Sa Cida Santa est arribbada e nci funt giai scuadras chi ant serrau is giogus po su primu postu de sa lista

E duncas, nci dda apu fata (chistionu po mei, est craru ma chi boleis si nci sticu aintru de sa truma de personas chi, pròpriu cumenti fia fadendi deu, fiant abertendi chi nd'arribbessit sa cida santa) a nc'arribbai a custu puntu de s'annu: su giòbia ainnantis de sa Pasca Manna, una de is cidas de importu prus mannu po totus is catolicus e is cristianus. E deu no potzu narai de essi pròpriu unu catolicu-cristianu perfetu, antzis: no andu in cresia su domìnigu, no andu a mi cunfessai a che su preidi, no pigu (est a nai, ca no fatzu, chi si sonat mellus puru) sa cumenioni (o cumanioni, cumenti dda tzerriàt sa bon'anima de mamma mia), e duncas, eia, no potzu narai de essi catolicu-cristianu, poita sa metadi (o prus de sa metadi, si cumprendit) de is cosas ca unu catolicu-cristianu fait (partendi, mescamente, de su de andai in cresia a intendi sa predica de su preidi), o iat a depi fai, po camminai, mi benit de ddu narai diaici, gioghendi giai giai a fai su poeta, in sa bia, in s'arrastu chi s'at lassau Gesù Cristu, de no ddas sigu. 
Peròu, nc'est de narai custu puru: mancai deu no mi potza intendi unu cristianu – catolicu a su centu po centu (antzis, nemmancu a su cincuanta po centu, chi boleus fai beni is contus), eia, mi praxit a sighiri sa caresima. Chi pròpriu si ddu depu narai, dda pigu giai giai cumenti chi fessit unu giogu, ma custu no bollit narai ca no fatzu is cosas cun seriedadi. Antzis. 
Mi intendu, in custu, cumenti cussus giogadoris chi currint me is campionaus de is diletantis, e chi duncas no ddu faint po trabballu o po su dinai, a trassa de su chi faint is giogadoris professioneris etotu, ma chi aintru de sa cida s'allenànt, e trabballant, e sudant, e si fadiant, po circai de si cuncodrai po is partidas de su domìnigu, cumenti chi fessint professioneris. 
Est a nai, cun su pròpriu impignu chi nci podint is professioneris, is giogadoris professioneris, mancai, chi giogant cun is grandus scuadras chi currint me in su campionau de sa Sèrie A, e chi faint su chi faint, no tanti po su spàssiu chi nd'agatant, cumenti faint invècias is giogadoris diletantis, ma po trabballu, e, tocat a ddu narai craru e tundu, po su dinai chi si bonint in buciaca. 

E duncas, eia, deu puru fatzu sa caresima, sigu is regulas chi sa cresia ponit po sa caresima, poita dda pigu a trassa de un esercìtziu, cumenti chi fessit un allenamentu, eia, eis cumprèndiu beni, un allenamentu po sa conca cosa mia, po s'anima, si iat a podi narai diaici, e po su corpus puru. 
Ca su de fai sa dièta, su de abarrai, mancai, chentza de papai, mancai feti po su cenabara, po is cincu-ses cenabaras chi ddoi funt aintru de sa cuaresima, iat a podi fai beni a su corpus, est craru, ma puru a sa fortza de volontadi, cumenti m'est benida de dda tzerriai, a trassa de cumenti si narat in italianu etotu. 
E duncas, e parit una brulla, dònnia annu (e sa cosa andat ainnantis de una pariga de annus, a si narai sa beridadi) m'agatu a sighiri is regulas, is dietas e totu su restu de is cosas chi andant fatas (e mescamente, is cosas chi NO andant fatas) mellus de cumenti iat a podi fai, mancai, unu catolicu-cristianu. 
Ma custu est un antra pariga de maigas, cumenti mi naràt sèmpiri babbu miu candu fia unu piciocheddu e, mancai, ammesturammu is chistionis apari. 

Sa cosa chi si bollu narai (e m'eis a iscusai po su fatu chi seu pàrtiu, a totu coddu, cumenti si narat innoi in Bidd'e Sorris etotu, cun totu custa biga de strollichiminis, ma chi eis giai lìgiu unu de is artìculus chi ndi pesu po is Novas de su Diàriu Sportivu e chi ndi bogu aforas dònnia, dònnia giòbia de s'annu, scieis giai cumenti andant is cosas) est ca, eia, tui ti podis allenai po centumila motivus, ma a sa fini, sa cosa chi contat, est ca candu dda acabas cun s'allenamentu, ses stancu mortu, cumenti si iat a podi narai. 
E po bona sorti, po fortuna (cumenti si iat a podi narai, puru), apustis chi acabat sa caresima arribbat su momentu puru, de sa festa, e de su pàsiu. 

E duncas, po oi puru s'apu chistionau, mi parit craru, de su tempus chi est passau, de su tretu chi eus giai fatu e si seus lassaus a is pabas. Fadendi su contu ca seus arribbaus a sa metadi de su de cuatru mesis de s'annu. 
E no mi parit nemmancu berus, si ddu torru a arrapiti, fadendi su contu ca sa caresima cust'annu est incumentzada su cincu de su mesi de martzu, e candu atacas cun una faina, mancai, ti parit totu cumenti chi no nci dda as a fai mai a nci lompi a sa fini, e invècias, candu ses po acabbai una cosa, e ti castias a is pabas, ti ndi rendis contu de totu su trabballu ca ses stètiu bonu a ndi pesai. 

E in custu, mi intendu a trassa de cussus piciocheddus, de cussus giogadoris chi incarrerant cun sa stagioni cosa insoru, e duncas, cun is allenamentus po si cuncodrai po sa stagioni noba, a sa metadi de agustu, e fadiant dònnia dì, po unu mesi interu, e poi faint noi mesis a curri avatu de sa bòcia, e avatu de is aversàrius puru, po is partidas, e sa stagioni est bella e fadiosa, gei ddu eis a sciri mellus de mei puru. 
E duncas, eia, seus arribbaus a sa metadi de su mesi de Abrili, seus intraus, giai de una parighedda de diis, a narai sa beridadi, in sa cida santa, e nci funt giai is primus scuadras chi funt fadendi sa festa po sa bìncida de is campionaus cosa insoru. 
E cun custu, mi parit craru, incumentzaus, po oi puru, a chistionai unu pagheddeddu de bòcias, e de resultaus, e de partidas, chi est sa farra, ddi naru diaici, de importu prus mannu chi si serbit po ndi pesai su pani (chi mi permiteis de giogai a fai su poeta, mancai feti po unu pagheddeddu) chi sforraus, dònnia dì, innoi in su giàssu de su Diàriu Sportivu, e sa cosa ballit po mei, ma ballit, puru, est craru, po totus is atrus collegas chi tèngiu. 

E duncas, eia, ia a podi incumentzai a si chistionai unu pagheddeddu de totu su chi nd'est bèssiu aforas in custas ùrtimas cidas de giogus, ma segumenti, cumenti s'arrapitu fatu fatu, de su restu, no sciu mai cali arrastu apa a sighiri, cali lega apa a pigai, ainnantis de mi ponni a ddu fai, duncas nc'est su tanti po crei, po pentzai, ca mi iant a podi benni in conca un antra parighedda de strollichiminis puru, a trassa, po si cumprendi mellus a pari, de is chi s'apu scritu pròpriu immubagora. 

A narai sa beridadi, m'est sèmpiri praxia custa cosa de circai de acapiai is chistionis chi pertocant su mondu de sa bòcia (ddu seu fadendi de una pariga de annus custu gioghiteddu, e potzu narai ca, a su mancu fintzas a oi, is cosas mi funt sèmpiri andadas beni) cun is chistionis chi, mancai, pertocant sa religioni catolica, o, po ddu narai cun atrus fueddus, cun sa storia de Gesù Cristu po cumenti dda ligeus me is Vangelus. 

Po si ndi contai una (e feti una, si ddu promitu giai de immoi), si potzu narai ca nci funt una biga de assòtzius chi mancai funt fallius, me is annus passaus, est a nai ca funt mortus, e chi apustis funt torraus a partiri, mancai gràtzias a s'agiudu de atra genti, de dirigentis nous, e chi mancai, cust'annu, e duncas, in dì de oi etotu, funt fadendi torra sa festa poita, mancai, ant bintu unu campionau. 
S'apu giai chistionau, de su restu (diaici, mancai, si cumprendit mellus ita seu circhendi de si narai), me is cidas passadas, de is de su Budoni, chi ant bintu su campionau cosa insoru, e duncas, su campionau de s'Ecellenza, apustis de nd'essi cabaus de sa Sèrie D. 
E duncas, eia, po un assòtziu, e po unu giogadori, e po un allenadori puru, est craru, est unu dannu mannu, unu disprexeri mannu meda su de ndi cabai de categoria (cumenti si iat a podi narai, e cumenti m'est bèniu de narai, de su restu), ma a sa fini, sa cosa de importu prus mannu, apustis chi nd'arruis (e sa cosa ballit, est craru, siat po su giogu de sa bòcia e siat po sa vida chi si depeus bivi dònnia dì), est pròpriu cussa de ndi torrai a artziai sa conca. 

Nci funt una biga manna de scuadras chi mancai depint torrai a partiri de sa de Tres Categorias (chi est cussa prus pitichinninnia tra totus is campionaus chi si giogant in s'isula, e chistionaus, est craru, de is campionaus de is diletantis, pesaus de is de sa Federatzioni Italiana de su Giogu de su Càlciu), chi est cumenti a nci cabai a s'inferru. 
Ma apustis, chi tui ses bonu a trabballai, e a crei apitzus de tui etotu, apitzus de su trabballu chi tui etotu megas a fai, eia, podit sucediri puru (cumenti sucedit, de su restu) ca s'annu apustis tui s'iast torra fadendi sa festa poita, mancai, nd'as bintu su campionau, e chentza, mancai (cumenti est sucèdiu, po si nd'arremonai feti duas, a is de sa Gioventù de Sarroch e a is de su Lauras, sa scuadra chi ant pesau in Luras) de perdi nemmancu una partida. 
E duncas, oi ses sunfrendi a trassa de cani, tristu e totu impentzamentau, ma mancai cras ses torra arriendi, e fadendi festa, e gosendudì totu su bonu chi custa vida ti podi regalai. 
Ca bastat pagu, a bortas, e sa vida (e su giogu de sa bòcia, mescamente) est diaici: no podis mai sciri cumenti ant a andai is cosas me in su benidori. No podis mai sciri cumenti ant a andai a finiri. 
E iat a cumbenni, custu mi arrapitu, a solu a solu, a no si fai pigai tropu de s'afròddiu, e de su prexu, candu is cosas si andant beni; ma circai, puru, est craru, de no si fai pigai tropu de su disisperu candu is cosas, invècias, no si andant beni cumenti podestus isperai. Ca a bortas sa vida, diaici narant is bècius a su mancu, est a trassa de un'arroda chi girat. 
E duncas, chi si nd'arregodais (e desinò deu seu innoi pròpriu po cussu), sa cida passada s'apu chistionau, pròpriu, de cumenti funt andadas is cosas me in su campionau de s'Ecellenza, cun sa bìncida chi nd'ant cassau is de du Budoni (e de totus su restu de is cosas chi pertocant is regulas novas po is partidas finalis, chi funt cussas ca seus costumaus, in Italia puru, a tzerriai play-off, a trassa de cumenti faint is ingresus etotu, si nd'apa a chistionai in su benidori, mancai in cust'artìculu etotu o, de seguru, sa cida chi at a benni, chi su Cielu at a bolli custu beni po mei, est craru), e custa cida invècias, apustis de totu sa biga de partidas chi, cumenti a dònnia domìnigu e a dònnia fini de cida de sa stagioni, si funt giogadas, nci funt stètias atras duas scuadras chi ant potziu incumentzai a fai sa festa. 

E difatis, in sa Lista A de sa Segunda Categoria is de sa Gioventù de Sarroch (custu a su mancu est su modu ca manigiaus po tzerriai sa scuadra in italianu, ma chi circaus de furriai sa cosa po cumenti si iat a depi narai in sardu, ndi iat a benni aforas, deu creu, calincuna cosa cumenti a is de sa Gioventudi de Sarroch, chi no abarrat meda atesu, est a nai chi est giai giai aguali, a cumenti si narat in italianu etotu. E duncas, diaici apa a sighiri a ddus tzerriai, po totu custu artìculu, pighendi po bonu, de su restu, su chi m'at consillau su fueddariu. Ca estus a depi ponni a menti totus is consillus bonus chi si ndi proint apitzus, in unu modu o in un antru, siat gràtzias a is fueddus chi s'arregallant is personas chi atobiaus, e siat, ballit aguali, a su mancu po mei, gràtzias a is fueddus chi agataus, mancai, me is paginas de is lìbbrus). 

E impari a issus, duncas, ant fatu festa (ant incumentzau a fai sa festa, si iat a podi narai, mellus puru, diaici) is de su Lauras, chi est sa scuadrixedda de càlciu chi nd'ant pesau, si cumprendit beni de su nomini de s'assòtziu etotu, in Luras. 

E duncas, cumenti eis a podi cumprendi a solus, de contus e de contixeddus, apicaus a su giogu de sa bòcia e a su mundu de is diletantis, no nd'ammancant nemmancu po custa cida, e mi parit craru puru. E ainnantis de si nci fuiai a fundu 'e susu (cumenti si narat in bidda mia, cumenti apu sèmpiri intèndiu narai in Bidd'e Sorris, fintzas de candu seu unu pipieddu piticu, unu notzenteddu, si iat a podi narai diaici) me is chistionis chi pertocant custas duas scuadras chi ant bintu is campionaus cosa insoru, si potzu narai ca, in dì de oi, candu megu a scriri cust'artìculu (e seu boghendindi aforas custas rigas candu seu lòmpiu, chi su calendàriu no est contendumì brullas, a su noi de su mesi de Abrili etotu, e duncas, eia, eis cumprèndiu beni, seu scriendi s'artìculu, seu atrachendi a scriri s'articulu, prus o mancu una cida ainnantis de sa dì innoi nd'at a bessiri aforas, sighendi su dìciu, ca apu incumentzau a pigai a coru, cumenti si narat, chi consillat, a su chi tenit su tempus de fai is cosas, de no abertai a cras po ddas fait) nci funt atras duas scuadras chi futn giai gigi po ndi cassai sa bìncida de su campionau cosa insoru, e megu a chistionai de is de su Lanusè e de is de su Buddusò, chi currint in sa Lista A (sa cosa ballit po is ollastrinus) e in sa Lista B (po su chi pertocat sa scuadra sighida de Ferruccio Terrosu) de su campionau de sa Promotzioni. 

E duncas, mancai, apa a incumentzai a si chistionai de sa cosa in custu artìculu etotu, e chi invècias no apa a acudi (no sciu mai cali e cantu legas nc'ant a brintai in s'artìculu chi ndi pesu in sardu, ainnantis de mi ponni a ddu scriri), si naru giai de immoi chi nd'eus a chistionai, custu est pagu ma seguru, me in s'artìculu chi nd'at a bessiri sa cida avatu de sa Pasca Manna (fadendi su contu, de su restu, e cumenti s'apu giai arremonau puru, ca cust'artìculu at a bessiri aforas su giòbia de sa cida santa). 

E si incumintzu a narai puru (diaici incumentzais a cumprendi ita totu nd'eus a sforrai po bosatrus me is mesis de s'istadi, po su chi pertocat is Novas de su Diàriu Sportivu, est craru) ca in totus is tres mesis prus callentis de s'annu (ddu naru diaici, gioghendi unu pagheddeddu a fai su poeta, e no feti su giornalista; e megu a chistionai, gei s'at a cumprendi, deu creu, de is mesis de Lampadas, de Treulas e fintzas a arribbai a su mesi de Agustu) eus a torrai a chistionai, cida po cida, de totus is scuadras chi ant bintu (chi ant ai bintu, fortzis cratzat mellus puru cumenti est cuncodrau su verbu) is campionaus cosa insoru. 

E duncas, eia, de seguru eus a torrai a chistionai (meda mellus de su chi apa acudi a fai oi, e si cumprendit puru) de is de sa Gioventudi de Sarroch, de is de su Lauras e, puru, de is atras ses scuadras chi ant a binci is atras ses listas de su campionau de sa Segunda Categoria (si ddu arregodais, berus est? Ca su campionau de sa Segunda Categoria benit pretziu in otu listas), ma eus a tenni su modu, puru, de chistionai de is cuatrus scuadras chi ant a arrannesci a ndi cassai sa bìncida de su campionau de sa Primu Categoria. E immoi chi nci seus, si potzu narai ca chi po su chi pertocat is giogus de sa Promotzioni, is de su Lanusè e is de su Buddusò funt a unu passu (cumenti si narat), a unu passu feti, de sa bìncida de su campionau cosa insoru (a totu e duas is scuadras ammancat feti unu puntixeddu po ndi cassai sa seguresa, cumenti si narat, sa seguresa matematica, de nd'essi cassau su primu postu de sa lista), invècias po su chi pertocat su mundu de sa Primu Categoria, ancora no si cumprendit (ancora no si podit sciri, chi si praxit de prus cumenti sonat) cumenti ant a acabbai is cosas, fadendi su contu (immoi chi nci seu, si scoviu unu pagheddeddu, ma unu pagheddeddu feti, cumenti funt andadas is cosas, e totu su chi nd'est bèssiu aforas, apustis de s'ùrtima giorronada de partidas, cussa chi s'est giogada su ses de Abrili, po si cumprendi mellus apari) ca in sa Lista A is de su Cannonau de Jerzu s'agatant, eia, a su primu postu de sa lista, ma tenint is de sa Baunese apicigaus a is carronis (cumenti si narat, e cumenti apu sèmpiri intèndiu narai de sa bon'anima de mamma mia etotu), cun feti duus puntus in mancu; e in sa Lista B is cosas funt giai giai agualis, cun is de su Samugheo chi ant pèrdiu sa segunda partida de sighiu me is ùrtimas duas cidas, e immoi tenint is serramannesus de sa Gialetu a tres puntus (est a nai, gei si cumprendit, deu creu, ca is de su Samugheo tenint unu vantàgiu de tres puntixeddus), e is de s'Arbus, sighius de Virgiliu Perra, tenint feti cuatru puntus in mancu. Po su chi pertocat sa Lista C, invècias, megaus a sighiri sa cursa, sa batalla, si iat a podi narai puru, tra is de s'Ozierese e is de su Thiesi, e tra is duas scuadras, no nc'eis a crei, ma nci funt feti duus puntus de diferèntzia. E is cosas funt giai giai agualis po su chi pertocat sa Lista D (e seu chistionendi sèmpiri de sa primu categoria, si cumprendit, berus est?), innoi is de su Campanedda, apustis de essi serrau in paridadi sa partida chi ant giogau in domu de is de su Badesi, si funt fatus cassai (ddi naru diaici, e lassu sa cosa po cumenti m'est bèssida) de is de su San Giorgio de Peifugas, cun is duas scuadras chi, immoi, tenint su pròpriu tanti de puntus. 
E mi parit de podi narai, duncas, ca is campionaus de sa Primu Categoria funt cussus, in dì de oi, prus spassiosus, e no megu a narai (no bollu narai, mi parit craru puru) ca is tifosus chi sighint is scuadras chi currint me is atrus campionaus si siant arroscendu, antzis, ma megu a narai (seu circhendi de si narai, po ddu narai mellus puru) ca in su mundu de sa Primu Categoria (e sa cosa ballit, cumenti eus biu pròpriu immubagora, po totus e cuatru is listas) no si sciit ancora cumenti ant a andai is cosas, cumenti s'ant a serrai is giogus, po su chi pertocat sa bìncida de su campionau e duncas, sa cursa po ndi cassai su primu postu de sa lista. 

Ma torraus a nosu, duncas, e a sa lega chi apu pigau ainanntis, e duncas, andu a si chistionai, po su chi at a fai, po su chi apa a acudi a fai (po ddu narai mellus puru, e su chi no apa a acudi a si contai oi, podeis abarrai segurus de custa cosa, ddu apa a torrai a pigai in consideru in su benidori) de su prexu chi nd'ant tentu is de sa Gioventudì de Sarroch, e is de su Lauras, candu ant bintu sa partida chi ddis est serbida po ndi cassai sa seguresa de serrai sa cursa a su primu postu de sa lista. 

E fadendi su contu ca custu artìculu at a bessiri in sa cida santa, una pariga de diis feti ainnantis de sa dì de sa Pasca, e fadendi su contu ca sa festa de sa Pasca est cussa innoi s'arregodaus de sa morti e de sa resurretzioni de Gesù Cristu (cumenti s'apu giai arremonau ainnantis), intzandus apa a circai de fai su giogu de cumprendi chi, su giogu de su càlciu (mellus: is contus e is contixeddus chi ndi podint arribbai, e nd'arribbant, de su restu, de su mundu de sa bòcia, potzant balli, si potzant acapiai, cun is chistionis chi pertocant sa vida cosa nosta de dònnia dì, chi si potzant serbiri, ddi naru diaici, de letzioni). 

E duncas, eia, si potzu narai, po incumentzai, ca is de su Sarroch nd'ant cassau is ùrtimus tres puntus chi ddis mancant po ndi aguantai sa seguresa de serrai sa stagioni a su primu postu gràtzias a sa bìncida, toga meda, de seti a zeru, chi nd'ant pesau in sa partida, in domu cosa insoru, contras a is de s'Audax de Cabuderra (una de cussas partidas chi is ingresus tzerriant derby, poita pertocat duas scuadras chi nd'arribbant de duas biddas chi funt a su costau s'una de s'atra). E duncas, eia, si potzu narai, puru, ca po cussa partida nci fiat su stadiu, su campu (fait a ddi narai diaici puru) prenu fintzas a cucuru de genti, chi no biiat s'ora, cumenti si narat, de fai festa impari a is giogadoris e a s'allenadori. E is cosas ddis funt andadas beni meda, fadendi su contu ca is de su Sarroch nd'ant cassau su primu gol apustis de feti otu minudus de giogu, gràtzias a unu tiru de is undixi metrus chi nc'at scutu Giuseppi Mura, chi tra is atras cosas est su giogadori chi at fatu, chi est arrannèsciu a ndi pesai, a su mancu fintzas a immoi, su tanti, sa cantidadi prus manna de gol, no feti tra totus is giogadoris chi faint parti de sa scuadra cosa sua etotu (e, duncas, tra totus is cumpàngius cosa sua etotu), ma puru, tra totus is atrus giogadoris chi currint, impari a issu, ma cun is scuadras aversàrias, in sa Lista A. E duncas, su segundu gol est arribbau a su de binti minudus de giogu, e torra gràtzias a unu tiru de is undixi metrus, sèmpiri intzertau de Mura. E de cussu momentu, si cumprendit, is cosas po is de su Sarroch si funt fatas prus fàcilis, est a narai, duncas, chi nd'ant cassau sa bìncida chentza tropus strobbus, chentza dificurtades. 
«Ndi seus cabaus in campu cun sa famini, cun sa gana bella de binci chi eus tentu, de su restu, puru in totus is atras partidas chi eus giogau fintzas a oi, chi eus giogau in totu custu tempus – s'at contau mister Nunzio Falco apitzus de sa partida chi is de su Sarroch ant giogau contras a is cabuderresus de s'Audax -. Sciestus ca podestus serrai sa cursa po su primu postu, chi mi cumprendeis su che si bollu narai, e bolestus cassai sa bìncida de su campionau a sa primu bessida, a sa primu ocasioni, diaici seus partius a milli a s'ora, cumenti si narat candu una scuadra atacat a curri, a totu coddu, fintzas de su primu segundu de giogu. Suella e Ojeda nd'ant cassau aciutu is fallus chi s'ant portau a tenni duus tirus de is undixi metrus, unu avatu de s'atru; e Giuseppe Mura, ca po nosu est su giogadori chi nd'at pesau su tanti, sa cantidadi prus manna de gol tra totus is chi giogant po sa scuadra cosa nosta, ma puru fadendi su contu de totus is giogadoris chi faint parti de su mundu de sa Lista A de sa Segunda Categoria. E duncas, apustis de su de tres gol chi nd'eus cassau, is cosas si funt fatas meda ma meda prus fàcilis po nosu, mescamente po su chi pertocat sa conca, chi mi cumprendeis po su chi si bollu narai». 
Mister Nunzio Falco s'at contau, puru, cumenti funt andadas is cosas a is giogadoris cosa sua no feti po su chi pertocat sa bessida contras a is de s'Audax, ma po su chi pertocat totu sa stagioni e, duncas, totu su campionau. «Podeus narai, puru, ca po nosu est stètia una stagioni de oru, e no podestus bisai de mellus, fadendi su contu, intzandus, chi eus serrau sa cursa po ndi cassai su primu postu cun unu mesi de vantàgiu, est a nai, candu a acabbai su campionau ammancàt ancora unu mesi. Deu no ia a podi essi prus prexau de cumenti mi intendu in dì de oi, si iat a podi narai, duncas, cumenti si narat, de su restu, ca mi intendu prexau cumenti una Pasca, e immoi chi nd'apu e nd'eus cassau sa bìncida de su campionau e duncas su primu postu de sa lista, mi ndi seu acatau chi seu torrau mabi de dexi chilus». 

E arremonai sa Pasca, in s'artìculu chi ndi bessit aforas po sa cida santa, mi parit ca siat una cosa toga meda: nemmancu a ddu fai aposta, si iat a podi narai. E est stètiu pròpriu Nunzio Falco chi s'at arregalau un'antra perda de oru, un antru arrogu de sabiesa, po narai sa cosa cun atrus fueddus puru, candu s'at contau sa istoria sua, sa storia de is ùrtimus annus chi pertocant sa carriera cosa sua cumenti a allenadori. E duncas, si ddu torru a narai, a bortas custa vida no est atru ca nc'arrui e si ndi torrai a pesai, chi est sa letzioni prus manna, mancai, mi benit de ddu narai diaici, chi ndi podeus arriciri de sa Pasca, chi est sa festa innoi si nd'arregodaus, mi parit craru puru, de sa morti e de sa resurretzioni de Gesù Cristu. E duncas, eia, Nunzio Falco, e m'at fatu prexeri meda su de ddu podi ascurtai, m'at torrau a contai cumenti funt andadas is cosas po su chi pertocat s'acàpiu chi nd'at pesau cun is de sa Gioventudi de Sarroch. «Depu torrai gràtzias, po incumentzai, a Mirko Dentoni e a Rocco Canepa, chi s'annu passau m'ant circau, e funt arrannèscius a mi cunvinci, a sighiri sa scuadra, s'assòtziu cosa insoru. Mi dispraxit po issu, est craru, ma su presidenti in sa stagioni de su duamilla e bintitres – duamilla e binticuatru iat decìdiu de nci bogai a Saul Cherchi, chi fiat, chi est stètiu, po ddu narai mellus puru, s'allenadori chi at trabballau cun su Sarroch in sa primu parti de su campionau de sa de Tres Categorias. E mi iat a fai prexei a mandai is saludus cosa mia a Cherchi, e a ddi fai is cumplimentus po su trabballu bonu chi at fatu in sa primu parti de sa stagioni; apustis chi nd'ant sciusciau s'acàpiu chi teniant cun issu, duncas, is de s'assòtziu ant pentzau de donai is crais de sa scuadra cosa insoru a mei, e deu, invècias, mi fia lassendi a is pabas, fia circhendi de mi lassai a is pabas, po ddu narai mellus puru, un annu de trabballu fatu cun is de s'Arborea, chi mi nc'ant bogau de sa scuadra cosa insoru, mi iat a fai prexei a ddu arregodai torra a totus is chi funt ligendi cust'artìculu, candu m'agatamu, e duncas, s'agatastus, deu e is giogadoris cosa mia, a feti cincu puntus de sa scuadra chi s'agatàt a su primu postu de sa lista. Fia unu pagheddeddu inchietu, si cumprendit, po no narai, peus puru, ca mi intendia unu pagheddeddu arrannegau, chi cumprendeis su chi si bollu narai, e deu pentzu ca is cosas siant craras, est a nai, no fait a prexei a nemus su de perdi su trabballu chentza, mancai, de ndi tenni crupa. Ma in su mundu de sa bòcia, e ddu scieus, e ddu scieis bosatrus puru, deu creu, is cosas andant diaici: atzis, si iat a podi narai ca est su mundu de su trabballu ca andat ainnantis diaici; oi nci ses, e cras invècias ti depis fai is bagàglius, saludai a totus e serrai sa porta candu ndi bessis de sa faina, cumenti si narat. E duncas, apustis de essi serrau s'aventura impari a is de s'Arborea, seu abarrau frimu, ddi naru diaici, po cincu mesis e seu torrau a partiri de su campionau de sa de Tres Categorias, chi no est de seguru una cosa fàcili. Is dirigentis de s'assòtziu, peròu, m'ant fatu a cumprendi, est a nai ca m'ant spiegau, totu su chi teniant in conca po sa scuadra, est a nai su programma, cumenti ddu tzerriaus a trassa de s'italianu etotu. Apu cumprendiu, in pagu tempus, ca sa bidea chi teniant fiat toga meda, e duncas mi funt bastadas feti binticuatru oras po ddis torrai sa sceda. Candu apu pigau is crais de sa scuadra in manu, e chistionu, est craru, de candu sa scuadra s'agatat ancora in su campionau de sa de Tres Categoria, tenestus una biga de puntus in mancu de is scuadras chi s'agatant a is primus postus de sa lista, ma in sa segunda parti de sa stagioni seus arrannèscius a ndi pesai una cursa toga meda, fadendi su contu ca eus pèrdiu feti una partida, e gràtzias a totu cussu muntoni de puntus chi nd'eus cassau seus arrannèscius a nc'arribbai giai giai a is pabas de is de s'Accademia Sulcitana e de s'Isuledda. E custa cosa s'at donau sa possibbilidadi de podi fai sa domanda po essi bènius piscaus torra po sa Segunda Categoria, cumenti si narat in italianu etotu, e diaici funt andadas is cosas. Po su chi pertocat sa stagioni de su duamilla e binticuatru – duamilla e binticincu, si seus postus a trabballai po cuncodrai sa rosa aciutu e allestru apustis chi s'est serrada sa stagioni de s'annu passau; apu tentu s'ocasioni, sa possibbilidadi manna e bona meda, de podi trabballai impari, est a nai a su costau de su diretori sportivu cosa nosta, chi est Mirko Dentoni, chi apu giai arremonau pròpriu immubagora. Mi iat a praxi, immoi chi nci seu, a fai is complimentus a Dentoni po su trabballu chi nd'at pesau, e ddi fatzu is augùrius po sa aventura nova chi at incumentzau a sighiri pròpriu in custus ùrtimus annus, e megu a chistionai, est craru, mi parit, po su chi pertocat sa carriera cosa sua in su mundu de su càlciu de is diletantis sardus, me is pannus de diretori sportivu. Po incumentzai, duncas, si potzu contai custu, seus torraus a partiri agatendi torra s'acàpiu cun totus is giogadoris chi tenestus giai, e chi si iant donau una manu de agiudu manna me in su campionau de sa de Tres Categorias de s'annu ainnantis, a partiri, duncas, mi parit craru puru, de su capitanu de sa scuadra cosa nosta, chi est Diego Strazzera, e chi est unu de is piciocus chi ant sudau po custa scuadra candu, mancai, no annadastus in acua bonas; nesciunu mellus de issu, deu creu custu a su mancu, podit sciri e podit torrai a contai totu su trabballu chi eus fatu, chi eus dèpiu fai, po torrai a artziai in su campionau de sa Segunda Categoria. Ed in prus, seus stètius bonus a agatai e a serrai s'acòrdiu cun una bella pariga, una bella pariga a sa sarda, si cumprendit, de giogadoris de esperièntzia manna po custa categoria, e chi no ant mai abasciau sa cuncentratzioni, chi cumprendeis su chi si bollu narai. E apitzus de custa chistioni, no potzu no fai is nominis de Mura e Recano, ca funt duus tra is giogadoris cun su bagàgliu de esperièntzia prus manna a is pabas tra totus cussus chi nci funt, in dì de oi, in sa rosa de su Sarroch. Ma funt totus is giogadoris chi, candu ndi funt cabaus in campu, ant sèmpiri fatu totu su chi podiant, cun is cambas e fintzas po su chi pertocat su coru e sa conca. Si iat a podi partiri, duncas, pròpriu de sa lista de giogadoris chi, fatu fatu, po su prus de is bortas, ndi cabant in campu fintzas de su primu minudu: e seu chistionendi, duncas, de Frau tra is palus de sa porta, Sirigu, Contsu capitanu Strazzera e Recano po su chi pertocat sa difesa, is duus giogadoris argentinus chi teneus, e seu chistionendi, est craru, de Ojeda e Andruetto po su chi pertocat su centru de su campu, e fintzas a nd'arribbai a is giogadoris chi teneus in atacu, e seu chistionendi de Mura, Suella e Vitellaro, chentza de si ndi scaresi, peròu, de Salonis. Tèngiu una pariga de fueddus, invècias, chi mi iat a praxi a spendi, a dedicai a Mateu Stochino, chi at dèpiu serrai sa stagioni cosa sua ainnantis de su tempus, fadendi su contu ca s'est arrogau su genugu in una de is primus bessidas e de cussa dì, si cumprendit, e de su restu su dannu chi nd'at tentu no est stètiu de pagu contu, e apustis mi iat a praxi a torrai gràtzias, e cun custus fueddus ddu saludu puru, a Dario Stochino, su fradi de Mateu etotu, ca apustis de sa partida chi eus giogau, e bintu, contrasa  is de s'Accademia Sulcitana, at dèpiu lassai sa scuadra, sa rosa, po andai a studiai in Romania po su chi tzerriant "progetu Erasmus". E duncas, totu sa scuadra bolit dedicai sa bìncida de sa partida contras a is de s'Audax, e chi est stètia cussa chi s'est giogada cuindixi diis fait, e chi s'at donau sa seguresa de nd'essi cassau su primu postu de sa lista, a Maureddu Palmas, chi at tentu unu dannu, unu incidenti, cumenti si iat a podi narai a trassa de s'italianu etotu, cun sa machina, e custu ddi est sucèdiu pròpriu una pariga de diis de sa partida chi eus giogau contras a is de s'Audax, e duncas, est craru, una pariga de diis feti ainnantis de atacai, de incumentzai cun sa festa chi festus abertendi, giai, mi parit de podi narai diaici, de una bella pariga de mesis, e chi pertocat, est craru, sa bìncida de su campionau. E immoi, no podeus fai atru ca isperai chi Palmas si potzat torrai a strantaxai chitzi, mancai in tempus po benni a fai sa festa impari a nosu, su cuatru de su mesi de Maju, candu s'ant a serrai totus is giogus cun s'ùrtima partida de su campionau». 

E a narai sa beridadi, chi pròpriu ddu depu fai, nci iat a adessi de chistionai puru de is de su Lauras, cumenti s'apu arremonau ainnantis, de su restu, ca funt stètius un'antra scuadra de su campionau de sa Segunda Categoria, a nc'essi arrannèscius a ndi cassai sa bìncida de su campionau, ma tocat a narai, puru, ca su logu chi m'est abarrau po custa cida est pagu e nudda. 
Ma si promitu giai de immoi, de su restu, ca in s'istadi eus a torrai a pigai in consideru is chistionis chi pertocant is de sa Gioventudi de Sarroch e, mescamente, is de su Lauras puru. 
Po custa cida, no potzu fai atru, duncas, ca si intregai una pariga de fueddus tra tosus cussus chi m'at regalau Franco Scano, e chi est s'allenadori de is de su Lauras. Ca, cumenti si naru e s'arrapitu fatu fatu meda, chi mellus de un allenadori podi sciri, e podi contai, cumenti funt andadas is cosas po su chi pertocat sa scuadra cosa sua? E duncas, Scano m'at contau ca, a parri suu, a su mancu, «po binci unu campionau serbit ca totus is chi trabballant in s'assòtziu fatzant, e donint, su centu po centus de su chi tenint de donai, de bonu: sa chistioni ballit, est craru, po sa truma de giogadoris chi fait parti de sa scuadra, po is dirigentis chi sighint s'assòtziu, a partiri de su presidenti e fintzas a arribbai a totus cussas personas chi, mancai, ddi donant una manu de agiudu e fintzas a arribbai, mancai, a is tifosus cosa nosta etotu. Po nosu is tifosus funt stètius, cumenti si narat, su de doxi ominis in campu; chistionu, po essi prus craru e pruschetotu, de una truma de cincuanta – sessanta piciocheddus ca nd'ant pesau unu grupu de tifosus e chi no s'ant mai lassaus a solus, chi cumprendeis su chi si bollu narai, siat po is partidas chi eus giogau in domu cosa nosta e siat po is partidas chi eus giogau in domu allena. Ma a sa fini, est craru ca su trabballu prus mannu ddu faint is giogadoris etotu: funt issus chi si funt postus a trabballai a trassa de professioneris, mancai siant peròu diletantis, siat po is allenamentus chi ndi pesaus de cida in cida e duncas, siat me is partidas de su fini de cida. Apu tentu sa bona sorti, sa possibbilidadi de podi sighiri una truma de piciocus chi funt sèmpiri abarraus cumpatus tra de issus, siat po is chistionis chi pertocant sa scuadra e su campu, ma siat aforas de su campu puru. E est una cosa, si cumprendit, ca ti podit donai una manu de agiudu manna meda a binci is partidas».



Attività realizzata col contributo della Regione Sardegna. IMPRENTAS 2024-2025. LR 22/2018 art. 22