S'iscaramanzia in su giogu de sa bòcia: chini nci credit e chini no nci pentzat nemmancu

E duncas, po cust'annu puru nci dda seus po fai torra: megu a chistionai, est craru, de su Nadali o, po ddu narai mellus puru, de is festas chi pertocant su Nadali, mancai su Nadali nc'apicighit pagu e nudda, mi megu a solu a solu, cun su giogu de sa bòcia, chi est sa faina de importu prus mannu chi sigheus in su giàssu de is amigus de su Diàriu Sportivu chi, a sa fini, funt cussus, e mi parit craru puru, chi acasagiant (cumenti si narat, puru, sighendi e pighendi po bonu su chi m'at consillau su fueddàriu), chi acullint (po ddu narai, invècias, a sa moda sorresa, e po ddu narai cumenti apù sèmpiri intèndiu in domu miu de babbu e de sa bon'anima de mamma) is artìculus chi ndi pesu in sardu, ma a sa fini, cumenti scieis beni, seu costumau a mi strollicai unu pagheddeddu (e est una cosa chi mi praxit a fai fintzas a s'amachiadura, cumenti si iat a podi narai), ainnantis de mi ponni a arraxonai de bòcias, de partidas e de resultaus. 

E duncas, chi eis lìgiu a su mancu unu de is artìculus chi nd'apu bogau aforas, nareus, in custus ùrtimus cuatru-cincu mesis, scieis beni ca tra is legas chi pigu in consideru, dònnia dònnia borta (giai giai cumenti chi fessit unu ritu), ddoi funt cussas acapiadas a su tempus chi passat, e a su tempus chi fait (e cun su tempus chi fait megu a chistionai, mescamente, de su chi podeus tzerriai clima: e duncas, de sa basca, mescamente in istadi, o de su frius, mescamente in s'ierru; de sa sicagna, po nd'arremonai una, o de sa tropu acua chi mancai ndi ghetat, chi mancai nd'arruit de su Cielu, e ghetat a pari totus is sartus, e totu su logu, invècias de ddu sanai, cumenti m'est bèniu de narai, gioghendi a fai unu pagheddeddu su poeta). 

E duncas, apu atacau, apu incarrerau s'artìculu de custa cida arremonendusì su Nadali: po primu cosa, m'acudu a si narai ca, chi si nd'arregodais (e desinò, chi no si nd'arregodais, nci pentzu deu a ddu fai, ca seu innoi pròpriu po custa cosa puru), in s'artìculu chi nd'est bèssiu a pillu pròpriu sa cida passada (giòbia passau, po essi prus pretzisus puru, est a nai su cincu de custu mesi etotu) no mi seu strollicau nemmancu po unu segundu, cumenti si iat a podi narai, ma apu fatu a bonu (cumenti m'ant sèmpiri consillau de fai de candu seu unu pipiu, e megu a brullai, e si cumprendit puru) e apu chistionau giai giai feti de bòcias, e de partidas, e de resultaus; antzis, a narai sa beridadi, est de duas cidas, prus o mancu, ca m'est acucau a conca (cumenti si megàt sa bon'anima de mamma mia, e candu manigiu torra custu fueddu, custus tres fueddeddus, mi parit totu de dda torrai a intendi, crara crara, cumenti chi fessit innoi a su costau cosa mia) de chistionai de is allenadoris de is assòtzius, est a nai, mellus, de su trabballu, mannu e fadiosu puru, chi depint fai po sighiri una truma manna de giogadoris. 
E duncas, si domandu giai de mi iscusai chi, invècias, po custa cida apa a chistionai, puru, ma feti unu pagheddeddu (si ddu promitu giai! ca no seu innoi po si fai perdi su tempus chi mancai no teneis), de totu is cosas bellas chi s'abertant, de si bivi, est craru, in custu mesi. 
E apustis, cumenti acabbu, s'eus a fuiai, torra, me is chistionis acapiadas a sa bòcia, a su giogu de su càlciu (ma ancora no sciu cali arrastu apa a sighiri po ndi pesai su tanti de rigas chi mi serbint po preni, fintzas a cucuru, cumenti si narat, s'artìculu de custa cida. Ca no sciu mai cali legas apa a scerai, tra totus cussas chi tèngiu badda badda in conca, ainnantis de mi ponni a scriri). 

Ma cumenti seu circhendi de si narai (e ancora no nci seu arrannèsciu, ma custa iat a podi essi sa borta bona), candu ndi brintat su mesi de Idas est dificili meda (e sa cosa ballit po is mannus puru, e no feti po is pipius e is pipias) a no pentzai a totus is festas chi s'at a tocai a bivi, isperu cun prexu mannu, est craru. Fadendi su contu, mescamente, ca pròpriu custu fini de cida passada nc'est stètia sa festa de s'otu de su mesi de Idas, chi est sa primu chi si tocat a nci cabai (ddi naru diaici), e chi est cussa chi, ddi naraus diaici, oberrit su periodu de su prexu mannu. E de su restu, est pròpriu s'otu de su mesi de Idas (e m'acapiu a sa traditzioni chi pertocat is criastianus catolicus, est craru) chi, de su chi si contat sa cresia, sa Madonna, benit a sciri, de s'angelu, ca at a diventai mamma, po segai sa chistioni a crutzu. 
E duncas, est pròpriu de s'otu de su mesi de Idas, ca incumentzaus a contai is diis chi ammancant a su Nadali, e duncas, a sa dì innoi fadeus sa festa, gei ddu scieis beni, e nc'est pagu de si perdi, pagu de si sbàlliai, po sa nàscida de Gesù Cristu. 
E abertaus sa dì de sa festa manna (po nosu chi biveus in Ocidenti, po nosu chi biveus in su logu innoi su catolicesimu est nàsciu, cussa de su Nadali est una de is festas prus mannas chi ddoi funt aintru de s'annu, po no narai chi est sa festa prus manna de totus cussas chi ddoi funt aintru de s'annu etotu) cumenti abertaus chi nasciat unu pipiu (o una pipia, ballit aguali, e nci iat a mancai atru puru) po cussus noi mesis. 
E prus abertaus, e prus sa festa s'acostat, e prus passat su tempus e prus s'ammanniat s'afròddiu e su prexu chi si intendeus in su coru. 
E de su restu, parit ca is personas, a su mancu in custu periodu (ma a nai sa beridadi calincuna cosa incumentzat a si biri giai de sa fini de su mesi de Donniasantu, chi pròpriu depeus narai is cosas po cumenti funt), no arrannèsciant a pentzai a atru: at a essi ca is bias, e is domus, funt totus cuncodradas cun is apicajonis (diaici ddus tzerriàt mamma mia); e giai giai in dònnia domu sa genti s'acudit a cuncodrai su presèpiu o cussa chi estus a podi tzerriai, a sa moda de s'italianu etotu, sa mata de su Nadali, ca benit a essi cussa gènia de mata, ca arregodat su pinu (o s'abbete puru, chi boleis) e chi cuncodraus cun una biga manna de pallineddas de centumila caboris e de luxis; e in prus nc'est de pentzai, puru, a is (tialus) de arregalus, e custu bollit narai ca po duas-tres cidas de sighiu sa genti est cumenti chi bessat aforas de conca, e no arrannèsciat giai giai a pentzai a atru ca a is cosas chi nci funt de comperai. 

E duncas, sa genti si nci fuiat me is bias, e mescamente me is mercaus de Nadali, cumenti seus costumaus a ddus tzerriai, po fai cussu chi, in ingresu, pigat su nomini de "shopping", e chi, po furriai sa cosa in sardu, si iat a podi tzerriai "sa gana maca chi si pigat de comperai dònnia calidadi de cosa, siat cosa de papai, siant bistiris, siant arreloxus", po nd'arremonai una, ma sa cosa ballit, diaderus, po dònnia genia de cosa chi bendint. 

E duncas, si naru totu custu po mi torrai a acapiai a sa cosa chi, eia, mancai tui no nci bollast pentzai, est dificili meda a fai finta (m'est bèssiu de ddu narai diaici) ca su Nadali no siat arribbendindi. 
Ca chi no nci pentzas tui  (e si ddu contu cumenti chi fessit una mesu brulla, e cun custa cosa, mancai, arrannèsciu puru a serrai sa chistioni, con una butada), a su Nadali, nci penzant is atrus po tui. 

E duncas, cumenti intendia a sa televisioni una bella pariga de annus fait (est de unu pagheddu de tempus, a narai sa beridadi, chi no castiu prus nemmancu unu segundu de su chi donant a sa televisioni, e est de unu bellu arrogheddu de tempus, duncas, chi nc'apu scavuau a prasoni sa televisioni, cumenti si iat a podi narai, puru, a trassa de cumenti narant innoi in Bidd'e Sorris etotu), iat a tocai a abertai is festas de su Nadali chentza de si fai pigai de su nervosu, de sa pressi: su Nadali nd'at a arribbai candu at a essi s'ora sua, e mancai chi arrannèsceus, in s'interis, a no nci bessiri aforas de conca, iat a essi mellus puru. 

E custu, duncas, po su chi pertocat su tempus chi passat. 
E ddu torru a arrapiti: no si podit chistionai de su tempus chi passat, e no si podit chistionai, duncas, de su mesi de Idas, chentza de arremonai, a su mancu po una borta, sa festa de su Nadali. 

E duncas, potzu narai, puru, ca po custa cida su tanti de su trabballu, po su chi pertocat sa chistioni, ddu apu fatu. 
E immoi ant a ammancai feti atrus duas giòbias, ainnantis chi nd'arribbint is festas. 

Po su chi pertocat su tempus chi est fadendi, invècias, fait a narai puru (e nci poneus pagu meda) ca est incumintzendi a fai unu bellu frischetu, ma gràtzias a su Cielu, gràtzias a Deus, no at fatu prus su tempus malu cumenti est sucèdiu a sa fini de su mesi de Donniasantu, candu totu s'acua chi nd'est cabada de su cielu at ghetau a pari totu su logu (e at fatu puru unu mortu, chi si ddu arregodais). 
E duncas, eia, est craru, nc'est unu pagheddeddu de frischetu in prus (frischetu est unu fueddu chi m'est sèmpiri praxu, a si narai sa beridadi), mescamente chi fadeus su contu ca fintzas a una pariga de cidas fait (fintzas a unu mesi fait, mellus) no arrannèscestus a sumportai sa basca manna chi at fatu, po cust'annu puru (e mescamente in s'istadi). E nareus, puru, immoi chi nci seus, ca no arrannèsceus giai prus a sumportai nudda, e totu su chi seus bonus a fai est murrungiai: murrungiai po sa basca manna, o murrungiai po su frius forti. E mancu mali, mi megu a solu a solu, ca candu ndi brintat su frius tèngiu sa possibbilidadi de allui su fogu e de mi callentai; antzis, chi pròpriu si depu narai sa beridadi, giai giai no biu s'ora (e chistionu po mei, est craru!) chi nd'arribbit su tempus friscu, diaici tèngiu sa scusa (chi poi scusa no est, ma est unu bisòngiu) de mi nd'abarrai aranti de sa ziminera, cun su fogu allutu, est craru, mancai po oras e oras, mancai cun unu bellu libbru me is manus. 
E duncas, po su chi mi pertocat, a su mancu, su de su doxi mesis in s'annu est unu de is prus drucis: seu prexau meda, duncas, de essi lòmpiu a custu puntu de sa storia (dda tzèrriu diaici). 
Ma mi ndi rendu contu, a solu, ca mancai nci funt personas ca no sumportant is festas (e mescamente no sumportant is festas acapiadas a su Nadali): s'atra di (e cun custa dda acabbu po diaderus de mi strollicai, a su mancu po oi, a su mancu po custa cida) sa picioca chi mi bendit su pani e chi duncas trabballat in su forru chi tèngiu pròpriu a su costau de domu, candu fiat su duus de su mesi de Idas, m'at scoviau ca, chi fiat po issa, iat a essi sartau totus custus mesis, po arribai dereta dereta a sa primu dì de su mesi de maju (po sartai, diaici, is festas po sa Pasca Manna puru, diaici m'at narau). 
Ma a sa fini, custa cosa de sartai su tempus no si podit fai, e duncas, s'unica cosa chi s'abarrat est cussa de si bivi sa vida cun passièntzia, circhendi de ndi pigai totu su bonu, totu su druci chi si podit donai. E at a essi ca me is coranta-cincuanta diis chi nci funt ainnantis de su Nadali seu costumau, giai de una bella pariga de annus (ant a essi prus de dexi, tra una cosa e s'atra), a fai cussa chi estus a podi tzerriai "dieta", sa cosa toga de is festas benit a essi (e s'at a parri una mesu tontesa, ma podeis abarrai segurus de su fatu ca po mei est una cosa de importu) ca tèngiu sa possibbilidadi de papai unu pagheddeddu de totu e, mancai puru, un arrogheddeddu de cosa druci. 

E duncas, si domandu iscusa torra po s'essi furau totu custu tempus, ma a sa fini si scoviu puru ca circu de chistionai, dònnia dònnia tanti, de atras legas puru (e no feti de resultaus de is partidas) po circai, po primu cosa, de manigiai una parighedda de fueddus in prus de su chi ia a fai chistionendi feti de gol e de giogadoris de bòcia e, in prus, ddu fatzu cun sa ispera de ndi cassai s'atentzioni, puru, mancai, de totus cussas personas (e pentzu mescamente a is femineddas), chi no funt acapiadas a istrintu cun is fainas, cun is istorias de is scuadras de càlciu chi s'agatant spratas in totu s'isula cosa nosta (e chi funt sa farra, ddi naru diaici, po ndi pesai su pani, est a nai, is novas, chi sforraus dònnia, dònnia dì, chentza de ndi sartai nemmancu una, cun su giàssu de su Diàriu Sportivu). 

E duncas, immoi chi apu acabbau, e fiat ora puru, s'at a megai calincunu de bosatrus, de si fai sa conca a acua (po manigiai torra unu fueddu chi mamma mia naràt fatu fatu, e chi m'est sèmpiri praxu), podeus andai a castiai cali funt is novas prus callentis (e cun custu frischetu, po mi torrai a acapiai a su chi s'apu narau ainnantis, is novas callentis speddiant puru) chi ndi funt arribbadas in custas ùrtimas cidas, de is campus innoi si giogant is partidas (e custu ballit po dònnia fini de cida chi su Cielu s'arregalat, e gei du podeis cumprendi a solus) de is scuadras de is diletantis sardus. 

E duncas, me is ùrtimas duas cidas (cumenti s'apu giai arremonau) m'est bènniu de si chistionai, pruschetotu, de su trabballu chi faint is allenadoris, chi funt cussus chi, mancai, si pigant is compliementus prus mannus candu sa scuadra cosa insoru arrannèscit a binci su campionau (o ballit aguali, candu sa scuadra cosa insoru arrannèscit a ndi cassai sa sarvesa), ma funt puru cussus ca (cumenti eus cumprendiu candu si seus postus a arraxonai apitzus de is stagionis de duas scuadras sardas chi currint in su campionau de sa Sèrie D, e seus chistionendi de is de s'Olbia-Terranova e de is de su COS Sarrabus – Ollastra, chi ant decìdiu de cambiai allenadori) pagant su contu, cumenti si narat (cumenti si iat a podi narai, a trassa de s'italianu etotu), candu is cosas no andant beni. E duncas, si contu custa cosa, immoi chi nci seu, po mi nci fuiai a fundu 'e susu me is chistionis acapiadas a is campionaus (e duncas po no si fai perdi prus nemmancu unu segundu, po no si furai prus nemmancu unu mesu minudu), me is cidas passadas apu tentu s'ocasioni, est a nai sa possibbilidadi, de mi fai una bella ciaciarrada a su telefunu cun Gianmario Rassu, ca in custa stagioni est sighendi sa scuadra de su Thiesi. E duncas, Gianmario Rassu (ca candu giogàt, fiat unu de is piciocus prus fortis chi nci fiant in s'isula, fadendi su contu ca fiat adderetura arribbau a giogai in sa scuadra de piciocheddus, cussa chi, in ingresu, tzerriaus Juniores, de su Milan, chi est una de is scuadras prus fortis chi ddoi funt in sa Sèrie A e in su mundu) s'est torrau a arregodai, impari a mei (e nd'aprofitu po ddi torrai gràtzias po totus is fueddus e is contixeddus chi m'at regalau), de candu nci ddu ant bogau de sa panchina de su Bonorva, un annu e mesu fait; e si cumprendit, po un allenadori no est mai una cosa spassiosa, su de no arrannèsci a binci cumenti, mancai, is dirigentis de s'assòtziu s'abertant de tui; candu ti nci bogant, duncas, de sa panchina de una scuadra, nd'arricis (m'est bèniu de ddu narai diaici) unu dabori mannu meda, unu dabori po s'onori, mi benit de narai. E sa cosa prus dificilis, candu nd'arruis (sa cosa ballit po su mundu de sa bòcia ma ballit, puru, po sa vida cosa nosta de dònnia dì), est pròpriu cussa de ti ndi pesai, de torrai a agatai, mescamente, sa seguresa apitzus de tui etotu, chi cumprendeis su chi si bollu narai.
E duncas, Rassu est torrau a partiri, apustis de una de is delusionis prus mannas chi at tentu in totu sa carrièra sua (mancai si potzat narai, puru, ca est bistendi is pannus de s'allenadori de pagu tempus), cun sa scuadra de sa bidda innoi bivit de una bella pariga de annus, est a nai, cun s'assòtziu de su Thiesi. E no nc'est nudda de mellus, apustis chi nd'arregollis una surra, apustis chi nd'arruis, apustis chi ti ingollis, de torrai a partiri cun s'agiudu de is amigus cosa tua, de is personas chi ti bolint beni, de is personas chi, mancai, faint parti de sa famìlia cosa tua. 
Eia, si depu narai sa beridadi: m'at fatu prexei meda a benni a sciri ca immoi is cosas po Rassu funt andendi unu pagheddu mellus, mancai ndi siat dèpiu cabai de categoria (is de su Bonorva, cumenti eis a sciri, e chi no ddu scieis deu seu innoi pròpriu po custu, currint, e custu giai de una bella pariga de annus, in su campionau de sa Promotzioni; is de su Thiesi, invècias, s'agatant a curri, in dì de oi, in su campionau de sa Primu Categoria); e duncas su giogu de sa bòcia, a su mancu chi pigaus po bona sa storia de Gianmarieddu Rassu, s'agiudat a si nd'arregodai ca is cosas ti podint andai mabi, custu est berus (sa vida m'at imparau ca is cosas ti podint andai mabi dònnia dònnia dì), ma poi, apustis, sa vida, su Cielu, Deus (o su chi boleis bosatrus, su chi si praxit de prus) fatu fatu (fatu fatu meda, mi benit de narai) si donat s'ocasioni, sa possibbilidadi po si fai balli torra. E seu cuntentu po Rassu, cumenti bèngiu a essi cuntentu dònnia, dònnia borta chi bèngiu a sciri chi calincunu chi no fiat annadendi in acua bonas est arrannèsciu a aderetzai is cosas, siat po unu dannu a sa saludi, siat po un arrori in su trabballu, siat po is atrus centumila dannus chi si ndi podint proi in conca. 

Ma ainnantis de incumentzai a si torrai a contai ita totu m'at scoviau Gian Mario Rassu, si ia a bolli arremonai, po oi, po su chi pertocat s'artìculu de custa cida, a su mancu, de un'antra chistioni, chi mi parit de importu mannu po su chi pertocat su mundu de sa bòcia de is diletantis (e deu creu ca sa chistioni potzat balli no feti po is diletantis sardus, ma po is giogadoris chi s'agatant, puru, me is atras regionis de s'Italia): e seu chistionendi de su chi estus a podi tzerriai, cumenti megat a mi consillai su fueddariu, de su restu, majinzu, o chi si sonat mellus, majarzadoria; e seu chistionendi, mi parit craru puru, de cussa chi in italianu si iat a podi tzerriai "scaramanzia". Fatu fatu, mi capitat de ligi, in certus libbrus chi mi capitant me is manus, de is sentidus, chi ancora s'agatant in su coru e in sa conca de is personas, e chi pertocant cussa chi estus a podi tzerriai maghia. 
Po si segai a crutzu, e allestru, sa chistioni (cumenti chi tenessi unu corteddu me is manus, po atrotoxai sa chistioni a sa moda de is poetas, prus ca a sa moda de is giornalistas), si potzu feti narai ca s'omini, in su passau, fiat acapiau a strintu a totu una biga de ritus (ddus tzerriaus diaici), e de fainas chi nd'arribbànt, po ddi narai diaici, de su mundu maxicu, cumenti si iat a podi tzerriai; is fainas de su mundu maxicu, intzandus, s'agiudant (si iant a depi agiudai, mellus, po chini nci creit, est craru) a fai andai deretas is cosas nostas in su mundu innoi biveus impari a totus is atrus; nci funt ritus, duncas, chi serbint, po nd'arremonai unu, a fai proi (a fai proi s'acua de su cielu mescamente candu nc'est sa sicagna), o a ndi fai bessiri torra su sobi (candu fait po diis e diis de sighiu totu proi proi, cumenti apu sèmpiri intèndiu narai innoi in Bidd'e Sorris); nci funt ritus (e cun custu s'acostaus a sa chistioni chi si pertocant prus de acanta) chi serbint po ndi cassai, po ndi fai lompi (po ddu narai mellus puru) sa bona sorti; e nci funt ritus chi serbint po nci spundi sa maba sorti apitzus de is fainas chi pertocant un'antra persona. Nci funt ritus chi serbint po ndi sanai de unu mabi, e a s'imbressi, nci funt ritus po augurai un arrori a una persona chi, mancai, no podis biri nemmancu pintada. 

Duncas, sa chistioni chi m'agatu fatu fatu in conca, e no nc'eis a crei, chi m'agatu fatu fatu in conca candu trabballu po su Diàriu Sportivu, est ca is personas, in dì de oi (is personas chi bivint in custus tempus modernus, cumenti ddus estus a podi tzerriai), no creint prus (no creint prus cumenti, mancai, sucediàt e capitàt me is tempus antigus) a totu cussa biga de ritus chi, mancai, is personas fiant costumadas a sighiri me is tempus antigus (e megu a chistionai de cussus tempus passaus innoi sa scièntzia, dda tzerriu diaici, no fiat ancora benida a essi, a su mancu innoi in Sardìnia, sa faina de importu prus mannu po cumprendi cumenti girat su mundu, ddi naru diaici isperendi chi si potzat cumprendi su chi megu a si narai). 
Immoi chi seus totus civilizaus (po manigiai unu fueddu chi apu agatau pròpriu immubagora in su fueddariu), si parit fintzas lègiu, ddi naru diaici, su de abarrai a crei a custas cosas chi, immoi, pigaus a trassa de tontesa, de machimini; immoi chi su prus de sa genti tenit sa possibbilidadi de andai a scola, e tenit sa possibbilidadi de studiai is scientzias, tra is atras cosas, intzandus benit a essi una cosa giai giai mesu aforas de conca, chi calincunu abarrat apicau a is ingestus chi, mancai, si fadiant me is tempus passaus po ndi cassai, mancai, sa bona sorti, o ballit aguali, e si cumprendit, is ingestus chi si faint po s'iscabulli de sa maba sorti. 
Ma, mancai feti a fueddus, immoi seus totus civilizaus, e mancai no nci siant prus personas chi creint, po diaderus, a sa maxia, su logu (e megu a chistionai, pruschetotu, de su mundu de sa bòcia e, po su chi si pertocat de acanta, de su mundu de sa bòcia de is diletantis sardus) est prenu fintzas a cucuru de personas chi sighint a si cumportai cumenti chi credessint ancora a is atus de sa maxia, mancai siat giai giai una bregùngia, in custus tempus, feti puru su de ddu narai a boxi arta. E duncas, de una parti no credeus prus a custas cosas, ma de s'atra parti, peròu, sigheus a si cumportai cumenti chi custas cosas (megu a chistionai, sèmpiri e ancora, de cussus tialu de ritus chi fadeus po circai de ndi guadangiai calincuna cosa po su chi pertocat sa bona sorti) fessint beras, cumenti si iat a podi narai. 

E duncas, po torrai a nosu (e fiat ora puru, s'at a megai calincunu de bosatrus) su mundu de is allenadoris, po nd'arremonai feti una genia (ma sa pròpriu chistioni si iat a podi fai po totus is giogadoris puru, e po cussus giòvunus ma puru po cussus prus matucheddus, po no chistionai, poi, de totus is tifosus) est prenu fintzas a cucuru de genti chi, mancai, (e no nc'eis a crei mai), in su duamilla e binticuatru, arribbat a crei ca su de chistionai cun unu giornalista po ndi pesai impari un'intervista (chi a sa fini est pròpriu unu de is trabballus de importu prus mannu chi fatzu cun e po is amigus de su Diàriu Sportivu), mancai feti su de ciaciarrai a su telèfunu po una parighedda de minudus, est una cosa chi portat sa maba sorti. 

E duncas, no nc'eis a crei, nci funt allenadoris chi, candu ddus circu po sciri chi tenint sa gana, e mescamente su tempus, po chistionai unu pagheddeddu de bòcias impari a mei, a bortas nemmancu t'arrespuntint (eia, a trassa de burricus etotu) poita, est cussu chi mi scoviant issus etotu, tenint sa paura, cumenti si iat a podi narai, e duncas timint, e meda puru (ca giai giai trigas a ddu crei...) ca s'intervista potzat portai mabi a sa scuadra (e a issus etotu); e duncas, preferrint a abarrai citius. E duncas, benit a essi una cosa istramba meda, su de pentzai ancora (diaici mi parit de podi narai, a su mancu) ca una ciaciarrada cun unu giornalista ti potzat fai perdi totus is partidas chi tui as a depi giogai apustis, ma eia, est su chi sucedit, ancora, in dì de oi, e su chi m'est sucèdiu, no nc'eis a crei, custa cida puru, candu su diretori cosa mia m'at domandau su prexei de intendi, a su telefunu, est craru, calincunu giogadori de is de su Bonorva po ndi pesai una ciaciarradedda de una pariga de minudus; e diaici apu fatu duncas; no nc'eis a crei, ma me is manus mi seu agatau su numeru de su telefunu de unu piciocu giòvunu, ma giai forti meda, cumenti est Oscar Kevin Foddai, chi est unu de is atacantis chi est fadendu a biri is ispantus prus mannus in sa Lista B chi pertocat su campionau de sa Promotzioni. Ma candu m'at arrespustu a su tialu de su telefunu, no nc'eis a crei (deu puru giai giai no nci credia, mancai no fessit de seguru sa primu borta chi mi sucedit una cosa diaici, est craru) ma Foddai m'at narau ca no si dda intendiat de chistionai de cumenti ddi funt andendi is cosas, po su chi pertocat, est craru, is partidas chi est gioghendi cun sa camisedda de is de su Bonorva in pitzus, poita timiàt, est su chi m'at narau issu etotu, ca is cosas ddi podessint andai mabi, diaici, de una dì a s'atra, fadendi su contu (custu m'at contau), ca una pariga de annus fait ddi fiat capitau, ddi fiat sucèdiu de chistionai cun unu giornalista e apustis fudi cumenti chi ddu essint pigau de ogu (cumenti si narat in Sardìnnia candu calincunu, mancai, t'apicigat sa maba sorti in pitzus, feti cun una castiada trota, chi cumprendeis su chi seu circhendi de si narai), est a nai ca est passau de si bivi un'annada toga meda, prena fintzas a cucuru de prexus e de satisfatzionis, a si bivi un annada lègia meda, ca, de su chi m'at contau, a su mancu, apustis de cussa ciaciarrada (chi ancora s'arregodat, po cumprendi cantu ddi est costada cara, cumenti si iat a podi narai, sighendumì seis, berus est?) si fiat giai giai mesu strupiau puru. 
E duncas, po custa cida, a su mancu po immoi, Foddai at prefèrriu a abarrai citiu, est a nai chentza de m'arregalai nemmancu mesu fueddu. E deu ddu cumprendu beni, po caridadi; e su piciocu s'est acutu a mi narai ca cumprendiat puru ca po nosu giornalistas su de ndi pesai custas ciaciarradas benit a essi su trabballu cosa nosta (e nosu, duncas, e in sa truma mi nci ghetu deu puru, ndi pesaus is intervistas po trabballai, e no de seguru, po pigai de ogu sa genti, o po ddis augurai su mabi), ma no si dda intendiat, pròpriu po una chistioni de majinzus, de iscaramantzia, de chistionai cun mei. 
Su piciocu, tocat a narai custu puru, est stètiu educau meda: est fintzas arribbau a mi narai ca podiat fai s'intervistas feti chi serbiat a dda fai po s'ammarolla , ma deu ddi apu potziu feti arrespundi (e cun custu serru sa chistioni po diaderus) ca in bixinau cosa mia si narat ca "feti s'impicu est po s'ammarolla, est a nai ca feti su de benni acapiau a su tzugu ddu depis fai po s'ammarolla"; po totu su restu de is cosas (e sa cosa ballit, puru, e mi parit craru, po is intervistas apustis de is partidas chi is giogadoris diletantis sardus giogant su fini de cida), invècias, unu podit sèmpiri scerai de ddu fai, o de no ddu fai. E custa possibbilidadi chi teneus, (su de fai o de no fai una cosa, si cumprendit, berus est?) est una de is fortunas, de is abbilidadis prus mannas chi pertocant s'omini, una de is abbilidadis prus mannas chi funt tocadas a s'omini, po cuncodrai sa chistioni cun unu stiddiu de filosofia puru, ca ddu scieis, de su restu, ca mi praxit a nci dda aciungi (e megu a chistionai de sa filosofia, si cumprendit, berus est?), mancai, me is legas acapiadas a su mundu de su càlciu de is diletantis sardus. 

E duncas, totu custu trumentu, totu custa biga de fueddus, po si narai ca, eia, mi fait prexei meda, duncas, candu calincunu tenit sa gana (sa gana bella, si iat a podi narai diaici puru, cumenti apu sèmpiri intèndiu narai in bidda mia, a su mancu) de ciaciarrai cun mei de partidas, e de resultaus de bòcias. E duncas, depu torrai gràtzias a Gian Mario Rassu ca at decìdiu de m'agiudai a ndi pesai s'intervista e, immoi chi nci seu, immoi chi ddus apu arremonaus, depu torrai gràtzias puru a Pablo Gutierrez (chi est unu giogadori chi nd'aproillat de s'Argentina e chi est tra is prus fortis chi ddoi funt in dì de oi in Sardìnnia), chi cust'annu giogat pròpriu impari a is de su Bonorva, e chi est unu de is giogadoris cun s'esperièntzia prus manna, no feti po su chi pertocat sa scuadra cosa sua, ma fadendi su contu de totus is giogadoris chi ndi cabant in campu in dì de oi, fadendi su contu ca Gutierrez est nàsciu in su milli e noicentus otantaduus (e duncas nci podeis arribbai a solus a fai su contu de cantus annus tenit), e issu etotu, arriendusindi, m'at narau ca est bèciu, e no si podit prus permiti, a s'edadi sua, de ponni a menti sa iscaramanzia. E duncas, una de is intervistas (in italianu) chi nd'apu pesau custa cida, dda apu fata cun issu.

E duncas, torraus a su chi m'at scoviau Gian Mario Rassu apitzus de sa stagioni toga meda chi est arrannescendi a ndi pesai impari a is de su Thiesi, una scuadra chi currit in sa Lista C de su campionau de sa Primu Categoria. E duncas, apu intèndiu a Gian Mario Rassu a su telefunu pròpriu apustis de sa partida chi is birdis – nieddus (ddus tzerriaus diaici, est craru, po arremonai is caboris de is camiseddas chi manigiant po is partidas, pruschetotu po is partidas chi giogant in domu cosa insoru) iant bintu contras a is de sa Fanum Orosei. 
E sa cida avatu is de su Thiesi si dda funt depia biri (cumenti si iat a podi narai, e cumenti de su restu seu narendi) contras a is de su Patada; e no nc'eis a crei, ma una de is primus cosas chi andu a castiai, candu ndi bessint is resultaus de is partidas, est chi is allenadoris chi apu intèndiu aintru de sa cida, funt arrannèscius a ndi cassai sa bìncida de sa partida e duncas is tres puntus; e po s'otanta – noranta po centus, podeus narai ca, eia, a fai is intervistas (diaici serraus sa chistioni) cun su Diàriu Sportivu, portat beni meda. 
A su mancu, is de su Thiesi, po arremonai issus, immoi chi ddus tèngiu in conca, funt arrannèscius a binci, cun su resultau de tres a duus, in sa partida chi ant giogau, apustis de sa ciaciarrada mia cun Rassu, contras a is de su Patada etotu. E deu, duncas, no potzu fai atru ca torrai gràtzias a totus is allenadoris e a totus is giogadoris chi si donant una manu de agiudu, manna meda (chentza de issus su trabballu cosa nosta, est craru, no iat a podi nemmancu esistiri) po ndi pesai is artìculus chi di bessint dònnia dònnia dònnia dì de sa cida, de su mesi e de s'annu (chentza giai giai de ndi sartai nemmancu unu), in su giassu de is amigus de su DiàriuSportivu. 

Ma torraus a Rassu, e duncas a is chistionis chi pertocant is de su Thiesi. In dì de oi, est a nai candu seus arribbaus a sa de undixi giorronadas, is nieddus-birdis tenint allogaus in buciaca calincuna cosa cumenti a bintises puntus, est a nai duus in prus de sa scuadra chi tenint a is pabas, e seus chistionendi de is de sa Corrasi de Uliana, e unu feti in mancu de is chi tenint is de s'Ozierese, chi funt is primus de sa lista, cun bintiseti puntus allogaus in buciaca. 

Est a nai, duncas, e a fai is contus nci poneus pagu meda, ca is de su Thiesi, apustis chi apu intèndiu s'allenadori cosa sua, funt stètius bonus a binci contras a is de su Patada, cumenti s'apu giai arremonau, apustis nd'ant cassau unu puntixeddu de oru (si iat a podi tzerriai diaici) in sa partida chi ant dèpiu giogai in domu de is de sa Corrasi de Uliana etotu, e apustis, ant bintu, pròpriu custu fini de cida passau, est a nai s'otu de su mesi de Idas, in domu cosa insoru etotu, contras a is de su Santa Justa, cun su resultau de unu a zeru. 

«Candus t'agatas me is primus postus de sa lista, cumenti est sucedendi a nosu, de su restu, depis fai su contu ca is aversàrius cosa tua nd'ant a cabai in campu cun su corteddu tra is dentis, cumenti si podit narai e de su restu si narat; depis fai su contu ca is aversàrius cosa tua iant a podi essi prontus a giogai fintzas a sa morti, cumenti si narat candu calincunu nci fuiat, nci ponit in campu totu sa fortza chi tenit in conca, in su coru, me is cambas. Is scuadras prus fortis in sa lista – at sighiu a mi contai Rassu – funt benendi a pillu, cumenti si iat a podi narai, ma podeus narai, puru, ca nesciunu, a su mancu in custa lista, est a nai, duncas, in sa Lista C de su campionau de sa Primu Categoria, t'arregalat nemmancu mesu puntixeddu, cumenti si iat a podi narai. Est a nai, duncas, ca dònnia dominigu depis sudai sa camisedda cosa tua, sèmpiri chi ndi bolis cassai sa bìncida de sa partida. E sa chistioni ballit, puru e pruschetotu, po is partidas chi depis giogai contras a totus is scuadras chi s'agatant me is partis prus bascias de sa lista, e chi funt currendi, est craru, po ndi cassai sa sarvesa, est a narai, duncas, po tenni sa possibbilidadi de giogai in su campionau de sa Primu Categoria puru in  sa stagioni chi at a benni (e seus chistionendi, est craru, de cussa de su duamilla e binticincu – duamilla e bintises, chi su Cielu m'at a donai sa possibbilidadi, e su prexu, de abarrai in custu mundu po s'annu chi at a benni puru ndr). Candu t'agatas a cumbati, ddi nau diaici, contras a custas scuadras, benit a essi una cosa bastanti normali su de depi fai unu pagheddeddu de trumentus, ddi naru diaici, po arrannesci a ndi cassai is tres puntus; nc'est de fadiai, duncas, dònnia dònnia domìnigu. Pròpriu po custu abarru cunvintu de su fatu – at sighiu a mi contai Rassu – ca una scuadra depit essi forti siat po su chi pertocat is cambas, e duncas su corpus, ma puru po su chi pertocat sa conca, e duncas, sa gana, sa mentalidadi ca ti portas avatu, ddi nau diaici, candu ndi cabas in campu po giogai is partidas. Feti diaici, duncas, feti candu sa conca e su corpus staint beni, podis isperai de arrespundi a is cropus chi ti scudint is aversàrius. Sa cosa prus de importu po su chi pertocat su Thiesi – at aciuntu Rassu - , est ca sa scuadra cosa mia immoi est currendi a lestru meda, mancai me is primus bessidas is cosas no siant andadas cumenti podestus bisai».

Ma sa cosa de importu, in su giogu de sa bòcia ma in sa vida puru, est pròpriu cussu de circai, e de arrannesci, a si ndi strantaxai, mancai acoitu, apustis chi nd'arrueus a terra. E mi praxit de amachiai, candu una cosa chi ndi bogaus aforas, mancai, in s'interis chi ciaciarraus apitzus de giogus e de partidas, de gol e de resultaus, si donat una bidea bona po circai de cumprendi cumenti andant is cosas me in sa vida cosa nosta de dònnia dì. E sa cosa prus toga est candu sa chi podeus tzerriai (sèmpiri chi mi ddu permiteis) "filosofia de su giogu de sa bòcia" torrat paris, ddi nau diaici, cun sa filosofia chi sigheus (chi estus a depi sighiri, a su mancu) po si bivi in gràtzias de Deus sa vida cosa nosta. E duncas, in sa vida cosa nosta, is trumentus no ammancant mai, est craru, e pròpriu po custu estus a depi fai de totu, totu su possibbili, est craru, po circai de si fai agatai prontus, e fortis, po si ndi scabulli de is dannus.




Attività realizzata col contributo della Regione Sardegna - IMPRENTAS 2023-2024. LR 22/2018, art. 22