de sa Promotzioni, e fintzas a arribbai a is campionaus de sa Primu Categoria e de sa Segunda Categoria puru. Mi dispraxit a depi narai ca no arrannèsceus a sighiri is campionaus chi pertocant sa de Tres Categorias, ca su trabballu ca depeus fai benit a essi fadiosu meda giai diaici, e s'eis a scusai chi no acudeus a sighiri totus is scuadras de bòcia chi ddoi funt in dì de oi in s'isula cosa nosta, e chi currint, est craru, me is campionaus chi ndi pesant is de sa Federatzioni Italiana de su Giogu de su Càlciu, is de sa Lega Natzionali de is Diletantis impari a is de su Cumitau Regionali Sardu. E duncas, cumenti scieis beni (chi eis lìgiu a su mancu unu de is artìculus chi ndi funt bessius in custas primus cidas de s'istadi), candu acabbant is giogus, candu si studant (mi benit de ddu narai diaici puru, gioghendi unu pagheddeddu a fai su poeta) is campionaus, candu si serrant is stagionis, sa cosa mellus chi podeus fai est cussa de andai a chistionai de is scuadras chi nd'ant cassau su primu postu de sa lista e chi, duncas, funt arrannèscias a ndi cassai s'artziada de sa categoria, chi est sa cosa prus spassiosa, a sa fini, a fai beni is contus, de totu sa chistioni, de totu su giogu. 
Nci funt scuadras, difatis, ca in una pariga de annus, arrannèscint a fai, a ndi pesai una cursa toga meda: est a nai ca, mancai, partint de sa de Tres categorias e ndi artziant fintzas a sa Promotzioni ca, si cumprendit dda su chi eus nau ainnantis, est su segundu campionau prus mannu tra totus cussus chi si giogant a livellu regionali, chi mi permiteis de manigiai custus fueddus. E duncas, candu arrannèscis a ndi artziai de categoria, dònnia annu, mancai po duus, tres annus de sighiu, benit a essi unu prexu mannu po s'allenadori, po incumentzai, ca est cussu chi tenit in manu is crais de sa scuadra e est cussu chi donat una filosofia de giogu (mi benit de dda tzerriai diaici) a is piciocus cosa sua, ma est unu prexu, e un afròddiu mannu meda, si cumprendit, puru e mescamente po is piciocheddus, ca tenint sa possibbilidadi de si cunfrontai, de annu in annu, cun aversàrius sèmpiri prus fortis (prus ndi artzias de categoria, mi parit una chistioni bastanti lògica, e prus is aversàrius cosa tua funt bravus, e duncas, fait a narai custu puru, prus is aversàrius cosa tua funt fortis e prus tui depis fadiai, e trabballai, chi ndi bolis cassai su primu postu de sa lista). 

E duncas, apustis de totu su chi s'apu contau fintzas a immoi (e mi eis a scusai po totu is stròllichiminis chi nc'apu postu in s'artìculu de custa cida), deu pentzu ca siat arribbau su momentu po incarrerai a si contai (e fiat ora puru, s'at a megai calincunu de bosatrus) cumenti funt andadas is cosas cust'annu a is de s'Uda, chi ant serrau sa stagioni a su primu postu de sa lista cosa insoru (chi fiat sa Lista A, in su campionau de sa Primu Categoria, chi est cussa chi pertocat totus is scuadras chi ddoi funt in sa zona de Casteddu, e in prus, pertocat totus is scuadras ollastrinas puru). E m'est bènniu in conca de chistionai de s'assòtziu campidanesu pròpriu poita sa storia cosa insoru cratzat, e beni puru, cun su chi s'apu narau pròpriu immubagora, est a nai ca parit una cosa aforas de conca, ma tres annus fait is udesus curriant in su campionau de sa de Tres categorias (chi est su prus pitichinninniu de totus) ma s'annu chi at a benni, e seus chistionendi duncas de sa stagioni de su duamilla e binticuatru – duamilla e binticincu, ant a tenni sa possibbilidadi de giogai impari a is grandus scuadras de sa Promotzioni. 

Sa primu cosa chi podeus fai, intzandus, po cumprendi cantu is de s'Uda funt stètius bravus, e fortis puru, est a andai a castiai, impari, si cumprendit, is numerus chi nd'ant pesau is piciocus sighius, po cust'annu puru, de Carletu Saba, chi est unu de is allenadoris prus giòvuneddus chi ddoi funt in dì de oi in su mundu de su càlciu de is diletantis sardus, ma chi est giai fadendi spantus, cumenti si narat. 
E duncas, is biancus-birdis ant serrau sa stagioni, apustis de calincuna cosa cumenti a trintaduus bessidas, cun setantases puntus in buciaca (e no funt pagus, gei ddu cumprendeis a solus puru, deu creu pròpriu) e chi ndi funt arribbaus gràtzias a binticuatru partidas bintas e a cuatru partidas chi, invècias, ant serrau cun su resultau in paridadi. A fai is contus nci poneus pagu meda (chi is cosas de scroxai in custa fida fessint totus diaici facilis fortzis estus a bivi in paradisu, mi benit giai giai de narai, gioghendi unu pagheddeddu a fai su poeta): apitzus de is trintaduas partidas chi ant giogau, nd'ant pèrdiu feti seti. Immoi chi seu arribbau a custu puntu de sa chistioni, si potzu narai, acoitu, ca sa fortza de una scuadra (e mescamente: sa fortza de sa scuadra chi ndi cassat su primu postu de sa lista) si cumprendit, mellus, de sa fortza de is aversàrius etotu; est a nai, ca prus s'aversàriu cosa tua est forti e prus benit a balli sa bìncida chi nc'arrannescis a ndi cassai. E duncas, si ddu nai immoi etotu, a su segundu postu de sa lista agataus is de sa Baunese (sa scuadra chi nd'ant pesau in Baunei, si cumprendit, berus est?), chi ant serrau sa stagioni cun setantacincu puntus in busciaca, chi funt feti unu in mancu de is chi nd'ant cassau is udesus; iat a fai a narai, puru, ca is de sa Baunese si funt arrèndius feti a s'ùrtimu minutu de giogu, cun sa chistioni po su primu postu chi s'est serrada, est craru, a s'ùrtima giorronada. Is de s'Uda funt stètius is ùrtimus, tra totus is scuadras chi ant bintu su campionau de sa Primu Categoria, a fai sa festa po s'artziada in su campionau de sa Promotzioni, ma sa festa est stètia toga meda, e gei si cumprendit, ca prus disigias e abertas una cosa (ballit po totus, mannus e pipius, e ballit po una surra manna de cosas, e no feti po su chi pertocat su giogu de sa bòcia, gei si cumprendit), e prus nc'agatas prexu candu arrannescis a dda cassai. A su de tres postus de sa lista (si nau custu puru) agataus un'antra scuadra ollastrina, e seus chistionendi de is de su Cannonau de Jerzu (s'assòtziu, gei si cumprendit beni, ma deu seu innoi po si crariri mellus is cosas, nd'at pigau su nomini de cussa calidadi, bona meda, de àxina chi crescit in cussus logus etotu, ca serbit po ndi bogai aforas, deu pentzu ca su fueddu chi cratzat mellus siat pròpriu custu, cussa calidadi fentomada meda, in totu su mundu, de binu nieddu), chi ant serrau sa stagioni cun calincuna cosa cumenti a sessantaseti puntus in buciaca, chi funt, peròu, noi in mancu de is chi tenint is de s'Uda (e no funt pagus, gei si cumprendit, deu pentzu). 

E duncas, sa cosa mellus chi podeus fai a custu puntu, po cumprendi beni cumenti funt andadas is cosas a is udesus, est cussa de andai a arraxonai, impari, apitzus de totus is cosas chi m'at torrau a contai e m'at scoviau, apitzus de sa scuadra cosa sua etotu, est craru, e apitzus de sa stagioni chi nd'ant pesau, s'allenadori de is biancus-birdis, est a nai Saba (chi s'apu giai arremonau, de su restu). 

E duncas, si potzu narai ca nd'apu pesau una bella ciaciarrada cun Saba pròpriu sa dì avatu de s'ùrtima partida chi ant giogau, fiat su doxi de su mesi de maju (po essi prus pretzisus, ca ddu scieis, de su restu, ca su trabballu de unu giornalista est bonu candu est pretzisu, a su mancu po su chi fait), in domu de is de s'Asseminese (una de is duas scuadras mannas chi ddoi funt in dì de oi in sa citadi de Assèmini, gei si cumprendit, deu pentzu pròpriu), cun is allenus chi nd'ant cassaus is ùrtimus tres puntus de sa stagioni e chi funt stètius cussus chi ammancant, intzandus, po ndi cassai sa bìncida finali. E chini mellus de un allenadori, mi domandu fatu fatu, podis sciri, e si podit contai, cumenti funt andadas is cosas chi pertocant sa scuadra cosa sua? «Si seus cuncodraus po s'ùrtima bessida de s'annu sciendu beni ca iat a essi stètia sa partida de importu prus mannu tra totus cussas chi eus giogau cust'annu, fadendi su contu ca de cussu resultau dipendiat sa bìncida finali e, duncas, sa bìncida de su campionau. Eus provau a mantenni sa conca sbuida e limpia de totus is pentzamentus lègius, de is dudas e mescamente de totus is timorias, ma no est stètia una cosa facili, fadendi su contu, pruschetotu, ca sa partida chi eus giogai contras a is de su Cannonau de Jerzu, sa cida ainnantis (fiat, duncas, sa bessida de su cincu de su mesi de maju), si nd'at furau, ddi nau diaici, una surra manna, una zuba de energias. Is de s'Asseminese, de su restu, no s'ant regalau nudda, e nci iat a mancai atru puru; in sa rosa cosa insoru tenint medas giogadoris de importu, bravus e, mescamente, cun un'esperièntzia manna a is pabas; pentzu, po nd'arremonai feti duus, a Cristian Cacciuto e a Silvio Fanni, ma sa lista iat a podi essi meda, ma meda prus longa, e si cumprendit. In prus, chi boleus narai sa beridadi, chi boleus contai is cosas cumenti funt diaderus, eus giogau in unu campu chi no fiat in bonas cunditzionis, cumenti si iat a podi narai, puru. Eus giogai in su campu de Santa Lucia, ma no eus tentu modu de giogai cumenti scieus, fadendi su contu ca is giogadoris cosa mia tenint peis bonus, ma chi t'agatas a giogai in unu campu totu ghetau a pari, o mabi postu, intzandus benit a essi totu prus dificili. Est stètia una partida chi eus giogau, e bintu, prus cun su coru, cun is dentis e cun is ungas, cumenti si narat, invècias ca cun is peis.  Po bona sorti cosa nosta, seus arrannèscius a cassai su primu gol giai in su primu tempus de sa partida, ma su pecau prus mannu est stètiu cussu de no essi stètius bonus a serrai sa partida; est a nai chi, cun su segundu gol in buciaca, festus potziu essi prus selenus, cumenti si narat. Chi pròpriu si depu narai sa beridadi, fait a nc'aciungi puru ca is de s'Asseminese no s'ant donau strobbus mannus meda, est a nai ca seus arrannèscius a si ndi scabulli beni de is atacus cosa insoru, chentza sunfriri prus de su tanti. Peròu, candu no arrannescis a serrai sa chistioni, si cumprendit, giogas cun sa timoria chi calincuna cosa potzat andai mabi: bastat pagu, bastat unu sbàlliu, mancai unu sbàlliu tontu, ddi nau deu, de unu giogadori, e nci fuias a s'abiga totu su trabballu chi nd'as pesau in una stagioni intera. Nosu, de su restu, sciestus ca depestus pentzai feti a sa partida contras a s'Asseminese: cumenti si narat, festus is meris de su destinu de s'Uda. De su restu, is de sa Baunese funt abarraus apicigaus a is carronis cosa nosta fintzas a s'ùrtimu segundu e immoi chi is bòcias si funt frimadas, cumenti si narat, potzu narai ca no est stètiu facili, ma pròpriu po nudda, arrannèsci a si ddus lassai a is pabas. A nai sa beridadi, is nieddus-asullus funt partius cun unu pronosticu bonu a coddu, chi mi cumprendeis su chi si bollu narai: fadendi su contu ca s'annu passau ndi iant cassau su segundu postu de sa lista, fiat normali a s'abertai ca cust'annu circhessint de fai una stagioni mellus de cussa passada; e s'ùnicu modu chi tenis de mellorai su segundu postu de sa lista, si cumprendit beni, est cussu de ndi cassai su primu. Ma is de sa Baunese no funt stètius is ùnicus aversàrius chi eus tentu cust'annu e chi curriant, pròpriu cumenti eus fatu nosu, po ndi cassai s'artziada de sa categoria. Deu creu chi nci siat su tanti po spendi, ddi nau diaici, una pariga de fueddus po is de su Cannonau de Jerzu puru, fadendi su contu ca nd'ant pesau, custu est pagu ma seguru, una segunda parti de sa stagioni toga meda, est a nai, mescamente, me in totus is partidas de sa lista de sa torrada. Si ndi depeus arregodai, intzandus, ca is de su Jerzu funt stètius bonus a recuperai calincuna cosa cumenti a otu-dexi puntus siat a nosu e siat a is de sa Baunese puru. Apustis de sa partida chi ant pèrdiu pròpriu contras de nosu, peròu, ant pèrdiu unu pagheddeddu sa gana bona chi teniant, s'afròddiu, e duncas si funt lassaus unu pagheddeddu andai, ma minescint is complimentus de totus is atras scuadras, po sa cursa toga meda chi funt stètius bonus a ndi pesai. E de su restu, nosu tenesut un ogu apitzus de is de su Jerzu e un ogu apitzus de is de sa Baunese. E pròpriu is partidas chi eus giogau cun is aversàrius prus fortis chi tenestus, ant fatu, ddi naru diaici, sa diferèntzia. In sa partida chi eus giogau contras a is de sa Baunese, ndi seus cabaus in campu cun sa bidea, crara meda, in conca, ca no podestus abarrai a buca asciuta; sa cosa de importu prus mannu, intzandus, fiat cussa de no perdi, de no lassai is tres puntus prenus a is aversàrius; sciestus, puru, ca is nieddus-asullus depiànt giogai un'antra bella pariga de partidas de importu, apustis de cussa chi teniànt cun nosu, fadendi su contu ca si depiant atobiai, ancora, cun is de sa Citadi de Ceraxius e cun is de su Jerzu puru, chi eus giai arremonau. Sa cosa de importu prus mannu po nosu – at sighiu a mi contai Saba – fiat cussa de mantenni is puntus de vantàgiu chi tenestus, pròpriu po cussu si podit narai ca su puntixeddu chi nd'eus arragotu sa dì ballit prus de s'oru. A nai sa beridadi, comentecasiat, is cosas si fiant postas beni po nosu, e acoitu, fadendi su contu ca seus stètius bonus a ndi cassai su primu gol de sa partida, ma apustis seus stètius pagu furbus, ddi nau diaici, candu is aversàrius cosa nosta nd'ant cassau duus gol gràtzias a duus tirus de frimu, cumenti si iat a podi narai. Po bona sorti cosa nosta, peròu, seus stètius bonus a ndi torrai a strantaxai sa partida, ddi nau diaici, chentza si fai pigai de su disisperu e de sa furighedda (chi est unu fueddu chi mi praxit meda meda po cumenti sonat, e chi ndi furriat su fueddu ca in italianu bessit cumenti a "frenesia". E custu po narai ca is fueddus sardus sonant, e beni puru, a trassa de cussus de is atras linguas. Ndr). De seguru, sa dì – at sighiu a mi contai Saba – ndi seus bèssius de su campu cun unu stìddiu de disprexei in su coru, mi benit de narai diaici, fadendi su contu ca nci fiat su tanti, custu est pagu ma seguru, po ndi cassai is tres puntus prenus, fadendi su contu ca festus bìncendi sa partida cun su resultau de unu a zeru. Ma andat beni diaici, de su restu, ti ddu torru a narai, sa cosa de importu prus manna po nosu fiat cussa de no perdi sa partida. E sa pròpria cosa, prus o mancu, si podit narai po sa isfida, po sa partida chi eus dèpiu giogai contras de is de su Jerzu: in cussu momentu fiat una partida de importu mannu e nosu ndi seus cabaus in campu cun sa bidea, in conca, ca sa bìncida fiat s'ùnica cosa chi si serbiàt; unu puntu, est a nai, mellus, iat a essi stètiu tropu pagu. In su primu tempus, fortzis, si seus fatus pigai unu pagheddu tropu de sa sprama, de is timorias, e candu giogas totu timi timi, cumenti si narat, intzandus no arrannescis a ndi bogai aforas totu su bonu chi, invècias, iast a podi fai. Peròu, fait a narai custu puru, bolestus regalai unu prexu mannu a is tifosus cosa nosta, fadendi su contu ca sa dì, a castiai sa partida, ddoi fiant calincuna cosa cumenti a otucentus personas. Duncas, bolestus giogai una partida bona e toga, e mancai spassiosa puru, po totu sa genti de sa bidda. Ma is de su Jerzu ant fatu a biri a totus cantu balliànt: a contus fatus, deu creu ca sa scuadra de Piccarreta fessit sa prus forti, sa rosa cun s'esperièntzia prus manna tra totus cussas chi ddoi fiant in sa Lista A. Fortzis, prus forti puru de sa rosa de is de sa Baunese. Nosu, in prus, tocat a narai custu puru, depestus fai is contus cun totus is giogadoris chi tenestus ingotus, strupiaus o aforas de is giogus po crupa de is scualificas, cumenti si tzerriant. Sa stagioni cosa nosta – at sighiu a mi contai Saba – est stètia prus trabballosa, prus fadiosa de su chi si podestus abertai, fadendi su contu ca eus dèpiu fai is contus cun seti giogadoris chi si funt strupiaus, e mabi puru: duus giogadoris si funt ingotus a su carroni, atrus tres, invècias, si funt arrogaus su genugu; Amorati, po nd'arremonai unu, chi est, tra is atras cosas, unu de is piciocus prus fortis chi tenestus in sa rosa, est abarrau chentza giogai po cincu mesis, sèmpiri po crupa de unu dannu a su carroni de su pei. No megu a circai scusas, cumenti si narat: est stètia una stagioni tostada meda e is atras scuadras ant fatu su doveri cosa insoru, ma is cosas si faint ancora prus grais, prus dificilis chi no nci podis mandai in campu is giogadoris prus fortis chi tenis in sa rosa cosa tua. E duncas, apu dèpiu contai apitzus, prus o mancu, de is pròprius undixi giogadoris, chi, nc'arribbais a solus, deu creu, e si cumprendit beni, no ant tentu sa possibbilidadi de si pasiai nemmancu po unu segundu, e custu po tres – cuatru mesis de sighiu. Candu giogas sèmpiri cun is pròprius giogadoris, intzandus is fortzas incumentzant a no nc'essi prus, chi mi cumprendeis su chi bollu narai. Sa partida chi eus pèrdiu contras a is casteddaius de su Vecchio Borgo de Sant'Elia s'est andada mabi propriu po crupa de custu motivu. Ma candu is cosas si faint tostadas, mancai prus tostadas de su chi pentzàst, intzandus depis abarrai selenu, po su chi est possibbili, poita sciestus puru, de su restu, ca torrendi a podi contai apitzus de totus is piciocus, de totus is giogadoris de sa scuadra, intzandus is cosas si iant a essi aderetzadas, e po fortuna est andau totu beni. Is de sa Baunese, de su restu, no ant mai bintu candu nosu eus pèrdiu e no nd'ant mai aprofitau, cumenti si narat. Custu bollit nai, duncas, ca si seus agataus a su primu postu de sa lista po totus is trintaduas giorronadas de sa stagioni. Immoi – m'at scoviau Saba a sa fini de sa ciaciarrada – depeus feti cumprendi, impari a is dirigentis de s'assòtziu, chi nc'est su tanti po sighiri cun custa aventura puru po s'annu chi at a benni, e duncas, puru in su campionau de sa Promotzioni. Cun is dirigentis, de su restu, tenestus in conca sa bidea de ndi artziai in su campionau de sa Promotzioni, ma chentza pressi: de seguru no tenestus s'obbrigu de nci artziai in tres annus, cumenti invècias eus fatu. Po cumenti seu fatu, peròu, e deu creu chi sa propra chistioni potzat balli po su presidenti e po is atras personas chi faint parti de s'assòtziu, cumenti ndi cassas una bìncida depis pentzai, acoitu, chentza perdi nemmancu unu segundu, a cumenti fai po ndi cassai un'antra. Deu potzu narai ca bivu in Uda de calincuna cosa cumenti a dexi annus e duncas nc'est su tanti po sighiri cun custu acapiu. Scieus giai, de su restu, ca su campionau de sa Promotzioni at a benni a essi meda prus tostau de cussu de sa Primu Categoria, pròpriu po custu depeus incarrerai acoitu cun is arraxonamentus po cumprendi cumenti cuncodrai sa rosa cosa nosta po su benidori». 






Attività realizzata col contributo della Regione Sardegna - IMPRENTAS 2023-2024. LR 22/2018, art. 22